Gyuraayi

Byona ebi Yesu yaagambire n’ebi yaakozire otwariiremu n’eby’okutangaaza, bikooreka gye emiteekateekyere n’enyehurira za Ishe. (Yoh. 14:9) Nitubaasa kwegyera ki aha by’okutangaaza bya Yesu? Yesu na Ishe nibatukunda munonga. Obu Yesu yaabaire ari omu nsi akooreka ngu naakunda abantu arikukora eby’okutangaaza kuhwera abaabaire nibabonabona. Eizooba rimwe, abashaija babiri empumi bakamweshengyereza ngu abahwere. (Mat. 20:​30-34) Yetegyereze ngu Yesu ‘akabagirira embabazi’ yaabatambira. Ebigambo by’Orugriika ebirikuvunuurwa ‘okugira embabazi’ nibimanyisa enyehurira y’esaasi ei omuntu arikugira omunda. Embabazi nk’ezo, ezirikworeka rukundo, zikahiga Yesu kuriisa abaabaire baine enjara n’okutambira omubembe. (Mat. 15:32; Mak. 1:41) Nitubaasa kuhamya ngu Yehova, Ruhanga ‘oijwire embabazi,’ n’Omwana we nibatukunda munonga kandi nibatusaasibwa twaba nitubonabona. (Luk. 1:78; 1 Pet. 5:7) Buzima ka baine ekihika ky’okwihiraho kimwe oburemeezi bw’abantu bwona! w23.04 3 ¶4-5

Nitubaasa kukora ekyo turikwetantara ebirikubaasa kutureetera kugira emiteekateekyere etahikire eijwire omu nsi ya Sitaane. Nitubaasa kuta omu biteekateeko byaitu ebintu birungi turikushoma Baibuli kandi tukagyeyegyesa Baibuli. Okwejumba omu nteerane n’okuza omu kubuurira nakyo nikirinda ebiteekateeko byaitu. Kandi Yehova naaturaganisa ngu tarikwija kutureka kugyezibwa eki tutarikubaasa kwemera. (1 Kor. 10:​12, 13) Buri omwe ahariitwe aine kwongyera kushaba kubaasa kuguma ari omwesigwa ahari Yehova omu biro by’emperu ebi ebigumire. Yehova naayenda ngu twaba nitushaba tumugambire byona ebi turi aha mutima. (Zab. 62:8) Himbisa Yehova kandi omusiime ahabwa byona ebi arikukora. Mushabe kukuhwera kugira obumanzi omu kubuurira. Mweshengyereze kukuhwera kwemera oburemeezi n’okwangira okwohibwa okw’emiringo yoona. Otaikiriza ekintu kyona kukuremesa kuguma nooshaba Yehova. w23.05 7 ¶17-18

Ahabw’enki nituza omu nteerane z’ekibiina? Enshonga enkuru n’okuhimbisa Yehova. (Zab. 26:12; 111:1) Kandi nituza omu nteerane kugira ngu tugumyane omu bwire obu obugumire. (1 Tes. 5:11) Twahanika omukono kandi tukagarukamu, nituhikiiriza ebintu ebyo bibiri. Kwonka hariho ebirikubaasa kuturemesa kugarukamu. Nitubaasa kutiina kugarukamu, nari nitubaasa kutatooranwa buri kuhanika omukono. Mbwenu shi nitubaasa kukora ki? Entumwa Paulo akagira ngu twine kuta omutima aha ‘kugumyana.’ Twamanya ngu n’ebyorobi ebi turikugarukamu nibigumya abandi, titurikwija kutiina kuhanika omukono kugarukamu. Kandi twaba tutarikukira kutooranwa, nitubaasa kushemererwa ahabw’okugira ngu abandi omu kibiina nibatunga omugisha gw’okugarukamu.—1 Pet. 3:8. w23.04 20 ¶1-3

Omugabe akaba yaaherize kuranga! Abayudaaya abaabaire bari enkwatwa omuri Babulooni kumara emyaka nka 70, bakaikirizibwa kugaruka owaabo, Israeli. (Ezr. 1:​2-4) Yehova niwe wenka owaabaire naabaasa kuhikiiriza eki. Babulooni ekaba etarikukira kurekura enkwatwa zaayo. (Isa. 14:​4, 17) Kwonka ekaba yaaherize kusingurwa, kandi omutegyeki musya akaba agambiire Abayudaaya ngu nibabaasa kutaaha. Buri Muyudaaya, na munonga emitwe y’amaka bakaba baine enshonga nkuru y’okucwamu, yaaba kuruga omuri Babulooni nari kugumayo. Eki kikaba kitoorobi kucwamu. Baingi nibabaasa kuba baabaire bakuzire omu myaka batarikubaasa kugyenda orugyendo ruraingwa orwo. Kandi ahabw’okugira ngu Abayudaaya abarikukira obwingi bakaba bazaariirwe Babulooni, nigwo mwanya gwonka ogu baabaire nibamanya. Bakaba nibateekateeka ngu Israeli n’omwanya gwa baishenkurubo. Abayudaaya abamwe bakaba bari abagaiga omuri Babulooni, n’ahabw’ekyo nikibaasa kuba kyabagumiire kutsigaho amaka gaabo marungi nari eby’obushuubuzi byabo kuza kutuura omu mwanya ogu baabaire batamanyiriire. w23.05 14 ¶1-2

Ekigambo kya Ruhanga nikituhiga kwongyera kugumisiriza, kugira esaasi, na rukundo. Luka 21:19 nihagira hati: “Omu kwehangaana nimwo murijunira amagara gaanyu.” Abakolosai 3:12 nihagira hati: “Mujware omutima gw’esaasi.” Kandi 1 Abatesalonika 4:​9, 10 nihagira hati: “Ahabw’okuba imwe ahabwanyu mukeegyesibwa Ruhanga okukundana. . . . Kwonka nitubeehanangiriza b’eishe-emwe, mugume mweyongyere kukundana.” Emishororongo egyo bakagihandiikira abeegi abaabaire baayorekire okugumisiriza, esaasi, na rukundo. Kwonka, bakaba baine kugumizamu nibateeraho kworeka emitwarize egyo. Kubaasa kuhwerwa, yetegyereze oku Abakristaayo omu kyasha ky’okubanza baayorekire emitwarize. Reero noija kureeba oku orikubaasa kutooreza abeegi abo, kandi n’ekiraarugyemu noija kwetebeekanisiza okubonabona kwingi. Reero okubonabona kwingi ku kuraatandikye, noija kuba waayegire oku orikubaasa kugumisiriza, kandi noija kumariirira kugumizamu noogumisiriza. w23.07 3 ¶4, 8

Yaaba turi entoore nari ‘ab’entaama ezindi’ twine kuguma nitugyendera omu ‘Muhanda Ogurikwera’ ogurikuturabya omu paradiso y’eby’omwoyo kandi oguraatuhitsye aha migisha y’Obukama. (Yoh. 10:16) Kuruga 1919 Y.A.K., abashaija, abakazi, n’abaana baingi barugire omuri Babulooni Orukuru, ediini zoona z’ebishuba, baaza omu muhanda ogu ogw’akamanyiso. Abayudaaya ku baarugire Babulooni, Yehova akahamya ngu yaiha omu muhanda byona ebirikubaasa kubaremesa. (Isa. 57:14) Kandi shi “Omuhanda Ogurikwera” ogw’omu bunaku obu? Ebyasha bingi omwaka 1919 gutakahikire, Yehova akakoresa abashaija abaabaire nibamutiina kuhwera abandi kuruga omuri Babulooni Orukuru. (Gyeragyeranisa Isaaya 40:3.) Baakakora emirimo yoona eyaabaire neeyetengyesa kutebeekanisa omuhanda gw’eby’omwoyo, kugira ngu abantu ab’emitima eshemeire barugye omu Babulooni Orukuru baze omu paradiso y’eby’omwoyo, nikwo kuramya okushemeire okwabaire kugarwirweho. w23.05 15-16 ¶8-9

Yehova naayenda ngu tumuheereze tushemereirwe kandi twekundiire. (2 Kor. 9:7) Mbwenu shi twine kugumizamu nituteeraho kuhikiiriza ekigyendererwa ky’omwoyo n’obu twakuba nituhurira tutaine kihika? Teekateeka aha ky’okureeberaho ky’entumwa Paulo. Akagira ati: “Nteera omubiri gwangye ngu ngutegyekye.” (1 Kor. 9:​25-27) Paulo akaba ayeegyema kukora ekihikire n’obu yaabaire aba naahurira atarikwenda kukikora. Mbwenu shi Yehova akasiima obuheereza bwa Paulo? Eego. Kandi akamushuumbusha ahabw’okuteeraho. (2 Tim. 4:​7, 8) Yehova naatusiima twateeraho kuhikiiriza ekigyendererwa kyaitu n’obu turikuba tutaine kihika. Naashemererwa ahabw’okumanya ngu titurikukikora ahabw’okugira ngu nitukikunda, kureka nitukikora ahabw’okumukunda. Nk’oku Yehova yaahaire Paulo emigisha, naitwe naija kugituha twateeraho. (Zab. 126:5) Kandi twareeba emigisha ei Yehova arikutuha nikituhwera kugira ekihika. w23.05 29 ¶9-10

Entumwa Paulo akagyeragyeranisa abataraahonokeho aha kiro kya Yehova n’abantu abagwejegyeire. Nibaba batarikumanya ebirikubaho nari eshaaha ahu zaahika. N’ahabw’ekyo, nibaba batarikumanya ebintu bikuru ebirikubaho, kandi batarikubaasa kugira eki baakora. Abantu baingi bagwejegyeire omu by’omwoyo. (Rom. 11:8) Tibarikwikiriza obuhame oburikworeka ngu turi omu ‘biro by’emperu’, kandi ngu okubonabona kwingi kuri haihi kubaho. (2 Pet. 3:​3, 4) Kwonka, obuhabuzi oburikugira ngu mugume nimureeba nibwongyera kuba bukuru ahariitwe buri izooba. (1 Tes. 5:6) N’ahabw’ekyo, nituguma twikaikaine kandi tweteekateekire. Ahabw’enki? Kugira ngu tutakeejwanzya omu nshonga z’eby’obutegyeki nari ez’abantu. Nitwija kwongyera kugyemeserezibwa kwejwanzya omu nshonga ezo ekiro kya Yehova kyaguma nikiirira haihi. Kwonka nabwo, titwine kwerarikirira aha ku turatwaze. Omwoyo gurikwera nigubaasa kutuhwera kwikaikana, kuteekateeka gye n’okucwamu omu muringo gw’obwengye.—Luk. 12:​11, 12. w23.06 10 ¶6-7

Niki ekirikukwija omu biteekateeko waahurira eiziina Samusooni? Nooteekateeka aha mushaija w’amaani maingi? Nikwo kiri. Kandi Samusooni akacwamu kubi ekyamureeteire akabi. Kwonka, Yehova akata omutima aha bikorwa bye eby’obwesigwa, kandi akabindiikisa omu Baibuli kutugasira. Yehova akakoresa Samusooni kuhwera abaheereza be, Abaisraeli. Bwanyima y’emyaka mingi, Yehova akahwera Paulo kuhandiika amaziina g’abashaija abaabaire baine okwikiriza otwariiremu na Samusooni. (Heb. 11:​32-34) Eky’okureeberaho kya Samusooni nikibaasa kutugumya. Akaba naayesiga Yehova, n’omu mbeera zigumire. Samusooni nitubaasa kumwegyeraho amashomo maingi, kandi eky’okureeberaho kye nikibaasa kutugumya. w23.09 2 ¶1-2

Nitubaasa kuhamya okugumisiriza kwaitu turikushaba Yehova emirundi mingi tukamugambira oburemeezi bwaitu bwona. (1 Tes. 5:17) Noobaasa kuba otaine okugyezibwa kw’amaani hati. Kwonka shi ku orikushoberwa, nari waaba otarikumanya eky’okukora nooshaba Yehova obuhabuzi? Waaba nooshaba Yehova butoosha kukuhwera waatunga buremeezi, torikwija kugumirwa kumushaba waahikwaho oburemeezi bw’amaani omu biro by’omumaisho. Noija kuba noohamiza kimwe ngu naamanya gye obu araakuhwere n’eki araakore kukuhwera. (Zab. 27:​1, 3) Nitwija kubaasa kugumisiriza okubonabona kwingi omu biro by’omumaisho twagumisiriza okugyezibwa hati. (Rom. 5:3) Ahabw’enki nitugira tutyo? Ab’eishe-emwe baingi nibagira ngu buri murundi ogu barikugumisiriza embeera zigumire, nikibahwera kugumisiriza oburemeezi obundi obu barikutunga. Okugumisiriza nikubahwera kuhamya okwikiriza kwabo ngu Yehova naayenda kubahwera, kandi ngu ayeteekateekire kukikora. Okwikiriza okwo kubabaasiise kwemera okugyezibwa okundi.—Yak. 1:​2-4. w23.07 3 ¶7-8

Yehova naahigwa obucureezi bwe n’esaasi kutwaza omu muringo guringaniire. Nk’eky’okureeberaho, Yehova akooreka ngu n’omucureezi obu yaabaire ari haihi kucwekyereza abantu babi ba Sodoma. Yehova akakoresa baamaraika be, kugambira Looti kuhungira omu nshozi. Looti akatiina kuzayo. N’ahabw’ekyo akeeshengyereza Yehova, ngu we n’eka ye baikirizibwe kuhungira Zoari, tauni nkye ei Yehova yaabaire acwiremu kucwekyereza. Yehova akaba naabaasa kuremera aha nshonga ngu Looti akore eki yaamugambira. Kwonka, akakora eki Looti yaamushabire, n’obu Zoari yaabaire eri ey’okucwekyerezibwa. (Kut. 19:​18-22) Ebyasha ebyakuratsireho, Yehova akagirira esaasi abatuuzi ba Nineeve. Akatuma nabi Yona kugambira abantu babi ba Nineeve ngu bo n’orurembo bakaba nibaza kucwekyerezibwa. Kwonka abantu ba Nineeve ku baayeteisize, Yehova akabagirira esaasi tiyacwekyereza n’orurembo.—Yon. 3:​1, 10; 4:​10, 11. w23.07 21 ¶5

Nitubaasa kwegyera ki ahari Yoasi? Akaba ari nk’omuti ogwine emizi etahami ogurikushagikwa enyomyo. Yehoyaada niwe yaabaire ari enyomyo ye, n’ahabw’ekyo ku yaafiire, Yoasi akahurikiza abaabaire beehagwire aha mazima, kyamureetera kugwa. Eky’okureeberaho eki nikyoreka gye ngu okutiina Ruhanga tikwine kurugiirira aha Bakristaayo bagyenzi baitu otwariiremu n’ab’eka yaitu. Kubaasa kuguma tuhami omu by’omwoyo, twine kuhamya omukago gwaitu na Ruhanga kandi tukamutiina turikweyegyesa obutoosha, tukateekateeka kandi tukashaba. (Yer. 17:​7, 8; Kol. 2:​6, 7) Yehova tarikutushaba kukora ebi tutarikubaasa. Ebi arikutwenza biri omu Omubuurizi 12:​13, aharikugira hati: “Tiina Ruhanga, oyorobere ebiragiro bye, ahakuba ekyo kyonka nikyo omuntu ashemereire kukora.” Twaba nitutiina Yehova, nitwija kubaasa kuguma tumuhamiireho. Kandi tihaine ekiraashiishe omukago gwaitu nawe. w23.06 19 ¶17-19

Obuhame bwa Ruhanga nibutandika buti: “Ogwo owaabaire ashutami aha kitebe ky’obukama yaagira ati.” (Kush. 21:5a) Ogu n’omurundi gw’okubanza aha mirundi eshatu obu Yehova yaagamba butunu omu kworekwa omu kitabo ky’Okushuuruurwa. N’ahabw’ekyo, orikutuha obuhame obu ti maraika, nari Yesu owaabaire azookire, kureka ni Yehova. Okumanya ekyo nikituhwera kwesiga ebigambo ebirikukurataho. Ahabw’enki? Ahakuba Yehova ‘tarikubaasa kubeiha.’ (Tit. 1:2) Ebigambo ebyo nibireetera ebi turikushoma omu Okushuuruurwa 21:​5, 6 kuba ebirikwesigirwa kimwe. Yetegyereza ekigambo “Reeba!” Ekigambo ky’Orugriika ekirikuvunuurwa “reeba” nikikoresibwa emirundi mingi omu kitabo ky’Okushuuruurwa. Niki ekirikukurataho? Nihakurataho ebigambo bya Ruhanga ebi: “Nimpindura byona bisya.” N’amazima, akaba naagamba aha mpinduka eziraabeho omu biro by’omumaisho, kwonka ahabw’okugira ngu akaba naahamya ngu niziija kubaho, akazigambaho nk’eziriyo nizibaho.—Isa. 46:10. w23.11 3-4 ¶7-8

Entumwa Petero akaba naateganisibwa obweremwa bwe. Teekateeka aha by’okureeberaho ebi. Yesu ku yaashobooroire oku yaabaire naija kubonabona kandi akafa kuhikiiriza obunabi, Petero akamuteisa. (Mak. 8:​31-33) Emirundi mingi, Petero n’entumwa abandi bakahakana aha waabaire ari omukuru omuribo. (Mak. 9:​33, 34) Aha kiro ky’aha muheru Yesu atakafiire, Petero ahabw’ekiniga akashara okutu kw’omushaija. (Yoh. 18:10) Kandi aha kiro ekyo, Petero ahabw’okutiina akeehakana munywani we Yesu emirundi eshatu ngu tarikumumanya. (Mak. 14:​66-72) Ekyo kikareetera Petero kurira munonga. Yesu tararugire aha ntumwa ye owaabaire naayehurira kubi. Ku yaazookire, akaha Petero omugisha gw’okworeka ngu naakimukunda. Akaha Petero obujunaanizibwa bw’okuriisa entaama ze. (Yoh. 21:​15-17) Petero akaba ayeteekateekire kukora eki Yesu yaamugambiire. Akaba ari omuri Yerusaalemu aha izooba rya Pentekoote, kandi akaba ari omu baabandize kushukwaho omwoyo gurikwera. w23.09 22 ¶6-7

Petero akahiga abareeberezi bagyenzi be ati: “Muriise gye obusyo bwa Ruhanga.” (1 Pet. 5:​1-4) Waaba ori omureeberezi, nitumanya ngu nookunda ab’eishe-emwe na banyaanyako, kandi nooyenda kubareeberera omu by’omwoyo. Kwonka, obumwe noobaasa kugira bingi by’okukora nari ohurire oruhire otarikubaasa kuhikiiriza obujunaanizibwa obu. Noobaasa kukora ki? Gambira Yehova oku orikwehurira omu kushaba. Petero akahandiika ati: “Orikuheereza aheereze n’amaani agu Ruhanga amuhaire.” (1 Pet. 4:11) Ab’eishe-emwe na banyaanyazi-itwe nibahikwaho oburemeezi obutarikubaasa kurugiraho kimwe hati. Kwonka ijuka ngu “Omuriisa omukuru,” Yesu Kristo, naabaasa kubahwera kukira oku orikubaasa kukikora. Ekyo naabaasa kukikora hati, n’omu nsi ensya. Yehova naayenda ngu abareeberezi bakunde ab’eishe-emwe bagyenzi baabo, babagumye kandi bababeere ‘eky’okureeberaho.’ w23.09 29-30 ¶13-14

Twine kwetantara okugyendera aha miteekateekyere y’abantu. Twaba twine emiteekateekyere nk’ey’abantu b’ensi, nitubaasa kwehuzya Yehova n’emitindo ye. (1 Kor. 3:19) “Obwengye bw’ensi” nibureetera abantu kuta omutima aha ebyetengo by’omubiri. Abakristaayo abamwe omuri Perugamo na Suatira bakaba batandikire kugira emiteekateekyere y’obushambani n’okuramya ebishushani nk’abantu abandi omu ndembo ezo. Yesu akahana ebibiina byombi ahabw’okushwekyerera obushambani. (Kush. 2:​14, 20) Naitwe nitugyemeserezibwa kugira emiteekateekyere egwire. Ab’amaka gaitu na banywani baitu nibabaasa kwihirira aha nyehurira zaitu kutureetera kuhenda emisingye ya Baibuli. Nk’eky’okureeberaho, nibabaasa kukugira ngu okuguma oshemeire omu micwe ti kikuru, kandi ngu emitindo ya Baibuli ey’emicwe ehweire aha mureembe. Obumwe nitubaasa kugira ngu obuhabuzi obu Yehova arikuha tiburikumara. Nitubaasa n’okwohibwa ‘kurenga aha Byahandiikirwe.’—1 Kor. 4:6. w23.07 16 ¶10-11

Mariamu nyina wa Yesu, akaba aine kugira amaani. Akaba atari mu bushwere, kwonka akaba naija kugira enda. Tihaine eki yaabaire naamanya aha kworora abaana, kwonka akaba aine kworora omwojo owaabaire naija kuba Mesia. Kandi obu ataine ou yaabaire yaateeraine nawe, akaba naija kushoboororera ata Yosefu owaabaire naamugamba obugyenyi? (Luk. 1:​26-33) Mariamu akatunga ata amaani? Akahwerwa abandi. Nk’eky’okureeberaho, akashaba Gaburieli kumugambira ebyabaire nibitwarirwa omu bujunaanizibwa obwo. (Luk. 1:34) Bwanyima, akaza “omu nsi y’ebibungo” omuri Buyudaaya kutaayaayira omunyabuzaare we Elizaabeesi. Elizaabeesi akasiima Mariamu, kandi arikuhwerwa Yehova akagamba obunabi obwabaire nibukwata aha mwana wa Mariamu owaabaire akiri omunda. (Luk. 1:​39-45) Mariamu akagira ngu Yehova akaba “ayorekire amaani n’omukono gwe.” (Luk. 1:​46-51) Yehova akagumya Mariamu arikukoresa Gaburieli na Elizaabeesi. w23.10 14-15 ¶10-12

Abeegi bakye ba Kristo abashukirweho omwoyo gurikwera nibo baine omukago gw’omutaano na Yehova. Abantu 144,000 nibo baraaheereze na Yesu nk’abanyamurwa omu iguru. (Kush. 14:1) Aharikwera nihajwekyera embeera ey’eby’omwoyo ei abashukirweho omwoyo gurikwera barimu omu nsi nk’abaana ba Ruhanga. (Rom. 8:​15-17) Aharikwera munonga nihajwekyera iguru, ahu Yehova arikutuura. “Omukingo” ogwabaire nigutaanisa Aharikwera n’Aharikwera munonga, nigujwekyera omubiri gwa Yesu ogw’obuntu ogu yaabaire aine atakagiire omu iguru nk’Omunyamurwa Omukuru rugambwa owa hekalu ey’eby’omwoyo. Yesu okuhayo omubiri gwe nk’ekitambo ahabw’abantu, akateeraho Abakristaayo entoore boona omuhanda gw’okuza omu iguru. Nabo nibaba baine kufeerwa omubiri gwabo ogw’obuntu kubaasa kutunga ekihembo ky’okuza omu iguru.—Heb. 10:​19, 20; 1 Kor. 15:50. w23.10 28 ¶13

Gideoni akagarukamu gye Abaefuraimu ku baamucwereire orubanja. (Bar. 8:​1-3) Taragarukiremu n’ekiniga. Akooreka obucureezi arikuhurikiza ebi baabaire nibagamba kandi omu muringo gw’obwengye akaikaikanisa embeera. Abareeberezi abanyabwengye nibatooreza Gideoni barikuhurikiza gye kandi bakagarukamu baikaikaine baacwerwa orubanja. (Yak. 3:13) Omu muringo ogwo nibongyera kureetaho obusingye omu kibiina. Ku baahimbiise Gideoni ahabw’okusingura Abamidiani, akacwamu kuhimbisisa Yehova. (Bar. 8:​22, 23) Abareeberezi n’abaheereza nibabaasa kutooreza bata Gideoni? Baine kuhimbisisa Yehova ahabw’ebi barikuhikiiriza. (1 Kor. 4:​6, 7) Nk’eky’okureeberaho, omureeberezi baamusiima ahabw’okwegyesa gye, naaba aine kworeka ngu obukomooko bw’obuhabuzi, n’Ekigambo kya Ruhanga, kandi ngu twena nitwegyesibwa ekibiina kya Yehova. Abareeberezi obumwe baine kweshwijuma kureeba yaaba nibeetaho omutima omu mwanya gw’okuhimbisisa Yehova. w23.06 4 ¶7-8

Okushaba kwaitu kwaba kutagarukirwemu, nitubaasa kwebuuza tuti: ‘Ninshaba ekintu ekihikire?’ Kaingi, nitukira kuteekateeka ngu nitumanya ekirikukirayo oburungi. Kwonka eki turikushaba nikibaasa kuba tikyo kiraatugasire. Twaba twine oburemeezi obu turikwenda ngu burugyeho, nihabaasa kuba hariho omuringo murungi gw’okubushoboorora kukira ogu turikushaba. Kandi obumwe ebi turikushaba nibibaasa kuba bitarikuhikaana n’ebi Yehova arikukunda. (1 Yoh. 5:14) Nk’eky’okureeberaho, teekateeka aha bazaire abashabire Yehova ngu omwana waabo agume omu mazima. Okwo nikureebeka nk’okushaba okuhikire. Kwonka, Yehova tarikugyema muntu weena kumuheereza. Naayenda ngu buri omwe ahariitwe ayecweremu kumuramya, otwariiremu n’abaana baitu. (Bir. 10:​12, 13; 30:​19, 20) N’ahabw’ekyo abazaire abo bakaba nibabaasa kushaba Yehova kubahwera kuhika omwana waabo aha mutima, kukunda Yehova n’okuba munywani we.—Enf. 22:6; Efe. 6:4. w23.11 21 ¶5; 23 ¶12

Ahabw’enki okuhuumuriza abandi guri omuringo mukuru gw’okworeka rukundo? Kurugiirira aha bigambo ebirikushoboorora Baibuli, ekigambo eki Paulo yaakoreise kushoboorora ‘okuhuumuriza’ nikimanyisa “okwemerera haihi n’omuntu kumugumya yaaba naaraba omu kugyezibwa kw’amaani.” N’ahabw’ekyo, twateeraho kugumya ab’eishe-emwe bagyenzi baitu abaine amaganya, nitubahwera kuhama n’okugumizamu nibagyendera omu muhanda gw’amagara. Buri murundi ogu turikuha ow’eishe-emwe nari munyaanyazi-itwe eibega ry’okuririraho, nituba nitworeka ngu nitumukunda. (2 Kor. 7:​6, 7, 13) Okugirira abandi embabazi n’okubahuumuriza biine akakwate. Mu muringo ki? Omuntu oine embabazi naahuumuriza abandi kandi abahwera. N’ahabw’ekyo twine kubanza kugirira abandi embabazi, reero tukabahuumuriza. Yetegyereze oku entumwa Paulo arikworeka ngu embabazi za Yehova ziine akakwate n’oku arikutuhuumuriza. Paulo naagamba ahari Yehova nka ‘Tataitwe ow’okusaasira, kandi Ruhanga ow’okuhuumuriza kwona.’—2 Kor. 1:3. w23.11 9-10 ¶8-10

Abakuratsi ba Kristo boona baine kumanya ngu nibaija kugira obusaasi. Yetegyereze eky’okureeberaho ky’entumwa Paulo. Akagambira aba Tesalonika ati: “Ahakuba tukabamanyisa kare tukiri owaanyu, ku turi ab’okubonabonesibwa, kandi nikwo kyabaire, nk’oku murikumanya.” (1 Tes. 3:4) Kandi akahandiikira Abakorinso ati: ‘Titurikwenda ngu mutamanya okubonabona okwatubaireho kukatureetera kwehwa amatsiko ngu titurakire.’ (2 Kor. 1:8; 11:​23-27) Abakristaayo nabo nibamanya ngu nibabaasa kuhikwaho obusaasi omu miringo etari emwe n’emwe. (2 Tim. 3:12) Waikiririza omuri Yesu kandi okamukuratira, abanyabuzaare nibabaasa kukutwariza kubi. Okumariirira kuba ow’amazima omuri byona shi kikureetaire kuhiiganisibwa aha murimo? (Heb. 13:18) Noohakanisibwa gavumenti ahabw’okugambira abandi amatsiko agu oine? Entumwa Paulo akagira ngu twine kushemererwa n’obu twakuhikwaho okuhiiganisibwa kwa muringo ki. w23.12 10-11 ¶9-10

Yakobo akagumisiriza oburemeezi bwingi. Batabani ba Yakobo babiri Simeoni na Leevi, bakagwisiza eka yaabo akagwe, kandi baajumisa n’eiziina rya Yehova. Ekindi, Rakeeli omukazi we omukundwa, akafa arikuzaara omwana waabo wa kabiri. Kandi ahabw’enjara y’amaani, Yakobo akagyemeserezibwa kuza Misri ari omugurusi. (Kut. 35:​16-19; 37:28; 45:​9-11, 28) Kwonka omu mbeera ezo zoona, Yakobo akaguma naikiririza omuri Yehova n’omu biraganiso bye. Kandi, Yehova akahamiza Yakobo ngu naamusiima. Nk’eky’okureeberaho, Yehova akaha Yakobo emigisha yaatunga ebintu bingi. Kandi teebereza oku Yakobo yaasiimire Yehova ku yaagarukire kureeba mutabani we Yosefu ou yaabaire naamanya ngu akafa. Yakobo akabaasa kwemera oburemeezi ahabw’okugira ngu akaba aine omukago guhami na Yehova. (Kut. 30:43; 32:​9, 10; 46:​28-30) Twaguma twine omukago guhami na Yehova nitubaasa kugumisiriza oburemeezi oburikubaho kitaraariire. w23.04 15 ¶6-7

Zaaburi 23 n’ekyeshongoro ekirikworeka obwesigye obu Daudi yaabaire aine omuri rukundo ya Yehova n’okufayo kwe. Daudi omuhandiiki wa zaaburi egi, naashoboorora omukago guhami ogu yaabaire aine na Yehova Omuriisa we. Daudi ku yaabaire aikiriza Yehova kumwebembera, akaba ahurira aine oburinzi, kandi akaba ayongyera kumwesigira kimwe. Daudi akaba naamanya ngu Yehova naija kuguma naamukunda ebiro byona eby’amagara ge. Niki ekyamuhweraire kugira obwesigye obwo? Daudi akaba naareeba ngu tihaine eki akyenire, ahabw’okugira ngu Yehova akaba naamuha ebirikwetengyesa byona. Daudi akaba naasiimwa Yehova kandi aine omukago murungi nawe. Niyo nshonga ahabw’enki yaabaire naahamiza kimwe ngu n’obu haakubaho ki, Yehova naija kugumizamu naamureeberera. Ahabw’okugira ngu Daudi akaba naamanya ngu Yehova naamufaho, kikamuhwera kuterarikirira, kugira okushemererwa kwingi n’okumarwa.—Zab. 16:11. w24.01 29 ¶12-13

Kuruga obu haabaho Orutaro rw’Ensi Yoona II, abaheereza ba Yehova omu mahanga maingi batwire nibeesiimira omu kugira obusingye n’obugabe barikwejumba omu murimo gw’okubuurira. Kandi omurimo ogwo, gurugiremu ebirungi. Hati, ab’Akakiiko Akareeberezi nibasherura obuhabuzi ahari Kristo. Nibenda ngu obuhabuzi obu baraahe ab’eishe-emwe bube nibworeka emiteekateekyere ya Yehova aha nshonga. Abareeberezi ba saketi na b’ebibiina nabo nibakora nikyo kimwe baaba nibaha obuhabuzi ebibiina. Abareeberezi entoore bari omu mukono gwa Kristo ogwa “buryo.” (Kush. 2:1) Buzima abareeberezi aba tibahikiriire, kandi nibakora enshobe. Musa, Yoshua n’entumwa, obumwe bakaba nibakora enshobe. (Kub. 20:12; Yos. 9:​14, 15; Rom. 3:23) Kwonka, Kristo naayebembera omwambari omwesigwa n’abareeberezi abatoorainwe, kandi naija kugumizamu naakora atyo. N’ahabw’ekyo, twine enshonga nungi ezirikutureetera kwesiga obuhabuzi obu arikutuha kurabira omu barikutooranwa kutureeberera. w24.02 23-24 ¶13-14

Hati, nitubaasa kuhimbisa Yehova turikumugambaho n’omuhimbo, turikumusiima kandi tukooreka ngu nitumukunda. Twaba nitubuurira, nituguma tutaire omutima aha kigyendererwa kyaitu ekikuru, eky’okuhwera abantu kwirira haihi Yehova, n’okumureeba nka Ishebo orikubakunda. (Yak. 4:8) Nitushemererwa munonga kworeka abantu oku Baibuli erikugamba ahari Yehova, rukundo ye, oburingaaniza bwe, amaani ge n’emitwarize ye endiijo erikushemeza. Kandi nituhimbisa Yehova turikuteeraho kumutooreza. Twakora tutyo, nituba ab’omutaano omu nsi egi embi. Abantu nibabaasa kwetegyereza ngu nitutwaza omu muringo gw’omutaano, reero beebuuze ahabw’enki. (Mat. 5:​14-16) Twaba nitugaaniira nabo buri izooba, nitubaasa kubashoboororera ahabw’enki nitutwaza tutyo. N’ekirikurugamu, abacureezi nibabaasa kwenda kwirira haihi Yehova. Twahimbisa Yehova omu miringo egi, nitumushemeza.—1 Tim. 2:​3, 4. w24.02 10 ¶7

Kubaasa kuba ow’eishe-emwe okuzire omu by’omwoyo, teeraho kwega emyoga erikukugasira. Emyoga egyo neija kukuhwera kuhikiiriza obujunaanizibwa bwawe omu kibiina, aha murimo gw’okwebaisaho, omuka, n’okugira enkoragana nungi n’abandi. Nk’eky’okureeberaho, yega kushoma gye n’okuhandiika gye. Baibuli neegira ngu omuntu oine okushemererwa, kandi omusinguzi naashoma Ekigambo kya Ruhanga buri izooba kandi akiteekateekaho. (Zab. 1:​1-3) Waashoma Baibuli buri izooba noija kumanya emiteekateekyere ya Yehova kandi ogigyendereho. (Enf. 1:​3, 4) Ab’eishe-emwe na banyaanyazi-itwe nibasherura obuhabuzi oburikwegamira ahari Baibuli aha bashaija abakuzire omu by’omwoyo. Waayega kushoma gye n’okuhandiika gye, noija kutebeekanisa embazo n’eby’okugarukamu ebirikugasira abandi, kandi ebirikuhamya okwikiriza kwabo. Kandi noobaasa kugira ebi waahandiika waaba nooyeyegyesa, ebiraakuhwere kuhamya okwikiriza kwawe n’okw’abandi. w23.12 26-27 ¶9-11

Waatiina, teekateeka aha ki Yehova araakore omu biro by’omumaisho obu Sitaane araabe atakiriho. Aha ruteerane oruhango orw’ebiro bishatu 2014, tukareeba nyineeka arikuhikaanisa ebiteekateeko n’eka ye aha ku ebiri omu 2 Timoseo 3:​1-5 birikubaasa kugambwa waaba noogamba ahari Paradiso. Akagira ati: “Kwonka omanye eki ngu, omu nsi ensya, nihaija kubayo okushemererwa. Ahakuba abantu nibaija kuba abarikukunda abandi, abarikukunda eby’omwoyo, abarikutwaza gye, abacureezi, abarikuhimbisa Ruhanga, abarikworobera abazaire baabo, abarikusiima, abarikwera, abarikukunda abaabo, abeesigwa, abatarikubeiherera abandi, abarikweyangisa, abarikukunda ebirungi, abatarikureebyana, abarikuhurira, abatarikwekuza, abarikukunda Ruhanga okukira okweshemeza bonka, abarikuhamira ahari Ruhanga bakaikiriza obushoboorozi bwe, abantu nk’abo obe nibo waayehitsya.” Noogaaniira n’ab’eka yaawe nari ab’eishe-emwe bagyenzi baawe oku embeera ziraabe ziri omu nsi ensya? w24.01 6 ¶13-14

Ka nikihuumuriza kumanya ngu Yehova naasiima abantu be nka guruupu! Baibuli neegira eti: ‘[Yehova] naashemerererwa abantu be.’ (Zab. 149:4) Kwonka, abamwe nibeetamwa reero beebuuza bati: ‘Mbwenu shi Yehova naansiima? Abaheereza ba Yehova baingi abeesigwa, obumwe bakaba nibateganisibwa enyehurira nk’ezo. (1 Sam. 1:​6-10; Yob. 29:​2, 4; Zab. 51:11) Baibuli neeyoreka butunu ngu n’obu tutahikiriire nitubaasa kusiimwa Yehova. Mu muringo ki? Turikwikiririza omuri Yesu kandi tukabatizibwa. (Yoh. 3:16) Twakora tutyo, nituba nitworeka muranga ngu tweteisize ebibi byaitu, kandi twaraganisa Ruhanga kukora ebi arikukunda. (Byak. 2:38; 3:19) Yehova naashemererwa munonga twakora ebyo kugira omukago murungi nawe. Twateeraho kukora kyona ekirikubaasika kuhikiiriza okwehayo kwaitu, Yehova naatusiima, kandi nituba banywani be.—Zab. 25:14. w24.03 26 ¶1-2

Nitubaasa kutooreza abeegi ba Yesu turikugumizamu nitubuurira n’obu ab’obushoboorozi baakuturagiira kurekyera aho. Nitubaasa kugira obuhame ngu Yehova naija kutuhwera kuhikiiriza obuheereza bwaitu. N’ahabw’ekyo, shaba obwengye n’okutatiina, na Yehova kukuhwera kugumisiriza oburemeezi. Baingi ahariitwe nitubonabona ahabw’okurwara, oburemeezi omu nyehurira, okufeerwa omukundwa, embeera y’eka egumire, okuhiiganisibwa, nari ahabw’oburemeezi obundi. Kandi ebigwererezi n’entaro bireetaire abantu kugumirwa kwemera oburemeezi obu. Gambira Yehova kyona ekikuri aha mutima. Mugambire embeera ezi orikurabamu nk’orikugamba na munywani waawe ow’aha mara. Gira obwesigye ngu Yehova naija kukora ekiraakuhwere. (Zab. 37:​3, 5) Okuguma nitushaba nikituhwera ‘kugumisiriza omu busaasi.’ (Rom. 12:12) Yehova naamanya ebi abaheereza be barikurabamu, kandi ‘naahurira okutaka kwabo.’—Zab. 145:​18, 19. w23.05 5-6 ¶12-15

Twaba nitwenda kucwamu aha nshonga nkuru, nikyetengyesa kumanya ‘ebi [Yehova] arikwenda,’ kandi tukakora ebirikuhikaana nabyo. (Efe. 5:17) Twasherura emisingye ya Baibuli erikuhikaana n’embeera yaitu, nituba nitwenda kugira emiteekateekyere nk’eya Ruhanga aha nshonga egyo. Kandi twagyendera aha misingye ye, nitwija kucwamu gye. ‘Omubi,’ kandi omuzigu waitu Sitaane, naayenda tuhugibwe eby’ensi tuburwe obwire bw’okuheereza Ruhanga waitu. (1 Yoh. 5:19) Omukristaayo naabaasa kwebembeza okusherura eby’obutungi, obwegyese, nari omurimo omu mwanya gw’okuhayo ekirikukirayo oburungi omu kuheereza Yehova. Ekyo kyabaho, nikyoreka ngu emiteekateekyere y’ensi etandikire kumushiisha. Buzima, ebintu ebyo ti bibi, kwonka tibiine kutwara omwanya gw’okubanza omu magara gaitu. w24.03 24 ¶16-17