Moisesi​—Ankho Una Oluembia

OLUEMBIA OITYI?

Oluembia luakutikinya okukala nohole onene novanthu. Omunthu wokuna oluembia ulekesa muetyi apopia nomuetyi alinga oñgeni elitehelela konthele yavana ehole, namphila okutyilinga pamwe tyesukisa ononkhono ononene.

OÑGENI MOISESI ALEKESILE OKUTI UNA OLUEMBIA?

Moisesi walekesile okuti ankho uhole Huku. Omonkhalelo patyi? Nkhele tuhinangelei onondaka mbukahi mu 1 João 5:3, mbati: “Ohole na Huku ihangununa okutavela ovitumino viae.” Mokonda Moisesi ankho uhole Huku, wetavelele ovitumino viae. Moisesi wetavelele atyiho Huku emutumine, okupolela kotyilinga otyinene tyokukapopia na Farao, notyilinga ankho tyimoneka ngoti otyitutu tyokuveta nomphangoti yae Melunga Enkhuhu. Tyilinge ankho upewa otyilinga otyinene ine otyitutu, Moisesi ankho utyilinga. Ankho “utyilinga umwe nawa-nawa”—Êxodo 40:16.

Moisesi ankho uhole ova Isilayeli. Ankho vetyii okuti Jeova ukahi nokuundapesa Moisesi opo ahongolele ovanthu vae, moluotyo tyina ankho vena ovitateka, vevipopila Moisesi. Mombimbiliya tutangamo okuti: “Ovanthu ankho vaya ku Moisesi okupolelela komuhuka alo kongulohi.” (Êxodo 18:13-16) Soka oñgeni ankho tyiponeswa Moisesi okukala onoola ononyingi nokutehelela ovitateka vio va Isilayeli! Mahi, Moisesi wevekuatesileko nehambu mokonda ankho uvehole.

Moisesi ankho kevetehelela vala, mahi tupu ankho uvelingila omalikuambelo. Alo umwe ankho ulingilako omalikuambelo vana vemulinga onya! Mongeleka, etyi Miriã omphange yae añgoñgene mokonda yotyilinga Moisesi apewa na Huku, Jeova emuyumbu otyilundu. Mahi, Moisesi kahambukilwe, anthi welikuambela liwa-liwa opo emuitileko, wati: “Huku yange, mbambavo! Muvelula mbambavo!” (Números 12:13) Tyotyili, Moisesi walingile elikuambelo olio mokonda ankho una oluembia olunene.

OTYO TYITULONGESA TYI?

Tupondola okuhetekela Moisesi mokutualako okukala nohole onene na Huku. Ohole oyo maitulundu okutavela ovitumino viae “nomutima auho.” (Romanos 6:17) Tyina tutavela Jeova nomutima auho, tuhambukiswa omutima wae. (Provérbios 27:11) Tupu tupolako ouwa. Haunene, tyina tuumbila Huku nohole onene, tuhambukilwa okulinga etyi tyaviuka!—Salmo 100:2.

Onkhalelo onkhuavo tupondola okuhetekela Moisesi, okukala noluembia navakuetu. Tyina omapanga etu ine ombunga yetu itupopila ovitateka viavo, ohole itulunda (1) okuvetehelela nawa, (2) okuovola okunoñgonoka oñgeni velitehelela (3) nokuvepopila okuti tuvehole.

Nga Moisesi, tupondola okulingila omalikuambelo vana tuhole. Pamwe tyina vetupopila ovitateka viavo, tulitehelela omapita mokonda tutupu etyi tupondola okulinga pala okuvekuatesako. Hamwe tupondola okupopia okuti “Himetyivili okukukuatesako, mahi mandyikulingailapo vala omalikuambelo.” Mahi, hinangela: “Elikuambelo liomunthu utavela ku Huku lina ononkhono ononene.” (Tiago 5:16, Nova Tradução na Linguagem de Hoje) Omalikuambelo etu apondola okuhindila Jeova okulingilako omunthu oo otyipuka ñgeno ahalingile inkha katuelikuambelele. Tyotyili petupu otyipuka tyavilapo vali tupondola okulinga tyipona okulingila omalikuambelo vana tuhole.a

Kutavela okuti ongeleka ya Moisesi itulongesa ovipuka ovinyingi? Namphila ankho omunthu vala ngonthwe, wetuavela ongeleka onene yokukala nekolelo, nokuliola omutima, nokukala noluembia. Tyina tuhetekela vali nawa ongeleka yae, tupu tupolako vali ouwa pala onthwe muene na vakuetu.—Romanos 15:4.