Vakuendye, Okuti Mukahi Nokuovola Ovilinga Meongano Lya Huku?

1-3. (a) Ovakuendye vekahi monkhalelo patyi, iya otyo tupondola okutyieleka natyi? (Tala olutalatu pefo pahimbikila onthele.) (b) Oityi matyikuatesako ovakuendye Ovakristau vekahi monkhalelo oyo?

SOKA ñgeno ukahi nokulipongiya opo wende kotyipito tyimwe tyakolela unene kepunda-umbo likala kokule. Opo uhikeko, una okuenda nekalela. Ponthyimbi ungwangwana mokonda pana patalamena omakalela, pena ovanthu, nomakalela omanyingi. Mahi, uhambukwa mokonda wii oku uhanda okuenda nako iya nekalela liendako. Ove kumanyingila vali mekalela ekuavo mokonda utyii okuti lipondola okukekuvombesa.

² Onthue tukahi ngatyina tuli moungendi iya ovakuendye vekahi ngovanthu veli apa patalamena omakalela. Pamwe mokonda pena omatokolo omanyingi una okulinga, ove upondola okungwangwana. Mahi inkha unoñgonoka nawa-nawa oku wenda, matyikupepukila okulinga omatokolo ekahi nawa. Mahi, opi moende?

³ Onthele ei maikumbulula epulo olio iya maikuavela ondundo opo uundapese omuenyo wove mokuhambukiswa Jeova. Otyo tyilekesa okulandula onondonga mba Jeova momatokolo aeho ulinga, ngetyi okulongeswa kosikola, novilinga moholovona, tupu inkha monepe iya nokukala novana. Tupu tyilekesa okulinga ononkhono mbokuvasa ovilinga meongano lya Jeova, iya okulinga ngotyo matyipameka oupanga wove na Jeova. Inkha usuka vali unene nokuumbila Jeova, kala nonthumbi yokuti mekuyambe iya mekukuatesako muetyi ulinga.—Tanga Provérbios 16:3.

OMOKONDA YATYI TYAKOLELA OKUOVOLA OVILINGA MEONGANO?

4. Oityi matulilongesa monthele ei?

⁴ Otyiwa unene okuovola okukala novilinga meongano. Omokonda yatyi? Matulilongesa omahunga etatu. Ehunga lyo tete no lya vali maetukuatesako okunoñgonoka okuti okulinga ononkhono mbokukala novilinga meongano lya Jeova matyipameka oupanga wove nae. Ehunga lya tatu malilekesa omokonda yatyi otyiwa okuovola ovilinga tyina nkhele umukuendye.

5. Ehunga patyi liakolela tuna opo tuovole okukala novilinga meongano?

⁵ Ehunga liakolela vali onthue tuna opo tuovole okukala novilinga meongano, omokonda tuhanda okupandula Jeova mokonda yohole ena nonthue iya novipuka etulingila. Omuhoneki umwe wono Salmu wati: “Otyiwa okupandula Jeova . . . Mokonda ove wanthyambukiswa, Jeova, novipuka walinga. Ame ndyikuililila nehambu mokonda yovilinga vio mankhanya ove.” (Salmo 92:1, 4) Soka vala kovipuka aviho Jeova ekuavela: omuenyo, ekolelo, no Mbimbiliya, novakuatate iya nekevelelo liokukala nomuenyo uhapu Momphangu Yombembwa. Tyina wovola okukala novilinga meongano, una nokulekesa ku Jeova okuti wemupandula mokonda yovipuka ovio aviho iya otyo matyipameka vali oupanga wove nae.

6. (a) Oñgeni okuovola ovilinga meongano tyikalesa oupanga wove na Jeova? (b) Ovilinga patyi upondola okuovola meongano tyina nkhele umukuendye?

⁶ Ehunga lya vali opo wovole ovilinga meongano, omokonda tyina ulinga ngotyo, ukahi nokulinga ovilinga oviwa pala Jeova iya otyo matyipameka oupanga una nae. Apostolu Paulu wapopile okuti: “Huku utupu onya opo alimbwe ovilinga vienyi, nohole mualekesa menyina liae.” (Hebreus 6:10) Upondola okukala nolusoke luokukala novilinga meongano alo umwe tyina umona. Mongeleka, Christine ankho una omanima 10 etyi atokola okutanga apeho omahipululo ovakuatate ovakuatyili. Toby ankho una omanima 12 etyi atokola okutanga Ombimbiliya aiho tyina nkhele ehenembatisalwe. Maxim ankho una omanima 11 iya omphange yae Noemi ankho una omanima 10 etyi vambatisalwa, iya aveho vevali vahanda okukaundapa mo Mbetele. Opo vatualeko okukala nehando liokukaundapa mo Mbetele, avamate mondyuo yavo omukanda uhonekwa opo omunthu akaundape mo Mbetele. Iya ove? Okuti upondola okusoka kovilinga vimwe ove upondola okuovola meongano, olingi ononkhono opo uvivase?—Tanga Filipenses 1:10, 11.

7, 8. (a) Oñgeni okuovola okukala novilinga meongano tyikuatesako okulinga omatokolo? (b) Omokonda yatyi omuhikuena umwe atokola okuhaende mosikola onene?

⁷ Olipi ehunga lya tatu lilekesa okuti otyiwa okuovola ovilinga meongano tyina nkhele umukuendye? Mokonda umukuendye, una okulinga omatokolo omanyingi. Wesukisa okutokola alo-pi molongeswa kosikola, novilinga patyi moholovona iya novipuka ovikuavo. Omatokolo oo ekahi ngatyina uhika apa peliyapukila onondyila. Inkha wii oku wenda, matyikupepukila okutokola ondyila moende nayo. Tupu, inkha wii nawa etyi uhanda okulinga, matyikupepukila okulinga omatokolo omawa. Provérbios 21:5 yati: “Omunthu uundapa nawa, ovipuka ahanda okulinga vienda nawa.” Inkha wovola ovilinga meongano tyina nkhele umukuendye, matyikupepukila okuvivasa liwa. Otyo tyaendele na Damaris etyi esukisa okulinga etokolo limwe liakolela etyi ankho omuhikuena.

⁸ Etyi Damaris amana okulongeswa kosikola, ankho omunongo unene iya ankho upondola okuenda mosikola onene opo akale omuameni wonombonge. Mahi, atokola okuundapa mombango. Omokonda yatyi? Omokonda tunde etyi ankho omukainthu, ankho uhanda okukala omukokoli-ndyila. Wati: “Opo ndyityivile, ankho nesukisa ovilinga viundapwa vala onoola mbumwe. Inkha naile kosikola onene, ñgeno nakalele nonombongo ononyingi, mahi ñgeno havasile ovilinga viundapwa vala onoola mbumwe.” Damaris waundapa movilinga vioukokoli-ndyila mokueenda kuomanima 20. Okuti Damaris ulitehelela okuti etokolo alingile etyi ankho omuhikuena liaviuka? Yoo. Mombango aundapa ulivasa novanthu ovanyingi valinga otyilinga ñgeno ankho alingile inkha waile kosikola onene. Wapopia okuti ovanyingi puvo kavahambukilwa otyilinga otyo. Damaris ulitehelela okuti okuundapa ngo mukokoli-ndyila momanima oo aeho, tyemuetela ehambu enene iya tyemukuatesako okulityilika okuhakala nehambu ngavo.

9. Omokonda yatyi ovakuendye vetuhambukiswa unene?

⁹ Ovakuendye ovanyingi mouye auho vekahi nokulinga omatokolo omawa iya tuvepandula mokonda yotyo. Oupanga wavo na Jeova, nokuovola ovilinga meongano ovipuka viakolela vali momuenyo wavo. Ovakuendye ovo, vena ehambu liotyotyili iya tupu vekahi nokulilongesa okulandula ehongolelo lya Jeova movipuka aviho, okukutikinyamo alo-pi mavalongeswa, novilinga mavaholovona iya nombunga. Salomau wati: “Yumba onthumbi mu Jeova nomutima wove auho.” Ayawisako okuti: “Landula ehongolelo liae monondyila mbove ambuho, iya oe maviukisa onondyila mbove.” (Provérbios 3:5, 6) Vakuendye, Jeova umuhole unene! Onwe muakolela unene kwe iya Jeova memuyakulila, nokumuhongolela iya tupu memuyambe.

LIPONGIYA NAWA OPO UPOPILE VAKUENYI KONTHELE YA JEOVA

10. (a) Omokonda yatyi ovilinga viokuivisa vina okukala tyimwe povipuka viakolela vali kuonthue? (b) Oñgeni ove upondola okuhangununa vali nawa etyi utavela?

¹⁰ Tyina ulinga atyiho opo uhambukiswe Jeova, mohande okupopila vakuenyi konthele yae. Jesus Kristu wapopia okuti “onondaka onongwa mbuna okuiviswa tete.” (Marcos 13:10) Otyo tyilekesa okuti mokonda ovilinga viokuivisa vialumbana unene, vina okukala tyimwe povipuka viakolela unene kuonthue. Okuti upondola okuundapa vali unene movilinga viokuivisa? Okuti upondola okukala omukokoli-ndyila? Mahi oityi molingi inkha utupu ehambu liokuivisa? Iya oñgeni upondola okuhangununa vali nawa etyi utavela? Kuna ovipuka vivali vipondola okukukuatesako: Lipongiya nawa iya uhayekeko okupopila vakuenyi etyi wii konthele ya Jeova. Mohimbika okupanda ovilinga viokuivisa iya otyo tyipondola okukuhuvisa.

11, 12. (a) Oityi upondola okulinga opo ulipongiye na upopile vakuenyi konthele ya Jeova? (b) Oñgeni omukuatate umwe omukuendye aundapesa omphitilo yokupopia konthele ya Jeova kosikola?

¹¹ Himbika pokupongiya ekumbululo liepulo vana ulilongesa navo kosikola vapondola okulinga, ngeli liati: “Omokonda yatyi utavelela okuti Huku oko ekahi?” Mo site jw.org muvasiwa ononthele mbupondola okukukuatesako okukumbulula epulo olio. Inkha unyingila pana pati OMALONGESO OMBIMBILIYA > OVAKUENDYE NOVAHIKUENA OVATUTU, movasi onthele yati “Omokonda Yatyi Ndyitavelela Okuti Huku oko Ekahi?” Landula onondonga mbuvasiwa monthele oyo opo upongiye ekumbululo liove. Movasimo onotestu ononthatu mbo Mbimbiliya ove upondola okuundapesa: Hebreus 3:4, na Romanos 1:20, na Salmo 139:14. Kuna vali ononthele ononkhuavo mbupondola okukukuatesako okupongiya omakumbululo omapulo omanyingi.—Tanga 1 Pedro 3:15.

¹² Popila vana ulongeswa navo opo vaovole ovipuka ovikuavo mo site jw.org. Otyo Luca alinga. Vana alongeswa navo ankho vekahi nokupopia konthele yonongeleya. Luca aimbuka okuti ankho vena omukanda upopia omapita Onombangi mba Jeova. Namphila Luca atilile owoma, aiti komulongesi wae inkha ankho upondola okuhangununa omokonda yatyi ovipuka ankho vekahi nokupopia viapenga. Omulongesi emuyeke ahangunune etyi etavela iya otyo atyimuavela omphitilo yokuvelekesa o site jw.org. Tupu omulongesi evetumu vakatalele keumbo ovidiu yati: Oñgeni Mokoleleya Tyina Ulewa, Mahi Ohalu. Okuti upondola okusoka oñgeni Luca elitehelela nawa etyi apopia konthele ya Jeova kosikola?

13. Omokonda yatyi tuna okutualako tyina tuna ovitateka?

¹³ Tyina ukala novitateka uhasoye, mahi tualako okulinga ononkhono opo uvase ovilinga uhanda meongano. (2 Timóteo 4:2) Otyo Katharina alingile. Etyi ankho ena omanima 17, watokolele okuava oumbangi ku vana ankho aundapa navo. Umwe puvo apeho ankho umupopia omapita. Mahi, no ngotyo atualako okuava oumbangi. Ovituwa viae oviwa avihuvisa omukuendye umwe ankho utiwa Hans. Omukuendye oo ahimbika okutanga omikanda vietu, nokulilongesa Ombimbiliya iya konyima ambatisalwa. Otyo Katharina ankho ketyii mokonda wailukile. Mahi, etyi palamba omanima 13 ahuvu unene mokonda onthiki imwe Hans weile okulinga elongomona mewaneno liae! Katharina ahambukwa unene mokonda yokuatuaileko okuivisa ku vana ankho aundapa navo.

UHALIMBWE OVILINGA UHANDA OKUVASA

14, 15. (a) Oityi una okuhinangela tyina vakuenyi vekuhongiliya okulinga etyi valinga? (b) Oityi upondola okulinga opo utualeko tyapama tyina vakuenyi vekuhongiliya?

¹⁴ Onthele ei, yekuavela ondundo opo utokole okuundapesa omuenyo wove pala okuhambukiswa Jeova iya nokukala nehando liokuvasa ovilinga meongano liae. Mahi ovakuendye ovanyingi veti liove, vahanda vala okutalukwa iya vapondola okukukonga opo ulinge etyi navo valinga. Ove mosukisa okuvepopila okuti otyipuka tyakolela unene kuove, okuovola ovilinga meongano lya Huku. Uhayeke vakuenyi vekulingisise okulimbwa ovilinga uhanda okuvasa meongano. Etyi tuapopia ponthyimbi konthele yokukala apa patalamena omakalela, okuti monyingila vala mekalela limwe mokonda weete okuti vana vanyingilamo vekahi ngoti vahambukwa? Au, kumetyilingi!

¹⁵ Ngotyo, oityi upondola okulinga opo utualeko tyapama tyina vakuenyi vekuhongiliya okulinga etyi valinga? Lityilika ovipuka vipondola okukulingisisa okuhaanye tyina uhongiliyua. (Provérbios 22:3) Soka kovitateka vipondola okutundilila kokulinga ovipuka ovivi. (Gálatas 6:7) Tupu, kala nomutima weliola opo wiimbuke okuti pamwe wesukisa okulondolwa. Tavela kuetyi ovo tate yove, novakuatate mewaneno vekupopila.—Tanga 1 Pedro 5:5, 6.

16. Oñgeni ongeleka ya Christoph ilekesa okuti okuliola omutima tyakolela?

¹⁶ Okuliola omutima tyakuatesileko Christoph okutavela etyi apewa onondonga mbukahi nawa. Konyima yetyi ambatisalwa, ahimbika okuenda apeho komphangu yokusanena ombola, iya ovakuendye ovakuavo avemukongo opo anyingile motyikundyi tyavo tyokusana ombola. Christoph etyipopila omukulu umwe wewaneno iya omukulu wewaneno emupopila opo asoke koviponga vipondola okutundulilako, ngetyi okukala notyituwa tyokulityutya. No ngotyo, Christoph atokola okunyingila motyikundyi. Mahi konyima, aimbuka okuti ankho vasana ombola monkhalelo ipaka omuenyo motyiponga. Christoph apopi vali novakulu vewaneno iya avemuavela onondonga mbapolwa mo Mbimbiliya. Christoph wati: “Jeova wanthuma ovanthu opo vamphe onondonga mbukahi nawa iya ame nemutehelela, namphila nehetyilingile liwa-liwa.” Okuti wafuapo opo utavele tyina upewa onondonga?

17, 18. (a) Oityi hono Jeova ahandela ovakuendye? (b) Tyina nkhele umukuendye, oityi upondola okulinga opo ha uhelivele onombei mokonda yomatokolo walingile? Popia ongeleka.

¹⁷ Ombimbiliya yati: “Ove mukuendye [ine muhikuena], hambukwa poukuendye wove, nokuyeka omutima wove ukulingile oviwa tyina nkhele umukuendye.” (Eclesiastes 11:9) Jeova uhanda ove ukale nehambu tyina nkhele umukuendye. Monthele ei, welilongesa okuti onkhalelo imwe yokukala nehambu o putyina wovola okukala novilinga meongano, nokulandula ehongolelo lya Jeova momatokolo aeho ulinga. Inkha utyilinga tyina nkhele umukuendye, moimbuka liwa oñgeni Jeova ekuhongolela, ekuyakulila iya noñgeni ekuyamba. Soka konondonga onongwa ekuavela Mondaka yae iya landula onondaka mbati: “Hinangela Omupakeko wove Omunene tyina nkhele umukuendye.”—Eclesiastes 12:1.

¹⁸ Ovakuendye vekula iya liwa-liwa avala ovakulu. Ovanyingi velivela onombei mokonda puetyi ankho ovakuendye ankho kavesukile nokuovola ovilinga meongano lya Huku. Mahi, inkha usuka vali unene nokuovola ovilinga meongano lya Huku tyina nkhele umukuendye, tyina wamekulu mohambukwa mokonda yomatokolo walingile. Ongotyo Mirjana elitehelela. Etyi ankho omuhikuena, ankho uhateka nawa. Alo umwe wakongelwe opo akahateke novanthu vovilongo ovikuavo. Mahi, atokola okuumbila Jeova movilinga viomuvo auho. Palamba omanima alamba po 30, mahi nkhele utualako movilinga viomuvo auho kumwe nomulume wae. Wapopia okuti ovanthu vokuhanda omunkhima, nehumbilo, nepondolo iya nokukala ovahona, vetupu ehambu liotyotyili. Tupu, wayawisako okuti otyipuka tyikahi vali nawa okuumbila Huku, nokukuatesako ovanthu okumunoñgonoka.

19. Omokonda yatyi otyiwa okuovola okukala novilinga meongano tyina nkhele umukuendye?

¹⁹ Vakuendye, onwe muatokala okupandulwa mokonda namphila mukahi nokulambela movitateka ovinyingi, no ngotyo mutualako okusuka vali unene nokuumbila Jeova. Onwe muhanda okukala novilinga meongano iya ovilinga viokuivisa o tyimwe povipuka viakolela vali momuenyo wenyi. Tupu, onwe kamutavela tyina ouye uno umuhongiliya okuyekapo okuovola ovilinga meongano lya Huku. Mupondola okukala nonthumbi yokuti ononkhono mulinga mbupandwa unene. Ovakuatate no nomphange vemuhole unene. Ngotyo, “ovilinga viove viavela Jeova, iya ovipuka wapanga okulinga maviende nawa.”