Novembro

Pakuti timbadziwa lini bzinthu bzentse bzomwe bzidacitika na Djona, pinango tingakumbuke kuti iye akhali munthu wapezi-pezi na wakusaya kukhulupirika. Yahova adauza Djona kuti ayende ku mzinda wa Ninive kuti akadziwise wanthu bza kupfudziwa kwa mzindayo. Koma Djona alibe kubvera, ndipo adapakira xitima ya m’madzi yomwe ikhayenda ku mbuto inango yakusiyana na yomwe Yahova akhadamuuza. (Djona 1:1-3) Kodi mungadakhala ndimwepo, mungadamupasa pomwe Djona mpata waciwiri kuti akakwanirise bzomwe adauzidwabzo? Pinango mungadamupasa lini. Tsono Yahova adawona kuti Djona akhafunikira mpata winango. (Djona 3:1, 2) Pomwe Djona adapemba, adalatiza momwe unthu bwace bukhaliri. (Djona 2:1, 2, 9) Mwakusaya kupenukira, Djona akhapemba kwa Yahova nthawe zizinji. Ndipo ubodzi mwa mipembo yomwe iye adacita ni omwe adapemba pomwe akhali m’mimba mwa cintsomba. Mpemboyo umbatithandiza kudziwa momwe iye akhaliri sikuti kundomukumbukira ninga munthu omwe adathawa utumiki bwace. Ndipo mafala ya mu mpemboyo, yambalatiza kuti iye akhali wakubzecepesa, wakutenda na wakukonzeka kubvera Yahova. Yahova alibe kundokhala acinyang’anisisa kuphonya komwe Djona adacita. Koma adatawira mpembo wace ndipo adapitiriza kumuphatisa basa ninga mpolofeta. Mpsakufunika kwene-kwene kuti mkulu ali-wentse ambayambe “kubvesesa nkhani yentse” pomwe anati kuperaka malango! w20.04 15 ¶4-6

Akristau wakuyambirira akhabvuma mapfunziso yamweya, ndipo akhathemba thandizo la mzimu wakucena kuti abvesese Fala la Mulungu. Iwo akhafufudza, acifika pakutsimikizira okha kuti mapfunziso yamweya yakhacokeradi m’Fala la Mulungu. (Mab. 17:11, 12; Aheb. 5:14) Akristauwa akhakhulupira lini bzinthu mwa mwambo, ndipo iwo akhanamata lini Yahova thangwe ra kukomedwa kukhala pabodzi na abale wawo. M’mbuto mwace, cikhulupiro cawo cikhacokera pa ‘cidziwiso caico ca Mulungu.’ (Akol. 1:9, 10) Cadidi ca m’Fala la Mulungu cimbacinja lini. (Sal. 119:160) Mwa ciratizo, bzomwe Bibliya limbapfunzisa, bzin’dzacinja lini, napo mugumane na mabvuto, mukalipisidwe na m’bale wanu, ayai iye acite pikado ikulu. Ndipopa, tin’funika kuyadziwa bwino mapfunziso ya m’Bibliya na kukhulupirambo kuti njacadidi. Penu bzomwe timbakhulupira bzimbacokera m’Bibliya, ifepano tin’dzakwanisa kukhala wakulimba pa bzineso. Cikhulupiro cathuco cin’dzakhala ninga ndangula yomwe imbacitisa kuti mwadiya ukhale pa mbuto ibodzi-bodzi cikacitika conzi. w20.07 9-10 ¶6-7

Jezu ambawona bzentse bzomwe timbacitira Akristau wakudzozedwa ninga kuti tikucitira iye. (Mat. 25:34-40) Njira ibodzi yakulatizira kuti timbathandiza Akristau wakudzozedwa, ndiyo kupfunzisa wanthu bza Umambo. (Mat. 28:19, 20) Bzingadakhala kuti Akristau wakudzozedwa akuthandizidwa lini na ‘mabira yanango,’ iwo angadakwanisa lini kupalizira bzipsa bzabwino pa dziko lentse la pantsi. (Ju. 10:16) Penu imwepo ndimwe m’bodzi wa mabira yanango, dziwani kuti pa nthawe iri-yentse pomwe mukucita basali, mumbalatiza lini kokha kuti mumbafuna anyakudzozedwawo, koma mumbafunambo Jezu. Pana njira zinango za momwe tingathandizire abale wa Kristu. Ibodzi mwa njirazo ni kupereka kobiri zomwe tingakhale nazo kuti zithandizire basa lomwe likutsogoleredwa na Yahova na Jezu. (Luka 16:9) Mwa ciratizo, tingacite bzakupereka kuti bzithandizire basa la pa dziko lentse, nakuti bzithandizirembo pakacitika matsoka mwadzidzidzi. Ndipo tingacitembo bzakupereka kuti bzithandizire m’gwere mwathu caimo, ayai tingathandizembo abale omwe tikudziwa kuti akufunikira thandizo.—Mim. 19:17. w20.04 24 ¶12-13

Pofesiyayi imbalewa kuti mambo wa kumpoto ‘an’dzakumbukira lini Mulungu wa abereki wace.’ Kodi polofesiyayi idakwanisika tani? Na cakulinga cakufuna kupfudza bzipembedzo bzentse, boma la União Soviética lidayezera kukunda mphanvu ya bzipembedzobzo. Ndipo kuti likwanise kucita bzimwebzi, mu gole la 1918, bomali lidakhazikisa lamulo lakuti xikola zimbapfunzise kuti kulibe Mulungu. Polofesiya ya Danyeri imbalewambo kuti mambo wa kumpoto ‘an’dzatumbiza mirungu ya bzifanikiso bza malitsito yakulimba.’ Kodi bzimwebzi bzidacitika tani? Boma la União Soviética lidadzonga kobiri zizinji kwene-kwene kuti likonze gulu la anyankhondo, ndipo lidakonza bzifuzo bzizinji bza nkhondo kuti likhale lamphanvu kwene-kwene. Mambo wa kumpoto na mambo wa kummwera, ali-wentse adakonkhanisa bzifuzo bzace bza nkhondo kuti aphere nabzo wanthu azinji! Mambo wa kumpoto na mambo wa kummwera adaphatira basa pabodzi mwa kucita cinthu cakufunika kwene-kwene. Iwo ‘adakhazikisa cinthu cakunyantsa comwe cimbadzonga,’ cinthuco ni bungwe la Nações Unidas (ONU).—Dan. 11:31. w20.05 6-7 ¶16-17

Kodi ni mbani omwe anganyang’ane omwe adadjedjera mwauzimu? Apalizi wentse, kuyambira akulu wa gwere, apainiya na wa m’banja la munthu wakudjedjerayo. Kodi imwepo muna xamwali ayai m’bale wanu omwe adadjedjera mwauzimu? Kodi mungacite ciyani mukagumana na munthu wakudjedjera mwauzimu pomwe mukupalizira nyumba na nyumba ayai mukupalizira mu nseu? Mubvunzeni penu angafune kuzungiridwa ndipo muuzeni kuti mun’dzakomedwa kwene-kwene kuuza akulu wa gwere bza nkhaniyo. Mkulu munango wakucemeredwa Thomas adati: “Cakuyamba, nimbabvunza abale wakusiyana-siyana kuti ndibve penu iwo akudziwa komwe ambakhala abale omwe adjedjera mwauzimu. Ayai nimbabvunza abalewo kuti ndidziwe penu alipo m’bale omwe waleka kutsonkhana. Ndipo ndikazungira m’bale omwe adadjedjera mwauzimu, nimbamubvunza kuti andifototokozere momwe aliri wana wace na abale wace winango. Abale winango pomwe akhanati kudjedjera mwauzimu, akhayenda ku mitsonkhano na wana wawo, ndipo pinango wanawo adafika pakukhala apalizi. Tenepo, wanawo angafunikembo kuthandizidwa kuti abwerere kwa Yahova.” w20.06 24 ¶1; 25 ¶6-7

Pa cirengedwe centse ca pa dziko la pantsi, ni wanthu okha omwe ana mphanvu yakupfunza bza makhalidwe. Ifepano timbacita bzimwebzo mwa kukumbukira bzinthu bzomwe bzidaticitikira pa moyo wathu. Kucita bzimwebzi kumbatithandiza kukhala na makhalidwe yabwino, kucinja makumbukidwe yathu na momwe timbacitira bzinthu pa moyo wathu. (1Ako. 6:9-11; Akol. 3:9, 10) Tsono tin’funika kupfunzisa mtima wathu kuti umbakwanise kusiyanisa cabwino na cakuipa. (Aheb. 5:14) Ndipo tingapfunze momwe tingalatizire lufoyi na ntsisi, na momwe tingatewezerere cirungamo ca Yahova. Ifepano tingalatize kuti timbatenda mphaso yakukumbuka yomwe Yahova adatipasa mwa kumbakumbukira nthawe zentse zomwe Yahovayo adatithandiza na kutitsangalaza. Kukumbukira bzimwebzi kun’dzatipasa citsimikizo cakuti kutsogoloku iye an’dzatithandiza pomwe. (Sal. 77:12; 78:4, 7) Tin’funikambo kumbakumbukira bzinthu bzabwino bzomwe winango ambaticitira na kuwatenda. Anyakufufudza azindikira kuti wanthu omwe ambatenda ambakhala wakukondwa kwene-kwene. w20.05 23 ¶12-13

Kumbukirani momwe Mozeji adabvera pomwe adawona matsomphenya ya mbiri ya Yahova yakugwata pomwe iye akhadaima pa tsendwa. Bukhu la Estudo Perspicaz das Escrituras limbalewa kuti: “Matsomphenya yamweya yakhali yakudabwisa kwene-kwene mwakuti palibe munthu winango omwe akhadayawona kale Jezu akanati kubwera pano pa dziko la pantsi.” Mozeji adabva fala, ndipo pinangopentse falalo likhali la anjo, omwe adalewa kuti: ‘Yahova, Yahova, Mulungu wa ntsisi ndipo ambafulumiza lini kukalipa; iye ngwakudzala na lufoyi lakukhulupirika pabodzi na cadidi, ambalatiza lufoyi lakukhulupirika kwa mibadwo bzulu na bzulu, acilekerera bzakuphonya na pikado.’ (Kuf. 33:17-23; 34:5-7) Pinango Mozeji akhakumbukira cakucitikaci pomwe akhaphatisa basa dzina la Mulungu pomwe adalewa mafala ya m’vesi la leroya. Tikambakumbukira bza dzina la Mulungu, tin’funika kumbakumbukirambo momwe iye aliri. Tin’funikambo kumbakumbukira makhalidwe yace ninga mphanvu, nzeru, cirungamo na lufoyi. Tenepo kukumbukira makhalidweya na yanango, kun’dzatithandiza kuti timbalemekeze kwene-kwene Mulungu.—Sal. 77:11-15. w20.06 8-9 ¶3-4

Jezu adauza anyakupfunza wace kuti iwo angadadzadziwika thangwe ra lufoyi lomwe ambalatizana. (Ju. 13:34, 35) Tsono lufoyi pa lokha limbalimbisa lini cikhulupiro. Koma cikhulupiro cathu cin’funika lini kundocokera pa lufoyi lacikristau lomwe liripo pakati pa wanthu wa Mulungu. Thangwe ranyi? Tiyezezere kuti m’bale, mpainiya ayai mkulu wa gwere wacita pikado ikulu. Ayai n’ciyani comwe mungadacita bzingadakhala kuti m’bale ayai mpfumakazi acita bzinthu bzomwe mulibe kukomedwa nabzo? Ayai mungadabzibva tani bzingadakhala kuti mukubva nyakupanduka akulewa kuti mukupfunza lini cadidi imwe. Kodi mungadacita ciyani? Kodi mungadasiya kutumikira Yahova? Mpsakufunika kukumbukira ibzi: Kumangira cikhulupiro canu pa cikhulupiro ca winango m’mbuto mwa kucimangira pa uxamwali bomwe munabo kuna Yahova, kun’dzacitisa kuti cikhulupiro canu cikhale cakusaya kulimba. Cikhulupiro canu cin’funika lini kumangidwa kokha na bzinthu bzakusaya kulimba ninga, makumbukidwe yanu na momwe mumbabvera. Koma mun’funika kucimanga na bzinthu bzakulimba, ninga kukhala na umboni bwakukwanira pabodzi na kufufudza kuti mutsimikizire kuti bzomwe mukupfunzabzo mpsacadidi. Imwepo mun’funikambo kukhala na umboni bwakuti Bibliya lina cadidi cakulewa bza Yahova.—Aro. 12:2. w20.07 8 ¶2-3

Pana bzinthu bzizinji bzomwe bzikulatiza kuti anjo akutithandiza kugumana anyakudjedjera mwauzimu omwe akufuna kubwerera kwa Yahova. (Apok. 14:6) Mwa ciratizo, Silvio wa ku Equador adadandaulira Yahova mu mpembo kuti amuthandize kubwerera m’gwere. Akanati kumaliza mpemboyo, adabva kugogodza kwa nsuwo, akhali akulu awiri wa gwere omwe akhali pa nsuwopo. Akuluwo adakomedwa kwene-kwene kupasa Silvio thandizo lakuyamba lomwe iye akhafunikira. Kuthandiza omwe adadjedjera mwauzimu kuti abwerere kwa Yahova kumbatikondwesa kwene-kwene. Onani bzomwe mpainiya winango wakucemeredwa Salvador ambacita kuti athandize omwe adadjedjera mwauzimu. Iye adati: “Nthawe zinango, nimbakomedwa kwene-kwene mpaka kufika pakugwesa misozi. Bzimbakondwesa kwene-kwene kudziwa kuti Yahova wapulumusa m’bodzi mwa mabira yace ku dziko la Sathaniri ndipo inembo ndakhala na mwayi wakuthandizira basa limweri.” Penu imwepo mudaleka kutsonkhana pabodzi na atumiki wa Yahova, dziwani kuti iye akadakufunani. Yahova akukudikhirirani kuti mubwerere, ndipo iye an’dzakutambirani na manja mawiri. w20.06 29 ¶16-18

Yahova ‘Mpfunzisi [wathu] Mkululetu’ adatiikhira bziratizo m’Bibliya kuti bzimbatipfunzise. (Zai. 30: 21) Mu Bibliyamo, timbagumana nkhani za wanthu omwe adalatiza makhalidwe yomwe Yahova ambakomedwa nayo. Koma timbagumanambo bziratizo bza wanthu winango omwe alibe kulatiza khalidwe limweri, ndipo timbawonambo bzakutewera bzace. Tikambapambula nthawe yakukumbukira nkhani zimwezi, timbapfunza bzinthu bzizinji. (Sal. 37:37; 1Ako. 10:11) Kumbukirani bzomwe mambo Sauli adacita. Pakuyamba iye akhali tswaka lakubzicepesa. Iye akhazindikira kuti pakhana bzinthu bzinango bzomwe akhakwanisa lini kucita, ndipopa iye adazeza kutambira udindo. (1 Sam. 9:21; 10:20-22) Tsono na kupita kwa nthawe iye adadzakhala wakubzikuza. Iye adalatiza khalidwe limweri pomwe adakhala mambo. Ntsiku inango Sauli alibe kukwanisa kupirira ndipo alibe kudikhirira mpolofeta Samuyeri. M’mbuto mwakukhala wakubzicepesa acikhulupira kuti Yahova an’thandiza atumiki wace, Sauli adacita bzinthu bzomwe akhafunika lini kucita, iye adapereka ntsembe kwa Yahova. Kodi bzakutewera bzace bzidakhala bziponi? Sauli adaluza uxamwali bomwe akhanabo na Yahova ndipo Yahovayo adalamba kuti iye apitirize kukhala mambo. (1 Sam. 13:8-14) Mwakusaya kupenukira, tin’funika kupfunza na ciratizo cimweci ticileka kucita bzinthu na mtima wakubzikuza ninga Sauli. w20.08 10 ¶10-11

Mwakuphatisa basa Kristu, Yahova adaikha m’gwere ‘amuna ninga mphaso.’ (Aef. 4:8) ‘Mphaso za amuna’ zimwezo zimbaphatanidza Bungwe Lakutonga, athandizi wa Bungwe Lakutongalo, komiti ya mthambi, anyakunyang’anira dera, apfunzisi wa xikola ya Bibliya, akulu wa gwere na atumiki wakuthandiza. Abale wentsenewa adasankhulidwa na mzimu wakucena, ndipo iwo ana udindo bwakusamalira mabira yakufunika ya Yahova na kulimbikisa gwere. (1 Pe. 5:2, 3) Abale ambasankhulidwa na mzimu wakucena kuti asamalire maudindo yakusiyana-siyana. Ninga momwe manja, minyendo na mbuto zinango za thupi zimbaphatira basa pabodzi pakuthandiza thupi, abale amwewa ambaphata basa mwamphanvu pakuthandiza gwere kuti ligumane phindu. Iwo ambalinga lini kukhala na mbiri, koma ambacita nyongo yakulimbikisa abale na mpfumakazi zawo. (1 Ates. 2:6-8) Timbatenda kwene-kwene Yahova thangwe ra kutipasa amuna wauzimu omwe ambaikha bzakufuna bza anzawo pa mbuto yakuyamba! w20.08 21 ¶5-6

Cinthu cibodzi comwe cimbaticitisa kupalizira ni thangwe rakuti wanthu ni ‘wakupwetekeka na wakumwazika,’ ndipo akufunikira mwakamfulumize kupfunza cadidi ca Umambo. (Mat. 9:36) Yahova akufuna kuti wanthu wa mkhalidwe uli-wentse afike pakukhala na cidziwiso caico ca cadidi kuti adzapulumuke. (1 Tim. 2:4) Kukumbukira momwe basa lakupalizira lingatokonyere wanthu, kun’dzaticitisa kuphata basali. Ifepano timbapulumusa moyo wa wanthu. (Aro. 10:13-15; 1 Tim. 4:16) Ndipo ifepano tin’funikambo kukhala na bzakupfunzisira bzabwino na kudziwambo momwe tingabziphatisire basa. Jezu adapasa anyakupfunza wace malango ya momwe iwo angamedzere wanthu. Iye adawauza bzomwe anganyamule, komwe angakapalizire na bzomwe angakalewe. (Mat. 10:5-7; Luka 10:1-11) Ntsiku zino, gulu la Yahova limbatipasa Bzinthu Bzomwe Timbapfunzisira kuti basa lathu litifambire bwino. Ndipo gululo limbatipfunzisambo momwe tingabziphatisire basa bzinthubzo. Kupfunzako kumbatithandiza kukhala wakukhulupirika pakupalizira na kuwona momwe tingakhalire mpfunzisi wa bzipsa bzabwino.—2 Tim. 2:15. w20.09 4 ¶6-7, 10

Mpostolo Juwau adathandiza wanthu azinji kupfunza cadidi. Ndipo iye akhawona wanthuwo ninga wana wace. Napo kuti iwo akhagumana na mabvuto mazinji, koma alibe kusiya kutumikira Yahova. Bzimwebzi bzidakondwesa kwene-kwene mpostolo Juwau. Ifepanombo ntsiku zino timbakomedwa kwene-kwene tikambawona wana wathu caiwo ayai wale omwe tidawapfunzisa cadidi, akubzipereka kwa Yahova acipitiriza kumutumikira mwakukhulupirika. (3 Ju. 3) Mu gole la 98 E.C., mzimu wakucena wa Yahova, udacitisa Juwau kunemba matsamba matatu yomwe yambacita mbali ya Bibliya. Cakulinga ca matsambayo cikhali kuthandiza Akristau wakukhulupirikawo, kupitiriza kukhulupira Jezu na kufamba m’cadidi. Juwau akhacita thupo kwene-kwene na apfunzisi wakunama omwe akhayamba kuwoneka m’gwere lacikristau. (1 Ju. 2:18, 19, 26) Apfunzisi wa kunamawo akhalewa kuti ambamudziwa Mulungu koma akhabvera lini malamulo yace. w20.07 20 ¶1-3

Ifepano timbakhulupira mafala yomwe timbapalizira, bzimwebzi bzimbaticitisa kufuna kuuza wanthu azinji mafalayo. Ifepano timbakhulupira bzomwe Bibliya limbalewa. (Sal. 119:42; Zai. 40:8) Ntsiku zino tikuwona kukwanirisidwa kwa mapolofesiya ya m’Bibliya. Ndipo tikuwonambo momwe moyo wa wanthu ukucinjira thangwe ra kuphatisa basa bzomwe Bibliya limbalewa. Bumwebu ni umboni bomwe bukuticitisa kukhulupira kuti bzipsa bzabwino bza Umambo ni mafala yomwe wanthu wentse an’funika kuyabva. Ifepano timbakhulupirambo Yahova omwe ni mwenekaciro mafala yomwe timbapalizira, ndipo timbakhulupirambo Jezu omwe adamuikha kukhala Mambo wa Umambo bwace. Bziribe basa bzomwe tingagumane nabzo, Yahova nthawe zentse an’dzakhala pakuthawira pathu na mphanvu yathu. (Sal. 46:1-3) Kuthimizira bzimwebzi, ifepano timbakhulupira kuti Jezu ni omwe akutsogolera basa lakupalizira kucokera kudzulu, mwa kuphatisa basa mphanvu na utongi bomwe Yahova adamupasa. (Mat. 28:18-20) Cikhulupiro cimbaticitisa kuwona kuti Yahova an’dzasimba nyongo yathu. w20.09 12-13 ¶15-17

Kawiri-kawiri mpfumakazi zimbafuna munthu kuti azithandize zikagumana na mabvuto. (Zai. 1:17) Mwa ciratizo, mkazi mantsiwa ayai mpfumakazi yomwe idalambana na mwamuna wace, imbafunikira munthu kuti amuthandize kucita mabasa yomwe mwamuna wace akhacita. Mpfumakazi yacikulire yomwe ikuduwala ingafune munthu kuti aithandize kukalewalewa na dotolo. Ayai mpfumakazi yomwe ni mpainiya omwe akucita mabasa yanango mu gulu la Yahova, ingafune munthu kuti aikhotcerere pomwe apainiya winango akulewa kuti iye ambapalizira lini kawiri-kawiri ninga momwe anzacewo ambacitira. Onani ciratizo ca Jezu. Jezu akhazeza lini kukhotcerera mpfumakazi zace akawona kuti wanthu akufuna kuzipenyerera. Pa nthawe inango iye adakhotcerera Mariya pomwe Marta alibe kukomedwa na bzomwe Mariyayo adacita. (Luka 10:38-42) Ndipo Jezu adakhotcerera pomwe Mariya kaciwiri, pomwe wanthu akhalewa kuti bzomwe Mariya akhacita bzikhali lini bwino. (Marko 14:3-9) Jezu adabvesesa bzomwe Mariya adacita. Ndipo Jezuyo adalewambo kuti bzomwe Mariyayo adacita bzin’dzadziwika ‘kuli-kwentse komwe mafala yabwino yan’paliziridwa pa dziko lentse la pantsi.’ w20.09 24 ¶15-16

Makabusa wabwino akhadziwa kuti mabira yangataike. Ndipo makabusa akagumana bira wakataikayo, akham’menya lini. Onani momwe Mulungu adakhalira ciratizo cabwino pomwe adathandiza atumiki wace winango omwe akhabonera. Mpolofeta Djona adathawa pomwe Yahova adamuuza kuti ayende ku Ninive. Koma Yahova adapitiriza kumuwona kukhala wakufunika. Ninga makabusa wabwino, Yahova adapulumusa Djona ndipo adamupasa mphanvu zomwe akhafunikira kuti akacite basa lomwe akhadamuuza. (Djona 2:7; 3:1, 2) Na kupita kwa nthawe, Mulungu adaphatisa basa kamuti kuti athandize Djona kubvesesa kuti moyo wa munthu ali-wentse ngwakufunika kwene-kwene kwa iye. (Djona 4:10, 11) Kodi tikupfunza ciyani? Akulu wa gwere an’funika lini kuthamangira kuwona kuti abale omwe adjedjera mwauzimu mbakufunika lini pomwe. Koma iwo ambafufudza kuti abvesese bzomwe bzacitisa abalewo kudjedjera. Ndipo abalewo akabwerera kwa Yahova, akuluwo ambapitiriza kuwalatiza lufoyi. w20.06 20-21 ¶10-12

Pomwe boma la União Soviética lidamala mphanvu yakutonga mu 1991, atumiki wa Mulungu wa m’dzikolo adakhala pa mtendere mu nthawe yakucepa, yomwe Danyeri adalewa kuti ikhali ‘thandizo lakucepa.’ Tenepo, iwo adayamba kupalizira mwakutsudzuka ndipo mu nthawe yakucepa mbogo ya apalizi idathumizirika kwene-kwene m’madziko yakutongedwa na bomalo. Tsono, na kupita kwa nthawe boma la Rússia na madziko yanango yomwe yambathandizira bomalo yadakhala mambo wa kumpoto. Kuti boma likhale mambo wa kumpoto ayai mambo wa kummwera, iro lin’funika kucita bzinthu ibzi: (1) kuboneresa kwene-kwene atumiki wa Mulungu, (2) kucita bzinthu mu njira yakulatiza padeca kuti ambawenga Yahova na atumiki wace, na (3) kutsutsana na mambo wa kummwera. Boma la Rússia na madziko yomwe yambabverana nalo ni mambo wa kumpoto wa ntsiku zino thangwe iwo ambaboneresa atumiki wa Mulungu mwa kuwazunza na kuwaletsa kupalizira m’madziko yomwe iwo ambatonga. Cizunzoco cikulatiza kuti iwo ambawenga Yahova na atumiki wace. Ndipo iwo ambanesana na mambo wa kummwera omwe ni boma la Grã-Bretanha na América lomwe lina mphanvu kwene-kwene pa dziko lentse la pantsi. w20.05 12-13 ¶3-4

Penu tikufuna kukhala apfunzisi wabwino, tin’funika kukulisa luso lathu lakupfunzisa. Ifepano timbapfunzisa nthawe zentse wanthu azinji cadidi cakugumanika m’Bibliya. Ifepano timbakomedwa pomwe tikupfunzisa wanthu mwa kuphatisa basa Fala la Mulungu. Bzimwebzi bzingaticitise kufuna kulewa bzizinji pa bzomwe ifepano timbakhulupira. Munthu omwe ambacitisa pfunziro la Ntsanza ya Mulindiri, pfunziro la Bibliya la gwere ayai kupfunza na munthu, ambafunika lini kulewalewa kwene-kwene. Koma ambafunika kupfunzisa mwa kuphatisa basa Bibliya. Tenepo pomwe akupfunzisa, an’funika kusamala kuti aleke kumbalewalewa kwene-kwene koma aphatise basa Bibliya pakupfunzisapo. (Ju. 16:12) Ndendemezerani cidziwiso comwe mukhanaco pomwe mudabatizidwa na tsapano. Pa nthawe yomwe mudabatizidwa mukhandodziwa mapfunziso yakuyambirira ya m’Bibliya. (Aheb. 6:1) Papita magole mazinji kuti mudziwe bzinthu bzizinji bzomwe imwepo mukudziwa tsapano. Ndipopa lekani kutsanda kupfunzisa anyakupfunza wanu wa Bibliya bzinthu bzizinji pa nthawe ibodzi. w20.10 14-15 ¶2-4

Yahova adasankhula wanthu wabwino kuti akhale abereki wa Jezu. (Mat. 1:18-23; Luka 1:26-38) Bibliya limbalatiza momwe Mariya akhabvera ndipo limbalatiza lufoyi lomwe akhanalo kuna Yahova pabodzi na Fala lace. (Luka 1:46-55) Ndipo bzomwe Zuze adacita pa kubvera malango, bzidalatiza kuti akhana lufoyi na Mulungu ndipo akhamutumbiza. (Mat. 1:24) Onani kuti Yahova alibe kusankhula wanthu wakudala kuti akhale abereki wa Jezu. Ntsembe yomwe Zuze na Mariya adapereka pambuyo pa kubadwa kwa Jezu idalatiza kuti iwo akhali wanthu wakusauka. (Luka 2:24) Ndipo bzikuwoneka kuti iwo akhalibe kobiri zizinji ayai bzinthu bzizinji, ndipo akhana wana azinji. (Mat. 13:55, 56) Yahova adakhotcerera Jezu ku ngozi zinango, koma iye alibe kumukhotcerera kuna wanthu omwe akhamukhulupira lini. (Mat. 2:13-15) Mwa ciratizo, Jezu akhafunika kulimbana na acibale wace omwe pakuyamba akhamukhulupira lini kuti iye ni Mesiya. (Marko 3:21; Ju. 7:5) Cinthu cinango comwe Jezu akhafunika kulimbana naco cikhali kuwawidwa thangwe ra kufedwa pai wace wakuthupi Zuze, pomwe Jezuyo akhali mwana. w20.10 26-27 ¶4-6

Kodi mudabzibvambo kale kuti muli mwekha mucikumbuka kuti palibe munthu omwe angakuthandizeni na kumalisa mabvuto yanu? Wanthu azinji ambakumbuka tenepo kuphatanidzambo atumiki wakukhulupirika wa Yahova. (1 Wam. 19:14) Bzimwebzi bzingakucitikirani, kumbukirani bzomwe Yahova adalewa: ‘Nin’dzakusiya lini ndipo cipo ndicidzakuthawa.’ Ndipopa tingalewe na mtima wentse kuti: ‘Yahova ni mthandizi wangu, nin’dzagopa lini cinthu.’ (Aheb. 13:5, 6) Mpostolo Paulo adanembera abale wace wa ku Djudeya mafala yamweya mu gole la 61 E.C. Mafala yamweya yakundokumbusa bzomwe bzidanembedwa pa Salimo 118:5-7. Ninga nyakunemba salimoyi, Paulo adazindikira kuti Yahova akhali nthandizi wace. Mwa ciratizo, pomwe padapita magole mawiri kucokera pomwe iye adanembera tsamba Ahebereu, mpostolo Paulo adacita ulendo bwakugopswa pa nthawe yomwe m’nyanza mukhacita cimphepo cakugopswa. (Mab. 27:4, 15, 20) Pa nthawe yomwe iye akhacita ulendo bwace na pa nthawe yomwe akhanati kucita ulendobo, Yahova adalatiza kazinji kentse kuti akhali nthandizi wace. w20.11 12 ¶1-2

Thangwe ranyi tingalewe kuti mpsakusaya nzeru kumbandokhala ticikumbuka kuti kale-kale tikhana moyo wabwino? Cisuwo cingaticitise kumbandokhala ticikumbukira bzinthu bzabwino bzokha bzomwe bzidacitika pa moyo wathu kale-kale. Kumbukirani bzomwe bzidacitika na Ajirayeri. Pambuyo pakucoka ku Edjipito, iwo mwakusaya kucedwa adayebwa kuti moyo wawo kumweko ukhali wakunesa kwene-kwene. Tenepo iwo akhambandokhala acikumbukira cakudya cabwino comwe akhakomedwa naco ku Edjipitoko. Ajirayeriwo adalewa kuti: ‘Tasuwa ntsomba zomwe tikhadya fovolo ku Edjipito, pabodzi na makaka, mabvembe, ntsabola na adyo!’ (Mirew. 11:5) Kodi n’cadidi kuti iwo akhadya cakudya ca ‘fovolo?’ Nee. Ajirayeri akhabonera kwene-kwene pomwe akhali ku Edjipito, ndipo pa nthaweyo iwo akhali akapolo ndipo akhaponderezedwa mwakuti bwerani mudzawone. (Kuf. 1:13, 14; 3:6-9) Tsono napo kuti bzikhali tenepo, iwo na kupita kwa nthawe adayebwa mabvuto yomwe akhagumana nayo ndipo adasuwa moyo omwe akhanawo ku Edjipito. Iwo akhakumbukira ‘bzinthu bza m’mbuyo,’ m’mbuto mwakukumbukira bzinthu bzabwino bzomwe Yahova akhawacitira. Yahova alibe kukomedwa na makhalidwe yawoyo.—Mirew. 11:10. w20.11 25 ¶5-6

Nthawe zinango, tingakumbuke kuti moyo ngufupi ndipo ‘[wandodzala] na mabvuto.’ (Djobi 14:1) Tenepo bzimwebzi nthawe zinango bzingatimalise mphanvu. Bzimwebzi kale-kale bzidacitikambo na atumiki winango wa Yahova. Mpaka winango wa iwo akhakhumba kufa. (1 Wam. 19:2-4; Djobi 3:1-3, 11; 7:15, 16) Koma Yahova nthawe zentse akhawatsangalaza ndipo akhawapasa mphanvu. Nkhani zawozo zidanembedwa m’Bibliya kuti tikambaziwerenga zimbatitsangalaze na kutipfunzisa. (Aro. 15:4) Kumbukirani bza Zuze mwana wa Djakobo, iye alibe kudzakhala na pai wace omwe akhamufuna, koma adayenda kukakhala ku Edjipito ninga kapolo wa mkulu wa acikunda omwe akhanamata lini Yahova. (Ciy. 37:3, 4, 21-28; 39:1) Mkazi wa Potifari adanamizira Zuze kuti akhafuna kupswitha. Tsono Potifari alibe kuyeza kufufudza kuti akhale na umboni bomwe bungadamuthandiza kudziwa kuti nkhaniyo ikhali yacadidi ayai ne. M’mbuto mwace iye adathusa Zuze m’kawoko, ndipo iye akhadamangidwa na makorenti. (Ciy. 39:14-20; Sal. 105:17, 18) Bzikuwonekeratu padeca kuti Zuze akhana mathangwe yakukhalira wakusunama! w20.12 16¶1-4

Jezu adalewa bza nkhani yomwe tin’funika kumbaiguma m’mipembo yathu. Iye adati: ‘Dzina lanu licenesedwe.’ Kodi iye akhafuna kulewanyi na mafalaya? Kucenesa kumbathandauza kutsuka cinthu comwe cidapswipa. Winango angabvunze kuti: ‘Kodi dzina lakuti Yahova ndakucena lini kale?’ Kuti tikwanise kutawira mbvunzoyu, tin’funika kukumbukira bzentse bzomwe dzina limbaphatanidza. Dzina limbathandauza bzinthu bzizinji sikuti kundolinemba pa tsamba ayai munthu kulicemera mwakukuwa. Onani bzomwe Bibliya limbalewa: ‘Kuli bwino kukhala na dzina labwino kuposa kukhala na cuma cizinji.’ (Mim. 22:1; Mpal. 7:1) Thangwe ranyi dzina ndakufunika? Thangwe limbaphatanidza mbiri ya munthu na momwe wanthu winango ambawonera mwenekaciro dzinalo. Tenepo, kanembedwe ka dzina na momwe wanthu ambalicemerera, mpsakufunika lini. Koma cakufunika kwene-kwene ni bzomwe wanthu ambakumbuka akawona na kubva dzinalo. Anyamagunkha akambanamizira Yahova, ambacitisa wanthu kukhala na makumbukidwe yakuipa pakulewa bza Yahovayo. Ndipo na makumbukidwe yakuipayo, wanthuwo ambanyoza Mulungu ndipo ambapswipizambo dzina lace. w20.06 3 ¶5-7

Ifepano tingakhale na thupo kwene-kwene pa nkhani inango mwakuti tingakwanise lini kukumbukira cinthu cinango. Mwa ciratizo, ifepano tingakhale na thupo lakuti tin’dzakhala tiribe kobiri zakukwanira kuti tigulire bzomwe tin’funikira, ayai thupo lakuti tin’dzaduwala ticidzatazira kuphata basa ayai kuluza basa cairolo. Ndipo tingakhalembo na thupo lakuti pinango tin’dzakwanisa lini kukhala wakukhulupirika, tikadzayezedwa kuti tireke kubvera lamulo la Mulungu. Tsapanopapa Sathani an’citisa kuti wale omwe iye ambawaphatisa basa apfudze atumiki wa Mulungu. Tenepo, ifepano tingakhale na thupo lakuti, kodi tin’dzacita ciyani pa nthawe imweyo? Pinango tingabzibvunze kuti: ‘Kodi mpsakuphonyeka inepano kucita thupo na bzinthu bzimwebzi?’ Ifepano timbadziwa kuti Jezu adauza ateweri wace kuti: “Lekani kucita thupo.” (Mat. 6:25) Kodi pamwepa Jezu akhafuna kulewa kuti tileke kucita thupo na cinthu ciri-centse? Ne, n’tenepo lini. Kumbukirani kuti m’mbuyomu, atumiki winango wakukhulupirika wa Yahova adakhalambo na thupo, tsono napo bzikhali tenepo, Yahova adapitiriza kuwawona kuti akhali wanthu wakufunika. (1 Wam. 19:4) Jezu adalewa mafalaya pakufuna kutitsangalaza. Iye ambafuna lini kuti timbakhale na thupo kwene-kwene na bzinthu bzomwe bzingaticitise kuwona kutumikira Yahova kukhala kwakusaya kufunika pa moyo wathu. w21.01 3 ¶4-5

Amuna ambanyang’aniridwa na Yahova pabodzi na Jezu momwe iwo ambasamalirira mabanja yawo. (1 Pe. 3:7) Pakuti Yahova ni Msolo wa banja lace lentse, iye ana mphanvu yakukhazikisa malamulo kuna wana wace na kutsimikizirambo kuti iwo akubvera malamuloyo. (Zai. 33:22) Ndipo Jezu omwe ni msolo wa gwere lacikristau, iye ana ugo bwakukhazikisambo malamulo nakuwonesesa kuti malamuloyo yakutewezedwa. (Agal. 6:2; Akol. 1:18-20) Ninga Yahova na Jezu, msolo wa banja lacikristau ana ugo bwakusankhulira banja lace bzakucita. (Aro. 7:2; Aef. 6:4) Tsono ugo bwacebo, buna malire. Mwa ciratizo, malamulo yaceyo yan’funika kukhala yakubverana na mitemo ya m’Fala la Mulungu. (Mim. 3:5, 6) Ndipo msolo wa banja alibe ugo bwa kukhazikisa malamulo kuna wanthu omwe ni wa m’banja lini lace. (Aro. 14:4) Ndipo wana wace wacimuna na wacikazi akakula acicoka pamui, wanawo ambapitiriza kulemekeza paiyo, koma iye alibe udindo bwa kuwatsogolera pomwe.—Mat. 19:5. w21.02 2-3 ¶3-5

Njira ibodzi yakufunika kwene-kwene yomwe msolo wa banja angalatizire nayo kuti ambafuna banja lace, ni kusamalira banja lacero na kulipasa bzomwe iro limbafunikira pa moyo. Koma iye an’funika kukumbukira kuti cinthu cakufunika kwene-kwenetsa ni kuthandiza banja lacero kuti likhale pa uxamwali bwa mphanvu na Yahova. (Mat. 5:3) Pomwe Jezu akhali pa muti wakuzunzidwira, iye akhafuna kutsimikiza kuti pangadawoneka munthu omwe angadasamalira bwino Mariya omwe akhali mai wace. Napo pomwe akhabva kuwawa kwakuti bwerani mudzawone, Jezu adakumbira mpostolo Juwau kuti asamalire Mariya. (Ju. 19:26, 27) Pinango msolo wa banja ungakhale na udindo buzinji bwakufunika kwene-kwene. Iye akakhala ali ku basa, an’funika kuphata basa na nyongo kuti makhalidwe yace yatumbizise Yahova. (Aef. 6:5, 6; Tito 2:9, 10) Ndipo pinango iye angakhale na udindo m’gwere, ninga kulimbisa na kusamalira abale na mpfumakazi, pabodzi na kutsogolera basa lakupalizira. Ndipo pa nthawe ibodzi-bodziyo, iye ana udindombo bwa kumbapfunza Bibliya na mkazace pabodzi na wana wace. Iye akacita bzimwebzi, wanthu wa m’banja mwacewo an’dzamutenda thangwe ra bzinthu bzentse bzomwe iye ambawacitira kuti awathandize kukhala na thanzi labwino, wakukondwa na kuti apitirize kutumikira Yahova.—Aef. 5:28, 29; 6:4. w21.01 12 ¶15, 17

Bibliya limbafotokoza bzomwe mkazi wa nzeru angacite. Mwa ciratizo, iye anganyang’anire mabasa ya pamui na kucitambo malonda. (Mim. 31:15, 16, 18) Iye ana ufulu bwa kumbafotokozambo makumbukidwe yace. Ndipo bayace an’funika kumbamukhulupira na kumbatetekera bzomwe iye ambalewa. (Mim. 31:11, 26) Mwamuna akambacita bzinthu na mkazi wace mwalufoyi na kumulemekeza, mkaziyo an’dzakomedwa ndipo bzin’dzakhala bzakusaya kunesa kumbamubvera. Napo kuti Jezu adacita bzinthu bzizinji, iye ambawona lini ninga cinthu cakunyozeka kubvera utsogoleri bwa Pai wace. (1Ako. 15:28; Afil. 2:5, 6) Mpsibodzi-bodzimbo na mkazi wacikristau omwe ambatewezera ciratizo ca Jezu. Mkaziyo ambabzibva lini kukhala wakunyozeka kubvera utsogoleri bwa bayace. Ndipo iye ambathandizira bayace sikuti kokha thangwe ra kumufuna, koma thangwe rakuti iye ambafuna Yahova na kumulemekeza. Mkazi wacikristau omwe ambabvera, angabvume lini bayace akamuuza kuti aleke kubvera mitemo ya m’Bibliya. w21.02 11 ¶14-15; 12 ¶19

Lufoyi lomwe atumiki wa Yahova analo kuna iye, nthawe zentse limbawathandiza kupirira akambazunzidwa. Mwa ciratizo, pomwe apostolo adauziwa na nyumba ya mphala ya Adjuda kuti asiye kupalizira, lufoyi lomwe akhanalo kuna Mulungu, lidawacitisa “kubvera Mulungu ninga mtongi sikuti wanthu.” (Mab. 5:29; 1 Ju. 5:3) Lufoyi lamphanvu limweri, lomwe abale wathu analo kuna Mulungu, likuwathandizambo kuti apitirize kukhala wakukhulupirika pomwe akuzunzidwa na maboma mwakuti bwerani mudzawone. M’mbuto mwakukhala wakutepa, ifepano timbawona kuti ni mwayi tikambapirira pomwe tikuwengedwa. (Mab. 5:41; Aro. 5:4, 5) Tikakhala tikuyezedwa na wanthu wa m’banja mwathu, bzingakhale bzakunesa kupirira. Iwo akabva kuti tikufuna kupfunza bza Yahova, angakumbuke kuti ifepano tapumpsidwa. Ndipo winango angakumbuke kuti msolo wathu ukuphata lini bwino basa. (Ndendemezerani na Marko 3:21.) Thangwe ra bzimwebzi, iwo angatizunze mwa kucita kutimenya ayai kutitukwana. Bzimwebzi bzin’funika lini kutidabwisa. Jezu adalewa kuti: “Anyamadulanthaka wa munthu an’dzakhala wanthu wa m’banja mwace caiwo.”—Mat. 10:36. w21.03 21 ¶6-7

Mukaperekeza munthu ku mpfunziro lace la Bibliya, tetekerani bwino-bwino pomwe mpfunzisi na nyakupfunza akulewalewa. Mukacita bzimwebzi, mun’dzakhala mudakonzeka kuti mulewelewe bzikafunikira. Koma mun’funika kuyamba mwakumbuka mukanati kulewalewa. Mwa ciratizo, imwepo mun’funika lini kulewalewa kwene-kwene, mun’funika lini kugwatiza mpfunzisi akakhala akulewalewa ayai kuyambisa nkhani yomwe iri mu ndime inango. Tsono na mafala yacigwatho, ciratizo, ayai mbvunzo, imwepo mungathandizire nfundo yomwe ikufotokozedwayo. Nthawe zinango imwepo mungabzibve kuti mulibe bzakulewa pa ndimeyo, tsono penu mumbamufuna nyakupfunzayo ndipo mumbacita naye thupo, mun’dzacita ciri-centse kuti mumuthandize kuti ayende patsogolo. Penu bzingathandize, imwepo mungamufotokozere nyakupfunza wa Bibliya momwe mudapfunzira cadidi, momwe mudakundira mabvuto, ayai momwe Yahova adakuthandizirani pa moyo wanu. (Sal. 78:4, 7) Bzimwebzi bzingakhale bzinthu bzomwe nyakupfunza wa Bibliya angafune kubzibva. Ndipo bzimwebzi bzingamupase mphanvu kuti ayende patsogolo mpaka kufika pa kubatizidwa. w21.03 10 ¶9-10

Kodi mbani omwe ambacitisa kuti bzinthu bzitifambire bwino pa basa lakupalizira? Mpostolo Paulo adatawira mbvunzoyu pomwe adanemba bza gwere la ku Kolinto, iye adati: “Ine ndidabzala ndipo Apolo adathirizira, tsono Mulungu ndiye omwe akhakulisa. Tenepo, nyakubzala ayai nyakuthirizira n’cinthu lini, koma Mulungu omwe ambakulisa. Ine ndidabzala, Apolo adathirizira tsono Mulungu ndiye akhakulisa. Pakuti omwe ambabzala ayai omwe ambathirizira n’cinthu lini, koma Mulungu ndiye omwe ambakulisa.” (1Ako. 3:6, 7) Tenepo ninga Paulo, bzinthu bzikatifambira bwino pa basa lathu lakupalizira, tin’funika kumbawona kuti ni Yahova omwe wacitisa. Kodi tingalatize tani kuti timbatenda mwayi omwe tinawo wakuphata basa pabodzi na Mulungu, Kristu na wanjo? (2Ako. 6:1) Mwa kumbapalizira na nyongo na kunyang’ana mipata yakuti timbauze winango mafala ya Mulungu. Tin’funika lini kumbandobzala mbeu za cadidi ca Mulungu, koma tin’funikambo kumbazithirizira. Na tenepo, munthu akalatiza kuti akufunisisa kudziwa bzizinji, tin’funika kucita ciri-centse kuti timbamuzungire. Cakulinga cathu pomwe tikucita bzimwebzi, cikhale cakuyambisa pfunziro la Bibliya. Ndipo pomwe pfunzirolo likuyenda patsogolo, timbakomedwa tikawona momwe Yahova akuthandizira nyakupfunza Bibliyayo kucinja bzinthu pa moyo wace. w20.05 30-31 ¶14, 16-18