Pitirizani “Kutsogoleredwa na Mulungu”

1. Kodi ni bzinthu bziponi bzomwe timbafunikira? (Mateu 5:3)

YAHOVA ambadziwa bzomwe wanthu ambafunikira. Mwa ciratizo, kuti tipitirize kukhala na moyo timbafunikira cakudya, bzakubvala na pakukhala. Tikasaya bzinthu bzimwebzi napo m’kanthawe kakucepa, moyo ungakhale wakunesa kwene-kwene. Kuthumizira bzimwebzi, Yahova ambadziwa kuti pana cinthu cinango comwe wanthu ambafunikira. Iye adatilenga na cikhumbo ca kufuna kumudziwa na kumuthemba kuti atitsogolere. (Werengani Mateu 5:3.) Penu tikufuna kukhaladi wakukondwa tin’funika kuzindikira kuti tin’funika kukhala pa uxamwali na iye na kupitiriza kumuthemba.

2. Kodi ni ciratizo ciponi comwe cakulatiza thandauzo la fala lakuti ‘tin’funika kutsogoleredwa’ na Mulungu?

² Kodi fala lakuti ‘tin’funika kutsogoleredwa’ na Mulungu limbathandauza ciyani? Fala lace cairo limbafuna kulewa bza munthu omwe akufunikira thandizo. Kumbukirani bza munthu omwe adasauka kwene-kwene omwe bzakubvala bzace bzidang’ambika ndipo adakhala pa mseu. Iye alibe mphanvu thangwe ra kusaya cakudya, wanthu akumutcenkha thangwe ra mawonekedwe yace, ambandokhala pa dzuwa ndipo usiku ambandokhala padeca acimbabonera na mphepo. Munthu umweyu akudziwa kuti an’funika thandizo kuti apitirize kukhala na moyo na kukhalambo na mphanvu. Mwa njira ibodzi-bodziyi, wale omwe ambadziwa kuti an’funika kutsogoleredwa na Mulungu, ambadziwambo kuti ambafunikira thandizo lace pa moyo wawo. Ndipopa iwo akufunisisa kugumana phindu na malango yomwe Yahova ambapasa wale omwe ambamufuna.

3. Kodi tin’pfunza ciyani mu nkhani ino?

³ Mu nkhani ino, tiniyamba kuwona bzomwe tingapfunze na mkazi wa ku Fenisiya omwe adadandaulira Jezu kuti amuthandize. Tin’pfunza momwe tingamutewezerere penu tikufuna kuti Yahova apitirize kutitsogolera. Patsogolo pace, tiniwona ciratizo ca Pedru, Paulo na Mambo Davide, omwe adathemba thandizo la Yahova pa moyo wawo.

MAKHALIDWE MATATU YOMWE TIN’FUNIKA KUKHALA NAYO

4. Thangwe ranyi mkazi wa ku Fenisiya adayenda kuna Jezu?

⁴ Ntsiku inango, mkazi munango wa ku Fenisiya adayenda kuna Jezu. Mwana wace wacikazi akhana ‘ciwanda comwe cikhamuzunza kwene-kwene.’ (Mateu 15:21-28) Ndipopa mkaziyo adagodama acidandaulira Jezu kuti amuthandize. Mbatiwoneni makhalidwe matatu yomwe iye adayalatiza na momwe tingamutewezerere.

5. Kodi ni makhalidwe yaponi yomwe mkaziyo adalatiza, ndipo Jezu adacita ciyani? (Onanimbo cithunzi-thunzi.)

⁵ Mkazi wa ku Fenisiya adalatiza kuti akhali wakubzicepesa. Thangwe ranyi tingalewe bzimwebzo? Thangwe iye alibe kusunama na momwe Jezu adamutawirira. Jezu adamundendemezera na ka mbwaya kang’ono komwe wanthu omwe akhali lini Adjuda akhambafuwa m’mii mwawo. N’ciyani comwe imwepo mungadacita bzingadakhala kuti Jezu akuuza imwepo mafala yamweya? Kodi mungadasunama mucisiya kukumbira thandizo Jezuyo? Tsono ndibzo lini bzomwe mkazi wa ku Fenisiya adacita. Iye alibe kundolatiza kuti akhali wakubzicepesa koma adapitirizambo kukumbira kuti Jezu amuthandize. Thangwe ranyi iye adacita bzimwebzo? Thangwe rakuti akhakhulupira Jezu. Jezu adadabwa kwene-kwene na cikhulupiro cace mwakuti adacita cinthu cabwino kwene-kwene. Napo kuti Jezu akhadalewa kale kuti Mulungu akhalibe kumutumiza kwa wanthu wentse koma kokha kwa “mabira yakutaika ya mtundu wa Jirayeri,” iye adathandiza mkaziyo ndipo adacosa ciwanda comwe cikhaboneresa mwana wace cire.

6. Kodi tikupfunza ciyani na ciratizo ca mkazi wa ku Fenisiya?

⁶ Penu tikufuna kugumana phindu na malango ya Yahova, tin’funika kutewezera mkazi umweyu. Tin’funika kukhala wakubzicepesa na kupitiriza kukumbira Mulungu kuti atithandize. Tin’funikambo kukhulupira Jezu Kristu na kuthemba wale omwe iye ambawaphatisa basa kuti atsogolere anyakupfunza wace. (Mateu 24:45-47) Yahova na Jezu ambakomedwa tikakhala wakubzicepesa, tikapitiriza kukumbira thandizo lawo na kukhala na cikhulupiro. Tikacita bzimwebzi, iwo an’dzatithandiza na kutitsogolera. (Ndendemezerani na Tiyago 1:5-7.) Tsapano mbatiwoneni momwe Yahova ambatitsogolerera na kutipasa bzakufunikira kuti tikhale wakukondwa. Ndipo tiniwonambo momwe tingatewezerere mpostolo Pedru, Paulo na Mambo Davide.

TEWEZERANI PEDRU MWA KUPITIRIZA KUPFUNZA FALA LA MULUNGU

7. Kodi Jezu adauza ciyani Pedru, ndipo n’ciyani cinango comwe iye akhafunika kucita? (Ahebereu 5:14–6:1)

⁷ Onani ciratizo ca mpostolo Pedru. Iye adakhala Mdjuda wakuyamba kuzindikira kuti Jezu akhali Mesiya. Iye adakwanisambo kuzindikira kuti Yahova akhaphatisa basa Jezu kuti apfunzise wanthu bza “moyo wakusaya kumala.” (Juwau 6:66-68) Pomwe akhanati kubwerera kudzulu, Jezu adauza Pedru kuti: “Dyesa kathimu kangu ka mabira.” (Juwau 21:17) Pedru adabvera Jezu ndipo adapfunzisa abale na mpfumakazi m’magwere. Ndipo Yahova adamuphatisa basa kuti anembe matsamba mawiri yomwe yambacita mbali ya Bibliya. Tsono Pedru akhafunikambo kupfunza Fala la Mulungu. Mwa ciratizo, iye akhambapfunza matsamba yomwe mpostolo Paulo adanemba. Pedru adazindikira kuti bzinthu bzinango bzomwe mpostolo Paulo akhadanemba bzikhali “bzakunesa kubvesesa.” (2 Pedru 3:15, 16) Napo bzikhali tenepo, iye adacita nyongo yakupitiriza kupfunza. Iye akhana cikhulupiro cakuti Yahova angadamuthandiza kubvesesa na kuphatisa basa bzomwe akhapfunza. — Werengani Ahebereu 5:14–6:1.

8. Kodi n’ciyani comwe Pedru adacita pomwe adatambira malango mapsa yakucokera kwa Yahova?

⁸ Pedru adalatiza kuti akhakhulupira Yahova mwakubvera malango yomwe iye akhapasidwa. Mwa ciratizo, ntsiku inango Pedru adawona matsomphenya ndipo anjo adamuuza kuti adye bzirombo bzomwe Lamulo la Mozeji likhabvumiza lini kuti Adjuda adye. Pedru omwe akhali Mdjuda kwa moyo wace wentse akhawona kuti mpsakuphonyeka kucita bzomwe anjo ule akhamuuza. Ndipopa, iye pakuyamba adatawira kuti: “Ne Mbuya, thangwe ndikanati kudya cinthu cakuipisidwa na cakupswipa.” Patsogolo pace, anjoyo adalewa kuti: “Leka kulewa pomwe kuti mpsakuipisidwa, bzinthu bzomwe Mulungu wabzicenesa.” (Mabasa 10:9-15) Pedru adabvesesa kufuna kwa Mulungu ndipo adacinja makumbukidwe yace. Kodi timbadziwa tani bzimwebzi? Pambuyo pa matsomphenyayo, amuna atatu adayenda ku mui kwa Pedru. Iwo adalewa kuti mbuya wawo Korneliyo akhafuna kuti Pedru ayende kumui kwace. Bzingadakhala kuti Pedru alibe kuwona matsomphenyayo, iye angadabvuma lini kuyenda ku mui kwa Korneliyo thangwe iye akhali lini Mdjuda. Atsogoleri wa Adjuda akhambapfunzisa wanthu kuti bzikhali bzakuphonyeka Mdjuda kupita m’nyumba mwa munthu omwe akhali lini Mdjuda. (Mabasa 10:28, 29) Tsono Pedru mwakamfulumize adabvuma malango yomwe Yahova akhadamupasa. (Mimwani 4:18) Iye adapalizira Korneliyo, wanthu wa m’banja mwace na azixamwali omwe akhali ku mui kwaceko. Ndipo adakomedwa pomwe adawona wentse akubvuma cadidi, akutambira mzimu wakucena na kubatizidwa. — Mabasa 10:44-48.

9. Kodi ni njira ziwiri ziponi zomwe zin’funika kuticitisa kupfunza bzinthu bzakunesa kubzibvesesa?

⁹ Ninga Pedru, tin’funika kumbapfunza Fala la Mulungu ntsiku zentse. Nthawe zizinji timbawerenga bzinthu bzomwe mpsakupusa kubzibvesesa, tsono tin’funikambo kumbakomedwa kupfunza bzinthu bzomwe mpsakunesa kubzibvesesa. Tin’funika kuwonesesa kuti tikupambula nthawe kuti timbapfunze Fala la Mulungu mwakamderekho. Ndipo mpsakufunika kucita nyongo yakubvesesa bzinthu bzomwe pinango pakuyamba tikhabzibvesesa lini. Thangwe ranyi? Thangwe timbagumana phindu mu njira ziwiri izi: Yakuyamba, timbapfunza bzinthu bzomwe bzimbakulisa lufoyi lathu kwa Yahova na kumulemekeza; ndipo yaciwiri timbakhala wakukonzeka kuuza winango bza Baba wathu wakudzulu. (Aroma 11:33; Apokalipse 4:11) Ciratizo ca Pedru cimbatipfunzisa cinthu cinango ici: Kabvesesedwe kathu ka cadidi cinango ca m’Bibliya kakacinjidwa tin’funika kucinja mwakamfulumize makumbukidwe yathu na bzicito bzathu. Tikacita bzimwebzi, Yahova an’dzapitiriza kutitsogolera ndipo tin’dzamutumikira mwakukhulupirika.

TEWEZERANI PAULO MWA KUBVALA UNTHU BUPSA

10. Mwakubverana na Akolose 3:8-10, n’ciyani comwe tin’funika kucita kuti tikondwese Yahova?

¹⁰ Yahova ambatitsogolerambo mwa kutilatiza momwe tingakulisire makhalidwe yomwe iye ambakomedwa nayo. (Werengani Akolose 3:8-10.) Pambafunika nthawe na nyongo kuti tikulise makhalidwe yomwe Yahova ambakomedwa nayo. Mbatiwoneni bzomwe bzidacitikira Paulo. Pomwe akhali tswaka, iye akhacita nyongo kuti akondwese Mulungu. (Agalatiya 1:14; Afilipi 3:4, 5) Tsono iye akhadziwa lini bwino-bwino momwe angadanamatira Mulungu mu njira yakuthemera. Ndipo iye akhadziwa lini cadidi pakulewa bza Jezu. Paulo akhali wakubzikuza ndipopa alibe kucita bzinthu bzomwe bzingadakondwesa Mulungu. Paulo adalewa kuti ‘akhalewalewa mwaukali.’ — 1 Timotio 1:13.

11. Kodi Paulo akhafunikira kucinja bzinthu bziponi? Fotokozani.

¹¹ Pomwe Paulo akhanati kukhala Mkristau, iye akhambafulumiza kukalipa. Nkhani inango ya m’bukhu la Mabasa imbalatiza kuti Paulo akhadakalipa kwene-kwene na anyakupfunza wa Jezu mwakuti ‘akhambawaboneresa . . . na kuwapha.’ (Mabasa 9:1) Kulewa cadidi, pomwe Paulo adakhala Mkristau adacita nyongo yakusiya makhalidwe yomwe yakhabverana na unthu bwace bwakale. (Aefezo 4:22, 31) Tsono pomwe Pauloyo na Barnaba alibe kubverana pa nkhani inango, iye ‘adakalipa kwene-kwene.’ (Mabasa 15:37-39) Pa nthawe imweyire, Paulo alibe kucita bzinthu ninga momwe Yahova akhafunira. Tsono iye adapitiriza kucita nyongo yakukhala munthu omwe Yahova angadakomedwa naye. — 1 Akolinto 9:27.

12. N’ciyani comwe cidathandiza Paulo kupitiriza kucinja unthu bwace?

¹² Paulo adakwanisa kucinja unthu bwace thangwe rakuti akhali wakubzicepesa ndipo akhabzithemba lini. (Afilipi 4:13) Ninga Pedru, Paulo akhathemba “mphanvu ya Mulungu.” (1 Pedru 4:11) Napo bziri tenepo, nthawe zinango Paulo akhasunama. Tsono pa nthawe zimwezi, iye akhambakumbukira bzinthu bzabwino bzomwe Baba wace wakudzulu akhadamucitira kale. Bzimwebzi bzikhamucitisa kuti apitirize kucinja kuti akondwese Mulungu. — Aroma 7:21-25.

13. Kodi tingatewezere tani Paulo?

¹³ Tingatewezere Paulo mwa kuzindikira kuti napo kuti tikutumikira Yahova kwa magole mazinji, tin’funika kupitiriza kucita nyongo yakuphatisa basa bzomwe Yahova ambatipfunzisa. Ndipo ninga momwe tawonera, bzimwebzi bzimbaphatanidza kukhundula unthu bwathu bwakale ticibvala unthu bupsa. Mwa ciratizo, tingakalipe ayai kulewa cinthu comwe n’cakuphonyeka. Bzimwebzi bzikacitika, tin’funika lini kukumbuka kuti tingakondwese lini pomwe Yahova, m’mbuto mwace tin’funika kupitiriza kucinja makumbukidwe yathu na momwe timbacitira bzinthu. (Aroma 12:1, 2; Aefezo 4:24) Tsono tin’funika kukumbukira cinthu cakufunika ici: Penu tikufuna kupitiriza kucinja unthu bwathu, tin’funika kupitiriza kubvesesa bzomwe Yahova akufuna kuti ticite.

TEWEZERANI DAVIDE MWA KUBVUMA KUTI YAHOVA AKUKHOTCERERENI

14-15. Kodi Yahova ambakhotcerera tani wanthu wace? (Salimo 27:5) (Onanimbo cithunzi-thunzi.)

¹⁴ Kuti tikhale wakukondwa tin’funikambo kukhotcereredwa na Yahova. Kodi Yahova ambatikhotcerera tani? Ndipo n’ciyani comwe tin’funika kucita kuti atikhotcerere?

¹⁵ Mambo Davide akhana citsimikizo cakuti Yahova angadamukhotcerera pa nthawe zakunesa. (Werengani Salimo 27:5.) Kodi Yahova ambakhotcerera tani wanthu wace ntsiku zino? Iye ambatikhotcerera kwa munthu ali-wentse ayai kwa cinthu ciri-centse comwe cingatitazise kukhala wakukhulupirika kwa iye. Napo kuti wanthu angayezere kutitazisa kumunamata, Yahova akupicira kuti an’dzakhotcerera uxamwali bwathu na iye. (Salimo 34:7; Zaiya 54:17) Napo kuti Sathani na madimonyo yace mbamphanvu, Yahova ngwamphanvu kwene-kwene kuposa iwo. Ndipo napo kuti iwo angatiphe, Yahova an’dzatilamusa. (1 Akolinto 15:55-57; Apokalipse 21:3, 4) Yahova ambatikhotcererambo mwakutithandiza kulimbana na thupo lomwe lingadaticitisa kusiya kumutumikira. (Mimwani 12:25; Mateu 6:27-29) Pai wathu walufoyi ambatipasambo abale na mpfumakazi kuti atithandize na akulu wa gwere omwe ambatipfunzisa na kutithandiza kupitiriza kukhala na cikhulupiro cakulimba. (Zaiya 32:1, 2) Ndipo tikambagumanika pa mitsonkhano, timbapfunza njira zinango za momwe tingabvumire kuti Yahova atithandize na kutikhotcerera. — Ahebereu 10:24, 25.

16. Kodi Yahova adakhotcerera tani Davide?

¹⁶ Pomwe Davide akhabvera Yahova, Yahovayo akhamukhotcerera mwa kumuthandiza kusankhula bzinthu mwanzeru bzomwe bzikhacitisa kuti akhale wakukondwa. (Ndendemezerani na Mimwani 5:1, 2.) Tsono pomwe Davide alibe kubvera Yahova, iye adabonera thangwe ra bzakusankhula bzace bzakuipa ndipo Yahova alibe kumukhotcerera ku bzinthu bzakuipabzo. (2 Samuyeli 12:9, 10) Nthawe zinango, Davide akhabonera thangwe ra kuboneresedwa na wanthu winango. Bzimwebzi bzikambacitika, iye akhambauza Yahova bza thupo lace lentse, ndipo Yahovayo akhambamutsangalaza na kumuthandiza kukhala wakugwa mpfuwa mwakumutsimikizira kuti akhamufuna kwene-kwene nakuti angadamusamalira bwino. — Salimo 23:1-6.

17. Kodi tingatewezere tani Davide?

¹⁷ Tingatewezerembo Davide mwakuphatisa basa malango ya Yahova pomwe tikufuna kucita bzakusankhula. Ndipo timbabvesesambo kuti nthawe zinango timbabonera sikuti thangwe rakuti Yahova wasiya kutikhotcerera koma thangwe rakuti tasankhula bzinthu bzakuphonyeka. (Agalatiya 6:7, 8) Ndipo tikabonera thangwe ra bzicito bza wanthu winango, timbapemba kwa Yahova ticimuuza bza thupo lathu na cikhulupiro cakuti iye an’dzakhotcerera makumbukidwe yathu na mtima wathu. — Afilipi 4:6, 7.

PITIRIZANI KUTHEMBA YAHOVA KUTI AKUTSOGOLERENI

18. Kodi azinji ambawona tani kutsogoleredwa na Mulungu, ndipo n’ciyani comwe tin’funika kucita penu tikufuna kuti Mulunguyo apitirize kutitsogolera? (Onanimbo bzithunzi-thunzi.)

¹⁸ Vesi lathu la gole la 2026 likulewa kuti: “An’kondwa mbale omwe ambadziwa kuti an’funika kutsogoleredwa na Mulungu.” Mafala yamweya njacadidi. Thangwe ranyi? Thangwe wanthu azinji ntsiku zino ambawona kuti an’funikira lini Mulungu na kutsogoleredwa na iye. Ndipo winango ambakhulupira Mulungu, tsono ambasankhula kumunamata mu njira yawo. Winango ambathemba wanthu kuti awatsogolere. Bzimwebzi bzimbawatazisa kukhala wakukondwa. Tin’funika lini kutewezera wanthu amwewa. Tsono kodi n’ciyani comwe tin’funika kucita kuti tipitirize kutsogoleredwa Yahova? Tin’funika kupitiriza kuthemba Fala la Yahova, kupfunza momwe tingalatizire makhalidwe yomwe yambamukondwesa, kumubvera na kubvuma kuti iye atikhotcerere.