Ouhamba wa Huku oityi?
Ekumbululo Lyo Mbimbiliya
Ouhamba wa Huku outumini wotyotyili wavialekua na Siovaa Huku. “Ouhamba wa Huku” tupu wihanwa okuti “Ouhamba wokeulu.” Ombimbiliya ipopia ngotyo mokonda Ouhamba oo ukala keulu. (Maluku 1:14, 15; Mateusi 4:17, Ombimbiliya Rei Jaime) Mouhamba wa Huku muna ovipuka ovinyingi vielifwa noutumini wovanthu, mahi wa Huku wavilapo vali.
Ovatumini. Huku waholovona Sesusi Kilisitu opo akale Ohamba Youhamba oo. Emuavela epondolo lihenekale nomutumini nawike pano pohi. (Mateusi 28:18) Epondolo olio Sesusi uliundapesa vala nawa. Etyi ali pano pohi walekesa-le okuti Omutumini ukahi nawa una ohole nokankhenda. (Mateusi 4:23; Maluku 1:40, 41; 6:31-34; Luka 7:11-17) Nehongolelo lya Huku, Sesusi ukahi nokuholovona ovanthu momalongo atyo aeho “mavakakala onohamba avatumina kombanda yohi” kumwe nae otyo vekahi keulu. — Eholololo 5:9, 10.
Omuwvo Utumina. Tyelikalela noutumini wovanthu, Ouhamba wa Huku, “nalumwe maukanyimwa-ko.” — Daniel 2:44.
Ovanthu. Aveho vana valinga etyi Huku ahanda mavakatuminwa Nouhamba wa Huku, tyihatalela kotyivala ine otyilongo omunthu atyitilwa. — Ovilinga 10:34, 35.
Ovitumino. Ovitumino Viouhamba wa Huku (ine etyi etutuma) kavitupopila etyi tuhapondola okulinga. Vikuatesako omunthu okukala novituwa oviwa. Mongeleka, Ombimbiliya itupopila okuti: ‘“Una okukala nohole na Siovaa Huku yove nomutima wove auho, nomuenyo wove auho, nonondunge mbove ambuho.’ Etyi, otyo otyitumino tyo tete iya otyo otyinene vali. Tya vali tyelifwa notyo, otyetyi: ‘Una okukala nohole na munthele yove ngetyi ulihole ove muene.’” (Mateusi 22:37-39) Ohole na Huku nohole no munthele yetu ilunda ovanthu vatuminwa Nouhamba wa Huku okulitekula nawa.
Ondongeso. Namphila Ouhamba wa Huku wavilapo, mahi ulongesa ovanthu vao oñgeni mavaendela movitumino ovio. — Isaías 48:17, 18.
Etyi ulinga. Ovatumini Vouhamba wa Huku kavaovola ouhona, okupola tya vana vatumina. Mahi, ulinga etyi Huku ahanda, okukutikinya-mo omulao wokuti vana vemuhole mavakakala nomuenyo wahapu mouye omupe pano pohi. — Isaías 35:1, 5, 6; Mateusi 6:10; Eholololo 21:1-4.