Orwakashatu, Gyuraayi 30
Titurikubaasa kuhunama kutagamba ebi twareebire, n’ebi twahuriire.—Byak. 4:20.
Nitubaasa kutooreza abeegi ba Yesu turikugumizamu nitubuurira n’obu ab’obushoboorozi baakuturagiira kurekyera aho. Nitubaasa kugira obuhame ngu Yehova naija kutuhwera kuhikiiriza obuheereza bwaitu. N’ahabw’ekyo, shaba obwengye n’okutatiina, na Yehova kukuhwera kugumisiriza oburemeezi. Baingi ahariitwe nitubonabona ahabw’okurwara, oburemeezi omu nyehurira, okufeerwa omukundwa, embeera y’eka egumire, okuhiiganisibwa, nari ahabw’oburemeezi obundi. Kandi ebigwererezi n’entaro bireetaire abantu kugumirwa kwemera oburemeezi obu. Gambira Yehova kyona ekikuri aha mutima. Mugambire embeera ezi orikurabamu nk’orikugamba na munywani waawe ow’aha mara. Gira obwesigye ngu Yehova naija kukora ekiraakuhwere. (Zab. 37:3, 5) Okuguma nitushaba nikituhwera ‘kugumisiriza omu busaasi.’ (Rom. 12:12) Yehova naamanya ebi abaheereza be barikurabamu, kandi ‘naahurira okutaka kwabo.’—Zab. 145:18, 19. w23.05 5-6 ¶12-15
Orwakana, Gyuraayi 31
[Mugumizemu] nimwetegyereza ebirikusiimwa Mukama.—Efe. 5:10.
Twaba nitwenda kucwamu aha nshonga nkuru, nikyetengyesa kumanya ‘ebi [Yehova] arikwenda,’ kandi tukakora ebirikuhikaana nabyo. (Efe. 5:17) Twasherura emisingye ya Baibuli erikuhikaana n’embeera yaitu, nituba nitwenda kugira emiteekateekyere nk’eya Ruhanga aha nshonga egyo. Kandi twagyendera aha misingye ye, nitwija kucwamu gye. ‘Omubi,’ kandi omuzigu waitu Sitaane, naayenda tuhugibwe eby’ensi tuburwe obwire bw’okuheereza Ruhanga waitu. (1 Yoh. 5:19) Omukristaayo naabaasa kwebembeza okusherura eby’obutungi, obwegyese, nari omurimo omu mwanya gw’okuhayo ekirikukirayo oburungi omu kuheereza Yehova. Ekyo kyabaho, nikyoreka ngu emiteekateekyere y’ensi etandikire kumushiisha. Buzima, ebintu ebyo ti bibi, kwonka tibiine kutwara omwanya gw’okubanza omu magara gaitu. w24.03 24 ¶16-17
Orwakataano, Agusto 1
Ebibonabono by’ohikiriire ni bingi, kwonka Yehova naabimwihamu byona.—Zab. 34:19.
Yetegyereze enshonga ibiri nkuru omu zaaburi eri aha ruguru: (1) Abantu abahikiriire nibahikwaho oburemeezi. (2) Yehova naatucungura oburemeezi bwaitu. Naatucungura ata? Eki naakikora arikutuhwera kureeba embeera omu ensi egi omu muringo oguringaniire. N’obu Yehova arikuturaganisa ngu nitwija kushemererwa twamuheereza, tarikugira ngu titurikwija kuhikwaho oburemeezi. (Isa. 66:14) Naatuhiga kuta omutima ahari nyentsya yaitu, obu turaabe nitutuura omu mbeera ezi arikwenda ngu twesiimire ebiro byona. (2 Kor. 4:16-18) Ekyo kitakabaireho, naatuhwera kugumizamu nitumuheereza buri izooba. (Tonz. 3:22-24) Nitubaasa kwegyera ki aha baheereza ba Yehova abarikugambwaho omu Baibuli n’aba hati? Nitubaasa kutunga oburemeezi obu tutarikuteekateeka. Kwonka twayesiga Yehova, tarikubaasa kutwehuzya.—Zab. 55:22. w23.04 14-15 ¶3-4