OSAPI YOKONDYE | OKUTI HUKU UKUTEHELELA?
Huku Ukwi Nawa
“Ove Jeova, wovola okunoñgonoka, iya undyi nawa.” —SALMO 139:1.
“Omaiho ove amona etyi ankho ndyikahi meimo.” —SALMO 139:16
OMOKONDA YATYI VAMWE VENA ONDIMA: Ovanthu ovanyingi vasoka okuti Huku utala vala ovanthu ngatyina o vononkhali vala—vahasukukile vehesukisile ombatelo yae. Kendra, wamona ononkhumbi mbuihamesa omutima, mokonda yokulivela onombei okusoka okuti kafuilepo pala okulinga etyi Huku ahanda. Mokonda yotyo, ati “himalingi vali omalikuambelo.”
ETYI ONDAKA YA HUKU ILONGESA: Jeova utala nawa ovanthu ovakuankhali nokunoñgonoka etyi vekahi. Ombimbiliya yati: “Jeova wii nawa oñgeni tuatungwa, uhinangela okuti tuatunda keheke.” Haunene ketutekula monkhalelo yelikuata “no nonkhali mbetu,” mahi nokankhenda utuevela tyina tulivela.—Salmo 103:10, 14.
Tala David, ohamba yo Isilayeli wapopiwa monthele yotete. Melikuambelo alinga ku Huku, David wati: “Omaiho ove amona etyi ankho ndyikahi meimo, iya ononthele mbatyo ambuho ankho wembuhoneka momukanda wove . . . Huku yange, nthale nawa, nokunoñgonoka omutima wange.” (Salmo 139:16, 23) Otyili, David ankho utyii nawa okuti namphila alinga onkhali, nokuanumana unene, Jeova utyivila okutala okuti welivela nomutima auho.
Jeova ukwi vali nawa tyipona kese munthu. Ombimbiliya yati: “Omunthu utala etyi tyimoneka komaiho, anthi Jeova, utala etyi tyikahi momutima.” (1 Samuel 16:7) Huku wii nawa etyi ukahi nokulinga, nevi wapiñgana, no ñgeni wekula, novilinga viove novituwa viove aviho. Oe utala nokupanda ononkhono ukahi nokulinga, alo umwe tyina ulinga oviponyo.
Mahi oñgeni Huku aundapesa ekungunyiko liae ‘lietyi ei konthele yove’ opo ekukuateseko?