Janeiro

Jezu adazimbula mwakukhwimika kuti atsogoleri wa magereja akhapfunzisa bzinthu bzakunama. Mwa ciratizo, iye adalewa kuti Afarizeu akhali wapezi-pezi. Iwo akhacita thupo na nkhani ya kusamba m’manja, m’mbuto mwakucita thupo na kusamalira abereki wawo. (Mat. 15:1-11) Jezu alibe kuzeza kulewa cadidi thangwe ra kukumbukira kuti atsogoleri wa magerejawo angadakalipa. Jezu adalewambo kuti Afarizeuwo akhapfunzisa bzinthu bzakunama. Ndipo iye alibe kulewa kuti Mulungu akhabvuma bzentse bzomwe wanthu wa magerejawo akhakhulupira. M’mbuto mwace, iye adalewa kuti wanthu azinji ali mu mseu ukulu omwe ukuyendesa ku infa, ndipo ni wanthu ang’ono-ng’ono omwe akufamba mu msewu omwe ukuyenda ku moyo. (Mat. 7:13, 14) Jezu adalewambo kuti wanthu winango angadadzawoneka ninga kuti akutumikira Mulungu, pomwe cadidi n’cakuti akumutumikira lini na pang’onopo. Ndipopa iye adaticenjeza kuti: “Khalani tceru na apolofeta wakunama omwe ambabwera kwa imwe adabvala khanda la bira, koma mkati mwawo ni mphumphi zakulusa. Kulewa cadidi, wanthu amwewa mun’dzawazindikira thangwe ra bzisapo bzawo.” — Mat. 7:15-20. w21.05 9 ¶7-8

Ana akhadalowodwa na Mlevi wakucemeredwa Elikana, omwe akhamufuna kwene-kwene. Tsono Elikana akhana mkazi winango pomwe wakucemeredwa Penina. Elikana akhafuna kwene-kwene Ana kuposa Penina. Tsono ‘Penina akhana wana, koma Ana akhalibe.’ Thangwe ra bzimwebzi, Penina akhamuseka Ana kuti ‘amukhukhumudwise.’ Bzimwebzi bzikhamuwawa kwene-kwene Anayo! Iye ‘akhalira ndipo akhadya lini.’ Napo bziri tenepo, Bibliya limbalewa lini kuti Ana adayezera kubwezera. M’mbuto mwace, iye adafotokozera Yahova bzomwe bzikhali mu mtima mwace ndipo akhakhulupira kuti Yahovayo angadamuthandiza kumalisa bvutolo. (1 Sam. 1:2, 6, 7, 10) Kodi tingapfunze ciyani na ciratizo ca Ana? Mukawona kuti munthu akuyezera kucita namwe mpikisano, kumbukirani kuti imwepo mungakwanise kubziphata pa nkhaniyo. Lekani kubvuma kucita naye mapici. M’mbuto mwa kubwezera cakuipa na cakuipa, yezerani kukhazikisa mtendere na munthuyo. (Aro. 12:17-21) Napo iye akusaya kufuna, imwepo mun’dzapitiriza kukhala na mtendere mu mtima mwanu. w21.07 17-18 ¶13-14

Kusirira kwakuipa kudacitisa Djuda Sikaliyoti kufika pa kugulisa Jezu. Pakuyamba Djuda akhali munthu wabwino. (Luka 6:13, 16) Bzikuwoneka kuti Djuda akhali munthu wa luso na wakukhulupirika. Ndipopa Jezu adamupasa ugo bwakuti ambakoye kaxa ya kobiri. Tsono na kupita kwa nthawe, Djuda adadzayamba kuba, napo kuti akhabva mwakubwereza-bwereza bzomwe Jezu akhalewa pa nkhani ya kusirira kwakuipa. (Marko 7:22, 23; Luka 11:39) Kusirira kwakuipa kwa Djuda kudawonekera pomwe Jezu akhadasala pang’ono kuphedwa. Jezu na anyakupfunza wace, pabodzi na Mariya na m’bale wace Marta, akhali kumui kwa Simau nyamapere. Pa nthawe ya kudya, Mariya adaima ndipo adathululira Jezu mu msolo mafuta yakununtcira, yomwe yakhali yakuumira kwene-kwene. Djuda na anyakupfunza winango adaipidwa kwene-kwene na bzomwe Mariya adacitabzo. Pinango anyakupfunza winangowo adakumbuka kuti bzikhali bwino kugulisa mafutayo aciphatisa basa kobirizo pa basa lakupalizira. Tsono Djuda akhakumbuka lini tenepoyo. Iye “akhali mbava” ndipo akhafuna kuba kobiri za m’kaxa. — Ju. 12:2-6; Mat. 26:6-16; Luka 22:3-6. w21.06 18 ¶12-13

Kodi imwepo nthawe zinango mumbabzibva kuti mabasa yomwe munayo yakuwandirani, ndipo mukutazira kucita bzinthu bzinango bzomwe mumbafuna kucita? Penu mun’ti inde, imwepo mun’bvesesa bzomwe bzidacitikira Paulo. Iye akhambacita thupo kwene-kwene, sikuti na gwere libodzi, koma na “magwere [yentse].” (2 Ako. 11:23-28) Kodi imwepo mukugumana na bvuto la matenda lomwe likukucitisani kusaya kukhala wakukondwa? Paulo adabonera na ‘munga m’thupi’ yomwe pinango yakhali matenda yomwe akhatazira kuyamalisa. (2 Ako. 12:7-10) Kodi imwepo mumbabzibva kuti mudatepa thangwe ra khalidwe lanu? Bzimwebzi bzidacitikirambo Paulo. Iye adabzicemera kuti ‘nyakubonerane,’ thangwe rakuti akhacita nyongo yakuti acite bzinthu bzabwino, tsono bzikhamunesa. (Aro. 7:21-24) Napo kuti Paulo adagumana na mabvuto yentseneya, iye adapitiriza kutumikira Yahova. Kodi n’ciyani cidamupasa mphanvu kuti apitirize kumutumikira? Napo kuti Paulo akhadziwa kuti akhacita bzinthu bzinango bzakuphonyeka thangwe ra kuperewera, iye akhakhulupira kwene-kwene cakulombolera. w21.04 21-22 ¶7-8

Pomwe Adamu adaphonya, iye adaluza mwayi wakukhala na moyo wakusaya kumala, sikuti mwayi wa iye yekha, koma na wa wana wace wentse. Adamu akhalibe mathangwe yakubveka yakucitira bzinthu bzakuphonyeka bzomwe iye adacitabzo. Iye adaphonya utowa. Tsono tani pakulewa bza wana wace? Wanawo alibe kuphonya cinthu ciri-centse ndipo alibe kuthandizira kuphonya kwa Adamu. (Aro. 5:12, 14) Adamu adathemera kufa thangwe ra bzomwe iye adacita. Tsono kodi Yahova adacita cinthu ciri-centse kuti wana wa Adamu adzakhale na moyo wakusaya kumala? Inde! Pambuyo pa Adamu kuphonya, Yahova adalatiziratu momwe angadadzalombolera wanthu azinji, wa mbadwe za Adamu ku pikado na infa. (Ciy. 3:15) Thangwe ra cakulombolera, timbakhala pa uxamwali bwakulimba na Yahova napo kuti ndife wanthu wakuperewera. Thangwe ra cakulombolera, mabasa yentse ya Dyabu yan’dzapfudzidwa. (1 Ju. 3:8) Thangwe ra cakulombolera, bzomwe Yahova akhafuna kucita na dzikoli bzin’dzakwanisika. Bzomwe bzikuthandauza kuti dziko lentse la pantsi lin’dzakhala paraizo. w21.04 14 ¶1; 19 ¶17

Thimu likulu la amuna na akazi wakucokera m’madziko mazinji na wa bzirewedwe bzakusiyana-siyana likhadakonkhana pa mbuto ibodzi. Pa ntsiku imweyo padacitika cinthu cakudabwisa kwene-kwene. Adjuda winango mwadzidzidzi adayamba kulewalewa bzirewedwe bzakusiyana-siyana bza wanthu wa madziko yakusiyana-siyana. Bzimwebzi bzidadabwisa wanthuwo. Tsono bzomwe Adjuda wale adauza wanthuwo na bzomwe mpostolo Paulo adauza wentsene bzidawadabwisiratu kwene-kwene. Bzomwe bzidawadabwisabzo, bzikuphatanidza mafala yomwe adapfunzisidwa yakuti iwo angadadzapulumusidwa thangwe ra kukhulupira ntsembe ya Jezu Kristu. Thimulo lidakomedwa kwene-kwene na mafalayo. Wanthuwo adadabwa, mpaka adabvunza kuti: “Kodi tin’funika kucita ciyani?” Pedru adawatawira kuti: “Ali-wentse abatizidwe.” (Mab. 2:37, 38) Bzomwe bzidadzacitika bzikhali bzakudabwisa kwene-kwene. Wanthu wakukwana 3000 adabatizidwa acikhala anyakupfunza wa Kristu. Kumweku kukhali kuyamba kwa basa likulu lakupfunzisa wanthu lomwe Jezu adauza anyakupfunza wace kuti alicite. Ateweri wace akupitiriza kucita basa limweri mpaka ntsiku zino. w21.06 2 ¶1-2

Pinango tingakhale ku mbuto komwe mpsakunesa kuyambisa mapfunziro ya Bibliya. Wanthu winango angafune lini kubva mafala yathu ayai angayanyoze. Kodi n’ciyani comwe cingatithandize kuti tileke kubwerera m’mbuyo? Kumbukirani kuti bzinthu pa moyo wa wanthu bzingacinje mwakamfulumize mu dziko lakuipali. Ndipo wanthu omwe pakuyamba akhafuna lini kutetekera mafala yathu angafike pakuwona kuti an’funika kutsogoleredwa na Mulungu. (Mat. 5:3) Wanthu winango omwe kale-kale akhalamba kutambira mabukhu yathu, na kupita kwa nthawe adabvuma pfunziro la Bibliya. Ndipo ifepano timbadziwambo kuti Yahova ni Mwenekaciro wa kubvuna. (Mat. 9:38) Iye akufuna kuti tibzale na kuthirizira, tsono ndiye omwe ambakulisa. Ndipo mpsakulimbikisa kudziwa kuti napo penu tikukwanisa lini kucitisa pfunziro la Bibliya pakali pano, Yahova ambasimba nyongo yathu, sikuti bzomwe timbakwanisa kucita! w21.07 6 ¶14

Yahova adapasa wanthu ufulu bwakusankhula kukhala na wana, pabodzi na udindo bwa kuwapfunzisa kufuna Yahovayo na kumutumikira. Yahova adapasa anjo maluso mazinji. Tsono iye alibe kuwapasa ufulu bwakusankhula kukhala na wana. Tenepo, penu imwepo ndimwe m’bereki, mbatendani mwayi omwe munawo wakukhala na wana. Abereki adapasidwa udindo bwakufunika kwene-kwene bwakuti ‘ambalere na kupfunzisa [wana wawo] mwakubverana na kufuna kwa Yahova.’ (Aef. 6:4; Bzak. 6:5-7) Kuti gulu la Mulungu lithandize abereki kupfunzisa wana wawo, iro limbapereka bzinthu bzizinji bzakupfunzisira bzakucokera m’Bibliya, ninga mabukhu, mavidiyo, nyimbo na bzinthu bzomwe bziri pa interneti. Kulewa cadidi, Baba wathu wa kudzulu pabodzi na Mwana wace, ambafuna wana wathu. (Luka 18:15-17) Abereki akambathemba Yahova na kucita ciri-centse comwe angakwanise kuti alere wana wawo, Yahovayo ambakomedwa. Ndipo abereki amwewa ambathandizambo wana wawowo kuti akhale na cidikhiro cakuti adzacitembo mbali ya wanthu wa m’banja la Yahova mpaka kale-kale! w21.08 5 ¶9

Wanthu winango ambakumbuka kuti kukhala na cikhulupiro kumbathandauza kukhulupira cinthu uko tiribe umboni. Tsono ninga momwe Bibliya limbalewera, cimweci n’cikhulupiro lini cacadidi. Bibliya limbafotokoza kuti cikhulupiro cimbacokera pakukhala na umboni. Tenepo, napo kuti timbakwanisa lini kuwona Yahova, Jezu na Umambo, ifepano tina umboni bwakuti iwo alipo ndipo Umambobo bulipombo. (Aheb. 11:3) Siyentista m’bodzi, omwe adakhala Mboni ya Yahova, adalewa kuti: “Mboni za Yahova zina umboni bwa bzinthu bzomwe zimbakhulupira; izo zimbanyoza lini bzomwe siyentsiya imbalewa.” Pinango tingabzibvunze kuti: ‘Penu pana umboni bwakulatiza kuti Mulengi alipo, thangwe ranyi wanthu azinji ambakhulupira kuti Mulungu alibe kulenga moyo?’ Ni thangwe rakuti wanthu winango akanati kufufudza kuti akhale na umboni. Robert, omwe tsapano ni Mboni ya Yahova, adalewa kuti: “Inepano ndikhakhulupira lini kuti Mulengi alipo thangwe rakuti nkhani ya cirengedwe ikhagumidwa lini ku xikola. Ndidakhala na nzeru zimwezi kufikira pomwe ndidapfitsa magole 22, pa nthawe yomwe ndidabva kuti Bibliya limbatipasa mathangwe yakubveka yakukhulupira kuti Mulungu ni Mulengi wa bzinthu bzentse.” w21.08 15 ¶4-5

Ifepano tingadziwe kuti Yahova ngwabwino mwa kuwerenga Bibliya na kubvambo bzisimbo bzomwe abale wathu adatambira. Tsono ifepano tin’dzabvesesa caibzo kuti Yahova ngwabwino tikacita kulawidza tekha. Kuti tibvesese bzimwebzi, mbatiyezezereni kuti tikufuna kucita utumiki bwa nthawe zentse. Tsono kuti tikwanise kucita bzimwebzo, tin’funika lini kukhala na bzinthu bzizinji pa moyo wathu. Timbadziwa kuti Jezu adalewa kuti tikaikha Umambo bwa Mulungu pa mbuto yakuyamba, Yahova an’dzatipasa bzinthu bzomwe tikufunikira. Koma tikanati kuwona Yahova akuticitira bzimwebzi. (Mat. 6:33) Tsono thangwe ra kukhulupira mafala ya Jezuya, timbakhala na moyo wakusaya kufuna bzinthu bzizinji, timbacepesa nthawe yakuphata basa ndipo timbacita bzinthu bzizinji pa basa lakupalizira. Tikambacita bzimwebzi, timbawona kuti Yahova ambatipasa bzomwe timbafunikira. Tekhafe ‘[timbalawidza]’ ticiwona kuti Yahova ngwabwino. w21.08 26 ¶2

Kodi ntsiku zino timbagumanambo na bvuto ninga limweri? Inde. Atsogoleri azinji wa magereja ambafuna kuti wanthu wakudala na omwe ambawonedwa na dzikoli kuti mbanzeru kwene-kwene apite magereja yawo. Iwo ambalekerera wanthuwo kupita magereja yawoyo, napo acidziwa kuti wanthuwo ambacita bzinthu bzomwe bzimbabverana lini na mitemo ya Mulungu. Atsogoleri abodzi-bodziwo ambanyoza atumiki wakukhulupirika wa Yahova thangwe rakuti iwo mbakucena ndipo ambabverana lini na makhalidwe ya dzikoli. Tsono ninga momwe Paulo adalewera, Mulungu adasankhula wanthu omwe ambawoneka kuti mbakunyozeka. (1 Ako. 1:26-29) Kwa Yahova, atumiki wace wentse wakukhulupirika mbakufunika kwene-kwene kwa iye. Kodi n’ciyani comwe cingatithandize kuleka kusoceresedwa na kakumbukidwe ka dzikoli? (Mat. 11:25, 26) Ni kuleka kutewezera makumbukidwe yace pakulewa bza momwe wanthu ambawonera atumiki wa Mulungu. Dziwani kuti Yahova ambaphatisa basa wanthu wakubzicepesa kuti acite bzomwe iye ambafuna. (Sal. 138:6) Ndipo kumbukiranimbo bzinthu bzizinji bzomwe Yahova akucita mwakuphatisa basa wanthu omwe dzikoli limbawawona ninga kuti mbakusaya nzeru ayai mbakusaya kupfunza. w21.05 8 ¶1; 9 ¶5-6

Mpostolo Paulo adatenda thandizo lomwe adapasidwa. Iye akhali wakubzicepesa ndipo adabvuma thandizo la abale na mpfumakazi zace. (Afil. 2:19-22) Acikulire, imwepo mungalatize kutenda maswaka ya m’gwere mwanu mu njira zizinji. Iwo akafuna kukuthandizani, ninga kukupasani buleya, kuyenda kukakugulirani bzinthu ayai kukucitirani bzinthu bzinango bzomwe mukufunikira, mbabvumani ndipo mbatendani thandizo lawolo. Kumbukirani kuti thandizolo ni njira ibodzi yomwe Yahova akukulatizirani lufoyi. Ndipo imwepo mun’dzadabwa na uxamwali bomwe mun’dzakhala nabo na maswakayo. Thandizani axamwali wanuwo kuti akhalembo wakufendererana na Yahova. Ndipo auzeni kuti mumbakomedwa kuwona maswaka yakucita bzizinji kuti yathandize gwere. Khalani wakukonzeka kumbaceza nawo muciwafotokozera bza moyo wanu. Mukacita bzimwebzi, imwepo ‘mun’dzalatiza kuti mukutenda’ Yahova thangwe ra maswaka yomwe iye adayakwewa kuti yabwere m’gwere. — Akol. 3:15; Ju. 6:44; 1 Ates. 5:18. w21.09 12 ¶12-13

Yahova ambafuna abale na mpfumakazi zathu. Tsono bziribe kupusa kuna ifepano kufuna abale na mpfumakazi zathuzo na kubzibva kuti timbafunidwambo. Bzimwebzi bzimbacitika thangwe rakuti tidakulira mbuto zakusiyana-siyana ndipo tina bzikhalidwe bzakusiyana. Ndipo tentsenefe timbacita bzinthu bzakuphonyeka bzomwe bzimbadekera lini anzathu. Tsono bzentsenebzi bziribe basa, tentsenefe tingalimbise lufoyi lomwe liripo pakati pathu. Kodi tingacite tani? Mwa kutewezera Baba wathu pakulatiza lufoyi kuna abale na mpfumakazi zathu. (Aef. 5:1, 2; 1 Ju. 4:19) Munthu wa ntsisi ambanyang’ana njira zakuthandizira wanthu na kuwatsangalaza. Momwe Jezu akhacitira bzinthu na wanthu bzimbalatiza kuti Yahova ni Mulungu wa ntsisi. (Ju. 5:19) Pa nthawe inango, pomwe Jezu adawona thimu la wanthu, iye “adawabvera ntsisi, thangwe wanthuwo akhali wakupwetekeka na wakumwazika ninga mabira yakusaya makabusa.” (Mat. 9:36) Jezu alibe kundowabvera ntsisi wanthuwo, koma iye adacita ciri-centse kuti awathandize. Iye adapoza atenda ndipo adatsangalaza wentse “wakuneta na wakulemedwa.” — Mat. 11:28-30; 14:14. w21.09 22 ¶10-11

Yahova ambafuna kubvera ntsisi wanthu. Mpostolo Paulo adafuliziridwa kunemba kuti Mulungu “ngwantsisi kwene-kwene.” Na mafalaya, Paulo akhalewa kuti Mulungu ngwantsisi kwene-kwene thangwe rakuti akupereka cidikhiro kwa atumiki wace wakudzozedwa wakuperewera kuti akakhale na moyo wakusaya kumala kudzulu. (Aef. 2:4-7) Tsono Yahova ambandolatiza lini ntsisi kuna atumiki wace wakudzozedwa okha. Nyakunemba Salimo Davide, adanemba kuti: “Yahova ngwabwino na wentse ndipo ntsisi zace zimbawonekera pa mabasa yace yentse.” (Sal. 145:9) Pakuti Yahova ambafuna wanthu, iye ambabvera ntsisi munthu pakakhala kuti pana mathangwe yakucitira bzimwebzo. Kuposa munthu ali-wentse, Jezu ambadziwa kuti Yahova ambafuna kubvera ntsisi wanthu. Pomwe Jezu akhanati kubwera pa dziko la pantsi, iye na Yahova adakhala pabodzi kudzulu magole mazinji. (Mim. 8:30, 31) Jezu adawona Baba wace akubvera ntsisi wanthu wa pikado kazinji-kentse. (Sal. 78:37-42) Ndipo pomwe akhapfunzisa wanthu, kawiri-kawiri akhalewa bza khalidwe labwino la Baba waceli. w21.10 8-9 ¶4-5

Yahova adatawira mpemboyo na mafala yakukuwa yakucokera kudzulu yakulewa kuti iye angadalemekeza dzina lace. Pa utumiki bwace, Jezu adalemekeza dzina la Baba wace. (Ju. 17:26) Ndipopa Akristau wacadidi ambawona kuti ni mwayi kuphatisa basa dzina la Mulungu na kulidziwisambo kuna wanthu winango. Pomwe gwere lacikristau lidakhazikisidwa, Yahova “adabvumambo wanthu wa mitundu inango pa nthawe yakuyamba kuti kucokera mwa iwo, asankhulembo wanthu wakudziwika na dzina lace.” (Mab. 15:14) Akristauwo akhakomedwa kuphatisa basa dzina la Mulungu na kulidziwisambo kuna wanthu winango. Apostolo pabodzi na anyakupfunza akhaphatisa basa dzina la Mulungu pomwe iwo akhapalizira na pomwe akhanemba mabukhu ya m’Bibliya. Na bzimwebzi, iwo adalatiza kuti akhali okhawo omwe akhadziwisa dzina la Mulungu. (Mab. 2:14, 21) Mpsibodzi-bodzimbo na Mboni za Yahova ntsiku zino. Izo ndizo zokha zomwe zimbadziwika na dzina la Yahova. w21.10 20-21 ¶8-10

Lufoyi lacadidi la Mulungu lin’dzakhala mpaka kale-kale. Mafala yamweya yambagumanika maulendo 26 mu bukhu la Salimo 136. Mu vesi lakuyamba timbawerenga kuti: “Tendani Yahova, pakuti iye n’gwabwino; lufoyi lace lacadidi lin’dzakhala mpaka kale-kale.” (Sal. 136:1) M’mavesi 2 mpaka 26 timbagumana koro yakulewa kuti: “Pakuti lufoyi lace lacadidi lin’dzakhala mpaka kale-kale.” Pomwe tikuwerenga salimo limweri, timbadabwa na njira zizinji za momwe Yahova ambalatizira lufoyi lace lacadidi mwakusaya kulekeza. Koro yakuti “pakuti lufoyi lace lacadidi lin’dzakhala mpaka kale-kale,” imbatitsimikizira kuti lufoyi lomwe Mulungu analo kuna wanthu wace limbacinja lini. Mpsakudekeza kwene-kwene kudziwa kuti Yahova ambasiya lini kufuna atumiki wace mwakamfulumize! Koma, iye akayamba kulatiza lufoyi munthu omwe akumutumikira, ambasiya lini kucita bzimwebzo, maka-maka pa nthawe yomwe munthuyo akugumana na mabvuto. Momwe timbagumanira phindu: Kudziwa kuti Yahova adaphatana nafe kumbatipasa mpfatso na mphanvu zomwe timbafunikira kuti tipirire mabvuto yathu na kupitiriza kumutumikira. — Sal. 31:7. w21.11 4 ¶9-10

Kodi imwepo nthawe zinango mumbakhala na thupo thangwe ra kukumbukira bzinthu bzomwe bzin’dzacitika kutsogoloku, bzomwe ni kupfudzidwa kwa magereja yakunama, kuphindukiridwa na Gogi wa ku Magogi pabodzi na nkhondo ya Armagedo? Kodi imwepo mudabzibvunza kale kuti: ‘Nthaweyo ikadzafika, kodi nin’dzakwanisa kukhala wakulimba ndikadzawona bzinthu bzimwebzi bzikucitika?’ Penu mudakumbuka kale tenepo, mafala ya Jezu yomwe yali mu vesi la leroya yangakuthandizeni. Jezu adauza anyakupfunza wace kuti: “Lekani kuneseka mu mtima mwanu, khulupirani.” Cikhulupiro camphanvu cin’dzatithandiza kukhala wakukhwimika pa bzomwe bzin’dzacitika kutsogolo. Ifepano tingalimbise cikhulupiro cathu kuti tidzakwanise kupirira mabvuto yomwe tin’dzagumana nayo kutsogolo mwa kuwona bzomwe tingacite tikagumana na mabvuto yomwe yambayeza cikhulupiro cathu ntsiku zino. Tikambakumbukira bzimwebzi, tin’dzawona mbali pa moyo wathu zomwe tin’funika kulimbisa cikhulupiro cathu. Mabvuto yentse yomwe tingagumane nayo yan’dzacitisa kuti cikhulupiro cathu cikhale cakulimba. Bzimwebzi bzin’dzatithandiza kupirira mabvuto yomwe tin’dzagumana nayo kutsogolo. w21.11 20 ¶1-2

Mpostolo Paulo adapasa mphanvu Timotio pabodzi na Akristau wentse kuti akwanirise mbali zentse za utumiki bwawo. (2 Tim. 4:5) Tsono nthawe zinango bzimbatinesa kucita bzimwebzi. Mwa ciratizo, kumbukirani abale wathu omwe akukhala m’madziko yomwe basa lathu ndakuletsedwa. Wanthu wa Yahova ambagumana na mabvuto yakusiyana-siyana yomwe yambawamalisa mphanvu. Mwa ciratizo, abale azinji ambamala nthawe izinji akuphata basa kuti akwanise kudyesa mabanja yawo. Iwo ambafuna kucita bzizinji mu utumiki, tsono kuphampha kwa sumana ambakhala alibe mphanvu yakucita bzimwebzi. Winango thangwe ra kuduwala ayai kukalamba, ambakwanisa lini kucita bzinthu bzizinji pakutumikira Yahova, ndipo ambandokhala ali pamui pawo. Winangombo nthawe zentse ambabziwona kuti mbakusaya kufunika kwa Yahova. Bziribe basa kuti ni mabvuto yaponi yomwe tikugumana nayo, Yahova angatipase mphanvu kuti tipitirize kumutumikira ninga momwe tingakwanisire. w21.05 20 ¶1-3

Nthawe zinango, wanthu winango angatingingimize kuti ticite basa lomwe lingatitazise kunamata Yahova. Iwo akacita bzimwebzi, tin’funika kusankhula bzinthu mwanzeru. Onani nfundo yabwino yakugumanika pa Mwambo 19:19, yomwe mafala yace manango yambalewa kuti: “Lekani kubvala bzakubvala bzakukonzedwa na mitundu miwiri ya usalu bwakusanganiza.” Lamulo limweri likhathandiza Ajirayeri kukhala wakusiyana na mitundu yomwe ikhawazungulira. Ntsiku zino, timbatcenkha lini kubvala bzakubvala bza nguwo bza mitundu yakusiyana-siyana. Koma timbatcenkha kukhala ninga wanthu omwe ambakhulupira bzinthu bzomwe bzimbapitana na bzomwe Bibliya limbapfunzisa. N’cadidi kuti timbafuna adzinza wathu ndipo timbafunambo wanthu wentse. Tsono, bzikawoneka kuti mpsakufunika kutalikirana nawo, ifepano pakuti ndife atumiki wa Yahova, timbakhala wakukonzeka kucita bzimwebzo. Kumbukirani kuti kusankhulidwa kuti ticite basa la Mulungu kumbacita mbali yakukhala wakucena. Bzimwebzi mpsakufunika penu tin’funa kukhala wakucena. — 2 Ako. 6:14-16; 1 Ped. 4:3, 4. w21.12 5 ¶14; 6 ¶16

Mseu wakuyendesa ku moyo ungagumanike. Jezu adalewa kuti: “Mukapitiriza kubvera fala langu, ndimwedi anyakupfunza wangu. Ndipo imwepo mun’dzadziwa cadidi, ndipo cadidico cin’dzakutsudzulani.” (Ju. 8:31, 32) Tikukutendani thangwe rakuti imwepo mulibe kutewera mthithi wa wanthu koma mudanyang’ana cadidi. Imwepo mudayamba kupfunza Bibliya na nyongo kuti mudziwe bzomwe Mulungu ambafuna kuna ifepano, ndipo mudabvera bzomwe Jezu adapfunzisa. Imwepo mudapfunza kuti Yahova ambafuna kuti tilambe bzipfunziso bza magereja yakunama na kutcenkha kumbacita maphwando na bzicito bzomwe Bibliya limbabvumiza lini. Imwepo mudapfunza pomwe kuti kucita bzomwe Yahova ambafuna na kutcenkha bzomwe iye ambafuna lini bzingakhale bzakunesa kwene-kwene kubzicita. (Mat. 10:34-36) Bziribe kukhala bzakupusa kucinja bzinthu pa moyo wanu. Napo bziri tenepo, imwepo mudacinja thangwe ra lufoyi lomwe munalo kuna Baba wanu wakudzulu. Yahova adakomedwa namwe kwene-kwene! — Mim. 27:11. w21.12 22 ¶3; 23 ¶5

Mozeji akhali munthu wabwino omwe tingamutewezere. Iye adabvuma malango pomwe adaphonya cinthu cikulu. Pa nthawe inango iye adakalipa ndipo alibe kulemekeza Yahova. Thangwe ra bzimwebzi, iye adaluza mwayi wakukapita m’dziko lomwe Mulungu adapasa Ajirayeri. (Mirew. 20:1-13) Pomwe Mozeji adakumbira kuti Yahova aiwone pomwe nkhaniyo, Yahovayo adamuuza kuti: “Leka kudzandiuza pomwe nkhani imweyi.” (Bzak. 3:23-27) Mozeji alibe kukalipa na bzimwebzi. Iye adabvuma bzomwe Yahova adasankhula ndipo Yahovayo adapitiriza kumuphatisa basa pakutsogolera Ajirayeri. (Bzak. 4:1) Mozeji ni munthu wabwino omwe ifepano tingamutewezere pa nkhani ya kubvuma malango. Mozeji adalatiza kuti adabvuma malango ya Yahova mwa kupitiriza kumutumikira mwakukhulupirika napo pomwe adaluza mwayi omwe ukhali wakufunika kwene-kwene kwa iye. Tikatewezera ciratizo ca wanthu wakukhulupirika ninga Mozeji, tin’dzakhalambo wakukonzeka kubvuma malango. (Mim. 4:11-13) Abale na mpfumakazi zizinji ambacita bzimwebzi. w22.02 11 ¶9-10

Mu gole la 32 EC, Lazaro, xamwali wa Jezu, adaduwala acifa. (Ju. 11:3, 14) Lazaroyo akhana mpfumakazi ziwiri, Mariya na Marta, ndipo Jezu akhawafuna kwene-kwene. Pomwe Marta adabva kuti Jezu akubwera, iye adayenda mwakamfulumize kuti akagumane naye. Ndokumbukirani momwe iye akhadasunamira pomwe adalewa mafala yakuti: “Mbuya, bzingadakhala kuti mukhali kuno, m’bale wangu angadafa lini.” (Ju. 11:21, 32, 33) Jezu adalira thangwe ra kuwona kuti Mariya na Marta akhawawidwa na infa ya m’bale wawoyo. Penu imwepo mwafedwa munthu omwe mumbamufuna, Yahova ambabvesesa momwe mumbabvera. Jezu ambalatiza “makhalidwe” caiyo ya Baba wace. (Aheb. 1:3) Pomwe Jezu adalira, iye adalatiza momwe Baba wace ambabvera tikafedwa munthu omwe timbamufuna. (Ju. 14:9) Penu imwepo mwafedwa munthu omwe mumbamufuna, mungakhale na citsimikizo centse cakuti Yahova ambawona kusunama kwanu ndipo ambakubverani ntsisi. Iye ambafuna kukutsangalazani. — Sal. 34:18; 147:3. w22.01 15 ¶5-7

Imwepo mun’dzagumana phindu likulu kwene-kwene mukambakhala na nthawe ya kulewalewa, kutetekera na kukumbukira bza Yahova. Cakuyamba, imwepo mun’dzasankhula bzinthu mwa nzeru. Bibliya limbatitsimikizira kuti: “Omwe an’famba na wanthu wanzeru, an’dzakhalambo wanzeru.” (Mim. 13:20) Caciwiri, imwepo mun’dzakhala mpfunzisi wabwino. Pomwe tikupfunza Bibliya na munthu cakulinga cathu cikulu cimbakhala kuthandiza munthuyo kukhala pa uxamwali bwakulimba na Yahova. Ifepano tikambapemba kwene-kwene kwa Yahova lufoyi lathu kwa iye lin’dzathimizirika ndipo tin’dzakhala wakukonzeka kupfunzisa nyakupfunza wathu kuti ambamufunembo. Bzimwebzi ni bzomwe Jezu akhacita. Iye adalatiza kwa anyakupfunza wace kuti Yahova ngwalufoyi kwene-kwene, bzomwe bzidacitisambo anyakupfunzawo kufuna Yahova. (Ju. 17:25, 26) Cacitatu, cikhulupiro canu cin’dzalimba. Kumbukirani pa nthawe yomwe mudakumbira Yahova kuti akutsogolereni, akuthandizeni na kukutsangalazani. Nthawe zentse pomwe iye akhatawira mipembo yomwe mukhacita, cikhulupiro canu cikhalimba. — 1 Ju. 5:15. w22.01 30 ¶15-17

Yahova ambatiuza kuti ticose nzeru na makhalidwe yakuipa thangwe rakuti ambatifuna kwene-kwene ndipo ambafuna kuti tipfatse na moyo. (Zai. 48:17, 18) Iye ambadziwa kuti wanthu omwe ambacita bzinthu bzakuipa ambabzidzonga okha na kudzongambo anzawo. Ndipo iye ambakomedwa lini akawona kuti tikubzidzonga tekha na kudzongambo anzathu. Axamwali na adzinza wathu winango angambatiseke thangwe rakuti tikucinja unthu bwathu. (1 Ped. 4:3, 4) Iwo angatiuze kuti tina ufulu bwakucita bzomwe tin’funa ndipo tin’funika lini kubvuma kuti munthu ali-wentse atiuze bzakucita. Tsono omwe ambalamba kubvera mitemo ya Yahova ali lini pa ufulu. Cadidi cace n’cakuti iwo ambalekerera kuti dziko lomwe likutongedwa na Sathani ndiro liwauze bzakucita. (Aro. 12:1, 2) Ifepano tin’dzasankhula tekha penu tin’funa kupitiriza kukhala na unthu bwakale bwakutsogoleredwa na pikado pabodzi na dziko la Sathaniri ayai kubvuma kuti Yahova aticinje kuti tikhale wanthu wabwino. — Zai. 64:8. w22.03 3 ¶6-7

Tikambakumbukira bzomwe Fala la Mulungu limbalewa, timbakhala na makumbukidwe yabwino bzikakhala kuti tiri pa mabvuto. Onani momwe Bibliya lidathandizira mkazi mamsiwa. Mkulu munango wa gwere adalewa kuti mkaziyo angapfunze nfundo zakufunika kwene-kwene akambawerenga bukhu la Djobi. Pomwe mkaziyo adadzacitadi bzimwebzi, iye adandothamangira kulewa makumbukidwe yakuphonyeka ya Djobi. M’makumbukidwe mwace, mkaziyo adalewa kuti: “Djobi! Leka kundokhala ucikumbukira mabvuto yako!” Tsono na kupita kwa nthawe, mkaziyo adadzawona kuti makumbukidwe yace yakhali yakundendemerana kwene-kwene na makumbukidwe ya Djobi. Bzimwebzi bzidathandiza mkaziyo kucinja momwe akhawonera bzinthu, ndipo adakhala na mphanvu yomwe idamuthandiza kupirira msunamo omwe akhanawo thangwe ra kufedwa bayace. Njira inango yomwe Yahova ambatithandiza nayo kuti tikhale wakukhwimika ni kuphatisa basa Akristau anzathu. Paulo adanemba kuti iye akhakhumba ‘kulimbikisana’ na abale na mpfumakazi zace zacikristau. — Aro. 1:11, 12. w21.05 22 ¶10-11; 24 ¶12

Yahova adauza Ajirayeri kuti: “Amuna wentse an’funika kudzawonekera pamaso pa Yahova Mulungu wanu katatu pa gole pa mbuto yomwe iye an’dzasankhula.” (Bzak. 16:16) Ajirayeri akhafunika kusiya mii yawo na minda yawo bzokha. Tsono Yahova adawauza kuti: “Palibe [munthu] ali-wentse omwe an’dzasirira dziko lanu pomwe mukuyenda kukawonekera kwa Yahova Mulungu wanu katatu pa gole.” (Kuf. 34:24) Ajirayeri wakukhulupirika omwe akhagopa Yahova, akhayenda kukawonekera ku maphwando yomwe yakhacitika gole liri-lentseya. Bzimwebzi bzikhacitisa kuti iwo atambire mabaibai mazinji. Iwo akhakhala na mwayi wakupfunza Malamulo ya Mulungu, kukumbukira bzinthu bzentse bzabwino bzomwe Yahova akhawacitira na kukhala na mpata wakuceza na Ajirayeri anzawo omwe akhafunambo Yahova. Ntsiku zino, timbakhalambo na mabaibai mabodzi-bodziya tikambacita nyongo kuti tigumanike pa mitsonkhano. Kumbukirani kuti Yahova ambabva tani akambatiwona tikupereka mitawiro yathu yacigwatira, koma icikhala yakubveka bwino. Kulewa cadidi, iye ambakomedwa kwene-kwene. w22.03 22 ¶9

Yahova adapfunzisa Jezu kuti akhale Mkulu wa Antsembe. Jezu adakwanisa kuwona momwe bzimbakhalira bzakunesa kubvera Mulungu pomwe munthu akugumana na mayezo makulu. Iye adagumana na mabvuto yakuti bwerani mudzawone, mpaka adapemba kwa Yahova kuti amuthandize ‘mwakucita kulira na kugwesa misozi.’ Pakuti Jezu adabonera kwene-kwene, tikupenukira lini kuti iye ambabvesesa bzomwe ifepano timbafunikira, ndipo iye angatithandize tikakhala ‘tikugumana na mayezo.’ Timbatenda kwene-kwene Yahova thangwe ra kutipasa Mkulu wa Antsembe wa ntsisi omwe ngwakukonzeka “kutibvesesa bzakuphonya bzathu.” (Aheb. 2:17; 4:14-16; 5:7-10) Yahova adabvuma kuti Mwana wace Jezu abonere kwene-kwene thangwe ra kufuna kutawira mbvunzo wakufunika kwene-kwene wakuti: Kodi wanthu angapitirize kukhala wakukhulupirika kwa Mulungu napo pomwe akugumana na mabvuto makulu? Sathani adalewa kuti bzingakwanisike lini! Iye adalewa kuti wanthu ambatumikira Mulungu thangwe ra psete ndipo ambafuna lini Yahova. (Djobi 1:9-11; 2:4, 5) Jezu adapitiriza kukhala wakukhulupirika ndipo adalatiza kuti Sathani ni nyakunama. w21.04 17 ¶7-8

Pomwe nyakupfunza akanati kubatizidwa, iye an’funika kuphatisa basa bzomwe Bibliya limbapfunzisa. Nyakupfunza wa Bibliya akambaphatisa basa bzomwe ambapfunza ambakhala ninga “munthu wakucenjera” wa mu ciratizo ca Jezu, omwe ambacera pantsi mpaka kuphata mwala acimanga nyumba yace pa mwalapo. (Mat. 7:24, 25; Luka 6:47, 48) Thandizani nyakupfunza wanu kuti acinje moyo wace. (Marko 10:17-22) Jezu akhadziwa kuti bzingadakhala bzakunesa kuna munthu wakudala kugulisa bzinthu bzace bzentse. (Marko 10:23) Napo bzikhali tenepo, Jezu adauza munthuyo kuti acite bzinthu bzakunesabzi pa moyo wace. Thangwe ranyi? Thangwe rakuti Jezu akhamufuna kwene-kwene. Nthawe zinango ifepano tingazeze kulimbikisa nyakupfunza wa Bibliya kuti aphatise basa bzomwe akupfunza thangwe ra kukumbuka kuti iye alibe kukonzeka kuti acinje bzinthu pa moyo wace. (Akol. 3:9, 10) Tsono tikafulumiza kuceza na nyakupfunza bzinthu bzomwe an’funika kucinja, iye an’dzacinja mwakamfulumize. Mukacita bzimwebzi, imwepo mun’dzalatiza kuti mumbacita naye thupo. — Sal. 141:5; Mim.  27:17. w21.06 3 ¶3, 5

Jezu akufotokozedwa na mpostolo Pedru kuti iye ni ciratizo cabwino, thangwe adapirira mabvuto yomwe akhagumana nayo. Tenepo, pana njira zizinji zomwe tingatewezerere Jezu. (1 Ped. 2:18-25) Kulewa cadidi, moyo wa Jezu, bzentse bzomwe iye adalewa na kucita, ni ciratizo kuna ifepano kuti timutewezere. Kodi n’cadidi kuti wanthu wakuperewerafe tingakwanise kutewezera ciratizo ca Jezu? Inde, tingakwanise. Kumbukirani kuti Pedru alibe kulewa kuti tin’funika kutewera nzayo za Jezu mwakulungamiratu. M’mbuto mwace, iye adatiuza kuti titewere ‘nzayo za [Jezu] mwakukhulupirika.’ Tikatewera nzayo zace bwino-bwino mwa kucita bzentse bzomwe tingakwanise napo kuti ndife wanthu wakuperewera, tin’dzabvera mafala ya mpostolo Juwau, yakuti: “[Citani] bzinthu ninga momwe Jezu akhacitira.” (1 Ju. 2:6) Tikatewera nzayo za Jezu, tin’dzakhala pa uxamwali bwakulimba na Yahova. Thangwe ranyi tikulewa tenepo? Cakuyamba, Jezu adatisiyira ciratizo ca momwe tingakhalire na moyo omwe umbatumbiza Mulungu. (Ju. 8:29) Tenepo, mwa kutewezera nzayo za Jezu, ifepano tin’dzatumbiza Yahova. Ndipo tingakhale na citsimikizo centse cakuti Baba wathu wakudzulu, an’dzafenderera wale omwe akufuna kukhala axamwali wace. — Tiy. 4:8. w21.04 2-3 ¶4-6

Yahova ambawona makhalidwe yathu yabwino, bzomwe tingakwanise kucita, ndipo ambatithandiza kuti tikhale axamwali wace. Tikapitiriza kukhala wakukhulupirika kwa iye, tin’dzakhala naye pa uxamwali kuyenda na kuyenda! (Ju. 6:44) Tikambatsimikiza kuti Yahova ambatifuna, ifepano tin’dzacita ciri-centse kuti timutumikire bziribe basa kuti tikugumana na mabvuto pa moyo wathu. Tsono tikambapenukira kuti Mulungu ambatisamalira, ‘mphanvu zathu zin’dzacepa.’ (Mim. 24:10) Ndipo tikayamba kukumbuka kuti Mulungu ambatifuna lini, tin’dzakwanisa lini kupirira mayezo ya Sathani. (Aef. 6:16) Akristau winango wakukhulupirika ntsiku zino ambatepa mwauzimu thangwe ra kupenukira kuti Yahova ambawafuna. Kodi n’ciyani comwe tin’funika kucita makumbukidwe yakuti Mulungu ambatifuna lini yakatibwerera? Tin’funika kuyathamangisa mwakamfulumize! Kumbirani Yahova kuti akuthandizeni kucosa ‘makumbukidwe yomwe yakukusayisani mtendere’ muciikha ‘mtendere wa Mulungu omwe un’dzakoya mitima yanu pabodzi na luso lanu lakukumbuka.’ (Sal. 139:23; Afil. 4:6, 7) Ndipo kumbukirani kuti muli lini mwekha. w21.04 20 ¶1, 4; 21 ¶5-6

Kodi imwepo mudakhala tani Mboni ya Yahova? Pinango pentse mudabva “mafala yabwino” na abereki wanu, mwanzanu wa ku basa, wa ku xikola, avizinyu wanu, ayai na upalizi bwa mui na mui bomwe Mboni za Yahova zimbacita. (Marko 13:10) Ndipo, munthu adapambula nthawe yace na mphanvu zace kuti akupfunziseni Bibliya. Ndipo pakupfunzapo, imwepo mudafika pakufuna Yahova ndipo mudapfunza kuti iye ambakufunani. Yahova adakukwewerani mu cadidi ndipo tsapano ndimwe nyakupfunza wa Jezu Kristu ndipo mukudikhirira kudzakhala na moyo wakusaya kumala kutsogolo. (Ju. 6:44) Kulewa cadidi, imwepo mumbatenda kwene-kwene Yahova thangwe rakuti iye adaphatisa basa munthu kuti akupfunziseni cadidi, ndipo adabvuma kuti mukhale m’bodzi wa atumiki wace. Tsapano ifepano timbadziwa cadidi ndipo tina mwayi wakuthandizambo wanthu winango kuti afambe nafe pa mseu omwe ukuyenda ku moyo. Ifepano bzingatipusire kupalizira mui na mui, tsono bzingatinese kuyambisa na kucitisa mapfunziro ya Bibliya. w21.07 2 ¶1-2