Oityi tyesukisa opo unoñgonoke Ombimbiliya?

Ekumbululo lyo Mbimbiliya

Ombimbiliya yatyo mwene ilekesa etyi tyesukisa opo twinoñgonoke nawa. Tyilinge walongeswa unene ine haunene, Ombimbiliya ‘kaipuiya okuinoñgonoka, tupu kaikahi kokule’. — Deuteronômio 30:11.

Oityi wesukisa okulinga

1. Kala nolusoko lwaviuka. Tavela okuti Ombimbiliya Ondaka ya Huku. Liola omutima, Huku uyele vana velipakako. (1 Ova Tesalonika 2:13; Tiaku 4:6) Mahi wahalinge vala ngomumphonhi. Huku uhanda ove uundapese nawa omalusoko ove “okusoka otyiwa notyivi”. — Ova Loma 12:1, 2.

2. Likwambela okuita ounongo. Ombimbilya yatyi: “Wahasoke vala mounongo wove mwene.” (Provérbios 3:5, Bíblia na Linguagem de Hoje) Ngotyo, ‘Twalako okuita’ ku Huku ounongo opo unoñgonoke Ombimbiliya. — Tiaku 1:5.

3. Itanga apeho. Monoñgonoka vali unene Ombimbiliya ankho ulilongesa-yo apeho, ohalingi vala pamwe-pamwe. — Josué 1:8.

4. Lilongesa etyi uhanda okunoñgonoka, tyike-tyike. Onkhalelo oyo yokulilongesa, okutala kwetyi Ombimbiliya ipopia, okusoka kotyipuka tyike ngatyo wovola, tyikwatekosako unene okunoñgonoka etyi Ombimbiliya ilongesa. Lilongesa “ovipuka viotete”, konyima pahe oende “kondongeso yovakulu”, ine ovipuka viokwaya vali kohi. (Ova Hebeleu 6:1, 2, BLH) Eleka onotesitu mbo Mbimbiliya nononkhwavo, motyimona okuti Ombimbiliya etyi ipopia tyelikwata nononthele ononkhwavo, aloo umwe mbuna “mbepwiya okunoñgonoka”. — 2 Petulu 3:16.

5. Ovola okukwateswako. Ombimbiliya itulunda opo tutavele okukwateswako na vana veii nawa. (Ovilinga 8:30, 31) Onombangi mba Siovaa valongesa ovanthu Ombimbiliya otyali. Ngetyi ankho tyilinga ovakilisitau votete, vaundapesa ononthele ononkhwavo mbo Mbimbiliya opo vakwateseko vakwavo okunoñgonoka etyi Ombimbiliya tyili-tyili ilongesa. — Ovilinga 17:2, 3.

Oityi wehesukisile

1. Okulongeswa unene omosikoala. Ono apostolu 12 mba Sesesi ankho vanoñgonoka nawa Ovihonekwa nokuvilongesa vakwavo, namphila ankho vatalwa okuti ovanthu “vala vahalongesilwe unene”. — Ovilinga 4:13, BLH.

2. Onombongo. Ove kwesukisile okufeta natyike opo ulongeswe Ombimbiliya. Sesusi wapopila ovalongwa vae okuti: “Muetyipewa otyali, no onwe tyiavei otyali.” — Mateusi 10:8.