Lufoyi la Mulungu Lin’dzakhala Mpaka Kale-kale

1-2. Kodi mungabzibve tani mukakhala mukugumana na mabvuto?

KUMBUKIRANI bza barko lomwe liri nyanza pa nthawe yomwe kukucitika conzi camphanvu kwene-kwene. Mabimbi ya m’nyanzamo yakugwinya barkolo ndipo yakucitisa kuti litekenyeke. Munthu akasaya kuikha ndangula m’barkomo iro linganyamulidwe na mabimbiyo. Ndangulayo in’dzacitisa kuti barkolo lileke kutekenyeka ndipo in’dzacitisambo kuti lileke kuyenda na conzico.

² Mukakhala mukugumana na mabvuto mungakhale ninga barko limweri. Makumbukidwe yanu yangacinje mwakamfulumize. Ntsiku inango imwepo mungatsimikizire kuti Yahova ambakufunani na kukusamalirani; tsono ntsiku inango bzingakuneseni kukhulupira penu iye akuwona bzomwe bzikukucitikirani. (Salimo 10:1; 13:1) Patsogolo pace, pinango xamwali wanu angakuuzeni mafala yomwe yangakutsangalazeni ndipo imwepo mucibzibva bwino. (Mimwani 17:17; 25:11) Tsono patsogolo pace, imwepo mwayamba pomwe kupenukira penu Yahova ambakuthandizani. Pinango imwepo mungafike pakukumbuka kuti Yahova wakusiyani. N’ciyani comwe cingakhale ninga ndangula yanu cicikuthandizani kukhala wakulimba pomwe mukugumana na mabvuto? M’mafala manango, kodi imwepo mungapitirize tani kutsimikizira kuti Yahova ambakufunani na kukuthandizani?

3. (a) Kodi “lufoyi lacadidi” limbathandauza ciyani? (Salimo 31:7; 136:1) (b) Thangwe ranyi tingalewe kuti Yahova ni ciratizo cikulu ca lufoyi lacadidi? (Onanimbo cithunzi-thunzi.)

³ Cinthu cibodzi comwe cingakhale ninga ndangula yanu pa nthawe yomwe mukugumana na mabvuto ndico kukumbukira bza lufoyi lacadidi la Yahova. (Werengani Salimo 31:7; 136:1.) Fala lakuti “lufoyi lacadidi” limbathandauza lufoyi na kukhulupirika komwe kumbakhala kulipo pakati pa wanthu awiri. Yahova ni ciratizo cikulu ca lufoyi lacadidi. Ndipopa Bibliya limbalewa kuti iye ‘ngwa lufoyi likulu.’ (Ekisodo 34:6, 7) Ndipo Bibliya limbalewambo bza Yahova kuti: “Mudadzala na lufoyi lacadidi kwa wentsene omwe akukucemerani.” (Salimo 86:5) Kumbukirani bzomwe mavesi yamweya yakulewa! Iyo yakulewa kuti Yahova ambasiya lini atumiki wace wakukhulupirika. Kukumbukira kuti Yahova ngwakukhulupirika kungakhale ninga ndangula yomwe ingakuthandizeni kukhala wakulimba pomwe mukugumana na mabvuto pa moyo wanu. — Salimo 23:4.

KUMBUKIRANI KUTI LUFOYI LA YAHOVA LIMBACITA MBALI YA MAPFUNZISO YAKUYAMBIRIRA YA M’BIBLIYA

4. Fotokozani mapfunziso yanango yakuyambirira ya m’Bibliya, ndipo fotokozanimbo kuti thangwe ranyi timbayakhulupira.

⁴ Njira ibodzi yomwe ingakutsimikizireni bza lufoyi la Yahova, ndiyo kukumbukira kuti lufoyi limweri limbacita mbali ya mapfunziso yakuyambirira ya m’Bibliya. Kwa imwepo, kodi mafala yakuti “mapfunziso yakuyambirira ya m’Bibliya” yambathandauza ciyani? Pinango imwepo mungakumbukire bza mapfunziso yakuyambirira yomwe mudapfunza m’Fala la Mulungu. Imwepo mudapfunza kuti dzina la Mulungu ni Yahova, kuti Jezu ni Mwana wakubadwa yekha wa Mulungu, kuti anyakufa ambadziwa lini ciri-centse na kuti pa dziko pano pan’dzakhala paraizo omwe wanthu an’dzakhala mpaka kale-kale. (Salimo 83:18; Mpalizi 9:5; Juwau 3:16; Apokalipse 21:3, 4) Pambuyo pa kukhulupira mapfunziso yamweya bzingakhale bzakunesa kuti imwepo musiye kuyakhulupira. Thangwe ranyi? Thangwe imwepo mudabvesesa kuti mapfunziso yamweya njacadidi. Kukumbukira kuti lufoyi la Yahova limbacita mbali ya mapfunziso yakuyambirira ya m’Bibliya kungatithandize kutcenkha kukumbuka kuti iye ambawona lini bzomwe tikugumana nabzo ayai kuti ambacita lini nafe thupo.

5. Fotokozani momwe bzipfunziso bzakunama bzingalambidwire.

⁵ Pomwe mukhapfunza Bibliya, n’ciyani comwe cidakuthandizani kulamba bzipfunziso bzakunama? Bzikuwonekeratu padeca kuti imwepo mudacita bzimwebzi mwakundendemezera bzomwe mudapfunza ku gereja kwanu na bzomwe Bibliya limbapfunzisa. Mbatiwoneni ciratizo: Tiyezezere kuti imwepo mukhakhulupira kuti Jezu ni Mulungu wa mphanvu-zentse. Tsono pomwe mukhapfunza Bibliya, imwepo mudayamba kubzibvunza kuti: ‘Kodi bzimwebzi mpsacadidi?’ Pomwe mudawona bzomwe Bibliya limbalewa, imwepo mudazindikira kuti ni cadidi lini. Patsogolo pace, imwepo mudasiya kukhulupira bzipfunziso bzakunamabzo muciyamba kukhulupira bzomwe Bibliya limbalewa, bzakuti: Jezu ni “wakuyamba kubadwa m’cirengedwe centse,” ndipo ni “Mwana m’bodzi yekha wa Mulungu.” (Akolose 1:15; Juwau 3:18) N’cadidi kuti bzipfunziso bzakunama bzingakhale ninga “bzinthu bzakuzika kwene-kwene” bzomwe bzingakhale bzakunesa kubzizula. (2 Akolinto 10:4, 5) Tsono pomwe imwepo mudapfunza cadidi, mulibe kubzikhulupira pomwe bzipfunziso bzakunamabzo. — Afilipi 3:13.

6. Thangwe ranyi imwepo mungatsimikizire kuti “lufoyi lacadidi la Yahova lin’dzakhala mpaka kale-kale”?

⁶ Imwepo mungacitembo bzibodzi-bodzibzo pa bzomwe Bibliya limbapfunzisa pakulewa bza lufoyi la Yahova. Imwepo mukayamba kupenukira penu Yahova ambakufunani pomwe mukugumana na mabvuto, bzibvunzeni kuti: ‘Kodi bzomwe ndikukumbukabzi mpsakubveseseka?’ Ndendemezerani bzomwe mukukumbukabzo na mafala ya pa Salimo 136:1 yomwe ni vesi lomwe likutsogolera nkhani ino. Thangwe ranyi Yahova akulewa kuti lufoyi lace “ndacadidi”? Thangwe ranyi mafala yakuti “lufoyi lace lacadidi lin’dzakhala mpaka kale-kale” yambagumanika maulendo 26 mu salimo limweri? Ninga momwe tawonera, lufoyi lacadidi lomwe Yahova analo kwa wanthu wace limbacita mbali ya mapfunziso yakuyambirira ya m’Bibliya. Ninga mapfunziso yakuyambirira yanango ya m’Bibliya yomwe bziribe kukunesani kuyakhulupira, makumbukidwe yakuti Yahova ambakufunani lini ayai ambakuwonani lini kuti ndimwe wakufunika njakunama. Ndipo ninga momwe mungalambire bzipfunziso bzinango bzakunama lambanimbo makumbukidwe yamweya!

7. Fotokozani mavesi ya m’Bibliya yomwe yambalatiza kuti Yahova ambakufunani.

⁷ M’Bibliya muna mavesi mazinji yomwe yambatitsimikizira kuti Yahova ambatifuna. Jezu adauza ateweri wace kuti: “Imwepo ndimwe wakufunika kwene-kwene kuposa tumbalame tuzinji.” (Mateu 10:31) Ndipo Yahova caiyeyo adauzambo wanthu wace kuti: ‘Nin’dzakulimbisani, cadidi, nin’dzakuthandizani, nin’dzakuphatisisani na boko langu lamadidi la cirungamo.’ (Zaiya 41:10) Ndokumbukirani momwe mafala yamweya yakulatizira kuti Yahova ambatifuna. Jezu alibe kulewa kuti ‘pinango imwepo ndimwe wakufunika kwene-kwene kuposa tumbalame tuzinji,’ ndipo Yahova alibe kulewa kuti ‘pinango ningakuthandizeni.’ M’mbuto mwace, iwo adalewa kuti: “Imwepo ndimwe wakufunika kwene-kwene” na ‘nin’dzakuthandizani.’ Imwepo mukayamba kupenukira bza lufoyi la Yahova mukakhala mukugumana na mabvuto, mavesiya yangandokuthandizeni lini kubzibva kuti Yahova ambakufunani koma yangakuthandizenimbo kudziwa na kukhulupira bzimwebzo. Mavesiya yambalewa cadidi. Mukambapemba na kumbakumbukira bzimwebzi, mungadzalewembo mafala yomwe yali pa 1 Juwau 4:16 yakuti: “Ifepano timbadziwa lufoyi lomwe Mulungu analo kwa ife ndipo timbakhulupira lufoyi limweri.”a

8. N’ciyani comwe mungacite penu mukadapenukira bza lufoyi la Yahova?

⁸ Tsono n’ciyani comwe mungacite penu nthawe zinango mumbapitiriza kupenukira kuti Yahova ambakufunani? Ndendemezerani bzomwe imwepo mumbapenukirabzo na bzomwe mumbadziwa pakulewa bza Yahova. Ni nthawe lini zentse zomwe tingakhulupire bzomwe timbakumbuka koma nthawe zentse tingakhulupire bzomwe mpsacadidi. Ndipo bzomwe Bibliya limbapfunzisa pakulewa bza lufoyi la Yahova mpsacadidi. Penu imwepo mukukhulupira lini kuti Yahova ambakufunani bzimwebzi bzikuthandauza kuti mukukumbukira lini bza khalidwe lace lakufunika kwene-kwene lomwe ni lufoyi. — 1 Juwau 4:8.

KUMBUKIRANI BZA LUFOYI LOMWE YAHOVA ANALO KWA IMWEPO

9-10. Kodi Jezu akhafuna kulewa ciyani pa Juwau 16:26, 27 pomwe adalewa kuti: “Baba ambakufunani”? (Onanimbo cithunzi-thunzi.)

⁹ Tingapfunze bzizinji bza lufoyi la Yahova mwa kukumbukira bzomwe Jezu adauza anyakupfunza wace, iye adati: “Baba ambakufunani.” (Werengani Juwau 16:26, 27.) Jezu alibe kulewa mafala yamweya kuti akondwese anyakupfunza wace. Tikawerenga nkhani yentse yakulewa bza mafala yamweya timbakwanisa kuwona kuti Jezu akhalewa bza mpembo.

¹⁰ Jezu adauza ateweri wace kuti iwo akhafunika kupemba m’dzina lace, sikuti kwa iye. (Juwau 16:23, 24) Kudziwa bzimwebzi kukhali kwakufunika kwa iwo. Pambuyo pa Jezu kulamusidwa, pinango anyakupfunza wace akhafuna kupemba kwa iye. Thangwe iye akhali xamwali wawo. Pinango iwo angadakumbuka kuti pakuti Jezu akhawafuna kwene-kwene iye angadabva mipembo yawo ndipo angadakumbira Baba kuti awathandize. Tsono Jezu adalewa kuti iwo akhafunika lini kukumbuka tenepoyo. Thangwe ranyi? Iye adawauza kuti: “Baba ambakufunani.” Cadidi ca m’Bibliya cimweci cimbacita mbali ya mapfunziso yakuyambirira ya m’Bibliya yakulewa bza mpembo. Kumbukirani bzomwe mafala yamweya yakuthandauza kwa imwepo: Pomwe mudapfunza Bibliya imwepo mudamudziwa Jezu ndipo mudayamba kumufuna. (Juwau 14:21) Tsono ninga anyakupfunza wale, imwepo mungapembembo kwa Mulungu na citsimikizo cakuti “Baba ambakufunani.” Nthawe zentse zomwe imwepo mumbapemba kwa Yahova mumbalatiza kuti mumbakhulupira mafala yamweya. — 1 Juwau 5:14.

MBAKUMBUKIRANI BZINTHU BZOMWE BZIMBAKUCITISANI KUPENUKIRA

11. Thangwe ranyi Sathani angakomedwe tikayamba kupenukira bza lufoyi la Yahova?

¹¹ Kodi n’ciyani comwe cimbaticitisa kupenukira bza lufoyi la Yahova? Pinango tingalewe kuti omwe ambacitisa ni Sathani ndipo bzimwebzi n’cadidi. Dyabu akufuna “kutikhudyula” ndipo iye angakomedwe kwene-kwene akawona kuti tikuyamba kupenukira bza lufoyi la Yahova. (1 Pedru 5:8) Pakuti Yahova ambatifuna, iye adatipasa cakulombolera, tsono Sathani akufuna kuti tikumbuke kuti tin’themera lini bzimwebzi. (Ahebereu 2:9) Tsono mbani omwe angakomedwe tikayamba kupenukira bza lufoyi la Yahova? Ni Sathani. Ndipo kodi mbani angakomedwe ticisiya kutumikira Yahova thangwe ra msunamo? Ni Sathani. Sathani akufuna kuti timbakumbuke kuti timbafunidwa lini na Yahova tsono iye ndiye omwe ambafunidwa lini. Ndipo iye ambaphatisa basa “mapumpso” yace kuti ayezere kuticitisa kukumbuka kuti timbafunidwa lini na Yahova ndipo iye ambakomedwa lini nafe. (Aefezo 6:11) Tikazindikira bzomwe nyamadulanthaka wathuyu akuyezera kucita timbakhala wakutsimikiza “kumugaza.” — Tiyago 4:7.

12-13. Kodi pikado imbaticitisa tani kupenukira bza lufoyi la Yahova?

¹² Pana cinthu cinango comwe cingaticitise kupenukira bza lufoyi la Yahova. Kodi cinthuco n’ciponi? Ni kuperewera komwe tidakutengera kwa Adamu na Eva. (Salimo 51:5; Aroma 5:12) Pikado idacitisa kuti tikhale kutali na Mulengi wathu. Iyo idadzongambo makumbukidwe yathu, mtima wathu na thupi lathu.

¹³ Pikado imbaticitisa kuti tikhale na makumbukidwe yakuphonyeka, ninga kubzipasa mulandu, kucita thupo, kubzibva kuti tiri lini wakukhotcerereka na manyazi. Bzimwebzi bzingaticitikire maka-maka tikakhala kuti tacita pikado. Ndipo bzingaticitikirembo thangwe ra kuti nthawe zentse timbakumbukira kuti ndife wakuperewera comwe ni cinthu comwe n’cakusiyana na bzomwe Yahova akhafuna pomwe adatilenga. (Aroma 8:20, 21) Ninga momwe karo yomwe ina roda lakufota ingafambire lini bwino, thangwe ra kuperewera ifepano timbacitambo lini bzinthu mwakubverana na momwe tidalengedwera. Ndipopa mpsakudabwisa lini nthawe zinango tikambapenukira bza lufoyi la Yahova. Bzimwebzi bzikacitika tin’funika kukumbukira kuti Yahova ni ‘Mulungu mkulu na wakugopswa omwe ambakoya mpangano ndipo ambalatiza lufoyi lacadidi kwa omwe ambamufuna na kwa omwe ambateweza malamulo yace.’ — Nehemiya 1:5.

14. Kodi kukumbukira bza cakulombolera kungatithandize tani kutsimikizira kuti Yahova ambatifuna? (Aroma 5:8) (Onani kwadru yakuti, “Bzikhotcerereni ku ‘Mphanvu Yakupumpsa ya Pikado.’”)

¹⁴ Nthawe zinango tingabzibve kuti tikuthemera lini lufoyi la Yahova. Ndipo kulewa cadidi, ifepano timbathemeradi lini. Ndipopa bzimwebzi bzimbacitisa kuti lufoyi la Yahovalo likhale lakupambulika kwene-kwene kwa ifepano. Palibe comwe tingacite kuti tithemere lufoyi la Yahova. Napo bziri tenepo, thangwe ra lufoyi, Yahova adapereka cakulombolera kuti alekerere pikado zathu. (1 Juwau 4:10) Kumbukiranimbo kuti Jezu adabwera kudzapulumusa wanthu wapikado sikuti wakulungama. (Werengani Aroma 5:8.) Palibe ne m’bodzi wa ifepano omwe ambakwanisa kucita bzinthu mwakulungamiratu ndipo Yahova ambadikhirira lini kuti ticite bzimwebzo. Tikabvesesa kuti kuperewera kwathu kungacitise kuti tipenukire lufoyi la Yahova, timbacita ciri-centse kuti tileke kulekerera kuti bzimwebzi bzicitike. — Aroma 7:24, 25.

PITIRIZANI KUKHALA WAKUKHULUPIRIKA

15-16. Tikapitiriza kukhala wakukhulupirika kwa Yahova, n’ciyani comwe tingatsimikizire, ndipo thangwe ranyi? (2 Samuyeli 22:26)

¹⁵ Yahova akufuna kuti ifepano tisankhule kupitiriza “kumuphatisisa.” (Deuteronomiyo 30:19, 20) Tikacita bzimwebzo, tingakhale na citsimikizo cakuti iye an’dzapitiriza kukhala wakukhulupirika kwa ifepano. (Werengani 2 Samuyeli 22:26.) Tikapitiriza kukhala wakukhulupirika kwa Yahova, tingakhale na citsimikizo cakuti iye an’dzatithandiza kupirira mabvuto yali-yentse yomwe tingagumane nayo pa moyo wathu.

¹⁶ Ninga momwe tawonera, tina mathangwe mazinji yomwe yangaticitise kupitiriza kukhala wakulimba pomwe tikugumana na mabvuto pa moyo wathu ninga barko lomwe lina ndangula. Ifepano tikudziwa kuti Yahova ambatifuna ndipo iye an’dzatithandiza. Bzimwebzi ndibzo bzomwe Bibliya limbapfunzisa. Ntsiku inango tikadzapenukira bza lufoyi limweri tin’funika kudzakumbukira bzomwe timbadziwa pakulewa bza lufoyi la Yahova m’mbuto mwa kukumbukira momwe tikubvera pa nthaweyo. Tin’funika kupitiriza kutsimikizira kuti lufoyi lacadidi la Yahova lin’dzakhala mpaka kale-kale ninga momwe Bibliya limbalewera.