Omikanda Viokulilongesa Omukanda Wovilinga Omuenyo Wetu Woukilisitau
5-11 YA AGOSTO
OLUMONO LUKAHI MONDAKA YA HUKU | 2 TIMOTIU 1-4
“Huku Ketuavelele Ononkhono Mbae Pala Okukala Noluhuhu”
(2 Timotiu 1:7) Mokonda Huku ketuavelele ononkhono mbae pala okukala noluhuhu, mahi opala epondolo, nohole, nonondunge onongwa.
Omutala Womulavi 01/05/2009 pefo 19 § 9
Vakuendye — Okukula Kuenyi Motyili Kumoneke Kovanthu
9 Opo akuateseko Timotiu, Paulu wemuhinangelesa okuti: “Huku ketuavelele ononkhono mbae pala okukala noluhuhu, mahi opala epondolo, nohole, nonondunge onongwa.” (2 Tim. 1:7) “Onondunge onongwa” muakutikinya ounongo wokusoka monkhalelo yaviuka. Tupu tyesukisa okutala ovipuka ngetyi muene vikahi — ha monkhalelo onthue tuvihandela. Ovakuendye vamwe vahapamene motyili vena oluhuhu, ine vaovola okuyepa ovitateka mokutala o televisau, nokulala unene, nokunwa ovihemba vikoleswa, nokunwa unene, nokulinga omaundalelapo. Ovakilisitau valondolwa opo vaanye “omahando omouye, iya atukala nonondunge nokukala ovaviuki, atufende Huku mouye uno.” — Titu 2:12.
(2 Timotiu 1:8) Ngotyo uhankhie ohonyi yokuava oumbangi konthele ya Tatekulu ine konthele yange, ame nkhuatwa mokonda yae, mahi no ove tavela okumoneswa ononkhumbi mokonda yonondaka onongwa mokuyumba onthumbi mepondolo lya Huku.
A Sentinela 01/03/2003 pefo 9 § 7
Kala Tyapama Kola Omutima!
7 Paulu wahonekela Timotiu okuti: “Huku ketuavelele ononkhono mbae pala okukala noluhuhu, mahi opala epondolo . . . Ngotyo uhankhie ohonyi yokuava oumbangi konthele ya Tatekulu.” (2 Timotiu 1:7, 8; Maluku 8:38) Tyina tutanga onondaka ombo tupondola okulipula okuti: ‘Ndyina ohonyi yekolelo liange ine nakola omutima? Ndyipopila ava ndyilongeswa navo, na ava ndyiundapa navo okuti Ndyimbangi ya Siovaa, ine ndyiliholeka? Ndyinkhia ohonyi mokonda nelikalela na vakuetu, ine ndyina ehambu mokonda ndyina oupanga na Siovaa?’ Inkha omunthu umwe una omalusoke apenga konthele yokuivisa onondaka onongwa, una okuhinangela onondaka Siovaa apopila Sosuwe, okuti: “Kala tyapama kola omutima.” Uhalimbueko okuti, tyesukisa vali hatyetyi-ko ava ulongeswa navo ine uundapa navo vasoka, mahi onkhalelo Siovaa na Sesusi vatala ovipuka. — Ova Galata 1:10.
Ovola Olumono Lwa Huku
(2 Timotiu 2:3, 4) Ngefualali lya Kilisitu Sesusi likahi nawa, no ove tavela okumoneswa ononkhumbi. 4 Nawike ukahi movilinga vioufualali ulipaka movipuka ovikuavo vielikalela opo ahambukiswe una wemupaka koufualali.
Omutala Womulavi 07. 2017 pefo 7 § 13
Ovola Omalumono Otyotyili
13 Timotiu ankho omulume umwe una ekolelo. Etyi Paulu aihana Timotiu okuti ukahi “ngefualali lya Kilisitu Sesusi,” ayawisako okuti: “Nawike ukahi movilinga vioufualali ulipaka movipuka ovikuavo vielikalela opo ahambukiswe una wemupaka koufualali.” (2 Tim. 2:3, 4) Hono po valanduli va Sesusi, pena ovanthu ovanyingi vekahi movilinga viomuvo auho, valinga atyiho opo valandule onondonga mba Paulu. Velityilika omahongiliyo omouye, okukala nomalumono. Vahinangela etyi Ombimbiliya ipopia, okuti: “Omunthu wokulevala ukala omupika womunthu wemulevalesa.” (Pro. 22:7) Satanasi uhanda tupesele ononkhono mbetu nomuvo wetu mouye wae wonondando. Vamwe valevala onombongo opo valande onondyuo, nomatuku-tuku, nokulongeswa mo nosikola ononene, iya vamwe valevala opo vanepe. Inkha katulunguka, matukala no nongele omanima omanyingi. Tulekesa okuti tuna ounongo tyina tutyinda omuenyo wapepuka, nokulityilika okulevala, nokupesela onombongo. Tyina tulinga ngotyo, tukala vali nomuvo wokuumbila Huku tyipona okukala ovapika vouye uno wonondando. — 1 Tim. 6:10.
(2 Timotiu 2:23) Tyihe-otyo vala, anya okulipatana kuoutyova no kuomutomba, mokonda utyii okuti tyieta ovilwa.
Omutala Womulavi 15/07/2014 pefo 14 § 10
Ovanthu va Siovaa “Vayekapo Etyi Tyihaviukile”
10 Hono, katyakakele okuvasa ovanthu vatyitukilapo otyili, mokati kewaneno. Mahi, nkhele tupondola okuiva ovipuka vihelikuatele netyi Ombimbiliya ilongesa. Katyesukisile olie upopia ovipuka ovio, tuesukisa okuvianya liwa-liwa. Hatyiwa-ko okutomphola na vana vatyitukilapo otyili, tyilinge mo Internet, ine mononkhalelo onkhuavo. Namphila hamwe tuhanda okumukuatesako, inkha tutomphola nae matulekesa okuti katukahi nokutavela Huku. Mokonda tuvanthu va Siovaa, tyotyili tuesukisa okuanya omalongeso aeho avana vatyitukilapo otyili.
Okutanga Ombimbiliya
(2 Timotiu 1:1-18) Ame Paulu, apositolu ya Kilisitu Sesusi kehando lya Huku, pala okuivisa omulao womuenyo una maupewa vana vekahi kumwe na Kilisitu Sesusi, 2 nahonekela Timotiu, omona wange onthyolwe okuti: Okankhenda okanene, nouwa-tima nombembwa vitunda ku Huku Tate no ku Kilisitu Sesusi Tatekulu yetu vikale no ove. 3 Ame ndyipandula Huku ou ndyikahi nokuundapela, ngetyi ovakuaukulu vange valingile iya nomutima wasukuka hikulimbwa nii vala katutu tyina ndyilivondela, tyitenya na tyinthiki. 4 Tyina ndyihinangela ononkhuka mbove, ndyikuivaluka unene tyokuhanda okukutala opo ndyikale nehambu enene. 5 Mokonda ndyihinangela ekolelo liove lihena omaandambeyo, liali na nyoko-kulu Loide na mee yove Eunise, iya ndyina onthumbi yokuti olio likahi mu ove. 6 Mokonda yotyo, ndyikuhinangelesa okuti nthiakana ngotupia ounongo ou wapewa na Huku puetyi nekuyambeka omavoko ange. 7 Mokonda Huku ketuavelele ononkhono mbae pala okukala noluhuhu, mahi opala epondolo, nohole, nonondunge onongwa. 8 Ngotyo uhankhie ohonyi yokuava oumbangi konthele ya Tatekulu ine konthele yange, ame nkhuatwa mokonda yae, mahi no ove tavela okumoneswa ononkhumbi mokonda yonondaka onongwa mokuyumba onthumbi mepondolo lya Huku. 9 Ngwe wetuyovola, etuihana opo tukale ovasukuki, ha mokonda yovilinga vietu oviwa, mahi omokonda yehando lyae muene, nokankhenda kae okanene. Otyo tuetyipewa-le mokonda ya Kilisitu Sesusi komivo vyo kohale-hale, 10 mahi pahe tyamoneka nawa mokuahololoka kwa Kilisitu Sesusi Omuyovoli wetu, wokuanyima-ko ononkhia iya etuholololela no nondaka onongwa oñgeni matukala nomuenyo nolutu luhavolo. 11 Mokonda ame ombo naholovonenwa opo ndyikale omuivisi, no apositolu, nomulongesi. 12 Otyo na ame ndyikahi nokumonena ononkhumbi mbovipuka ovio, mahi katyinkhundisa. Mokonda Ou netavela ame ndyimwii iya ame ndyina onthumbi yokuti upondola okuyunga nawa ovipuka aviho nemuavela alo onthiki ina. 13 Tualako okukakatela mongeleka yonondaka mbueta ouwa, weiva ku ame, kumwe nekolelo, nohole, vituka kokukala kumwe na Kilisitu Sesusi. 14 Holeka nawa ovipuka ovio vina esilivilo enene watambula kononkhono mba Huku mbukahi mu onthue. 15 Ove utyii nawa okuti ovanthu aveho mo Asia okukutikinyamo Fiselu na Helemosene, vanthya-po. 16 Tatekulu akale nokankhenda nombunga ya Onesifolu, mokonda wamphameka ovikando ovinyingi iya kankhile ohonyi mokonda yetyi ndyinkhuatwa. 17 Mahi, etyi ankho ekahi mo Loma, wandyovolele unene, alo ambasa. 18 Tatekulu emukuateseko avase okankhenda katunda ku Siovaa monthiki oyo. Iya ove wii nawa ovilinga aviho alinga mo Efesu.
12-18 YA AGOSTO
OLUMONO LUKAHI MONDAKA YA HUKU | TITU 1–FILEMO
‘Okuholovona Ovakulu Vomawaneno’
(Titu 1:5-9) Ame nekusa mo Keleta, opo uviukise ovipuka ankho vihaviukile iya oholovona ovakulu vomawaneno momapunda-umbo aeho, ngetyi nekulongesa: 6 omukulu wewaneno una okukala omulume uhahungwa, wanepa omukai wike, una ovana vetavela, uhahungwa okuti utyinda omuenyo wasila ine woumphuki. 7 Mokonda omuundapi wa Huku, omukulu wewaneno, una okukala tyihahungwa, uhena omalityindailo, uhanumana liwa, uhenkholwa, uhehole okulwa, uhena elungavi lionombongo nomalumono, 8 mahi utambula nawa ovaenda, uhole otyiwa, una onondunge, omuviuki, omukuatyili, ulikondola omutima, 9 ukakatela mondaka yayumbwa onthumbi konthele younongo wae wokulongesa, opo etyivile okupameka vakuavo nondongeso ongwa, nokuviyula vana vapatana.”
A Sentinela 15/11/2014 pefo 28
Omapulo Ovatangi
Ombimbiliya kaipopi monkhalelo yayandyuluka nawa oñgeni ankho tyiholovonwa ovakulu vewaneno. Mahi tupondola okunoñgonoka oñgeni ankho tyilingwa. Etyi Paulu na Balanabe vekahi nokukondoka kondyuo moungendi wavo wotete woumisionaliu, ‘avaholovona ovakulu vewaneno momawaneno aeho, avelikuambela avakala omuvo umwe tyihali, iya avapakula ku Siovaa, una pahe vetavela.’ (Ovilinga 14:23) Etyi palamba omanima amwe Paulu ahonekela Titu, mundyila yae youngendi, okuti: “[Ame] nekusa mo Keleta, opo uviukise ovipuka ankho vihaviukile iya oholovona ovakulu vomawaneno momapunda-umbo aeho, ngetyi nekulongesa.” (Titu 1:5) Timotiu walingile oungendi omuvo omunyingi na apositolu Paulu, iya mokutala nae ankho upondola okuholovona ovakulu vewaneno. (1 Tim. 5:22) Otyo tyilekesa okuti, ovakulu vewaneno ankho kavaholovonwa nono apositolu ine novakulu vewaneno mo Selusalei, mahi ankho ovatalelipo vomawaneno vaholovona ovakulu vewaneno.
Okutala konkhalelo ankho tyiholovonwa ovakulu vewaneno Potyita Tyotete, Ononkhalamutwe mbo Nombangi mba Siovaa vapilulula onkhalelo yokuholovona ovakulu vewaneno novakuatesiko vovakulu vewaneno. Okuhimbikila 1 ya Setembro yo 2014, pahe otyilinga otyo tyilingwa ñgaa: omutalelipo womauaneno, utala nawa, elikuambela konthele ya vana ovakulu vewaneno vapopia okuti upondola okupewa otyilinga. Tyina ekahi nokutalelapo ewaneno woovola okunoñgonoka omukuatate oo. Inkha wetyivila, uundapa nae movilinga viokuivisa. Pahe tyina amatale nawa ovakuatate ovakulu vewaneno vapopia okuti vapondola okupewa otyilinga, omutalelipo womauaneno una otyilinga tyokuholovona ovakulu vewaneno, ine ovakuatesiko vovakulu vewaneno. Tyina tulinga ngotyo tukahi nokulandula onkhalelo ankho tyilingwa potyita tyotete.
Oityi kese umwe wakutikinyua motyilinga otyo alinga? “Omupika omukuatyili nokualunguka” una otyilinga tyokuavela okulia vomeumbo. (Mat. 24:45-47) Otyo tyakutikinya okuovolola nawa Mombimbiliya pokati kehongolelo liononkhono mba Huku, opo vanoñgonoke oñgeni ewaneno lya Huku lina okuonganekwa. Konyima yotyo omupika omukuatyili nokualunguka apopi oñgeni omawaneno ena okueendela monondonga ombo. Omupika omukuatyili nokualunguka una otyilinga tyokuholovona ovatalelipo vomawaneno, na ava valinga onthele Yokomisau Yofiliyale. Kese Filiyale, ikuatesako omawaneno opo aendele monondonga. Ovakulu Vewaneno vena otyilinga otyinene tyokutala nawa-nawa inkha ovakuatate ava vapopia okuti vapondola okupewa otyilinga vafuisapo Onondonga mbo Mbimbiliya, opo vaholovonwe. Ngotyo kese omutalelipo womauaneno utala nawa, elikuambela konthele ya vana ovakulu vewaneno vapopia okuti upondola okupewa otyilinga, konyima aholovona vana vafuapo.
Ovola Olumono Lwa Huku
(Titu 1:12) Umwe puvo, omuuli wavo muene, wati: “Ova Keleta apeho ononkhembi, vekahi ngovinyama ovikalavi, ovanthu vokuananga vokuhole okulia unene.”
A Sentinela 15/05/1989 pefo 31 § 5
Omapulo Ovatangi
Tyotyili Paulu ankho kekahi nokulekesa okuti vena okukala nokapungulula nova Keleta. Tutyii mokonda Paulu ankho utyii okuti mo Keleta, ankho muna ovakilisitau votyotyili iya Huku weveavelele Ononkhono mbae. (Ovilinga 2:5, 11, 33) Mo Keleta ankho muna ovakilisitau ovakuatyili ankho vapondola okuonganeka omawaneno “momapunda-umbo”. Namphila ankho ovakuatate ovo ovakuankhali, mahi tuna onthumbi yokuti ankho, kavakembe, kavekahi ngovinyama ovikalavi, tupu havanthu vokuananga vokuhole okulia unene; mokonda inkha ankho otyo vekahi, ñgeno ankho kavapandelwe vali na Siovaa. (Ova Filipu 3:18, 19; Eholololo 21:8) Ngetyi tyimoneka hono mouye auho, mokutala mo Keleta ankho muvasiwa ovanthu vaihamenwa mokonda yovipuka ovivi ovanthu valinga. Mahi tupu ankho muna vana vesuka notyili tya Huku. — Ezequiel 9:4; tyieleka nomukanda Ovilinga 13:48.
(Filemo 15, 16) Hamwe etyi otyo atundila katutu pu ove, opo akondoke ku ove pala apeho, 16 ahakondoka vali omupika, mahi ukondoka wapona pomupika, omukuatate onthyolwe, haunene pala ame, mahi unene vali pala ove, omupika tupu omukuatate mu Tatekulu.
Omutala Womulavi 01/10/2008 pefo 31 § 4
Ononthele Mbavilapo Mbo Mukanda Titu, Filemo, Ova Hebeleu
15, 16 — Omokonda yatyi Paulu ahaitilile ku Filemon ayovole Onesimu? Paulu ankho uhanda okufuisapo nawa otyilinga tyae ‘tyokuivisa konthele Youhamba wa Huku nokulongesa konthele ya Tatekulu Sesusi Kilisitu.’ Moluotyo, ankho kahande okulipaka povipuka viamuene. Ovipuka vioupika. — Ovilinga 28:31.
Okutanga Ombimbiliya
(Titu 3:1-15) Tualako okuvehinangelesa okuti vena okutavela konohamba no kovatumini, vakale tyafuapo pala ovilinga oviwa, 2 vahapopie otyivi omunthu nawike, vahakale ovanthu vonondyaya, mahi vakale ovanthu vapola pokati, okulekesa epoleyo kovanthu aveho. 3 Mokonda no onthue ankho tutupu onondunge, ankho katutavela, ankho tuayapulwa, tuali ovapika vomahando omanyingi novipuka vituhambukiswa, ankho tulinga ovivi nokuna onkhi, ankho tutoyesa, tuliyele na vakuetu. 4 Mahi, etyi Omuyovoli wetu Huku, akala nokankhenda noluembia novanthu, 5 (ha mokonda yovilinga viouviuki onthue tualinga, mahi omokonda yokankhenda kae), wetuyovola etyi etukoha iya atyitueta komuenyo, etukalesa ovape kononkhono mbae. 6 Huku wetuavela ononkhono mbae otyali menyina lya Sesusi Kilisitu Omuyovoli wetu, 7 opo tyina tuamatiwa tuvaviuki mokankhenda kae okanene natukale onomphinga, tyelikuata nekevelo lietu liomuenyo uhapu. 8 Onondaka ombo mbuyumbwa onthumbi, iya ame nahanda ove utualeko okupopia unene ovipuka ovio, opo vana vetavela Huku vatualeko okusoka kovilinga oviwa. Ovipuka ovio vikahi nawa iya vietela ovanthu ouwa. 9 Mahi uhelipake ponondaka mbowova no mbomanyina ononthuko mbovakuaukulu no povilwa nokuyaya konthele Yovitumino, mokonda kavikuatesako, vitupu esilivilo. 10 Inkha omunthu umwe uyandyanesa omalongeso omatutu, tyina wamemuviyula ovikando vivali mahi ehekutehelela, ove una okulityilika-e, 11 mokonda ove utyii okuti omunthu oo, watunda mondyila, ukahi nokulinga onkhali iya muene ukahi nokulihitisa. 12 Tyina namatumu oko Aletemasi ine o Tikiku, ove linga ononkhono mbokumbasa ko Nikopolisi, mokonda oko natokola okukala omuvo woutalala. 13 Linga atyiho opo ukuateseko Sena wokwii nawa Ovitumino na Apolu, opo vahakambe natyike moungendi wavo. 14 Mahi ovanthu vetu tupu velilongese okutualako okulinga ovilinga oviwa opo vaave ekuateso tyina tyamesukisa liwa, na vahakale tyihaave ovinyango. 15 Aveho vekahi na ame vatuma okumukukunya-po. Nkhukunyinei-po vana vena ohole no onthue mekolelo. Okankhenda okanene ka Huku kakale no onwe amuho.
19-25 YA AGOSTO
OLUMONO LUKAHI MONDAKA YA HUKU | OVA HEBELEU 1-3
“Humba Ouviuki, Yala Wokuhetavela Ovitumino”
(Ova Hebeleu 1:8) Mahi konthele Yomona wae upopia okuti: “Huku otyipundi tyove tyoutumini apeho-apeho iya onkhunye Youhamba wove, onkhunye youviuki.
Omutala Womulavi 15/02/2014 pefo 5 § 8
Hivilika Kilisitu, Ohamba Yankhimana!
8 Mo 1914, Siovaa walembula Omona wae akala Ohamba keulu. “Onkhunye” youhamba wa Sesusi, “onkhunye youviuki,” ngotyo tupondola okukala nonthumbi yokuti outumini wae apeho maukakala wouviuki. Sesusi watokala okukala Ohamba mokonda Huku otyipundi tyae, otyo tyilekesa okuti o Siovaa wemulembula akale Ohamba. Outumini wa Sesusi mautualako “apeho-apeho.” Tyituhambukiswa unene okuumbila Siovaa nekuateso Yohamba aholovona!
(Ova Hebeleu 1:9) Ove wakala nohole youviuki, iya oyale okuhetavela ovitumino. Otyo Huku, Huku yove, ekulembulila nomulela iya ekuavela ehambu enene vali tyipona vakuenyi.
Omutala Womulavi 15/02/2014 pefo 5 § 7
Hivilika Kilisitu, Ohamba Yankhimana!
7 Tanga Salmo 45:6, 7. Siovaa walembula Sesusi akale Ohamba Youhamba wa Huku mokonda Sesusi uhole unene ouviuki, mahi uyele kese tyipuka tyihankhimaneka Tate yae. Sesusi walembulua “nomulela wenkhimano,” moluotyo wavilapo vali “kuvakuavo,” konohamba mbo Sundaa tupu vatundile mombunga ya David. Ñgeni ngotyo? Tete, o Siovaa yatyo muene walembula Sesusi. Vali, Siovaa walembula Sesusi akale Ohamba, Nomunene-nakwa. (Sal. 2:2; Heb. 5:5, 6) Tatu, Sesusi kalembulilwe nomulela, mahi walembulua nononkhono mba Huku iya ouhamba wae kaukahi pano pohi uli keulu.
Ovola Olumono Lwa Huku
(Ova Hebeleu 1:3) Oe otyilekeso tyomunkhima wa Huku, tupu otyilekeso tyaviuka tyonkhalelo yae iya ulinga ovipuka aviho vitualeko nepondolo liondaka yae. Etyi etusukukisa ononkhali mbetu, apumphama kokulio Kuomunanene keulu.
Perspicaz Vol. 2 pefo 382 § 1
Otyifuika
Okuti Sesusi ankho ulekesa umwe nawa-nawa onkhalelo ya Tate yae?
Omona wongunga wa Huku weile pano pohi, otyifuika tya Tate yae. (2 Kol. 4:4) Tyilekesa okuti Huku Oe apopilile onondaka mbati: “Tulinge omulume otyifuika tyetu,” otyifuika Tyomona, no tya He Omutungi ankho uliko-ale tunde apa Omona atungwa. (Gên. 1:26; Suau 1:1-3; Kolo. 1:15, 16) Etyi ali pano pohi ngomunthu uhena onkhali, ankho ulekesa nawa onkhalelo ya Tate yae, mahi tyina apa aoyela ine ankho tyapola pokati. Moluotyo ankho upondola okupopia okuti: “Una weete ame, tupu weete Tate.” (Suau 14:9; 5:17, 19, 30, 36; 8:28, 38, 42) Okulekesa onkhalelo ya Tate yae tyamoneka nawa-nawa etyi atutiliswa opo ende keulu, etyi apewa “outumini wovipuka viatyo aviho, keulu no pohi” na Tate yae, Siovaa Huku. (1 Pet. 3:18; Mat. 28:18) Mokonda Huku wapaka Sesusi “kounene pomphangu imwe yakulama,” Omona wa Huku pahe ulekesa vali nawa-nawa onkhalelo ya Tate yae tyipona etyi ankho eli pano pohi. (Fili. 2:9; Heb. 2:9) Sesusi pahe “otyilekeso tyaviuka . . . tyonkhalelo yae [Huku].” — Heb. 1:2-4.
(Ova Hebeleu 1:10-12) Iya: “Ove Tatekulu, konthyimbi ove walinga elisesu liohi iya omaulu ovilinga viomavoko ove. 11 Ohi neulu mavinyimi-ko, mahi ove motualako; ohi neulu mavikulupa ngomuvalo, 12 iya ove mokeviwinga-winga ngekapote, avikakumanwa ngomuvalo. Mahi ove, ove vala, omanima ove kamaapu nalumwe.”
Perspicaz Vol. 1 pefo 491 § 2
Eulu
2Onondaka mbuvasiwa mu Salmo 102:25, 26, mbupopia Siovaa Huku, mahi apositolu Paulu wembuundapesa mu Sesusi Kilisitu. Otyo tyitavela mokonda Omona wongunga wa Huku ankho Omutumwa wa Siovaa pokutunga ovipuka. Paulu walekesa okuti puetyi ovipuka viatungwa Sesusi ankho opo eli. Iya inkha Huku otyo ahanda ankho upondola ‘ukuviwinga-winga ngekapote’ evipakela ponthele. — Heb. 1:1, 2, 8, 10-12; tyieleka na 1 Pet. 2:3, okatoi.
Okutanga Ombimbiliya
(Ova Hebeleu 1:1-14) Kohale-hale Huku waundapesile ovauli opo apopie novakuaukulu vetu ovikando ovinyingi, mononkhalelo ononyingi. 2 Pahe konthyulilo yononthiki ombu, wapopia no onthue menyina lyo Mona wae, una aholovona opo akale omphinga yovipuka aviho iya menyina liae watunga ovipuka keulu no pohi. 3 Oe otyilekeso tyomunkhima wa Huku, tupu otyilekeso tyaviuka tyonkhalelo yae iya ulinga ovipuka aviho vitualeko nepondolo liondaka yae. Etyi etusukukisa ononkhali mbetu, apumphama kokulio Kuomunanene keulu. 4 Ngotyo, ngwe akala omunene vali tyipona onoandyu mokonda wapiñgana enyina ewa vali tyipona omanyina ambo. 5 Mongeleka oipi vali oandyu Huku apopilile okuti: “Ove umona wange; hono ame nakala tate yove”? Tupu ati: “Ame mandyikala tate yae iya ngwe makala omona wange”? 6 Mahi pokueta vali Otyiveli tyae mouye wovanthu, ngwe wati: “Onoandyu ambuho mba Huku mbulipetamene kwe.” 7 Tupu wapopia konthele yonoandyu okuti: “Ukalesa onoandyu mbae nepondolo enene iya ovaundapi vae uvekalesa omutemo wotupia.” 8 Mahi konthele Yomona wae upopia okuti: “Huku otyipundi tyove tyoutumini apeho-apeho iya onkhunye Youhamba wove, onkhunye youviuki. 9 Ove wakala nohole youviuki, iya oyale okuhetavela ovitumino. Otyo Huku, Huku yove, ekulembulila nomulela iya ekuavela ehambu enene vali tyipona vakuenyi.” 10 Iya: “Ove Tatekulu, konthyimbi ove walinga elisesu liohi iya omaulu ovilinga viomavoko ove. 11 Ohi neulu mavinyimi-ko, mahi ove motualako; ohi neulu mavikulupa ngomuvalo, 12 iya ove mokeviwinga-winga ngekapote, avikakumanwa ngomuvalo. Mahi ove, ove vala, omanima ove kamaapu nalumwe.” 13 Mahi, oandyu ipi vali Huku apopilile okuti: “Pumphama kokulio kuange alo ndyipaka onondyale mbove ngotyilyatelo tyo nomphai mbove”? 14 Okuti onoandyu ambuho kambuundapela Huku? Iya hambo-ko Huku atuma okukuatesako vana mavapiñgana eyovo?
26 YA AGOSTO ALOO 1 YA SETEMBRO
OLUMONO LUKAHI MONDAKA YA HUKU | OVA HEBELEU 4-6
“Linga Atyiho Uvila Opo Unyingile Monthiki ya Huku Yokupululukwa”
(Ova Hebeleu 4:1) Ngotyo, mokonda nkhele kuakamba omulao wokunyingila monthiki yae yokupululukwa, tulungukei opo pokati kenyi pahakale nawike utalwa okuti katokalele okunyingila-mo.
(Ova Hebeleu 4:4) Mokonda monthele imwe yovihonekwa wapopile konthele yonthiki yapandu-vali okuti: “Iya Huku, apululukwa kovilinga viae aviho monthiki yapandu-vali,”
Omutala Womulavi 01/07/2011 pomafo 24-25 §§ 3-5
Onthiki ya Huku Yokupululukwa Oityi?
3 Kuna ovipuka vivali vilekesa okuti pomuvo wa Sesusi no pomuvo wo Vakilisitau votete, ankho nkhele onthiki yepandu-vali. Otyipuka tyotete tutyinoñgonokela kuetyi Sesusi apopila vamwe ponondyale mbae. Ankho vanumana na Sesusi mokonda wahakula ovanthu mo Tyasapalo. Ankho vasoka okuti katyaviukile okuhakula omunthu Motyasapalo, mokonda Ovitumino Viapelwe Moisesi ankho vipopia okuti Tyasapalo onthiki yokupululukwa kovilinga. Opo evekumbulule Sesusi ati: “Tate yange ukahi nokuundapa aloo pehepano, na ame ndyikahi nokuundapa.” (Suau 5:16, 17) Oityi Sesusi ankho ahanda okupopia? Wapopia okuti: “Ame na Tate yange tukahi nokulinga otyilinga tyike. Tate yange uundapa mokueenda kuo Tyasapalo tyae tyomanima omanyingi, iya nkhele ukahi nokuundapa, moluotyo ame ndyipondola okuundapa mo Tyasapalo.” Onondaka mba Sesusi mbulekesa okuti konthele yohi, onthiki yo Tyasapalo onthiki ya Huku yokupululukwa, nkhele ankho itualako pononthiki mba Sesusi.
4 Otyipuka tyavali tyilekesa oñgeni tutyii okuti pomuvo wa Sesusi no pomuvo wo Vakilisitau votete, nkhele ankho onthiki yepandu-vali.Apositolu Paulu wahoneka konthele yonthiki ya Huku yokupululukwa momukanda ova Hebeleu. Mokapitulu 4 komukanda oo, etyi ehene-pitulule onondaka mba Gênesis 2:2, Paulu wahoneka okuti: “Onthue vokuna ekolelo tuanyingila monthiki yae yokupulukwa.” ( Heb. 4:3, 4, 6, 9) Otyo tyilekesa okuti pomuvo wa Paulu, nkhele ankho onthiki yapandu-vali. Onthiki yepandu-vali ipwa nalupi?
5 Opo tukumbulule epulo olio, tuesukisa okuhinangela okuti Siovaa waholovona onthiki yepandu-vali pala otyipuka tyesukisa. Omukanda wa Gênesis 2:3 utupopila okuti: “Huku ayambe onthiki yapandu-vali nokuilinga onthiki ikola.” Siovaa walinga onthiki oyo ikola mokonda weiholovona opo ikale onthiki mamanuhula ehando liae konthele yohi. Siovaa ankho uhanda omulume nomukai, vakale apeho kombanda yohi nokuyunga aviho vilimo. (Gên. 1:28) Siovaa Huku na Sesusi Kilisitu “utumina Otyasapalo,” “vatualako okuundapa aloo hono” pala okufuisapo ehando lya Huku konthele yohi. (Mat. 12:8) Moluotyo, onthiki ya Huku yokupululukwa, maitualako aloo ehando liae lifuisuapo. Otyo matyikamoneka konthyulilo Yovityita Ekwi Vioutumini wa Kilisitu.
(Ova Hebeleu 4:6) Ngotyo, mokonda nkhele kuakamba vamwe opo vanyingile-mo, iya vana vokuatetekela okupopilwa onondaka onongwa kavanyingilile mokonda yokuhetavela,
Omutala Womulavi 01/07/2011 pefo 25 § 6
Onthiki ya Huku Yokupululukwa Oityi?
6 Huku wapopilile Andau na Eva olipi ehando ena nohi, mahi kavetavelele. Konyima, ovanthu ovakuavo navo avehetavela. Aloo umwe ovanthu va Huku, ova Isilayeli, vaanyene Huku ovikando ovinyingi. Iya Paulu walondolele Ovakilisitau vo pononthiki mbae okuti vamwe puvo ankho kavetavela ngo va Isilayeli. Paulu wahoneka okuti: “Tulingei ononkhono opo tunyingile monthiki oyo yokupululukwa, iya apahakala nawike utokela motyituwa tyokuhetavela.” (Heb. 4:11) Etyi Paulu apopia tyilekesa okuti ovanthu vokuhetavela kamavanyingila monthiki ya Huku yokupululukwa. Otyo tyilekesa tyi ku onthue? Okuti otyo tyilekesa okuti inkha katutavela ehando lya Huku, kamatunyingila monthiki ya Huku yokupululukwa? Ekumbululo liepulo olio liakolela unene.
(Ova Hebeleu 4:9-11) Moluotyo nkhele kuesala otyasapalo tyokupululukwa pala ovanthu va Huku. 10 Mokonda omunthu wanyingila monthiki ya Huku yokupululukwa, tupu wapululukwa kovilinga viae, ngetyi Huku apululukwa kovilinga viae. 11 Tulingei ononkhono opo tunyingile monthiki oyo yokupululukwa, iya apahakala nawike utokela motyituwa tyokuhetavela.
Omutala Womulavi 01/07/2011 pefo 28 §§ 16-17
Onthiki ya Huku Yokupululukwa Oityi?
16 Hono pu onthue nawike utavela okuti Ovakilisitau vena okulandula Ovitumino Viapelwe Moisesi opo vayovolwe. Onondaka Paulu apopila ova Efesu mbayandyuluka nawa. Wati: “Mokonda yokankhenda oko okanene, onwe muayovolwa mokonda yekolelo, iya otyo katyitei ku onwe muene; mahi otyali tya Huku.” (Efe. 2:8, 9) Ngotyo, oñgeni hono Ovakilisitau vapondola okunyingila monthiki ya Huku yokupululukwa? Hinangela okuti Siovaa waholovona onthiki yae yokupululukwa, opo ikale onthiki mamanuhula ehando liae konthele yohi novanthu vokutavela. Pokati keongano liae, Siovaa utupopila ehando liae netyi ahanda tulinge. Tupondola okunyingila monthiki ya Siovaa yokupululukwa inkha tumutavela nokuundapela kumwe neongano liae.
17 Mahi, inkha katutavela komupika omukuatyili nokualunguka, atuende vala ngetyi tuhanda, ngotyo tukahi nokuaanya ehando lya Siovaa. Iya inkha tutyilinga, katupondola okukala omapanga a Siovaa. Ngotyo inkha tutavela komupika omukuatyili nokualunguka matunyingila monthiki ya Huku yokupululukwa, mahi inkha tuholovona okuenda vala monkhalelo yetu kamatunyingila monthiki omo.
Ovola Olumono Lwa Huku
(Ova Hebeleu 4:12) Mokonda ondaka ya Huku ina omuenyo, ina epondolo, iya yatwa vali tyipona omutunga wononthuilo onombali, iya inyingila mokati aihololola kohi mokati komunthu no kondye, naapa pahonyena omankhipa no momusa, iya ityivila okupunga omalusoke neetyi tyili momutima.
Omutala Womulavi 09. 2016 pefo 32
Omapulo Ovatangi
Momukanda Ova Hebeleu 4:12 “ondaka ya Huku” yapopiwa okuti “ina omuenyo, ina epondolo” oityi?
▪ Ono versikulu mbatetekela nombu mbalandulako, mbutukuatesako okuimbuka okuti Paulu ankho ukahi nokupopia ehando lya Huku, livasiwa mo Mbimbiliya.
Ovikando ovinyingi, omikanda vietu vipopia konthele yomukanda Ova Hebeleu 4:12 opo vilekese okuti Ombimbiliya ina epondolo liokupilulula omienyo viovanthu, iya otyo otyili. Mahi, otyiwa okunoñgonoka oityi Paulu ankho ekahi nokupopia etyi ahoneka onondaka mbukahi momukanda Ova Hebeleu 4:12. Ankho ukahi nokuavela ondundo Ovakilisitau ova Hebeleu opo vaundapele kumwe nehando lya Huku. Ehando olio lya Huku livasiwa movihonekwa vikola. Paulu wapopia ongeleka yova Isilayeli Huku ayovolele koupika mo Isitu. Ankho vena ekevelelo liokuenda motyilongo Tyalaelwe, “otyilongo muna owiki nomahini” omu ankho vapondola okukapululukilwa. — Êx. 3:8; Deut. 12:9, 10.
Olio ankho ehando lya Huku. Mahi ova Isilayeli kavatuaileko okulandula ehongolelo lya Siovaa, nokukala nekolelo mwe, mokonda yotyo ovanyingi puvo avahanyingila motyilongo Tyalaelwe. (Núm. 14:30; Jos. 14:6-10) Mahi, no ngotyo Paulu nkhele wapopia “omulao wokunyingila monthiki yae yokupululukwa [Huku].” (Heb. 3:16-19; 4:1) “Omulao” oo ulinga onthele yetyi Huku ekahi nokuhololola konthele yehando liae. Ngo Vakilisitau ova Hebeleu, onthue tutanga konthele yehando olio nokuundapela kumwe nehando olio. Opo alekese okuti ehando olio lielikuata kumwe Novihonekwa, Paulu wapopia onondaka mbukahi mu Gênesis 2:2 no mu Salmo 95:11.
Tyitupameka unene okunoñgonoka okuti “omulao wokunyingila monthiki ya [Huku] yokupululukwa utualako.” Onthue tuna onthumbi yokuti etyi Ombimbiliya ilongesa konthele yokunyingila monthiki ya Huku yokupululukwa tyili-tyili tyiyumbwa onthumbi, iya tukahi nokulinga atyiho opo tunyingile-mo. Onthue katulingi vala ngotyo tyina tulandula Ovitumino Viapelwe Moisesi, ine tyina tulinga ovipuka oviwa vihambukiswa Siovaa. Mahi, mokonda tuna ekolelo mu Huku, tuna ehambu nokuundapela kumwe nehando liae. Ovanthu ovanyingi mouye auho vekahi nokuhimbika okulilongesa Ombimbiliya, tupu vekahi nokulilongesa okuti Huku ukahi nokuhololola ehando olio. Otyo tyikahi nokulunda ovanthu ovanyingi okupilulula omienyo viavo, nokulekesa ekolelo liavo, nokumbatisalwa. Onkhalelo vekahi nokulinga omapiluluko, otyilekeso tyokuti “ondaka ya Huku ina omuenyo, ina epondolo.” Etyi Huku ekahi nokuhololola Mombimbiliya konthele yehando liae tyikahi nokupilulula omienyo vietu, tupu matyitualako okupilulula omienyo vietu.
(Ova Hebeleu 6:17, 18) Tyelifwa notyo, etyi Huku atokola okulekesa vali nawa konomphinga mbomulao okuti ehando liae kalipiluluka, nae aane. 18 Ovipuka ovio vivali Huku alinga nalumwe vipondola okupiluluka, iya Huku kapondola okukemba; ovipuka ovio vitupameka onthue vokuatilila motyiholamo opo tukale nonthumbi mekevelelo tuapewa.
Perspicaz Vol. 2 pefo 24 § 6
Ekevelelo
Ekevelelo liomuenyo uhapu nokupindulwa-po nolutu luhavolo “kuovasukuki vokuaihanwa opo vende keulu” olio tyotyili iya tupondola okuyumba-ko onthumbi. (Heb. 3:1) Omakevelelo oo evali, epumphi kombanda yovipuka vivali, iya Huku kapondola okukemba. Ovipuka ovio, omulao nomphango yatyo, iya nekevelelo lili mu Kilisitu, uli keulu uhankhi. Moluotyo ekevelelo olio liihanwa okuti “ohako ikuata owato, ekevelelo olio kamaliponyo, malifuisuapo iya liapama, iya ekevelelo olio malitutuala konyima yotyinyanga tyayapaula ondyuo ya Huku [ngetyi ankho Omunene-nakwa anyingila Momphangu Onthyukuki Monthiki Yokupata Ononkhali], Sesusi watetekela ku onthue okunyingila-mo, aikula ondyila eipongiya pala onthue, akala omunene-nakwa wavilapo monkhalelo yelifwa no ya Melekisedeke apeho-apeho.” — Heb. 6:17-20.
Okutanga Ombimbiliya
(Ova Hebeleu 5:1-14) Mokonda kese munene-nakwa wavilapo uholovonwa pokati kovanthu, upewa otyilinga tya Huku pala ouwa wovanthu, opo aave oviawa novilikutila pala ononkhali. 2 Ngwe utyivila okukala nokankhenda na vana vehena enoñgonoko, vokupengesa, mokonda nae omukuankhali, 3 iya mokonda yotyo, nae una okulinga ovilikutila pala ononkhali mbae muene, ngetyi alinga pala ononkhali mbovanthu. 4 Omunthu kakala omunene-nakwa wavilapo kehando liae, mahi utyipewa vala tyina amaihanwa na Huku, ngetyi tyalingilwe Alau. 5 Tupu na Kilisitu kelinkhimanekele aike muene mokuakala omunene-nakwa wavilapo, mahi wankhimanekelwe na Una wemupopilile okuti: “Ove umona wange; hono ame nakala tate yove.” 6 Ngetyi tupu apopia ponthele onkhuavo okuti: “Ove umunakwa apeho monkhalelo yelifwa noya Melekisedeke.” 7 Mokueenda kuomuenyo wae pano pohi, Kilisitu welikuambelele iya tupu aiti nokulila, nokutokesa ononkhuka, ku Una ankho utyivila okumuyovola kononkhia iya atehelelwa etyi aita mokonda ankho una onthilo na Huku. 8 Namphila ankho omona wa Huku, welilongesile okutavela mokonda yononkhumbi amuene. 9 Iya etyi pahe akaleswa tyafuapo, akala notyilinga tyokuetela eyovo lihapu aveho vana vetavela kwe, 10 mokonda waholovonwa na Huku opo akale omunene-nakwa wavilapo monkhalelo yelifwa no ya Melekisedeke. 11 Tuna ovipuka ovinyingi pala okupopia konthele yae, mahi vialema okuvihangununa, mokonda onwe mualia ovihita matwi. 12 Mokonda pahe onwe ñgeno muvalongesi, mahi nkhele muesukisa omunthu umulongesa ovipuka vyo tete viondaka yatunda ku Huku, iya muakondoka vali mokusukisa omahini, hakulia kuakola. 13 Mokonda, kese munthu utualako okunwa omahini kei ondaka youviuki, mokonda nkhele omona. 14 Mahi okulia kuakola o kuovanthu ovakulu, vana vaundapesa apeho ounongo wavo wokusoka, vetyii-ale oñgeni vaimbuka otyiwa notyivi.