Gyuni

Yehova akaha omugisha Abakristaayo omu kyasha ky’okubanza, obwo barikuraba omu mbeera zihindukire. Bakaba nibakira kuhiiganisibwa, obumwe kitaraariire. Teekateeka aha kyahikire ahari Barunaba n’entumwa Paulo obu baabaire nibabuurira omuri Lusitura. Omu kubanza abantu b’ekicweka ekyo bakabakiira gye baabahurikiza. Bwanyima, abahakanisa bakabeihabeiha abantu, kandi bamwe aharibo bakateera Paulo amabaare baamureka ari haihi kufa. (Byak. 14:19) Kwonka Barunaba na Paulo bakagumizamu nibabuurira omu myanya endiijo. Hakarugamu ki? ‘Bakahindura abeegi baingi,’ kandi eky’okureeberaho kyabo n’ebigambo byabo bikagumya Abakristaayo bagyenzi baabo. (Byak. 14:​21, 22) Baingi bakagasirwa ahabw’okugira ngu Barunaba na Paulo bakagumizamu nibabuurira n’obu baabaire nibahiiganisibwa. Twagumizamu nitukora omurimo gwa Yehova, naija kutuha emigisha. w23.04 16-17 ¶13-14

Omugabe Daudi akaba aine abazigu baingi ab’akabi omu kubaho kwe kwona, kandi akaba naakira kushaba Yehova obuhwezi. Akaba aine obwesigye ngu Yehova naahurira okushaba kwaitu, kandi akugarukamu. Naiwe noobaasa kugira obwesigye nk’obwo. Baibuli neetuhamiza ngu Yehova naabaasa kutuha obwengye n’amaani agarikwetengyesa kugumisiriza. Naabaasa kukoresa eka yaitu y’eby’omwoyo nari abatarikumuramya kutuhwera omu miringo etari emwe. N’obu Yehova araabe atarikugarukamu okushaba kwaitu nk’oku turikuteekateeka, nituba twine obwesigye ngu naija kukugarukamu. Naija kutuha byenyini ebirikwetengyesa omu bwire obuhikire. N’ahabw’ekyo gumizamu nooshaba, oine obwesigye ngu Yehova naaza kukureeberera kandi naija ‘kuhaazya ekintu kyona ekihuriire ebi kirikwetenga’ omu nsi ensya eri haihi kubaho.—Zab. 145:16. w23.05 8 ¶4; 13 ¶17-18

Ni kirungi kuta omutima aha migisha ei otungire waaba noohika aha kigyendererwa. Ni birungi ki ebi orikubaasa kuteekateekaho? Ekigyendererwa kyawe kyaba kiri eky’okushoma Baibuli nari kushaba, teekateeka aha ku kiraahamye omukago gwawe na Yehova. (Zab. 145:​18, 19) Waaba oine ekigyendererwa ky’okugira omutwarize gw’Ekikristaayo, ta omutima aha ku kiraakuhwere kwongyera kukoragana gye n’abandi. (Kol. 3:14) Nikibaasa kukwetengyesa kuhandiika enshonga zoona ahabw’enki nooyenda kuhikiiriza ekigyendererwa kyawe. Guma nooshwijuma ebi waahandiika. Kandi, mara obwire n’abo abarikukuhiga. (Enf. 13:20) Kwonka obumwe, hariho obu turikuba nituhurira tutaine kihika. Mbwenu shi ekyo nikimanyisa ngu titurikubaasa kuhika aha kigyendererwa kyaitu? Ngaaha. Nitubaasa kuhika aha kigyendererwa kyaitu n’obu twakuba tutaine mujinya. N’obu eki kirikwetengyesa okwezibira, kwonka ebirikurugamu nibikira okwefeerereza. w23.05 27-28 ¶5-8

Okumanya ngu nitujunaanwa ahabw’ebi turikucwamu nikibaasa kutuhiga kweteisa ebibi byaitu, tutereeze enshonga, kandi twetantare kugaruka kubikora. Okukora ebyo nikituhwera kuguma omu mpaka z’okutunga amagara. Ku oraabe otarikubaasa kuhindura okucwamu kwawe kubi, ikiriza embeera ei orimu hati. Otashiisha obwire orikuteeraho kwehozaho, nari kwecwera orubanja nari kurucwera abandi. Kureka, ikiriza enshobe zaawe kandi oteereho kukora ekihikire omu mbeera ei orimu. Waayeshinja ahabw’ekibi eki okozire, yeshengyereze Yehova omu kushaba, oikirize ekibi kyawe, kandi omushabe kukusaasira. (Zab. 25:11; 51:​3, 4) Shaba okusaasirwa abu oshobeize, kandi kyaba nikyetengyesa gambira abareeberezi kukuhwera. (Yak. 5:​14, 15) Yegyera aha nshobe zaawe, kandi teeraho kutagaruka kuzikora. Waakora ekyo, noobaasa kugira obwesigye ngu Yehova naija kukugirira embabazi kandi akuhwere.—Zab. 103:​8-13. w23.08 28-29 ¶8-9

Yehoyaada akahwera Omugabe Yoasi kuba omuntu murungi. N’ekyarugiremu, omugabe muto ogwo akaba naayenda kushemeza Yehova. Kwonka Yehoyaada ku yaafiire, Yoasi akahurikiza abanyiginya abaabaire batarikutiina Ruhanga. (2 Bus. 24:​4, 17, 18) N’obu kiraabe kyagwisize kubi Yehova “akaguma naabatumaho baanabi kubagarura. . . , kwonka baayanga kuhurira.” Tibaraahurikiize na Zekaria mwene Yehoyaada, owaabaire ari nabi, omunyamurwa kandi omunyabuzaare wa Yoasi. Nangwa omugabe Yoasi akaitisa Zekaria. (2 Bus. 22:11; 24:​19-22) Yoasi ku yaarekyeire aho kutiina Yehova. Yehova akaba agizire ngu, ‘abarikumugaya, nibaija kugaywa.’ (1 Sam. 2:30) Bwanyima, eihe rikye rya Siria rikasingura “eihe rihango munonga” rya Yoasi, kandi “baatsiga ahutaire munonga.” (2 Bus. 24:​24, 25) Abasiria ku baagarukireyo, abaheereza be bakamwita barikuhoorera eshagama ya Zekaria. w23.06 18-19 ¶16-17

Entumwa Paulo akaba amazire obwire omuri Efeso arikubuurira amakuru marungi kandi arikwegyesa. (Byak. 19:​1, 8-10; 20:​20, 21) Akaba naakunda munonga beene ishe, kandi akaba naayenda kubahwera kuguma bahamiire ahari Yehova. Abaefeso abu Paulo yaahandiikiire, bakaba baabaireho omu mwirima gw’ediini z’ebishuba. Efeso ekaba erengyesereize omu bikorwa by’obushambani n’obuhwanshoni. Ebigambo ebirikwitsa enshoni bikaba nibikira kukoresibwa omu myanya y’okweshemerezamu n’aha mikoro y’ediini. (Efe. 5:3) Abaefeso baingi bakaba barengyesereize omu kukora ebihagaro, kandi batarikweshinja “bari nk’ebiti.” (Efe. 4:​17-19) Obu baabaire batakeegire kutaanisa ekirungi n’ekibi, omuntu waabo ow’omunda akaba atarikubashinja. N’ahabw’ekyo, Paulo akabagambaho ‘nk’abari omu mwirima, beetaaniise n’amagara agarikuruga ahari Ruhanga.’ Kwonka, Abaefeso abamwe tibaragumire omu mwirima. w24.03 20 ¶2, 4; 21 ¶5-6

Obujunaanizibwa bwa Gideoni nk’omuramuzi bukaba nibutwariramu okukora n’amaani. Obu Abamidiani baahunga nyekiro, Gideoni akabakuratira kuruga omu ruhanga rwa Yezereeli kuhika aha Mugyera Yorudaani. (Bar. 7:22) Gideoni shi akagarukira aha Mugyera Yorudaani? Ngaaha! N’obu araabe yaabaire aruhire, akambuuka omugyera ogwo n’abashaija be 300 baagumizamu babairukireho. N’ekyarugiremu bakasingura Abamidiani. (Bar. 8:​4-12) Gideoni akaba aine obwesigye ngu Yehova naija kumuha amaani, kandi taramureebize. (Bar. 6:​14, 34) Eizooba rimwe, Gideoni n’abashaija be bakaba bari aha bigyere bairukire aha bagabe babiri Abamidiani obundi bo barikugyendera aha ngamira. (Bar. 8:​12, 21) Kwonka, Abaisraeli barikuhwerwa Ruhanga bakarugaho basingura. Abareeberezi nabo nibabaasa kwesiga Yehova, ‘otarikugwa nshazi, n’obu kwakuba okuruha.’ Naija kubaha amaani agarikwetengyesa.—Isa. 40:​28, 29. w23.06 6 ¶14, 16

Nitubaasa kuguma twine omutima guhami n’obu twakuba nituraba mu kugyezibwa ki. N’ahabw’ekyo, yesigye Yehova. Teekateeka aha businguzi obu Baraki yaatungire ahabw’okwesiga obuhabuzi bwa Yehova. N’obu yaabaire ataine ngabo n’amacumu garikumara, Yehova akamugambira kuza kurwanisa Sisera mukuru w’eihe ry’Abanyakanaani abaabaire baine eby’okurwanisa bingi. (Bar. 5:8) Nabikazi Debora akagambira Baraki kushuma omu ruhita aze kurwanisa Sisera n’ebigari bye 900. Baraki akooroba n’obu yaabaire naamanya ngu ebigaari nibigyenda gye omu mwanya oguteraire. Abaserukare ku baashumire kuruga aha kibungo Tabori, Yehova akagwisa enjura nyingi. Ebigaari bya Sisera bikashaayira omu byondo, Yehova yaahwera Baraki kusingura. (Bar. 4:​1-7, 10, 13-16) Naitwe, Yehova naija kutuhwera kusingura twamwesiga, kandi tukakuratira obuhabuzi obu arikutuha kurabira omu kibiina kye. w23.07 19 ¶17-18

Twine kugumisiriza kubaasa kucungurwa. Nk’abaheereza ba Yehova abeesigwa aba ira, twine kutegyereza tugumisirize kuhitsya obu araahikiirize ebiraganiso bye. (Heb. 6:​11, 12) Baibuli neegyeragyeranisa embeera yaitu n’ey’omuhingi. (Yak. 5:​7, 8) Omuhingi naakora n’amaani kubyara n’okwitirira ebimera bye, kwonka naaba atarikumanya obu biraamere. N’ahabw’ekyo omuhingi naategyereza agumisiriize, aine obwesigye ngu naija kusharuura ebihingwa bye. Nikyo kimwe, nituguma nitwehenenga omu mirimo y’Obukama, n’obu turaabe ‘tutarikumanya ekiro eki Mukama waitu araizireho.’ (Mat. 24:42) Nitutegyereza tugumisiriize, turikumanya ngu Yehova naija kuhikiiriza ebiraganiso bye byona omu bwire bwe obuhikire. Twaba tutagumisiriize nitubaasa kuruha kutegyereza, kandi mporampora tutandikye kuruga omu mazima. Nitubaasa kutandika kusherura ebintu ebirikutureetera okushemererwa okwa kaanya kakye. Kwonka twagumisiriza kuhitsya aha muheru nitwija kujunwa.—Mik. 7:7. w23.08 22 ¶7

Twagyeragyeranisa obunabi oburi omu Danieli 2:​41-43 n’obundi oburi omu kitabo kya Danieli n’Okushuuruurwa, nituhamiza kimwe ngu ebigyere nibijwekyera obutegyeki bw’amakwatane obwa Bungyereza n’Amerika oburiho hati. Aha bikwatiraine n’obutegyeki obwo, Danieli akagira ati: ‘Nikwo n’obwo bugabe burikwija kuba, ekicweka kyabwo nikiija kuba kigumire, n’ekindi kibe ekirikwatwa busha.’ Ahabw’enki ekicweka kyabwo kyabaire nikiija kuba ekirikwatwa busha? N’ahabw’okugira ngu gavumenti eziri ahansi y’obutegyeki obwo tizirikwija ‘kuguma hamwe’ zirikukwatanisa. Kurugiirira aha ku Danieli yaashobooroire ekirooto ky’ekishushani, nitukyegyeraho amazima makuru. Ag’okubanza, obutegyeki kirimaani obwa Bungyereza n’Amerika bworekire ngu bwine amaani omu miringo etari emwe. Nk’eky’okureeberaho, bukakora kihango omu kusingura Orutaro rw’Ensi Yoona I n’orwa II. Kwonka, obutegyeki kirimaani buhwaire amaani, kandi nibugumizamu kucweka busha ahabw’emihondano y’abatuuzi baayo. Aga kabiri, obutegyeki obwo kirimaani obw’amakwatane nibwo buraabe nibukitegyeka Obukama bwa Ruhanga ku buraije kwihaho obutegyeki bw’abantu. w23.08 10-11 ¶12-13

Obumwe, Daudi akaba ayehurira kubi ahabw’okugyezibwa n’okugira oburemeezi. (Zab. 18:​4, 5) Kwonka, okumanya ngu Yehova naamukunda kandi naamufaho kikaba nikimugumya. Yehova akeebembera munywani we owaabaire aruhire yaamuhitsya omu ‘bunyaatsi buto n’amaizi agarikusheneneka.’ N’ekyarugiremu, Daudi akagarukwamu amaani, kandi yaabaasa kugumizamu naamuheereza. (Zab. 18:​28-32; 23:2) Nikyo kimwe na hati, rukundo ya Yehova neetubaasisa kuraba omu kugyezibwa n’emirabanamu. (Tonz. 3:22; Kol. 1:11) Kaingi, Daudi akaba ayeshanga omu kabi kandi aine abazigu b’amaani. Kwonka nabwo, rukundo ya Yehova ekaba neemureetera kuhurira aine oburinzi. Yehova akaba ari hamwe nawe omu buri mbeera kandi eki kikamugumya. N’ahabw’ekyo Daudi akeeshongora ati: ‘[Yehova] akancungura ebyabaire nibintiinisa byona.’ (Zab. 34:4) Ebi Daudi yaabaire naatiina bikaba biri ebya buzima, kwonka rukundo ya Yehova ekaba neekirira kimwe okutiina kwe. w24.01 30 ¶15-17

Yegyera aha kucwamu kubi kwa Yoasi. Yehoyaada ku yaafiire, Yoasi akagira abanywani babi. (2 Bus. 24:​17, 18) Akacwamu kuhurikiriza abanyiginya ba Yuda abaabaire batarikukunda Yehova. Noobaasa kuba noikiriza ngu Yoasi akaba naabaasa kwetantara abanyiginya babi abo. Kwonka, akahurikiza abaabaire nibeetwara nka banywani be. Kandi Zekaria omunyabuzaare wa Yoasi, ku yaataireho kumuhabura, Yoasi akamwita. (2 Bus. 24:​20, 21; Mat. 23:35) Ekyo ka kyabaire kiri kibi kandi eky’obushema! Yoasi akatandika gye, kwonka eky’obusaasi akahinduka omwitsi, kandi yaayehagura aha mazima. Empereruka, abaheereza be bakamwita. (2 Bus. 24:​22-25) Ka yaabaire naija kuhendera gye, ku ogire ngu akagumizamu naahurikiza Yehova n’abarikukunda Yehova! w23.09 9 ¶6

Yesu akaba naamanya ngu entumwa Petero naabaasa kuguma ari omwesigwa. N’ahabw’ekyo Yesu akagambira Petero ati: “Otatiina.” Ekyo kikakwata munonga ahari Petero. Bwanyima, we n’omurumuna Anderea bakatsigaho omurimo gwabo gw’okujuba eby’enyanja baahinduka abakuratsi ba Mesia ab’obutwire, kandi bakatunga emigisha mingi. (Mak. 1:​16-18) Petero akatunga ebirungi bingi arikuheereza nk’omukuratsi wa Kristo. Akareeba Yesu arikukiza abarwaire, arikubinga baadaimoni, kandi arikuzoora n’abafu. (Mat. 8:​14-17; Mak. 5:​37, 41, 42) Petero akareeba okworekwa kw’ekitiinisa kya Yesu nk’Omugabe w’Obukama bwa Ruhanga, kandi ekyo kikamukwataho munonga. (Mak. 9:​1-8; 2 Pet. 1:​16-18) Buzima, Petero akareeba ebintu bingi ebi yaabaire atarikwija kureeba ku ogire ngu tarahindukire omukuratsi wa Yesu. Ka aine kuba yaashemereirwe ahabw’okutaikiriza obweremwa bwe kumureetera kufeerwa emigisha egyo! w23.09 21 ¶4-5

Omu baruha y’entumwa Petero ey’okubanza akakoresa ebigambo “mukundane munonga.” Rukundo egyo terikushweka ebibi bikye byonka, kureka ‘neeshweka ebibi bingi.’ (1 Pet. 4:8) Obundi Petero akaijuka eishomo eririkukwata aha kusaasira eri Yesu yaabaire amwegyeise emyaka mikye enyima. Omu bwire obwo, Petero naabaasa kuba yaateekateekire ngu naaba akozire gye yaasaasira mugyenzi we “emirundi mushanju.” Kwonka Yesu akamwegyesa ngu aine kusaasira ‘emirundi 77,’ ekirikumanyisa okusaasira otaine bugarukiro, kandi naitwe nikyo twine kukora. (Mat. 18:21) Waaba noogumirwa kugyendera aha buhabuzi obu, otahwa amaani. Abaheereza ba Yehova abatahikiriire obumwe nibagumirwa kusaasira. Ekikuru munonga hati n’okukora kyona ekirikubaasika kusaasira ow’eishe-emwe mugyenzi waawe, kandi okagira obusingye nawe. w23.09 29 ¶12

Obu Yona yaabaire ari omu nda y’eky’enyanja, akaba aine obuhame ngu Yehova naija kugarukamu okushaba kwe kw’okweteisa n’obucureezi, kandi ngu Yehova naija kumuhwera. Bwanyima, Yona akagarurwa aha nkungu y’enyanja, kandi hati akaba ayeteekateekire kwikiriza obujunaanizibwa obundi n’okubuhikiiriza. (Yon. 2:10–3:4) Waaba oine oburemeezi, nooyerarikirira munonga oremwa n’okushaba Yehova? Nari noohurira otarikubaasa kweyegyesa? Manya ngu Yehova naayetegyereza gye embeera ei orikurabamu. N’ahabw’ekyo, gira obwesigye ngu n’obu waakushaba omu bugufu, Yehova naija kukuha kyenyini eki orikwenda. (Efe. 3:20) Waaba oine obusaasi omu nyehurira nari omu mubiri oburikukuremesa kushoma nari kwega, teeraho kuhurikiza Baibuli ekwatsirwe omu maraka nari bimwe aha bitabo byaitu. Ekindi ekirikubaasa kukuhwera n’okuhurikiza bimwe aha byeshongoro byaitu nari okureeba vidiyo aha jw.org. Yehova naija kukugumya waamushaba, kandi okateeraho kureeba oku arikugarukamu okushaba kwawe kurabira omu by’okurya by’omwoyo ebi atuhaire. w23.10 13 ¶6; 14 ¶9

Eihema na hekalu eyaayombekirwe omuri Yerusaalemu bikaba nibishushana omunda. Omunda hakaba harimu emyanya ebiri, “Aharikwera, n’Aharikwera Munonga,” kandi hataanisiibwe omukingo. (Heb. 9:​2-5; Kur. 26:​31-33) Omunda y’Aharikwera hakaba harimu etabaaza eheetsirwe omu zaabu, eitambiro ry’okwoteereraho obubaane, n’emeeza eriho emigaati y’okumurikwa. “Abanyamurwa abaashukirweho amajuta” nibo bonka abaabaire nibaikirizibwa kutaaha omunda y’Aharikwera kukora emirimo erikwera. (Kub. 3:​3, 7, 10) Aharikwera munonga hakaba harimu eshanduukye y’endagaano ekozirwe omu zaabu eyaabaire neejwekyera okubaho kwa Yehova. (Kur. 25:​21, 22) Omunyamurwa omukuru niwe wenka owaabaire naikirizibwa kutaaha Aharikwera munonga aha Izooba ry’Okurihiiriraho Ebibi buri mwaka. (Lev. 16:​2, 17) Akaba naataahayo n’eshagama y’enyamaishwa, kurihiirira ebibi bye n’ebya eihanga ryona. Bwanyima, Yehova akooreka gye eki ebyo byabaire nibijwekyera.—Heb. 9:​6, 7. w23.10 27 ¶12

Ekigambo kya Ruhanga nikitwehanangiriza emirundi mingi “kukundana.” (Yoh. 15:12; Rom. 13:8; 1 Tes. 4:9; 1 Pet. 1:22; 1 Yoh. 4:11) Kwonka rukundo n’omutwarize gw’omu mutima, ogu omuntu atarikubaasa kureeba. Nitubaasa kureetera tuta abandi kureeba rukundo ei twine? Ekyo nitukikora kurabira omu bigambo n’omu bikorwa. Hariho emiringo mingi oku turikubaasa kworeka ngu nitukunda ab’eishe-emwe na banyaanyazi-itwe. Emwe ahariyo n’egi: “Mugume mugambirane amazima.” (Zek. 8:16) “Mugire obusingye omuntu na mugyenzi we.” (Mak. 9:50) “Omu kuhaana ekitiinisa, buri muntu ateekateekye ahari mugyenzi we okumweshumba.” (Rom. 12:10) “Mwakiirane.” (Rom. 15:7) ‘[Mugumizemu] nimusaasirana.’ (Kol. 3:13) “Muhwerahwerane emitwaro yaanyu.” (Gal. 6:2) Mugumizemu ‘nimuhuumurizana.’ (1 Tes. 4:18) ‘[Mugumizemu] nimwombekana.’ (1 Tes. 5:11) “Mushabirane.”—Yak. 5:16. w23.11 9 ¶7-8

Buri izooba nitucwamu aha nshonga ezirikwetengyesa okugira okwikiriza kuhami. Nk’eky’okureeberaho, nitucwamu ebirikukwata aha banywani, eby’okweshemeza, eby’obwegyese, eby’obushwere, abaana, n’omurimo. Ni kirungi kwebuuza oti: ‘Ebi ndikucwamu nibyoreka ngu niimanya ngu entebeekanisa y’ensi egi n’ey’akaanya bwanya, kandi ngu Ruhanga ari haihi kureetaho ensi ensya?’ Nari ebi ndikucwamu nibyoreka emiteekateekyere y’abantu abarikugira ngu okufa niyo muheru?’ (Mat. 6:​19, 20; Luk. 12:​16-21) Nitwija kucwamu gye twahamiza kimwe ngu ensi ensya eri haihi. Nituhikwaho okugyezibwa okurikwetengyesa okugira okwikiriza kuhami. Nitubaasa kuba nituhiiganisibwa, twine endwara y’amaani, n’ebindi bintu ebirikubaasa kutumaramu amaani. Omu kubanza, nitubaasa kwemera okugyezibwa okurikutuhikaho. Kwonka kwagumizamu, nikiija kutwetengyesa okwikiriza kuhami kubaasa kugumisiriza n’okugumizamu nituheereza Yehova tushemereirwe.—1 Pet. 1:​6, 7. w23.04 27 ¶4-5

Yehova naayenda ngu tukore ebirikuhikaana n’okushaba kwaitu. Nk’eky’okureeberaho, ow’eishe-emwe naabaasa kushaba Yehova kumuhwera kutunga obwire bw’okuza aha ruteerane oruhango orw’ebiro bishatu. Yehova naabaasa kugarukamu ata okushaba oku? Naabaasa kuhwera ow’eishe-emwe kutunga obumanzi bw’okugamba na mukama we. Kwonka ow’eishe-emwe nawe naaba aine kukora ebirikuhikaana n’okushaba kwe arikushaba mukama we orusa. Nikibaasa n’okumwetengyesa kukikora emirundi mingi. Naabaasa n’okushaba omukozi mugyenzi we kukora omu mwanya gwe yaaba atariho, nari kutashashurwa obwire obu araabe atariho. Yehova naayenda ngu tumushabe emirundi mingi aha bintu ebirikutwerarikiriza. Ebi Yesu yaagambire nibyoreka ngu okushaba kwaitu obumwe nikubaasa kutagarukwamu ahonaaho. (Luk. 11:9) N’ahabw’ekyo titwine kubirugaho! Twine kushaba emirundi mingi twihire aha mutima. (Luk. 18:​1-7) Twaguma nitushaba, nitworeka Yehova ngu okushaba kwaitu ti kushiisha bwire. Kandi nitworeka ngu twine obwesigye ngu naija kutuhwera. w23.11 22 ¶10-11

Yehova akaraganisa munywani we Abrahamu ngu amahanga goona ag’omu nsi gakaba nigaija kuheebwa omugisha kurabira omu ruzaaro rwe. (Kut. 15:5; 22:18) Ahabw’okugira ngu Abrahamu akaba aine okwikiriza kuhami, akaba naahamiza kimwe ngu Ruhanga naija kuhikiiriza eki yaamuraganiise. Kwonka, Abrahamu akahitsya emyaka 100 n’omukazi we yaahitsya emyaka 90 batakazaire omwana w’omwojo. (Kut. 21:​1-7) Kwonka Baibuli neegira ngu, Abrahamu ‘akaba aine amatsiko, ngu naija kuba ishenkuru w’amahanga maingi nk’oku kyagambirwe. (Rom. 4:18) Nitumanya ngu eki Abrahamu yaabaire aineho amatsiko kikahikiirira. Akazaara omwana w’omwojo Isaaka ou yaabaire atwire ategyereize. Abrahamu akaba naihirira ahari ki kugira obwesigye? Akaba aine omukago murungi na Yehova, n’ahabw’ekyo akaba “[naahamiza] kimwe ngu eki Ruhanga yaaraganiise, naabaasa kukikora.” (Rom. 4:21) Ahabw’okugira ngu akaba aine okwikiriza kandi arikusiimwa, Yehova akamweta ohikiriire.—Yak. 2:23. w23.12 8 ¶1-2

Ow’eishe-emwe muto orikwesigwa naateeraho kuhikiiriza gye obujunaanizibwa bwe bwona. Teekateeka ahari Yesu owaabaire ahikiriire. Akaba naafayo kuhikiiriza gye obujunaanizibwa obu Yehova yaabaire amuhaire n’obu kiraabe kyabaire kitoorobi. Akaba naakunda munonga abantu, okukira munonga abeegi be kandi akaba ayeteekateekire kuhayo amagara ge ahabwabo. (Yoh. 13:1) Noobaasa kutooreza Yesu, orikukora n’amaani kuhikiiriza obujunaanizibwa obu orikuheebwa. Waaba otarikumanya oku oraabuhikiirize, shaba obuhwezi ab’eishe-emwe abakuzire omu by’omwoyo. Otakora ebyo byonka ebi ogambiirwe kukora. (Rom. 12:11) Kureka, hikiiriza obujunaanizibwa bwawe ‘nk’orikukorera [Yehova], beitu batari bantu.’ (Kol. 3:23) N’amazima tohikiriire, n’ahabw’ekyo manya obugarukiro bwawe, kandi ikiriza enshobe ezi oraakore.—Enf. 11:2. w23.12 26 ¶8

Nikishemeza omuntu ku arikubatizibwa akaza omu ka ya Yehova. Abaine omugisha ogu ogw’omutaano nibaikirizana na Daudi omuhandiiki wa zaaburi, owaagizire ati: ‘[Aine okushemererwa ou Yehova] arikutoorana, akamwiriza haihi, kuguma omu bikaari bye.’ (Zab. 65:4) Yehova tarikwikiriza buri omwe kwija omu ka ye. Naatoorana abarikworeka ngu nibenda kugira omukago guhami nawe. (Yak. 4:8) Waayehayo ahari Yehova kandi okabatizibwa, noobaasa kuhamiza kimwe ngu bwanyima y’okubatizibwa naija ‘kukushukaho emigisha, obure n’ah’okugita.’ (Mal. 3:10; Yer. 17:8) Okubatizibwa n’entandikiro y’okuheereza Yehova. Noija kuba oine kukora kyona ekirikubaasika kuhikiiriza okuraganisa kwawe, n’obu waakwohibwa nari okahikwaho ebirikugyeza okwikiriza kwawe. (Mub. 5:​4, 5) Ahabw’okugira ngu ori omwegi wa Yesu, noija kuteeraho kumutooreza, kandi oyorobere ebiragiro bye.—Mat. 28:​19, 20; 1 Pet. 2:21. w24.03 8 ¶1-3

Kandi shi iwe n’ou ori nawe omu mwaba mutarikukunda kumara hamwe obwire? Nimubaasa kukora ki? Teekateeka aha muriro. Tigurikwaka ahonaaho. Nooba oine kuguma nooyongyeramu enku mporampora. Nikyo kimwe, nimubaasa kutandika murikuba hamwe obwire bukye buri izooba. Muteeraho kukora ekintu eki murikukunda mwembi. (Yak. 3:18) Mwatandika mporampora, nimubaasa kugaruraho rukundo yaanyu. Ni kikuru kuhaana ekitiinisa omu bushwere. Ekitiinisa kiri nk’omwoya ogurikubaasisa omuriro kuguma nigwaka. Haaba hatariho omwoya ogwo, omuriro niguraara ahonaaho. Nikyo kimwe, haaba hatariho okuhaana ekitiinisa, rukundo y’abari omu bushwere neehora. Kwonka abari omu bushwere baateeraho kuhaana ekitiinisa rukundo yaabo neeyongyera kuhama. Kandi ijuka ngu tikirikurugirira aha ku orikuteekateeka ngu noomuha ekitiinisa kureka nikirugiirira aha ku omukundwa waawe arikwehurira. w23.05 22 ¶9; 24 ¶14-15

Abaheereza ba Yehova abeesigwa abarikugambwaho omu Baibuli, obumwe bakahikwaho embeera ezaabareeteire kugira amaganya n’okutiina ahabw’abazigu baabo nari okugyemeserezibwa okundi. (Zab. 18:4; 55:​1, 5) Naitwe nitubaasa kuba nituhakanisibwa aha ishomero, aha murimo, ab’eka yaitu, nari gavumenti. Nitubaasa kuba nitutiina ngu nitubaasa kufa ahabw’okurwara. Omu bwire nk’obwo, nitubaasa kwehurira nk’abatarikubaasa kwehwera nk’omwana muto. Omu mbeera nk’ezo shi Yehova naatuhwera ata? Naatugumya kandi atuhuumuriza. N’ahabw’ekyo gira obwire bw’okuba na Yehova orikushaba kandi okashoma Ekigambo kye. (Zab. 77:​1, 12-14) Reero waaba ori omu mbeera egumire, noija kubanza kuhungira ahari Sho ow’omu iguru. Gambira Yehova ebirikukutiinisa n’ebirikukwerarikiriza. Ikiriza Yehova kugamba naiwe kandi akuhuumurize kurabira omu Byahandiikirwe.—Zab. 119:28. w24.01 24-25 ¶14-16

Okugira ekihika nikikuhwera kuhika aha kigyendererwa kyawe ky’eby’omwoyo. Omuntu oine ekihika naakora n’amaani kuhika aha kigyendererwa kye. Kandi twayongyera kugira ekihika ky’amaani, nitwija kuhika aha bigyendererwa byaitu. Mbwenu shi noobaasa kukora ki kwongyera kugira ekihika? Shaba kwongyera kugira ekihika. Yehova naabaasa kukoresa omwoyo gwe kukuhiga kuhika aha kigyendererwa kyawe. Obumwe nitutaho ekigyendererwa ahabw’okugira ngu twine kukitaho, kandi ekyo ni kirungi. Kwonka nitubaasa kuba tutaine kihika ky’okukihikaho. Entumwa Paulo akateekateeka aha mbabazi za Yehova ezitamushemereire ezi yaamugiriire, kyamuhiga kukora n’amaani kumuheereza. (1 Kor. 15:​9, 10; 1 Tim. 1:​12-14) Nikyo kimwe, waayongyera kuteekateeka aha bi Yehova akukoreire, nooyongyera kugira ekihika ky’okuhika aha kigyendererwa kyawe.—Zab. 116:12. w23.05 27 ¶3-5

Nitushemeza Tataitwe ow’omu iguru turikuhimbisa eiziina rye. (Zab. 119:108) Eki shi nikimanyisa ngu Ruhanga ow’obushoboorozi bwona naaba naayenda kuhimbisibwa, nk’oku abantu barikuba baine ekihika ky’okuhimbisibwa? Ngaaha. Twahimbisa Tataitwe ow’omu iguru, nitworeka ngu ebi Sitaane yaatugambireho n’ebishuba. Sitaane naagira ngu tihariho muntu orikwija kuhamira ahari Ruhanga akajuririra eiziina rye. Naateekateeka ngu, tihaine orikubaasa kurinda obwesigwa bwe. Naayongyeraho ngu, twena nitubaasa kuruga ahari Ruhanga okukora ekyo kyaba nikitugasira. (Yob. 1:​9-11; 2:4) Kwonka, Yobu owaabaire ari omwesigwa akooreka ngu Sitaane n’omubeihi. Kandi shi iwe? Buri omwe ahariitwe aine omugisha gw’okuhimbisa eiziina rya Tataitwe, kandi akaguma naamuheereza omu bwesigwa. (Enf. 27:11) Buzima n’omugisha gw’amaani kukora ekyo. w24.02 8-9 ¶3-5

Bwanyima y’obwire bwa Musa na Yoshua, Yehova akakoresa abaramuzi kwebembera abantu be. Bwanyima, omu bwire bw’abagabe, Yehova akatoorana baanabi kwebembera abantu be. Abagabe abeesigwa bakagyendera aha buhabuzi bwa baanabi. Nk’eky’okureeberaho, Omugabe Daudi omu bucureezi akaikiriza okuhana kwa nabi Nasani. (2 Sam. 12:​7, 13; 1 Bus. 17:​3, 4) Omugabe Yehoshafaati akeesiga obuhabuzi bwa nabi Yahazieli, kandi yaahiga Abayudaaya kwesiga baanabi ba Ruhanga. (2 Bus. 20:​14, 15) Omu bwire bw’obusaasi Omugabe Hezekia akasherura obuhabuzi ahari nabi Isaaya. (Isa. 37:​1-6) Abagabe ku baabaire bakuratira obuhabuzi bwa Yehova, bakaba batunga emigisha, kandi n’eihanga rikaba riguma riine oburinzi. (2 Bus. 20:​29, 30; 32:22) Kikaba nikireebwa butunu ngu Yehova akaba naakoresa baanabi kwebembera abantu be. w24.02 21 ¶8

Sitaane naayenda ngu tukwatanise n’abantu abarikutureetera kugumirwa kuhamira aha mitindo ya Yehova. Twine kwijuka ngu abu turikushashaanuka nabo t’abo abu turikumara nabo obwire butunu bonka. Beitu n’abo abu turikukoragana nabo aha mikura y’empurizana. Twine kurwanisa emiteekateekyere y’ensi erikugira ngu ebikorwa by’obushambani nibiikirizibwa. Nitumanya ekihikire. (Efe. 4:​19, 20) Ni kirungi kwebuuza tuti: ‘Niinteeraho kwetantara kumara obwire butarikwetengyesa n’abu ndikukora nabo, abu ndikushoma nabo, nari abandi abatarikuha ekitiinisa emitindo ya Yehova? Niinyoreka obumanzi ndikuhamira aha mitindo ya Yehova, n’obu abamwe baakugira ngu niindemeraho?’ Nk’oku kirikworekwa omu 2 Timoseo 2:​20-22, twine n’okwegyendesereza twaba nitutoorana abanywani ab’aha mara omu kibiina Ekikristaayo. Twine kwijuka ngu abamwe nibabaasa kutatuhwera kuguma turi abeesigwa ahari Yehova. w24.03 22-23 ¶11-12

Nooteekateeka ngu Yehova ni wa muringo ki? N’obu Yehova araabe atarikureebwa, Baibuli neemugambaho omu miringo mingi. Yehova naayetwa ‘eizooba n’engabo’ hamwe ‘n’omuriro ogurikurya busha.’ (Zab. 84:11; Heb. 12:29) Yehova naagyeragyeranisibwa n’eibaare rya safiro, omuringa gweziibwe, n’omuhanganzima. (Ezk. 1:​26-28) Ahabw’okugira ngu titurikubaasa kureeba Yehova, nikibaasa kutugumira kwikiriza ngu naatukunda. Abamwe nibateekateeka ngu Yehova tarikubaasa kubakunda ahabw’ebi baarabiremu. Yehova naayetegyereza oku turikwehurira n’oku turikukwatwaho enyehurira nk’ezo. Naakoresa Ekigambo kye kutuhwera kumanya emitwarize ye mirungi. Rukundo nikyo kigambo kimwe ekirikushoboorora gye Yehova. (1 Yoh. 4:8) Baibuli neegira ngu Ruhanga ni rukundo. Niyo erikumuhiga kukora buri kimwe. Ruhanga aine rukundo mpango kandi naagyoreka n’abatarikumukunda.—Mat. 5:​44, 45. w24.01 26 ¶1-3

Yehova akatoorana Musa kwebembera Abaisraeli kubaiha Misri kandi arikukoresa akamanyiso akarikureebwa butunu, akataho enyomyo y’ekicu kubeebembera nyomushana n’enyomyo y’omuriro kubeebembera nyekiro. (Kur. 13:21) Musa akakuratira enyomyo egyo kwebembera Abaisraeli kuhika aha Nyanja Erikutukura. Abantu bakahahaara emitima ku baahikire aha nyanja, kandi obwo bakuratiirwe eihe ry’Abanyamisri. Kwonka ekaba etari nshobe. Yehova akakoresa Musa kuhitsya abantu be omu mwanya ogwo akigyendereire. (Kur. 14:2) Bwanyima akabajuna omu muringo gw’eky’okutangaaza. (Kur. 14:​26-28) Omu myaka 40 eyaakuratsireho, Musa akagumizamu naakuratira enyomyo y’ekicu kwebembera abantu ba Ruhanga kuraba omu ihamba. (Kur. 33:​7, 9, 10) Yehova akaba agamba na Musa kurabira omu nyomyo egi, reero Musa agambira abantu obuhabuzi bwa Yehova. Abaisraeli bakaba baine obuhame oburikumara kubahamiza ngu Yehova naakoresa Musa kubeebembera. w24.02 21 ¶4-5