Yesu Okwegyesa Entumwa Ze Okushaba

Byona ebi Abafarisaayo baabaire bakora bikaba biri eby’okushemeza abantu. Ku baabaire bakorera omuntu eby’embabazi, bakaba babikora ngu abandi babareebe. Bakaba bashabira omu bantu baingi kugira ngu babaase kubareeba. Abafarisaayo bakaba bakwata eshaara ndaingwa omu mutwe kandi baguma nibazigarukagarukamu omu sinagogi n’omu nteeraniro z’enguuto ahu abantu baabaire nibabaasa kubahurira. N’ahabw’ekyo abantu bakatangaara obu Yesu yaabagira ati: ‘Mutashaba nk’Abafarisaayo. Nibateekateeka ngu Ruhanga naija kushemezibwa ebigambo byabo bingi, kwonka tikirikumushemeza. Okushaba kwine kuba ahagati yaawe na Yehova. Murekye kushaba nimugarukagaruka omu bigambo. Yehova naayenda ngu omugambire oyihire aha mutima.’

‘N’ahabw’ekyo mushabe muti: “Tataitwe ow’omu iguru, eiziina ryawe ryezibwe, Obukama bwawe bwije; ebi okunda bikorwe omu nsi nk’oku bikorwa omu iguru.”’ Kandi Yesu akagira ngu baine kushaba n’eby’okurya bya buri izooba, okusaasirwa ebibi, hamwe n’ebyetengo byabo ebindi.

Yesu akagira ati: ‘Mutareka kushaba. Mugume nimushaba Shoimwe, Yehova, ebintu birungi. Buri muzaire naaba naayenda kuha omwana we ebintu birungi. Omwana waawe yaakushaba omugaati, okamuha eibaare? Yaakushaba eky’enyanja, okamuha enjoka?’

Bwanyima Yesu akabagira ati: ‘Imwe ku muraabe nimumanya kuha abaana baanyu ebirungi, Shoimwe ow’omu iguru tarikizaho kubaha omwoyo ogurikwera? Eki oine kukora n’okumushaba.’ Nookuratira obuhabuzi bwa Yesu? Ni bintu ki ebi orikushaba?