OVAKWENDYE VAPULA
Oityi Ndyina Okulinga Ndyivase Ovanthu Vena Ovituwa Oviwa Ndyihanda Okuhetekela?
“Tyina kosikola namakala notyitateka, tyihole okunkhwatesako okusoka komunthu ndyihole ukahi nawa, nae wali-ale notyitateka ngo tyange. Pahe andyihetekela okulinga etyi alinga. Okumona ou tuhetekela opo tyipepuka okukoleleya, tyina ovipuka viamaleme.” — Haley
Okukala omunthu ukahi nawa matyikukwatesako okulityilika ovitateka, otyivili okulinga evi wapanga. Etyi una okulinga okukoya ovanthu vena ovituwa uhanda okuhetekela.
Omokonda yatyi otyiwa okukoya umwe nawa?
Omokonda ovanthu mokoyo okuhetekela mavekuhongiliya movipuka ulinga.
Ombimbiliya itwavela ondundo tuhetekele vana vena ovituwa oviwa. Yati: “Oku tupu tyina mutala ouwa utuka ku evi valinga, hetekelei eyumba-nthumbi liavo.” — Ova Hembeleu 13:7.
Etyi una okulinga: Mokonda ovanthu tukoya okuhetekela vapondola okututwala kokulinga etyi tyaviuka aa kokulinga etyi tyapenga, koya umwe omunthu una ovituwa oviwa, wahaye kwou ovaunyingi venda, aa hamwe weeti liove.
“Nelilongesila-ko unene kokulinga etyi Adam nae ankho linga — Nelilongesila unene kweetyi ekahi, nokovituwa viae. Soka Nkhele ndyihinangela umwe nawa ovipuka vimwe alingile neevi apopile. Otyipuka ankhwatesako nae vala ketyisoko, wankhwatesako umwe unene.” — Colin
Ovanthu mokoyo okuhetekela mavahongiliya evi usoka nevi ulinga.
Ombimbiliya yati: “Mwahayondywei. Omapanga omavi anyona ovituwa oviwa.” — 1 Ova Kolindu 15:33.
Etyi una okulinga: Koya omunthu mokonda yovituwa viae oviwa, wehemukoye mokonda yolupe lwae, opo haa tyihekunumanese.
“Ove upondola okulitehelela omapita ine uhimbika okulieleka nava vena-tyo. Otyo tyipondola okukulingisisa okulitomba.” — Tamara
Soka kweetyi: Oityi tyipondola okutuka-ko ine tuhetekela vokwankhimana, novanthu vokulityutya okuhateka?
Ovanthu wahanda okuhetekela vapondola avekutyopola vala, okuti hatyo vapondola okukukwatesako okuvasa evi wahanda okulinga.
Ombimbiliya yati: “Okweenda novana-ndunge noove ukala omuna-ndunge.” — Omihe 13:20.
Etyi una okulinga: Hetekela ovanthu vena ovituwa noove wahanda okukala navio. Opo motyivili okulinga ovipuka vikahi nawa mavikukwatesako okuvasa etyi wapanga.
“Hahe okwahasimo oti umwe ndyihanda okukala omunthu uyumbwa onthumbi nga Jane, tyipona okupopia vala okuti ndyihanda okuyumbwa onthumbi. Jane apeho kasete, otyilinga amapewa utyilinga umwe.” — Miriam
Mokuvitula: Tyina omunthu uhanda okuhetekela oyou una ovituwa oviwa, opo noove motyivili haa okukala umunthu ukahi nawa.
Tyina uhetekela omunthu una ovituwa oviwa opo tyipepuka okuvasa evi wapanga!
Oñgeni mokoyo ovanthu vena ovituwa uhanda okuhetekela?
Opo utyivile upondola okulinga ovipuka evi vivali:
Tala otyituwa ove wahanda okukala natyo, pahe oovola omunthu ukahi nawa, uhole, una otyituwa otyo ove wahanda okukala natyo.
Soka omunthu ukahi nawa, uhole, otale otyituwa tyimwe ena-tyo, noove uhanda okukala natyo.
Ovipuka viapopiwa monthele omu vipondola okukukwatesako okutyilinga.
Upondola okuhetekela:
Ovakwandye. “Ame ndyihanda okukala ngeetyi tyikahi epanga liange enene. Hapala-le atie tyina tukahi nokupopia anthyi-po akaya vali komukwavo. Ngwe omona vali kwaame, mahi ngwe una vali ovituwa vikahi nawa tyipona ame, otyo tyinthwala kokumuhetekela.” — Miriam
Ovakulu. Tyipondola ovava mufenda navo Huku, aa ovo tate yove. “Ame hisimo-ale vali, ame ndyihetekala etyi ovo tate valinga. Vena ovituwa oviwa. Vapengesa umwe, mahi tupu ndyimona okuti namphila vapengesa, vana kavayeke-po Huku. Tyina namekulu ndyihanda ovanthu naame vamphopie nawa ngootyo.” — Annette
Ava vapopiwa m’Ombimbiliya. “Ndyihole okuhetekela ovanthu ovanyingi vapopiwa m’Ombimbiliya — Timotiu, Luti, Sombe, Petulu, no kamukainthu komo Isilayeli — kese umwe ndyina etyi ndyimuhetekelela. Tyina namelilongesa unene ovanthu vapopiwa m’Ombimbiliya, opo tupu ndyivenoñgonoka vali nawa. Ndyityihole unene tyokutanga omahipululo apopiwa momukanda Hetekela Ekolelo Liavo, na eli momukanda Jovens Perguntam — Respostas Práticas pokwati: ‘Exemplo a Seguir.’ — Melinda
Etyi una okulinga: Wahahambukilwe vala okuhetekela omunthu wike. Omutumwa Paulu wapopilile ovakwa-Kilisitu okuti: “Ikei omaiho enyi mwaava veli nokweendela omu noonthwe twalingailile ovipuka etyi tuna onwe.” — Ova Filipu 3:17.
Okuti ankho utyii-ale? Vakwenyi navo vapondola okukuhetekela! Ombimbiliya yati: “Vatalele kwoove, evi upopia, evi ulinga, onthyole yove, eyumba-nthumbi liove, no mounthate wo monondunge.” — 1 Timotiu 4:12.
“Upondola okulikwatesila ukale omunthu ukahi nawa, oku nkhele tupu otyo ukwatesako vakwenyi navo vakale ovanthu vekahi nawa. Ove kutyii, pamwe pena umwe omunthu ukahi nokukutala nawa, evi upopia vipondola umwe okutwala ava vekutala, kokukala ovanthu vekahi nawa.” — Kiana