Dezembro

Jezu adandendemezera ciphatano comwe akhanaco na ateweri wace na kubverana komwe kumbakhala kulipo pakati pa makabusa na mabira yace. (Ju. 10:14) Bzimwebzi mpsacadidi. Mabira yambadziwa makabusa wace ndipo yambatetekera fala lace. Munthu munango omwe akhacita ulendo adawonambo kuti bzimwebzi mpsacadidi. Iye adalewa kuti: “Tikhafuna kucosa vidiyo mabira ndipo tidayezera kuyacitisa kufendera pafupi na ifepano. Tsono mabirayo yalibe kutifenderera thangwe rakuti yakhadziwa lini mafala yathu. Patsogolo pace, kamulumbwana komwe kakhali ka makabusa kayene kadabwera; pomwe kadayacemera, mabirayo yadakatewera.” Bzomwe bzidacitika na munthu omwe akhali pa ulendoyu bzimbatikumbusa mafala ya Jezu pakulewa bza mabira yace, yomwe ni anyakupfunza wace. Iye adalewa kuti: “[Mabirayo] yan’dzatetekera fala langu.” Tsono Jezu ali kudzulu. Kodi tingalewe tani kuti tikumutetekera? Njira yakufunika yakulatizira kuti tikutetekera fala la Mbuya wathu, ndiyo kuphatisa basa bzomwe adatipfunzisa pa moyo wathu. — Mat. 7:24, 25. w21.12 16 ¶1-2

Pakuyamba mpostolo Paulo akhali munthu wakunesa ndipo akhaboneresa Akristau. Tsono adadzacinja. Iye akhadziwa kuti bzomwe akhacita bzire bzikhali bzakuphonyeka ndipo akhali wakukonzeka kucinja nzeru zace na makhalidwe yace. (1 Tim. 1:12-16) Na thandizo la Yahova, iye adakwanisa kukhala mkulu wa gwere wa lufoyi, wa ntsisi na wakubzicepesa. Iye akhakhulupira kuti Yahova angadamulekerera. (Aro. 7:21-25) Iye akhadziwa kuti angadakwanisa lini kukhala munthu wakulungamiratu. Koma adacita ciri-centse kuti akhale na makhalidwe yacikristau, kukhala wakubzicepesa na kuthemba Yahova kuti amuthandize kucita basa lace. (1 Ako. 9:27; Afil. 4:13) Akulu ambasankhulidwa lini thangwe rakuti mbakulungama. Ndipo Yahova ambafuna kuti iwo ambabvume kuphonya kwawo acicita ciri-centse kuti akulise makhalidwe yacikristau. (Aef. 4:23, 24) Kuti akwanise kucita bzimwebzi, mkulu wa gwere an’funika kumbabzidinga yekha mwakuphatisa basa Fala la Mulungu, acicinja bzomwe akuwona kuti an’funikira kucinja. Yahova an’dzamuthandiza kukhala wakukondwa na kukhala mkulu wa gwere wabwino kwene-kwene. — Tiy. 1:25. w22.03 29-30 ¶13-15

Kodi n’ciyani comwe tin’funika kucita tikazindikira kuti tikhakumbukira kuipa Mkristau mwanzathu? Tin’funika kukumbukira kuti tina udindo bwa kumbafuna abale wathu. (Tiy. 2:8) Tin’funikambo kumbapemba kwa Yahova na mtima wentse, ticimukumbira kuti atithandize kuleka kumbakumbukira kuipa anzathu. Tingacite bzinthu mwakubverana na mipembo yathu mwa kukhala na nthawe yakuceza na munthu omwe tikhamukumbukira kuipayo. Bzimwebzi bzingatithandize kumudziwa bwino munthuyo. Tingamukumbire kuti tidzayende naye pabodzi mu utumiki bwa kumunda ayai tingamuuze kuti tidzadye naye pabodzi. Pomwe tikuceza naye m’bale wathuyo, tingacite ciri-centse kuti titewezere ciratizo ca Yahova na Jezu mwa kuwona bzinthu bzabwino bzomwe iye ambacita. Tikacita bzimwebzi, timbalatiza kuti tikutetekera fala la makabusa wathu wabwino lakuti tileke kumbatonga anzathu. Ninga momwe mabira caiyo yambatetekerera fala la makabusa wayene, ateweri wa Jezu ambatetekera fala lace. Penu ndife wa ‘kathimu ka mabira’ ayai wa “mabira manango,” bwerani tipitirize kutetekera na kubvera fala la makabusa wathu wabwino. — Luka 12:32; Ju. 10:11, 14, 16. w21.12 19 ¶11; 21 ¶17-18

Pomwe Robuwamu adakhala mambo wa Jirayeri, wanthu wace adabwera kudzamukumbira cinthu. Iwo adakumbira kuti iye acepese basa lomwe pai wace, Salomau, akhadauza wanthuwo kuti ambacite. Mpsabwino kuwona kuti Robuwamu adakabvunza akulu-akulu wa Jirayeri kuti adziwe kuti angadawatawira tani wanthuwo. Akulu-akuluwo adauza mamboyo kuti iye akacita bzomwe wanthuwo akumbira, iwo an’dzapitiriza kumutumikira. (1 Wam. 12:3-7) Bzikuwoneka kuti Robuwamu alibe kukomedwa na malango yawo, ndipopa iye adayenda kukabvunza wanthu wa msinkhu wace. Iwo adamuuza kuti iye athumizire basa kwa wanthuwo. (1 Wam. 12:9-11) Bzingadakhala bwino Robuwamu kubvunza Yahova kuti adziwe bzakucita. Tsono iye alibe kucita bzimwebzo, koma adacita bzomwe wanthu wa msinkhu wace adalewa. Tsono bzimwebzi bzidadzabweresa mabvuto kwa Robuwamu na Ajirayeri. Nthawe zinango, ifepano tin’dzatambira malango yomwe tin’dzakomedwa lini nayo, tsono yakakhala kuti ngakucokera m’Bibliya, tin’funika kuyabvuma. w22.02 9 ¶6

Munthu omwe ngwakubzicepesa na wakuzindikira malire, ambakumbukira bzinthu bzomwe maswaka yambadziwa kale, sikuti bzinthu bzomwe iwo an’funika kupfunza. Iye an’dzawawona ninga anyabasa anzace sikuti ninga anyakucita nawo mapici. Abale wacikulire ambawona maswaka ninga mphaso yakucokera kwa Yahova ndipo ambatenda bzomwe maswakayo yambacita. Pomwe mphanvu zawo zikucepa, acikulire ambatenda thangwe ra maswaka yomwe yambakhala yakukonzeka kucita mabasa ya m’gwere. M’Bibliya, Naomi ni ciratizo cabwino ca munthu wacikulire omwe adabvuma thandizo lomwe adapasidwa na tswaka lacikazi. Pakuyamba, Naomi adauza Rute, omwe akhali mulowola wace mamsiwa, kuti abwerere kwa wanthu wace. Rute adalamba kubwerera ndipo adayenda na Naomi ku Betelehemu. Naomi adakomedwa kukhala pabodzi na Rute ndipo adabvuma kuthandizidwa na Ruteyo. (Ru. 1:7, 8, 18) Bzimwebzi bzidakhala cisimbo kuna Naomi na Rute! (Ru. 4:13-16) Kubzicepesa kun’dzacitisa acikulire kutewezera ciratizo ca Naomi. w21.09 10-11 ¶9-11

Baba wathu wa kudzulu. Iye ambadziwa bzomwe tingakwanise kucita na bzomwe tingakwanise lini. Pinango imwepo mungakwanise kucita bzizinji kuposa abale wanu na axamwali wanu. Ayai, pinango imwepo mungakwanise lini kucita bzizinji kuposa anzanu thangwe rakuti mwakalamba, mumbaduwala-duwala ayai thangwe rakuti m’banja mwanu muna wanthu omwe ambathemba imwepo. Penu n’tenepo, lekani kuwofoka. (Agal. 6:4) Yahova cipo acidzayebwa basa lomwe mumbacita. Iye ambakomedwa na bzentse bzomwe mumbamucitira, mukabzicita na mathangwe yabwino. Dziwani kuti iye ambakwanisa kuwona bzomwe mtima wanu umbakhumba kucita. Ndipo akufuna kuti mukomedwe na bzomwe mukukwanisa kumucitira. Ifepano tiri kale pa mtendere thangwe timbadziwa kuti Yahova ambathandiza atumiki wace akakhala akugumana na mabvuto. (Zai. 41:9, 10) Ndipopa, tina mathangwe yakukhalira wakukondwa pomwe tikunamata Baba wathu walufoyi omwe ngwakuthemera “kupasidwa ulemerero na ulemu” na bzentse bzomwe adalenga! — Apok. 4:11. w22.03 24 ¶16; 25 ¶18

Ifepano timbafuna kutewezera Jezu. Koma tin’funika lini kuwofoka tikatazira kumutewezera bwino-bwino. (Tiy. 3:2) Nyakupfunza angakwanise lini kutewezera bwino-bwino mpfunzisi wace omwe adamupfunzisa basa. Tsono akambapfunza na bzomwe aphonya na kumbacita nyongo yakutewezera mpfunzisi waceyo, nyakupfunzayo an’dzakhala na luso kwene-kwene. Mpsibodzi-bodzimbo na ifepano. Tikambaphatisa basa bzomwe tapfunza pa pfunziro la Bibliya la patekha na kucita nyongo kuti ticinje makhalidwe yathu, ifepano tin’dzakwanisa kutewezera makhalidwe yabwino ya Jezu. (Sal. 119:59) Tikukhala mu dziko lomwe wanthu ambandobzifuna okha. Tsono wanthu wa Yahova mbakusiyana na wanthu amwewa. Jezu akhafunisisa kuthandiza wanthu ndipo tikufunisisa kumutewezera. (1 Ped. 2:21) Tikacita ciri-centse kuti titewezere Jezu mwa kumbathandiza anzathu, ifepano tin’dzakomedwa kwene-kwene thangwe ra kudziwa kuti tikukondwesa Yahova. w22.02 24 ¶16; 25 ¶18

Cinthu comwe Yahova akuciphatisa basa ntsiku zino kuti apitirize kutsogolera wanthu wace ni Fala lace, Bibliya. Tikapambula nthawe yakukumbukira bzomwe Yahova ambatipfunzisa, tin’dzakwanisa kuteweza malango yace na kucita bwino basa lathu lakupalizira. (1 Tim. 4:15, 16) Cinthu cinango comwe Yahova ambaphatisa basa kuti atipase malango ni “kapolo wakukhulupirika na wanzeru.” (Mat. 24:45) Nthawe zinango, kapoloyu angatipase malango yomwe tingayabvesese lini bwino-bwino. Iye angatipase malango yakuti tin’funika kukonzekera malengwa ya pantsi yomwe ifepano tikuwona ninga kuti yangacitike lini komwe timbakhala. Ayai tingayambe kukumbuka kuti malango yomwe iye akutipasa pa nthawe ya matenda ino yalemwa. Kodi n’ciyani comwe tin’funika kucita tikawona ninga kuti malango yomwe tikupasidwa yangaphate lini basa kwa ifepano? Mbakumbukirani nkhani za m’Bibliya zomwe tidaziwerenga kale. Nthawe zinango, wanthu wa Mulungu ambapasidwa malango yomwe munthu angayawone ninga kuti ngakusaya basa koma yambapulumusa moyo. — Way. 7:7; 8:10. w22.03 18-19 ¶15-16

Na cikhulupiro centse, Jezu adalewa mafala ya m’vesi la leroya. Jezu akhadziwa kuti tsogolo lace likhali m’manja mwa Yahova, ndipo iye akhana citsimikizo centse cakuti Pai wace angadadzamukumbukira. Kodi tingapfunze ciyani na mafala ya Jezuya? Pitirizani kukhala wakukhulupirika kwa Yahova. Kuti mukwanise kucita bzimwebzi, imwepo mun’funika ‘kukhulupira Yahova na mtima wanu wentse.’ (Mim. 3:5) Onani ciratizo ca m’bale Joshua, wa magole 15 yakubadwa, omwe adaduwala matenda yakugopswa. Iye adalamba kutambira thandizo la adotolo lomwe likhapitana na lamulo la Mulungu. Pomwe akhadasala pang’ono kufa, adauza mai wace kuti: “Mai, inepano ndiri m’manja mwa Yahova. . . . Mai, ndikukuuzani na mtima wangu wentse mafalaya thangwe ndikudziwa kuti Yahova an’dzandilamusa ndicidzakhala pomwe na moyo. Yahova ambadziwa makumbukidwe yangu na momwe inepano nimbabvera ndipo nimbamufuna kwene-kwene.” Ali-wentse wa ifepano an’funika kumbabzibvunza kuti: ‘Bzingadakhala kuti ndikuduwala mwakuti penu-penu ayai ndikugumana na mayezo yomwe yangadaikha moyo wangu pa ngozi, kodi ningadapitiriza kukhala wakukhulupirika kwa Yahova na kukhulupirambo kuti iye an’dzandikumbukira?’ w21.04 12-13 ¶15-16

Atumiki wa Yahova ambalimbikisidwa akambacita basa lakupalizira. Ifepano tikambapalizira cadidi ca m’Bibliya pabodzi na anzathu, timbagumana mtsangalazo na mphanvu, bziribe basa penu wanthu abvume ayai aleke kubvuma kutitetekera. Abale winango angabzibve kuti an’kwanisa lini kucita bzinthu bzizinji mu utumiki thangwe ra momwe bzinthu bziriri pa moyo wawo. Penu imwepo mukubzibvambo tenepoyo, kumbukirani kuti Yahova ambakomedwa na nyongo yomwe mukulatiza pa kumutumikira. Yahova ambawona ndipo ambatenda nyongo yathu yomwe timbalatiza mu utumiki, napo penu tikukwanisa lini kucoka pa mui thangwe ra mabvuto yakusiyana-siyana. Yahova angatipase mipata kuti tipalizire wanthu omwe ambatisamalira pa mui ayai adotolo. Tikambandendemezera bzomwe tikhacita kale-kale, tingagoboke m’mabondo. Tsono tikambakumbukira momwe Yahova akutithandizira tsapano, tin’dzagumana mphanvu zomwe tikufunikira kuti tipirire mabvuto yali-yentse ticikhala wakukondwa. Ifepano timbadziwa lini kuti ni mbewu ziponi zacadidi zomwe tikabzala zingamere ziciyamba kukula. — Mpal. 11:6. w21.05 24-25 ¶14-17

Kusirira kwakuipa kudacitisa Mambo Davide kuyebwa bzomwe Yahova adamupasa, bzomwe ni kudala, mbiri na kukunda anyamadulanthaka wace ku nkhondo. Thangwe ra kutenda, Davide adadziwa kuti bzinthu bzomwe Mulungu adamupasa bzikhali bzizinji ndipo ‘angadakwanisa lini kubzifotokoza!’ (Sal. 40:5) Tsono pa nthawe inango, Davide adayebwa bzomwe Yahova adamupasa. Napo kuti Davide akhana akazi azinji, iye adabvuma kuti cikhumbo cakufuna mkazi wa mwenekaciro cikule mu mtima mwace. Mkaziyo akhali Bateseba, ndipo bayace akhali Uriya m’Hiti. Thangwe ra kusaya kukumbuka bwino, Davide adacita malume ya pa mphasa na Bateseba, ndipo mkaziyo adakhala na pathupi. Bzomwe Davide adacitabzo bzikhali bzakuipa kwene-kwene. Tsono iye adacitiratu cinthu cinango cakuipa kwene-kwenetsa. Davide adanyang’ana njira yakuti Uriya aphedwe! (2 Sam. 11:2-15) Kodi Davide akhakumbukanyi? Kodi iye akhakumbuka kuti Yahova angadawona lini? Mtumiki wakukhulupirika wa Yahovayu adakundidwa na khalidwe la kusirira kwakuipa, ndipo adabonera na bzomwe adacitabzo. Na kupita kwa nthawe, Davide adadzabvuma kuti akhadaphonya ndipo adakungula. Ndipo iye adatenda kwene-kwene Yahova thangwe ra kumulekerera komwe adacita! — 2 Sam. 12:7-13. w21.06 17 ¶10

Tingakumbuke kuti tin’kwanisa lini kucitisa pfunziro la Bibliya. Pinango timbakumbuka kuti tin’funika kudziwa bzinthu bzizinji ayai kukhala na luso ninga mpfunzisi kuti tikwanise kupfunzisa munthu munango. Penu mumbakumbukambo tenepoyo, onani bzinthu bzitatu bzomwe bzingakuthandizeni kuwona kuti mungakwanise kupfunzisa munthu. Cakuyamba, Yahova ambakuwonani kuti mungakwanise kupfunzisa wanthu winango. Caciwiri, Jezu, omwe ‘adapasidwa utongi bwentse kudzulu na pa dziko la pantsi,’ ndiye adakuuzani kuti mupfunzise wanthu. (Mat. 28:18) Ndipo cacitatu, imwepo mungathembe wanthu winango kuti akuthandizeni. Pakulewalewa, Jezu akhathemba bzomwe Pai wace adamupfunzisa, ndipo imwepo mungacitembo bzibodzi-bodzibzi. (Ju. 8:28; 12:49) Kuthimizira bzimwebzi, imwepo mungakumbire nyakunyang’anira kagulu kanu ka utumiki bwakumunda, mpainiya waluso, ayai mpalizi wakukhwima kuti akuthandizeni kuyambisa na kucitisa pfunziro la Bibliya. Njira ibodzi yomwe ingakuthandizeni kuwona kuti mungakwanise kupfunzisa munthu, ndiyo kukhala pabodzi na apalizi amwewa pomwe iwo akucitisa mapfunziro yawo ya Bibliya. w21.07 6 ¶12

Pomwe dzikoli likuyenda kukamala, tin’funika kukhulupira kuti Yahova ambacita bzinthu bzakulungama nthawe zentse. Thangwe ranyi? Thangwe pa citsautso cikulu, ifepano tin’dzapasidwa malango yomwe yan’dzawoneka ninga yakusaya basa. Yahova an’dzalewalewa lini nafe maso na maso. Bzikuwoneka kuti iye an’dzatipasa malango mwakuphatisa basa wanthu omwe adawasankhula. Pa nthawe imweyo, tin’dzafunika kukhulupira malangoyo ticileka kukumbuka kuti: ‘Kodi malangoya yakucokeradi kwa Yahova ayai nga mu msolo mwawo?’ Kodi mun’dzakhulupira Yahova na gulu lace pa nthawe yakunesayi? Bzomwe imwepo mumbacita mukapasidwa malango na wanthu omwe akuphatisidwa basa na Mulungu kuti atitsogolere ntsiku zino bzin’kuthandizani kudziwa mtawiro wa mbvunzoyu. Penu imwepo mumbakhulupira malango yomwe timbatambira ntsiku zino na kuyabvera mwakusaya kucedwa, mun’dzacitambo tenepoyo pa citsautso cikulu. w22.02 6 ¶15

Gidiyoni pabodzi na acikunda wace 300 adakunda nkhondo thangwe ra kuthandizidwa na Yahova. Bzimwebzi bzidacitisa kuti wanthu akomedwe nawo kwene-kwene. Tsono amuna wa ku Efraimu adayenda kukawonana na Gidiyoni. Iwo alibe kuyenda kumweko kuti akamutende, koma kuti akapopotezane naye, thangwe rakuti Gidiyoniyo alibe kuwacemera kuti ayende naye pabodzi ku nkhondo. (Way. 8:1) Gidiyoni adakumbusa amunawo momwe Yahova adawathandizira kucita bzinthu bzikulu-bzentse. Pomwe adabva bzimwebzi, amunawo ‘adagwesa mpfuwa.’ (Way. 8: 3) Gidiyoni adabzicepesa kuti akhazikise mtendere pakati pa wanthu wa Mulungu. Bzomwe adacita amuna wa ku Efraimubzi bzikutipfunzisa kuti tin’funika lini kumbabzilemekezesa tekha, koma tin’funika kumbalemekezesa Yahova. Omwe ndife misolo ya mabanja pabodzi na akulu wa gwere, tingapfunzembo bzinthu bzinango na bzomwe Gidiyoni adacita. Munthu akakalipa na cinthu comwe ifepano tacita, tin’funika kubvesesa kuti thangwe ranyi iye wakalipa. Ndipo cinango, tin’funikambo kumutenda pa cinthu cabwino comwe iye wacita. Kuti ticite bzimwebzi, tin’funika kukhala wakubzicepesa. Dziwani kuti mtendere ngwakufunika kwene-kwene pakati pathu kuposa kulatiza kuti tina lazau. w21.07 16-17 ¶10-12

Yahova adatilemekeza mwakutikonza m’cifanikiso cace. Pakuti tidakonzedwa m’cifanikiso ca Mulungu, ifepano tingapfunze momwe tingalatizire makhalidwe yace yabwino. Mwa ciratizo, tingalatize lufoyi, ntsisi, kukhulupirika na cirungamo. (Sal. 86:15; 145:17) Tikambalatiza makhalidweya, timbakhala tikulemekeza Yahova na kulatiza kuti timbamutenda. (1 Ped. 1:14-16) Tikambacita bzinthu bzomwe Baba wathu wa kudzulu ambakomedwa nabzo, timbakhala wakupfatsa. Ndipo pakuti tina makhalidwe ninga yomwe Yahova anayo, ifepano tingakhale wanthu omwe iye akufuna m’banja mwace. Yahova adatikonzera mui wabwino kuti tikhale. Kale-kale, pomwe Yahova akhanati kulenga munthu wakuyamba, iye adakonza dziko la pantsi kuti wanthu akhale m’mwemo. (Djobi 38:4-6; Jer. 10:12) Pakuti Yahova ngwakudeka mtima na wakupasa, iye adalenga bzinthu bzizinji bzabwino kuti timbakomedwe nabzo. (Sal. 104:14, 15, 24) Pa nthawe inango, pomwe iye akhakumbukira bzinthu bzomwe adalenga, “adawona kuti bzikhali bwino.” — Ciy. 1:10, 12, 31. w21.08 3 ¶5-6

Tentsenefe tina udindo bwa kupalizira na kupfunzisa wanthu. (Mat. 28:19, 20; Aro. 10:14) Kodi imwepo mukufuna kukulisa luso lanu pa basa lakufunikali? Pfunzani broxura lakuti Kuwerenga na Kupfunzisa ndipo khalani na bzakulinga bzomwe bzingakuthandizeni kuphatisa basa bzomwe mukupfunzabzo. Lekani kuyebwa kuti cakulinga cakufunika kwene-kwene comwe mun’funika kukhala naco ni kukulisa makhalidwe yomwe Mulungu ambakomedwa nayo. (Akol. 3:12; 2 Ped. 1:5-8) Tentsenefe tikufuna kucitira Yahova bzinthu bzizinji, koma timbakwanisa lini. Tsono mu dziko lipsa, ifepano tin’dzatumikira Mulungu bwino-bwino ndipo palibe cinthu comwe cin’dzatiphingiza. Pomwe nthaweyo ikanati kufika, tikacita nyongo pa basa liri-lentse la Yahova, tin’dzathimizira kukondwa kwathu ndipo tin’dzakhala lini wakusunama. Ndipo cinthu cakufunika kwene-kwene, tin’dzalemekezesa na kutumbizisa Yahova, ‘Mulungu [wathu] wakukondwa.’ (1 Tim. 1:11) Tenepo, bwerani timbakondwe na utumiki bomwe tinabo! w21.08 25 ¶18-20

Penu imwepo mudakulira m’banja la Mboni za Yahova, pinango-pentse mudapfunza bza Yahova kuyambira muli mwana. Ndipo mudapfunzisidwa kuti iye ni Mulengi, ana makhalidwe yabwino, nakuti akufuna kusandusa dzikoli kuti likhale paraizo. (Ciy. 1:1; Mab. 17:24-27) Napo bziri tenepo, wanthu azinji ambakhulupira lini kuti Mulungu alipo ayai ambakhulupira lini kuti bzinthu bzentse bzomwe bziripobzi ndiye omwe adabzilenga. M’mbuto mwace, iwo ambakhulupira kuti moyo udandoyambambo okha, ndipo pang’ono na pang’ono udadzafika pa kukhala bzinthu bzikulu-bzikulu bzamoyo. Winango mwa wanthu amwewo ni wale omwe adapfunza kwene-kwene. Iwo ambalewa kuti siyentsiya idalatiza kuti Bibliya ndakunama ndipo wanthu omwe ambakhulupira kuti Mulengi alipo mbale omwe alibe kupfunza, alibe nzeru ayai omwe mbakupusa kupumpsika. Bziribe basa magole yomwe tinayo ninga Mboni ya Yahova, tentsenefe tin’funika kupitiriza kukulisa cikhulupiro cathu. Tikacita bzimwebzi, tin’dzapumpsidwa lini na wanthu omwe ambalewa kuti bzomwe Bibliya limbapfunzisa mpsakunama. — Akol. 2:8. w21.08 14 ¶1-3

Kale-kale, atumiki wakukhulupirika wa Yahova omwe ni Abeli, Nowa, Abalahamu, Djobi na winango adalatiza kuti akhalemekeza Yahova na kumufuna. Iwo akhacita bzimwebzi mwa kumubvera, kumukhulupira na kumbapereka ntsembe kwa iye. Bibliya limbalewa lini bzinthu bzentse bzomwe iwo adacita kuti Yahova akomedwe nawo. Tsono iwo adacita ciri-centse kuti alemekeze Yahova. Ndipopa iye adabvuma kunamata kwawo. Pomwe padapita nthawe, Yahova adapasa Ajirayeri Malamulo mwakuphatisa basa Mozeji. Malamulo manango yomwe iwo adapasidwa yakhalewa bzomwe akhafunika kucita kuti Yahova abvume kunamata kwawo. Kucokera pomwe Jezu adafa na kulamusidwa, Yahova ambafuna lini kuti atumiki wace ambamunamate mwa kumbateweza Malamulo ya Mozeji. (Aro. 10:4) Bibliya limbalewa kuti Akristau an’funika kuteweza lamulo lipsa, lomwe ni “lamulo la Kristu.” (Agal. 6:2) “Lamulo” limweri lidasiyana na Malamulo ya Mozeji thangwe liribe lista ya bzinthu bzomwe iwo an’funika kucita na bzomwe an’funika lini kucita. Koma iwo an’funika kundotewezera bzomwe Jezu adacita na kupfunzisa. Ntsiku zino, Akristau akucitambo nyongo kuti atewezere Kristu kuti akondwese Yahova na “kutsangalazidwa” pa moyo wawo. — Mat. 11:29. w22.03 20-21 ¶4-5

Yahova ambatetekera wana wace. Iye adatetekera mipembo mizinji yomwe Mwana wace adaicita pomwe akhali pa dziko la pantsi. Iye adatetekera pomwe Jezu adapemba kuti acite cinthu cakufunika kwene-kwene, comwe cikhali kusankhula apostolo wace 12. (Luka 6:12, 13) Yahova adatetekera pomwe mpembo wa Jezu pomwe iye akhacita thupo kwene-kwene. Pomwe Jezu akhadasala pang’ono kuti aperekedwe na Djuda, iye adapemba kuna Baba wace thangwe ra bzinthu bzomwe bzikhadasala pang’ono kumucitikira. Yahova alibe kundotetekera mpembo wa Jezu, koma adatumambo anjo kuti akalimbikise Mwana waceyo. (Luka 22:41-44) Ntsiku zino, Yahova akupitiriza kutetekera mipembo ya atumiki wace ndipo iye ambatawira mipemboyo pa nthawe yabwino na mu njira yakuthemera. (Sal. 116:1, 2) Mpfumakazi inango ya ku Índia idawona momwe Yahova adatawirira mipembo yace. Iyo ikhabonera kwene-kwene thangwe ra thupo, ndipo idapemba kwa Yahova kuti amuthandize kumalisa thupolo. Mpfumakaziyo idati: “Programa ya JW Broadcasting^® ya mwezi wa Maio, 2019, yakulewa bza momwe tingamalisire thupo, idandokhala ninga kuti idakonzedwera inepano. Ndidawona kuti programayo ikhali mtawiro wa mpembo wangu.” w21.09 21-22 ¶6-7

Ndokumbukirani momwe bzikhaliri bzakunesa kuna Akristau wakuyambirira wale kusiya bzinthu bzawo acikayamba papsa bzinthu bzentse. Tsono iwo akhafunika cikhulupiro kuti athembe kuti Yahova angadawapasa bzomwe akhafunikira pa moyo wawo. Ndipo iwo adathandizidwa kukhala na cikhulupiroco. Magole maxanu pomwe Aroma akhanati kuzungulira mzinda wa Jeruzalemu, mpostolo Paulo adapasa Ahebereu malango yakufunika yakuti: “Lekani kumbafuna kwene-kwene kobiri, m’mbuto mwace mbakomedwani na bzomwe munabzo, thangwe Mulungu adalewa kuti: ‘Inepano nin’dzakusiya lini ndipo cipo ndicidzakuthawa.’ Kuti tikhale wakukhwimika kwene-kwene ticilewa kuti: ‘Yahova ni mthandizi wangu, nin’dzagopa lini cinthu. Kodi munthu angandicitenyi?’” (Aheb. 13:5, 6) Akristau omwe adateweza malango ya Paulo pomwe Aroma akhanati kuzungulira mzinda wa Jeruzalemu bziribe kuwanesa kukhala na moyo wakusaya kufuna bzinthu bzizinji pomwe adayenda kukakhala ku mbuto inango. Iwo akhatsimikizira kuti Yahova angadawapasa bzomwe akhafunikira pa moyo wawo. w22.01 4 ¶7, 9

Munthu wantsisi ngule omwe ngwakudeka mtima na wakupasa. Bzimwebzi bzikutikumbusa nkhani yomwe Jezu adaifotokoza yakulewa bza Msamariya wantsisi. Munthu umweyu ‘adabvera ntsisi’ Mdjuda omwe adamenyedwa acibedwa bzinthu bzace na akambowa. Ndipo bzimwebzi bzidamucitisa kuti amuthandize mwa lufoyi. (Luka 10:29-37) Ciratizoci cimbatipfunzisa bza ntsisi, lomwe ni khalidwe labwino kwene-kwene la Mulungu wathu. Mulungu ambatibvera ntsisi thangwe rakuti ambatifuna, ndipo ambacita bzimwebzi mu njira zakusiyana-siyana ntsiku zentse. Pana njira inango pomwe yomwe munthu angalatizire ntsisi. Munthu wantsisi angakumbuke bza kuleka kulanga munthu omwe akuthemera kulangidwa. Imweyi ni njira inango yomwe Yahova ambalatizira kuti ambatibvera ntsisi. Nyakunemba Salimo adalewa kuti Yahova ambaticitira lini bzinthu ‘mwakubverana na kutaza kwathu.’ (Sal. 103:10) Tsono, nthawe zinango Yahova angapereke cirango camphanvu kuna munthu omwe waphonya. w21.10 8 ¶1-2

Yahova ambalatiza lufoyi lacadidi kuna wale omwe ali pa uxamwali bwabwino na iye basi, omwe ni atumiki wace. Tingawone bzimwebzi kucokera pa bzomwe Mambo Davide na mpolofeta Daniyeli adalewa. Mwa ciratizo, Davide adati: ‘Pitirizani kulatiza lufoyi lacadidi kuna wale omwe mumbawadziwa.’ ‘Yahova an’dzapitiriza kulatiza lufoyi lacadidi mpaka kale-kale, kuna wanthu omwe ambamugopa.’ Ndipo Daniyeli adanemba kuti: ‘Imwe Yahova Mulungu wacadidi, Mulungu Mkululetu na wakucitisa mantha, ule omwe ambayebwa lini mpangano ndipo ambalatiza lufoyi lacadidi kwa wale omwe ambamufuna na kwa wale omwe ambabvera malamulo yace.’ (Sal. 36:10; 103:17; Dan. 9:4) Mwakubverana na mafala yakufuliziridwaya, Yahova ambalatiza lufoyi lacadidi kuna atumiki wace thangwe rakuti iwo ambamudziwa, ambamugopa, ambamufuna ndipo ambabvera malamulo yace. Yahova ambalatiza lufoyi lacadidi kuna wale omwe ambamutumikira mu njira yakuthemera. Pomwe tikhanati kuyamba kutumikira Yahova, ifepano tidalatizidwa lufoyi lomwe Mulungu ambalatiza wanthu wentse. (Sal. 104:14) Tsono ninga atumiki wace, ifepano timbagumanambo phindu na lufoyi lace lacadidiri. w21.11 4 ¶8-9

Bziribe basa bzomwe bzingaticitikire, ifepano ndife wakutsimikiza kubvera mafala ya Jezu ya m’vesi la leroya. Ntsiku zino, wanthu azinji ambatewera atsogoleri wa magereja wakutapira mkanwa. Wanthuwo ambadabwa na kapaliziridwe kawo, ndipo bzimwebzi bzimbacitisa kuti afike pakunamata atsogoleriwo. Wanthu azinji ambayenda ku magereja yawo, ambagula mabukhu yawo ndipo ambapereka kobiri zizinji kuna atsogoleriwo ayai ku magereja yawoko. Wanthu winango ambakhulupira mafala yentse yomwe atsogoleriwo ambalewa. Iwo ambakomedwa kwene-kwene na atsogoleriwo kuposa momwe angadakomedwera bzingadakhala kuti awona Jezu caiye! Mwakusiyana na wanthuwo, anamati wacadidi wa Yahova ambatewera lini wanthu. Napo kuti timbalemekeza wale omwe akutitsogolera, ifepano timbabvera mafala ya Jezu yakuti: ‘Mwentsenemwe ni ubale bwanu.’ (Mat. 23:8-10) Ifepano timbanamata lini wanthu napo akhale atsogoleri wa magereja ayai wa ndale. Ndipo timbathandizira lini magereja yawoyo ayai ndale zawozo. Koma ndife wakusiyana na dzikoli thangwe timbapitira lini nkhani za ndale. Bzikuwonekeratu kuti ndife wakusiyana kwene-kwene na magereja yomwe yambabziti ni Akristau. — Ju. 18:36. w21.10 20 ¶6-7

Mkristau ali-wentse omwe akufuna kukhala wakucena an’funika kutsimikizira kuti palibe cinthu ayai palibe munthu ali-wentse omwe ambamuwona kuti ngwakufunika kwene-kwene kuposa uxamwali bwace na Yahova. Ndipo pakuti timbadziwika na dzina lakuti Mboni za Yahova, tin’funika kutsimikizira nthawe zentse kutcenkha bzicito bzomwe bzingadzonge ayai kupswipiza dzina lace lakucena. (Mwam. 19:12; Zai. 57:15) Kwa Ajirayeri, kuzindikira kuti Yahova ni Mulungu wawo kukhaphatanidza kubvera malamulo mazinji. Mwambo 18:4 ambati: “Imwepo mun’funika kubvera malango yangu, ndipo mun’funika kuphatisa basa mitemo yangu pa moyo wanu. Ine ndine Yahova Mulungu wanu.” Kapitulo 19 imbafotokoza zinango mwa “nfundozo.” Mwa ciratizo, mavesi 5-8, 21, 22 yambafotokoza bza kupereka ntsembe bzirombo. Ntsembezo zikhafunika kuperekedwa mu njira yomwe ‘ingadapswipiza lini cinthu cakucena ca Yahova.’ Kuwerenga mavesi yamweya kun’funika kuticitisa kufuna kukondwesa Yahova na kupereka ntsembe zakubvumizika za citumbizo, ninga momwe Ahebereu 13:15 ambatilimbikisira. w21.12 5-6 ¶14-15

Mabanja yomwe yalowolana tsapanopa yangagumane phindu na bziratizo bza wale omwe adapfunza kuthemba Yahova. Pana mabanja manango yomwe yamala magole mazinji yakucita utumiki bwa nthawe zentse. Penu imwepo mukufuna kucita bzizinji pa moyo wanu, abvunzeni kuti akuthandizeni kudziwa momwe adakwanisira kucita utumiki bwawo. Imweyi ni njira inango yakulatizira kuti timbathemba Yahova. (Mim. 22:17, 19) Lekani kuyebwa kuti malowozi ni mphaso yakucokera kwa Yahova. (Mat. 19:5, 6) Iye ambafuna kuti wanthu wakulowolana akomedwe na mphaso imweyi. Imwe omwe mwalowolana tsapanopa, mbawonani momwe mukuphatisira basa moyo wanu. Kodi mumbacita ciri-centse comwe mungakwanise kuti mulatize kuti mumbatenda bzomwe Yahova adakupasani? Mbalewalewani na Yahova mu mpembo. Fufudzani m’Bibliya kuti mugumane nfundo zomwe zikubverana na momwe bzinthu bziriri pa moyo wanu. Ndipo phatisani basa malango yomwe Yahova ambakupasani. Imwepo mukambaikha nzeru zanu pa kutumikira Yahova, mun’dzakhala wakukondwa ndipo moyo wanu un’dzakhala wakusimbidwa! w21.11 18-19 ¶16, 18

Tiyago akhambabziwona mu njira yakuthemera. Tiyago akhambabziwona lini kuti ngwakufunika kwene-kwene kuposa Akristau winango thangwe rakuti akhali m’bale wace wa Jezu ayai thangwe ra utumiki bomwe adapasidwa. Iye akhambacemera abale wace wacikristau kuti “abale wangu wakufunidwa.” (Tiy. 1:16, 19; 2:5) Iye akhambacitisa lini wanthu winango kumuwona ninga kuti ngwakulungama. Bzomwe tikupfunza: Kumbukirani kuti tentse tina pikado. Tin’funika lini kumbakumbuka kuti ndife wakufunika kwene-kwene kuposa wale omwe timbawapfunzisa. Thangwe ranyi? Ifepano tikacitisa nyakupfunza wathu kutiwona ninga kuti timbaphonya lini, iye an’dzawofoka thangwe rakuti an’dzakumbuka kuti angakwanise lini kucita bzomwe Mulungu ambafuna. Tsono tikambalatiza kuti nthawe zinango bzimbatinesambo kuteweza nfundo za m’Bibliya na kumufotokozerambo momwe Yahova watithandizira kucinja bzinthu pa moyo wathu, ifepano tin’dzathandiza nyakupfunza wathuyo kuwona kuti angakwanisembo kutumikira Yahova. w22.01 12 ¶13-14

Tikambakumbuka ninga Jezu tin’dzakwanisa kumutewezera ndipo tin’dzakwanisambo kutewezera makhalidwe yace. (Aheb. 1:3) Pinango tingalewe kuti: ‘Jezu akhali wakulungamiratu. Ndipopa ningakwanise lini kukhala ninga iye!’ Penu timbakumbuka tenepoyo, kumbukirani ibzi. Cakutoma, imwepo mudakonzedwa kuti mukhale ninga Yahova na Jezu. Ndipopa tingakwanise kucita bzimwebzo napo ndife wakuperewera. (Ciy. 1:26) Caciwiri, mzimu wakucena wa Mulungu una mphanvu kwene-kwene m’cirengedwe centse. Mzimuyo ungakuthandizeni kucita cinthu comwe imwepo mungakwanise lini kucita na mphanvu zanu zokha. Cacitatu, Yahova akudziwa kuti pakali pano imwepo mungakwanise lini kulatiza bwino-bwinoletu makhalidwe yentse yomwe yambacita mbali ya bzisapo bza mzimu. Ndipo kumbukiranimbo kuti Yahova adapambula magole yakukwana 1000 kuti adzathandize wanthu omwe ana cidikhiro ca kudzakhala na moyo wakusaya kumala pa dziko la pantsi kukhala wakulungama. (Apok. 20:1-3) Comwe Yahova akufuna kwa ifepano, n’cakuti ticite nyongo ya kumutewezera na kumuthemba na mtima wentse kuti iye an’tithandiza. w22.03 9 ¶5-6

Ni mpembo lini okha omwe ungatithandize kupitiriza kukhala pa uxamwali bwakulimba na Yahova. Kupfunza Fala la Mulungu na kugumanika pa mitsonkhano ya gwere kungatithandizembo kukhala pa uxamwali bwakulimba na Mulungu. Kodi pana cinthu cinango comwe mungacite kuti muphatise bwino basa nthawe yanu yakupfunza na nthawe yomwe muli pa mitsonkhano ya gwere? Bzibvunzeni kuti: ‘Kodi n’ciyani comwe cinganditazise kukhala tceru pa mitsonkhano ayai pomwe ndikucita pfunziro la pandekha?’ Kodi kungakhale kupfuwiridwa mtedwe, kutambira mensaje ayai kutambira bzinthu bzinango pa mitcini yathu ya nzeru? Mukawona kuti nzeru zanu zikufamba-famba pomwe muli pa mitsonkhano ayai pomwe mukupfunza, kumbirani Yahova kuti akuthandizeni kukhala tceru. Bzingakhale bzakunesa kukhala tceru pa bzinthu bzauzimu pomwe tidasunama ayai tina thupo, koma kukhala tceruko n’kwakufunika. Pembani kuti Yahova akupaseni mtendere omwe umbakhotcerera sikuti mtima wanu okha koma na “makumbukidwe yanu.” — Afil. 4:6, 7. w22.01 29-30 ¶12-14

Mambo Uziya adalamba malango. Iye adapita m’cipinda ca mu templo ya Yahova, comwe ni antsembe okha omwe akhabvumizidwa kupita ndipo adayezera kupereka bzakununtcirisa. Tsono antsembe wa Yahova adamuuza kuti: “Mpsakubvumizika lini kwa imwepo a Uziya kutentha bzakununtcirisa kwa Yahova. Ni antsembe okha omwe an’funika kumbatentha bzakununtcirisa.” Kodi Uziya adacita ciyani? Iye angadabzicepesa acibvuma malangoyo na kucokeratu mu templomo, Yahova angadamulekerera. Tsono “Uziya . . . adakalipa.” Thangwe ranyi iye alibe kutetekera malangoyo? Thangwe iye akhawona kuti, pakuti akhali mambo, akhana ugo bwakucita ciri-centse comwe akhafuna. Tsono Yahova akhawona lini tenepo. Pakuti Uziya adacita cinthu comwe akhalibe ugo bwa kucicita, iye adakhala na “mapere mpaka ntsiku yakufa kwace.” (2 Nkha. 26:16-21) Bzomwe bzidacitikira Uziya bzikutipfunzisa kuti tikalamba malango yakucokera m’Bibliya tin’dzaluza uxamwali bwathu na Yahova. w22.02 9 ¶7

Munthu omwe ana “unthu bwakale” ambakumbuka na kucita bzinthu bzakuipa. (Akol. 3:9) Iye angakhale wakubzifuna yekha, wakukulumiza kukalipa, wakusaya kutenda na wakubzikuza. Iye ambakomedwa kuwona bzinthu bzamaika na mavidiyo yakumenyana ayai ya nkhondo. Napo kuti iye ambacita bzimwebzi, nthawe zinango angakhalembo na makhalidwe yabwino ndipo angabzipase mulandu akalewa ayai kucita cinthu cakuipa. Tsono iye ambalewedwa kuti ana unthu bwakale thangwe rakuti ambatazira kucinja nzeru zace na bzicito bzace. (Agal. 5:19-21; 2 Tim. 3:2-5) Ifepano ndife wakuperewera, ndipopa tingakwanise lini kucoseratu nzeru na bzikhumbo bzakuipa mu mtima mwathu. Nthawe zinango tingacite ayai kulewa cinthu cakuipa. (Jer. 17:9; Tiy. 3:2) Tsono tikakhundula unthu bwakale, tin’dzabvuma lini kuti makhalidwe na bzicito bzakuipa bzitikunde. Ndipo bzimwebzi bzin’dzatithandiza kuti tileke kulatiza unthu bwakale. — Zai. 55:7; w22.03 3 ¶4-5     

Akulu, mbawonani makhalidwe yabwino yomwe abale na mpfumakazi zanu anayo. Munthu ali-wentse ambaphonya koma ali-wentse ana makhalidwe yabwino yomwe tingakomedwe nayo. (Afil. 2:3) N’cadidi kuti nthawe zinango akulu angafunike kupereka malango kwa m’bale ayai mpfumakazi. Tsono iwo an’funika kutewezera Paulo mwa kumbawona makhalidwe yabwino yomwe abale na mpfumakazi anayo sikuti bzinthu bzomwe iwo ambaphonya. Iwo angacite bwino kumbakumbukira lufoyi lomwe m’bale ayai mpfumakazi analo kwa Yahova, kupirira kwace pa kutumikira Yahovayo na bzinthu bzabwino bzomwe angakwanise kucita. Akulu omwe ambawona makhalidwe yabwino ya abale na mpfumakazi, ambacitisa kuti abalewo awone kuti ambafunidwa na gwere lentse. Kumbukirani kuti Yahova akufuna lini kuti imwepo mukhale munthu wakulungamiratu. Comwe iye akufuna kwa imwepo n’cakuti mukhale wakukhulupirika. (1 Ako. 4:2) Yahova adakomedwa kwene-kwene na basa lomwe Paulo adacita na kukhulupirika kwace. Ndipo imwepombo khalani na citsimikizo centse cakuti Yahova ambakomedwambo na bzomwe mumbacita. Yahova “an’dzayebwa lini basa lanu na lufoyi lomwe mudalilatiza pa dzina lace, ndipo mumbalatiza bzimwebzi mwakutumikira anyakukhulupira anzanu mpaka pano.” — Aheb. 6:10. w22.03 31 ¶19, 21