EISHOMO 54
Obujunaanizibwa ‘bw’Omwambari Omwesigwa Kandi ow’Obwengye’
Yesu niwe mutwe gw’ekibiina Ekikristaayo. (Abaefeso 5:23) Hati Yesu ari omu iguru, naayebembera abakuratsi be omu nsi kurabira omu ‘mwambari omwesigwa kandi ow’obwengye.’ (Shoma Matayo 24:45.) Yesu niwe yaatooraine ‘omwambari,’ akamuha n’obushoboorozi buringaniire, kwonka omwambari ogwo naaguma ari omuhuuku wa Yesu, kandi naaheereza beene Ishe Yesu. Omwambari ogu n’oha? Naatureeberera ata?
1. ‘Omwambari Omwesigwa Kandi ow’Obwengye’ n’Oha?
Kuruga ira, Yehova atwire naatoorana omushaija omwe nari abashaija baingi kwebembera abantu be. (Malaki 2:7; Abaheburaayo 1:1) Bwanyima ya Yesu kufa, entumwa n’abareeberezi omuri Yerusaalemu nibo baatandikire kureeberera ekibiina. (Ebyakozirwe 15:2) Kuhikaana n’entebeekanisa egi, hati Akakiiko Akareeberezi ak’Abajurizi ba Yehova kariho abareeberezi abarikutebeekanisa eby’okurya by’omwoyo, kandi bakeebembera n’omurimo gw’okubuurira. Abareeberezi aba nibo barikwetwa ‘omwambari omwesigwa kandi ow’obwengye’ ou Yesu yaatooraine. (Matayo 24:45a) Boona abari aha Kakiiko Akareeberezi n’Abakristaayo abashukirweho omwoyo, abaine ekihika ky’okwegaita ahari Kristo kutegyeka nawe omu Bukama bw’omu iguru, baahendera obuheereza bwabo omu nsi.
2. Ni by’okurya ki eby’omwoyo ebi omwambari arikutuha?
Yesu akagira ngu omwambari omwesigwa akaba naija ‘kugaburira [Abakristaayo bagyenzi be] omu bunaku obuhikire.’ (Matayo 24:45b) Nk’oku eby’okurya ebya butoosha birikutuhwera kuguma twine amaani n’amagara marungi, obuhabuzi oburi omu Kigambo kya Ruhanga nari eby’okurya by’omwoyo, nibituhwera kugira amaani g’okuguma tuhamiire ahari Yehova, n’okukora omurimo ogu Yesu yaatuhaire. (1 Timoseo 4:6) Nitutunga eby’okurya by’omwoyo ebi kurabira omu nteerane z’ekibiina, empango ez’ekiro kimwe, n’ez’ebiro bishatu, otwariiremu vidiyo n’ebitabo ebirikutuhwera kumanya eki Ruhanga arikwenda, n’okuhamya omukago gwaitu nawe.
SHWIJUMA GYE
Reeba ahabw’enki nikyetengyesa kugira ‘omwambari omwesigwa kandi ow’obwengye’ nari Akakiiko Akareeberezi.
Akakiiko Akareeberezi nikatebeekanisa eby’okurya by’omwoyo, nikataho n’eby’okukuratira, kuhwera Abajurizi ba Yehova omu nsi yoona
3. Abantu ba Yehova baine kuba batebeekanisiibwe gye
Yesu naaha Akakiiko Akareeberezi eby’okukuratira kugira ngu Abajurizi ba Yehova batebeekanisibwe gye. Entebeekanisa nk’egi ekaba eriho omu Bakristaayo aba ira. Zaana VIDIYO.
Shoma 1 Abakorinso 14:33, 40, kubaasa kugarukamu ekibuuzo eki:
Ekyahandiikirwe eki nikyoreka kita ngu Yehova naayenda ngu Abajurizi be babe batebeekanisiibwe gye?
4. Omwambari omwesigwa naatebeekanisa omurimo gwaitu gw’okubuurira
Okubuurira nigwo murimo mukuru ogu Abakristaayo aba ira baabaire nibakora. Shoma Ebyakozirwe 8:14, 25, kubaasa kugarukamu ebibuuzo ebi:
N’oha owaabaire naaha Abakristaayo aba ira eby’okukuratira omu murimo gw’okubuurira?
Petero na Yohaana bakatwara bata obuhabuzi bw’entumwa bagyenzi baabo?
Okubuurira nigwo murimo mukuru ogu Akakiiko Akareeberezi karikutebeekanisa. Zaana VIDIYO.
Yesu akooreka obukuru bw’okubuurira. Shoma Mako 13:10, kubaasa kugarukamu ebibuuzo ebi:
Ahabw’enki Akakiiko Akareeberezi nikatwara omurimo gw’okubuurira nka mukuru?
Ahabw’enki haine kubaho ‘omwambari omwesigwa kandi ow’obwengye’ kutebeekanisa omurimo ogu omu nsi yoona?
5. Omwambari omwesigwa naataho eby’okukuratira
Akakiiko Akareeberezi nikaha Abakristaayo omu nsi yoona eby’okukuratira. Nikacwamu kata eky’okukuratira ebi karaateho? Yetegyereze oku akakiiko akareeberezi omu kyasha ky’okubanza kaakikozire. Shoma Ebyakozirwe 15:1, 2, kubaasa kugarukamu ebibuuzo ebi:
Abakristaayo aba ira bakatunga butaikirizana ki?
Paulo, Barunaba, n’abandi bakeebuuza ahari baahi kubaasa kugonjoora obutaikirizana obwo?
Shoma Ebyakozirwe 15:12-18, 23-29, kubaasa kugarukamu ekibuuzo eki:
Akakiiko akareeberezi aka ira kakatunga kata obuhabuzi bwa Ruhanga katakacwiremu?—Reeba omushororongo 12, 15, na 28.
Shoma Ebyakozirwe 15:30, 31 na 16:4, 5, kubaasa kugarukamu ebibuuzo ebi:
Abakristaayo bakatwara bata obuhabuzi obwabahairwe akakiiko akareeberezi?
Yehova akabaha ata omugisha ahabw’okworoba kwabo?
Shoma 2 Timoseo 3:16 na Yakobo 1:5, kubaasa kugarukamu ekibuuzo eki:
Hati Akakiiko Akareeberezi nikaiha nkahi obuhabuzi kaaba nikaza kucwamu?
ABAMWE NIBAGIRA NGU: “Waahurikiza Akakiiko Akareeberezi, nooba nookuratira abantu buntu.”
Niki ekirikukuhamiza ngu Yesu niwe arikwebembera Akakiiko Akareeberezi?
OMU BUGUFU
Akakiiko Akareeberezi niwe ‘omwambari omwesigwa kandi ow’obwengye’ owaatoorainwe Kristo. Omwambari ogu naaha Abakristaayo omu nsi yoona eby’okukuratira, n’eby’okurya by’omwoyo.
Okweijutsya
N’oha owaatooraine ‘omwambari omwesigwa kandi ow’obwengye’?
Akakiiko Akareeberezi nikatureeberera kata?
Noikiriza ngu Akakiiko Akareeberezi niwe ‘omwambari omwesigwa kandi ow’obwengye’?
JUMBURA EBINDI
Reeba oku Akakiiko Akareeberezi katebeekanisiibwe kukora omurimo gwako.
“Akakiiko Akareeberezi ak’Abajurizi ba Yehova Niki?” (Eky’aha mukura)
Manya oku Akakiiko Akareeberezi karikuhamya ngu twatunga eby’okurya by’omwoyo ebirikwesigwa.
Abari aha Kakiiko Akareeberezi nibatwara bata omurimo ogu Yesu yaabahaire kukora?
Enteerane z’ekibiina n’enteerane empango nizihamya zita ngu Yehova niwe arikuha Akakiiko Akareeberezi eby’okukuratira?