Omapulo Ombimbiliya Akumbululwa
Okuti vokuankhia mavakakala vali nomuenyo?
Tyotyili wokuatunga atyiho upondola okupindula-po vokuankhia
Jeova Huku oe Ondyivi-ndyivi yomuenyo. (Salmo 36:9) Okuti Huku oo, kapondola okupindula-po vokuanyima? Ombimbiliya itupopila nonthumbi okuti mekevepidula-po komutwe. (Tanga Atos 24:15) Mahi, mekevepindula-po mokonda yatyi?
Konthyimbi, Omutungi wetu wahandele ovanthu vakale nomuenyo apeho kombanda yohi. (Gênesis 1:31; 2:15-17) Otyo, nkhele otyo ahandela ovanthu. Tyimuihama unene tyina atala omuenyo wetu weyula ononkhumbi, iya liwa-liwa atunkhi.—Tanga Jó 14:1, 14, 15.
Vana mavakapindulwa-po mavakakala pi?
Okuti Huku ankho watunga ovanthu opo vakale keulu? Au. Huku watunga onoandyu opo mbukale keulu. Iya atungu ovanthu opo vakale kombanda yohi. (Gênesis 1:28; Jó 38:4, 7) Nenoñgonoko olio, pahe soka kovanthu Jesus atutilisile. Wevepindulile-po, iya avakala vali pano pohi. Tupu, ovanyingi mavakapindulwa-po komutwe, mavakakala vali nomuenyo kombanda yohi.—Tanga João 5:28, 29; 11:44.
Mahi, Huku waholovona ovanthu vehehi makapindula-po nomuenyo wo keulu, iya oko mavakakala nomalutu ngo onoandyu. (Lucas 12:32; 1 Coríntios 15:49, 50) Vana mavatutiliswa nomuenyo wo keulu, mavakatumina na Kristu ohi aiho. —Tanga Revelação 5:9, 10.