Ame nalwa opo ndyimaneko onya noungangala

OMUENYO WANGE KOHALE:

Ame nekulila mo Rmaysh, pokati no Isilayeli no Líbano pomuvo ankho muna ovilwa. Ndyihinangela otyilongo otyo, ankho tyina vala onomina mbututana nokuipaa ovanthu vehena etyi valinga. Omuenyo ankho wepuiya unene, okulingwa onya noungangala ankho tyakaka.

Ombunga yetu ankho oyo Kapela Maronita, okapela kamwe ankho kova Katolika kakala koutakelo. Tate ankho uundapa unene opo etyivile okutekula ombunga yetu ovanthu 12, mahi me ankho ulinga atyiho opo tuende kokapela. Pomuvo opo, andyihimbika okulitehela okuti ovanthu vokapela vekahi vala ngovanthu ovakuavo, kavetyivili okukuatesako ovanthu.

Etyi nakola andyihimbika okusuka no kung fu, okulilongesa okulwa. Ankho ndyenda apeho okukelilongesa, andyikala omunongo wokulua komaoko nokuveta noviti aviho ankho viundapeswa. Ankho ndyisoka okuti, namphila ‘himetyivili okumanako ovilwa, mahi ndyipondola okumanako ovivi ovanthu valinga.’ Ankho tyina ndyimona ovanthu vevali valwa, liwa-liwa ndyilipakapo. Ankho hisete okunumana, nokapuka vala kehehi, kanumanesa. Ovanthu aveho koutakelo wo Líbano ankho vena owoma naame, ankho ndyilwa opo ndyimaneko onya noungangala.

Mo 1980, andyilipake mo kung fu, mondyuo yokulilongesila ovilwa ovio mo Beirute. Omatenda nomauta omanene ankho atutana ononthiki ambuho, mahi ame no ngotyo ndyenda okukelilongesa ovilwa. Omuenyo wange auho okupolelela kokulia, nokulangalapo ankho welifua vala no wa Bruce Lee, woko China ankho ukala ko América ankho pehena nawike uvetako movilwa vio kung fu. Ankho ndyihetekela onkhalelo yae yomuenyo, okuenda, no ñgeni alwa tyina ekahi mo kung fu. Ankho hiyolo namunthu.

OÑGENI OMBIMBILIYA YAPILULULA OMUENYO WANGE:

Etyi ankho ndyihanda, okukala omunongo wankhimana wo kung fu mo China. Motyinthiki tyimwe, ankho ndyikahi nokulilongesa mokonda ankho ndyihungi kokulinga oungendi okuenda ko China, omunthu umwe atotola kepito liange. Ankho epanga liange weya no Nombangi mba Jeova vevali. Nokuavala ovikutu viange viokulilongesa, nokuepuila metukuta, andyivepopila okuti, “ame hi natyike konthele Yombimbiliya.” Ankho hityii okuti okutuka opo omuenyo wange maupiluluka.

Onombangi vandekesa Mombimbiliya omokonda yatyi ovanthu kononkhono mbavo vehetyivilila okumanako onya, novivi. Vamphopila okuti Satanasi Eliapu oe ukahi nokueta ovitateka ovio. (Revelação 12:12) Andyikala tyahuva nombembwa nonthumbi Onombangi ankho vena. Tupu andyihuvu etyi vandongesa okuti Huku una enyina. (Salmo 83:18) Tupu vandekesa 1 Timóteo 4:8, muna tutanga okuti: “Okulonga olutu tyakolela vala pala ovipuka vihehi, mahi onthilo na Huku yakolela pala ovipuka aviho. Tyetyi ina omulao womuenyo uhapu pahetyino, na una maukeya.” Onondaka ombo mbankhuatesako unene.

Andyikala omuwo omunyingi tyehelimono no Nombangi mokonda ombunga yange vevepopila okuti muhakondokei vali. Mahi no ngotyo, ankho momutima natokola okuyekapo o kung fu nandyihimbike okulilongesa Ombimbiliya. Onondenge, novakulu vange otyo avehetyihande, mahi ame ankho natokola okuvasa vali Onombangi mba Jeova nokulilongesa navo Ombimbiliya.

Andyitualako okuovola Onombangi mahi anehevevasi. Pomuwo opo, ankho nanumana unene mokonda ya tate wankhia, novitateka ovikuavo mombunga. Andyihimbika okuundapa movilinga viokutunga, iya nthiki imwe umwe ankho tuundapa nae utiwa Adel anthalameka amphulu oityi nanumanena. Amphopila etyi Ombimbiliya yapopia konthele yekevelo lietutilo. Monohanyi etyive mbalandulako, Ombangi oo woluembia nokuna okankhenda, noumphua-lundo elilongesa naame Ombimbiliya.

Tyina tutualako okulilongesa, andyihimbika okuimbuka okuti nesukisa okulinga omapiluluko omanene momuenyo wange. Otyo ankho katyapepukile. Ame apeho ankho ndyinumana liwa. Ombimbiliya yandongesa okulikondola omutima nokuhanumana liwa. Mongeleka, mu Mateus 5:44 muna elondolo lia Jesus, liati: “Tualeiko okukala nohole nonondyale mbenyi nokuitilako vana vemumonesa ononkhumbi.” Iya Romanos 12:19 ilondola okuti: “Muhakalei nonkhongo nomunthu nawike, . . . mokonda tyahonekwa okuti: ‘“Okukondolela ovanthu, otyange, ame madyifete kese munthu, otyo tyapopia Jeova.’” Onotestu ombo no nonkhuavo mbankhuatesako katutu-katutu okukala nombembwa.

OUWA PATYI NAPOLAKO:

Namphila ombunga yange tete vayala etokolo liange liokulilongesa no Nombangi mba Jeova, mahi konyima veya okuhumba Onombangi. Tyotyili, umwe pu vana tulilandula navo, elipake kumwe naame okufenda Jeova, iya alo etyi ankhia Me wamena ekolelo lietu.

Tupu navasa ononkhano onongwa okuanepa omukai omuwa, omukuatyili, Anita, una ndyiundapa nae movilinga viomuwo auho. Tunde menima 2000, ame na Anita tuakala ko Eskilstuna mo Suécia kuna tualongesa Ombimbiliya ovanthu vapopia o árabe.

Omutima wange nkhele kaukala nawa tyina ndyimona ovanthu vamoneswa ononkhumbi. Mahi mokonda ndyityii oityi vamonena ononkhumbi, nokwi okuti apa katutu Huku mekembumanako, tyimpha ehambu liotyotyili nombembwa.—Salmo 37:29.