Yesu Naatwegyesa Kushaba

NOOSHABA Yehova Ruhanga?— Naayenda ngu omushabe. Yesu butoosha akaba ashaba Ishe ow’omu iguru. Obumwe akaba ayehereera amushaba. Baibuli neegira ngu omurundi gumwe ‘akainamuka omu kibungo wenka kushaba. Obwire bwaira akiriyo wenka.’​—Matayo 14:23.

Noobaasa kuza mu mwanya ki kushaba Yehova ori wenka?— Noobaasa kwehereera ogambe na Yehova otakagiire kubyama. Yesu akagira ati: “Ku oraaze kushaba, otaahe omu kishengye kyawe, obanze okingye orwigi, oshabe Sho.” (Matayo 6:6) Mbwenu nooshaba Yehova buri kiro otakagiire kubyama?— Oshemereire kukikora.

Kandi Yesu akaba ashaba ari n’abandi bantu. Munywani we Laazaaro ku yaafiire, Yesu akashaba n’abandi abaabaire bari aha mwanya ogu Laazaaro yaabaire azikirwemu. (Yohaana 11:41, 42) Kandi Yesu ku yaabaire agira enteerane n’abeegi be akaba ashaba nabo. Nookira kuza omu nteerane?— Omu nteerane ezo omuntu omukuru niwe arikujwekyera abandi omu kushaba. Oine kuhurikiza gye ebi arikuba naagamba ahakuba naaba naabajwekyera omu kushaba Ruhanga. Reero obwo noobaasa kugira ngu “Amiina” yaaheza kushaba. Noomanya eki kirikumanyisa okugira ngu “Amiina” aha muheru gw’eshaara?— Nikimanyisa ngu waasiima ebi yaashaba. Kandi nikiba nikimanyisa ngu noikirizana n’ebi owaashaba yaagamba kandi ngu noobitwara nk’eshaara yaawe.

Yesu kandi akaba ashaba arikuza kurya. Akaba ayeebaza Yehova ahabw’eby’okurya ebi yaabaire atunga. Butoosha nooshaba waaza kurya?— Ni kirungi itwe kwebaza Yehova ahabw’eby’okurya tutakatandikire kurya. Omuntu ondiijo naabaasa kushaba mwaba nimuza kurya hamwe. Kwonka shi waaba nooza kurya wenka? Nari shi waaba nooza kurya hamwe n’abantu abatarikwebaza Yehova?— Obwo nooba oine kushaba wenka.

Kwonka shi butoosha nooyetenga kushaba omu iraka ririkuhurirwa? Nari Yehova naabaasa kuhuurira eshaara yaawe ei waashabira aha mutima?— Nitubaasa kumanya eky’okugarukamu kuruga aha byabaire ahari Nehemia. Akaba ari omuramya wa Yehova owaabaire naakora omu kikaari ky’Omugabe wa Buperesi Arutagizakiseesi. Eizooba rimwe Nehemia akaguubwa kubi ahabw’okuba akahurira ngu orugo rwa Yerusaalemu, orurembo rukuru rw’Abaisraeli, rukaba rushenyukire.

Omugabe ku yaabuurize Nehemia ahabw’enki yaabaire agwirwe kubi, Nehemia akabanza yaashabira aha mutima. Bwanyima Nehemia akagambira omugabe ahabw’enki yaabaire agwirwe kubi reero yaamushaba ngu amwikirize aze Yerusaalemu kugaruka kwombeka orugo orwo. Niki ekyabaireho?—

Buzima, Ruhanga akagarukamu okushaba kwa Nehemia. Omugabe akaikiriza Nehemia kugyenda kandi yaamuha n’emiti mingi y’okukoresa omu kwombeka orugo. N’ahabw’ekyo Ruhanga naabaasa kugarukamu eshaara zaitu, nangwa n’obu twakushabira aha mutima.​—Nehemia 1:2, 3; 2:4-8.

Hati teekateeka ahari eki. Oshemereire kwinama waaba nooshaba? Nari oshemereire kutsimba amaju? Nooteekateeka ki?— Obumwe Yesu akaba ashaba atsimbire amaju. Obundi akaba ashaba eyemereire. Kandi obumwe akaba aimutsya amaisho ashaba arikureeba ahaiguru, nk’oku yaakozire obu yaashaba arikuza kuzoora Laazaaro.

Ekyo shi nikyoreka ki?— Buzima nikyoreka ngu omuringo ogu turikuba turimu tikyo kikuru. Obumwe ni kirungi okushaba oyinami kandi ohumiize. Obwire obundi noobaasa kushaba otsimbire amaju nk’oku Yesu obumwe yaabaire akora. Kwonka, ijuka ngu nitubaasa kushaba Ruhanga obwire bwona, omu ihangwe nari nyekiro kandi naatuhurira. Ekikuru munonga nookwikiriza ngu Yehova naatuhurira. Noikiriza ngu Yehova naahurira eshaara zaawe?—

Tushemereire kugamba ki twaba nitushaba Yehova?— Niinkushaba ongambire: Waaba nooshaba Ruhanga, noomugambira ki?— Yehova naatuha ebintu bingi birungi, n’ahabw’ekyo ni kirungi kumwebaza, tikwo?— Nitubaasa kumwebaza ahabw’eby’okurya ebi arikutuha. Kwonka shi oreebarize Yehova ahabw’okwezi okurikwaka nyekiro, emiti n’ebirabyo birungi?— Nabyo niwe yaabihangire.

Abeegi ba Yesu omurundi gumwe bakamushaba kubegyesa kushaba. Omwegyesa Mukuru akabeegyesa, kandi akabooreka ebintu bikuru ebi baabaire baine kushaba. Ebintu ebyo noobimanya?— Kwata Baibuli yaawe, oshuuruure omuri Matayo eshuura 6. Omu runyiriri 9 kuhika 13, nitushangamu eki abantu baingi barikweta Eshaara ya Tataitwe. Ka tuhashome hamwe.

Aha nitureeba ngu Yesu akatugambira kushaba aha bikwatiraine n’eiziina rya Ruhanga. Akagira ngu tushabe ngu eiziina rya Ruhanga ryezibwe. Eiziina rya Ruhanga ni riiha?— Ni Yehova, kandi tushemereire kukunda eiziina eryo.

Ekindi, Yesu akatwegyesa kushaba ngu Obukama bwa Ruhanga bwije. Obukama obwo ni bukuru ahakuba nibwija kureeta obusingye omu nsi kandi bugihindure paradiso.

Kandi, Omwegyesa Mukuru akagira ngu tushabe ngu ebi Ruhanga akunda bikorwe omu nsi nk’oku birikukorwa omu iguru. Twashaba ekyo, obwo nituba twine kukora ebi Ruhanga arikwenda ngu tukore.

Ekindi, Yesu akatwegyesa kushaba kutunga eby’okurya ebi turikwetenga buri izooba. Kandi akagira ngu tushemereire kweteisa twakora ebi Ruhanga atarikukunda. Kandi tushemereire kushaba Ruhanga kutusaasira. Kwonka Ruhanga atakatusaasiire, tushemereire kusaasira abandi baaba batushobeize. Ekyo nikikworobera kukora?—

Eky’aha muheru, Yesu akagira ngu tushemereire kushaba ngu Yehova Ruhanga aturinde omubi, Sitaane Omuregi. N’ahabw’ekyo ebyo byona n’ebintu birungi ebi tushemereire kushaba Ruhanga.

Tushemereire kwikiriza ngu Yehova naahurira okushaba kwaitu. Oyihireho okushaba Ruhanga ngu atuhwere, tushemereire kuguma nitumwebaza. Naashemererwa twamushaba twihire aha mutima kandi twamushaba ebirikuhikaana n’ebi akunda. Kandi naija kutuha ebintu ebyo. Ekyo nookiikiriza?—