Tyina muundapela kumwe, mukala ngatyina amuho vevali muli nokutaha o aviau
VOKUELINEPA
2 Undapelei Kumwe
OTYO OTYITYI?
Vokuelinepa tyina vaundapela kumwe, vakala ngovanthu vevali vokutaha o aviau. Tyina pamoneka ovitateka, kavasoko vala ku etyi muene vahanda, vasoka kotyinepo tyavo.
ONONDUNGE MBO MBIMBILIYA: “Kavakala vali vevali, mahi vakala ohitu ike.” — Mateusi 19:6.
Ine vokuelinepa vahanda umwe okuhambukilwa otyinepo tyavo, vena okuundapela kumwe. — Christopher.
OITYI OTYIPUKA OTYO TYESUKISILA?
Tyina vokuelinepa vahaundapela kumwe, povitateka vakalela vala okulipopia. Pahe noutateka oututu vala ankho wahaende-ale kokule, ukala ounene.
“Ovanthu vokuelinepa vesukisa okuundapela kumwe. Ine kavaundapela kumwe, kamavakala ngetyi otyinepo tyina okukala, mavakala vala ngovanthu veli opo vakala mondyuo ike.” — Alexandra.
OITYI UPONDOLA OKULINGA?
LITALA NAWA OVE MUENE
Okuti tyina una onombongo, usoka okuti ombove umwe vala tyapwa?
Okuti ngoti ndyikala vali nawa tyina ndyili kokule na mukuetu?
Okuti katumapanga-ko nombunga ya mukuetu, naapa umwe ndyityii okuti ngwe uvehole unene?
TOMPHOLEI OMAPULO AA NA MUKWENYI
O movipuka patyi tutyivila okuundapela kumwe?
Ovipuka patyi tuna okutala nawa tutyivile okuundapela kumwe?
Pahe oityi matulingi tutyivile okuundapela kumwe?
LINGEI NGETYI
Soka ñgeno muli nokuyumba ombola, pahe atyiti mukwenyi wahula nthele yo oko, ove wahula nthele yo oku. Pahe sokei etyi mamulingi opo onwe vevali muhule vala nthele ike.
Muahasokei ñgaa: ‘Oityi mandyilingi ndyisane nawa?’ Lipulei ngetyi: ‘Oityi matulingi tusane nawa tutyivile?’
“Hahe vali okukala nombembwa meumbo tyipona okuovola olie wapengesa, olie una elasau.” — Ethan.
ONONDUNGE MBO MBIMBILIYA: ‘Muahatalei vala komasuka-suka enyi muene, mahi tupu amutale komasuka-suka a vakwenyi.’ — Ova Filipu 2:3, 4.