Oityi Upondola Okulinga Na Ukakale Mouye Omupe?

Mononthele mbokualamba tuamona okuti Huku meya okuhanyako ovanthu vana valinga ovipuka ovivi novitateka aviho tumona. Onthue tutyii okuti otyo matyimoneka umwe. Omokonda yatyi? Mokonda Ondaka ya Huku Ombimbiliya ipopia okuti:

“Ouye ukahi nokulamba.” — 1 SUAU 2:17.

Tutyii okuti pena ovanthu mavakahupa mokonda otesitu oyo tupu ipopia okuti:

“Mahi una ulinga ehando lya Huku makala-ko apeho.”

Naina opo tukahupe tuesukisa okulinga etyi Huku ahanda. Opo tulinge etyi ahanda tete tuesukisa okumunoñgonoka nawa.

OPO UKAHUPE WESUKISA “OKUNOÑGONOKA” HUKU

Omalutalatu: 1. O fulumela upumphi mokonda yokuaponwa nokuasoya. 2. Pahe unwa tyimwe, iya uluete okuti mukuavo aundapa nae wahambukwa tyina ekahi nokutanga omukanda umwe. 3. Mukuavo aundapa nae, ukahi nokumutangela Ombimbiliya emuavela okamukanda kokunyingila mo site jw.org.

Sesusi wapopia okuti: “Opo vakamone omuenyo uhapu vena okunoñgonoka ove Huku wike wotyotyili.” (Suau 17:3) Opo tukahupe atukakala-ko apeho tuesukisa “okunoñgonoka” Huku. Okunoñgonoka Huku, hakunoñgonoka vala okuti kouye kuna Huku. Tuesukisa okukala omapanga ae. Opo ukale epanga liomunthu umwe tyesukisa omuvo, noupanga na Huku ongotyo. Tutalei ovipuka vimwe tulilongesa mo Mbimbiliya vitukuatesako okukala nokutualako noupanga na Huku.

Otyili Tuelilongesa Mombimbiliya

Tuelilongesa okuti Huku uhanda tukakale Mouye Omupe.

Huku watungile ovalinepi votete ovo Andau na Eva evepake momphangu imwe ongwa itiwa Otyikunino tyo Endene. Ankho vetupu onkhali, iya Huku weveavelele ovipuka aviho vesukisa opo vatualeko nehambu. Ankho vapondola okukala-ko pala apeho. Inkha vatuaileko okutavela ku Huku, ñgeno kavankhile. Mahi ngwe vaanyene etyi Huku evepopilile.

Tuelilongesa omokonda yatyi tumonena ononkhumbi.

Etyi Andau ehetavelele ku Huku, apumbwa elao liokukala apeho, kumwe novana vae. Ombimbiliya yati: “Mokonda yomunthu wike vala onkhali yanyingila mouye iya onkhali yaeta ononkhia.” (Ova Loma 5:12) Ngetyi omona apondola okutyitwa tyayambula ouvela kovohe, tupu ovana aveho va Andau vayambula kwe onkhali, mokonda yotyo tukulupa nokunkhia.

Tuelilongesa etyi Huku alinga opo etukuateseko.

Ombimbiliya ipopia okuti: “Mokonda Huku una unene oluembia nouye, waava Omona wae wongunga, opo kese omunthu ukala nekolelo mwe ahakahanyue-ko, mahi akakale nomuenyo uhapu.” (Suau 3:16) Huku watuma omona wae Sesusi pano pohi, opo etunkhile. Mokuasoka koluembia lwa Huku omukulu umwe una omanima 86 utiwa Prabhakar wapopia okuti: “Otyo tyandekesa okuti Siovaaa unthyole. Uhanda ndyikakale-ko nomuenyo uhapu.”

Tuelilongesa oñgeni tuna okupandula ovipuka Siovaa etulingila.

Ombimbiliya ipopia okuti tulekesa okuti tuapandula ovipuka Huku etulingila tyina tutualako “okutavela ovitumino viae.” (1 Suau 2:3) Siovaa Huku utulongesa etyi tuesukisa okulinga opo tukale nomuenyo ukahi nawa pahetyino. (Isaías 48:17, 18, okatoi) Huku kahande onthue tumone ononkhumbi. Ngwe wetupopila okuti inkha tutavela ovitumino viae, kamatukala vala nehambu pahetyino mahi tupu matukakala nomuenyo wahapu.

TANGA OMBIMBILIYA ONDAKA YA HUKU ONONTHIKI AMBUHO

Etyi akaomba-po opo alie, konyima yetyi atanga Ombimbiliya ukahi nokutala peulu. — Opo uhupe tyina onthyulilo yameya, wesukisa okulikuambela ku Huku, nokulinga etyi ahanda.

Onthue tulia ononthiki ambuho tukale nomuenyo. Mahi Sesusi wapopia okuti: “Omunthu kakala vala nomuenyo mokonda yombolo, mahi ukala nomuenyo mokonda yonondaka ambuho mbutunda momulungu wa Siovaa.” — Mateusi 4:4.

Onondaka mba Siovaa tumbuvasa mo Mbimbiliya. Tyina tulilongesa Ombimbiliya matunoñgonoka etyi Siovaa alingile kohale, ne etyi ekahi nokulinga pahetyino, ne etyi makalinga komutwe wandyila.

LIKUAMBELA KU SIOVAA OKUMUITA EKUKUATESEKO

Oityi upondola okulinga inkha uhanda okulandula ovitumino vya Huku ,mahi pena otyipuka tyimwe tyapenga wehevili okuyekapo? Motyitateka ngotyo okunoñgonoka Huku tyipondola okukuatesako.

Tutalei ongeleka yomukai umwe utiwa Sakura, ankho ulinga ovipuka ovivi. Etyi ehimbika okulilongesa Ombimbiliya, anoñgonoka otyitumino tya Huku tyati “enda nkholo ouhayo wotyihola.” (1 Ova Kolindu 6:18) Sakura elikuambela ku Huku emukuateseko, iya etyivili umwe okutyiyekapo. Mahi no ngotyo utualako okuluisa omalusoke oo. Sakura wati: “Tyina namakala nomalusoke apenga, ndyilikuambela ku Huku nomutima auho mokonda ndyityii okuti hityivili okutyiluisa andyike. Okulikuambela tyifueneka vali ku Siovaa.” Nga Sakura, ovanthu ovanyingi vekahi nokunoñgonoka Huku. Huku ukahi nokuvekuatesako okulinga omapiluluko momuenyo wavo, avatyindi omuenyo monkhalelo imuhambukiswa. — Ova Filipu 4:13.

Tyina unoñgonoka nawa Huku nae mekunoñgonoka okala epanga liae. (Ova Galata 4:9; Salmo 25:14) Tupu mokakala mouye omupe wa Huku. Naina, omuenyo mouye omupe maukakala ñgeni? Onthele mailandulako maikumbulula epulo olio.

a Ngetyi Ombimbiliya ipopia Siovaa enyina lya Huku.