‘ Pitirizani Kukhala Wakuphatana Mwauzimu’
MPOSTOLO Paulo adalimbikisa Akristau wa ku Efezo kuti akhafunika kupitiriza ‘kumbapirirana mwa lufoyi mwa kucita nyongo yakuti apitirize kukhala wakuphatana mwauzimu na kukhala mwa mtendere pakati pawo.’ — Aefezo 4:2, 3.
Ifepano timbakhala, “wakuphatana” thangwe ra mzimu. Bzimwebzi bzikuthandauza kuti bzimbakwanisika thangwe ra mphanvu ya Mulungu. Tsono ninga momwe Paulo adalewera, kuti tipitirize kukhala wakuphatana pambafunikira nyongo. Tsono mbani omwe an’funika kucita nyongo imweyi? Kulewa cadidi, Mkristau ali-wentse an’funika kucita nyongo kuti ‘tipitirize kukhala wakuphatana mwauzimu.’
Tiyezezere kuti munthu wakupasani karo inovu. Kodi mbani omwe an’funika kuisamalira karoyo kuti ipitirize kukhala iri bwino? Mtawiro ngwakuti ndimwepo. Penu imwepo mulibe kuisamalira bwino karoyo ndipo yadzongeka, mun’funika lini kupasa mulandu munthu omwe adakupasani karoyo.
Mu njira ibodzi-bodziyo, ciphatano cathu ni mphaso yakucokera kwa Yahova, tsono ali-wentse wa ifepano an’funika kucita bzomwe angakwanise kuti tipitirize kukhala wakuphatana. Penu ifepano tiri lini pa mtendere na m’bale ayai mpfumakazi tin’funika kubzibvunza kuti: ‘Kodi ndikucita bzomwe ningakwanise kuti tipitirize kukhala wakuphatana?’
‘CITANI NYONGO KUTI MUPITIRIZE KUKHALA WAKUPHATANA’
Ninga momwe Paulo adalewera, nthawe zinango, timbafunika kucita nyongo ikulu kwene-kwene kuti tipitirize kukhala wakuphatana mwauzimu. Ndipo kucita bzimwebzi kungakhale kwakunesa maka-maka bzikakhala kuti m’bale ayai mpfumakazi atisunamisa. Kodi kukhala wakuphatana kumbathandauza kuti imwepo nthawe zentse mun’funika kucezerana na munthuyo bza bvutolo? Nkhani njimweyo lini. Bzibvunzeni kuti: ‘Kodi ndikayenda kukacezerana na munthuyo, ningacitise kuti bzinthu bzikhale bwino ayai bziipiretu?’ Nthawe zinango cinthu cabwino comwe mungacite n’kundoisiya nkhaniyo ayai kumulekerera munthuyo. — Mimwani 19:11; Marko 11:25.
Bzibvunzeni kuti: ‘Kodi ndikayenda kukacezerana na munthuyo, ningacitise kuti bzinthu bzikhale bwino ayai bziipiretu?’
Ninga momwe Paulo adanembera, tin’funika kupitiriza ‘kupirirana mwalufoyi.’ (Aefezo 4:2) Bukhu linango lidalewa kuti mafala yamweya yangasanduliziridwe kuti “kubvuma momwe wanthu aliri.” Bzimwebzi bzimbathandauza kuti timbabvuma kuti abale wathu mbakuperewera ninga ifepano. N’cadidi kuti ifepano tikuyezera ‘kubvala unthu bupsa.’ (Aefezo 4:23, 24) Tsono palibe ne m’bodzi wa ifepano omwe ambakwanisa kucita bzimwebzi mu njira yakulungamiratu. (Aroma 3:23) Tikazindikira bzimwebzi bzin’dzakhala bzakupusa, kupirirana mwalufoyi, kumbalekererana na ‘kupitiriza kukhala wakuphatana mwauzimu.’
Tin’dzapitiriza ‘kukhala mwa mtendere pakati pathu’ pabodzi na m’gwere tikambalekerera na kuyebwa bzomwe winango ambacita na kutisunamisa. Fala la Cigerego lomwe lidasanduliziridwa kuti “kukhala wakuphatana” lomwe liri pa Aefezo 4:3 lidasanduliziridwa kuti ‘kuphatana’ pa Akolose 2:19. Kuti mafupa yakhale yakuphatana pana bzinthu bzomwe bzimbacitisa kuti mafupayo yaphatane. Mwa njira ibodzi-bodziyi, mtendere na lufoyi lomwe tinalo kwa abale wathu bzin’dzatithandiza kuti tipitirize kukhala wakuphatana nawo napo acicita bzinthu bzomwe tingakomedwe lini nabzo.
M’bale ayai mpfumakazi akakusunamisani ayai kukukalipisani yezerani kumubvesesa mucimulatiza ntsisi m’mbuto mwa kumbandowona bzakuphonya bzace. (Akolose 3:12) Pakuti tentsene ndife wakuperewera, imwepo mudasunamisambo kale munthu pa nthawe inango. Kukumbukira bzimwebzi kun’dzakuthandizani kucita mbali yanu kuti ‘tipitirize kukhala wakuphatana mwauzimu.’