Lipamekei na Vakwenyi Momaliongiyo

1. Oityi twaavela omakumbululo momaliongiyo?

OITYI twiila komaliongiyo? Haunene umwe tyitutwala komaliongiyo, okukahilivika Siovaa. (Sal. 26:12; 111:1) Tupu twenda komaliongiyo tukelipameke na vakwetu mononthiki mbuno mbokwepwiya. (1 Tes. 5:11) Tyina tuyelula okuvoko twaave ekumbululo, twati umwe onthwe twahanda okuhilivika Siovaa, onthwe tupu twahanda okupameka vakwetu.

2. Onalupi tupondola okwaava omakumbululo momaliongiyo etu?

² Onosimanu mbatyo ambuho tuna onomphitilo ononyingi mbokwaava omakumbululo momaliongiyo etu. Meliongiyo lyo konthyulilo yosimanu, tupondola okwaava omakumbululo tyina tulilongesa Omutala Womulavi. Meliongiyo liomokati kosimanu, tupondola okwaava omakumbululo monthele yokwati Olumono lwa Huku, Nomelilongeso Li’ombimbiliya Mewaneno, no mononthele ononkhwavo vali.

3. Oityi tyipondola okututyika twahaave omakumbululo? Oñgeni Ova Hebeleu 10:24, 25 ipondola okutukwatesako?

³ Onthwe atuho twahanda okuhilivika Siovaa, nokupameka vakwetu tufenda navo. Mahi tyipondola okutupwiya okukumbulula momaliongiyo mokonda, tyina pamwe usoka vala okukumbulula omutima uveta unene, okuti hatyo, pamwe uyela umwe okuvoko wahanda okukumbulula mahi otyo wahalekesiwa. Oityi matyitukwatesako ine tuna tyimwe povipuka ovio? Ekumbululo tulivasa monondaka omu apositolu Paulu apopile momukanda atumine ova Hembeleu. Pokwapopia oityi tyesukisila unene okuliongiya watile, etyi tuna okusuka natyo ‘okulipameka’ na vakwetu. (Tanga Ova Hebeleu 10:24, 25.) Omutima upondola umwe okutula awahavete unene tyina tuhinangela okuti okuyela okuvoko pala okwaava ekumbululo atupopi vala onondaka mbehehi, tyipameka umwe vakwetu meliongiyo. Tupu ine onthwe katwalekehilwe, matyituhambukiswa okusoka okuti tyina onthwe twahalekehilwe tyapa vakwetu omphitilo yokwaava ekumbululo. — 1 Pet. 3:8.

4. Ovipuka patyi vitatu matupopi monthele ei?

⁴ Monthele ei, tete matupopi oityi tuna okulinga tupameke vakwetu momawaneno mwehena ovanthu ovanyingi vaava omakumbululo. Pahe haa atupopi etyi tuna okulinga tupameke vakwetu momawaneno muna ovanthu ovanyingi vayela omavoko vahanda okwaava omakumbululo. Pokuvitula pahe atupopi etyi tuna okulinga, opo etyi tukumbulula momaliongiyo tyipameke umwe vakwetu.

LIPAMEKEI NA VAKWENYI MEWANENO MWEHENA OVANTHU OVANYINGI

5. Oityi tuna okulinga tupameke vakwetu tyina tuli meliongiyo mwehena ovanthu ovanyingi?

⁵ Momawaneno mwehena ovanthu ovanyingi, no monongulupu, pamwe mutupu ovanthu ovanyingi vaava omakumbululo. Pahe pamwe ou wokuli nokulinga onthele ina omapulo, uti umwe apulu nkhele akevelela. Momaliongiyo atyo ngoo pamwe upondola umwe okutala oti pahe ngoti tyalema vala, kamuli-ale nokulipameka. Oityi ove una okulinga? Tyina wokulinga onthele amapulu, yela okuvoko. Ine otyo ulinga otyo, na vakwenyi mavatalela kwoove navo pahe avahande okuyela omavoko.

6-7. Oityi tuna okulinga opo tyehetulingise unene otyiho tyokwaava omakumbululo momaliongiyo?

⁶ Molingi ñgeni ine uti tyina wamasoko kokwaava omakumbululo momaliongiyo utehela omutima uveta unene? Ovanyingi-ale vekahi ngootyo. Mahi opo upameke vakwenyi mewaneno, hahahe usoke kovipuka ovikwavo upondola okulinga tyehekulingise otyiho tyokwaava omakumbululo? Oityi pahe una okulinga?

⁷ Tyimwe upondola okulinga matyikukwatesako, okutala etyi tyapopia Omutala Womulavib womanima okwalamba. Otyikwavo tupu tyipondola okukukwatesako, okulifwiika nawa. (Pro. 21:5) Tyina unoñgonoka nawa etyi mamukelilongesa, matyikekupepukila vali okwaava omakumbululo. Pokukumbulula tupu wahapopie onondaka ononyingi. (Pro. 15:23; 17:27) Okupopia vala onondaka mbehehi tyipondola umwe okukutulisa omutima awahavete unene. Okupopia onondaka mbehehi, natyo tyipepukila-le vali ava veli nokutehelela avanoñgonoka nawa etyi wapopia, tyipona okupopia ehimbwe opopi vala ovipuka ovinyingi. Okupopia onondaka mbehehi mahi opopi umwe monondaka mbove, matyimoneka okuti welifwiika umwe nawa, tupu wanoñgonoka umwe nawa onthele muli nokulilongesa.

8. Oñgeni Siovaa akala tyina atala ononkhono tulinga?

⁸ Pahe molingi ñgeni ine wahetekela ovipuka ovio twapopia no ngootyo otyo vala tyikulingisa otyiho tyokwaava omakumbululo? Wahalimbwe-ko okuti Siovaa mahambukwa unene tyina atala ononkhono uli nokulinga. (Luka 21:1-4) Siovaa ketwiiti-ale tulinge etyi twehevili. (Fili. 4:5) Soka umwe nawa etyi upondola okulinga, pahe olingi omphango yokutyilinga. Mahi tupu likwambela opo omutima utule. Pokuhimbika linga omphango yokupopia vala onondaka mbehehi.

LIPAMEKEI NA VAKWENYI MEWANENO MUNA OVANTHU OVANYINGI

9. Oityi pamwe tyipwiyila okwaava omakumbululo mewaneno muna ovaivisi ovanyingi?

⁹ Ine mewaneno muli muna ovaivisi ovanyingi, natyo ñgoo tyipondola okukupwiya okwaava omakumbululo. Pamwe mokonda ovanyingi vayela omavoko vahanda okwaava omakumbululo, ove pahe otyo ulambwa-lambwa vala wahalekeswa. Omuhikwena umwe utiwa o Maliya utyihole unene tyokwaava omakumbululo momaliongiyo.c Wati, utyitala ngatyina uti omphitilo ena-yo yokufenda Siovaa, nokupameka vakwavo, nokupameka onthumbi yae motyili tyili m’Ombimbiliya. Mahi etyi ailuka mewaneno ankho eli pahe aende mewaneno ekwavo muna ovaivisi ovanyingi, pahe ankho ulekaiswa vala pamwe, pamwe eliongiyo liatyo atee lipwa umwe ahalekeswa. Wati: “Otyipuka otyo ankho tyinthokotesa vala omutima. Ankho ndyilitehela ngatyina uti ndyina otyilinga napolwa. Tyina vamati umwe avetyilingi avetyipaleka, pahe ankho ndyiti vala hamwe valingila wina.”

10. Oityi tupondola okulinga matyitukwatesako umwe atukumbulula momaliongiyo?

¹⁰ Okuti noove uhole okukala nga Maliya? Ine otyo uhole okukala otyo, upondola osoyo oti, momaliongiyo pahe ndyihule vala kokutehelela, nahaave vali omakumbululo. Mahi wahayeke-ko. Oityi una okulinga matyikukwatesako? Tyimwe upondola okulinga okufwiika omakumbululo omanyingi. Ine pu limwe kwalekehilwe, apa eliongiyo liakapwila tyipondola una umwe apa molekehiwa oave ekumbululo. Tyina uli nokulilongehila keumbo Omutala Womulavi, otyo usoka oñgeni onopalangalafu mbelikwata umwe nawa neetyi tyapopia osapi yatyo yonthele. Ine otyo ulinga otyo, matyikukwatesako omono etyi mokapopia tyina haa mukelilongesa-o mewaneno. Otyipuka otyikwavo upondola okulinga, okulifwiika ukaave ekumbululo ponopalangalafu mbokwalema umwe mbupopia otyili tyaya kohi ty‘Ombimbiliya. (1 Kol. 2:10) Omokonda yatyi? Omokonda yeetyi ponopalangalafu mbatyo ombo kavehi pamwe vembunoñgonoka nawa vetyivila okwaava omakumbululo. Pahe molingi ñgeni ine wahetekela ovipuka ovio mahi otyo momaliongiyo amwe uyela vala okuvoko otyo wahalekeswa-le? Opo pahe upondola okukapopia nou maendesa onthele yatyo tyina eliongiyo liehenehimbike omutolela epulo wahanda okukumbulula.

11. Oityi Ova Filipu 2:4 utupopila tuna okulinga?

¹¹ Tanga Ova Filipu 2:4. Omu apositolu Paulu wafiminwa na Huku ape ondundo ovalanduli va Kilisitu okuti vena okusuka neevi vakwavo vesuka-vo navio. Oñgeni matutyilingi otyo momaliongiyo? O putyina tuhinangela okuti, vakwetu navo o ngoonthwe-vo vala, navo vahanda okwaava omakumbululo.

12. Otyipuka patyi otyiwa tuna okulinga matyipameka vakwetu momaliongiyo? (Tala olutalatu.)

¹² Nkhele soka vala, ine muli nokutomphola nomapanga ove, mwene ove vala upopia otyo vakwenyi vahapopi-ale? Au, noove wahanda umwe tyitie ou apopi-po ou apopi-po. No momaliongiyo haityo ñgoo, onthwe twahanda na vakwetu vaave omakumbululo. Ngwe tyili, otyipuka tyikahi vali nawa tuna okulinga tulipameke na vakwetu, okuyeka-vo navo vapopie momaliongiyo etyi velilongesa Mondaka ya Huku. (1 Kol. 10:24) Pahe matutale oñgeni tupondola okutyilinga otyo.

13. Oityi tuna okulinga, na vakwetu meliongiyo vapopie-mo-vo?

¹³ Tyimwe tuna okulinga, okwahapopi unene tyina twaava omakumbululo opo na vakwetu vapopie-po-vo. Haunene vena umwe okutyilinga otyo na vakwavo vatalele-ko, ovakulu vewaneno, novaivisi ovakwavo vetyityiliya-le tyokwaava omakumbululo. Na tyina tupu wapopia onondaka mbehehi, wahatie okakwata pweetyi okakwata pweetyi. Ine upopia atyiho tyapopiwa mopalangalafu, momanena-po vakwenyi vetupu vali etyi mavapopi. Ine utala vala mopalangalafu omu, mwapopiwa ovipuka vivali, tyimwe, okwahapopi unene, otyikwavo, okwahakwate ovipuka ovinyingi. Pahe mopalangalafu omu ine ove walekeswa tete, hahahe upopie-po vala tyike, otyikwavo otyisila-po vakwenyi?

14. Oityi matyitukwatesako tusoke tuñgapi matuyelula okuvoko? (Tala olutalatu.)

¹⁴ Tupu otyiwa okusoka umwe nawa tuñgapi moyelula okuvoko. Ine uyelula vala apeho okuvoko, matyilingisisa wokuli nokweendesa onthele yatyo, atyimulingi vala navi okwehekulekesa, na vakwenyi kamatyivepe-vo omphitilo yokwaava omakumbululo. Otyo tyipondola okuveponeswa avahayelula vali omavoko. — Ecl. 3:7.

15. (a) Oñgeni tuna okukala tyina twamayelula okuvoko atwahakoywa? (b) Oñgeni vokulinga ononthele mavalekesa okuti vahanda aveho meliongiyo vapopie-mo? (Tala okakasa kati: “Tyina Ulinga Onthele Ina Omapulo.”)

¹⁵ Tyina meliongiyo muna ovanthu ovanyingi vayelula omavoko vahanda okwaava omakumbululo, pamwe onthwe kamatukoywa ponopalangalafu ambuho twahanda okupopia. Wokuli nokulinga onthele, kametyivili okutukoya vala apeho nga twayelula okuvoko. Otyo tyipondola okutusoyesa. Mahi tyina twamayelula okuvoko atwahakoywa, twahanumanei. — Ecl. 7:9.

16. Oityi tuna okulinga tupameke vakwetu vaava omakumbululo?

¹⁶ Ine katyetavelele waave omakumbululo ponopalangalafu ambuho ankho wahanda okupopia, okuti opo hahahe utehelele nawa ku vakwenyi veli nokupopia, haa pahe ovepandula tyina eliongiyo liamapu? Vakwenyi mewaneno, okukwiiva uli nokuvepandula matyivepameka umwe vala ngeetyi ankho ñgeno tyevepameka okukwiiva uli nokwaava ekumbululo. (Pro. 10:21) Okupandula vakwetu, otyimwe povipuka tuna okulinga tupameke vakwetu mewaneno.

OVIPUKA OVIKWAVO TUNA OKULINGA TUPAMEKE VAKWETU

17. (a) Oñgeni vokuna ovana mavakwatesako ovana vavo vakaave omakumbululo? (b) Ngeetyi tyapopia ovindiu, ovipuka patyi vikwana tuna okulinga pokulifwiika tukaave omakumbululo? (Tala pokatoi.)

¹⁷ Oityi vali tupondola okulinga tupameke vakwetu momaliongiyo? Ine una ovana ovatutu, vekwatesako velifwiike nawa vakaave omakumbululo, mahi talela keti liavo. (Mat. 21:16) Pamwe ononthele mbumwe mambupopi umwe vala ovipuka ovinene, ovitateka vikala no vokwelinepa, novipuka ovikwavo vali vialema, mahi no mononthele mbatyo ngoombo, pamwe muna opalangalafu ike hamwe onombali novana vapondola okupopia-po. Tupu popila ovana vove vanoñgonoke omokonda yatyi pamwe vahamakoyelwa tyina vamayelula okuvoko. Otyo matyivekwatesako avahasoyo tyina vamayelula okukovoko, apakoywa vakwavo ngwe avahakoywa. — 1 Tim. 6:18.d

18. Oityi twahapondola okulinga pokwaava omakumbululo opo vakwetu vahasoke vala unene kwoonthwe? (Provérbios 27:2)

¹⁸ Atuho umwe mewaneno tupondola okufwiika onondaka mbuti umwe ombo mbunkhimaneka Siovaa, ombo mbupameka vakwetu. (Pro. 25:11) Namphila pamwe pokwaava ekumbululo tupondola umwe okupopia-po vimwe twalingaile, mahi otyiwa tuliyunge atwahapopi vala unene evi tulinga. (Tanga Provérbios 27:2; 2 Kol. 10:18) Etyi onthwe tusuka natyo, okukwatesako vakwetu vasoke ku Siovaa, no Kondaka yae, no kovanthu vae aveho. (Ehol. 4:11) Mahi tyina epulo liatyo litwiita umwe tupopie etyi twalingile, opo tyipopia umwe. Monthele ei, epulo limwe liopalangalafu 19 otyo maliiti otyo.

19. (a) Ine ovanthu aveho meliongiyo vapopia-mo, oityi matyituku-ko? (Loma 1:11, 12) (b) Oityi wapanda tyiyemba kokwaava omakumbululo momaliongiyo?

¹⁹ Namphila kwehena otyitumino tyituti umwe pokwaava omakumbululo tuna okupopia ñgaa, mahi atuho mewaneno twahanda momaliongiyo tupopie-mo na tulipameke. Naina, pamwe kamatyitavela twaave omakumbululo monopalangalafu ambuho twahanda okupopia. Tupu pamwe matupameka umwe vakwetu tyina twamona omphitilo yatyo yokwaava omakumbululo, na tyina tuhambukilwa-vo vakwetu tyina vaava omakumbululo. Ine tusoka vali unene ku vakwetu momaliongiyo, matyituhambukiswa, ‘atuho atulipameka.’ — Tanga Ova Loma 1:11, 12.