Olie Ohamba Youhamba wa Huku?

• Waholovonwa na Huku. “Ame, ame navialeka ohamba yange . . . opo ndyiyavele omalongo akale epingo liae. Tupu mandyiyavela ohi aiho.” — Salmo 2:6, 8

• Watuka Mombunga Yohamba Daviti. “Tuatyitilwa omona, tuapewa omona womulume. . . . Outumini wae kotyipundi tya Daviti tyoutumini, no mouhamba wae, maukatualako apeho nombembwa opo eukalese tyapama.” — Isaías 9:6, 7.

• Watyitilwa mo Mbelei. “Ove Mbelei . . .  muove mamunthundila una makala omutumini. . . . Omunkhima wae, maukeivalela alo kononthele mbokokule-kule mbohi.” — Miquéias 5:2, 4.

• Wayalwa novanthu, aipawa. “Oe ankho watombwa, nokuyelwe novanthu. . . . Watomwa mokonda yoviponyo vietu. Watyopwa mokonda yononkhali mbetu.” — Isaías 53:3, 5.

• Watutiliswa, apewa otyilinga otyinene. “Ove kumandyekela mondyembo. Kumayeke una wokuna ekolelo muove avolele melangalo. . . . Kokulio kuove kuna ehambu lihapu.” — Salmo 16:10, 11.

Sesusi Kilisitu Wafuapo Opo Atumine Ovanthu

Ovipuka ovio aviho viafuisuapo vala momunthu wike. Omunthu oo, o Sesusi Kilisitu. Sesusi watamo opo akale Ohamba. Tyihe-otyo vala, oandyu imwe yapopilile me ya Sesusi Maliya okuti: “Huku, memupe otyipundi tyoutumini wa tate yae Daviti. . . . Iya Ouhamba wae kamaukapwa.” — Luka 1:31-33.

Sesusi kali ohamba pano pohi. Muene Ohamba Youhamba wa Huku, iya makatuminina ovanthu keulu. Omokonda yatyi tupopilila okuti Sesusi wafuapo opo atumine ovanthu aveho? Tala ovipuka vimwe alingile etyi ali pano pohi.

• Sesusi ankho wesuka novanthu. Sesusi walingile nawa ovanthu aveho. Ankho kalingi okapungulula. Ankho kesukile inkha omona ine omukulu, inkha omukuendye ine omuhi- kuena. Tupu ankho katale inkha wamona ine omuhepi. (Mateusi 9:36; Maluku 10:16) Nthi- ki imwe, omunthu umwe ankho uvela otyilundu emuiti okuti: “Inkha uhanda upondola okunthyakula.” Oñgeni Sesusi elitehelele? Emuetehila okankhenda, emuhakula. — Maluku 1:40-42.

• Sesusi walongesile ovanthu ovipuka viakolela. Wati: “Onwe kamupondola okukala ovapika va Huku no Vomalumono.” Apopi vali okuti tuna okulinga vakuetu ngetyi tuhanda vetulinge. Walongesile okuti Huku kesukile vala netyi tulinga, mahi tupu wesuka netyi tyikahi momutima wetu. Ngotyo, opo tupandwe na Huku tuesukisa okuyunga omalusoke etu. (Mateusi 5:28; 6:24; 7:12) Sesusi tupu walongesile okuti opo tukale nehambu liotyotyili, tuesukisa okunoñgonoka etyi Huku ahanda tulinge, ngatyo umwe tulinga. — Luka 11:28.

• Sesusi walongesa etyi tuesukisa okulinga opo tulekese okuti tuhole vakuetu. Sesusi ankho upopia onondaka mbulunda ovanthu okulinga ovipuka oviwa. Nthiki imwe etyi ankho ekahi nokulongesa, “ovanthu avahuvu unene nonkhalelo yae yokulongesa, mokonda ankho ukahi nokulongesa ngatyina etyitumwa.” (Mateusi 7:28, 29) Wevelongesile “okukala nohole nonondyale [mbavo].” Alo umwe etyi ankho ekahi momuti wemone, welikuambelele okuti: “Tate, veevela mokonda etyi vekahi nokulinga kavetyii.” — Mateusi 5:44; Luka 23:34.