Ono Mandre Mbakala Onombangi mba Jeova Tyapopiwa Na

Felisa: Natyitiwa mombunga yovanthu vahepa, ko Espanha. Meumbo lietu atuho Tu vokatolika. Ankho tuhole unene ongeleya. Ovanthu 13 vombunga yange omalombe ine vaundapa mokapela. Umwe puvo otyepwa tya me, tupu ankho ulongesa mosikola yo Katolika. Etyi anyima, o Papa João Paulo II aimukanena nawa. Tate ankho unthila ovivela, me ankho ongundya. Onthue tuatyitwa etyinana, ame ndyityiveli.

Puetyi ndyina omanima 12, mo Espanha amukala ovilwa. Etyi ovilwa viapwa, tate apakwa mokaleya mokonda ovatumini ankho kavahande omalusoke ae opulitika. Me atyimupuilisa unene okututekula aike. Pahe me atuala onondenge mbange Araceli na Lauri, na Ramoni, vakatekulwe no nomandre mepundaumbo lio Bilbao. Onondenge mbange pahe ankho vena okulia.

Araceli: Pomuvo opo pahe ankho ndyina omanima 14, Lauri una 12, Ramoni una 10. Ankho tueivaluka unene keumbo. Ankho ovilinga vietu mono mandre okukomba. Etyi palamba omanima evali, ono mandre ambututuala ko Saragoça atukakala mondyuo imwe ankho mutekulwa vokuakulupa. Ankho tuundapa unene okukomba motyitelekwa iya ankho tyituponeswa unene.

Felisa: Etyi onondenge mbange vatualwa kono mandre mboko Saragoça, ovo me na himi yange ankho elombe lio potyilongo tyetu, avanthuala kuvakuetu. Ankho vanthuala oko mokonda ankho vahanda ndyikale kokule nomukuendye umwe ankho unthyanda. Andyihambukwa unene okutualwa kono mandre, mokonda ankho ndyihole Huku. Ononthiki ambuho ankho ndyenda kokapela, iya ankho nahanda okukala omisionaliu Yokatolika ngomphange yange tulikuai nae mo me ankho uli ko Africa.

Mahi etyi nehika mono mandre, andyinumana unene mokonda ankho hikahi nokulinga etyi nahanda. Ono mandre ankho kambumphe ondundo yokukaundapela Huku kovilongo ovikuavo, ngetyi ankho nahanda. Moluotyo etyi palamba enima, andyikondoka keumbo opo nkhakuateseko himi yange ankho elombe. Ame ankho ndyimulingilako ovilinga vio meumbo, ononthiki ambuho kongulohi ankho tulikuambelela kotyilanda tyekulusu (Terço). Tupu ankho ndyihondyuela pononthemo mbo pokapela nokuvaleka ovilolo, me Maliya no “nosandu.”

Araceli: Ankho etyi ndyikala ko Saragoça, nafuisilepo otyitumino tyotete tyokukala omandre. Konyima ono mandre ambutuyapula no nondenge mbange. Ame ambunthuala kondyuo yono mandre ko Madrid, Lauri avemutuala kono mandre mbo ko Valencia. Ramoni esala ko Saragoça. Ko Madrid andyifuisipo otyitumino tya vali tyokukala omandre. Ovanthu ovanyingi ankho veya mono mandre, vamwe veya okulongeswa ovakuavo ovokuakulupa. Pahe ankho tuna ovilinga ovinyingi. Andyiundapa mosipitali yono mandre.

Ankho nesuka unene okukala omandre. Ankho ndyisoka okuti ngotyo matutange Ombimbiliya atuinoñgonoka vali nawa. Mahi etyi ankho tyilingwamo atyinthyoyesa. Nawike ankho ulongesa Nombimbiliya, alo umwe tyina vapopia konthele ya Huku ine konthele ya Jesus. Nalongesilwe vala ovipuka vimwe melaka lio Latin, andyililongesa ono “sandu” nokufenda ku Maliya. Haunene ankho tulinga vala ovilinga viokualema.

Pahe andyinumana unene, andyikala tyasukalala. Andyihimbika okusoka okuti, hahe vali ndyikaovole ovilinga opo ndyikuateseko ombunga yange, tyipona okuundapela vala ono mandre, vakuetu ngavo vakala nonombongo. Moluotyo andyitomphola nonkhalamutwe yono mandre, andyimupopila okuti ame nahanda okuenda. Mahi andyikila mondyuo imwe. Ankho wasoka okuti hamwe ngotyo himasoko vali okuenda.

Omandre aikulapo andyitundumo, mahi konyima etyi vamona okuti nongotyo nahanda okuenda, avandyikila-mo vali. Etyi vandyikila-mo ovikando vitatu, otyo nahanda vala okuenda, avamphopila okuti moende vala inkha uhoneka onondaka ombu: “Ame ndyienda mokonda nahanda okuundapela Satanasi hihande Huku.” Otyo atyinumanesa unene. Ame ankho nahanda umwe okuenda, mahi okuhoneka onondaka ombo ankho hahandele. Pahe andyipopi nelombe, andyilipopila etyi nalingwa. Elombe alipopi Nombisipu opo vankhondole ko Saragoça. Nakalako vala onohanyi mbehehi, avandyeke ndyende keumbo. Apakala vala katutu ovo Lauri na Ramoni, navo avatunduko.

OMUKANDA WETUYAPULA

Felisa: Pakala vala katutu andyinepwa, atuilukila kepundaumbo lio Cantábria mo Espanha. Pomuvo opo, nkhele ankho ndyenda umwe apeho kokapela. Mahi nthiki imwe mo Tyalumingu kokapela elombe ankho lianumana unene, alitukandukila, aliti: “Talei omukanda ou!” Omukanda wokuati, A Verdade Que Conduz à Vida Eterna. Alipopi okuti, “Ankho umwe puonwe una omukanda ngou eweete kuno,okueti hatyo euyumbehi!”

Omukanda oo ame ankho ndyitupu-o, mahi ankho ndyiuhanda. Palamba vala ononthiki ononthatu, meumbo lietu amuya ovakai vevali. Ankho Onombangi mba Jeova, avamphe omukanda oo. Andyiutange auho motyinthiki tyike vala. Etyi onthiki onkhuavo veya vali meumbo, avamphulu okuti kuhande okulilongesa Ombimbiliya? Ame andyiti ndyihanda.

Apeho ankho nahanda okuhambukiswa Huku. Pahe andyinoñgonoka otyili konthele ya Jeova, andyikala nonthilo nae. Ankho nahanda okupopila ovanthu aveho konthele ya Jeova. Menima lio 1973, andyimbatisalwa. Onthiki ambuho ankho ndyiovola okulongesa ombunga yange. Mahi ombunga yange ankho kaihande, alo umwe ondenge yange Araceli ankho upopia okuti etyi ndyilongesa ovanthu hatyiliko.

Araceli: Mokonda natekulilwe onya, etyi ankho ndyikala nono mandre, ankho pahe hihande vali ongeleya. Mahi, no ngotyo nkhele andyitualako okuenda kokapela movi Tyalumingu otyo ndyilikuambela kotyilanda Tyekulusu. Ankho ndyitualako nehando liange lio kunoñgonoka Ombimbiliya, otyo ndyilikuambela opo Huku ankhuateseko. Konyima Felisa amphopila etyi ankho ekahi nokulongeswa. Ankho tyemuhambukiswa unene, andyiti hamwe makala otyova. Ame ankho hetavelele etyi ankho ekahi nokumphopila.

Andyikondoka vali ko Madrid ngako ndyiundapa, tupu ngako ndyinepwa. Apalambe omanima amwe, mahi tyina ndyitala ovanthu ovanyingi venda apeho kokapela, kavalingi ngetyi Jesus alongesa. Moluotyo, ndyiyekepo okuenda kokapela. Tete ankho ndyifenda okuti kuna ono “sandu,” no ifelunu, mahi ankho otyipuka nehetavela, okuti elombe lieevela ononkhali. Andyiyumbuhi ovilolo aviho ankho ndyina. Mahi ankho hityii okuti ngotyo nalinga etyi tyaviuka. Ankho nanumana unene, mahi andyitualako okulikuambela ku Huku okuti: “Huku nahanda okukunoñgonoka. Nkhuateseko!” Ndyihinangela etyi Onombangi mba Jeova ankho veya meumbo liange, mahi ankho hilupuka pondye. Mokonda ankho hitavela vali kongeleya naike.

Ondenge yange Lauri ankho ukala ko França, Ramoni ankho ukala ko Espanha. Menima 1980 avahimbika okulilongesa Ombimbiliya no Nombangi mba Jeova. Ame ankho ndyisoka okuti vekahi vala nga Felisa, okuenda vala kongeleya mahi otyo vehetyii okuti vekahi nokulongeswa omatutu. Nthiki imwe atukala omapanga na Angelines, ankho tukala nae pomaumbo etu. Nae ankho Ombangi ya Jeova. Angelines kumwe nomulume wae, ovikando ovinyingi ankho vamphula inkha nahanda okulilongesa navo Ombimbiliya. Avetyimono okuti ame hesukile nongeleya, mahi ankho nahanda umwe okunoñgonoka Ombimbiliya. Andyiveavela ekumbululo lihambukiswa, andyiti: “Nahanda. Mahi ndyitavela vala mundongese Ombimbiliya putyina mundyeka ndyitange moyange muene!” Ankho Ombimbiliya apopia yapitiyua na Nácar-Colunga.

OMBIMBILIYA PAHE YETUHONYEKA

Felisa: Etyi nambatisalwa mo 1973, ankho mo Santander epundaumbo enene lio Cantábria mo Espanha, Onombangi mba Jeova ankho vena 70. Ankho tuenda kokule okukapopila ovanthu ondaka ya Huku ankho vakala mononthele ambuho mbepundaumbo olio. Ngotyo ankho tuenda nekalela, pahe atuendela ketuku-tuku opo tuhike komaumbo.

Momanima omanyingi nalongesa ovanthu ovanyingi Ombimbiliya, 11 puvo vambatisalwa. Ovanthu ovanyingi nalongesa ankho vali mongeleya Yokatolika. Pokuvelongesa ankho ndyina okupwa-lundo. Ankho vekahi vala nga ame, kavetyii okuti ankho vekahi nokulongeswa omatutu. Mahi ankho ndyityii okuti, Ombimbiliya vala nospilitu ya Jeova ikuatesako omunthu okupilulula omalusoke ae, nokunoñgonoka otyili. (Hebreus 4:12) Omulume wange Bienvenido ankho ekakunye, etavela otyili ambatisalwa mo 1979. Alo umwe me yange namphila pahe anyima mahi nae ankho wehimbika okulilongesa Ombimbiliya.

Araceli: Puetyi nahimbika okulilongesa Ombimbiliya no Nombangi mba Jeova, ankho ndyisoka okuti hamwe himeveyumbu onthumbi. Mahi mokueenda kuomuvo, pahe ankho hisoko vali ngotyo. Onombangi mba Jeova ankho kavalongesa vala etyi Ombimbiliya ipopia, mahi tupu vaendela muetyi ilongesa. Onthumbi yange mu Jeova no Mombimbiliya ailiyawisa, pahe ankho ndyina ehambu. Vamwe puava tukala navo pomaumbo avamono omapiluluko nalinga, avamphopila okuti: “Araceli, tualako nondyila waholovona!”

Ndyihinagela elikuambelo nalingile, andyiti: “Napandula etyi wahandyekele Jeova, wampha onomphitilo ononyingi opo ndyivase etyi ankho ndyiovola— enoñgonoko liotyili Tyombimbiliya.” Tupu pahe naita otyiponyo omukulu wange etyi ankho nemukandukila andyimupopila onondaka mbunumanesa. Okutuka opo, katutañguna vali, pahe tutomphola konthele Yombimbiliya. Nambatisalwa mo 1989, ankho ndyina omanima 61.

Felisa: Pehepano ndyina omanima 91. Omulume wange wanyima, tupu hityivili vali okuundapa ngetyi ankho ndyilinga kohale. Mahi ndyitualako okulongesa Ombimbiliya, tupu tyina ndyityivila apeho ndyenda komaliongiyo no movilinga viokuivisa.

Araceli: Ndyityihole tyokupopila omalombe konthele ya Jeova, nono mandre tyina tuamelivasi, tyafuile omokonda ankho na ame ndyi mandre. Tuhole okukala netompho ewa na vamwe pono mandre iya vamwe ndyihole okuvetuaila omikanda. Ndyihinangela elombe limwe natompholele nalio. Elombe olio, alitavela etyi nelipopila. Pahe alimphulu okuti: “Mahi tyina nakulupa ñga mandyii napi vali? Ava ndyilongesa mokapela kange nombunga yange mavatiwi?” Ame andyimukumbulula, andyiti: “Iya Huku matiwi?” Pahe alityinoñgonoka okuti etyi napopia tyaviuka, mahi tyina ndyitala kahandele. Wahanda umwe okutavela otyili mahi watila owoma.

Nalumwe mandyilimbwa onthiki omulume wange amphopila okuti na ame nahanda okuenda keliongiyo nove. Otyikando tyotete aya keliongiyo ankho una omanima 80 iya okutunda opo nalumwe alañgene keliongiyo. Walongesua Ombimbiliya, akala omuivisi. Ndyihinangela ononthiki ankho tuundapa kumwe nae movilinga viokuivisa. Ankho kuakamba vala onohanyi onombali na ambasatilwe, mahi anyimi.

Felisa: Puetyi nehimbika okulingila Jeova, onondenge mbange vetatu ankho vendyele. Mahi pahe navo vetavela otyili. Tyotyili, otyo otyipuka tyimwe otyiwa nakala natyo momuenyo wange nkhele nali. Konyima ankho pahe tukala kumwe nehambu, otyo tutomphola konthele ya Jeova Huku yetu Nondaka yae! Pahe atuho tufenda Jeova.a