Ondywo yo Mbambele

Konyima Yombila Onene, ovana va Nowee avakala novana ovanyingi. Ovanthu avakala ovanyingi, aveliyandyana kombanda yohi, ngeetyi Siovaa evepopilile.

Mahi onombunga mbumwe kambetavelele ku Siovaa. Vapopile okuti: ‘Tutungei epunda-umbo atukala vala kumwe. Tulingei ondywo imwe yaya unene peulu, opo tukale nomunkhima.’

Siovaa ehetyihande etyi ovanthu ovo ankho vekahi nokulinga, atalameka ovilinga viavo. Utyii oityi alingile? Wevelingisisile okupopia omalaka elikalaila. Aveheliivi vali kese umwe na mukwavo, ovilinga viavo avitalama. Epunda-umbo ankho vekahi nokutunga alilukwa okuti o Mbambele, tyihangununa okuti “Onondyaya.” Pahe ovanthu avahimbika okwilukila kovilongo ovikwavo. Mahi vatwaileko okulinga ovipuka ovivi kovilongo oku vakakala. Okuti ankho kuna omunthu uhole Siovaa? Matutyitale melongeso malilandula-ko.