Baibuli Neeyegyesa Ki?

Ruhanga naagarukamu buri kushaba kwona?

NOOTEEKATEEKA NGU . . .

• naagarukamu okushaba kwa buri omwe

• naagarukamu okushaba kw’abantu abamwe

• tihaine n’omwe ou arikugarukamu okushaba kwe

EKI BAIBULI ERIKWEGYESA

Yehova “ari haihi na boona . . . abamutakira omu mazima.”​—Zaaburi 145:18.

NIKI EKINDI EKI TURIKWEGA OMU BAIBULI?

• Ruhanga naayehuzya okushaba kw’abarikumugomera. (Isaaya 1:15) Kwonka, nibabaasa kutereeza enshonga barikuhindura omu mitwarize yaabo.​—Isaaya 1:18.

• Ruhanga kubaasa kugarukamu okushaba, kwine kuba nikuhikaana n’ebi arikutwenza ebiri omu Baibuli.​—1 Yohaana 5:14.

Twine kwecureeza omu muringo gw’omutaano twaba nitushaba?

ABAMWE NIBATEEKATEEKAngu baine kutsimba amaju, kwinika emitwe yaabo, nari kukwatanisa emikono yaabo baaba nibashaba. Iwe nooteekateeka ki?

EKI BAIBULI ERIKWEGYESA

Ruhanga akagarukamu okushaba kw’abo abaamushabire ‘bashutami’ nari ‘beemereire’ nari abo abaabaire ‘bajumaire’ nari ‘batsimbire amaju.’ (1 Obusingye 17:16; 2 Obusingye 30:27; Ezera 10:1; Ebyakozirwe 9:40) Tarikutuha omuringo gumwe ogu tushemereire kwecureezamu twaba nitushaba.

NIKI EKINDI EKI TURIKWEGA OMU BAIBULI?

• Ruhanga naahurikiza okushaba kw’abacureezi. —Zaaburi 138:6.

• Noobaasa kushaba omu rurimi rwona, nari ohunami.—2 Obusingye 6:32, 33; Nehemia 2:1-6.