Novembro

Yahova adakuthandizani mu njira zakusiyana-siyana. Iye adakuthandizani kuti mukhale wakugwa mpfuwa pomwe mukhanyozedwa mu utumiki. Ndipo adakuthandizanimbo kuti mukumbukire cinembo cabwino kuti muthandize naco mwenekaciro mui omwe akhafunisisa kukutetekerani. Ndipo iye adakupasani mphanvu kuti mupitirize kupalizira napo kuti wanthu akhafuna lini kukutetekerani. (Jer. 20:7-9) Yahova ambatilatizambo kuti ngwabwino mwa kutipfunzisa kuti tikapalizire. Pa mitsonkhano ya pakati pa mdzinga, timbabva bziratizo bza upalizi ndipo timbauzidwa kuti tiphatise basa bziratizobzo mu utumiki bwakumunda. Pakuyamba, pinango bzingatinese kucita upalizi bupsa. Tsono tikabucita, timbawona kuti n’bwakuthandiza kwene-kwene m’gawo lathu. Pa mitsonkhano ya gwere na pa mitsonkhano ya cigawo, ifepano timbauzidwambo kuti timbapalizire mu njira zakusiyana-siyana zomwe tikanati taziyezera kale. Bzimwebzi bzimbaticitisambo kukhala na thupo. Tsono tikayezera kuphatisa basa njirazo, Yahova ambatisimba. w21.08 27 ¶5-6

Mu tsamba lomwe adanembera gwere la ku Kolinto, Paulo adapereka malango yamphanvu. Ndipo pomwe adamala kunemba tsambali, iye adatuma Tito kwa iwo. Iye adakomedwa kwene-kwene kudziwa kuti iwo adaphatisa basa malango yaceyo! (2 Ako. 7:6, 7) Akulu angatewezere Paulo mwa kumbapambula nthawe kuti ambaceze na abale na mpfumakazi. Cinthu cibodzi comwe angacite kuti akwanise kucita bzimwebzi ni kufika mwakamfulumize pa mitsonkhano kuti ambaceze na abale na mpfumakazi. Nthawe zinango iwo angamale mphindi zakucepa akuceza na m’bale ayai mpfumakazi kuti ailimbikise. (Aro. 1:12) Mkulu wa gwere omwe ambatewezera bzomwe Paulo adacita, ambaphatisa basa Fala la Mulungu kuti alimbikise abale na mpfumakazi na kuwatsimikizira kuti Mulungu ambawafuna. Iye ambaceza nawo kawiri-kawiri ndipo ambacita ciri-centse kuti ambawatende. Mkulu wa gwere akafuna kupereka malango, an’funika kuphatisa basa Fala la Mulungu. Iye an’funika kuleweratu comwe caphonyeka, koma acite bzimwebzi mwakudeka mtima thangwe an’funa kuti abale na mpfumakazi atetekere malango yaceyo. — Agal. 6:1. w22.03 28-29 ¶11-12

Ntsiku zino, Yahova ambapasa wanthu wace ‘mphanvu yakuposa yacibadwa’ kuti iwo apitirize kumutumikira mwakukhulupirika. Cinthu cibodzi comwe timbalimbikisidwa kucita ni mpembo. Pa Aefezo 6:18, mpostolo Paulo adatiuza kuti timbapembe kwa Mulungu pa ‘cakucitika ciri-centse.’ Ndipo Mulunguyo an’dzatitawira mwa kutithandiza. Nthawe zinango, ifepano tingabzibve kuti tamala mphanvu, ayai tingadziwe lini bzinthu bzomwe tin’funika kubzipempherera. Tsono Yahova akutikumbira kuti timbapembe kwa iye, napo tikawona kuti bzikutinesa kumufotokozera bzomwe tikukumbuka na momwe tikubvera. (Aro. 8:26, 27) Ifepano timbakhalambo wamphanvu tikambawerenga Bibliya. Paulo akhambawerenga Bzinembo kuti akhale na mphanvu na mtsangalazo. Ifepano tin’funika kumbacitambo bzibodzi-bodzibzi. (Aro. 15:4) Tikambawerenga Fala la Mulungu na kumbakumbukira bzomwe tawerengabzo, Yahova an’dzaphatisa basa mzimu wace wakucena kuti utithandize kubvesesa bwino-bwino bzinembo na kuwona momwe tingabziphatise basa pa moyo wathu. — Aheb. 4:12. w21.05 22 ¶8-10

Timbawona basa lathu lakupfunzisa kukhala lakufunika kwene-kwene napo kuti timbagumana na mabvuto yomwe yambatitazisa kucita bzizinji pakupfunzisa wanthu. Tingabzibve kuti tin’kwanisa lini kucita bzizinji thangwe ra momwe bzinthu bziriri pa moyo wathu. Mwa ciratizo, apalizi winango mbakukalamba ayai alibe manungo yabwino. Kodi imwepo mukugumanambo na mabvuto ninga yamweya? Penu n’tenepo, ifepano tawona kuti tingacitise mapfunziro mazinji na pa mtedwe ayai na mitcini ya nzeru. Tenepo, imwepo mungayambise na kucitisa mapfunziro ya Bibliya na kumui kwanu. Ndipo pana phindu pomwe linango. Wanthu winango angafune kupfunza Bibliya, tsono iwo ambakhala ali lini pamui pomwe abale wathu ambakhala akupalizira. Tsono iwo angakhale ali pamui macibese ayai usiku. Kodi imwepo mungakhale wakukonzeka kuti mupfunze nawo nthawe zimwezi? Jezu adapfunzisa Nikodemo usiku, yomwe ikhali nthawe yabwino kuna Nikodemoyo. — Ju. 3:1, 2. w21.07 5 ¶10-11

Anyakupfunza wa Juwau Batista akhadabwa thangwe ra kuwona anyakupfunza wa Jezu akucita lini jejum. Jezu adalewa kuti iwo akhalibe mathangwe yakucitira jejum pomwe iye akhana moyo. (Mat. 9:14-17) Napo bzikhali tenepo, Afarizeu na anyamadulanthaka wace winango adamupasa mulandu thangwe rakuti iye akhateweza lini miyambo yawo. Iwo adakalipa kwene-kwene pomwe Jezuyo adapoza munthu pa ntsiku ya Sabudu. (Marko 3:1-6; Ju. 9:16) Ndipo iwo akhalewa mwakucita kusamwa kuti akhalemekeza ntsiku ya Sabudu; tsono okha-okhawo akhawona kuti bziribe mulandu kucita malonda mu templo pa ntsikuyo. Tsono pomwe Jezu adawatsimula kuti thangwe ranyi akhacita bzimwebzo, iwo adakalipa. (Mat. 21:12, 13, 15) Ndipo wanthu omwe Jezu adawapalizira mu sinagoga ya ku Nazaleti adakalipa kwene-kwene pomwe Jezuyo adaphatisa basa bziratizo bza moyo wa Ajirayeri kuti awalatize kuti iwo akhali wanthu wakubzifuna kwene-kwene na wakusaya cikhulupiro. (Luka 4:16, 25-30) Wanthu azinji adalamba Jezu thangwe rakuti Jezuyo alibe kucita bzinthu bzomwe iwo akhadikhirira kuti iye angadacita. — Mat. 11:16-19. w21.05 5-6 ¶13-14

Njira ibodzi yomwe Yahova ambaticenjezera pa nkhani ya kubzikuza na kusirira kwakuipa ni kutiuza kuti timbapfunze na bziratizo bza wanthu winango kucokera m’Bibliya. Tikalewa bza kusirira kwakuipa, timbakumbukira bza Sathani Dyabu. Ninga m’bodzi wa wanjo wa Yahova, Sathani akhana mwayi ukulu kwene-kwene. Tsono iye akhafuna bzizinji. Iye akhafuna kunamatidwa, komwe ni Yahova yekha omwe adathemera. Sathani akufuna kuti tikhale ninga iye. Ndipopa, ambaticitisa kufuna bzinthu bzizinji. Iye adayamba kucita bzimwebzi pa nthawe yomwe adalewalewa na Eva. Yahova mwalufoyi, adapasa Eva na bayace ufulu bwa kudya ‘miti yentse ya m’munda,’ kupambula ubodzi okha basi. (Ciy. 2:16) Napo bzikhali tenepo, Sathani adapumpsa Eva kuti akumbuke kuti akhafunika kudya muti omwe adaletsedwa. Eva alibe kutenda bzinthu bzomwe akhanabzo; iye akhafuna bzizinji. Ifepano tikudziwa kuti nkhani imweyi idamala tani. Eva adacita pikado, ndipo na kupita kwa nthawe iye adadzafa. — Ciy. 3:6, 19. w21.06 14 ¶2-3; 17 ¶9

Adamu na Eva akhafunika kubereka wana na kunyang’anira bwino dziko la pantsi. Bzingadakhala kuti Adamu na Eva adabvera bzomwe Yahova adawauza kuti acite, iwo pabodzi na wana wawo angadakhala m’banja la Mulungu mpaka kale-kale. Adamu na Eva akhana mbuto yakulemekezeka m’banja la Yahova. Pa Salimo 8:5, Davide adalewa bza kulengedwa kwa munthu na Yahova. Iye adati: ‘Mudamukhalisa mwana pang’ono pa kumundendemezera na anjo, ndipo mudamupasa umbiri na ulemerero ninga kumubvazika korowa ya mambo.’ N’cadidi kuti wanthu alibe kupasidwa mphanvu, nzeru na luso mwakundendemerana na anjo. (Sal. 103:20) Napo bziri tenepo, wanthu ni ‘[wana] pang’ono’ basi pa kundendemezera na anjo wamphanvu. Mpsakupasa ntsisi kuti Adamu na Eva alibe kubvera Yahova ndipo iwo adaluza mbuto yawo m’banja lace. Bzimwebzi bzidabweresera mabvuto mbadwo zawo. Tsono bzomwe Yahova akhafuna bziribe kucinja. Iye akufuna kuti wanthu omwe ambamubvera akhale wana wace mpaka kale-kale. w21.08 2-3 ¶2-4

Ntsiku zino, atumiki azinji wa Yahova akugumanambo na mabvuto. Abale winango akukhala m’madziko yomwe basa lathu ndakuletsedwa ayai alibe ufulu bwakucita bzinthu bzinango ndipo iwo ambamangidwa aciyendesedwa “kwa atongi wa m’bzigawo na amambo” kuti akacitire umboni kwa iwo. (Mat. 10:17, 18) Tsono atumiki winango wa Yahova ambagumana na mtundu winango wa mabvuto. Iwo ambakhala m’madziko yomwe ana ufulu bwa kutumikira Yahova, tsono wanthu wa m’banja mwawo ndiwo ambayezera kuwaphingiza kutumikira Yahova. Iwo ambacita ciri-centse kuti awacitise kusiya kutumikira Mulungu. (Mat. 10:32-36) Tsono kazinji-kazinji comwe cimbacitika n’cakuti, iwo akazindikira kuti bzentse bzomwe akhacita kuti atazise munthu kutumikira Mulungu bzayenda papezi, ambaleka kuwaphingizako. Ndipo nthawe zinango, ambadzakhala Mboni ya Yahova ya nyongo. Penu pana munthu omwe akukuphingizani kutumikira Yahova bwino-bwino, lekani kubwerera m’mbuyo! Khalani wakukhwimika. Imwepo mun’funika lini kucita mantha, thangwe Yahova an’dzakuthandizani mwakuphatisa basa mzimu wace wakucena! w22.03 16 ¶8

Bibliya limbalewa kuti Yahova ambawenga “maso yakubzikuza, lirime lakunama na manja yakucosa mulopa wa anyakusaya mulandu.” (Mim. 6:16, 17) Ndipo iye ambawengambo “wanthu waciwembo na wakunama.” (Sal. 5:6) Yahova ambawenga kwene-kwene makhalidwe yamweya, ndipopa adapfudza wanthu wakuipa mu ntsiku za Nowa thangwe rakuti dziko la pantsi likhadadzala na wanthu wakuipa. (Ciy. 6:13) Mu nthawe ya mpolofeta Malakiya wanthu akhacitambo bzinthu bzakuipa. Amuna akhasiya akazawo acikacita malume ya pa mphasa na akazi winango kuti akhale na mathangwe yakulambira akazawowo. Yahova akhaipidwa na bzimwebzi ndipo adalamba kunamata kwawo thangwe rakuti akhacita bzinthu bzakuipa. (Malak. 2:13-16; Aheb. 13:4) Yahova ambafuna kuti ‘timbawenge comwe n’cakuipa.’ (Aro. 12:9) Fala lakuti ‘kuwenga’ limbathandauza kuipidwa na cinthu; bzomwe bzin’funa kulewa kuti tin’funika kunyantsidwa kwene-kwene na cinthuco. Tin’funika kunyantsidwa na kundokumbukira kuti bzomwe tin’funa kucitabzo Yahova ambabziwenga. w22.03 4-5 ¶11-12

Tsapanopapa, Baba wathu wa kudzulu an’dzatisimba mwakuphatisa basa Umambo bwace. Wale omwe akupitiriza kudikhirira Yahova an’tambira bzisimbo bzizinji tsapano na mu dziko lipsa. Wanthu wa Mulungu akadzapita mu dziko lipsa, iwo an’dzapirira lini pomwe mabvuto yomwe akugumana nayo ntsiku zino. Pa nthawe imweyo kun’dzakhala kulibe kusaya cirungamo ne kubva kuwawa. (Apok. 21:4) Ifepano tin’dzakhala tiribe thupo la kudikhirira bzinthu bzomwe tikufuna thangwe m’dzikomo mun’dzakhala na bzinthu bzizinji. (Sal. 72:16; Zai. 54:13) Bzimwebzi bzin’dzakhala bzakudekeza kwene-kwene! Pomwe nthaweyo ikanati kufika, Yahova akutikonzekeresa kuti tidzakhale mu utongi bwace mwa kutithandiza kuleka kukhala na makumbukidwe yakuipa ticikulisa makhalidwe yabwino yomwe iye ambakomedwa nayo. Lekani kuthetha ndipo lekanimbo kusiya kutumikira Yahova. Bzinthu bzabwino bzikubwera kutsogoloku! Pakuti tikudikhirira tsogolo labwino, mbatipitirizeni kupirira mwakukomedwa pomwe tikudikhirira kuti Yahova adzacite bzinthu bzomwe adatilumbira! w21.08 13 ¶17-19

Pomwe padapita nthawe pang’ono kucokera pomwe adatambira tsamba la mpostolo Paulo, Akristau wa ku Djudeya akhafunika kusiya nyumba zawo, malonda yawo na adzinza wawo omwe akhali lini Akristau acithawira “ku mapiri.” (Mat. 24:16) Bzikuwonekeratu padeca kuti pa nthawe imweyi bzikhali bzakufunika kwene-kwene kumbathandizana. Penu iwo adaphatisa basa mafala ya mpostolo Pauloya, yakuti ambagawane bzinthu bzomwe anabzo, bzidakhala bzakusaya kunesa kuzolowera moyo upsa omwe adakhala nawo. Ni nthawe lini zentse pomwe abale na mpfumakazi zathu angatiuze bzomwe akufuna pa moyo wawo. Ndipopa khalani wakufikirika. Imwepo mumbadziwa kuti mu gwere mwanu muna abale na mpfumakazi omwe nthawe zentse ambafuna kuthandiza anzawo. Iwo ambakumbuka lini kuti tikuwapasa basa. Ifepano timbadziwa kuti iwo nthawe zentse ambafuna kutithandiza ndipo tingadafuna kukhalambo ninga iwo! w22.02 23-24 ¶13-15

Madera na magwere yalinganizidwa mwakusiyana magole yapitaya. Bzingakhale bzakunesa kusiya adzinza na axamwali wathu tikakumbiridwa kuti tikatsonkhane gwere linango. Kodi akulu ambacita kutsogoleredwa na Mulungu pakusankhula gwere lomwe mpalizi angakatsonkhane? Ne. Thangwe ra bzimwebzi bzingatinese kubvera bzomwe akuluwo atiuza. Tsono Yahova ambakhulupira akulu na bzinthu bzomwe asankhula kucita ndipo ifepano tin’funikambo kucita bzibodzi-bodzibzi. Thangwe ranyi tin’funika kubverana na makonzedwe ya akulu napo kuti tiribe kukomedwa na bzomwe iwo asankhula kucita? Thangwe rakuti tikacita bzimwebzi tin’dzathandizira kuti wanthu wa Mulungu apitirize kukhala wakuphatana. Bzinthu bzimbafamba bwino m’gwere wentse akambabvera bzomwe bungwe la akulu lingasankhule kucita. (Aheb. 13:17) Ndipo kuposa bzentse tikambabvera wale omwe Yahova adawaikha kuti atithandize, timbalatiza kuti timbamuthemba. — Mab. 20:28. w22.02 4-5 ¶9-10

Penu imwepo ndimwe m’bale wakubatizidwa, mungacite nyongo yakukulisa luso lanu lakulewalewa na kupfunzisa. Thangwe ranyi? Thangwe rakuti mukacita ‘nyongo’ yakukhala muwerengi wabwino, wakudziwa kulewalewa, na mpfunzisi wabwino mun’dzacita bzizinji kuti muthandize wale omwe akukutetekerani. (1 Tim. 4:15) Yezerani kukhala na cakulinga cakupfunza na kuphatisa basa nfundo zentse zomwe ziri mu broxura lakuti Kulisani Luso Lanu la Kuwerenga na Kupfunzisa. Pfunzani pfunziro libodzi na libodzi palokha, yezerani kuliphatisa basa kumui, ndipo liphatiseni pomwe basa pomwe mukufotokoza nkhani yanu. Kumbirani mthandizi wakupereka malango ayai akulu winango ‘omwe ambaphata basa na nyongo ya kulewalewa na kupfunzisa’ kuti akuthandizeni na malango. (1 Tim. 5:17) Lekani kundophatisa basa pfunziro lomwe liri m’broxuralo, koma thandizanimbo abveseri wanu kulimbisa cikhulupiro cawo ayai athandizeni kuphatisa basa bzomwe iwo akupfunzabzo. Mukacita bzimwebzi, imwepo pabodzi na iwo mun’dzathimizira kukondwa kwanu. w21.08 24 ¶17

Ifepano tikambawona anzathu kukhala wakutiposa, tin’dzacita lini mapici na wale omwe ana luso kuposa ifepano. M’mbuto mwace, tin’dzakomedwa na maluso yawoyo. Bzimwebzi mpsakufunika maka-maka bzikakhala kuti iwo akuphatisa basa maluso yawoyo pa kutumikira Yahova kuti amutumbizise. Tikacita bzimwebzi, gwere lin’dzakhala la mtendere na lakuphatana. Tingatcenkhe kucitira njiru m’bale ayai mpfumakazi tikazindikira kuti pana bzinthu bzomwe tingakwanise lini kucita. Ndipo tikakhala wakubzicepesa tin’dzayezera lini kubziwonesa kuti tina luso ayai kuti timbadziwa bzinthu bzizinji kuposa munthu ali-wentse. Koma tin’dzayezera kupfunza na wale omwe ambadziwa bzinthu bzizinji kuposa ifepano. Mwa ciratizo, tiyezezere kuti m’gwere muna m’bale omwe ambafotokoza bwino nkhani za wentse. Tingamubvunze kuti tidziwe kuti ambakonzekera tani nkhani zace. Penu mpfumakazi imbadziwa kuphika bwino, ifepano tingaikumbire kuti itiuze bzomwe bzingatithandize kuti tidziwembo kuphika bwino. w21.07 16 ¶8-9

M’bukhu la Mirewengo timbawerenga kuti Yahova adatonga kuti Mjirayeri munango aphedwe thangwe ra kutcola nkhuni pa ntsiku ya Sabudu. Koma m’bukhu la Samuweri waciwiri timbawerenga kuti pomwe padapita magole mazinji Yahova adalekerera Mambo Davide napo kuti adacita upombo na kupha munthu. (Mirew. 15:32, 35; 2 Sam. 12:9, 13) Pinango tingabzibvunze kuti: ‘Thangwe ranyi Yahova adalekerera Davide omwe adapha munthu na kucita upombo koma adatonga kuti munthu omwe adacita pikado yomwe imbawoneka ninga kuti njing’ono aphedwe?’ Tin’funika kukumbukira kuti nthawe zinango Bibliya limbalewa lini bzentse pa nkhani yomwe tikuwerenga. Mwa ciratizo, ifepano timbadziwa kuti Davide adakunguladi na mtima wentse pa bzomwe adacita. (Sal. 51:2-4) Tsono tani pakulewa bza munthu omwe alibe kubvera lamulo lakulewa bza ntsiku ya Sabudu? Kodi iye adazindikira kuti bzomwe adacitabzo bzikhali bzakuphonyeka? Kodi iye akhalibe kale kubvera lamulo linango m’mbuyomo? Kodi iye alibe kucita bzimwebzo napo kuti akhadacenjezedwa kale? Bibliya limbalewa lini. Koma, timbadziwa kuti Mulungu wathu “ngwakulungama mu njira zace zentse.” — Sal. 145:17. w22.02 2-3 ¶3-4

Munthu wakuzindikira malire ambakhumba lini kucita bzinthu bzomwe angakwanise lini kubzicita. Bzimwebzi bzimbamuthandiza kupitiriza kukhala wakukondwa na kuphata basa na nyongo. Ifepano tingandendemezere munthu wakuzindikira malire na xaferi omwe akufambisa karo, tsono karoyo yafika pa phiri. Xaferiyo an’funika kubweza magiya kuti akwanise kukwira phirilo. N’cadidi kuti iye an’dzafamba pang’ono-pang’ono, tsono karoyo in’dzapitiriza kuyenda komwe ikuyendako. Mpsibodzi-bodzimbo, munthu wakuzindikira malire, ambadziwa nthawe ya “kubweza magiya” kuti apitirize kutumikira Yahova na kuthandiza winango. (Afil. 4:5) Onani ciratizo ca Barzilai, omwe akhana magole 80 pomwe adakumbiridwa na Mambo Davide kuti ayende kukakhala naye pabodzi ku nyumba ya mambo. Barzilai adalamba mkumbiro wa mamboyo thangwe ra kuzindikira malire. Iye adazindikira bzinthu bzomwe angadakwanisa lini kucita, tenepo, iye adauza mambo kuti atenge Kimamu m’mbuto mwa iye. (2 Sam. 19:35-37) Ninga Barzilai, acikulire ambakomedwa kupereka mpata wa utumiki kwa maswaka. w21.09 10 ¶6-7

Kodi imwepo bzimbakunesani kuwona Yahova ninga Baba wanu wa lufoyi? Winango wa ifepano bzimbatinesa. Penu baba wathu caiye akhatifuna lini pinango bzingatinese kukumbukira kuti pana Baba omwe ambatifuna. Bzimbatitsangalaza kudziwa kuti Yahova ambabvesesa momwe tikubvera. Iye akufuna kutifenderera. Ndipopa Fala lace limbatiuza kuti: “Fendererani Mulungu ndipo iye an’dzakufendereranimbo.” (Tiy. 4:8) Yahova ambatifuna ndipo akufuna kukhala Baba wathu wabwino kwene-kwene kuposa baba ali-wentse. Jezu angatithandize kuti timufenderere Yahova. Jezu ambamudziwa bwino Yahova ndipo ambatewezera bwino-bwino makhalidwe yace. Ndipopa Jezuyo adalewa kuti: “Ule omwe wawona inepano wawonambo Baba.” (Ju. 14:9) Pakuti Jezu ali ninga m’bale wathu mkulu, iye ambatipfunzisa momwe tingalemekezere na kubvera Baba wathu, kutcenkha bzinthu bzomwe bzimbamudekera lini na bzomwe tingacite kuti iye atibvume. Iye adalatiza kuti Yahova ngwakudeka mtima na walufoyi, maka-maka pomwe akhali pa dziko la pantsi pano. w21.09 21 ¶4-5

Atumiki wa Yahova adaphatana pakunamata Mulungu m’bodzi yekha wacadidi. Yahova adapasa akulu udindo bwakunesa bwakucitisa kuti gwere lipitirize kukhala lakucena. Mkristau akacita pikado ikulu, Yahova adapasa akulu udindo bwakuti awone penu munthuyo angathemere kupitiriza kukhala m’gwere ayai ne. Ndipo iwo an’funika kuzindikira penu munthuyo wakunguladi. Iye angalewe kuti wakungula, tsono iye akuipidwadi na bzomwe wacitabzo? Kodi iye an’dzabwerezera lini pomwe pikadoyo? Penu iye adacita pikadoyo thangwe ra kubverana na wanthu wakuipa, kodi iye adakonzeka kumalisa uxamwali na wanthuwo? Akulu ambapemba kwa Yahova, ambawona nkhani yentse na bzomwe Bibliya limbalewa pa nkhaniyo ndipo ambawonambo momwe nyakuphonyayo akubvera thangwe ra bzomwe wacitabzo. Patsogolo pace, ambawona penu nyakuphonyayo angapitirize kukhala m’gwere. Tsono nthawe zinango bzimbakhala bwino kucosa munthu mu gwere. — 1 Ako. 5:11-13. w22.02 5 ¶11-12

Tentsenefe tin’funa kukhala na unthu bomwe Yahova ambakomedwa nabo, bziribe basa penu tabatizidwa tsapanopa ayai tikutumikira Yahova kuyambira kale-kale. Kuti Yahova ambakomedwe nafe, tin’funika kumbakhotcerera nzeru zathu. Thangwe ranyi? Thangwe nzeru zathu ndizo zimbatsogolera makhalidwe yathu. Ndipo tikambakumbuka bzinthu bzakuipa, ifepano tin’dzalewa na kucita bzinthu bzakuipabzo. (Aef. 4:17-19) Tsono tikambakumbuka bzinthu bzabwino, tin’dzalewa na kucita bzinthu bzomwe Yahova omwe ni Baba wathu wa kudzulu an’dzakomedwa nabzo. (Agal. 5:16) Tsono mpsakukwanisika lini kulekeratu kumbakumbuka bzinthu bzakuipa. Koma ifepano tina mphanvu ya kuleka kucita bzinthu bzakuipabzo. Pomwe tikanati kubatizidwa, ifepano tin’funika kusiyiratu kucita na kulewa bzinthu bzomwe Yahova ambakomedwa lini nabzo. Cimweci ndico cinthu cakuyamba na cakufunika kwene-kwene pa kukhundula unthu bwakale. Tsono kuti tipitirize kukondwesa Yahova, tin’funika kubverambo mtemo wakuti tibvale unthu bupsa. w22.03 8 ¶1-2

Bziribe kupusa kuna akulu wa gwere kudziwa penu munthu omwe wacita pikado ikulu wakunguladi na mtima wentse ayai ne. Thangwe ranyi? Thangwe rakuti akulu ambadziwa lini bza mu mtima mwa munthu. Tenepo, iwo ambayezera kugumana umboni bwakulatiza kuti m’bale omwe wacita pikadoyo wacinja ndipo akunyantsidwa na bzomwe wacitabzo. Iwo an’dzafunika kuwona umboni bwakuti munthu omwe wacita pikadoyo wacinjadi makumbukidwe yace, momwe ambabvera na makhalidwe yace kubodzi. Pangatenge nthawe kuti munthuyo acinje na kulatiza kuti wakunguladi na mtima wentse. Kuti munthu wakucosedwa alatize kuti wakungula na mtima wentse, iye an’funika kumbabwera ku mitsonkhano nthawe zentse na kubvera malango ya akulu wa gwere yakuti akhale na ndondomeko yabwino ya kupemba na kupfunza Bibliya ntsiku zentse. Iye an’funikambo kucita nyongo yakutcenkha bzinthu bzomwe bzingamucitise kubwerera pomwe pa pikado yomwe adacitayo. Iye akacita ciri-centse comwe angakwanise kuti akhale pomwe pa uxamwali na Yahova, Yahova an’dzamulekerera ndipo akulu wa gwere an’dzamuthandiza kucita pomwe mbali ya gwere. w21.10 6 ¶16-18

Thangwe ra lufoyi lace kuna Mulungu, Jezu adanamata Yahova yekha pomwe akhali kudzulu napo pomwe akhali pa dziko la pantsi. (Luka 4:8) Iye adapfunzisa anyakupfunza wace kuti ambacitembo bzibodzi-bodzibzi. Jezu na anyakupfunza wace akhaphatisa lini basa bzifanikiso pakunamata. Pakuti Mulungu ambawoneka lini, palibe munthu omwe angakonze cinthu ciri-centse comwe cingaimire ulemerero bwa Yahova! (Zai. 46:5) Apo tani pakulewa bza kukonza bzifanikiso bzomwe bzimbacemeredwa kuti wakucena na kumbabzipemba? Mu lamulo laciwiri pa Malamulo Khumi, Yahova adalewa mafala ya m’vesi la leroya. Wanthu omwe ambafuna kucita bzinthu bzomwe Mulungu ambakomedwa nabzo ambabvesesa kuti iye akufuna lini kuti timbanamate bzifanikiso. Afotokozi wa nkhani zakale-kale adazindikira kuti Akristau wakuyambirira akhanamata Mulungu yekha basi. Ntsiku zino, Mboni za Yahova zimbatewezera bzomwe Akristau wakuyambirirawo akhacita. w21.10 19-20 ¶5-6

Jezu adacenjeza Akristau omwe akhakhala ku Djudeya kuti ingadafika nthawe yomwe mzinda wa Jeruzalemu ‘ungadadzazunguliridwa na acikunda.’ (Luka 21:20-24) Pomwe angadawona bzimwebzi bzikucitika, iwo akhafunika ‘kudzathawira ku mapiri.’ Kuthawako kungadawathandiza kuti apulumuke, tsono kungadawacitisa kuluza bzinthu bzinango. Ntsanza ya Mulindiri inango idafotokoza bza nkhaniyi kuti: “Iwo adasiya minda na nyumba, ndipo alibe kukwanisa kukonkhobza bzinthu bzawo m’nyumba zawo. Thangwe ra kukhulupira kuti Yahova aniwathandiza, iwo adaikha kunamata patsogolo pa cinthu ciri-centse comwe cikhawoneka ninga kuti n’cakufunika.” Iyo idalewa pomwe kuti: “Kutsogoloku tingadzayezedwe kusiya bzinthu bzomwe tinabzo; kodi bzinthubzo bzin’dzakhala bzakufunika kwene-kwene kuposa kupulumusidwa na Yahova? Kuthawa kwathu kungadzatibwereserembo mabvuto na kusaya bzinthu bzinango bzakufunikira. Tin’dzafunika kukhala wakukonzeka kucita ciri-centse cakufunikira.” w22.01 4 ¶7-8

Pomwe Ajirayeri adandoti fulukeni ku Edjipito, Yahova adauza Mozeji pakulewa bza dzina lace na makhalidwe yace. Iye adati: ‘Yahova, Yahova, Mulungu wantsisi ndipo ambafulumiza lini kukalipa; iye ngwakudzala na lufoyi lacadidi pabodzi na cadidi, ambalatiza lufoyi lacadidi kwa mibadwo bzulu-na-bzulu, acilekerera bzakuphonya na pikado.’ (Kuf. 34:6, 7) Mwakuphatisa basa mafala yabwinoya, Yahova adauza Mozeji cinthu cabwino kwene-kwene pakulewa bza lufoyi lace lacadidi. Kodi cinthu cimweco n’ciponi? Yahova alibe kundolewa kuti iye ana lufoyi lacadidi, koma adalewa kuti: ‘N’gwakudzala na lufoyi lacadidi.’ Mafala yamweya yambagumanika pomwe m’mbuto zitanthatu m’Bibliya. (Mirew. 14:18; Neh. 9:17; Sal. 86:15; 103:8; Djow. 2:13; Djona 4:2) Ndipo m’mbuto zomwe mafala yamweya yambagumanika, yambakhala yakulewa bza Yahova sikuti wanthu. Mpsakudabwisa kuti Yahova akubzidziwikisa mwa njira imweyi m’Bibliya kuti iye ana lufoyi lacadidi. Tenepo, timbakwanisa kuwona kuti lufoyi lacadidi ndakufunika kwa iye. w21.11 2-3 ¶3-4

Mabanja yangapfunze na ciratizo ca mpostolo Pedru na mkazace. Pomwe padapita minyezi 6 kucokera pomwe Pedru adawonana na Jezu kakuyamba, iye akhafunika kusankhula bzakucita. Pedru akhaphata basa lakupha ntsomba kuti adyese banja lace. Pomwe Jezu adacemera Pedru kuti akhale mteweri wace, cakuyamba iye akhafunika kukumbukira mkazace. (Luka 5:1-11) Pedru adasankhula kutewera Jezu kuti aphate basa lakupalizira. Ndipo bzikuwoneka kuti mkazi wace adamuthandiza pa bzomwe adasankhulabzo. Bibliya limbalatiza kuti pambuyo pa Jezu kulamusidwa, mkazi wa Pedru adaperekeza bayace pa ulendo bunango bomwe Pedru adacita. (1 Ako. 9:5) Kulewa cadidi, ciratizo ca mkazi wa Pedru, pakukhala mkazi wacikristau, cidapasa mphanvu Pedru kuti apereke malango kuna amuna na akazi wacikristau. (1 Ped. 3:1-7) Bzikuwoneka kuti Pedru na mkazace adakhulupira bzomwe Yahova adalewa bzakuti iye an’dzawapasa bzomwe iwo akufunikira pa moyo wawo akaikha Umambo pa mbuto yakuyamba. — Mat. 6:31-34. w21.11 18 ¶14

Mpostolo Paulo akhafuna abale na mpfumakazi ndipo iye akhaphata basa na nyongo kuti awathandize. (Mab. 20:31) Ndipopa abale na mpfumakazi akhamufuna kwene-kwene. Pa nthawe inango akulu wa gwere la ku Efezo “[adalira] kwene-kwene” pomwe adadziwa kuti angadadzamuwona lini pomwe. (Mab. 20:37) Ntsiku zino, akulu wa gwere ambafunambo kwene-kwene abale na mpfumakazi ndipo ambacita nyongo ya kuwathandiza. (Afil. 2:16, 17) Tsono nthawe zinango bzimbakhala bzakunesa kwa akulu kucita bzentse bzomwe an’funikira kucita. Kodi n’ciyani comwe cingawathandize? Akulu angapfunze bzizinji na bzomwe Paulo adacita. Iye akhalibe mphanvu ninga za anjo ndipo akhali munthu wakuperewerambo omwe akhafunika kucita nyongo kuti akwanise kucita bzabwino. (Aro. 7:18-20) Iye akhagumanambo na mabvuto yakusiyana-siyana. Napo bzikhali tenepo, Paulo alibe kubwerera m’mbuyo ndipo adapitiriza kukhala wakukondwa. Akulu akambatewezera mpostolo Paulo, an’dzakwanisa kukunda mabvuto yakusiyana-siyana yomwe ambagumana nayo, acipitiriza kukhala wakukondwa pomwe akutumikira Yahova. w22.03 26 ¶1-2

Mwambo 19:3 ambatipfunzisa cinthu cakufunika pa nkhani ya kukhala wakucena. Cinemboci cimbalewa bza kukoya ntsiku ya Sabudu. Akristau ali lini pantsi pa Lamulo, tenepo timbakoya lini ntsiku ya Sabudu mdzinga uli-wentse. Napo bziri tenepo, tingapfunze kwene-kwene na Ajirayeri bza kukoya ntsiku ya Sabudu na phindu lomwe akhagumana thangwe ra kucita bzimwebzo. Sabudu ikhali ntsiku yakupuma pa basa liri-lentse lomwe akhacita kuti akhale na nthawe yakucita bzinthu bzauzimu. Ndipopa, pa ntsiku imweyi Jezu akhayenda ku sinagoga ya ku mzinda wace kuti akawerenge Fala la Mulungu. (Kuf. 31:12-15; Luka 4:16-18) Malango yakunembedwa pa Mwambo 19:3 yakuti: “Mun’funika kumbakumbukira ntsiku za Sabudu” yan’funika kuticitisa kunyang’ana nthawe napo kuti tikucita mabasa yathu ya ntsiku na ntsiku kuti ticite bzinthu bzauzimu. Kodi mukuwona kuti mun’funika kucinja bzinthu pa nkhani imweyi? Mukambapambula nthawe ntsiku zentse kuti mucite bzinthu bzauzimu, mun’dzakulisa uxamwali bwanu na Yahova, bzomwe mpsakufunika kuti mukhale wakucena. w21.12 5 ¶13

Pomwe Jezu akhali pa dziko la pantsi, iye akhacita tsantsa na munthu ali-wentse. Iye akhambadya na anyakudala pabodzi na omwe akhana ugo, tsono akhambamalambo nthawe akuceza na wanthu wakusauka pabodzi na omwe akhawoneka ninga kuti akhalibe na basalo. Kuthimizira bzimwebzi, Jezu akhabverambo ntsisi wale omwe akhalewedwa kuti ni ‘anyapikado.’ Wanthu winango wakubzikuza, adalamba Jezu thangwe ra bzomwe iye akhacita. Iwo adabvunza anyakupfunza wa Jezu kuti: ‘Thangwe ranyi imwepo mumbadya na kumwa pabodzi na anyakukhomesa mtsonkho pabodzi na anyapikado?’ Jezu adawatawira mbvunzoyu na mafala ya m’vesi la leroya. (Luka 5:29-31) Kale-kale, pomwe Mesiya akhanati kubwera, mpolofeta Zaiya adalewa kuti Mesiyayo angadadzabvumidwa lini na dziko. Polofesiya idaleweratu kuti: ‘Iye adanyozedwa ndipo wanthu alibe kumufenderera . . . Iye akhali ninga munthu omwe akatiwona akhatibisira nkhope yace. Iye adanyozedwa ndipo tikhalibe naye basa.’ (Zai. 53:3) Polofesiyayi idalewa kuti Mesiya angadadzafendereredwa lini ‘na wanthu.’ Ndipopa Adjuda akhafunika kudikhirira kuti Jezu angadadzalambidwa. w21.05 8-9 ¶3-4

Akristau winango wakuyambirira akhacedwa kuphatisa basa malango yomwe akhapasidwa. (Tiy. 1:22) Winango akhalatiza kuti akhafuna kwene-kwene anyakudala kuposa anyakusauka. (Tiy. 2:1-3) Ndipo winango akhana makiriyado. (Tiy. 3:8-10) Akristau wale akhana mabvuto mazinji. Tsono Tiyago akhadziwa kuti iwo angadacinja. Tenepo, iye adapereka malango yamphanvu koma mwakudeka mtima. Ndipo adalimbikisa wale omwe akhakwanisa lini kumalisa okha bvutolo kuti akakumbire thandizo akulu. (Tiy. 5:13, 14) Bzomwe tikupfunza: Lekani kumbatsemphera pakupereka malango, tsono mbawonani winango mu njira yakuthemera. Wanthu azinji omwe timbawapfunzisa Bibliya anganeseke kuphatisa basa bzomwe akupfunzabzo. (Tiy. 4:1-4) Pinango pangatenge nthawe kuti iwo acinje makhalidwe yawo yakuipa acikhala na makhalidwe yacikristau. Ifepano tin’funika kukhala wakukhwimika kuuza anyakupfunza wathu bzomwe an’funika kucinja. Koma tin’funikambo kuwona bzinthu mu njira yakuthemera ticikhulupirambo kuti Yahova an’dzakwewera kwa iye wanthu wakubzicepesa aciwapasa mphanvu kuti acinje. — Tiy. 4:10. w22.01 11 ¶11-12

Akristau wentse ambacita nyongo yakutewezera ntsisi za Yahova. Thangwe ranyi? Thangwe libodzi ndakuti Yahova an’dzatetekera lini mipembo ya wanthu omwe ambabvera lini ntsisi anzawo. Palibe ne na m’bodzi wa ifepano omwe ambafuna kuti Yahova aleke kubva mipembo yace. Tenepo, timbacita ciri-centse comwe tingakwanise kuti tileke kukhala wanthu wakuuma mtima. M’mbuto mwakufunga makutu yathu kuti tisaye kubva madandaulo ya Mkristau mwanzathu, tin’funika nthawe zentse kukhala wakukonzeka kutetekera kudandaula kwa munthu ‘wakutsautsika mu mtima.’ Tin’funika kumbakumbukira mafala yakuti: “Munthu omwe ambacita bzinthu mwakusaya ntsisi, an’dzatongedwa mwakusaya kubveredwambo ntsisi.” (Tiy. 2:13) Tikakumbukira kuti tin’funika kubveredwa ntsisi na wanthu winango, tin’dzakhala wakukonzeka kubverambo ntsisi anzathu. Maka-maka tin’funika kubvera ntsisi nyapikado omwe akungula acibwerera m’gwere. Bziratizo bza m’Bibliya bzingatithandize kumbabvera ntsisi wanthu winango na kuleka kumbacita nawo bzinthu mwakuuma mtima. w21.10 12 ¶16-17

Kuphampha kwa utumiki bwace, usiku bwakumalizira bwa moyo wace pa dziko la pantsi, Jezu adanyang’ana basi mbuto yakuderekha kuti apembe na kukumbukira. Iye adagumana mbuto imweyo mu zunde la Getsemani. Pa nthawe imweyo, Jezu adauza anyakupfunza wace cinthu cakufunika kwene-kwene pakulewa bza mpembo. Mbatiwoneni bzomwe bzidacitika. Pomwe iye adafika mu zunde la Getsemani, kukhadadoka kwene-kwene, pinango ikhali kati ya usiku. Jezu adauza anyakupfunza wace kuti: “Pitirizani kukhala mudapenya.” Ndipo iye adacoka aciyenda kukapemba. (Mat. 26:37-39) Tsono pomwe iye akhapemba, anyakupfunza wacewo adayamba kugona. Pomwe adadzawagumana akugona, Jezu adawauza pomwe kuti: “Pitirizani kukhala mudapenya ndipo mbapembani nthawe zentse.” (Mat. 26:40, 41) Jezu adazindikira kuti anyakupfunzawo akhadasunama ndipo akhadaneta ndipopa mwakudeka mtima, iye adalewa kuti: “Thupi ndakutepa.” Jezu adayenda pomwe kukapemba kawiri, ndipo pomwe akhabwerera akhagumana anyakupfunza wace akugona basi m’mbuto mwa kupemba. — Mat. 26:42-45. w22.01 28 ¶10-11