Ombatelo Pala Onombunga

1. Oñgeni Otyasapalo ankho tyivatela onombunga mbova Isilayeli?

¹ Okupululukwapo Motyasapalo ankho epongiyo lialingwa na Jeova woluembia pala okuvatela onombunga. Monthiki oyo, ova Isilayeli ankho kavalingi ovilinga viavo via kese nthiki opo vakale nomuvo pala okusoka kouwa-tima wa Jeova noupanga wavo nae. Ovohe ankho vaundapesa omphitilo oyo opo vapopile ovana vavo Ovitumino via Jeova. (Deut. 6:6, 7) Otyasapalo ankho tyiavela omuvo ovanthu va Jeova opo vasokolole kefendelo liavo.

2. Oityi Otyasapalo tyitulongesa konthele ya Jeova?

² Tyotyili, Jeova kaiti vali onombunga mbupululukwe Motyasapalo. Mahi, otyitumino otyo tyitulongesa otyipuka tyimwe konthele ya Huku. Oe apeho una esuko enene nonkhalelo ongwa yovanthu vae mopaspilitu. (Isa. 48:17, 18) Hono, onkhalelo Jeova alekesa esuko olio noluembia omokupongiya Elilongeso Liombimbiliya Mombunga.

3. Elilongeso Liombimbiliya Mombunga liaholovonenwa tyi?

³ Elilongeso Liombimbiliya Mombunga Liaholovonenwa Tyi? Mu Kupupu yo 2009, Elilongeso Liomukanda Mewaneno liahimbika okulingwa kumwe Nosikola Yovilinga Via Huku, Neliongiyo Liovilinga. Epiluluko olio, lialingwa pala okuavela onombunga omphitilo yokupameka oupanga wavo na Jeova pokuholovona onthiki kese simano pala elilongeso liombimbiliya mombunga. Onombunga ambuho mbapewa ondundo opo velilongese nombunga monthiki ankho yuundapeswa pala elilongeso liomukanda, nokuundapesa omuvo oo pala okulilongesa etyi matyikuatesako ombunga.

4. Okuti ombunga ina vala okulinga elilongeso liavo oola ike? Hangununa.

⁴ Opo tuende Kelilongeso Liomukanda Mewaneno, ankho tuesukisa omuvo pala okuvala, okuenda unene, novikuavo vali. Ovanyingi puonthue, okukala peliongiyo olio ankho lilingwa vala oola ike, ankho tyimana omuvo omunyingi. Nepiluluko liomaliongiyo etu, pahe tuna onthiki oyo pala okufenda Jeova nombunga. Ngotyo, katuesukisile okulinga vala Elilongeso Liombimbiliya Mombunga oola ike. Mahi, tuesukisa okusoka komasuko ombunga yetu nokuholovona onoola onoñgapi mamulingi Elilongeso Liombimbiliya Nombunga.

5. Okuti tuna okumana omuwo auho nokulilongesa nombunga? Hangununa.

⁵ Okuti Tuna Okumana Omuwo Auho Nokulilongesa Nombunga? Tyina ovalinepi novana vavo velilongesa kumwe Ovihonekwa, ovo velipameka otyikati. (Rom. 1:12) Ombunga ikala vali omapanga. Ngotyo, okulilongesa Ovihonekwa onthele yakolela vali Melilongeso Liombimbiliya Mombunga. Mahi, kese umwe mombunga tupu una okuovola omuvo pala okulinga elilongeso lioulike. Mongeleka, tyina muamana elilongeso liombunga, onwe mupondola okukala kumwe iya kese umwe atualako okulilongesa aike, hamwe okumanuhula okupongiya omaliongiyo ine okutanga Omutala Womulavi no Despertai!. Onombunga mbumwe mbuholovona okuhatale otelevisau onthiki oyo.

6. Oñgeni elilongeso lipondola okulingwa?

⁶ Oñgeni Elilongeso Lipondola Okulingwa? Pamwe, katyesukisile okulilongesa apeho onthele yomapulo nomakumbululo. Opo Elilongeso Liombimbiliya Mombunga liende monkhalelo ikahi nawa, onombunga ononyingi mbuna o programa yelifwa neliongiyo lietu mokati kosimano. Ovo vayapula elilongeso liavo mononthele ononyingi iya avembulingi mononkhalelo mbelikalela. Mongeleka, vapondola okutanga Ombimbiliya kumwe, okupongiya omaliongiyo, netyi mavakapopia movilinga viokuivisa. Pefo 6, pena onondonga mbumwe.

7. Ononkhono patyi ovohe vesukisa okulinga opo elilongeso liende nawa?

⁷ Ononkhono Patyi Ovohe Vesukisa Okulinga Opo Elilongeso Liende Nawa? Ombunga yove maipoloko ounongo inkha elilongeso lilingwa noluembia nombembwa. Ovikando vimwe mupondola okulilongesila pondye inkha tyitavela. Tyina tyesukisa, mupondola okuombapo. Onombunga mbumwe tyina vamamane okulilongesa valiapo katutu. Namphila ovohe velityilika okukandukila ovana pokulinga Elilongeso Liombimbiliya Mombunga, ovo vesukisa okuovola omuvo opo vatetulule ovitateka vipondola okumoneka mombunga. Mahi, pamwe otyiwa okupopia otyitateka omona ena monthiki onkuavo mokueenda kuo simano opo ulityilike okumukundisa pokati kavakuavo. Katyasukisile okulinga Elilongeso Liombimbiliya Mombunga monkhalelo imwe inumanesa, mahi monkhalelo ilekesa okuti tufenda Huku wehambu.—1 Tim. 1:11.

8, 9. Ononkhalamutwe mbombunga mbesukisa okupongiya tyi?

⁸ Oñgeni Onkhalamutwe Yombunga Melipongiya? Ombunga maipoloko ounongo inkha onkhalamutwe yombunga apongiya tete Elilongeso Liombimbiliya Mombunga opo atokole etyi tyesukisa okulilongeswa no ñgeni mavelilongesa. (Pro. 21:5) Otyiwa omulume apopie nomukai konthele yotyo. (Pro. 15:22) Nonkhalamutwe mbombunga, omokonda yatyi muhapulila ovana venyi vapopie etyi vasoka? Inkha ulinga ngotyo, monoñgonoka nawa omasuka nomahando ovana.

⁹ Onkhalamutwe yombunga kesukisile okumana omuvo omunyingi opo apongiye ononthele pala onosimano ononyingi. Ombunga maihambukwa okukala nonthele imwe vena okulinga apeho kese osimano, iya onkhalamutwe yombunga kesukisile okulinga apeho oprograma omphe. Oe upondola okutala okuti otyiwa okupongiya konthyulilo yelilongeso tyina nkhele ahalimbuileko omasuka ombunga opaspilitu. Ononkhalamutwe mbumwe mbombunga vahoneka oprograma aveimate moluhinyi opo aveho veitale. Otyo tyiavela ehambu nomuvo opo ombunga ilipongiye inkha tyesukisa.

10. Oñgeni vana vakala aveke vapondola okuundapesa Elilongeso liavo Liombimbiliya Mombunga?

¹⁰ Inkha Ame Vala Ndyililongesa Otyili Mombunga? Vana vakala aveke vapondola okuundapesa Elilongeso Liombimbiliya Mombunga pala okulinga elilongeso lioulike. O programa ongwa yelilongeso lioulike muakutikinya okutanga Ombimbiliya, okupongiya omaliongiyo, nokutanga Omutala Womulavi no Despertai! Ovaivisi vamwe vayawisako mokuholovona onthiki yelilongeso lioulike. Ovikando vimwe, ovo vapondola okukonga omuivisi omukuavo ine ombunga opo velilongese konthele Yovihonekwa.

11, 12. Ouwa patyi utundilila kokulinga apeho Elilongeso Liombimbiliya Mombunga?

¹¹ Ouwa Patyi Utundilila Kokulinga Apeho Elilongeso Liombimbiliya Mombunga? Vana vakakatela nomutima auho mefendelo liotyotyili vapameka oupanga wavo na Jeova. Tupu, onombunga mbulilongesa kumwe oupanga wavo upama. Ovalinepi vamwe vahoneka konthele youwa vapolako okuti: “Mokonda onthue tuvakokoli-ndyila iya tutupu ovana, tyotyili tupanda Elilongeso lietu Liombimbiliya Mombunga. Onthue tutala okuti tufuena vali kese umwe kumukuavo nokufuena ku Tate yetu keulu. Pahe tyina tupindukapo monthiki yokulilongesa kumwe, tupopia kese umwe kumukuavo okuti: ‘Oityi tuna motyinthiki tyo hono? Elilongeso Liombimbiliya Mombunga!’”

¹² Epongiyo liokulinga Elilongeso Liombimbiliya Mombunga tupu likuatesako onombunga mbuhena omuvo. Omukai umwe otyimbumba omukokoli-ndyila iya una ovana vevali pala okutekula wahoneka okuti: “Kohale, ankho katulingi apeho elilongeso lietu liombunga mokonda ankho nepuila. Ame ankho hityivili okufuisapo ovipuka aviho. Moluotyo, ndyikahi nokuhoneka pala okupandula unene mokonda Yelilongeso Liombimbiliya Mombunga. Onthue tukahi nokulinga apeho Elilongeso Liombimbiliya Mombunga iya tukahi nokupolako ouwa.”

13. Oityi matyilekesa okuti ombunga yove ikahi nokupola ouwa melilongeso liombunga?

¹³ Ngetyi Otyasapalo ankho otyiawa tya Huku, Elilongeso Liombimbiliya Mombunga tupu otyiawa tya Tate yetu keulu tyipondola okuvatela onombunga. (Tia. 1:17) Onkhalelo onombunga mbova Isilayeli ankho vaundapesa Otyasapalo, tyilekesa ouwa patyi ovo vapola koupanga wavo na Jeova. Tupu, onkhalelo tuundapesa onthiki yokulilongesa nombunga tyilekesa ouwa patyi ombunga yetu ipolako. (2 Cor. 9:6; Gál. 6:7, 8; Col. 3:23, 24) Inkha tuundapesa nawa Elilongeso Liombimbiliya Mombunga, ombunga yetu maipopi ngetyi tyapopile omuhoneki wono salmu okuti: “Anthi, kuaame okufuena ku Huku otyiwa. Otyiholamo tyange netyipaka mo Hamba Tatekulu Jeova.”—Sal. 73:28.

[Onondaka Mbavilapo pefo 5]

Katyasukisile okulinga Elilongeso Liombimbiliya Mombunga monkhalelo imwe inumanesa, mahi monkhalelo ilekesa okuti tufenda Huku wehambu

[Okakasa pefo 6]

UPAKA NAWA

Onondonga Mbumwe Pala Elilongeso Liombimbiliya Mombunga

Ombimbiliya:

• Tangelei kumwe Ombimbiliya onosimano ambuho. Inkha omahipululo amwe ahonekwa monkhalelo itavela okutanga ovanthu ovanyingi, onwe mupondola okutanga kumwe iya kese umwe ahetekela ovanthu vapopiwa mehipululo.

• Pongiyei oñgeni Ombimbiliya maitangwa.

• Kese omunthu mombunga atange ovikapitulu Viombimbiliya apewa iya ahoneka omapulo evali ine like konthele yetyi atanga. Iya amuovola kumwe omapulo oo momikanda omikuavo.

• Kese simano honeka popapelo oversikulu Yombimbiliya iya ovola okuikoneka nokuihangununa. Paka nawa oupapelo oo, iya ombupitulula kese simano opo utale onotestu onoñgapi ove uhinangela.

• Tehelela ovikasete Viombimbiliya viangalavalwa otyo ulandula Mombimbiliya yove.

Omaliongiyo:

• Pongiyei kumwe omaliongiyo.

• Pongiyei oviimbo Viouhamba mavikaimbwa mosimano maiya.

• Inkha umwe ena elongomona meliongiyo Liosikola Yovilinga via Huku, ine elekeso Meliongiyo Liovilinga, popia nombunga konthele yetyi wapongiya opo vekutehelele.

Etyi Tyesukisa Mombunga:

• Lilongesei omukanda Jovens Perguntam ine omukanda Aprenda do Grande Instrutor.

• Lilongesei onthele imwe ipopia oñgeni ovana mavatetulula ovitateka vipondola okumoneka kosikola.

• Lingei onthele imwe omu ovohe vapondola okukala ovana iya ovana avakala ovohe. Ovana vaovolola momikanda onthele imwe iya avakapopia novohe.

Ovilinga Viokuivisa:

• Pongiyei etyi mamukapopia movilinga viokuivisa.

• Popiei etyi ombunga ipondola okulinga opo vaundape vali unene movilinga viokuivisa mokueenda kuomuvo Wehinangelo lia Tatekulu ine momuvo wono felia.

• Yeka kese munthu mombunga ataindye nawa mono minutu mbehehi oñgeni makumbulula omapulo amwe apondola okulingwa movilinga viokuivisa, iya amupongiya onthele oyo.

Onondonga Ononkhuavo:

• Tangei kumwe onthele imwe Yomutala Womulavi ine o Despertai! onomphe.

• Kese umwe mombunga atange onthele imwe Yomutala Womulavi ine o Despertai! onomphe apanda unene, iya apopi konthele yetyi atanga.

• Ovikando vimwe mupondola okukonga omuivisi ine ovalinepi vakale kumwe nonwe Melilongeso Liombimbiliya Mombunga iya pamwe mupondola okuvelinga omapulo.

• Talei nokupopia konthele yo novideo mbetu.

• Popiei ononthele mbukahi mo Despertai! mbati, “Jovens Perguntam” ine “Para uma Revisão em Família.”

• Popiei ononthele mbukahi mo Mutala Womulavi (moputu) mbati, “Ensine Seus Filhos” ine “Para os Jovens.”

• Tanga nokutomphola onthele imwe yo Anúario omphe ine omukanda omupe tuapewa motyonge tyokualamba tyononthiki ononthatu.

• Tyina muamaende kotyonge tyononthiki ike, onombali ine ononthatu, pitululei ononthele mbakolela.

• Talei ovipuka Jeova atunga, iya amutomphola oityi ovipuka ovio vitulongesa konthele ya Jeova.

• Undapelei kumwe movipuka aviho muhanda okulinga.