NKHANI YAKUPFUNZA 47
NYIMBO 38 Yahova An’dzakulimbisa
“ Iwepo Ndiwe Munthu Wakufunika Kwene-kwene”!
“ Iwepo ndiwe munthu wakufunika kwene-kwene.” — DANIYELI 9:23.
CAKULINGA CA NKHANIYI
Nkhani ino, in’thandiza wale omwe ambabzibva kuti mbakufunika lini kubvesesa kuti mbakufunika kwene-kwene pamaso pa Yahova.
1-2. N’ciyani comwe cingatithandize kutsimikizira kuti ndife wakufunika pamaso pa Yahova?
ATUMIKI wa Yahova mbakufunika kwene-kwene kwa iye. Tsono winango ambakhulupira lini kuti Yahova ambawafunadi. Pinango iwo adaboneresedwa ndipo bzimwebzi bzimbawacitisa kubzibva kuti mbakusaya basa. Kodi imwepo mumbabzibvambo tenepo? Kodi n’ciyani comwe cingakuthandizeni kutsimikizira kuti imwepo ndimwe wakufunika pamaso pa Yahova?
2 Cinthu cibodzi comwe cingakuthandizeni ni kumbakumbukira bziratizo bza m’Bibliya bzomwe bzimbalatiza momwe Yahova ambafunira kuti wanthu ambawonedwere na kucitidwira bzinthu. Jezu akhalemekeza wanthu wentse ndipo akhawacitira bzinthu mwakudeka mtima. Na bzimwebzi, iye adalatiza kuti wale omwe ambabziwona kuti mbakusaya kufunika, kulewa cadidi mbakufunika kwene-kwene kwa iye na kwa Baba wace. (Juwau 5:19; Ahebereu 1:3) Mu nkhani ino, tiniwona: (1) Momwe Jezu adathandizira wanthu kuzindikira kuti iwo mbakufunika pamaso pa Yahova na (2) momwe tingatsimikizirire kuti ndife wakufunika kwene-kwene pamaso pa Yahova. — Agai 2:7.
MOMWE JEZU ADATHANDIZIRA WANTHU KUZINDIKIRA KUTI MBAKUFUNIKA
3. Kodi Jezu adacita tani bzinthu na wanthu wa ku Galileya omwe akhafunikira thandizo?
3 Pomwe Jezu akhapalizira ku Galileya, wanthu azinji akhambabwera kwa iye kuti adzamutetekere na kupozedwa. Jezu adazindikira kuti “wanthuwo akhali wakupwetekeka na wakumwazika ninga mabira yakusaya makabusa.” (Mateu 9:36) Atsogoleri wa magereja akhambawona wanthu ninga wakusaya basa na wakusaya kufunika. Iwo akhambafika pakulewa wanthuwo kuti ‘mbakutembereredwa’. (Juwau 7:47-49) Tsono Jezu akhambacita nawo bzinthu mwakudeka mtima na mwaulemu ndipo akhambapambula nthawe kuti awapfunzise na kuwapoza. (Mateu 9:35) Kuthumizira bzimwebzi kuti athandize wanthu azinji, Jezu adapfunzisa anyakupfunza wace kupalizira ndipo adawapasa mphanvu ya kupoza atenda. — Mateu 10:5-8.
4. Kodi tingapfunze ciyani na momwe Jezu akhacitira bzinthu na wanthu omwe akhanyozedwa?
4 Thangwe ra kumbacita bzinthu na wanthu mwaulemu, Jezu adalatiza kuti wanthu omwe ambawoneka kuti mbakunyozeka, mbakufunika kwene-kwene kwa iye na kwa Baba wace. Penu imwepo mumbatumikira Yahova tsono mukupenukira kuti ndimwe wakufunika, kumbukirani momwe Jezu akhacitira bzinthu na wanthu omwe akhawoneka ninga wakusaya basa omwe akhafuna kupfunza na iye. Kucita bzimwebzi kun’dzakuthandizani kuwona kuti ndimwe wakufunika pamaso pa Yahova.
5. Fotokozani momwe bzinthu bzikhaliri pa moyo wa mkazi munango omwe Jezu adamugumana ku Galileya.
5 Jezu akhambandopfunzisa lini mathimu ya wanthu yokha, koma akhapfunzisambo na kuthandiza munthu ali-wentse payekha. Mwa ciratizo, pomwe akhacita utumiki bwace ku Galileya, iye adagumana na mkazi munango omwe akhana matenda yakutaya mulopa kwa magole 12. (Marko 5:25) Mwakubverana na lamulo, matenda yamweya yakhamucitisa kuti akhale wakupswipa ndipo munthu ali-wentse omwe angadamukhuya angadakhalambo wakupswipa. Ndipopa iye akhakhala lini pabodzi na wanthu winango ndipo bzikuwoneka kuti akhambamala nthawe ikulu ali yekha. Kuthumizira bzimwebzi, iye akhafunika lini kukanamata Yahova pabodzi na wanthu winango mu nyumba yakunamatira na kumbagumanika m’maphwando. (Levitiko 15:19, 25) Kulewa cadidi, mkazi umweyu akhabonera mwakuthupi na m’makumbukidwe. — Marko 5:26.
6. Kodi n’ciyani comwe mkaziyo adacita kuti apozedwe?
6 Mkazi omwe akhanesekayu akhafunisisa kuti Jezu amupoze. Tsono iye alibe kukumbira kuti Jezuyo amupoze. Thangwe ranyi alibe kukumbira? Pinango iye akhana manyazi thangwe ra matenda yaceyo. Ayai pinango iye akhacita mantha kuti Jezu angadamuthotha pakuti iye akhali wakupswipa ndipo akhafunika lini kukhala pakati pa wanthu. Ndipopa iye adandokhuya cakubvala ca Jezu na citsimikizo cakuti angadandocita bzimwebzo, iye angadalimba. (Marko 5:27, 28) Iye akhana cikhulupiro cakulimba ndipo bzomwe adakumbukabzo bzikhali bzacadidi. Matenda yace yadamaliratu. Pambuyo pa bzimwebzi, Jezu adabvunza kuti mbani omwe akhadamukhuya ndipo mkaziyo adalewa bzomwe akhadacitabzo. Kodi Jezu adacita ciyani?
7. Kodi Jezu adacita tani bzinthu na mkazi omwe akhabonera kwene-kweneyu? (Marko 5:34)
7 Jezu adacitira mkaziyo bzinthu mwakudeka mtima na mwaulemu. Iye adawona kuti mkaziyo akhabva “mantha aciyamba kutetemera.” (Marko 5:33) Thangwe ra kudziwa momwe iye akhabvera Jezu adamucitira bzinthu mwalufoyi na kumulimbikisa. Iye adafika pakumucemera kuti “mwanangu.” Pakuphatisa basa fala limweri, Jezu alibe kundolatiza kuti akhalemekeza mkaziyo, koma adalatiza kudeka mtima na lufoyi. (Werengani Marko 5:34.) Imweyi ni nthawe ibodzi yokha yomwe Bibliya limbalewa kuti Jezu adacemera mkazi munango kuti “mwanangu.” Bzikuwoneka kuti iye adaphatisa basa fala limweri pa nthawe imweyi thangwe rakuti adawona kuti mkaziyo akhana mantha kwene-kwene. Kumbukirani momwe iye adakhalira wakutsangalazidwa na wakukondwa! Thangwe ra bzomwe Jezu adalewabzi, bzidacitisambo kuti mkaziyo aleke kubzipasa mulandu thangwe ra kuphata cakubvala cace na kukhala pakati pa wanthu. Jezu akhafuna kucita bzizinji sikuti kundomupoza kokha. Iye akhafuna kuti mkaziyo adziwe kuti iye akhali mwana wakufunika kwa Baba wathu wakudzulu.
8. Kodi ni mabvuto yaponi yomwe mpfumakazi inango ya ku Brasil ikhagumana nayo?
8 Ntsiku zinombo, atumiki winango wa Yahova ambaduwala matenda yomwe yambawacitisa kukhala wakusunama na kubzibva kuti alibe na basalo. Onani bzomwe bzidacitikira Maria,a mpainiya munango wakukhazikika wa ku Brasil. Thangwe ra bvuto la thanzi, iye adabadwa alibe minyendo na boko lamadzere. Iye adati: “Inepano ndikhasekedwa kwene-kwene ku xikola ndipo ndikhaboneresedwa thangwe ra bvuto langu la thanzi. Anzangu wa ku xikola akhambandicemera madzina yakuipa. Ndipo nthawe zinango adzinza wangu caiwo akhambandinyoza.”
9. N’ciyani cidathandiza Maria kuwona kuti akhali wakufunika kwa Yahova?
9 N’ciyani comwe cidathandiza Maria? Pomwe iye adakhala Mboni ya Yahova, abale na mpfumakazi adamuthandiza kubziwona ninga momwe Yahova ambamuwonera. Iye adati: “Kaderno wangu alibe masamba yakukwanira kuti ndinembe madzina ya abale na mpfumakazi wentse omwe adandithandiza! Ndikutenda kwene-kwene Yahova na mtima wangu wentse thangwe ra kundipasa banja labwino lauzimu.” Abale na mpfumakazi amwewa adathandiza Maria kuwona kuti iye ngwakufunika pamaso pa Yahova.
10. Kodi ni mabvuto yaponi yomwe Mariya Madalena akhanayo? (Onanimbo bzithunzi-thunzi.)
10 Onani momwe Jezu adathandizira mkazi munango wakucemeredwa Mariya Madalena. Iye akhana bziwanda bzakukwana 7! (Luka 8:2) Bzikuwoneka kuti thangwe ra bziwandabzo, iye akhambacita bzinthu bzakusaya kubveseseka bwino ndipopa wanthu akhamufenderera lini. Pa nthawe yakunesayi, iye pinango akhabzibva kuti akhafunidwa lini na wakusaya kukhotcerereka acimbakumbuka kuti palibe omwe angadamuthandiza. Jezu adacosa bziwanda bzomwe bzikhamucitisa kuti abonere ndipo iye adakhala mteweri wace wakukhulupirika. Kodi ni mwa njira inango iponi yomwe Jezu adathandiza Mariya Madalena kubvesesa kuti iye akhali wakufunika kwa Mulungu?
Kodi Jezu adatsimikizira tani Mariya Madalena kuti akhali wakufunika kwene-kwene kwa Yahova? (Onani ndime 10-11)
11. Kodi Jezu adamulatiza tani Mariya Madalena kuti akhali wakufunika kwene-kwene kwa Mulungu? (Onanimbo bzithunzi-thunzi.)
11 Jezu adapasambo mwayi Mariya Madalena wakucita naye ulendo pabodzi na anyakupfunza wace pomwe akhapalizira mudzi na mudzi.b Mwa njira imweyi, iye adakhala na mwayi wakubva Jezu pomwe akhapfunzisa wanthu winango. Jezuyo adawonekerambo kwa iye pa ntsiku yomwe adalamusidwa. Ndipo Mariya Madalenayo adakhala m’bodzi mwa wanthu wakuyamba kuwona Jezu pambuyo pa iye kulamusidwa. Ndipo Jezu adauza Mariya Madalena kuti akauze apostolo wace kuti iye akhadalamusidwa. Na bzimwebzi, Jezu adamuthandiza kuwona kuti akhalidi wakufunika kwa Yahova! — Juwau 20:11-18.
12. N’ciyani comwe cikhacitisa Lidia kuwona kuti akhathemera lini kulatizidwa lufoyi?
12 Ninga Mariya Madalena, wanthu winango ambabzibva kuti mbakusaya kufunika. Mpfumakazi inango, yakucemeredwa Lidia yomwe imbakhala ku Espanha, idalewa kuti pomwe iyo ikhanati kubadwa, mai wace akhafuna kucosa mimbayo. Mpfumakazi Lidia ikukumbukira kuti pomwe ikhali mwana mai wace akhambaisamalira lini ndipo akhambailewa mafala yakuipa. Iyo idati: “Bzomwe inepano ndikhafuna pa moyo wangu ni kufunidwa na wanthu winango. Inepano ndikhakumbuka kuti ningadafunidwa lini na munthu ali-wentse thangwe mai wangu akhambandiuza kuti ndikhali munthu wakuipa.”
13. N’ciyani comwe cidathandiza Lidia kuwona kuti iye ngwakufunika kwa Yahova?
13 Pomwe Lidia adayamba kupfunza Bibliya, bzinthu bzidacinja. Kupemba kwa Yahova, kuwerenga Bibliya na mafala pabodzi na bzicito bza lufoyi bza abale na mpfumakazi bzidamuthandiza kubvesesa kuti iye akhali wakufunika kwene-kwene kwa Yahova. Iye adati: “Bayangu nthawe zentse ambandiuza kuti ambandifuna. Ndipo iye nthawe zentse ambandiuza bza makhalidwe yabwino yomwe ndinayo. Axamwali wangu winango ambacitambo bzimwebzi.” Ninga Lidia, pinango munthu wa m’gwere mwanu angafunikirembo thandizo kuti awone kuti ngwakufunika pamaso pa Yahova. Kodi imwepo mukukumbukira munthu omwe ambabzibva mwa njira imweyi?
MOMWE TINGAMBABZIWONERE NINGA MOMWE YAHOVA AMBATIWONERA
14. Kodi 1 Samuyeli 16:7 ambatithandiza tani kuwona momwe Yahova ambawonera wanthu? (Onanimbo kwadru ya msolo wakuti “Thangwe Ranyi Wanthu wa Yahova Mbakufunika kwa Iye?”)
14 Kumbukirani kuti Yahova ambakuwonani lini ninga momwe dzikoli limbakuwonerani. (Werengani 1 Samuyeli 16:7.) Kwa wanthu azinji m’dzikoli, munthu ambawoneka kuti ngwakufunika akakhala kuti adadeka kwene-kwene, ana kobiri ndipo adapfunza kwene-kwene. Tsono Yahova ambatiwona lini mwa njira imweyi. (Zaiya 55:8, 9) Ndipopa m’mbuto mwa kumbabziwona ninga momwe dzikoli limbakuwonerani, imwepo mun’funika kumbabziwona ninga momwe Yahova ambakuwonerani. Bibliya limbalewa bza wanthu omwe nthawe zinango akhambabziwona kuti akhalibe na basalo omwe akhali Eliya, Naomi na Ana. Pomwe mukuwerenga bza iwo, khalani tceru kuti muwone momwe Yahova akhawafunira. Imwepo mungakhalembo na kaderno wanu kuti mumbanembe bzinthu bzomwe bzidakucitikirani pa moyo wanu bzomwe bzimbalatiza kuti Yahova ambakufunani nakuti ambakuwonani kuti ndimwe wakufunika. Kuthumizira bzimwebzi, imwepo mungawone nkhani zakuthumizirika zomwe zimbalatiza kuti imwepo ndimwe wakufunika zomwe zimbagumanika m’mabukhu yathu.c
15. Thangwe ranyi Yahova akhawona Daniyeli ninga “munthu wakufunika kwene-kwene”? (Daniyeli 9:23)
15 Kumbukirani kuti kukhulupirika kwanu kumbakucitisani kuti mukhale wakufunika kwa Yahova. Pa nthawe inango, mprofeta Daniyeli omwe bzikuwoneka kuti akhana magole yakupitirira 90 adabzibva kukhala ‘wakuneta kwene-kwene’ na wakusunama. (Daniyeli 9:20, 21) Kodi Yahova adamutsangalaza tani? Iye adatumiza anjo Gabriyeli kuti akakumbuse Daniyeli kuti iye akhali “munthu wakufunika kwene-kwene” nakuti mipembo yace ikhadabvedwa. (Werengani Daniyeli 9:23.) Kodi n’ciyani comwe cidacitisa kuti Daniyeli akhale munthu wakufunika kwa Mulungu? Comwe cidacitisa ni kulungama na kukhulupirika kwace. (Ezekiyeli 14:14) Yahova adacitisa kuti nkhani imweyi inembedwe m’Bibliya kuti imbatitsangalaze. (Aroma 15:4) Iye ambabvambo mipembo yanu ndipo ambawona kuti ndimwe wakufunika kwene-kwene thangwe ra lufoyi na kukhulupirika kwanu pa basa lace. — Mika 6:8, mafala ya m’nyantsi; Ahebereu 6:10.
16. N’ciyani comwe cingakuthandizeni kuwona Yahova ninga Baba wa lufoyi?
16 Mbawonani Yahova ninga Baba omwe ambakufunani. Iye akufuna kukuthandizani sikuti kuwona bzakuphonya bzanu. (Salimo 130:3; Mateu 7:11; Luka 12:6, 7) Kukumbukira bzimwebzi kudathandiza wanthu azinji omwe akhana makumbukidwe yakuphonyeka. Onani bzomwe bzidacitikira mpfumakazi Eliana, yomwe imbakhala ku Espanha yomwe ikhabzibva kuti njakufunika lini na yakusaya basa thangwe ra kuti mwamuna wace akhambamulewa mafala yakuipa kwa magole mazinji. Iyo idati: “Nthawe zentse zomwe ndikhambabzibva kuti ndiribe na basalo, ndikhambayezera kukumbukira kuti Yahova akhadandinyamula m’manja mwace acimbandilatiza lufoyi na kundikhotcerera.” (Salimo 28:9) Mpfumakazi inango, yomwe imbakhala ku África do Sul yakucemeredwa Lauren, nthawe zentse imbakumbukira mafala yakuti, “penu Yahova mwakudeka mtima na mwa lufoyi adandikwewera kwa iye acindicitisa kuti ndikhale pafupi na iye kwa magole yentseneya na kundiphatisa basa kuti ndipfunzise winango, bzimwebzi bzikulatiziratu padeca kuti ambandiwona kuti ndine wakufunika kwene-kwene.” — Ozeya 11:4.
17. Kodi imwepo mungakhale tani na citsimikizo cakuti Yahova akukomedwa namwe? (Salimo 5:12) (Onanimbo cithunzi-thunzi.)
17 Mbatsimikizirani kuti Yahova ambakomedwa namwe. (Werengani Salimo 5:12.) Davide adandendemezera kufunidwa na Yahova na “cakukhotcerera cikulu” comwe cimbakhotcerera anyakulungama. Kudziwa kuti Yahova ambakomedwa namwe na nakuti iye ambakuthandizani kungakhale ninga cakukhotcerera comwe cin’dzakuthandizani mukayamba kukhala na makumbukidwe yakuphonyeka. Tsono n’ciyani comwe cingakuthandizeni kudziwa kuti Yahova akukomedwa namwe? Ninga momwe tawonera tingakhale na citsimikizo cimweci tikambawerenga Bibliya lomwe Yahova ambatiuza momwe ambatiwonera. Kuthumizira bzimwebzi, iye ambaphatisa basa akulu wa gwere, azixamwali wanu na wanthu winango kuti akuuzeni kuti ndimwe wakufunika kwene-kwene pamaso pace. Tsono, kodi n’ciyani comwe imwepo mun’funika kucita munthu akakuuzani mafala yabwino?
Kukumbukira kuti Yahova akukomedwa nafe kumbatithandiza kutcenkha kukhala na makumbukidwe yakuti ndife lini wakufunika (Onani ndime 17)
18. Thangwe ranyi imwepo mun’funika kumbabvuma wanthu winango akambakutendani?
18 Bvumani kutendedwa na wanthu omwe ambakufunani na kukudziwani. Kumbukirani kuti Yahova angaphatise basa wanthu amwewa kuti akuthandizeni kubvesesa kuti iye akukomedwa namwe. Eliana, omwe agumidwa pakuyamba ule, adalewa kuti: “Pang’ono na pang’ono, inepano ndikupfunza kubvuma na mtima wentse mafala yabwino yomwe wanthu winango ambandiuza. Kucita bzimwebzi n’kwakupusa lini kwa inepano. Tsono nimbadziwa kuti ndibzo bzomwe Yahova akufuna kuti inepano ndicite.” Akulu wa gwere mwakudeka mtima akuthandiza Eliana kuwona kuti Yahova akukomedwa naye. Tsapano iye akutumikira ninga mpainiya ndipo akuthandizira pa Beteli na kumui.
19. Thangwe ranyi imwepo mungakhale na citsimikizo cakuti ndimwe wakufunika pamaso pa Mulungu?
19 Jezu mwakudeka mtima akutikumbusa kuti ifepano ndife wakufunika kwene-kwene kwa Baba wathu wakudzulu. (Luka 12:24) Na tenepo, tingakhale na citsimikizo cakuti Yahova ambatiwona kuti ndife wakufunika. Ndipopa tin’funika lini kuyebwa bzimwebzi! Ndipo tin’funikambo kucita bzomwe tingakwanise kuti tithandize winango kuwona kuti iwo mbakufunika pamaso pa Mulungu!
NYIMBO 139 Bziyezezereni Kuti Muli M’paraizo
a Madzina yanango yacinjidwa.
b Bzentse bzikulatiza kuti Mariya Madalena akhacita mbali ya thimu la akazi omwe akhambacita ulendo na Jezu. Akazi amwewa akhaphatisa basa kobiri zawo kuti apase Jezu pabodzi na apostolo wace bzinthu bzomwe akhafunikira. — Mateu 27:55, 56; Luka 8:1-3.
c Mwa ciratizo, imwepo mungawerenge kapitulo 24 la bukhu lakuti Yandikirani Yehova ndipo mungawonembo mavesi na nkhani zinango za m’Bibliya zomwe zimbagumanika pa msolo wakuti “Kudzikayikira” mu bukhu lakuti Malemba Othandiza pa Moyo wa Chikhristu.