Wahayekeko Okupameka Oupanga Wove na Siovaa

Apa wahimbika okulilongesa, pahe wanoñgonoka umwe ovipuka ovinyingi viayemba ku Siovaa. Mokonda etyi welilongesa wetyihumba unene, hamwe welipakulale ku Siovaa, ombatisalwa. Okuti hatyo, hamwe uli nokusoka okumbatisalwa apa katutu. Mahi tyina wamambatisalwa, hakuti ngotyo pahe welipwako. Una okupameka apeho oupanga wove na Siovaa. Mahi tyilingwa ñgeni?

1. Oityi wesukisila okupameka apeho oupanga wove na Siovaa?

Tuna umwe okulinga ononkhono tupameke apeho oupanga wetu na Siovaa “opo tuhayapuke” Kwe. (Ova Hebeleu 2:1) Oityi tuna okulinga tuahayekepo okulingila Huku? Tuna okuundapa unene movilinga viokulongesa ovanthu Ombimbiliya, atusoko apeho kovipuka ovikwavo tupondola okulinga movilinga vya Huku. (Tanga Ova Filipu 3:16.) Momono okuti petupu otyipuka otyiwa vali tyipona okuundapela Huku. — Salmo 84:10.

2. Oityi vali una okulinga apeho?

Tyokulilongesa, ñgaa tyili umwe nokupwa! Mahi una okulikuatehila apeho mokonda Ombimbiliya yati: ‘Livalekei ontheto omphe.’ (Ova Efesu 4:23, 24) Wahayekeko okulilongesa Ombimbiliya awike, nokuenda komaliongiyo. Una okulinga ovipuka ovio opo unoñgonoke vali nawa Siovaa. Ovola okuhetekela Siovaa movipuka ulinga ononthiki ambuho. Tyina wamamono okuti una tyimwe una okutala nawa uhambukiswe Siovaa, tyiyekapo umwe.

3. Oñgeni Siovaa mekukuatesako opo wahayekeko okupameka oupanga wenyi nae?

Ombimbiliya yati: “Huku . . . mamanuhula okumulongesa. Memukalesa tyitai, memukalesa tyapama, emupake kelisesu liapama.” (1 Petulu 5:10) Atuho pamwe tuhongiliyua tulinge ovipuka viapenga, viailikwa no Mbimbiliya. Mahi Siovaa utukuatesako tuanye ovipuka ovio. (Salmo 139:23, 24) Wapopia okuti metuavela ononkhono tuesukisa tutyivile okumulingila apeho. — Tanga Ova Filipu 2:13.

KUHANDE OKUNOÑGONOKA VALI?

4. Apeho tomphola Nepanga liove

Tuli tupu apa tumapanga a Siovaa, otyetyi tulinga ovipuka evi vivali: Okulikuambela, nokulilongesa Ombimbiliya. Mahi pahe oñgeni okulinga nawa ovipuka ovio matyikufweneka vali kepanga liove Siovaa Huku?

Tangei Salmo 62:8, amutomphola epulo eli:

• Opo upameke oupanga wove na Siovaa, una okulikuambela ñgeni?

Tangei Salmo 1:2, amutomphola epulo eli:

• Opo oupanga wenyi na Siovaa wahavombe-po, oityi una okulinga tyina utanga Ombimbiliya?

Oityi una okulinga ulilongese umwe nawa Ombimbiliya? Talei OVIDIU, mutale vimwe tupondola okulinga pokulilongesa Ombimbiliya opo tuinoñgonoke nawa. Pahe ha amutomphola omapulo aa:

OVIDIU: Oñgeni Molilongesa Nawa Ombimbiliya (5:22)

• Povipuka viapopiwa movidiu, ovipi upondola okulinga tyina ulilongesa Ombimbiliya?

• Ovipuka patyi uhanda ñgeno ovio ulilongesa?

5. Soka kovipuka ovikwavo upondola okulingila Siovaa

Okusoka kovipuka upondola okulingila Siovaa, olikuatehila umwe uvilinge, matyipameka oupanga wenyi. Talei OVIDIU, amutomphola epulo eli:

OVIDIU: Omuenyo ou oo Vala Ukahi Nawa (3:31)

• Movidiu, tuamona okuti Cameron wapanga umwe nawa etyi malingila Siovaa. Pahe oityi apola-ko?

Ha aveho ovanthu vetyivila okuenda kovilongo ovikwavo vakalongese ovanthu Ombimbiliya. Mahi atuho tupondola okusoka oñgeni matuundapela vali Siovaa. Tangei Provérbios 21:5, osoko oñgeni upondola okuundapa vali . . .

• mewaneno lienyi.

• movilinga viokulongesa ovanthu Ombimbiliya.

Oityi otesitu oyo yapopia matyikukuatesako tyina wamapange otyipuka, otyilingi umwe?

Ovipuka vimwe upondola okulinga

• Okupopia umwe etyi tyili momutima wove tyina ulikuambela.

• Okutanga Ombimbiliya aiho.

• Okulikuatehila unoñgonoke nawa aveho mewaneno lienyi.

• Okulinga ononkhono ukale nomulongwa wike ulongesa Ombimbiliya.

• Okukala omukokoli-ndyila wapola pokati, okuti hatyo, olingi umwe omukokoli-ndyila womuvo auho.

• Ine umukuendye, upondola okulikuatehila ukale omukuatesiko wovakulu vewaneno.

ETYI WELILONGESA

Welilongesa okuti opo ukakale-ko apeho, una okupameka apeho oupanga wenyi na Siovaa, osoko etyi upondola okulinga movilinga viae.

Okupitulula

• Oityi uyumbila-ko onthumbi okuti Siovaa mekukuatesako wahayekeko okumulingila?

• Oityi una okulinga apeho opo oupanga wenyi na Siovaa wahavombe-po?

• Oñgeni okusoka apeho kovipuka upondola okulingila Siovaa, ovilingi umwe, matyikufweneka vali kwe?

KUHANDE OKUOVOLA VALI?

Oityi Siovaa ahanda vali? Okuti uhanda ñgeno tulinga vala otyipuka tyike otyiwa tyapwa, ine uhanda ñgeno tumulingila umwe atee-tee?

Lingila Siovaa Apeho Ngetyi Tyalingile Ambalayau (9:20)

Omunthu pamwe petupu umwe etyi alinga tyapenga, mahi ahahambukilwa ovilinga vya Huku. Pohika ngo opo, oityi apondola okulinga ahambukwe vali?

Kala Vali Nehambu Pokulilongesa Nokusokolola (5:25)

Oityi una okulinga utyivile okupanga nawa ovipuka molingila Siovaa, ovilingi umwe?

“Evi Upanga Vihambukiswe Omutungi Wove” (Omutala Womulavi 15 ya Julho yo 2004)

Oityi tuesukisila okulikuatehila tukale ovanthu vena oupanga wapama na Siovaa? Oityi tuna okulinga tukale noupanga wapama na Siovaa?

“Tualako Okukula Mopamphepo — ‘Onthiki Onene ya Jeova Ikahi Popepi’” (Omutala Womulavi 1 ya Maio yo 2009)