ELONGESO 8

Ononthengele-popia Mbulongesa

Mateusi 13:34, 35

ETYI UNA OKULINGA: Viukisa ondongeso yove nononthengele-popia mbapepuka mbuhiviswe ondongeso yove, opotoyola nawa ovipuka viesukisa.

Popia ononthengele-popia mbapepuka. Linga nga Sesusi, popia ovipuka viapepuka uhangunune ovipuka vialema. Uhaye novinyingi, mavityopola vala onthengele-popia yove. Tala umwe nawa ine ovipuka mopopi monthengele-popia vielikwata umwe neetyi uli nokulongesa. Wahavombese ovateheleli oku wenda nako, avehekumono.

Apa weenda tala. Wahalimbwe ovipuka umona, lilongesa momikanda vieongano, talela kwaava vetyivila okulongesa nawa. Onthengele-popia watala itavela okulongesa nayo, ihoneka, opo utyivile okuviukisa ondongeso yove. Taindya apa umbuholeka.
Ovanthu molongesa vepaka momutwe. Ononthengele-popia mopopi mbuyembe kweetyi ovanthu vei neetyi vehole. Lunguka, wahapopie etyi tyikundisa ovateheleli, nii etyi tyitukana.
Longesa etyi tyesukisa vali. Monthengele-popia ulongesa nayo, yemba vala kweetyi tyesukisa vali, wahaye novinyingi. Ovateheleli vahahinangele-ko vala onthengele-popia yatyo kwapwa, etyi ilongesa avehetyimono.