Dezembro

Nthawe zinango bzingatinese kubvesesa bzomwe Bibliya limbalewa. Ayai pinango Yahova angatawire lini mpembo wathu mu njira yomwe tikhaidikhirira. Bzimwebzi bzingaticitise kupenukira bzomwe timbakhulupira. Tikandokhala tenepo ne kucita cinthu, kupenukirako kungatepese cikhulupiro cathu ndipo kungadzonge uxamwali bwathu na Yahova. (Tiy. 1:7, 8) Ndipo bzimwebzi bzingaticitise kuluza cidikhiro cathu cakutsogolo. Mpostolo Paulo adandendemezera cidikhiro cathu cakutsogolo na ndangula. (Aheb. 6:19) Ndangula imbacitisa kuti xitima ya m’madzi ireke kugwinyiwa na conzi ayai kuti ireke kukagudza bziminyala. Koma ndangulayo imbaphata bwino basa bzikakhala kuti korenti yomwe idaphatirira ku xitimayo iribe kugwatika. Ninga korenti ya ndangula yomwe yagwatika, kupenukira kungatepese cikhulupiro cathu. Munthu akayezedwa na anyakunyoza iye angayambe kupenukira ndipo bzimwebzi bzingamucitise kuluza cikhulupiro comwe anaco cakuti Yahova an’dzakwanirisa bzinthu bzomwe adalewa kutsogolo. Tikaluza cikhulupiro cathu tin’dzaluzambo cidikhiro cathu. Munthu omwe ambabzibva tenepa cipo acidzakhala wakukondwa! w21.02 30 ¶14-15

Pomwe Abalahamu adacoka na banja lace mu mzinda wa Uri, pinango-pentse akhana magole yakupitirira 70. (Ciy. 11:31–12:4) Ndipo kwa magole 100, Abalahamu adakhala m’matendi ndipo adacita ulendo mu dziko la Kanani. Iye adafa pomwe akhana magole 175. (Ciy. 25:7) Tsono iye alibe kuwona Yahova akukwanirisa mpangano omwe adacita naye, mpangano wakupereka dziko lomwe adamuuza kuti angadalipereka kuna mbadwo zace. Ndipo iye alibe kuwona kukhazikisidwa kwa mzinda, omwe ni Umambo bwa Mulungu. Napo bziri tenepo, Bibliya limbalewa kuti pomwe Abalahamu adafa iye akhadakalamba ndipo akhana ‘moyo utali na wabwino.’ (Ciy. 25:8) Napo kuti Abalahamu adagumana na mabvuto mazinji, iye adapitiriza kukhala na cikhulupiro cakulimba ndipo adadikhirira Yahova mwakukondwa. Kodi Abalahamu adakwanisa tani kupirira mabvuto yomwe adagumana nayo? Iye adakwanisa kupirira thangwe Yahova akhamukhotcerera na kumucitira bzinthu ninga xamwali. (Ciy. 15:1; Zai. 41:8; Tiy. 2:22) Ninga Abalahamu, ifepano tikudikhirira mzinda omwe una aliserse caiyo. (Aheb. 11:10) Koma tikudikhirira lini kumangidwa kwa mzindayo. Thangwe Umambo bwa Mulungu budakhazikisidwa kudzulu mu gole la 1914, ndipo tikulewa pano bukutonga kale kudzuluko. (Apok. 12:7-10) Koma ifepano tikudikhirira kuti Umambo bwa Mulungubo butongembo pa dziko lentse la pantsi pano. w20.08 4-5 ¶11-12

Kuti tikhale mtetekeri wabwino, tin’funika kukhala wakubzicepesa na wakupirira. Pana mathangwe matatu yomwe tin’funika kucitira bzimwebzi. Thangwe lakuyamba, tin’dzacepesa mipata yomwe tingakhale nayo ya kumbathamangira kulewa kuipa munthu pomwe tiribe mathangwe yakubveseseka. Thangwe laciwiri, tin’dzabvesesa makumbukidwe ya abale wathu na mathangwe yomwe iwo ambacitira bzinthu bzinango. Ndipo thangwe lacitatu, tin’dzathandiza abale wathu kuti abzidziwe bwino. Nthawe zinango, munthu angabvesese lini bwino-bwino makumbukidwe yace, mpaka atalewa makumbukidweyo. Abale winango bzimbawanesa kufotokoza makumbukidwe yawo. Pinango bzimwebzi bzimbacitika thangwe ra momwe adaleredwera, cikhalidwe cawo ayai thangwe ra cibadwa cawo. Pangatenge nthawe kuti iwo atsudzuke kutifotokozera bzomwe bziri mu mtima mwawo. Koma akatifotokozera ni pomwe tingakwanise kudziwa makumbukidwe yace. Tenepo, tikatewezera kupirira kwa Yahova, abale wathuwo an’dzatikhulupiradi. Ndipo iwo akambatifotokozera makumbukidwe yawo, tin’funika kumbawatetekera bwino-bwino. w20.04 15-16 ¶6-7

Ntsomba kawiri-kawiri zimbakhala pa mbuto yomwe ina madzi yabwino na pomwe zingagumane cakudya mwakusaya kunesa. Kodi nthawe yomwe khombweyo ambayenda ku mkulo kukamedza njakufunika? Pakulewa bza nthawe yabwino yakumedza, onani bzomwe m’bale winango wa ku Pacífico adalewa pomwe adacemera m’misiyonario kuti ayende kukamedza. M’misiyonariyoyo adalewa kuti: “Tiniwonana mangwana, nthawe zipfemba zakumacibese.” Tsono m’baleyo adatawira kuti: “Iwepo ungabvesese lini. Ifepano timbayenda pa nthawe yabwino yomwe tingagumane ntsomba, sikuti pa nthawe yabwino kwa ifepano.” Mpsibodzi-bodzimbo na akhombwe wa m’magole dzana yakutoma omwe akhamedza wanthu, iwo akhayenda kukamedza komwe angakagumane ntsomba na pa nthawe yomwe ntsombazo zingagumanike kumweko. Mwa ciratizo, ateweri wa Jezu akhayenda kukapalizira mu templo, m’masinagoga, nyumba na nyumba na m’misika. (Mab. 5:42; 17:17; 18:4) Ifepanombo tin’funika kuzolowera wanthu omwe ambakhala mu gawo lathu. Ndipo tin’funikambo kufulumiza kuzindikira kuti tikwanise kupalizira komwe tingagumane wanthu na nthawe yomwe tingawagumane.—1Ako. 9:19-23. w20.09 4 ¶8-9

Njira ibodzi yakukulisira uxamwali bwathu na Jezu, ndiyo kuthandizira makonzedwe ya gulu la Yahova. Jezu ni msolo wa gwere, ndipo iye adasankhula wanthu wakuthemera kuti atitsogolere. Tenepo, tikambabvera bzomwe iwo ambatiuza, timbakhala pa uxamwali bwamphanvu na Jezuyo. (Aef. 4:16) Mwa ciratizo, tsapano tikuyezera kuwonesesa kuti Nyumba zathu za Umambo ziphatisidwe basa bwino-bwino. Ndipopa magwere yanango yadaphatanidzidwa. Makonzedweya yacitisa kuti gulu lireke kudzonga kobiri zizinji zomwe abale ambapereka. Thangwe ra bzimwebzi, apalizi winango akhafunika kuzolowerana na kucinjako. Pinango abalewo akhatsonkhana mu gwere libodzi kwa nthawe itali ndipo akhadazolowerana kwene-kwene na abale na mpfumakazi za m’gweremo. Ndipo tsapano iwo akutsonkhana m’gwere lipsa. Jezu ambakomedwa kwene-kwene akawona abale wakukhulupirikawa akuthandizira makonzedwe ya guluya. w20.04 24 ¶14

Mambo wa ku norte na wa ku suli akadapitiriza kukhumbzana kuti awoneke mbani angatonge dziko lentse la pantsi. Mwa ciratizo, pa Nkhondo Yaciwiri ya pa Dziko Lentse la Pantsi, boma la União Soviética pabodzi na madziko yomwe yambalithandiza, lidayamba kutonga madziko mazinji ya ku Europa. Na thangwe limweri, mambo wa ku norte adabverana na madziko yanango, ndipo adakonza thimu la anyankhondo kuti akamenyane na mambo wa ku suli, omwe akhadziwika na dzina lakuti Organização do Tratado do Atlântico Norte (OTAN). Mambo wa ku norte na wa ku suli ambadzonga kobiri zizinji thangwe ra kukonza bzifuzo bza nkhondo bzamphanvu. Ndipo mambo wa ku norte ambathandizira anyamadulanthaka wa mambo wa ku suli, ndipo mambo wa ku suli ambacitambo bzibodzi-bodzibzo. Bzimwebzi bzidacitika kale ku África, Ásia na ku América Latina. M’magole yano, boma la Rússia pabodzi na madziko yomwe yambabverana nalo, akhala wamphanvu kwene-kwene pa dziko lentse la pantsi. Iwo ambanesana na mambo wa kummwera mwakuphatisa basa komputadori. Ndipo wamambowo ambalewana kuti akuphatisa basa programa za mu komputadori kuti adzonge cuma na nkhani za ndale za maboma yawoyo. Ndipo ninga momwe Danyeri adalewera, mambo wa ku norte akadapitiriza kuzunza atumiki wa Mulungu.—Dan. 11:41. w20.05 13 ¶5-6

‘Kodi mkazi angayebwe mwana wace?’ Umweyu ni mbvunzo omwe Yahova adaucita mu ntsiku za mpolofeta Zaiya. Iye adatsimikizira wanthu wace kuti: ‘Napo akaziwa angayebwe, ine cipo ningakuyebweni lini.’ (Zai. 49:15) Ni nthawe lini zentse zomwe Yahova ambabzindendemezera na mai, koma pa nthaweyi iye adacita bzimwebzo. Mwakuphatisa basa lufoyi lomwe liripo pakati pa mai na mwana wace, Yahova akhafuna kulatiza kuti lufoyi lomwe analo kuna atumiki wace ndikulu kwene-kwene. Azimai azinji an’tawiriza mafala yomwe mpfumakazi Jasmine idalewa, iyo idati: “Mai akakhala na mwana, lufoyi lace kwa mwanayo limbakhala lamphanvu kwene-kwene.” Yahova ambadziwa bzikakhala kuti m’bodzi wa wana wace aleka kutsonkhana na kupalizira, ndipo bzimwebzi bzimbamusunamisa kwene-kwene. Abale na mpfumakazi zizinji zomwe zimbadjedjera mwauzimu ambabwerera m’gwere ndipo ifepano timbawatambira na manja mawiri! Yahova akufuna kuti iwo abwerere m’gulu lace, ndipo ifepano tikufunambo bzimwebzo.—1 Pe. 2:25. w20.06 18 ¶1-3

Ni mphaso lini zentse zomwe tingaziwone na maso. Tenepo, mphaso zakufunika kwene-kwene tingakwanise lini kuziwona. Pa nkhani ya pa Phiri, Jezu adalewa kuti mphaso zakudzulu zimbaposa cuma. Ndipo iye adapitiriza kulewa kuti: ‘Komwe kuna cuma cako, mtima wako umbakhala uli kumweko.’ (Mat. 6:19-21) Tikambawona cinthu cinango kukhala cakufunika kwene-kwene, timbacita muno na muno kuti tikhale naco. Tsono kodi tingacite tani kuti tikhale na ‘cuma kudzulu’? Mwa kukhala na dzina la bwino na mbiri yabwino, pamaso pa Mulungu. Ndipo ninga momwe Jezu adalewera, cuma ca kudzulu cin’dzadzongeka lini ne kubewa. Mpostolo Paulo akutilimbikisa kuti ‘[timbanyang’anisise] bzinthu bzakusaya kuwoneka na maso.’ (2Ako. 4:17, 18) Mphaso zakusaya kuwoneka zimbaphatanidza bzinthu bzentse bzabwino bzomwe Mulungu an’dzatipasa m’dziko lipsa. Koma pana mphaso zinango zakusaya kuwoneka zomwe Mulungu angatipase ntsiku zino. Kodi tingalatize tani kuti timbatenda mphaso zakusaya kuwonekazi? w20.05 26 ¶1-2

Bzinthu bzomwe Mozeji adapfunzisa Ajirayeri bzidalimbisa cikhulupiro cawo ninga momwe nvula imbathandizira miti kuti ikule bwino. Bzimwebzi ndibzo bzomwe tin’funika kucita tikambapfunzisa winango. Mukambapalizira nyumba na nyumba na mu mseu, mun’funika kumbalatiza wanthu dzina la Mulungu lomwe ni Yahova lomwe liri m’Bibliya. Mbaphatisanimbo basa mabukhu, mavidiyo na nkhani zomwe ziri pa webisaite yathu zomwe zimbafotokoza momwe Yahova aliri. Ndipo mukakhala muli ku basa, kuxikola na pomwe muli pa ulendo, mbanyang’anani mpata wakuti mumbauze wanthu bza Mulungu na momwe iye aliri. Mbawauzani bzinthu bzabwino bzomwe Yahova an’dzaticitira kutsogoloku. Ndipo iwo akabvesesa bzinthu bzimwebzi, an’dzazindikira kuti Yahova ambatifuna kwene-kwene. Tenepo, tikambauza wanthu winango cadidi cakulewa bza Baba wathu wa lufoyi, timbakhala tikuthandizira kucenesedwa kwa dzina la Mulungu, kugaza magunkha yomwe yambapswipiza dzinalo na bzipfunziso bzakunama bzomwe wanthuwo adapfunza pakulewa bza Yahova. Bzomwe ifepano timbapfunzisa wanthu kucokera m’Bibliya, bzimbawatsangalaza kwene-kwene.—Zai. 65:13, 14. w20.06 10 ¶8-9

Kodi tin’funika kukhala na makhalidwe yaponi kuti tithandize wale omwe akufuna kubwerera kwa Yahova? Onani bzomwe tingapfunze na ciratizo ca Jezu cakulewa bza mwana omwe adacoka pamui. (Luka 15:17-24) Jezu adafotokoza bzomwe bzidacitika na mwanayo pomwe adagumana na mabvuto acikhumba kubwerera kumui. Baba wace adamuthamangira ndipo adamukumbatira mwamphanvu, bzomwe bzidalatiza kuti akhamufuna mwanayo. Mwanayo adabzipasa mulandu ndipo adakumbuka kuti akhathemera lini pomwe kuwonedwa ninga mwana wa pamuipo. Babayo adamubvera ntsisi ndipo adalatizambo kuti akhabvesesa bzomwe bzikhadacitika na mwanayo. Tenepo babayo adacita bzinthu bzinango bzomwe bzidalatiza mwanayo kuti adamutambira na manja mawiri ninga mwana omwe ambamufuna. Kuti alatize kuti ambamufuna, babayo adakonzera madyo mwana wace wakukungulayo ndipo adamupasa bzakubvala bzabwino kuti abvale. Yahova ali ninga baba wa mu ciratizoci. Iye ambafuna abale na mpfumakazi zathu ndipo akufuna kuti iwo abwerere kwa iye. Ifepano tikatewezera Yahova tin’dzathandiza abalewo kubwerera kwa iye. Kuti bzimwebzi bzikwanisike tin’funika kukhala wakupirira, wa ntsisi na walufoyi. w20.06 25-26 ¶8-9

Jezu adalewa bza wanthu omwe angadadzabvuma cadidi ‘mwakukomedwa,’ koma na kupita kwa nthawe angadadzaluza cikhulupiro pa nthawe ya mayezo. (Mat. 13:3-6, 20, 21) Pinango bzimwebzi bzimbacitika thangwe ra kusaya kubvesesa kwawo kuti kutewera Jezu kumbaphatanidza kulimbana na mayezo pabodzi na mabvuto. (Mat. 16:24) Pinango iwo akhakumbuka kuti Mkristau ambabonera lini, koma ambakhala na moyo wakudzala na bzisimbo. Tsono mu dziko lakuipali tentse timbagumana na mabvuto. Ndipo bzinthu bzinango bzikacinja pa moyo wathu, tingaluze cikondweso. (Sal. 6:6; Mpal. 9:11) Abale na mpfumakazi zathu ambapenukira lini kuti acigumana cadidi. Thangwe ranyi tikulewa tenepoyo? Thangwe palibe comwe cimbawaceukisa, napo penu Mkristau mwanzawo awaphonyera ayai wacita pikado. (Sal. 119:165) Mayezo yali-yentse yomwe abalewa ambagumana nayo yambawacitisa kuti cikhulupiro cawo cilimbe m’mbuto mwakutepa. (Tiy. 1:2-4) Tin’funika kukhala na cikhulupiro cakulimba. w20.07 8 ¶1; 9 ¶4-5

Pomwe mukanati kuyamba kuwerenga Bibliya, pembani kwa Yahova kuti akuthandizeni kugumana phindu na bzomwe muniwerengabzo. Mwa ciratizo, penu mukunyang’ana malango yomwe yangakuthandizeni kukunda bvuto lomwe mukugumana nalo, kumbirani Yahova kuti akuthandizeni kugumana nfundo m’Bibliya, zomwe zingakuthandizeni kusankhula mwanzeru bzomwe mun’funika kucita. (Afil. 4:6, 7) Yahova adatipasa luso lakudabwisa lomwe limbatithandiza kuyezezera bzinthu. Kuti mukwanise kubvesesa bzomwe mukuwerenga, yezezerani bzomwe bzikucitikabzo ndipo bziwoneni kuti ndimwe munthu omwe akufotokozedwa mu nkhaniyo. Yezerani kuwona bzomwe munthuyo adawona ndipo yezeranimbo kubva momwe iye adabvera. Patsogolo pace kumbukirani nkhanizo. Kukumbukira kumbathandauza kuyezera kubvesesa bzomwe mwawerenga na momwe mungabziphatisire basa pa moyo wanu. Bzimwebzi bzimbakuthandizani kubveranisa makumbukidwe na kubvesesa bwino bzomwe mukuwerengabzo. Kuwerenga Bibliya ticisaya kukumbukira, kuli ninga kuphika cisayi uko tiribe ngwedegero zinango. Tikasaya kuikha ngwedegero zentse, cisayico cingakhale lini na goso. Tenepo kukumbukira kungatithandize kubvesesa nkhani yentse yomwe mukuwerengayo. w21.03 15 ¶3-5

Bzingadakhala kuti mpostolo Paulo akhakumbukira moyo omwe akhanawo kale-kale, iye angadakhala lini Mkristau wakubzipereka pa basa lakupalizira ndipo angadafika lini pa kumangidwa. Iye angadabva ukali na amuna omwe adamusiya yekha ku Ásia, ndipo angadasiya kukhulupira axamwali wace. Tsono Paulo alibe kucita bzimwebzi. Napo kuti Paulo akhadziwa kuti akhadasala pang’ono kuphedwa, iye alibe kuyebwa kuti mpsakufunika kwene-kwene kutumbiza Yahova. Ndipo iye adapitiriza kukumbukira momwe angadalimbisira winango. Iye adakhulupira Yahova mwa kumbapemba kawiri-kawiri. Paulo alibe kundokhalira kumbakumbukira abale omwe adamuthawa, m’mbuto mwace, iye adatenda axamwali wakukhulupirika omwe adamuthandiza mu njira zakusiyana-siyana. Kuthimizira bzimwebzi, Paulo adapitiriza kupfunza Fala la Mulungu. (2 Tim. 3:16, 17; 4:13) Cinthu cakufunika kwene-kwene comwe iye akhatsimikiza n’cakuti Yahova na Jezu akhamufuna. w21.03 18 ¶17-18

M’magole 100 yakuyambirira, mu gwere lacikristau mudayamba kudzala wanthu omwe akhapfunzisa bzinthu bzakunama, ndipo akhabisa cadidi ca m’Fala la Mulungu. Tenepo, kuyambira gole limwero mpaka mu 1870, Mulungu akhalibe gulu lace lakulinganizidwa pa dziko la pantsi. Tenepo, Akristau wakunama adadzawanda kwene-kwene ninga nyakasongole m’munda, ndipo bzimwebzi bzidacitisa kuti bzikhale bzakunesa kuzindikira kuti mbani Akristau wacadidi. (Mat. 13:36-43) Thangwe ranyi mpsakufunika kudziwa bzimwebzi? Thangwe bzomwe timbawerenga pa Danyeri kapitulo 11 bzimbatithandiza kudziwa kuti kuyambira mu gole 100 mpaka 1870, pa maboma yomwe yakhatonga mu nthawe imweyire, palibe boma lomwe likhacita bzinthu kuti lithemere kukhala mambo wa kumpoto (norte) ayai mambo wa kummwera (sul), thangwe pakhalibembo gulu lakulinganizidwa la atumiki wa Mulungu kuti limbazunzidwembo na iwo. Tsono pambuyo pa gole la 1870, bzidadzakwanisika tsapano kuzindikira kuti mbani mambo wa kumpoto, mbani mambo wa kummwera. w20.05 3 ¶5

Djoweri akhadaleweratu kuti dzombe lingadapfudza dziko la Jirayeri ndipo iro lingadadzadya bzinthu bzentse bzomwe Ajirayeri angadadzabzala! (Djow. 1:4) Kwa magole mazinji, ifepano tikhabvesesa kuti polofesiyayi ikhalewa bza momwe wanthu wa Yahova akhacitira basa lawo lakupalizira. Ndipo basalo likhandendemezeredwa na dzombe lomwe limbakhotceka lini. Tikhabvesesambo kuti basalo lingadatokonya kwene-kwene ‘dziko,’ ayai wanthu wakutsogoleredwa na akulu-akulu wa bzipembedzo. Koma tikawerenga polofesiya yentse ya Djoweri, tiniwona kuti tin’funika kucinja kabvesesedwe kathu. Onani bzomwe Yahova adalewa pa nkhani ya dzombe. Iye adati: ‘Nin’dzakufundusirani kutali [dzombe] lomwe likubwera kucokera kumpoto.’ (Djow. 2:20) Tsono penu dzombero ni Mboni za Yahova, omwe ambabvera lamulo la Jezu lakupalizira na kupfunzisa wanthu, thangwe ranyi Yahova adalewa kuti angadawafundusa kutali? (Zakiy. 33:7-9; Mat. 28:19, 20) Bzikuwonekeratu padeca kuti Yahova ambafundusa, sikuti atumiki wace wakukhulupirika, koma wale omwe ambafuna kucita kuipa atumiki wacewo. w20.04 2-3 ¶3-5

Kodi tin’funika kucita ciyani tikawona kuti Yahova akutawira lini mpembo wathu pa nthawe imweyoletu? Tiyago adalewa kuti ‘pitirizani kumbakumbira’ Mulungu. Yahova ambaneta lini ifepano tikambapitiriza kumukumbira nzeru. Ndipo iye cipo acidzatikalipira. Baba wathu wakudzulu ambapasa na mtima wentse tikambapemba kuti atipase nzeru, kuti tipirire mabvuto yathu. (Sal. 25:12, 13) Iye ambawona mabvuto yathu ndipo bzimbamuwawa kwene-kwene akambatiwona tikubonera. Ndipo kudziwa bzimwebzi kumbatikondwesa! Tsono, kodi Yahova ambatipasa tani nzeru? Ambatipasa nzeru mwakuphatisa basa Fala lace. (Mim. 2:6) Kuti tikhale na nzeruzo tin’funika kumbapfunza Fala la Mulungu pabodzi na mabukhu yathu. Koma tin’funika kucita bzinthu bzizinji sikuti kundopfunza basi. Tin’funika kumbacita bzinthu bzomwe Mulungu ambatiuza kuti timbacite. Tiyago adanemba kuti: “Mbacitani bzomwe Fala la Mulungu limbalewa, sikuti kumbandobva basi.” (Tiy. 1:22) Tikambaphatisa basa malango ya Mulungu, timbakhala na mtendere, timbacita lini bzinthu mwakupitirira malire, ndipo timbakhalambo wanthu wa ntsisi. (Tiy. 3:17) Makhalidwe yamweya yambatithandiza kupirira mabvuto yali-yentse, ticipitiriza kukhala wakukondwa. w21.02 29 ¶10-11

Nyakupfunza wa Bibliya angacinje mwakamfulumize mpaka kufika pa kubatizidwa, akathandizidwambo na abale winango m’gwere. Mpalizi ali-wentse angathandize nyakupfunza wa Bibliya ali-wentse kuti acitembo mbali ya gwere. Mpainiya munango adati: “Mwani unango umbalewa kuti pambafunika mudzi kuti mwana akule. Mwani umweyi umbaphatisidwambo basa pomwe tikupfunzisa wanthu, pambafunikira gwere kuti munthu adziwe cadidi.” Wanthu wa m’banja mwace, axamwali na apfunzisi wace, wentse ana ugo bwakupfunzisa mwanayo kuti akule bwino. Iwo ambacita bzimwebzo mwa kumuthandiza mwanayo na kumupfunzisa bzinthu bzakufunika. Mpsibodzi-bodzimbo, abale na mpfumakazi m’gwere, angapase malango kulimbisa na kulatiza khalidwe la bwino kwa nyakupfunza kuti amuthandize kuyenda patsogolo acifika pa kubatizidwa. (Mim. 15:22) Thangwe ranyi mpsakufunika mpalizi kukomedwa pomwe abale winango m’gwere akuthandiza nyakupfunza wace wa Bibliya? Thangwe wanthu wazinji angathandize kuti nyakupfunza wa Bibliyayo akule mwauzimu. w21.03 8 ¶1-3

Mkristau ali-wentse, napo tswaka ayai mkulu an’funika kucita ciri-centse kuti aleke kukhala na moyo wakugawanika. Mpostolo Juwau adalewa kuti tin’funika lini kufamba m’cadidi ndipo pa nthawe ibodzi-bodziyo ticikhala na moyo wapezi-pezi. (1 Ju. 1:6) Penu tin’funa kuti Yahova atibvume lero na kutsogolo, tin’funika kudziwa kuti iye ambawona bzentse bzomwe timbacita. Kulewa cadidi palibe pikado zakubisika, thangwe kwa iye ‘bzinthu bzentse bziri padeca.’ (Aheb. 4:13) Tin’funika kulamba nzeru ya dziko pa nkhani yakulewa bza pikado. Mu nthawe ya Juwau, anyakupanduka akhalewa kuti munthu angacite pikado utowa koma acipitiriza kukhala xamwali wa Mulungu. Ntsiku zino wanthu ana nzeru zibodzi-bodzizi. Wanthu azinji ambalewa kuti ambakhulupira Mulungu, koma iwo ambabverana lini na bzomwe iye ambalewa pa nkhani ya pikado, maka-maka pa nkhani ya kugonana. Bzomwe Yahova ambalewa kuti ni pikado, iwo ambalewa kuti ni pikado lini, koma n’cakusankhula ca munthu ali-wentse payekha. w20.07 22 ¶7-8

Kodi imwepo mumbakhotcerera mpfumakazi zanu pomwe iwo akufunikira? Mwa ciratizo, tiyezezere kuti apalizi winango akuwona kuti mpfumakazi yomwe mwamuna wace ni mboni lini, kawiri-kawiri imbafika mwakucedwa pa mitsonkhano ndipo ikamala mitsonkhanoyo imbakulumiza kubwerera kumui. Ndipo apaliziwo ambawonambo kuti kawiri-kawiri mpfumakaziyo imbabwera lini pa mitsonkhanopo na wana wace. Tenepo, iwo akuipasa mulandu thangwe ra kukumbuka kuti mpfumakaziyo in’funika kuuza bayace kuti aibvumize kumbayenda ku mitsonkhano na wana. Tsono iwo akudziwa lini kuti mpfumakaziyo imbacita ciri-centse comwe imbakwanisa kucita. Mpfumakaziyo imbakwanisa lini kuphatisa bwino basa ndandanda wace, ndipo ndiyo lini yokha yomwe imbalewa bzomwe wanawo ambafunika kucita. Mukambakumbukira basa lentse lomwe mpfumakaziyo ikucita na nyongo, mun’dzafotokozera wanthuwo bza basalo ndipo iwo an’dzasiya kuipasa mulandu. Akulu ambadziwa kuti Yahova ambafuna kuti mpfumakazi zimbasamaliridwe bwino. (Tiy. 1:27) Iwo ambatewezera Jezu ndipo ambacita bzinthu mwakusaya kupitirira malire. Tenepo iwo ambacita bzimwebzi mwa kutcenkha kukhazikisa malamulo pa bzinthu bzomwe bziribe lamulo lakucita kunembedwa. (Mat. 15:22-28) Akulu wa gwere akambacita nyongo yakuthandiza mpfumakazi zawo, izo zimbabzibva kuti zimbafunidwa na gulu la Yahova. w20.09 24-25 ¶17-19

Mpolofeta Danyeri akhali mtumiki wakubzicepesa wa Mulungu, ndipo nthawe zentse akhakumbira Yahova kuti amupase nzeru. Pomwe adaphatisidwa basa na Yahova pa kuthumbudzula matulo ya Nabukadinazori, Danyeri alibe kufuna kutumbizidwa. M’mbuto mwace iye adatumbizisa Yahova. (Dan. 2:26-28) Kodi tikupfunza ciyani na nkhaniyi? Tikatendedwa thangwe rakuti tafotokoza bwino nkhani ayai thangwe rakuti tapalizira bwino, tin’funika kutumbizisa Yahova. Tin’funika kubzicepesa ticizindikira kuti mwa ife tekha tingadakwanisa lini kucita cinthu bzingadakhala kuti Yahova alibe kutithandiza. (Afil. 4:13) Tikambacita bzimwebzi timbakhala tikutewezera sikuti Danyeri yekha, koma timbakhala tikutewezerambo Jezu. Jezu adalatiza kuti akhathemba Yahova. (Ju. 5:19, 30) Iye alibe kuyeza kupsokonyola utongi bwa Baba wace. Pa Afilipi 2:6 pambalewa kuti Jezu ‘alibe kukumbuka bza kutenga udindo bwa Mulungu kuti bukhale bwace, ayai kufuna kukhala wakundendemerana na Mulunguyo.’ Ninga mwana wakubvera, Jezu akhadziwa kuti anamalire ndipo akhalemekeza udindo bwa Baba wace. w20.08 11 ¶12-13

Winango omwe akuthamanga mu njira yomwe ikuwatsogolera ku moyo, akugumana na mabvuto yomwe winango angakwanise lini kuyawona ndipo angayabvesese lini. Penu imwepo mumbatazira kucita bzinthu bzinango thangwe ra kupunduka, ciratizo ca Mefibozeti cingakuthandizeni kukhala wamphanvu. (2 Sam. 4:4) Iye akhali wakupunduka, ndipo adayeruzidwa mwakusaya cirungamo na Mambo Davide. Napo bzikhali tenepo, iye alibe kubvuma kuti makumbukidwe yakuphonyeka yamubwerere mu mtima mwace, koma akhandokumbukira bzinthu bzabwino bzomwe bzikhacitika pa moyo wace. Ndipo akhatenda kudeka mtima komwe Davide akhamulatiza nthawe za m’mbuyo. (2 Sam. 9:6-10) Ndipopa pomwe Davide adamuyeruza mwakusaya cirungamo, Mefibozeti adayezera kukumbukira bzinthu bzentse bzabwino bzomwe Davideyo akhamucitira. Iye alibe kubvuma kuti kuphonya kwa Davide kumucitise kukhala munthu waukali. Ndipo alibe kupasa mulandu Yahova thangwe ra kuphonya kwa Davide. Koma adacita ciri-centse kuti athandizire mambo wakusankhulidwa na Yahova. (2 Sam. 16:1-4; 19:24-30) Yahova adawona kuti ciratizo cabwino ca Mefibozeti cinembedwe m’Bibliya, kuti citithandize ntsiku zino.—Aro. 15:4. w20.04 26 ¶3; 30 ¶18-19

M’gwere alipombo omwe akutumikira ninga amisiyonario, apainiya wakupambulika ayai apainiya wakukhazikika. Iwo asankhula kupalizira na kupfunzisa wanthu bibliya nthawe zentse, ndipo limweri ni basa la moyo wawo wentse. Napo kuti atumiki wa nthawe zentse kawiri-kawiri ambakhala alibe bzinthu bzizinji bzakuthupi, Yahova ambawapasa bzisimbo bzizinji. (Marko 10:29, 30) Ifepano timbafuna kwene-kwene abale na mpfumakazi amwewa, ndipo timbatenda thangwe ra iwo kucita mbali ya gwere! Kodi omwe ana mbuto mu gwere ni abale okha omwe ana maudindo ayai omwe ali akucita utumiki bwa nthawe zentse? Nee n’tenepo lini! Mpalizi ali-wentse wa bzipsa bzabwino n’gwakufunika kwa Yahova na m’gwere. (Aro. 10:15; 1Ako. 3:6-8) Tin’funika kukumbukira kuti cakulinga ca gwere, n’cakufuna kuthandiza wanthu kuti akhale anyakupfunza wa Mbuya wathu Jezu Kristu. (Mat. 28:19, 20; 1 Tim. 2:4) Wentse omwe ambapalizira, abale wakubatizidwa na wakusaya kubatizidwa, ambawona basa lakupalizira kukhala cinthu cakufunika kwene-kwene pa moyo wawo.—Mat. 24:14. w20.08 21 ¶7-8

Ninga momwe yakulatizira mafala ya m’vesi la leroya, Jezu an’dzatithandiza nthawe zentse. Kulewa cadidi, mafala ya Jezuya yambatilimbikisa kwene-kwene. Thangwe ranyi? Thangwe tikukhala mu ntsiku zakunesa ndipo timbagumana na mabvuto mwakuti bzimbatinesa kupirira. Mwa ciratizo, munthu omwe timbamufuna akafa timbawawidwa kwene-kwene mu mtima, ndipo timbakhala tidasunama kwa nthawe itali ayai kwa magole mazinji; ndipo winango akulimbana na mabvuto yomwe yambabwera thangwe ra kukalamba ndipo winango akulimbana na msunamo pa moyo wawo. Napo bziri tenepo ifepano timbalimbikisidwa thangwe ra kudziwa kuti Jezu ali nafe pabodzi ‘ntsiku zentse’ kuphatanidzambo ntsiku zakunesa za pa moyo wathu. (Mat. 11:28-30) Fala la Mulungu limbatiuza kuti Yahova ambatithandiza mwakuphatisa wanjo wace. (Aheb. 1:7, 14) Mwa ciratizo, wanjo ambatithandiza tikakhala tikupalizira ‘mafala yabwino ya Umambo’ kuna wanthu wa ‘mtundu uli-wentse, dzinza, cirewedwe na mbumba.’—Mat. 24:13, 14; Apok. 14:6. w20.11 14 ¶6-7

Ifepano tin’funa kuti nyakupfunza wanthu abvesese kuti bzomwe iye akupfunzabzo bzikucokera m’Fala la Mulungu. (1 Ates. 2:13) Kodi tingacite tani bzimwebzi? Mwa kumulimbikisa kuti iye afotokoze bzinthu bzomwe akupfunza. M’mbuto mwa kumbandokhalira kumufotokozera bzinembo, muuzeni kuti akufotokozerenimbo bzomwe iye ambabzidziwa. Muthandizeni nyakupfunza wanuyo kuwona momwe Fala la Mulungu lingamuthandizire pa moyo wace, ndipo mukamala mubvunzeni mibvunzo yomwe ingamuthandize kufotokoza bzomwe akukumbuka, na momwe akubvera, na bzinembo bzomwe ambawerenga. (Luka 10:25-28) Mwa ciratizo, mubvunzeni kuti: “Kodi cinembo cimweci cikukuthandizani tani kuwona khalidwe la Yahova?” “Kodi bzinthu bzomwe mwawerenga m’Bibliya bzingakuthandizeni tani?” “Kodi mukubzibva tani na bzomwe mukupfunza?” Bziribe basa kuti iye ambadziwa bzinthu bzingasi penu bzizinji ayai bzing’ono-ng’ono koma cakufunika ni lufoyi lomwe analo pa bzomwe iye akupfunzabzo na kuwona momwe angabziphatisire basa pa moyo wace. Tenepo, siyani Bibliya kuti lipfunzise munthuyo ndipo mun’funika kukhala wakubzicepesa kuti mukulise luso lanu lakupfunzisa. w20.10 15 ¶5-6

Tingatsimikize kuti basa lakupalizira bza Umambo bwa Mulungu lin’dzamala pa nthawe yace. Kumbukirani bzomwe bzidacitika mu ntsiku za Nowa. Yahova adalatiza kuti ambacita bzinthu pa nthawe yace. Kwa magole 120 cigumula cikanati kucitika, Yahova adaikhiratu ntsiku yomwe cigumulaco cingadadzacitika. Ndipo na kupita kwa magole, Yahova adauza Nowa kuti akonze cingalawa. Pinango pentse Nowa adamala magole 40 ayai 50 akuphata basa mwaphanvu cigumula cikanati kuyamba. Napo kuti wanthu azinji akhafuna lini kumutetekera, Nowa adapitiriza kupalizira mafala yakucenjeza wanthuwo mpaka pa nthawe yomwe Yahova adamuuza kuti apite m’cingalawa. Ndipo pa nthawe yace Yahova ‘adafunga msuwo’ wa cingalawaco. (Ciy. 6:3; 7:1, 2, 16) Tsapanopapa Yahova an’tiuza kuti basa lakupalizira bzipsa bzabwino bza Umambo lamalira pano. Ndipo iye an’pfudza dziko la Sathaniri acibweresa dziko lipsa lomwe lin’dzadzala na wanthu omwe ambabvera Mulungu. Pomwe tikudikhirira nthaweyo, bwerani titewezere ciratizo ca Nowa na ca wanthu winango omwe alibe kupumisa boko lawo. Ikhani makumbukidwe yanu pa basa lakupalizira, pirirani, limbisani cikhulupiro canu kwa Yahova na pa bzomwe iye an’dzacita kutsogolo. w20.09 13 ¶18-19

Bzingadakhala kuti Yahova alibe kukhazikisa utsogoleri, banja lace lingadakhala lakusaya kulinganizika na lakusaya kukondwa. Mwa ciratizo, palibe omwe angadadziwa kuti ni mbani omwe an’funika kusankhula bzakucita na kutsogolera bzomwe bzasankhulidwabzo. Penu mpsabwino kuti mwamuna ambakhale mtsogoleri m’banja, n’thangwe ranyi akazi azinji ambabzibva kuti ambaboneresedwa ndipo ambasamaliridwa lini bwino na abayawo? Thangwe ndakuti amuna azinji ambabvera lini mitemo ya Yahova yakulewa bza banja, ndipo iwo ambasankhula kuteweza miyambo ayai bzikhalidwe bza dziko lawo. Nthawe zinango iwo ambaboneresa akazawo thangwe ra kufuna kukwanirisa bzikhumbo bzawo bzakuipa. Mwa ciratizo, mwamuna angabonerese mkazace thangwe ra kufuna kuti mkaziyo ambamugope kwene-kwene, ayai thangwe ra kufuna kubziwonesa kuna wanthu kuti ndiye omwe ambatonga pamuipo. Iye angakumbuke kuti an’funika lini kungingimiza mkazaceyo kuti ambamufune, koma angacite cinthu comwe cingacitise mkaziyo kuti ambamugope. Ndipo iye pinango angalokotere manthayo ninga njira yakumbaboneresera nayo mkazaceyo. Amuna omwe ambakumbuka mwa njira imweyi na kucita bzimwebzi, ambalemekeza lini akazawo ninga momwe bzimbafunikira, ndipo bzomwe iwo ambacitabzi bzimbapitaniratu na bzomwe Yahova ambafuna.—Aef. 5:25, 28. w21.02 3 ¶6-7

Mukakhala kuti mukucita thupo na bvuto linango, mbapembani kwa Yahova kuti akuthandizeni. Ndipo Yahovayo angakutawireni mwakukupasani “mtendere wace omwe wanthu angaubvesese lini.” (Afil. 4:6, 7) Yahova ambatithandiza kukhala wakuderekha, mwakuphatisa basa mphanvu yace ya mzimu wakucena. (Agal. 5:22) Mukakhala kuti mukupemba kwa Yahova, mbamufotokozerani momwe mukubvera mu mtima mwanu. Muuzeni bvuto lanulo ndipo mufotokozerenimbo momwe imwepo mukubvera. Ndipo penu mukuwona kuti pana njira yomwe ingakuthandizeni kumalisa bvutolo, mbakumbirani Yahova kuti akupaseni nzeru, kuti mudziwe bzomwe mungacite na mphanvu yakuti mucitire bzimwebzo. Tsono penu mukuwona kuti palibe comwe mungacite kuti mumalise bvutolo, mbakumbirani Yahova kuti akuthandizeni kuleka kukhala na thupo kwene-kwene. Mukambafokoza bzomwe bzikukunesani, mun’dzakwanisa kuwona momwe Yahova akutawirira mpembo wanu. Ndipo mukawona kuti mpembo wanu ukucedwa kutawiridwa, pitirizani kupembako. Yahova ambandofuna lini kuti timbamufotokozere bzomwe bzimbatinesa, koma iye ambafunambo kuti timbapitirize kuipempherera nkhaniyo.—Luka 11:8-10. w21.01 3 ¶6-7

M’gwere muna mabanja yakusiyana-siyana. Koma napo bziri tenepo, m’gweremo munambo abale na mpfumakazi omwe ali lini pa banja. Kodi tin’funika kumbawawona tani omwe akanati kulowola ayai kulowodwa? Onani bzomwe Jezu akhakumbuka pa nkhani imweyi. Pomwe iye akhali pano pa dziko la pantsi, alibe kulowola. Iye adapitiriza kukhala wakusaya kulowola ndipo adaphatisa basa nthawe na mphanvu zace pa utumiki bwace. Jezu alibe kulewa kuti kukhala wakusaya kulowola ayai kukhala na banja ni nkhani yakucita kungingimizana. Koma iye adalewa kuti Akristau winango angadadzasankhula kusaya kulowola ayai kulowodwa. (Onani mafala ya m’nyantsi pa Mateu 19:12.) Jezu akhalemekeza wale omwe akhali lini pa banja. Iye akhakumbuka lini kuti wanthu omwe alibe banja mbakusalira, nee kuwawona ninga wanthu omwe akhaluza cinthu cabwino. Tenepo ninga Jezu, mpostolo Paulo adasankhula kupitiriza kutumikira Mulungu ali khowa. Iye alibe kulewa kuti bzikhali bzakuphonyeka Mkristau kulowola ayai kulowodwa, thangwe akhazindikira kuti cimweci ni cakusankhula ca munthu ali-wentse payekha. w20.08 28 ¶7-8

Mpostolo Juwau adakhala na moyo magole mazinji ndipo bzinthu bzizinji bzidamucitikira. Iye adagumana na mayezo mazinji, yomwe yangadatepesa cikhulupiro cace. Tsono iye adacita bzentse bzomwe angadakwanisa kuti abvere malamulo ya Kristu, kuphatanidzambo lamulo lakulewa bza kufuna abale wace. Ndipopa, Juwau akhana citsimikizo centse cakuti Yahova na Jezu akhamufuna, nakuti angadamupasa mphanvu yakuti akwanise kupirira mabvuto yomwe akhagumana nayo. (Ju. 14:15-17; 15:10) Palibe comwe Sathani pabodzi na dziko lace angadacita kuti atazise Juwau kufuna abale wace na kulatiza lufoyi m’mafala na m’bzicito. Ninga Juwau, ifepano tikukhala mu dziko la kutongedwa na Sathani momwe muna wanthu omwe ambafuna lini wanthu anzawo. (1 Ju. 3:1, 10) N’cadidi kuti Sathani ambafuna kuti ifepano tisiye kufuna abale wathu. Tsono iye angakwanise kucita bzimwebzi ifepano tikamulekerera. Na tenepo, tsimikizani kufuna abale wanu ndipo latizani lufoyi mwa mafala na bzomwe mumbacita. Tenepo, imwepo mukacita bzimwebzi, mun’dzakondwa kwene-kwene thangwe ra kucita mbali mu banja la Yahova, ndipo moyo wanu un’dzakhala na thandauzo.—1 Ju. 4:7. w21.01 13 ¶18-19

Moyo ngwakunesa kwene-kwene m’dziko lomwe likutongedwa na Sathani, ndipo nthawe zinango ifepano timbataza kuti tin’phata muti wanyi. (2 Tim. 3:1) Tsono tin’funika lini kukhala na thupo ayai na mantha, thangwe Yahova ambawona mabvuto yomwe timbagumana nayo. Ndipo tikagwa iye akulewa kuti an’dzatiphata mwamphanvu na boko lace lamadidi. (Zai. 41:10, 13) Tenepo, mbatitsimikizeni kuti Yahovayo an’tithandiza, ndipo mavesi ya m’Bibliya yan’tipasa mphanvu kuti tikwanise kukunda mabvuto yali-yentse yomwe tingagumane nayo. Mavidiyo yathu, madrama ya audiyo, pabodzi na nkhani zomwe ziri mu bukhu lakuti “Tsanzirani Chikhulupiriro Chawo,” bzimbatithandiza kuwona nkhani za m’Bibliya kukhala za moyo. Mukafuna kuwona vidiyo ayai kuwerenga nkhani zomwe mwazifufudza, mukumbireni Yahova kuti akuthandizeni kugumana nfundo yakufunika kwene-kwene yomwe mungaiphatise basa. Bziyezezereni mwekha kuti ndimwe wanthu omwe akutofokozedwa mu nkhaniyo, ndipo kumbukirani bzomwe atumiki wakukhulupirika wa Yahovawo adacita na momwe iye adawathandizira kukunda mabvuto yawo. Mukamala phatisani basa bzomwe mukupfunzabzo pa moyo wanu. Tendani Yahova thangwe ra thandizo lomwe iye ambakupasani kale. Ndipo latizani kuti mumbatenda thandizolo mwa kumbanyang’ana njira zomwe zingakuthandizeni kuti mumbalimbise na kumbathandizambo wanthu winango. w21.03 19 ¶22-23

Penu imwepo muli pa banja ndipo mukufuna kukhala na wana, bzibvunzeni kuti: ‘Kodi ndife wakubzicepesa ndipo timbafuna Yahova na Fala lace? Kodi ndife wanthu omwe Yahova angadawasankhula kuti asamalire wana omwe ni mphaso yakucokera kwa iye?’ (Sal. 127:4) Tsono penu ndimwe kale m’bereki, bzibvunzeni kuti: ‘Kodi nimbapfunzisa wana wangu kuti ambawone kuti mpsabwino kuphata basa na nyongo?’ (Mpal. 3:12, 13) ‘Kodi nimbacita ciri-centse comwe ningakwanise kuti ndikhotcerere wana wangu ku bzinthu bzakuipa bzomwe bzikucitika mu dziko la Sathaniri?’ (Mim. 22:3) Mpsakubveka kuti imwepo mungakwanise lini kukhotcerera wana wanu ku mabvuto yentse. Koma imwepo mungawakonzekerese ku mabvuto yomwe angadzagumane nayo kutsogolo, mwa kuwapfunzisa mu njira ya lufoyi na kuwathandiza kuti ambathembe Bibliya. (Mim. 2:1-6) Mwa ciratizo, penu wacibale wanu angasankhule kusiya kutumikira Yahova, athandizeni wana wanu kupfunza bza Fala la Mulungu na kuwona thangwe race mpsakufunika kupitiriza kukhala wakukhulupirika kwa Yahova. (Sal. 31:23) Ayai penu munthu omwe mumbamufuna wafa, alatizeni wana wanu mavesi ya m’Bibliya yomwe yangawatsangalaze.—2Ako. 1:3, 4; 2 Tim. 3:16. w20.10 27 ¶7