Fevereiro

Yahova ambafunisisa kuti wanthu wentse omwe ambamunamata akhale wakukondwa. Yahova ali pafupi na ali-wentse wa ifepano, ndipo iye ambawona tikakhala tasunama ayai tikakhala na thupo. (Sal. 145:18, 19) Kumbukirani momwe Yahova adacitira thupo na mpolofeta Eliya na momwe adamuthandizira. Mwamuna wakukhulupirikayu adakhala mu nthawe yomwe bzinthu bzikhanesa pa moyo wa Ajirayeri. Wanthu wamphanvu mu Jirayeri omwe akhanamata lini Yahova, akhaboneresa wale omwe akhatumikira Yahova ndipo akhafuna kupha Eliya. (1 Wam. 19:1, 2) Cinthu cinango comwe cikhaboneresa Eliya, yakhali makumbukidwe yakuti ndiye yekha mpolofeta wa Yahova omwe akhadasala na moyo. (1 Wam. 19:10) Tenepo Mulungu adamuthandiza mwakamfulumize. Yahova adatuma anjo kuti akauze Eliya kuti akhali lini yekha. Anjoyo adauza Eliya kuti pakhana Ajirayeri azinji omwe akhatumikira Yahova mwakukhulupirika! (1 Wam. 19:5, 18) Jezu adauza anyakupfunza wace mwakudeka mtima kuti gwere lingadadzakhala ninga wanthu wa m’banja mwawo. (Marko 10:29, 30) Ndipo Yahova Baba wathu wa kudzulu ambatiuza kuti an’dzathandiza wale omwe ambafuna kumutumikira. — Sal. 9:10. w21.06 8-9 ¶3-4

Wanthu azinji ambakomedwa lini nafe thangwe rakuti timbaphatisa basa Bibliya kuti tiwalatize kuti bzomwe magereja yanango yambapfunzisa mpsakunama. Atsogoleri wa magereja ambapfunzisa wanthu wawo kuti Mulungu ambalanga wanthu wakuipa ku moto. Iwo ambaphatisa basa cipfunziso cakunamaci kuti apitirize kugopswera naco wanthu kuti wanthuwo aleke kuwathawa. Tsono ninga atumiki wa Yahova omwe ambanamata Mulungu wa lufoyi, ifepano timbazimbula kuti cipfunziso cimweci n’cakunama. Atsogoleriwo ambapfunzisambo kuti moyo umbafa lini. Bzingadakhala kuti bzimwebzi mpsacadidi, palibe munthu na m’bodziyo omwe angadafunikira kudzalamusidwa. Ndipopa ifepano timbazimbula kuti bzomwe iwo ambapfunzisabzi mpsakunama. Atsogoleri azinji ambapfunzisa kuti bzomwe bzimbaticitikira pa moyo wathu, bzidanembedwa kale na Mulungu. Tsono ifepano timbapfunzisa kuti munthu ana ufulu bwakusankhula yekha kutumikira Mulungu. Kodi atsogoleri wa magerejawo ambabzibva tani akambatiwona tikugaza bzomwe iwo ambapfunzisa? Bzimbawawawa kwene-kwene. Penu ifepano timbafuna cadidi, tin’funika kubvuma bzomwe Mulungu ambalewa. (Ju. 8:45, 46) Mwakusiyana na Sathani Dyabu, ifepano tin’dzapambuka lini pa cadidi. Ndipo tin’dzacita lini cinthu ciri-centse comwe cimbabverana lini na cikhulupiro cathu. (Ju. 8:44) Mulungu akufuna kuti wanthu wace ‘awenge cakuipa’ . . . ‘aciphatisisa comwe n’cabwino,’ ninga momwe Jezu adacitira. — Aro. 12:9; Aheb. 1:9. w21.05 10 ¶10-11

Tani tikawona kuti tayamba kukhala wanthu wakubzikuza ayai wakusirira kwakuipa? Ifepano tingacinje! Mpostolo Paulo adalewa kuti wale omwe ‘aphatidwa wa moyo’ na Dyabu, iwo angakwanise kupsidimula. (2 Tim. 2:26) Lekani kuyebwa kuti Yahova ngwamphanvu kwene-kwene kuposa Sathani. Tenepo, tikabvuma kuti Yahova atithandize, tin’dzapsidimula pa gango ayai pa bvuto liri-lentse lomwe Dyabu angatibweresere. Ifepano tin’funika kutcenkha kukhala wanthu wakubzikuza na wakusirira kwakuipa, kusiyana na kucita kupsidimula pomwe Sathani atimanga kale. Ifepano tingacite bzimwebzi kokha na thandizo la Mulungu. Tenepo, mbapembani kwa Yahova ntsiku zentse kuti ambakuthandizeni kuwona makumbukidwe yanu na bzicito bzanu. (Sal. 139:23, 24) Citani ciri-centse comwe mungakwanise kuti muleke kukhala wakubzikuza ayai wakusirira kwakuipa! Kuyambira kale-kale Sathani akhala ninga msodzi. Tsono tsapanopapa iye an’mangidwa ndipo an’pfudzidwiratu. (Apok. 20:1-3, 10) Ifepano tikudikhirira na mtima wentse ntsiku imweyo. Pomwe ntsikuyo ikanati kufika, pitirizani kukhala wakupenya kuti muleke kumangidwa na magango ya Sathani. Citani nyongo kuti muleke kukundidwa na khalidwe lakubzikuza ayai kusirira kwakuipa. Tsimikizani “[kugaza] Dyabu, ndipo iye an’dzakuthawani.” w21.06 19 ¶15-17

Yahova ambakomedwa munthu akabvuma cadidi ca m’Bibliya aciuzambo wanthu winango cadidico. (Mim. 23:15, 16) Ndipo Yahovayo ambakomedwa kwene-kwene akawona bzomwe bzikucitika ntsiku zino! Mwa ciratizo, napo pa nthawe ya matenda ya Coronavírus mu gole la 2020, mapfunziro yakukwana 7.705.765 yadacitisidwa, bzomwe bzidathandiza wanthu wakukwana 241.994 kuti abzipereke kwa Yahova acibatizidwa. Anyakupfunza apsawa akucitisa mapfunziro ya Bibliya ndipo akuthandiza wanthu azinji kuti akhalembo anyakupfunza. (Luka 6:40) Mwakusaya kupenukira, ifepano timbacitisa Yahova kukhala wakukomedwa tikambacita mbali pa basa lakupfunzisali. Basa lakupfunzisa wanthu lidanesa, tsono mwakuthandizidwa na Yahova, ifepano tingacite mbali pa basa lakupfunzisa wanthu kuti afune Baba wathu wa kudzulu. Penu bzimbakunesani kukhala na mapfunziro ya Bibliya, kodi mungacite nyongo kuti mukwanise kukhala na nyakupfunza m’bodzi yekha? Imwepo mukaphatisa basa mpata uli-wentse omwe mungakhale nawo kuti mukumbire wanthu kuti mupfunze nawo Bibliya, mungadabwe na bzomwe bzingacitike. w21.07 6-7 ¶14-16

Mambo Davide adacita bzakupereka bzizinji kucokera mu cuma cace kuti athandizire kumangidwa kwa templo (1 Nkha. 22:11-16) Tikawona kuti tikukwanisa lini pomwe kuthandizira mabasa ya bzakumanga-manga thangwe ra kukalamba, ifepano tingapitirize kuthandizira mabasayo mwakucita bzakupereka mwakubverana na momwe bzinthu bziriri pa moyo wathu. Ndipo tingathandizembo maswaka kuti yagumane phindu na bzomwe bzidaticitikira. Pa nkhani ya kupasa, onani bzomwe mpostolo Paulo adacita. Iye adauza Timotio kuti aphate naye pabodzi basa la umisiyonario. Ndipo Paulo adapfunzisa tswaka Timotio momwe angapalizirire na kupfunzisira. (Mab. 16:1-3) Paulo adapfunzisa Timotio kuti akhale mpalizi na mpfunzisi wabwino wa mafala ya Mulungu. (1 Ako. 4:17) Ndipo Timotio adaphatisa basa bzomwe adapfunzisidwa na Paulo kuti apfunzisembo winango. w21.09 12 ¶14-15

Kodi n’ciyani comwe tingapfunze na ciratizo ca Apolo na mpostolo Paulo? Amuna awiriwa akhadziwa kwene-kwene Bzinembo. Iwo akhali wanthu wakudziwika ndipo akhali apfunzisi wabwino. Ndipo akhadathandiza kale wanthu azinji kukhala anyakupfunza. Tsono iwo akhacitirana lini njiru. (Mab. 18:24) Nthawe inango pambuyo pa Apolo kucoka ku Kolinto, Paulo adamuuza kuti abwerere pomwe kumweko. (1 Ako. 16:12) Apolo adaphatisa bwino basa luso lace kuti apalizire bzipsa bzabwino na kulimbikisa abale wace. Ndipo ifepano tikutsimikiza kuti Apolo akhali munthu wakubzicepesa. Mwa ciratizo, Bibliya limbalewa lini kuti iye adakalipa pomwe Akila na Prisila adamufotokozera ‘njira ya Mulungu mwakulondoza.’ (Mab. 18:24-28) Mpostolo Paulo akhawona basa labwino lomwe Apolo akhacita. Tsono Paulo akhakumbuka lini kuti wanthu angadawona kuti Apolo ambadziwa bzinthu kwene-kwene kuposa iye. Tikambawerenga bzomwe Paulo adanembera Akristau wa ku Kolinto, timbawona kuti iye akhali munthu wakubzicepesa, wakuzindikira malire na wakusaya kunesa. — 1 Ako. 3:4-6. w21.07 18-19 ¶15-17

Adamu na Eva adacita utowa kuleka kubvera Mulungu. Tenepo, iwo adasiya kucita mbali ya banja lace. Tsono tani pakulewa bza wana wawo? Thangwe ra lufoyi, Yahova adapereka mpata kuna wana wawo wakubvera kuti acite mbali ya banja lace. Iye adacita bzimwebzi mwakupereka ntsembe Mwana wace wakubadwa-yekha. (Ju. 3:16) Thangwe ra ntsembe ya Jezu Kristu, wanthu wakukhulupirika wakukwana 144 000 akusankhulidwa kuti akhale ninga wana wa Mulungu. (Aro. 8:15-17; Apok. 14:1) Kuthimizira bzimwebzi, wanthu wakukhulupirika wakusaya kuwerengeka ambabvera Mulungu mwakucita bzomwe iye ambafuna. Iwo akudikhirira kudzacita mbali ya wanthu wa m’banja la Mulunguyo pambuyo pa mayezo yakumalizira kuphampha kwa magole 1000. (Sal. 25:14; Aro. 8:20, 21) Napo tsapano iwo ambawona Yahova, Mulengi wawo, ninga Baba wawo. (Mat. 6:9) Omwe an’dzalamusidwa kwa anyakufa an’dzakhalambo na mwayi wakupfunza bzomwe Yahova akufuna kuti iwo adzacite. Wale omwe ambabvuma kutsogoleredwa naye, an’dzacitambo mbali ya banja lace. w21.08 5 ¶10-11

Mpostolo Paulo adasankhulidwa kuti acite basa lakupalizira ndipo adamala magole mazinji akucita basa limweri. Iro likhali lakufunika kwene-kwene kwa iye. Iye akhambapalizira “padeca na nyumba na nyumba.” (Mab. 20:20) Iye akhapalizira lini pa nthawe yomwe akhadakonzekera kucita bzimwebzi basi, ayai kabodzi pa sumana. Koma akhaphatisa basa mpata uli-wentse kuti acite basa limweri. Kumbukirani bzomwe iye adacita pomwe akhadikhirira Akristau anzace mu mzinda wa Atena. Iye adayamba kupalizira wanthu wakubvekera wa m’mwemo ndipo winango wa iwo adamutetekera. (Mab. 17:16, 17, 34) Paulo adapitiriza kupalizira wanthu omwe akhali pafupi naye napo pomwe ‘akhadamangidwa.’ (Afil. 1:13, 14; Mab. 28:16-24) Paulo akhaphatisa basa bwino nthawe yace. Ndipo nthawe zinango iye akhacemerambo abale winango kuti acite naye pabodzi basa lakupalizira. Kumbukirani bzomwe akhacita pa ulendo bwace bwa umisiyonariyo. Pa ulendo bwakuyamba, iye adayenda pabodzi na Juwau omwe akhadziwikambo na dzina lakuti Marko; ndipo pa ulendo bwaciwiri adayenda pabodzi na Timotio. (Mab. 12:25; 16:1-4) Ndipo ifepano tikudziwiratu kuti mpostoloyu akhapfunzisa amuna amwewa momwe angalinganizire gwere, momwe angathandizire abale na mpfumakazi na momwe angapfunzisire bwino Fala la Mulungu. — 1 Ako. 4:17. w22.03 27 ¶5-6

Wanthu winango ambakhulupira lini kuti Mulengi alipo thangwe iwo ambalewa kuti ambakhulupira bzinthu bzomwe angawone na maso basi. Tsono cadidi n’cakuti iwo ambakhulupira bzinthu bzomwe bzingawoneke lini na maso. Mwa ciratizo, iwo ambakhulupira mphanvu yakukwewa ya cirengedwe thangwe rakuti ana umboni bwakuti mphanvuyo iripodi. Cikhulupiro comwe cikufotokozedwa m’Bibliya cikucokerambo pa ‘bzinthu caibzo napo mpsakusaya kuwoneka.’ (Aheb. 11:1) Kuti tikhale na umboni, bzimbafuna nthawe na nyongo yakupfunza; tsono wanthu azinji ambacita lini bzimwebzi. Munthu omwe ambafufudza lini kuti akhale na umboni, angafike pakulewa kuti kulibe Mulungu. Pomwe masiyentista manango yadapfunza kuti yakhale na umboni, iwo adatsimikiza kuti Mulungu ndiye omwe adalenga bzinthu bzentse. Tingalewe kuti iwo akhakumbuka kuti kulibe Mulengi thangwe rakuti nkhani ya cirengedwe imbapfunzidwa lini ku universidade. Tsono, tsapano iwo afika pakumudziwa Yahova na kumufuna. Ndipopa, ifepanombo tin’funika kukulisa cikhulupiro cathu kuna Mulungu, bziribe basa penu tidapfunza pang’ono ayai kwene-kwene. Thangwe palibe munthu angaticitire bzimwebzi. w21.08 14 ¶1; 16 ¶6-7

Jezu adaphatisa basa ciratizo ca mwana wakutaika, kuti atithandize kubvesesa momwe Yahova ambafunira kutibvera ntsisi. Mwanayo adacoka pamui ndipo “adakhala na makhalidwe yakuipa acidzonga cuma cace centse.” (Luka 15:13) Na kupita kwa nthawe, iye adakungula makhalidwe yace yakuipa, adabzicepesa ndipo adabwerera kumui. Kodi pai wace adacita ciyani? Jezu adalewa kuti: “Pomwe pai wacewo adamuwona na patali, adamubvera ntsisi ndipo adamuthamangira, acikamukumbatira na kumumpsompsona mwa lufoyi.” Pai wacewo alibe kumunyazisa, koma thangwe ra ntsisi, iwo adamulekerera ndipo adamutambira na manja mawiri. Mwana wakutaika ule akhadacita pikado ikulu kwene-kwene, tsono thangwe ra kukungula komwe iye adacita, pai wace adamulekerera. Pai wantsisi wa mu ciratizoci akuimira Yahova. Na nkhani yabwinoyi, Jezu akhafuna kutithandiza kubvesesa kuti Yahova ngwakukonzeka kulekerera nyapikado omwe wakungula na mtima wentse. — Luka 15:17-24. w21.10 8 ¶4; 9 ¶6

Ntsiku zino atsogoleri azinji wa magereja ambauza lini wanthu kuti Mulungu ana dzina. Iwo adacosa dzinalo m’Mabibliya yomwe adasandulizira, ndipo ambabvuma lini kuti dzina la Mulungu ligumidwe m’magereja yawo. Bzikuwonekeratu padeca kuti ni Mboni za Yahova zokha zomwe zimbalemekeza dzina la Mulungu. Ifepano timbadziwisa dzina la Mulungu kuzungulira dziko lentse la pantsi kuposa magereja yentse! Mwakubverana na bzimwebzi, ifepano tikucita ciri-centse comwe tingakwanise kuti tibverane na dzina lathu lakuti Mboni za Yahova. (Zai. 43:10-12) Ifepano tidadinda Bibliya Lakusanduliziridwa la Dziko Lipsa, makopiya yakupitirira mamidyau 240, lomwe lina dzina la Yahova m’mbuto zomwe anyakusandulizira wa Mabibliya manango adalicosa. Ndipo timbadinda mabukhu yomwe yambaphatisa basa dzina la Yahova m’bzirewedwe bzakupitirira 1000! w21.10 20-21 ¶9-10

Tikambathandiza abale wathu omwe akusaya timbakhala tikunamata Yahova. Yahova adalewa kuti angadabaira Ajirayeri omwe angadathandiza anyakusauka. (Bzak. 15:10) Ndipo ifepanombo tikathandiza m’bale ayai mpfumakazi yomwe ikusaya, Yahova ambawona kuti tikupereka mphaso kwa iye. (Mim. 19:17) Kumbukirani kuti pomwe Akristau wa ku Filipi adatumizira mphaso Paulo pomwe akhali m’kawoko, iye adalewa kuti zimwezi zikhali “ntsembe zakubvumizika na zakukondwesa Mulungu.” (Afil. 4:18) Mbakumbukirani abale wa m’gwere mwanu ndipo mbabzibvunzani kuti: ‘Kodi pana munthu omwe ningamuthandize?’ Dziwani kuti Yahova ambakomedwa tikambaphatisa basa nthawe yathu, mphanvu zathu, luso lathu na bzinthu bzathu kuti tithandize wanthu omwe akusaya. Ndipo iye ambawona kuti bzimwebzi bzimbacita mbali ya kunamata kwathu. (Tiy. 1:27) Kunamata Yahova kumbafuna nthawe na nyongo. Tsono kulibe kunesa. (1 Ju. 5:3) Thangwe ranyi? Thangwe timbanamata Yahova thangwe ra kumufuna na kufunambo abale na mpfumakazi zathu. w22.03 24 ¶14-15

Tikambakumbukira mabvuto yomwe abale na mpfumakazi zathu ambagumana nayo, ifepano tin’dzawabvera ntsisi. Mwa ciratizo, mpfumakazi ingakhale ikuduwala kwene-kwene. Tsono iyo ingalewe lini kuti ikuduwala, koma ingakomedwe kuthandizidwa. Kodi ifepano tingakwanise kuiphikira cakudya ayai kuipukutira m’nyumba mwace? M’bale angacosedwa basa, kodi ifepano tingamupasembo m’baleyo kobiri yomwe ingamuthandize mpaka iye kudzagumana basa linango? Ifepano tin’funika lini kucita kudikhirira kuti abale na mpfumakazi zathu ayambe ndiwo kubwera kudzatikumbira thandizo kuti tiwabvere bwino ntsisi. Ninga Yahova, tin’funika kuyamba ndifepano kuwabvera ntsisi na kuwathandiza pomwe iwo akanati kutibwerera. Yahova ambatiwonesa dzuwa ntsiku zentse napo kuti timbamukumbira lini kuti aticitire bzimwebzi. Dzuwalo limbandothandiza lini wanthu omwe ambamutenda koma limbathandiza wanthu wentse. Kodi imwepo mumbatsimikiza lini kuti Yahova ambatifuna mwakutipasa bzomwe timbafunikira pa moyo wathu? Ifepano timbamufuna kwene-kwene Yahova thangwe rakuti iye ngwakudeka mtima na wakupasa! w21.09 22-23 ¶12-13

Lufoyi lacadidi la Mulungu limbamucitisa kulekerera. Yahova akawona nyapikado omwe wakungula ndipo wasiya bzicito bzace bzakuipa, lufoyi lace lacadidi limbamucitisa kumulekerera. Pakulewa bza Yahova, nyakunemba salimo, Davide, adati: “Alibe kuticitira mwakubverana na kutaza kwathu, ayai kutipasa cirango mwakubverana na bzakuphonya bzathu.” (Sal. 103:8-11) Davide caiyeyo adabva momwe bzimbakhalira bzakuwawa munthu akambabzipasa mulandu na kusunama thangwe ra kubva kuwawa mu mtima. Tsono iye akhadziwambo kuti Yahova ‘ngwakukonzeka kulekerera.’ Kodi n’ciyani cimbacitisa Yahova kulekerera? Mtawiro umbagumanika m’vesi la lero. Ninga momwe Davide adalewera mu mpembo, Yahova ambalekerera thangwe rakuti ngwakudzala na lufoyi lacadidi kuna wentse omwe ambakumbira kulekereredwa. Tikacita pikado mpsakuthemera ndipo mpsabwino kukhumbula thangwe ra bzinthu bzomwe tacitabzo. Bzimwebzi bzingaticitise kucita ciri-centse kuti tikungule ticicinja. w21.11 5 ¶11-12

Yahova ambafuna dzina lace, ndipo iye akufunambo kuti munthu ali-wentse ambalilemekeze. (Zai. 42:8) Tsono papita kale magole yakupitirira 6000 ndipo dzina la Mulungu likupitiriza kunyozedwa. (Sal. 74:10, 18, 23) Bzimwebzi bzidayambira mu zunde la Edeni pomwe Dyabu (kuthandauza kuti “Nyamagunkha”) adalewa kuti Mulungu akhafuna lini kuti Adamu na Eva akhale na cinthu cakufunikira kwene-kwene. (Ciy. 3:1-5) Kuyambira nthawe imweyire, Yahova ambanamiziridwa kuti ambamana wanthu bzomwe iwo ambafunikira. Jezu akhacita thupo thangwe ra kunyozedwa kwa dzina la Baba wace. Ni Yahova yekha omwe adathemera kutonga kudzulu na pa dziko la pantsi, ndipo katongedwe kaceko n’kabwino kwene-kwene. (Apok. 4:11) Tsono Dyabu adayezera kupumpsa wanjo na wanthu mwa kuwacitisa kukumbuka kuti Mulungu alibe ugo bwakutonga. Mwakusaya kucedwa nkhani imweyi in’dzamalisidwa kabodzi na kabodzi. Ndipo wanthu wentse an’dzadziwa kuti katongedwe ka Mulungu n’kabwino ndipo Umambo bwace bun’dzabweresa mtendere na mkhomeko. w21.07 9 ¶5-6

Mpsacibadwa kuna msolo wa banja kufuna kugumanira mkazace na wana wace cakudya cakukwana, bzakubvala na mbuto yakukhala. Kodi imwepo mukubonera thangwe ra kusaya kobiri? Penu mun’ti inde, dziwani kuti imweyi ni nthawe yakunesa kwene-kwene kwa imwepo. Tsono, napo kuti mukugumana na mabvuto, imwepo mungaphatise basa nthawe imweyi kuti mulimbise cikhulupiro canu. Pembani kwa Yahova ndipo werengani mafala ya Jezu yomwe yali pa Mateu 6:25-34 ndipo kumbukirani bzomwe mwawerengabzo. Kumbukirani bziratizo bza ntsiku zino bzomwe bzingakutsimikizireni kuti Yahova ambathandiza wanthu omwe ambakhala wakutanganidwa pa basa lace. (1 Ako. 15:58) Mukacita bzimwebzi, mun’dzawona kuti penu Baba wanu wakudzulu athandiza kale wanthu omwe akhagumana na mabvuto ninga yanu, iye an’dzakuthandizanimbo. Iye ambadziwa bzomwe mumbafunikira pa moyo, ndipo ambadziwambo bzomwe angacite kuti akwanise kukuthandizani. Mukambawona kuti Yahova akukuthandizani pa moyo wanu, cikhulupiro canu cin’dzalimba kuti mudzakwanise kupirira mabvuto makulu yomwe yakubwera kutsogolo. w21.11 20 ¶3; 21 ¶6

Akristau azinji adakhala na cikhulupiro camphanvu thangwe ra kupfunza nkhani ya cakulombolera. Iwo adapitiriza kupalizira napo kuti akhazunzidwa, ndipo adalimbika pakugumana na mabvuto yakusiyana-siyana napo pa nthawe yomwe akhadakalamba. Onani ciratizo ca mpostolo Juwau. Iye adamala magole yakupitirira 60 akupalizira mwakukhulupirika cadidi cakulewa bza Kristu na cakulombolera. Pomwe iye akhana magole pafupi-fupi 100, atongi wa boma la Roma, adamumanga acimuikha m’kawoko pa ntsuwa ya Patimo, thangwe ra kukumbuka kuti iye akhali munthu wakugopswa. Thangwe ranyi? “Thangwe ra kupalizira mafala ya Mulungu na kucitira umboni bza Jezu.” (Apok. 1:9) Juwau ni ciratizo cabwino ca munthu wakukhulupirika na kupirira! Mabukhu ya m’Bibliya yomwe Juwau adanemba yambalatiza kuti iye akhafuna kwene-kwene Jezu ndipo akhatenda cakulombolera. Iye adalewa bza cakulombolera, ayai bzinthu bzabwino bzomwe cakulomboleraco cimbacitisa kuti bzikwanisike maulendo yakupitirira 100. (1 Ju. 2:2) Tikupenukira lini kuti Juwau akhatenda kwene-kwene cakulombolera. w21.04 17 ¶9-10

Yahova akhafuna kuti wanthu wace alatize kudeka mtima kuna wanthu wakupunduka. Mwa ciratizo, Ajirayeri akhafunika lini kutemberera munthu omwe ni nkhuthu. Kutembererako kukhaphatanidza kugopswa munthu omwe ni nkhuthu ayai kumulewa mafala yakuipa. Bzikhali bzakuipa kwene-kwene kucita bzimwebzi kuna iye! Iye angadakwanisa lini kubva bzomwe akulewedwa, ndipo angadakwanisa lini kubzikhotcerera. Kuthumizira bzimwebzi, pa Mwambo 19:14 timbapfunza kuti atumiki wa Mulungu akhafunika lini “kuikha cinthu kutsogolo kwa zimola.” Bukhu linango pakulewa bza wanthu wakupunduka lidalewa kuti: “Bzikuwoneka kuti kale-kale, [wanthu] wakupunduka ku Médio Oriente akhaboneresedwa na kuzunzidwa.” Pinango pa nthawe imweyo, wanthu wakuipa mtima akhaikha cinthu kutsogolo kwa zimola thangwe ra ciya ayai thangwe ra kufuna kumusenzekesa. Bzimwebzi bzikhalatiza kusaya kudeka mtima! Mwakuphatisa basa lamulo lace, Yahova adathandiza wanthu wace kuwona kuti iwo akhafunika kulatiza ntsisi kuna wanthu wakupunduka. w21.12 8-9 ¶3-4

Djakobo adacita mantha kwene-kwene thangwe akhakumbuka kuti pinango m’bale wace akhadamukoyera cakumtima. Tenepo, iye adauza Yahova bvuto lacero mwakucita kumudandaulira mu mpembo. Patsogolo pace, iye adatumiza mphaso kwa m’bale wace Esau. (Ciy. 32:9-15) Ndipo pomwe iwo adawonana maso na maso, Djakobo ndiye omwe adayamba kulatiza ulemu kwa Esau. Iye adamugodamira Esau, sikuti kabodzi, ayai kawiri, koma kanomwe! Mwakubzicepesa na mwakucita bzinthu mwa ulemu, Djakobo adakhazikisa mtendere na m’bale wace. (Ciy. 33:3, 4) Tikupfunza nfundo yakufunika kucokera pa bzomwe Djakobo adakonzekera kuti agumane na Esau na bzomwe adacita pomwe adagumana naye. Mwakubzicepesa, Djakobo adakumbira Yahova kuti amuthandize. Ndipo iye adalatiza kuti akhafuna kucita bzomwe adakumbira mu mpembo mwakucita bzomwe angadakwanisa kuti akhazikise mtendere na m’bale wace. Pomwe iwo adagumana, Djakobo alibe kunesana na Esau kuti mbani omwe akhana lazau ndipo mbani omwe akhadaphonya. Bzomwe Djakobo akhafuna kukhali kukhazikisa mtendere na m’bale wace. Kodi imwepo mungatewezere ciratizo ca Djakobo? — Mat. 5:23, 24. w21.12 25 ¶11-12

Imwepo mukakumbukira kuti Jezu adafa kuti ampsinkhe pikado zanu, pinango mungalewe kuti: ‘Ndiribe kuthemera mphaso imweyi.’ Thangwe ranyi mungakumbuke tenepoyo? Mtima wathu wakuperewera, ungatipumpse, uciticitisa kubzibva kuti tin’themera lini ayai timbafunidwa lini. (1 Ju. 3:19) Bzimwebzi bzikacitika, tin’funika kukumbukira kuti ‘Mulungu ni mkulu kuposa mitima yathu.’ Napo kuti nthawe zinango tingabzibve kuti Yahova ambatifuna lini, ayai an’dzatilekerera lini, tsono cadidi n’cakuti Baba wathu wakudzulu ambatifuna ndipo an’dzatilekerera tikamuphonyera. Tin’funika kupfunza kukhulupira kuti Yahova ambatifuna. Kuti tikwanise kucita bzimwebzi, tin’funika kumbapfunza Fala lace kawiri-kawiri, kumbapemba kwa iye nthawe zentse, na kumbatsonkhana na atumiki wace wakukhulupirika. Thangwe ranyi mpsakufunika kuti timbacite bzinthu bzimwebzi? Mukacita bzimwebzi, imwepo mun’dzakwanisa kuwona makhalidwe mazinji yabwino ya Yahova. Ndipo mun’dzakwanisambo kubvesesa kuti iye ambakufunani kwene-kwene. Pa ntsiku iri-yentse mukambakumbukira bzomwe mukupfunza m’Fala la Mulungu, bzin’dzakuthandizani kukumbuka bwino, na ‘kulungamiza bzinthu’ m’makumbukidwe mwanu na mu mtima mwanu. — 2 Tim. 3:16. w21.04 23-24 ¶12-13

Kuti tikhale na cikukhulupiro cakulimba pambafunika bzizinji sikuti kundodziwa bzinthu pakulewa bza Mulungu. Ifepano tin’funika kumbakumbukira bzomwe tikupfunza. Mbatiwoneni bzomwe bzidacitikira nyakunemba Salimo 77. Iye akhadasunama thangwe ra kukumbuka kuti iye na Ajirayeri anzace akhabvumidwa lini na Yahova. Makumbukidwe yamweya yakhamusayisa tulo. (Mavesi 2-8) Kodi iye adacita ciyani? Iye adauza Yahova kuti: “Nin’dzakumbukira mabasa yanu yentse ndipo nin’dzakumbukirambo bzicito bzanu.” (Vesi 12) N’cadidi kuti nyakunemba salimoyi akhadziwa bzinthu bzizinji bzomwe Yahova akhadacitira kale wanthu wace m’mbuyomu, tsono thangwe ra thupo, iye adakumbuka kuti: “Kodi Mulungu wayebwa kulatiza kudeka mtima kwace, ayai kodi ukali bwace bwamucitisa kuleka kutibvera ntsisi?” (Vesi 9) Nyakunemba salimoyi adakumbukira mabasa ya Yahova, kudeka mtima kwace na ntsisi zomwe iye adalatiza m’mbuyomu kwa wanthu wace. (Vesi 11) N’ciyani cidacitika? Nyakunemba salimoyi adatsimikizira kuti Yahova an’dzasiya lini wanthu wace. (Vesi 15) w22.01 30-31 ¶17-18

Kodi Yahova ambabzibva tani akakumbukira atumiki wace wakukhulupirika omwe adasaika? Iye akufunisisa kudzawawona pomwe. (Djobi 14:15) Kodi imwepo mungakwanise kubvesesa cisuwo comwe Yahova anaco na xamwali wace Abalahamu? (Tiy. 2:23) Ayai Mozeji omwe adalewalewa naye “maso na maso”? (Kuf. 33:11) Ndipo Yahova akufunisisambo kudzabva Davide pabodzi na anembi winango wa bukhu la Salimo akuimba nyimbo zabwino zakumutumbizisa. (Sal. 104:33) Napo kuti axamwali wa Mulunguwa adafa, tsono Yahova alibe kuwayebwa. (Zai. 49:15) Iye ambakumbukira bwino-bwino unthu bwawo. Ntsiku inango, Yahova an’dzawalamusa acikhala pomwe na moyo, ndipo an’dzabva pomwe mipembo yawo acibvuma kunamata kwawo. Penu imwepo mudafedwa, mafalaya yangakutsangalazeni. Pomwe kupanduka kudayamba mu Edeni, Yahova adadziwa kuti bzinthu pa moyo wa wanthu bzingadadzakhala bzakunesa pomwe ikanati kufika nthawe yabwino. Yahova ambaipidwa na uipi, kusaya cirungamo na ciwembo bzomwe bzikucitika m’dzikoli ntsiku zino. w21.07 10 ¶11; 12 ¶12

Tikambafunana, ifepano timbalatiza kuti timbatenda cakulombolera. Thangwe ranyi? Thangwe ra kuti Jezu alibe kufera ifepano tekha, koma adaferambo abale na mpfumakazi zathu. Penu iye akhali wakukonzeka kuwafera, bzimwebzi bzikulatiza kuti ambawafuna kwene-kwene. (1 Ju. 3:16-18) Ifepano timbalatiza kuti timbafuna abale na mpfumakazi zathu kucokera pa bzinthu bzabwino bzomwe timbawacitira. (Aef. 4:29, 31–5:2) Mwa ciratizo, ifepano timbawathandiza iwo akaduwala, ayai akagumana na mabvuto yakusiyana-siyana na malengwa ya pantsi. Tsono n’ciyani comwe tin’funika kucita m’bale akaticitira cinthu ayai kutilewa mafala yomwe yalibe kutidekera? Kodi nthawe zinango imwepo bzimbakunesani kulekerera? (Mwam. 19:18) Penu n’tenepo tewezani malangoya: “Pitirizani kupirirana na kulekererana na mtima wentse, napo penu munayo mathangwe yakukhalira wakukalipa. Ninga momwe Yahova adakulekererani na mtima wentse, imwepo mucitembo bzibodzi-bodzibzo.” (Akol. 3:13) Nthawe zentse tikambalekerera m’bale ayai mpfumakazi yathu, timbakhala tikulatiza Baba wathu wakudzulu kuti timbatenda cakulombolera. w21.04 18 ¶12-13

Ifepano tingaphatire basa Yahova na nyongo ndipo tingathandize wanthu azinji kuti ayende patsogolo acifika pa kubatizidwa. Tsono timbabvesesa kuti bzinthu bzimbatifambira bwino thangwe ra kuthandizidwa na Yahova. Ciratizo ca Apolo na ca mpostolo Paulo cikutipfunzisa pomwe cinthu cinango cakuti tikakhala na maudindo mazinji m’gwere, tingacite bzinthu bzizinji kuti tikhazikise mtendere m’gweremo. Timbatenda kwene-kwene akulu wa gwere pabodzi na atumiki wakuthandiza akambacita bzinthu bzakukhazikisa mtendere na ciphatano pakuphatisa basa Fala la Mulungu pakupereka malango na kuthandiza wentse kuti abvere Jezu Kristu acitewezera ciratizo cace! (1 Ako. 4:6, 7) Mulungu adapasa ali-wentse wa ifepano maluso yakusiyana-siyana. Ifepano tingabzibve kuti bzomwe tikucita mpsing’ono-ng’ono. Tsono tubzinthu tung’ono-tung’ono tomwe tumbacitisa kuti pakhale pana ciphatano tuli ninga misono ya cakubvala yomwe imbacitisa kuti cakubvalaco cikhale cakuphatana. Tenepo, ifepano tin’funika kucita nyongo yakucosa mu mtima mwathu makumbukidwe yomwe yangayambise mpikisano. Mbatitsimikizeni kucita ciri-centse comwe tingakwanise kuti tikhazikise mtendere na ciphatano m’gwere. — Aef. 4:3. w21.07 19 ¶18-19

Imwepo mungakhale na citsimikizo centse cakuti mun’dzawonana pomwe na adzinza wanu omwe adafa. Kulira komwe Jezu adacita pomwe akhatsangalaza axamwali wace kumbalatiza kuti iye akufunisisa kudzalamusa wanthu omwe adafa. (Ju. 11:35) Mbathandizani wanthu omwe adafedwa. Jezu alibe kundolira pabodzi na Marta na Mariya, koma iye adawatetekera na kuwatsangalaza na mafala. (Ju. 11:25-27) Ifepano tingacitembo bzibodzi-bodzi na wanthu omwe akulira thangwe ra kufedwa. Mkulu munango wa gwere omwe ambakhala ku Austrália, wakucemeredwa Dan, adati: “Pomwe mkazangu adasaika, inepano ndikhafuna thandizo. Tenepo, mabanja mazinji yakhadakonzeka kumbanditetekera nthawe zentse. Yakhandibvesesa ndikasunama ndipo yakhanditsimula lini ndikalira. Wanthu wa m’mabanjayo akhandithandizambo pa bzinthu bzakusiyana-siyana ninga kutsuka karo yangu, kukandigulira bzinthu na kundiphikira ndikakhala ndikukwanisa lini kucita bzimwebzo. Ndipo akhambapemba nande pabodzi. Iwo adalatiziratu padeca kuti mbaxamwali caiwo na abale omwe ‘adabadwa kuti atithandize pakawoneka mabvuto.’” — Mim. 17:17. w22.01 16 ¶8-9

Yahova ambafuna kuti bzinthu bzitifambire bwino. (Mim. 4:20-22) Iye akambatipasa malango mwakuphatisa basa Fala lace, mabukhu yomwe yambafotokoza bza Bibliya yomwe gulu lathu limbapereka ayai Akristau wakukhwima ambakhala akulatiza kuti ambatifuna. (Aheb. 12:9, 10) Kumbukirani bwino-bwino malangoyo, sikuti momwe yaperekedwera. Nthawe zinango, ifepano tingawone kuti malangoyo yalibe kuperekedwa bwino. N’cadidi kuti ali-wentse omwe an’funa kupereka malango, an’funika kucita ciri-centse kuti malango yaceyo yakhale yakusaya kunesa kuyabvuma. (Agal. 6:1) Tsono penu tikutambira malango, tingacite bwino kukumbukira bzomwe tingapfunze na malangoyo, napo penu tikuwona kuti yalibe kuperekedwa bwino. Bzibvunzeni kuti: ‘Kodi ciripo comwe ningapfunze na malango yamweya, napo kuti ndiribe kukomedwa na momwe yaperekedwera? Kodi ningaleke kundowona bzomwe ningapfunze na malangoya, sikuti kuphonya kwa omwe andipasa malangoyu?’ Bzingakhale bwino kwene-kwene kwa ifepano kucita ciri-centse kuti tigumane phindu na malango yomwe tapasidwa. w22.02 12 ¶13-14

Yahova ambadziwa kuti pambafunika nyongo kuti titcenkhe nzeru na bzicito bzakuipa ndipo pangatenge nthawe kuti tikwanise kucita bzimwebzi. (Sal. 103:13, 14) Tsono, Yahova ambaphatisa basa Fala lace, mzimu wace na gulu lace kuti atipase nzeru na mphanvu zomwe timbafunikira kuti tikwanise kucinja. Fala la Mulungu lidakhala ninga supedyo; iro lingatithandize kudziwa penu bzomwe timbakumbuka, bzomwe timbalewa na bzomwe timbacita mpsabwino ayai ne. (Tiy. 1:22-25) Ndipo dziwani kuti nthawe zentse Yahova an’dzakuthandizani. Thangwe ambadziwa bzomwe bziri mu mtima mwanu. (Mim. 14:10; 15:11) Ndipopa mbapembani kwa iye na kupfunza Fala lace ntsiku zentse. Tsimikizani kuti mitemo ya Yahova njabwino. Cinthu ciri-centse comwe Yahova ambatiuza kuti ticite n’caphindu kwa ifepano. Wanthu omwe ambabvera mitemo yace ambakhala wakulemekezeka, ambakhala na moyo wabwino ndipo ambakhala na mpfatso caiwo. — Sal. 19:8-11. w22.03 4 ¶8-10

Tikakhala tikumanga na kukonza bzinthu bzomwe bzadzongeka pa nyumba zakunamatira timbakhala tikunamata Yahova. Bibliya limbalewa kuti basa lakumanga tendi la mkonkhano na bzinthu bza mu tendimo likhali “basa . . . lakupambulika.” (Kuf. 36:1, 4) Ntsiku zino, Yahova ambawonambo kuti basa lakumanga Nyumba za Umambo na nyumba zinango za gulu lathu ndakupambulika. Pana abale na mpfumakazi omwe ambamala nthawe izinji akuphata basa limweri. Kodi ifepano timbatenda lini basa lomwe iwo ambalicitali? Tsono iwo ambacitambo basa lakupalizira. Ndipo winango wa iwo ambafunambo kukhala apainiya. Akulu wa gwere angalatize kuti ambathandizira basa lakumanga akambabvuma kuti abale omwe ambacita basa limweri acite upainiya akakhala kuti akuthemera. Penu tina luso lakumanga ayai ne, tentsenefe tingathandizire kuti nyumba zomwe gulu lathu limbaphatisa basa zikhale zabwino na zakucena. w22.03 22 ¶11-12