Tooreza Yehova Orikuba Omucureezi

1. Niki ekirikukushemeza aha bucureezi bwa Yehova?

WAAREEBA abari omu butegyeki obunaku obu, noobaasa kugira ngu n’abacureezi? Ngaaha buzima. Kwonka we Yehova n’obu araabe ari ow’obushoboorozi bwona, n’omucureezi. (Zab. 113:​5-8) Kandi tihariho orikubaasa kuba omucureezi nkawe ahakuba omuriwe tiharimu omwetunguuro gwona. Omu kicweka eki nituza kushwijuma emiringo ena oku Yehova arikworeka obucureezi. Nituza n’okureeba oku Yesu yaatooreize Ishe omu kuba omucureezi. Okushwijuma ebintu ebyo nikiija kutuhwera kwongyera kwirira haihi Yehova n’okumanya oku turikubaasa kumutooreza omu kuba abacureezi.

YEHOVA AYOROBI KUHIKIIRIRA

2. Zaaburi 62:8 nihagamba ki ahari Yehova? (Reeba n’ekishushani.)

² Tikyorobi kuhikiirira abantu abaine amaryo. Ahabw’okugira ngu nibatwariza abandi omu muringo gutari gwa rukundo, nikigumira abantu kubahikiirira. Kwonka Yehova tikwo ari. Ahabw’okugira ngu Tataitwe ow’omu iguru n’omucureezi, naayenda ngu twena tumuhikiirire, kandi tumugambire buri kimwe eki turi aha mutima n’omu biteekateeko. (Shoma Zaaburi 62:8.) Nk’oku omuzaire owa rukundo oku arikuba ayeteekateekire kuhurikiza ebirikwerarikiriza abaana be, na Yehova naahurikiza okushaba kw’abaheereza be. Kandi akahandiikisa okushaba kw’abaheereza be omu Baibuli. Buzima ekyo nikyoreka ngu naayenda tumuhikiirire. (Yos. 10:​12-14; 1 Sam. 1:​10-18) Mbwenu shi obumwe ku twakwehurira nk’abatashemereire kuhikiirira Yehova?

3. Niki ekirikutuhamiza ngu Yehova naayenda tumwirire haihi kurabira omu kushaba?

³ Nitubaasa kuhikiirira Yehova omu kushaba n’obu twakuba nitwereeba nk’abatashemereire rukundo ye. Ahabw’enki nitubaasa kugira tutyo? Omu nfumu y’omwana owaarazire, Yesu akagyeragyeranisa Yehova n’omuzaire owaayakiire omutabani owaayeteisize, kandi owaabaire naayereeba nk’otashemereire kugaruka omuka. Omuzaire ogwo akatwariza ata omutabani ku yaagarukire omuka? Yesu akagira ngu ku yaareebire ati omutabani, “yairuka, yaamugwa omunda, yaamunywegyera.” (Luk. 15:​17-20) Yehova ari nk’omuzaire ogwo. Abantu abaine emitima ehendekire nari abarikweshinja ahabw’enshobe ez’enyima ku barikumushaba, naahigwa obucureezi kubahurikiza n’obwegyendesereza. (Tonz. 3:​19, 20) Yehova naabagirira esaasi, abahuumuriza, kandi abagirira embabazi na rukundo nk’omuzaire owaayirukire kubugana omutabani. (Isa. 57:15) Ekyo Yehova naakikora ata obunaku obu? Naakikora arikukoresa abareeberezi, ab’eka yaitu n’ab’eishe-emwe bagyenzi baitu. (Yak. 5:​14, 15) Yehova naatuha obuhwezi obu ahabw’okuba naayenda ngu tumwirire haihi.

4. Yesu akooreka ata ngu kyorobi kumuhikiirira?

⁴ Yesu naatooreza Ishe omu kuba omucureezi. Obu yaabaire ari omu nsi, kikaba nikyorobera abantu kumuhikiirira, kandi bakaba batarikutiina kumubuuza ebibuuzo. (Mak. 4:​10, 11) N’ahabw’ekyo ku yaabaire agira eki yaababuuza, bakaba bamugambira kyenyini eki bari aha mutima. (Mat. 16:​13-16) Kandi ku baabaire bakora enshobe, bakaba bataguma batiinire, ahakuba bakaba nibamanya ngu Yesu n’omunyambabazi, aine esaasi, kandi naagumisiriza. (Mat. 17:​24-27) Ahabw’okugira ngu Yesu akaba naatooreza gye Ishe, kikahwera abakuratsi be kwongyera kumanya gye Yehova. (Yoh. 14:9) Bakeetegyereza ngu Yehova akaba atari nk’abeebembezi b’ediini abaabaire bataine saasi, kandi baine omwetunguuro. Kureka bakeetegyereza ngu Yehova n’omucureezi, kandi kyorobi kumuhikiirira.

5. Twaba abacureezi nikibaasa kuhwera kita abandi kutuhikiirira?

⁵ Nitubaasa kutooreza tuta Yehova? Twaba abacureezi nikyorobera abandi kutuhikiirira. Nikiija kutuhwera kwetantara kugira eihari, amaryo n’okubiika enziika emitwarize erikureetera abandi kugumirwa kutuhikiirira. Kwonka, obucureezi nibwija kutuhwera kugira embabazi, okugumisiriza n’okusaasira, emitwarize erikureetera abandi kutwirira haihi. (Kol. 3:​12-14) Okukira munonga abareeberezi baine kuba boorobi kuhikiirirwa. Kwonka ekyo kubaasa kubaho baine kumara obwire n’ab’eishe-emwe na banyaanyazi-itwe. N’ahabw’ekyo baine kubaho omu nteerane butunu bakeetaantara kuba aha zoom obu kitarikwetengyesa. Kandi nibateeraho nk’oku barikubaasa kuza omu kubuurira enju aha nju n’ab’eishe-emwe na banyaanyazi-itwe. Ab’eishe-emwe baamanya gye abareeberezi baabo, nikiija kuboorobera kubahikiirira bayetenga obuhwezi bwabo.

YEHOVA AINE EMITEEKATEEKYERE ERINGANIIRE

6-7. Ha eky’okureeberaho ekirikworeka ngu Yehova tarikuremera aha ki arikuba acwiremu abaheereza be ku barikumushaba.

⁶ Abantu abaine amaryo nibeetwara nk’abarikumanya buri kimwe, kandi nibaremera aha bi barikuba bacwiremu. Kwonka ahabw’okugira ngu Yehova n’omucureezi, naahindura omu bi arikuba acwiremu n’obu araabe aine obushoboorozi oburikukirirayo kimwe. Teekateeka aha ku yaatwariize Miriamu munyaanya wa Musa. We na Arooni bakeetomboitera Musa ou Yehova yaabaire atooraine kumujwekyera. Omu kukora ekyo, Miriamu akooreka ngu akaba atarikuha Yehova ekitiinisa. N’ekyarugiremu, Yehova akagirira Miriamu ekiniga ky’amaani yaamuteera ebibembe. Kwonka Arooni akashaba Musa ngu amuhwere, reero Musa yaayeshengyereza Yehova ngu amukize. Mbwenu shi Yehova akatwaza ata? Tararemeire aha ki yaabaire acwiremu. Ahabw’okugira ngu n’omucureezi akahurira okushaba kwa Musa yaakiza Miriamu.—Kub. 12:​1-15.

⁷ Kandi, Yehova akooreka obucureezi omu ku yaatwariize Omugabe Hezekia. Yehova akakoresa nabi we kumanyisa omugabe ngu akaba naaza kufa. Hezekia akatakira Yehova, kandi yaamweshengyereza ngu amukize. Yehova akahurira okutaka kwe, yaamugirira embabazi, kandi yaamwongyeraho emyaka 15. (2 Bag. 20:​1, 5, 6) Buzima obucureezi nibureetera Yehova kugira esaasi n’okuhurikiza abaheereza be baamushaba.

8. Ni by’okureeberaho ki ebirikworeka ngu Yesu aine emiteekateekyere eringaniire? (Mako 3:​1-6)

⁸ Yesu naatooreza Ishe. Obu yaabaire ari omu nsi, tarangire kukorera abantu ebirungi ahu kyabaire nikyetengyesa. Nk’eky’okureeberaho, akakiza abantu aha Sabato n’obu abeebembezi b’ediini abataine saasi baabaire nibamuhakanisa kukikora. (Shoma Mako 3:​1-6.) Yesu naagumizamu arikworeka emiteekateekyere eringaniire omu muringo ogu arikwebemberamu ekibiina Ekikristaayo. Nk’eky’okureeberaho, haagira owaakora ekibi ky’amaani omu kibiina, naamugumisiririza arikumuha omugisha gw’okweteisa n’okutereeza emihanda ye.—Kush. 2:​2-5.

9. Nitubaasa kugira tuta emiteekateekyere eringaniire nk’eya Yehova, kandi tukagyoreka? (Reeba n’ebishushani.)

⁹ Nitubaasa kutooreza tuta Yehova? Twine kuteeraho kuba abaringaniire nka Yehova omu miteekateekyere yaitu n’omu bi turikukora. (Yak. 3:17) Nk’eky’okureeberaho, abazaire abarikutooreza Yehova, tibarikuteekateeka ngu abaana baabo baine kukora ebirengire aha kubaasa kwabo. Ekyo nikyo Yakobo yaakozire omu Okutandika 33:​12-14. Abazaire abacureezi kandi abaine emiteekateekyere eringaniire, nibeetantara kugyeragyeranisa omwana aha ndiijo. Abareeberezi b’ekibiina nabo baine kugira emiteekateekyere eringaniire. Ekyo nibabaasa kukikora baaba bari omu rukiiko, barikwikirizana n’eki baingi baacwamu kyaba kitarikuhenda emisingye ya Baibuli. (1 Tim. 3:​2, 3) Kandi twena twine kuteeraho kwikirizana n’eki abandi barikuteekateeka n’obu twakuba nitureeba enshonga omu muringo ogurikutaana n’ogwabo. (Rom. 14:1) Twena omu kibiina twine kuteeraho kuhamya ngu okworoberana kwaitu nari okuba abaringaniire ‘kwamanywa abantu boona.’—Fil. 4:5.

YEHOVA NAAGUMISIRIZA

10. Yehova ayorekire okugumisiriza mu miringo ki?

¹⁰ Noobaasa kuba oyetegyereize ngu omuntu omunyamaryo naaba atarikwenda kutegyereza. Amaryo nigaremesa omuntu kugumisiriza. Ekyo ka nikitaanira kimwe na Yehova orikukirayo kworeka omutwarize gw’okugumisiriza! Nk’eky’okureeberaho, omu bwire bwa Noa, akagira ngu akaba naija kutegyereza emyaka 120 abone kucwekyereza abagomi. (Kut. 6:3) Noa akaba aine obwire burikumara bw’okworora abaana be n’okwombeka emeeri arikuhwerwa ab’eka ye. Bwanyima y’obwire, maraika owaabaire naajwekyera Yehova akagumisiririza Abrahamu obu yaabaire naamubuuza ebibuuzo ebirikukwata aha kucwekyereza Sodoma na Gomora. Omuntu omunyamaryo akaba naabaasa kumugarukamu ati: ‘Noobuuza nk’oha?’ Kwonka ahabw’okugira ngu maraika ogwo akaba naatooreza Yehova akagumisiririza Abrahamu.—Kut. 18:​20-33.

11. Kurugiirira ahari 2 Petero 3:​9, ahabw’enki Yehova naagumisiriza n’omu bunaku obu?

¹¹ N’omu bunaku obu Yehova naayoreka okugumisiriza. Akitegyereize obwire obu yaataireho kubaasa kureetaho emperu. Ahabw’enki akigumisiriize? N’ahabw’okugira ngu ‘tarikwenda muntu weena kuhwerekyerera, kureka naayenda ngu boona bahikye aha kweteisa.’ (Shoma 2 Petero 3:9.) Mbwenu shi okugumisiriza kwa Yehova kufiire busha? Ngaaha buzima! Abantu baingi babaasize kumwirira haihi, kandi twine amatsiko ngu n’abandi baingi nibaija kukora nikyo kimwe. Kwonka n’obu kiraabe kiri kityo, okugumisiriza kwe kwine obugarukiro. N’obu araabe naakunda abantu, tari byafandimu. Tarikwija kwikiriza abantu kugumizamu nibakora ebintu bibi ebiro byona.—Hab. 2:3.

12. Yesu naatooreza ata okugumisiriza kwa Yehova?

¹² Yesu naatooreza Ishe. Yesu atwire naatooreza okugumisiriza kwa Yehova kumara emyaka mingi. Yesu akaba naareeba Sitaane arikubeiherera Yehova n’abantu abeesigwa. (Kut. 3:​4, 5; Yob. 1:11; Kush. 12:10) Kandi atwire naareeba abantu barikubonabona. Buzima ka aine kuba aine ekihika ‘ky’okuhwerekyereza emirimo ya Sitaane’! (1 Yoh. 3:8) Mbwenu shi niki ekirikuhwera Yesu kutegyereza ngu Yehova amwikirize kucwekyerereza kimwe emirimo y’Omuregi? Obucureezi bwe nibumuhiga kureka enshonga omu mikono ya Yehova oine obushoboorozi bwona.—Byak. 1:7.

13. Yesu akagumisiririza ata entumwa ze, kandi ahabw’enki?

¹³ Obu Yesu yaabaire ari omu nsi akagumisiririza entumwa ze. Nk’eky’okureeberaho, entumwa ku baagumire nibateera empaka aha bikwatiraine n’ohikire kuba mukuru omuribo, tarabakabukiire. Kureka, akagumizamu naabagumisiririza. (Luk. 9:46; 22:​24-27) Akaba aine obwesigye ngu bwanyima y’obwire bakaba nibaija kukora empinduka ezirikwetengyesa. Naiwe haine obu orikukora enshobe emwe emirundi mingi? Kyaba nikwo kiri, tirikukushemeza kumanya ngu Omugabe orikukutegyeka n’omucureezi, kandi naagumisiriza?

14. Niki ekirikubaasa kutuhwera kugira okugumisiriza?

¹⁴ Nitubaasa kutooreza tuta Yehova? Twagira “okuteekateeka kwa Kristo” nikituhwera kutwaza nka Yehova. (1 Kor. 2:16) Niki ekirikubaasa kutuhwera kuteekateeka nka Kristo? Twine kuteeraho kushoma ebitabo by’Engiri. Bwanyima nitubaasa kutaho obwire bw’okuteekateeka aha ku ebi twashoma birikworeka emiteekateekyere ya Yesu aha nshonga ezitari zimwe. Kandi, twine kushaba Yehova kutuhwera kworeka obucureezi n’emiteekateekyere ya Yesu. Twateeraho kworeka emiteekateekyere ya Kristo nitwija kutooreza Yehova omu kwegumisiririza n’okugumisiririza abandi.—Mat. 18:​26-30, 35.

YEHOVA NAATA OMUTIMA AHA BACUREEZI

15. Yehova ahikiriize ata ebigambo ebiri omuri Zaaburi 138:6?

¹⁵ Shoma Zaaburi 138:6. Ka n’omugisha gw’amaani kureeba ow’Obushoboorozi bwona naata omutima gwe aha bacureezi! Teekateeka bimwe aha by’okureeberaho bikye ahu Yehova yaateire omutima aha bacureezi. Abamwe noobaasa kuba otarikukira kubaijuka kwonka bakahandiikwa omu Baibuli. Yehova akahwera Musa kuhandiika omu Baibuli eiziina ry’omurezi orikwetwa Debora owaabaireho omu bwire bw’abashaija abeesigwa aba ira. Akaheereza n’obwesigwa omuka ya Isaaka na Yakobo kumara emyaka nka 125. N’obu turaabe tutarikumanya bingi ebirikukwata aha mukazi ogwo omwesigwa, Yehova akamuhandiikisa omu Baibuli kworeka oku yaabaire naakundwa. (Kut. 24:59; 35:8.) Bwanyima y’emyaka mingi, Yehova akatoorana Daudi owaabaire ari omuriisa w’entaama yaamuhindura omugabe w’eihanga rya Israeli. (2 Sam. 22:​1, 36) Ekindi, Yesu ku yaaherize kuzaarwa, Ruhanga akahaisa ekitiinisa abariisa b’entaama abacureezi arikwohereza baamaraika kuba nibo babanza kugambirwa ngu omuri Betelehemu hazaarirwamu Mesia owaaraganisiibwe. (Luk. 2:​8-11) Kandi obu Yosefu na Mariamu bareeta Yesu omu hekalu, Yehova akahaisa Simeoni na Anna ekitiinisa abaabaire bari omu myaka ya bukuru arikubamanyisa Omwana we omwereere. (Luk. 2:​25-30, 36-38) Amazima gari ngu, ‘n’obu [Yehova] araabe ari ahaiguru munonga, naata omutima aha bacureezi.’

16. Yesu akatooreza ata Ishe omu ku yaatwariize abandi?

¹⁶ Yesu naatooreza Ishe. Yesu akatwariza abacureezi omu muringo gw’ekitiinisa nka Ishe. Akeegyesa “abantu babisi abateegyesiibwe” amazima agarikukwata aha Bukama bwa Ruhanga. (Byak. 4:13; Mat. 11:25) Akakiza abarwaire omu muringo ogwabareetaire kugira ekitiinisa n’okuhurira ngu nibakundwa. (Luk. 5:13) Aha kiro ekyahereerukireyo atakafiire, akanaabisa entumwa ze ebigyere, omurimo ogwabaire gukorwa omuhuuku. (Yoh. 13:5) Kandi obu yaabaire atakagiire omu iguru, akaha abakuratsi be abacureezi ekitiinisa, abaabaire bariho n’abaabaire nibaija kukurataho, arikubaha omurimo ogurikukirayo obukuru ogw’okuhwera abantu kutunga amagara amagara agatahwaho.—Mat. 28:​19, 20.

17. Nitubaasa kuha tuta abandi ekitiinisa? (Reeba n’ekishushani.)

¹⁷ Nitubaasa kutooreza tuta Yehova? Nituha abantu ekitiinisa twabagambira amakuru marungi tutataire omutima aha bukomooko bwabo, endeebeka yaabo nari obwegyese bwabo. Kandi nituha ab’eishe-emwe na banyaanyazi-itwe ekitiinisa turikubareeba nk’abarikutukira n’obu twakuba twine etalanta ezi bataine nari obujunaanizibwa. (Fil. 2:3) Nikishemeza Yehova twaba abacureezi ‘tukeeshumba [nari tukabaandinza] abandi’ omu kuhaana ekitiinisa n’omu miringo endiijo.—Rom. 12:10; Zef. 3:12.

18. Ahabw’enki nooyenda kutooreza obucureezi bwa Yehova?

¹⁸ Twateeraho kutooreza obucureezi bwa Tataitwe ow’omu iguru owa rukundo, nitwija kugira emiteekateekyere eringaniire, tube abarikugumisiriza, kandi kyorobere abandi kutuhikiirira. Nitwija n’okuha abandi ekitiinisa nka Yehova. Kandi twateeraho kutooreza Ruhanga waitu omucureezi, nitwija kuba ab’omuhendo omu maisho ge.—Isa. 43:4.