Abantu Okwiha Obwesigye omu Bategyeki—Baibuli Neegamba Ki?

Omwaka 2024 nigwija kubamu okuteera oburuuru bwingi munonga omu nsi yoona. Kwonka, abantu baingi bariyo nibaiha obwesigye omu bategyeki.

• Abamerika baingi abaabuuziibwe bakagira ngu “abategyeki abaingi nibaba nibeeyendeza,” beitu kutari kwenda kuheereza abantu.a—Pew Research Center, Okwamwenda 19, 2023.

N’eminyeeto abaingi tibarikwesiga ab’eby’obutegyeki.

• “Eminyeeto nibaba nibenda ngu enshonga zaabo zikorweho, kwonka okucondooza kukooreka ngu abategyeki tibarikufayo aha nshonga zaabo.”—The New York Times, Okwokubanza 29, 2024.

• “Okucondooza nikworeka ngu eminyeeto nibeesiga abarikuta vidiyo aha mikura y’empurizana, kukira oku barikwesiga abategyeki.”—The Korea Times, Okwokubanza 22, 2024.

Nitubaasa kwesiga abategyeki shi ngu nibaija kureetaho nyentsya nungi? Nitubaasa kwesiga oha?

Yegyendesereze ou orikwesiga

Abantu bahikire kwegyendesereza ou barikwesiga. Baibuli neegira ngu “otaine bwengye aikiririza eryo, kwonka omwerinzi ayetegyereza ahu arikuraba.”—Enfumu 14:15.

• Okutunga obukoryo bw’okukuhwera kushwijuma obutumwa obu orikutunga, shoma ekicweka, “Protect Yourself From Misinformation.”

Ekindi, nangwa n’abategyeki ab’amazima kandi abaine ebigyendererwa birungi, baine obugarukiro aha bi barikubaasa kukora. Niyo nshonga ahabw’enki Baibuli neerabura eti:

• “Oteesiga abategyeki b’abantu, tihariho omuntu orikubaasa kukujuna.”—Zaaburi 146:3, Good News Translation.

Omwebembezi ou orikubaasa kwesiga

Baibuli neeyoreka ngu Ruhanga akatoorana omwebembezi orikukirayo kuba ow’amazima, kandi orikwebaasa: Yesu Kristo. (Luka 1:32, 33) Yesu niwe Mugabe w’Obukama bwa Ruhanga, gavumenti erikutegyekyera omu iguru.—Matayo 6:10.

• Yega ahabw’enki orikubaasa kwesiga Yesu, n’eki arikwija kukora kugonjoora oburemeezi bwaitu. Shoma ebicweka, “Omugabe w’Obukama bwa Ruhanga n’Oha?” na “Obukama bwa Ruhanga Nibwija Kukorera ki Abantu?”