“Yeka Ekoleleyo Likale Notyilinga Tyalio Tyafuapo”

1, 2. (a) Ongeleka ya Gideau nomafualali ae 300 itulongesa tyi? (Tala olutalatu pefo pahimbikila onthele.) (b) Ngetyi tyipopia Lucas 21:19, omokonda yatyi okukoleleya tyesukisila unene?

NKHELE soka! Omafualali ova Isilayeli ankho ahongolelwa na Gideau ankho ena ovitateka ovinene, akalele novilwa ovinene nonondyale mbavo iya aepuila. Gideau nomafualali ae vataata ova Midiaa, otyinthiki atyiho otyikambo tyina ono kilometulu 32! Ombimbiliya ipopia etyi tyaendapo konyima yati: “Gideau nomafualali 300 avayauka ondongi Jordau, mahi ankho vaponwa.” Mahi ankho vena okutualako mokonda nkhele kavenefinde ovilwa, ankho vena okuluisa omafualali 15.000. Onondyale mbavo ombo ankho mbukahi nokuluiswa ova Isilayeli mokueenda kwo omanyingi, moluotyo ankho kavapondola okuveyeka. Moluotyo, Gideau nomafualali ae vatuaileko okutaata onondyale mbavo, avembuipaa!—Juízes 7:22; 8:4, 10, 28.

² Nonthue tukahi nokulwa novitateka, tuna ovilwa vimwe viepuiya. Onondyale mbetu o Satanasi nouye wae, nomalusoke etu oukuankhali. Ovanyingi puonthue tukahi movilwa ovio momanima omanyingi. Mokonda Jeova ukahi nokutukuatesako tukahiale nokufinda ovilwa ovinyingi. Mahi nkhele katunevivitule. Pamwe tupondola okuponwa. Ine hamwe tupondola okuponwa okukevela onthyulilo youye uno. Jesus wetulondola okuti makukakala ovitateka ovinyingi nononkhumbi mokueenda kuononthiki mbahulilila. Mahi apopi vali okuti inkha tukoleleya tupondola okufinda. (Tanga Lucas 21:19.) Okukoleleya oityi? Oityi matyitukuatesako okukoleleya? Oityi tupondola okulilongesila kuvana vakoleleyile? Oñgeni tupondola okuyeka “ekoleleyo likale notyilinga tyalio tyafuapo”?—Tiago 1:4.

OKUKOLELEYA OITYI?

3. Okukoleleya oityi?

³ Mombimbiliya, okukoleleya katyihangununa vala okupameka tyina una ovitateka ine hamwe okuhesuku navio. Tyakutikinya onkhalelo tusoka konthele yotyitateka, nonkhalelo tulitehela tyina tuna ovitateka. Okukoleleya tyitukuatesako okukala nomutima wakola, atukala nekolelo, atupu-elundo. Omukanda umwe wati, okukoleleya otyituwa tyimwe tyitukuatesako okukala nekevelelo liapama, atuhasoyo namphila tuna ovitateka. Tupu tyitukuatesako okutualako nekolelo liapama, atuhatenga-tenga alo umwe tyina tuvasiwa movitateka viepuiya unene. Okukoleleya tyitukuatesako okufinda ovitateka ovio, atutualako novilinga vietu, atuhasoko koluihamo vituetela.

4. Oityi tupopila okuti ohole oyo ilunda okukoleleya?

⁴ Ohole ituavela ondundo yokukoleleya. (Tanga 1 Coríntios 13:4, 7) Omononkhalelo patyi? Ohole na Jeova itulunda okukoleleya kese otyitateka ayeka tyitumonekele. (Lucas 22:41, 42) Ohole novakuatate vetu itukuatesako okukoleleya tyina vetulinga oviponyo. (1 Pedro 4:8) Ohole na una tuelinepa nae itukuatesako okukoleleya ‘ovitateka’ vikala pokati kovalinepi, alo umwe pokati kovalinepi velihole, ivekuatesako okupameka otyinepo.—1 Coríntios 7:28.

OITYI MATYIKUKUATESAKO OKUKOLELEYA?

5. Omokonda yatyi Jeova oe vala una ounongo wokutukuatesako opo tukoleleye?

⁵ Likuambela ku Jeova ekukuateseko. Jeova “o Huku wokuaava ekoleleyo nepameko.” (Romanos 15:5) Jeova oe vala wii nawa oñgeni tuatuwa, nomaluihamo etu, nonkhalelo tuatungwa. Moluotyo wii nawa-nawa etyi tuesukisa opo tutyivile okukoleleya. Ombimbiliya ipopia okuti: Huku “ufuisapo ehando lia vana vena onthilo nae. Utehelela tyina veliyava okuita ekuateso, eveyovola.” (Salmo 145:19) Mahi oñgeni Huku akumbulula omalikuambelo etu, tyina tumuita ononkhono opo tukoleleye?

6. Ngetyi Ombimbiliya yapopia, oñgeni Jeova “etuavela omphitilo opo tutyivile okukoleleya”?

⁶ Tyina tuita ku Jeova opo etukuateseko okukoleleya, Jeova ulaa “okutuavela omphitilo.” (Tanga 1 Coríntios 10:13.) Oñgeni etyilinga? Pamwe Jeova upolapo otyitateka tyatyo. Mahi pamwe, utupameka tyina tuvasiwa notyitateka opo “tukoleleye noumphualundo nehambu.” (Colossenses 1:11) Mokonda Jeova wii nawa etyi tuatungwa alo umwe omalusoke etu, no ñgeni tukahi, nalumwe metuyekela otyitateka ei okuti kamatutyivili okutualako nekolelo.

7. Popia ongeleka ilekesa okuti tuesukisa okulia Huku aava opo tukoleleya.

⁷ Yeka Okulia Huku aava kupameke ekolelo liove. Omokonda yatyi okulia Huku aava kuesukisila? Mongeleka: Omunthu ulinga oungendi, opo akoleleye ehiki oku ahanda wesukisa okulia atuuka. Kali vala ngomunthu wahaende nakuike. Tyelifwa notyo, tuesukisa okulia okulia Huku aava opo tukoleleye. Tuna okuovola omuvo wokulinga elilongeso lietu lioulike, nokuenda komaliongiyo. Ovipuka ovio mavitukuatesako okutualako nekolelo liapama.—João 6:27.

8, 9. (a) Ngetyi tyipopia Jó 2:4, 5 oityi tyakutikinya movitateka vietu? (b) Tyina una ovitateka, omalusoke patyi upondola okukala nao?

⁸ Soka koukuatyili wove ku Huku. Tumona ononkhumbi tyina tulolwa. Mahi pena vali otyipuka otyikuavo. Oukuatyili wetu ku Huku upondola okulolwa. Onkhalelo tukala tyina tuna ovitateka, mailekesa inkha tutyii okuti Jeova oe Omutumini wotyotyili mouye auho. Ñgeni ngotyo? Satanasi mokonda ondyale, uyele outumini wa Huku iya ukuela Jeova okuti ovanthu vemutavela vala mokonda una etyi evepa. Satanasi wati: “Omunthu maave ovipuka aviho ena mokonda yomuenyo wae.” Konyima Satanasi apopi konthele ya Job okuti: “Inkha uhanda tandaveka okuoko kuove, mbambavo, omuyame alo komankhipa no kohitu, otale inkha kamekuyale.” (Jó 2:4, 5) Okuti Satanasi wapiluluka? Kapilulukile! Konyima yetyi apopia onondaka ombo, apakala omanima omanyingi Satanasi keulu alitahuluako, mokonda ankho nkhele litualako okutendeleya ovaumbili va Huku. (Revelação 12:10) No hono Satanasi utualako okupopia okuti ovanthu vafenda vala Huku mokonda yelungavi. Uhanda tuanye outumini wa Huku, tupu atuyekepo Okumuumbila.

⁹ Tyina una ovitateka, soka ngatyina ukahi pokati kovanthu vekahi nokulinana ove. Satanasi novilulu vekahi nthele-imwe. Vekahi nokutala etyi molingi, otyo vekupopia okuti moyekeko. Onthele onkhuavo, kuna Jeova Nohamba yetu Jesus Kristu, novalembulwa pahe vekahi keulu, nono andyu. Vekahi nokutala ononkhono ukahi nokulinga, otyo vapopia okuti likuatehila! Vahambukua unene mokonda veete okuti ove wafuapo pala okukoleleya na utualeko noukuatyili wove ku Jeova. Pahe oivi Jeova okupopila okuti: “Kala nonondunge mona wange, hambukiswa omutima wange, opo ndyikumbulule una undinga omukuele.” —Provérbios 27:11.

10. Oñgeni tupondola okuhetekela Jesus putyina tutala kondyambi opo tukoleleye?

¹⁰ Tala kondyambi. Soka ñgeno ukahi moungendi, una oku wenda kokule. Tyina uti pokati, ondyila una okukuata ilambela mombuelo yeulungu, hamwe evoyo limwe enene. Tyina ukuata mevoyo omo natyike weete, muanthikovela vala. Mahi utyii okuti inkha utualako okuenda mokatumbuka kondye ovasi vali otyimimi. Omuenyo mouye uno weelekua noungendi oo. Ove pamwe upondola okukala novitateka ovinyingi, olithela okuti kuetyivilile vali okukoleleya. Mahi alo umwe Jesus welitehelele ngotyo. Etyi aipaelwa momuti wemone, wankhile omapita. Ononkhumbi ombo, tyipondola mbakalele otyitateka otyinene momuenyo wae! Oityi tyakuatesileko Jesus okukoleleya? Ombimbiliya yapopia okuti Jesus tyemukuatesileko “ehambu ankho apakelwa.” (Hebreus 12:2, 3) Opo Jesus akoleleye ankho usoka kondyambi, kwe ankho tyesukisa vali okunkhimaneka enyina lia Huku nokuamena outumini wae. Ankho utyii okuti ovitateka enavio mavilambe, mahi ondyambi ankho makakala nayo keulu o ya apeho. Hono ovitateka tupondola okukala navio vipondola okutupuiya unene, tupu vipondola okutuihama unene, mahi hinangela apeho okuti mavilambe.

“VANA VAKOLELEYILE”

11. Otyiwa okulilongesila konongeleka mba vana “vatuailako okukoleleya” mokonda yatyi?

¹¹ Hanthue-ko vala tuna okukoleleya. Opo apostolu Petulu akuateseko Ovakristau okukoleleya movitateka vietwa na Satanasi, wahoneka okuti: “Muyalei nekolelo liapama, okunoñgonoka okuti no vakuatate venyi ouye auho, vekahi nokumona emone ngolio.” (1 Pedro 5:9) Onongeleka mba vana “vatuaileko okukoleleya” mbutukuatesako okunoñgonoka oñgeni matutualako nekolelo, tupu mbutulekesa okuti nonthue tupondola okukoleleya, tupu mbutuhinangelesa okuti matukayambwa mokonda yekolelo lietu. (Tiago 5:11) Tutalei onongeleka mbumwe.^[1]—Tala okatoi konthyulilo yonthele.

12. Oityi tulilongesila kono kerumbi ankho mbuyunga mo Endene?

¹² Ono kerumbi ankho onoandyu mbakulama. Etyi Andau na Eva valinga onkhali, Jeova avela ono kerumbi mbumwe otyilinga tyimwe pano pohi. Otyilinga otyo ankho tyelikalela unene netyi ankho mbunatyo keulu. Ongeleka yono kerubin ipondola okutukuatesako okukoleleya tyina tuamapewa otyilinga. Ombimbiliya yati Jeova “apake ono kerumbi koutundilo wotyikunino tyo Endene, nomutunga watema ankho utualako nokuliseta-seta pala okuyunga ondyila yenda nokomuti womuenyo.”^[2](Tala okatoi konthyulilo yonthele.) (Gênesis 3:24) Ombimbiliya kaipopi okuti ono kerumbi ankho mbuliyava ine hamwe okuñgoñga, tupu kambelitalele ngatyina mbankhimana unene kambupondola okulinga otyilinga otyo otyipe. Kambasoyele tupu kambetyiyekelepo. Mahi, mbatuaileko notyilinga otyo alo tyapwa, tyafuile alo pomuvo Wombila onene, omanima 1.600 konyima!

13. Oñgeni Job etyivila okukoleleya movitateka?

¹³ Job wali nekolelo. Pamwe upondola okukala tyanumana mokonda epanga liove, ine hamwe ombunga yove wapopia otyipuka tyekunumanesa. Tupu upondola okukala nouvela ine okuhiwapo nomunthu umwe uhole unene. Mahi kese tyitateka upondola okukala natyo, upondola okuvasa epameko mokulilongesa ongeleka ya Job. (Jó 1:18, 19; 2:7, 9; 19:1-3) Job ankho ketyii oityi amonena ononkhumbi, mahi watuaileko nekolelo. Oityi tyemukuatesileko okukoleleya? Otyipuka tyotete tyemukuatesako, omokonda ankho uhole Jeova iya kahande okumunumanesa. (Jó 1:1) Tyavali, Job ankho uhanda okuhambukiswa Huku alo umwe momivo viovitateka. Tyihe otyo vala, Jeova wakuatesileko Job okutala epondolo Liae etyi emupopila ovipuka vimwe atunga. Otyo atyikuatesako Job okunoñgonoka okuti Jeova memuyovola movitateka viae. (Jó 42:1, 2) Iya tyili, ongotyo umwe tyaendele. “Jeova emuyovola mo nonkhumbi, iya emuavela ovipuka aviho Job ali navio.” Job “akalako omanima omanyingi.” —Jó 42:10, 17.

14. Ngetyi tyipopia 2 Coríntios 1:6, oñgeni ongeleka ya Paulu yakuatesileko vakuavo?

¹⁴ Apostolu Paulu. Okuti ukahi nokumoneswa ononkhumbi? Okuti umukulu wewaneno ine umutalelipo womawaneno iya ulitehelela okuti una ovilinga ovinyingi? Inkha o ngotyo, ongeleka ya Paulu ipondola okukuatesako. Paulu wamonesilue unene ononkhumbi, mahi ankho wesuka unene novakuatate mewaneno. (2 Coríntios 11:23-29) Paulu kayekeleko iya ongeleka yae ikuatesako vakuavo. (Tanga 2 Coríntios 1:6.) Tyina ukoleleya matyikuatesako vakuenyi okukoleleya.

OKUTI ‘EKOLELEYO LINA OTYILINGA?

15, 16. (a) Ovilinga patyi vifuisuapo “nekoleleyo”? (b) Ava ongeleka yo ñgeni “ekoleleyo likala notyilinga tyalio.”

¹⁵ Huku watumine omulongwa Tiagu ahoneke okuti: “Yekei ekoleleyo likale notyilinga tyalio tyafuapo, opo mukale tyafuapo mononkhalelo ambuho, amuhakambela na tyimwe.” (Tiago 1:4) Oñgeni ekoleleyo lifuisapo “otyilinga” tyalio? Putyina tuvasiwa movitateka, tupondola okunoñgonoka okuti tuesukisa vali okukala noumphualundo, nokupandula, nokukala noluembia. Tyina tukoleleya movitateka, tyitukuatesako okukala novituwa ovio, tupu matyitukuatesako okukala Ovakristau vena ovituwa oviwa.

¹⁶ Mokonda okukoleleya tyipondola okutukalesa Ovakristau vena ovituwa oviwa, tuna okulikuatehila opo tuahaliatele kovitumino via Jeova mokonda yokuhanda okuyovoka movitateka. Mongeleka, ankho ukahi nokulinga ononkhono mbokulityilika omalusoke okulinga oundalelapo, wahayeke omalusoko oo ekufinde! Likuambela ku Jeova opo ekukutateseko okulityilika omalusoko apenga. Okuti mombunga yove pena ou ukuyele? Wahayeke ekufinde! Tokola okutualako okuumbila Jeova. Okulinga ngotyo matyipameka ekolelo liove. Tala: Opo upandwe na Huku ove wesukisa okukoleleya.—Romanos 5:3-5; Tiago 1:12.

17, 18. (a) Popia ongeleka ilekesa okuti tuesukisa okukoleleya. (b) Mokonda onthyulilo ikahi unene popepi, onthumbi patyi tuesukisa okukala nayo?

¹⁷ Onthue tuesukisa okukoleleya, ha momuvo umwe vala, mahi alo konthyulilo. Soka ñgeno, ombaluku ikahi nokunyingila kohi yomaande. Opo ovanthu vekahi-mo vahupe, vena okuyoa alo vehika koluhimba. Ankho umwe uyoa vala ehikila pokati upondola okunkhila momaande. Tyelifwa notyo, vana vayekapo okukoleleya tyina vehenehike, mavankhila pokati. Ankho tuhanda okukakala mouye omupe, tuesukisa okutualako okukoleleya. Tukalei notyituwa etyi apostolu Paulu ahoneka, okuti: ‘Onthue katusoyo.’—2 Coríntios 4:1, 16.

¹⁸ Ngetyi apostolu Paulu alingile, nonthue tutyii umwe nawa okuti Jeova metukuatesako tukoleleye alo konthyulilo. Paulu wahoneka okuti: ‘Movipuka viatyo ovio aviho tukahi nokufinda, omokonda ya una utuhole. Mokonda ndyina onthumbi yokuti tyilinge ononkhia, tyilinge omuenyo, nono andyu, nomautumini, novipuka vikahiko hono, nevi mavikeya, nononkhono, ine hamwe ovio keulu, no viokuaya kohi, kese tyaetuako, natyike tyipondola okutuyapula mohole ya Huku, ikahi mu Kristu Jesus, Tatekulu yetu.’ (Romanos 8:37-39) Pamwe tyili tupondola okupuila. Mahi tuhetekelei Gideau nomafualali ae. Vakalele tyaponwa, mahi avahasoyo. ‘Vatuaileko okuluisa onondyale mbavo’!—Juízes 8:4.