Okuti Molikuatehila Mokonda Youhamba?

1. Ovanthu ovanyingi velikuatehila okulinga tyi, iya omokonda yatyi?

OVANTHU velikuatehila opo valinge ovipuka vehole. Ovohe vaava omuvo wavo, nonombongo, nononkhono pala ouwa wovana vavo. Vokuhateka opo vafetwe, vakala o noola ononyingi nokulilongesa, putyina omapanga avo anyana. Tupu Jesus welikuatehilile opo alinge ovipuka ankho viakolela kwe. Ankho utupu ehando liokukala omuhona ine okukala novana. Mahi, ankho uhanda okukuatesako Ouhamba wa Huku nononkhono mbae ambuho. (Mateus 4:17; Lucas 9:58) Tupu ovalongwa vae valingile ononkhono mbokukuatesako Ouhamba wa Huku mokonda ankho otyipuka tyakolela vali momuenyo wavo. (Mateus 4:18-22; 19:27) Ngotyo, tuesukisa okulipula okuti: ‘Otyipuka patyi tyakolela vali momuenyo wange?’

2. (a) Ovakristau aveho votyotyili vesukisa okulinga ononkhono patyi? (b) Ononkhono patyi ononkhuavo vamwe valinga?

² Ovakristau aveho votyotyili vesukisa okulinga ononkhono mbokulinga ovipuka vimwe viesukisa opo vatualeko noupanga omuwa na Jeova. Ovipuka ovio viakutikinya okuovola omuvo wokulikuambela, nokutanga Ombimbiliya, nokulinga efendelo liombunga, nokuenda komaliongiyo, nomovilinga viokuivisa.a (Josué 1:8; Mateus 28:19, 20; Hebreus 10:24, 25) Mokonda yononkhono tulinga, nononkhano onongwa mba Jeova, ovilinga viokuivisa vikahi nokuliyawisa, iya ovanthu ovanyingi vatualako okulonda “komphunda yondyuo ya Jeova.” (Isaías 2:2) Opo vakuateseko ovilinga Viouhamba, ovanyingi valinga ononkhono mbokukaundapa Kombetele, nokukuatesako ovilinga viokutunga Onondyuo Mbomaliongiyo no Mbovionge, nokuonganeka ovionge, ine okukuatesako vana vamonekelwa novinimawe, novitateka ovikuavo vali. Namphila, ovilinga ovio havioko viesukisa opo omunthu akakale nomuenyo wahapu, mahi viakolela pala okukuatesako Ouhamba wa Huku.

3. (a) Ouwa patyi tupolako tyina tulinga ononkhono pala ovilinga Viouhamba? (b) Omapulo patyi matukumbulula?

³ Okukuatesako ovilinga Viouhamba, hono tyakolela vali unene. Tyihambukiswa unene okutala ovanthu ovanyingi veliava pala okulinga ehando lia Jeova. (Tanga Salmo 54:6.) Inkha nonthue tulinga ngotyo, matukala nehambu putyina tukevelela okuya Kuouhamba wa Huku. (Deuteronômio 16:15; Atos 20:35) Tyakolela unene atuho tulitale nawa, nokulipula: Okuti kuna ononkhalelo tupondola okuundapa vali unene movilinga Viouhamba? Oñgeni tukahi nokuundapesa omuvo wetu, nonombongo, nononkhono, nounongo? Oityi tuesukisa okutala nawa tyina tulinga ononkhono ine ovilikutila? Matutale oityi tupondola okulilongesila konongeleka mba vamwe valingile ononkhono ine ovilikutila. Otyo matyitukuatesako okukala vali nehambu.

OVILIKUTILA MO ISILAYELI YOKOHALE

4. Ouwa patyi ova Isilayeli ankho vapola kokulinga ovilikutila?

⁴ Ovanthu mo Isilayeli yokohale ankho vaava ovilikutila opo vaevelwe ononkhali mbavo. Ovilikutila ankho viesukisa opo vapandwe na Jeova. Vimwe ankho veviitwa, iya ovikuavo ankho ovo muene veliava pala okuvilinga. (Levítico 23:37, 38) Ovilikutila aviho viokuyokua ankho ovo muene veliava pala okuvilingila Jeova. Ongeleka onkhuavo yavilapo yokuava ovilikutila ku Jeova yalingilwe etyi Salomau apakula ondyuo ya Huku.​—2 Crônicas 7:4-6.

5. Oityi Jeova alingile opo alo umwe vana vokuahepa vaave ovilikutila?

⁵ Jeova wanoñgonokele noluembia okuti vamwe ankho kamavetyivili okuava ngavakuavo, iya apopi okuti kese munthu upondola okuava etyi evila. Jeova watumine okuti ankho vena okulinga ovilikutila viovinyama iya ohonde yatyo aveinengulila pohi. Ovilikutila ovio, ankho “okahi kovipuka oviwa maviya” pokati ka Jesus. (Hebreus 10:1-4) Mahi, Jeova ankho kakuluminya ovanthu valandule otyitumino otyo. Mongeleka, inkha omunthu ankho utupu ongi ine otyinkhombo, Huku ankho utavela aave onopomba onombali. Ngotyo, alo umwe ankho vokuahepa vapondola okuava ovilikutila ku Jeova avahambukwa. (Levítico 1:3, 10, 14; 5:7) Namphila Jeova ankho etavela ovilikutila viovinyama vielikalaila, ankho pena ovipuka vivali aita kuaveho veliava pala okulinga ovilikutila.

6. Ovipuka patyi vivali ankho viitwa kuvana valinga ovilikutila? Ankho tyakolela okuvitavela mokonda yatyi?

⁶ Tete, omunthu ankho una okuava etyi tyakongoka nawa. Jeova ankho ketavela otyilikutila, inkha otyinyama ankho tyavela ine tyalemana. (Levítico 22:18, 20) Vali, omunthu wokuava otyilikutila, ankho una okukala tyasukuka ngetyi tyapopiwa Movitumino. Inkha omunthu ankho kasukukile, tete ankho una okuava otyilikutila tyonkhali ine otyiawa tyokulivela onombei opo apandwe vali na Jeova. (Levítico 5:5, 6, 15) Otyo ankho tyakolela unene. Jeova wapopile okuti inkha omunthu umwe wahasukukile ulia kotyilikutila oe muene aava, una okuipawa. (Levítico 7:20, 21) Mahi, inkha omunthu wasukuka iya otyilikutila tyae tyakongoka nawa, ankho ukala nomutima wasukuka nehambu enene.​—Tanga 1 Crônicas 29:9.

OVILIKUTILA VILINGWA HONO

7, 8. (a) Oñgeni ovanyingi velitehelela tyina vaundapa movilinga Viouhamba? (b) Ovipuka patyi tuna tupondola okuavela Jeova?

⁷ Hono, ovakuatate vetu ovanyingi veliava pala okuundapa unene movilinga via Jeova. Okuundapa unene pala okukuatesako ovakuatate vetu, tyihambukiswa Jeova nonthue muene. Omukuatate umwe uundapa movilinga viokutunga Onondyuo Mbomaliongiyo, nokukuatesako vana vamonekelwa novinimawe, novitateka ovikuavo vali, wapopia okuti uhambukwa unene tyina akuatesako ovakuatate vae. Wati: “Okutala ehambu nolupandu luovakuatate nonomphange tyina vekahi Mondyuo yavo omphe Yomaliongiyo ine tyina vakuatesuako mokonda yokuamonekelwa novitateka, tyituhambukiswa unene atumono okuti ononkhono mbetu kambapesekele.”

⁸ Eongano lia Jeova pano pohi apeho liovola ononkhalelo mbokukuatesako ovilinga Viouhamba. Menima 1904, Omukuatate C. T. Russell wapopile okuti tuesukisa okulinga ononkhono nokuundapesa omuvo wetu, no nombongo, novikuavo vali opo tuhivilike Jeova. Namphila tyahapepukile okulinga ovilikutila pala Jeova, mahi tyeeta ononkhano onongwa. (2 Samuel 24:21-24) Okuti ovipuka tuna tupondola okuviundapesa vali nawa movilinga via Jeova?

9. Oityi Lucas 10:2-4 itulongesa konthele yoñgeni tuna okuundapesa omuvo wetu?

⁹ Omuvo wetu. Tyesukisa omuvo omunyingi nononkhono pala okupitiya nokulinga omikanda vietu, nokutunga Onondyuo Mbomaliongiyo no Mbovionge, nokuonganeka ovionge, nokukuatesako vana vamonekelwa novinimawe novitateka ovikuavo, novilinga ovikuavo viesukisa. Tuna vala o noola 24 kese nthiki, mahi Jesus wetuavela onondonga mbutukuatesako okuundapesa omuvo wetu nonondunge. Etyi Jesus atumine ovalongwa vae okukaivisa, wevepopilile okuti “muhatolesei nawike mondyila pokulikukunya.” (Lucas 10:2-4) Omokonda yatyi Jesus eveavelele onondonga ombo? Pononthiki mba Jesus ovanthu tyina velikukunya ankho kavelivivi vala okuoko ine okulikuatesapo. Mahi, ankho velipupula ehimbwe iya alo umwe velipetamena avaikila konongolo. Otyo tyimana omuvo omunyingi. Jesus ankho kekahi nokupopia okuti ovalongwa vae kavapondola okukukunya. Mahi, ankho ukahi nokuvekuatesako okutala okuti omuvo wavo kauhi, moluotyo ankho vesukisa okuundapesa nawa omuvo nokulinga etyi tyakolela vali. (Efésios 5:16) Okuti nonthue tupondola okulandula onondonga ombo opo tukale vali nomuvo wokuundapa movilinga Viouhamba?

10, 11. (a) Oñgeni onombongo tuava mbuhole okuundapeswa? (b) Oñgeni 1 Coríntios 16:1, 2 ipondola okutukuatesako?

¹⁰ Onombongo mbetu. Tyesukisa onombongo ononyingi pala okukuatesako ovilinga Viouhamba ouye auho. Kese enima, kuundapeswa onomiliau ekwi mbono rande pala okukuatesako ovilinga viavana vatalelapo omawaneno, novakokoli-ndyila vavilapo, no nomisionaliu. Tunde mo 1999, kuatungwa Onondyuo Mbomaliongiyo mbulamba po 24.500 movilongo viokuahepa. Mahi, nkhele kuesukisa vali Onondyuo Mbomaliongiyo mbuhika po 6.400. Kese hanyi kulingwa 100 yonomiliau Mbomutala Womulavi no Despertai!. Ovilinga ovio aviho vilingwa nonombongo muava.

¹¹ Jeova watumine apostolu Paulu okuhoneka onondonga tupondola okulandula tyina tulinga oviawa. (Tanga 1 Coríntios 16:1, 2.) Wapamekele ovakuatate vae mo Korintu, opo konthyimbi yosimano vapake nawa etyi mavaave, avahakevela alo konthyulilo yosimano iya avaave etyi tyahupapo. Tupu hono, ovakuatate nonomphange kavaave etyi tyahupapo, mahi, vaava nomutima auho etyi vevila. (Lucas 21:1-4; Atos 4:32-35) Jeova upanda unene otyituwa otyo.

12, 13. Omokonda yatyi vamwe vasokela okuti kamavetyivili okuundapa unene movilinga Viouhamba? Oñgeni Jeova mevekuatesako?

¹² Ononkhono mbetu nounongo. Jeova utukuatesako tyina tuundapesa ononkhono mbetu nounongo movilinga Viouhamba. Walaa okutukuatesako tyina tuamaponwa. (Isaías 40:29-31) Tusoka okuti kamatutyivili okuundapa unene movilinga Viouhamba? Ine tusoka okuti vakuetu ovanongo vali kuonthue? Hinangela okuti Jeova upondola okuyawisa ounongo wetu, ngetyi alingile na Bezalele na Ooliabe.​—Êxodo 31:1-6; tala olutalatu pefo pahimbikila onthele ei.

¹³ Jeova utuavela ondundo opo tuahayeke natyike tyitutalameke, atuhalingi atyiho tuvila movilinga viae. (Provérbios 3:27) Puetyi ankho ondyuo ya Huku ikahi nokupinduluapo, Jeova wapopilile ova Judeu mo Jelusalei opo vasoke konthele yetyi ankho vena okulinga opo vakuateseko ovilinga viokutunga. (Ageu 1:2-5) Ankho vatalukwa, avahapake tete momuenyo wavo ovilinga via Jeova. Tuesukisa okulipula: Okuti kuonthue okulinga ehando lia Jeova tyakolela vali kovipuka aviho ovikuavo? Okuti tupondola okusoka nawa konthele yomuenyo wetu nokutala oñgeni tupondola okuundapa vali movilinga Viouhamba mononthiki mbuno mbahulililako?

OKUAVA ETYI TUNA

14, 15. (a) Ongeleka yovakuatate vetu vokuahepa itulongesa tyi? (b) Tuesukisa okukala nehando liokulinga tyi?

¹⁴ Ovanthu ovanyingi vakala movilongo viahepa iya okulitekula katyapepukile. Eongano lietu liundapa pala okukuatesako ovakuatate vetu movilongo ovio. (2 Coríntios 8:14) Mahi, alo umwe ovakuatate vetu vahepa vahambukilwa okuava. Jeova uhambukwa unene tyina evetala okuti vekahi nokuava nehambu atyiho vevila.​—2 Coríntios 9:7.

¹⁵ Motyilongo tyimwe tyahepa unene mo Afrika, ovakuatate vamwe vateta onthele imwe komapia avo iya etyi vateyamo veketyilandesa, onombongo mbatyo avembuave pala okukuatesako ovilinga Viouhamba. Tupu motyilongo otyo, ovakuatate nonomphange ankho vahanda okukuatesako okutunga Ondyuo Yomaliongiyo. Anthi, ankho opokulima. Mahi, mokonda ankho vahanda unene okukuatesako okutunga Ondyuo Yomaliongiyo, komutenya vakatunga, iya kongulohi avakalima. Otyituwa otyo otyiwa ngatyi! Tyituhinangelesa ovakuatate ankho vakala mo Masedonia yokohale. Namphila ankho “vahepa unene,” vaitile Paulu eveyeke opo vaavele ovakuatate vavo onombongo. (2 Coríntios 8:1-4) Nonthue tukalei ovanthu votyali opo tulekese okuti tupandula ovipuka oviwa Jeova ehole okutuavela.​—Tanga Deuteronômio 16:17.

16. Oityi tuna okulinga opo Jeova etavela etyi tumulingila?

¹⁶ Tyina tulinga ngotyo, tuesukisa okutala nawa opo tuahayekepo ovipuka viakolela vali, ngetyi onombunga mbetu. Ngetyi tyalingile ova Isilayeli, tuna okukala nonthumbi yokuti Huku utavela etyi tumulingila. Oityi tyipondola okulingisa Jeova okuanya etyi tuava? Tuesukisa okuhinangela okuti ovipuka viakolela vali, ombunga yetu noupanga wetu na Jeova. Jeova ‘kametavela’ etyi tulinga movilinga viokutunga Onondyuo Mbomaliongiyo, nokukuatesako vana vena ovitateka, novilinga ovikuavo, inkha katutekula ombunga yetu nokuikuatesako okukala noupanga omuwa na Jeova. Okulinga ngotyo, ongatyina tuhanda okuava etyi tuehena. (Tanga 2 Coríntios 8:12.) Tupu, tuesukisa okutualako okupameka oupanga wetu na Jeova opo tutualeko okupandwa nae. (1 Coríntios 9:26, 27) Tupondola okukala nonthumbi yokuti inkha tulandula ovitumino Viombimbiliya, etyi tuava matyituhambukiswa, “nokutavelwa” na Jeova.

ETYI TUAVA TYAKOLELA UNENE

17, 18. Oñgeni tulitehelela konthele yavana vakuatesako nombili ovilinga Viouhamba? Iya oityi atuho tuesukisa okusoka nawa?

¹⁷ Ovakuatate vetu ovanyingi nonomphange, valinga ononkhono, nokuava omuvo wavo, nonombongo pala okukuatesako ovilinga Viouhamba. (Filipenses 2:17) Tupanda unene vana valinga ngotyo. Tupu tupanda ovakai novana mokonda vayeka ovalume vavo novohe vahongolele ovilinga Viouhamba.

¹⁸ Tyesukisa okulinga ononkhono pala okukuatesako ovilinga Viouhamba. Tulikuambelei nokusoka nawa oñgeni tupondola okuundapa vali nawa movilinga via Jeova. Inkha tulinga ngotyo, matukala nononkhano onongwa pahetyino, “nomouye omupe.”​—Marcos 10:28-30.