Agusto

Yetegyereze enshonga ibiri nkuru omu zaaburi eri aha ruguru: (1) Abantu abahikiriire nibahikwaho oburemeezi. (2) Yehova naatucungura oburemeezi bwaitu. Naatucungura ata? Eki naakikora arikutuhwera kureeba embeera omu ensi egi omu muringo oguringaniire. N’obu Yehova arikuturaganisa ngu nitwija kushemererwa twamuheereza, tarikugira ngu titurikwija kuhikwaho oburemeezi. (Isa. 66:14) Naatuhiga kuta omutima ahari nyentsya yaitu, obu turaabe nitutuura omu mbeera ezi arikwenda ngu twesiimire ebiro byona. (2 Kor. 4:​16-18) Ekyo kitakabaireho, naatuhwera kugumizamu nitumuheereza buri izooba. (Tonz. 3:​22-24) Nitubaasa kwegyera ki aha baheereza ba Yehova abarikugambwaho omu Baibuli n’aba hati? Nitubaasa kutunga oburemeezi obu tutarikuteekateeka. Kwonka twayesiga Yehova, tarikubaasa kutwehuzya.—Zab. 55:22. w23.04 14-15 ¶3-4

Nitubaasa kwegyera ahari Yosefu na Mariamu, abaabaire beeteekateekire kworobera abakama abarikutegyeka n’obu kyabaire kitoorobi. (Luk. 2:​1-6) Obu Mariamu yaabaire aine enda y’ameezi mwenda, we na Yosefu okworoba kwabo kukagyezibwa. Augusto, owaabaire naategyeka Obutware bwa Rooma, akaragiira ngu habeho okubara abantu. Yosefu na Mariamu bakaba baine kugyenda orugyendo rwa mahiro 93 (kilomita 150) kuza Betelehemu barikuraba omu nshozi. Orugyendo rukaba rutoorobi, na munonga ahari Mariamu. Nibabaasa kuba baabaire beerarikiriire aha mwana waabo otakazairwe. Obundi barikwebuuza bati: “Mbwenu shi ku yaakukwatwa ebisha akiri omu rugyendo? Akaba aine enda y’owaabaire naija kuba Mesia. Bakaba nibabaasa kwekwatsa ekyo bangye kworobera gavumenti? Yosefu na Mariamu tibaraikiriize ebyo byona kubaremesa kworobera ekiragiro. Yehova akabaha omugisha ahabw’okworoba. Mariamu akahika gye Betelehemu, yaazaara omwereere oine amagara marungi, kandi yaahwera kuhikiiriza obunabi bwa Baibuli!—Mik. 5:2. w23.10 8 ¶9; 9 ¶11-12

Kwonka shi okugarukamu ku kwakuba nikukureetera kugira obwoba? Okutebeekanisa gye nikubaasa kukuhwera. (Enf. 21:5) Ku orikuba nooyetegyereza gye ebi otebeekaniise, noija kuhurira orikworoberwa kugarukamu. Kandi, garukamu omu bugufu. (Enf. 15:23; 17:27) Eky’okugarukamu kigufu nikikureetera kutatiina munonga. Waagarukamu omu bugufu kandi omu bigambo byawe, nooyoreka ngu otebeekaniise gye, kandi ngu nooyetegyereza ebi otebeekaniise. Kandi shi ku waakuteeraho kukuratira obuhabuzi obu bwona, kwonka nabwo okatiina kugarukamu emirundi erikurenga ahari gumwe? Gira obwesigye ngu Yehova naasiima okuteeraho kwawe kukora eki orikubaasa. (Luk. 21:​1-4) Okuha ekirikukirayo oburungi tikirikumanyisa okukora eki otarikubaasa. (Fil. 4:5) Manya eki orikubaasa kukora, taho ekigyendererwa ky’okukikora kandi oshabe kuguma oikaikaine. Noobaasa kutandika orikutaho ekigyendererwa ky’okugarukamu omurundi gumwe omu bugufu. w23.04 21 ¶6-8

Entumwa Paulo naatugyeragyeranisa n’abaserukare abarikuguma nibareeba kandi beeteekateekire kurwana. Obwire bwona omuserukare aine kuba ayeteekateekire kurwana haaba hariho orutaro. Nikyo kimwe naitwe. Nituguma twetebeekanisiize ekiro kya Yehova turikujwara eky’okwekingiza omu kifuba eky’okwikiriza na rukundo n’enkofiira y’amatsiko. Eky’okwekingiza omu kifuba kikaba nikirinda omutima gw’omuserukare. Okugira okwikiriza na rukundo nikirinda omutima gwaitu ogw’akamanyiso. Emitwarize egi neija kutuhwera kugumizamu nituheereza Ruhanga n’okukuratira Yesu. Okwikiriza nikutuhamiza ngu Yehova naija kutushumbuusha ahabw’okumusherura n’omutima gwaitu gwona. (Heb. 11:6) Nikwija kutuhiga kuguma tuhamiire aha mwebembezi waitu Yesu, n’obu twakuba twine oburemeezi obu turikwemera. Nitubaasa kuhamya okwikiriza kwaitu turikwegyera aha bahamiire ahari Yehova hati, barikwemera okuhiiganisibwa n’oburemeezi omu by’entaatsya. Nitubaasa kwetantara omutego gw’okukunda ebintu turikutooreza aboorobize embeera zaabo kwebembeza eby’Obukama. w23.06 10 ¶8-9

Okwerinda nikimanyisa okubaasa kw’okutegyeka enyehurira n’ebikorwa byawe. Okwerinda nikwetengyesa kutuhiga kuhika aha bigyendererwa byaitu, na munonga ekigyendererwa kyaba kigumire kukihikaho, nari twaba tutaine kihika. Ijuka ngu, okwerinda n’omutwarize gw’omwoyo gurikwera, n’ahabw’ekyo shaba Yehova kukuhwera kugira omutwarize mukuru ogwo. (Luk. 11:13; Gal. 5:​22, 23) Otategyereza kubanza waagira embeera nungi. Omu nsi egi, nitubaasa kutagira embeera nungi obwire bwona. Twazitegyereza, nitubaasa kutahika aha kigyendererwa kyaitu. Nitubaasa kutagira ekihika ahabw’okugira ngu ekigyendererwa kyaitu nikireebeka nk’ekigumire kuhikaho. Ku kiraabe nikwo kiri, noobaasa kutaho ebigyendererwa bikye ebi orikubaasa kuhikiiriza. Ku oraabe otaireho ekigyendererwa ky’okugira omutwarize, noobaasa kutandika orikugworeka omu bintu bikye. Waaba otaireho ekigyendererwa ky’okushoma Baibuli yoona, noobaasa kutandika orikukoresa obwire bukye. w23.05 29 ¶11-13

Omu biro by’emperu byona, Yehova atwire naakoresa ekibiina kye kugumizamu naatuha eby’okurya by’omwoyo kutuhwera kuguma nitugyendera omu ‘Muhanda Ogurikwera.’ (Isa. 35:8; 48:17; 60:17) Nitubaasa kugira ngu omuntu yaikiriza kwega Baibuli, naaba aine omugisha gw’okuza omu ‘Muhanda Ogurikwera.’ Abamwe nibagyendera omu muhanda ogu obwire bukye, reero bagurugamu. Abandi bamariire kugumizamu nibagugyenderamu kuhitsya baahika ei barikuza. Kwonka shi nigubahitsya nkahi? Abaine amatsiko g’okuza omu iguru, “Omuhanda Ogurikwera” nigubahitsya “omuri paradiso ya Ruhanga” omu iguru. (Kush. 2:7) Kandi abaine amatsiko g’okutuura omu nsi, omuhanda ogwo nigubahitsya aha muheru gw’emyaka 1,000 obu buri omwe araabe ahikiriire. Ku oraabe oriyo noogyendera omu muhanda ogu, otaranzya enyima. Kandi otagurugamu kuhitsya obu oraaze omu nsi ensya. Nitukwendeza “orugyendo rurungi.” w23.05 17 ¶15; 19 ¶16-18

Waateekateeka ahari byona ebi Yehova akukoreire noija kucwamu oyekundiire kwehayo. (Zab. 116:​12-14) Baibuli neegira ngu Yehova niwe bukomooko ‘bw’engabirano yoona enungi n’ekiconco kyona ekihikire.’ (Yak. 1:17) Ekiconco ekirikukirayo n’ekitambo ky’Omwana we, Yesu. Ekyo ka n’ekiconco kirikushemeza! Ekitambo kikubaasiise kugira omukago murungi na Yehova. Kandi oine amatsiko g’okutuuraho ebiro byona. (1 Yoh. 4:​9, 10) Okwehayo ahari Yehova n’omuringo gw’okworeka ngu noomusiima ahabwa rukundo erikukirayo ei akworekire n’emigisha ei akuhaire.—Bir. 16:17; 2 Kor. 5:15. w24.03 5 ¶8

Ku turikureeba emitindo y’emicwe eri omu nsi, nitwehurira nk’oku Looti omushaija omwesigwa yaayehuriire. Akaba “ashobeirwe ahabw’emicwe mibi y’abashambani,” arikumanya ngu Tataitwe ow’omu iguru naayanga ebikorwa bibi. (2 Pet. 2:​7, 8) Ahabw’okugira ngu Looti akaba naatiina Ruhanga, kandi arikumukunda akanga emicwe mibi ey’abantu abaabaire bamwetoroire. Naitwe nitutuura n’abantu abatarikuha kitiinisa emitindo ya Yehova ey’emicwe. Kwonka nabwo, nitubaasa kuguma tushemeire omu micwe twagumizamu nitukunda Ruhanga, kandi turikumutiina omu muringo oguhikire. N’ahabw’ekyo, Yehova naatuhabura omu muringo gwa rukundo arikukoresa ekitabo ky’Enfumu. Abakristaayo boona, abashaija n’abakazi, abakuru n’abato nibabaasa kugasirwa omu buhabuzi bw’obwengye oburi omu kitabo eki. Twaba nitutiina Yehova, nitwegyendesereza kuteehuzya emicwe mibi. w23.06 20 ¶1-2; 21 ¶5

Obundi noohakanisibwa ab’eka yaawe, nari oyefeerereize okusherura eby’obutungi kubaasa kwebembeza eby’Obukama. (Mat. 6:33) Kyaba nikwo kiri, gira obwesigye ngu Yehova naareeba obuheereza bwawe bw’obwesigwa. (Heb. 6:10) Noobaasa kuba waareebire okuhikiirira kw’ebigambo bya Yesu ebi: “Tihaine muntu owaatsigireho enju, beene ishe, banyaanya, nyina, ishe, abaana, nari ekibanja kye ahabwangye n’ahabw’engiri, otariheebwa omu biro bya hati ebirikukira ebyo emirundi igana, enju, beene ishe, banyaanya, baanyina, abaana, ebibanja, hamwe n’okuhiigwa, kandi omu biro bya bwanyima akaheebwa amagara agatahwaho.” (Mak. 10:​29, 30) Emigisha ei otungire neekirira kimwe ebi oyefeerereize.—Zab. 37:4. w24.03 9 ¶5

Obu Abakristaayo omuri Buyudaaya baateerwa enjara, ab’eishe-emwe omu kibiina ky’Antiokia bakamariirira, “buri muntu nk’oku yaabaasize, kwohereza eby’okuhwera ab’eishe-emwe abaabaire batwire Buyudaaya.” (Byak. 11:​27-30) N’obu ab’eishe-emwe abaateirwe enjara baabaire bari hare, Abakristaayo omuri Antiokia bakaba bamaririire kubahwera. (1 Yoh. 3:​17, 18) Naitwe nitubaasa twahurira ngu hariho ab’eishe-emwe abahikirweho ekihikiirizi, nitubaasa kubagirira esaasi. Nitugira eki twakora ahonaaho, obundi turikubuuza abareeberezi yaaba nitubaasa kuhwera butunu, kuhayo kushagika omurimo ogurikukorwa omu nsi yoona, nari kushabira abahikirweho ekihikiirizi. Ab’eishe-emwe na banyaanyazi-itwe nibabaasa kuba nibenda n’okuhwerwa kutunga eby’okwebaisaho. Omugabe waitu Yesu Kristo, ku araije kucwa orubanja, ka atushangye turikugirira abandi esaasi, reero atwete ‘kuhungura Obukama!’—Mat. 25:​34-40. w23.07 4 ¶9-10; 6 ¶12

Yesu akatooreza Yehova omu kuba oringaniire. Akooherezibwa omu nsi kubuurira ‘entaama z’oruganda rwa Israeli ezaabuzire.’ Kwonka akooreka ngu aringaniire omu kuhikiiriza obujunaanizibwa bwe. Nk’eky’okureeberaho, omukazi owaabaire atari Mwisraeli akamweshengyereza kukiza omuhara owaabaire “ariho daimoni.” Yesu akagirira omukazi ogwo esaasi yaakora eki yaamushabire, yaakiza omuhara. (Mat. 15:​21-28) Teekateeka aha ky’okureeberaho ekindi. Obu Yesu yaabaire atandikire obuheereza bwe akagira ati: ‘Weena oriinyehakana, naanye ninyija kumwehakana.’ (Mat. 10:33) Mbwenu shi akeehakana Petero, owaamwehakaine emirundi eshatu? Ngaaha. Yesu akateekateeka aha kweteisa n’okwikiriza kwa Petero. Bwanyima ya Yesu kuzooka, akeeyoreka Petero kandi naabaasa kuba yaamuhamiize ngu amusaasire, kandi ngu naamukunda. (Luk. 24:​33, 34) Yehova Ruhanga na Yesu Kristo bombi n’abaringaniire. Kandi shi itwe? Yehova naayenda ngu naitwe tube abaringaniire. w23.07 21 ¶6-7

Nitubaasa kuhamiza tuta abarikugira ngu ekiraganiso kya Ruhanga ekya Paradiso tikiraahikiirire? Eky’okubanza, Yehova niwe arikukiraganisa. Ekitabo ky’Okushuuruurwa nikigira kiti: “Ogwo owaabaire ashutami aha kitebe ky’obukama yaagira ati: Reeba nimpindura byona bisya.” Aine obwengye, amaani, n’ekihika ky’okuhikiiriza eki arikuraganisa. Ekya kabiri, eki Yehova arikuraganisa nikiba kiri nk’ekyaherize kubaho. Niyo nshonga ahabw’enki yaagizire ati: “Ebigambo ebi n’eby’okwesigwa kandi eby’amazima. . . . Kyahwa.” Ekya kashatu, Yehova ku arikutandika ekintu, tihaine ekirikubaasa kumuremesa kukihendera. Niyo nshonga ahabw’enki yaagizire ati: “Niinye Alufa na Omega.” (Kush. 21:6) Yehova naija kworeka butunu ngu Sitaane n’omubeihi otarikubaasa kumuremesa kuhikiiriza ekigyendererwa kye. N’ahabw’ekyo, omuntu yaagira ati: “Eki nikireebeka nka kirungi kwonka n’ekitarikubaasika,” mushomere Okushuuruurwa 21:​5, 6, kandi okishoboorore. Mworekye oku Yehova arikuhamya ngu naaza kuhikiiriza ekiraganiso kye, orikushusha ngu akihamize arikukitaho omukono gwe. w23.11 7 ¶18-19

Ekiraganiso eki Yehova akakigambira Abrahamu aine emyaka 75, kandi ataine mwana. Mbwenu shi Abrahamu akareeba okuraganisa okwo nikuhikiirira? Tarakureebire nikuhikiirira omu bwijwire. Bwanyima y’Abrahamu kwambuka Omugyera Furaati akategyereza kumara emyaka 25, reero omutabani Isaaka yaazaarwa omu muringo gw’eky’okutangaaza, kandi bwanyima y’emyaka 60, baijukuru be Esau na Yakobo nabo bakazaarwa akihuriire. (Heb. 6:15) Kwonka Abrahamu tarabaasize kureeba baijukuru be barikuba eihanga rihango, kandi barikuhungura ensi Eyaaraganisiibwe. Kwonka, omushaija ogwo omwesigwa akaba aine omukago guhami n’Omuhangi we. (Yak. 2:23) Kandi Abrahamu ku araazookye, ka naija kushemererwa kumanya ngu okwikiriza n’okugumisiriza kwe bikabaasisa amahanga maingi kutunga emigisha! (Kut. 22:18) Eky’okwega? Naitwe nitubaasa kutareeba byona ebi Yehova arikuraganisa birikuhikiirira. Kwonka, twagumisiriza nk’Abrahamu nitubaasa kugira obwesigye ngu Yehova naija kutuha emigisha hati, n’omu nsi ensya ei arikuturaganisa.—Mak. 10:​29, 30. w23.08 24 ¶14

Obu Omugabe Uziya yaabaire ari muto akaba ari omucureezi. Akeega ‘kutiina Ruhanga’ ow’amazima. Kandi omu myaka ye 68, obwire obwingi Yehova akamuha emigisha. (2 Bus. 26:​1-4) Uziya akasingura amahanga maingi g’abazigu be, kandi yaahamya ngu Yerusaalemu eine oburinzi. (2 Bus. 26:​6-15) Uziya aine kuba yaashemereirwe ahabwa byona ebi Ruhanga yaamuhweraire kukora. (Mub. 3:​12, 13) Omugabe Uziya akaba atwire naagambira abandi eby’okukora. Mbwenu shi ekyo kikamureetera kuteekateeka ngu naabaasa kukora kyona eki arikwenda? Eizooba rimwe, Uziya akataaha omu hekalu ya Yehova, kandi akeeragiira yaayoterera obubaane aha itambiro, eki abagabe baabaire batarikwikirizibwa kukora. (2 Bus. 26:​16-18) Omunyamurwa Omukuru Azaria akateeraho kumuzibira, kwonka Uziya akagira ekiniga kingi. Eky’obusaasi, Uziya taragumire ari omwesigwa, kandi Yehova akamurwaza ebibembe. (2 Bus. 26:​19-21) Ka byabaire nibiija kumugyendera gye ku ogire ngu akagumizamu ari omucureezi! w23.09 10 ¶9-10

Na bwanyima y’entumwa Petero kuhinduka Omukristaayo oshukirweho omwoyo gurikwera, akaba akiine obweremwa. Omuri 36 Y.A.K., Petero akaba ariho obu Koruneelio Omunyamahanga otashazirwe yaashukwaho omwoyo gurikwera, ekyayorekire gye ngu ‘Ruhanga tarikushoroora mu bantu,’ kandi ngu n’Abanyamahanga nibabaasa kuza omu kibiina Ekikristaayo. (Byak. 10:​34, 44, 45) Kuruga obwo Petero akatandika kurya n’Abanyamahanga, ekintu eki yaabaire atarikubaasa kukora enyima. Kwonka, Abakristaayo Abayudaaya abamwe bakaba nibateekateeka ngu Abayudaaya n’Abanyamahanga tibashemereire kurya hamwe. Bamwe aha baabaire baine emiteekateekyere egyo ku baagire Antiokia, Petero akarekyera aho kurya n’ab’eishe-emwe Abanyamahanga, arikutiina kugwisa kubi Abakristaayo Abayudaaya. Entumwa Paulo akareeba oburyarya bwe, kandi yaamuhana butunu omu maisho g’abantu. (Gal. 2:​13, 14) N’obu Petero araabe yaakozire enshobe egyo, akagumisiriza. w23.09 22 ¶8

Waayeshwijuma noobaasa kureeba ngu oine obweremwa, kwonka otahwa amaani. Ruhanga aine embabazi, kandi naija kukuhwera. (1 Pet. 2:3) Entumwa Petero naatuhamiza ngu Ruhanga naija kuhendera okutendekwa kwaitu, atugumye. Haine obu Petero yaayehurira nk’otashemereire kuba omu maisho g’omwana wa Ruhanga. (Luk. 5:8) Kwonka Petero arikuhwerwa Yehova na Yesu, akabaasa kugumisiriza kandi yaaguma ari omukuratsi wa Kristo omwesigwa. N’ekyarugiremu Petero akatunga omugisha ‘gw’okutaaha omu Bukama obutahwaho bwa Mukama waitu kandi Omujuni, Yesu Kristo.’ (2 Pet. 1:11) Ogwo ka n’omugisha gw’omutaano! Naiwe waagumisiriza nka Petero kandi okaikiriza kutendekwa Yehova noija kuheebwa ekihembo ky’amagara agatahwaho. Noija kutunga ‘okujunwa kw’amagara gaawe, nk’ekihembo ky’okwikiriza kwawe.’—1 Pet. 1:9. w23.09 31 ¶16-17

Eihema rikaba riine embuga mpango ezitiriirwe, ahu abanyamurwa baabaire nibakorera emirimo yaabo. Eitambiro rihango eriheetsirwe omu muringa rikaba ryombekirwe omu mbuga otwariiremu n’ebaafu ahu abanyamurwa baabaire nibabanza kweyeza batakakozire emirimo y’obunyamurwa. (Kur. 30:​17-20; 40:​6-8) Hati, entoore entsigarira beene-ishe Kristo nibaheereza omu bwesigwa omu mbuga ey’omunda ey’omu nsi omu hekalu ey’eby’omwoyo. Ebaafu mpango erimu amaizi neebaijutsya ngu Abakristaayo boona, baine kuguma bashemeire omu micwe n’omu by’omwoyo. Mbwenu shi “omutwe muhango gw’abantu,” nibaramiza nkahi? Entumwa Yohaana akareeba “beemereire omu maisho g’ekitebe ky’Obukama,” ekirikujwekyera embuga ey’aheeru, ‘barikuheereza [Ruhanga] omuri hekalu ye nyomushana na nyekiro.’ (Kush. 7:​9, 13-15) Nitwesiima munonga ahabw’okuba omu hekalu ya Yehova ey’eby’omwoyo. w23.10 28 ¶15-16

Gumwe aha miringo oku Yehova arikutugumya n’okukoresa abareeberezi. (Isa. 32:​1, 2) N’ahabw’ekyo waaba oyerarikiriire, gambira abareeberezi ekirikukwerarikiriza. Kandi baayehayo kukuhwera, ikiriza obuhwezi bwabo. Yehova naabaasa kubakoresa kukugumya. Amatsiko gaitu agarikwegamira ahari Baibuli ag’amagara agatahwaho omu Paradiso omu nsi nari omu iguru, nigabaasa kutugumya. (Rom. 4:​3, 18, 19) Amatsiko ago nigatuhwera kugumisiriza oburemeezi, kubuurira amakuru marungi, n’okuhikiiriza obujunaanizibwa butari bumwe na bumwe omu kibiina. (1 Tes. 1:3) Amatsiko ago gakagumya n’entumwa Paulo. Akaba ‘akubirwe,’ ‘ashobeirwe,’ ‘arikuhiiganisibwa,’ kandi ‘aikariirwe.’ N’amagara ge gakaba gari omu kabi. (2 Kor. 4:​8-10) Paulo akabaasa kugira amaani g’okugumisiriza ahabw’okugira ngu akata omutima aha matsiko ge. (2 Kor. 4:​16-18) Akata omutima aha matsiko ge ag’ebiro by’omumaisho ag’okutunga amagara agatahwaho omu iguru. Akateekateeka aha matsiko ago, n’ekyarugiremu, akaba naahurira ‘naagaruka busya buri izooba.’ w23.10 15-16 ¶14-17

Waaba nooshaba, teeraho kumanya yaaba nibwo bwire Yehova kugarukamu okushaba kwawe. Obumwe nitubaasa kuba nitwenda ngu okushaba kwaitu kugarukwemu ahonaaho. Kwonka, Yehova naamanya obwire obuhikire obw’okukugarukamu. (Heb. 4:16) Ahonaaho twaba tutatungire eki tushabire, nitubaasa kuteekateeka ngu Yehova tarikwija kugarukamu okushaba kwaitu. Kwonka, naabaasa kuba ‘atakakugarukiremu.’ Nk’eky’okureeberaho, ow’eishe-emwe muto akashaba Yehova kumuhwera kukira. Kwonka tarabaire gye. Kuri Yehova yaamukirize omu muringo gw’eky’okutangaaza, Sitaane akaba naabaasa kugira ngu ow’eishe-emwe ogwo naagumizamu kuheereza Yehova ahabw’okugira ngu akamukiza. (Yob. 1:​9-11; 2:4) Kandi, Yehova ataireho obwire obu araihireho kimwe endwara zoona. (Isa. 33:24; Kush. 21:​3, 4) Ekyo kitakabaireho, titwine kuteekateeka ngu nituza kukizibwa omu muringo gw’eky’okutangaaza. N’ahabw’ekyo, ow’eishe-emwe ogwo akaba naabaasa kushaba Yehova kumuha amaani n’obusingye bw’omu biteekateeko kugumisiriza endwara ye, kandi akagumizamu naamuheereza omu bwesigwa. w23.11 24 ¶13

Samusooni akakora enshobe, kwonka tarahanikire. Akasherura oburyo bw’okuhikiiriza obujunaanizibwa bw’okucwekyereza Abafilistia, obu Yehova yaabaire amuhaire. (Bar. 16:​28-30) Samusooni akeeshengyereza Yehova ati: Reka “mpoore Abafilistia.” Ruhanga ow’amazima akagarukamu okushaba kwe yaagaruka yaamuha amaani g’omutaano. N’ekyarugiremu, aha murundi ogu Samusooni akaita Abafilistia baingi okukira obundi bwona. N’obu Samusooni araabe yaatungire oburemeezi ahabw’enshobe ye, akaguma naateeraho kukora ebi Yehova arikukunda. Twakora enshobe tukahanwa nari tukaihwaho obujunaanizibwa, titwine kuhanika. Ijuka ngu Yehova, naaguma atwinemu amatsiko. (Zab. 103:​8, 9) N’obu twakukora enshobe, nitubaasa kuguma turi ab’omugasho ahariwe nka Samusooni. w23.09 6 ¶15-16

Waagumisiriza noosiimwa Yehova. Eki tikirikumanyisa ngu Yehova naashemererwa ahabw’okugira ngu noogyezibwa nari oine oburemeezi. Yehova niiwe arikusiima. Okugumisiriza kwawe nikurugamu okusiimwa. Ogu ka n’omugisha gw’amaani! (Zab. 5:12) Ijuka ngu Abrahamu akagumisiriza okugyezibwa kandi yaasiimwa Ruhanga. Yehova akamweta munywani we kandi yaamureeba nk’ohikiriire. (Kut. 15:6; Rom. 4:​13, 22) Kandi naitwe Yehova naabaasa kutureeba omu muringo nk’ogwo. Ruhanga tarikwihirira aha bi turikukora omu buheereza bwe kutusiima, nari n’aha bujunaanizibwa obu twine. Kureka, naatusiima ahabw’okugumisiriza omu bwesigwa. Oyihireho emyaka yaitu, embeera zaitu, nari okubaasa kwaitu, twena nitubaasa kugumisiriza. Oriyo noogyezibwa omu bwesigwa hati? Kyaba nikwo kiri, huumura ahabw’okumanya ngu Ruhanga naakusiima. Okumanya ngu nitusiimwa Ruhanga nikibaasa kutugasira munonga. Nikibaasa kuhamya amatsiko gaitu. w23.12 11 ¶13-14

Ow’eishe-emwe aine kwega kuhurizana gye n’abandi. Omuntu orikuhurizana gye n’abandi, naahurikiza kandi naafayo kwetegyereza ebiteekateeko by’abandi n’enyehurira zaabo. (Enf. 20:5) Naabaasa kumanya oku omuntu arikwehurira kurugiirira aha iraka rye, endeebeka ye y’aha maisho, n’oku arikukoresa ebicweka bye by’omubiri. Torikubaasa kwega kukora ekyo waaba otarikumara obwire n’abantu. Waaba nookira kumara obwire orikukoresa ebyoma kwohereza obutumwa, noija kugira obugara bw’okuhurizana n’abandi butunu. N’ahabw’ekyo, taho oburyo bw’okugamba n’abandi butunu. (2 Yoh. 12) Ow’eishe-emwe okuzire omu by’omwoyo aine n’okuba naabaasa kwereeberera n’ab’eka ye. (1 Tim. 5:8) Omu mahanga agamwe, ab’eishe-emwe abatsigazi nibabaasa kwegyera ahari baishebo nari abanyabuzaare emyoga. Ni kirungi kwega omwoga oguraije kukuhwera kutunga omurimo. (Byak. 18:​2, 3; 20:34; Efe. 4:28) Manywa nk’omuntu omweziriki kandi orikuhamira aha murimo kuhitsya gwahwa. Waakora otyo, noija kutunga omurimo kandi ogugumeho. w23.12 27 ¶12-13

Baibuli ku erikugamba aha “kiro kya” Yehova, neeba neemanyisa obu Yehova araacwere abazigu be orubanja, kandi akajuna abaheereza be. Ira, Yehova akaba naafubira amahanga agamwe. (Isa. 13:​1, 6; Ezk. 13:5; Zef. 1:8) “Ekiro kya” Yehova nikiija kutandika n’okucwekyerezibwa kwa Babulooni Orukuru, reero kihendere n’orutaro rwa Haramagedoni. Kubaasa kuhonokaho aha “kiro” ekyo, twine kwetebeekanisa hati. Yesu akeegyesa ngu twine kwetebeekanisiza “okubonabona kwingi,” kandi ‘tukaguma tukweteekateekiire.’ (Mat. 24:21; Luk. 12:40) Omu baruha y’okubanza ei entumwa Paulo yaahandiikiire Abatesalonika, akakoresa eby’okureeberaho bingi kuhwera Abakristaayo kuguma beeteekateekiire ekiro kikuru kya Yehova eky’okucwa orubanja. Paulo akaba naamanya ngu ekiro kya Yehova kikaba kitarikwija kuhika omu bwire obwo. (2 Tes. 2:​1-3) Kwonka nabwo, akahiga ab’eishe-emwe bagyenzi be kwetebeekanisiza ekiro ekyo nk’ekyabaire nikiza kuhika eizooba eririkukurataho, kandi naitwe nitubaasa kugyendera aha buhabuzi obwo. w23.06 8 ¶1-2

Emyaka ya 1970 erikuza kuhendera bakombeka ekyombeko kya kanyina 60 omuri Tokyo, Japan. Abantu bakaba nibeebuuza oku ekyombeko ekyo kiraabaase kuguma kyemereire haabaho emitsitsa omu rurembo orwo. Ekihama kikaba kiri ki? Bakakyombeka kigumire, kwonka kandi kirikubaasa n’okwemera okuteengyetsibwa omutsitsa. Abakristaayo ni nk’ekyombeko kiraingwa ekyo. Mu muringo ki? Omukristaayo aine kuba ahami kwona atagangaire. Aine kuba amaririre kuhamira aha biragiro bya Yehova n’emitindo ye. Naaba ayeteekateekire kworoba, kandi naaguma ahamiire aha mitindo n’emisingye ya Baibuli. Kwonka aha rubaju orundi, taine kuremera aha nshonga kyayetengyesa. (Yak. 3:17) Omukristaayo oyegire kugira emiteekateekyere eringaniire naija kwetantara kurengyesereza nari kushwekyerera abandi. w23.07 14 ¶1-2

Yesu akaba aine kuteeraho kwangira emitego ya Sitaane Omuregi, otwariiremu n’okugyezibwa butunu kutahamira ahari Ruhanga. (Mat. 4:​1-11) Sitaane akaba amaririire kureetera Yesu kushiisha kugira ngu atakahayo ekitambo. Obu Yesu yaabaire naaheereza omu nsi, akahiiganisibwa kandi yaatiinatiinisibwa kwitwa. (Luk. 4:​28, 29; 13:31) Kandi akaba aine kugumizamu naagumisiriza obutahikiirira bw’abakuratsi be. (Mak. 9:​33, 34) Obu yaabaire naahozesibwa, akatwarizibwa kubi kandi yaajumwa. Bwanyima akaitwa omu muringo gw’obusaasi bwingi, kandi ogurikuhemurana. (Heb. 12:​1-3) Kandi akaba aine kwemera okugyezibwa okwahereerukireyo, ataine burinzi bwa Yehova. (Mat. 27:46) Buzima, Yesu akeefeerereza kihango kubaasa kuhayo ekitambo. Nitwongyera kukunda Yesu twateekateeka aha ku yaayehaireyo ayekundiire kuba ekitambo ahabwaitu. w24.01 10-11 ¶7-9

Okugumisiriza nikutuhwera kutwariza gye abandi. Nikutuhwera kuhurikiza gye abandi baaba nibagamba. (Yak. 1:19) Okugumisiriza nikureetaho obusingye. Nikuturinda kutarahuka kugira eki twakora nari kugamba kubi twaba twine amaganya. Kandi twaba nitugumisiriza, titurikwija kurahuka kugira ekiniga haagira owaatutwariza kubi. Omu mwanya gw’okuhoora enzigu, nitwija ‘kugumisiririzana’ kandi ‘tusaasirane.’ (Kol. 3:​12, 13) Okugumisiriza nikubaasa kutuhwera n’okucwamu gye. Omu mwanya gw’okurahukiiriza nari kucwamu tutabandize kuteekateeka, nitwija kuteeraho kucondooza n’okushwijuma ebi turikwenda kucwamu. Nk’eky’okureeberaho, twaba nitusherura omurimo nitubaasa kwohibwa kwikiriza gwona ogu twabona. Kwonka twaba nitugumisiriza, nitwija kuteekateeka aha ku guraakwate aha ka yaitu n’omukago gwaitu na Yehova. Twagumisiriza nitwetantara kucwamu kubi. w23.08 22 ¶8-9

Ku oraabe otamirwe ahabw’enshobe zaawe, okuteekateeka aha ki waaraganiise Yehova obu waayehayo, nikiija kukuhwera kumariirira kwangira okwohibwa. Mu muringo ki? Waayehayo ahari Yehova, nooyeyangisa. Eki nikimanyisa ngu noocwamu kutakorera aha byetengo byawe ebitarikushemeza Yehova. (Mat. 16:24) N’ahabw’ekyo, waayohibwa tikirikwija kukwetengyesa kuteekateeka munonga aha ki oraakore. Noija kuba otakiine kubangaanisa kwona, kureka okuguma ori omwesigwa ahari Yehova. Kandi noija kuguma omaririire kuguma nooshemeza Yehova. Waakora otyo, noija kuba nootooreza Yobu. N’obu araabe yaatungire oburemeezi bw’amaani, amaririire akagira ati: ‘Okuhitsya obu ndifa, tindikwija kureka kuguma ndi omwesigwa!’—Yob. 27:5. w24.03 9 ¶6-7

Yehova, Ruhanga owa rukundo ari hamwe naitwe. (2 Kor. 13:11) Naafayo ahari buri omwe. Nituhamiza kimwe ngu ‘embabazi ze zitwehinguririze.’ (Zab. 32:10) Ku turikwongyera kuteekateeka ahari rukundo ye, naaba owaabuzima ahariitwe kandi nitwongyera kuhurira turi haihi nawe. Nitubaasa kumushaba tutatiinire kandi tumugambire oku turikwehurira ahabwa rukundo ye. Nitubaasa kumugambira byona ebirikutwerarikiriza, twine obwesigye ngu naija kutuhwera kandi ngu aine ekihika ky’okutuhwera. (Zab. 145:19) Nk’oku turikuba nitwenda kuba haihi n’omuriro aha izooba ry’embeho, nikwo na rukundo ya Yehova erikutwiriza haihi nawe. Rukundo ya Yehova n’ey’amaani kandi n’ey’embabazi. N’ahabw’ekyo, shemererwa ahabw’okugira ngu Yehova naakukunda. Kandi okyoreke orikugira oti: “Ninkunda” Yehova”!—Zab. 116:1. w24.01 31 ¶19-20

Yesu akakora ekirikukira aha kumanyisa abantu ngu eiziina rya Ruhanga ni Yehova. Abayudaaya abu Yesu yaayegyeise bakaba nibamanya eiziina rya Ruhanga. Kwonka Yesu akeebembera omu kuba niwe yaamanyisa abantu eiziina rya Ishe. (Yoh. 1:​17, 18) Nk’eky’okureeberaho, Ebyahandiikirwe eby’Oruheburaayo nibyoreka ngu Yehova aine embabazi n’esaasi. (Kur. 34:​5-7) Yesu akoongyera kworeka ngu ekyo nikwo kiri omu nfumu y’omwana owaarazire. Omu nfumu egyo ishe w’omwana owaayeteisize ku yaamureebire akiri hare akairuka kumubugana yaamubumbatira kandi yaamusaasirira kimwe, ekyo nikituhwera kwetegyereza embabazi za Yehova n’esaasi ze. (Luk. 15:​11-32) Yesu akooreka gye eki Ishe buzima ari. w24.02 10 ¶8-9

Yehova naaruhuura abaine amaganya kandi abahuumuriza. Nitubaasa kutooreza tuta Yehova omu kugirira abandi embabazi n’okubahuumuriza? Omuringo gumwe oku turikubaasa kukora ekyo n’okuteeraho kugira emitwarize eine akakwate n’okuhuumuriza. Emitwarize emwe ahari egyo n’eha? Niki ekiraatuhwere kuguma twine rukundo eraatubaasise kugumizamu ‘nituhuumurizana’ buri izooba? (1 Tes. 4:18) Twine kuteeraho kugira emitwarize nk’okufayo aha bandi, okukundana nk’eishe-emwe, n’embabazi. (Kol. 3:12; 1 Pet. 3:8) Emitwarize egi neetuhwera eta? Twaba twine embabazi n’emitwarize eine akakwate n’embabazi, nikiija kutuhwera kuhuumuriza abaine amaganya. Nk’oku Yesu yaagambire, ‘ebiijwire omutima, akanwa nibyo kagamba. Omuntu murungi naiha ebirungi omu ibiikiro rye erirungi.’ (Mat. 12:​34, 35) Okuhuumuriza ab’eishe-emwe na banyaanyazi-itwe abaine amaganya n’omuringo mukuru gw’okworeka ngu nitubakunda. w23.11 10 ¶10-11

Twine kushaba obuhwezi kubaasa kwetegyereza obunabi bwa Baibuli. Teekateeka aha ky’okureeberaho eki. Ka tugire ngu waaza kutaayaaya omu mwanya ogu otarikumanya gye, kwonka munywani waawe owaagyenda naiwe naamanya gye omwanya ogwo. Naamanya ei murikuza n’ahu buri muhanda gurikuhitsya. Buzima noobaasa kushemererwa ahabw’okugyenda na munywani waawe ogwo! Nikyo kimwe, Yehova naamanya obwire obu turimu n’embeera ezi tworekyeire omu biro by’omumaisho. N’ahabw’ekyo kubaasa kwetegyereza obunabi bwa Baibuli, twine kuba abacureezi tukashaba Yehova kutuhwera. (Dan. 2:28; 2 Pet. 1:​19, 20) Yehova ari nk’omuzaire murungi, naayenda ngu abaana be bagire nyentsya nungi. (Yer. 29:11) Kwonka okutashushana n’abazaire baitu, Yehova naagamba ebiraabeho omu biro by’omumaisho, kandi bihikiirira omu bwijwire. Akahandiikisa obunabi omu Kigambo kye kugira ngu tumanye ebintu bitari bimwe bitakabaireho.—Isa. 46:10. w23.08 8 ¶3-4