23-29 MARÇO, 2026
NYIMBO 18 Tinkutenda Cakulombolera
Kodi Mungalatize Tani Kuti Mumbatenda Cakulombolera?
“Lufoyi la Kristu limbaticitisa kumubvera.”— 2 AKOLINTO 5:14.
CAKULINGA CA NKHANIYI
Ni kuwona momwe tentsenefe tingalatizire kuti timbatenda cakulombolera.
1-2. Kodi ntsembe ya cakulombolera ya Jezu imbaticitisa kuti ticite ciyani, ndipo thangwe ranyi? (2 Akolinto 5:14, 15) (Onanimbo cithunzi-thunzi.)
IMWEPO mucibzinyidwa na matijolo ya prediyo yomwe yagwa ndipo munthu acibwera kudzakupulumusani, kodi mungamuwone tani munthu umweyo? Imwepo mungamutende kwene-kwene ndipo cipo mucidzayebwa bzomwe iye wakucitiranibzo.
2 Ninga momwe tidawonera mu nkhani idapita ire, tingakwanise lini kubzitsudzula ku pikado na infa. Tsono ntsembe ya cakulombolera ya Jezu imbatitsudzula thangwe imbatithandiza (1) kulekereredwa pikado zathu, (2) kukhala na cidikhiro ca kudzakhala wakulungama na (3) kukhala pa uxamwali bwakulimba na Yahova. Cakulomboleraco cimbatipasambo cidikhiro cakudzakhala na moyo mpaka kale-kale mu dziko lipsa la Yahova. Jezu adalatiza kuti ambafuna kwene-kwene wanthu mwakuti adapereka moyo wace ninga ntsembe thangwe ra iwo. Iye adayamba kufuna wanthu napo pomwe akhanati kubwera pa dziko la pantsi. (Mimwani 8:30, 31) Mpostolo Paulo adanemba kuti “lufoyi la Kristu limbaticitisa kumubvera.” (Werengani 2 Akolinto 5:14, 15.) Bzimwebzi bzin’funa kulewa kuti tin’funika kulatiza kuti timbatenda lufoyi lomwe Jezu adatilatiza ticilekambo kuyebwa bzomwe iye adaticitira.
Munthu akapulumusa moyo wathu, ifepano tin’funika kulatiza kuti tikutenda bzomwe iye aticitirabzo (Onani ndime 1-2)
3. Thangwe ranyi bzomwe wanthu winango angacite pa kutenda cakulombolera bzingandendemere lini na bza winango?
3 Kodi n’ciyani comwe imwepo mungacite kuti mulatize kuti mumbatenda cakulombolera? Bzomwe imwepo mungacite bzingandendemere lini na bzomwe wanthu winango angacite. Kuti mudziwe thangwe race, tiyezezere kuti wanthu atatu wa m’madziko yakusiyana akucita ulendo bwakuyenda ku mbuto ibodzi, njira zomwe iwo an’dzaphatisa basa kuti afike komwe akuyendako zingandendemere lini. Mwa njira ibodzi-bodziyi, njira yomwe imwepo mun’dzaiphatisa basa kuti mulatize kuti mumbatenda cakulombolera ca Jezu ingandendemere lini na ya winango. Pakukumbukira bzimwebzi, nkhani ino in’fotokoza bza momwe mathimu matatu ya wanthu yangalatizire kutenda cakulombolera. Mathimuyo ni aya: (1) Anyakupfunza wa Bibliya, (2) Akristau wakubatizidwa na (3) wale omwe adasiya kutsonkhana na gwere.
ANYAKUPFUNZA WA BIBLIYA
4. Thangwe ranyi tingalewe kuti Yahova ambawafuna anyakupfunza wa Bibliya?
4 Penu imwepo ndimwe nyakupfunza wa Bibliya, kumbukirani ibzi: Kufuna kwanu kupfunza bza Yahova na Bibliya kukulatiza kuti iye adakukwewerani kwa iye. (Juwau 6:44; Mabasa 13:48) “Yahova ndiye omwe ambawona bza mu mtima.” Bzimwebzi bzin’funa kulewa kuti iye ambawona nyongo yanu yakupfunza bza iye ndipo ambakomedwa kwene-kwene thangwe ra kuyenda kwanu patsogolo na kucinja komwe mukucita kuti mukhale xamwali wace. (Mimwani 17:3; 27:11) Cakulombolera cimbacitisa kuti imwepo mukhale pa uxamwali bwakulimba na Yahova. (Aroma 5:10, 11) Lekani kumbayebwa bzimwebzi.
5. Kodi anyakupfunza wa Bibliya angaphatise tani basa malango yomwe yali pa Afilipi 3:16?
5 Kodi imwepo, ninga anyakupfunza wa Bibliya, mungalatize tani kuti mumbatenda cakulombolera? Njira ibodzi ndiyo kuphatisa basa malango yomwe mpostolo Paulo adanembera Akristau wa ku Filipi, yakuti: “Bziribe basa momwe tayendera patsogolo, mbatipitirizeni kufamba mu njira imweyi.” (Afilipi 3:16) Bibliya linango lidasandulizira vesi limweri kuti: “Tin’funika kupitiriza kufamba mu njira yomwe tikufamba kaleyi.” Na tenepo, phatisani basa malango yamweya ndipo lekani kulekerera kuti munthu ali-wentse ayai cinthu ciri-centse cikutaziseni kufamba mu njira yakuyendesa ku moyo. — Mateu 7:14; Luka 9:62.
6. N’ciyani comwe anyakupfunza wa Bibliya angacite penu bzikuwanesa kukhulupira nfundo inango ya m’Bibliya? (Deuteronomiyo 30:11-14) (Onanimbo cithunzi-thunzi.)
6 N’ciyani comwe mungacite penu bzikukunesani kukhulupira nfundo inango yomwe mwapfunza m’Bibliya? Fufudzani ndipo kumbirani Yahova kuti akuthandizeni kubvesesa nfundoyo. (Salimo 86:11) Mukapitiriza kusaya kubvesesa nfundoyo napo kuti mwafufudza, lekani kubwerera m’mbuyo. Pitirizani kupfunza Bibliya. Kutsogolo, imwepo mun’dzaibvesesa. Tsono tani penu bvuto lanu ndakuti mukuneseka kusiya kucita cinthu comwe Yahova ambakomedwa lini naco? Kumbukirani kuti Yahovayo angakumbire lini wanthu wakuperewera kuti acite cinthu comwe iwo angakwanise lini. Imwepo mungakwanise kubvera malamulo yace. (Werengani Deuteronomiyo 30:11-14.) Ndipo Yahova akupicira kuti an’dzakuthandizani. (Zaiya 41:10, 13; 1 Akolinto 10:13) Na tenepo, citani nyongo yakubvera Yahova. Lekani kumbacita thupo kwene-kwene na bvuto lomwe munalo, koma mbakumbukirani bzinthu bzomwe Yahova adakucitirani kuphatanidzambo cakulombolera. Pomwe lufoyi lanu kwa Yahovayo likukula, mun’dzakwanisa kuzindikira kuti “malamulo yaceyo njakulemera lini.” — 1 Juwau 5:3.a
Yahova angatikumbire lini cinthu comwe tingakwanise lini kucicita. Ndipopa, iye an’dzatithandiza kucita bzinthu bzomwe bzimbamukondwesa (Onani ndime 6)
7. Kodi maswaka yomwe yakuleredwa na abereki omwe ni Mboni za Yahova yan’funika kukumbukira ciyani?
7 Tsono tanimbo imwepo maswaka omwe mukuleredwa na abereki omwe ni Mboni za Yahova? Imwepombo ndimwe anyakupfunza wa Bibliya. Kulewa cadidi, imwepo ndimwe anyakupfunza wa Bibliya wakufunika kwene-kwene kwa abereki wanu. Bibliya limbalewa kuti: “Fendererani Mulungu ndipo iye an’dzakufendereranimbo.” (Tiyago 4:8; 1 Nkhani 28:9) Imwepo mukacita nyongo yakuyamba kufenderera Yahova, iye an’dzakufendereranimbo. Yahova ambandokufunani lini thangwe rakuti mudabadwira m’banja la Mboni za Yahova. Iye ambakufunani thangwe akufuna kuti mukhale xamwali wace. N’ciyani comwe iye adacita kuti imwepo mukhale pa uxamwali bwakulimba na iye? Iye adapereka Mwana wace. Lekani kuyebwa kuti imweyi ni mphaso ikulu yomwe Yahova adakupasani. (Aroma 5:1, 2) Ndipopa, pomwe mukanati kucita Cikumbuso ca gole lino, kumbukirani bzomwe Yahova na Jezu adakucitirani. Patsogolo pace, kumbukirani bzomwe mukufuna kucita pa moyo wanu na bzakulinga bza uzimu bzomwe mungabzikhazikise kuti mulatize kuti mumbatenda bzomwe Yahova adakucitirani.
AKRISTAU WAKUBATIZIDWA
8. Kodi Mkristau wakubatizidwa adalatiza kale tani kuti ambatenda cakulombolera?
8 Penu imwepo ndimwe Mkristau wakubatizidwa, mudalatiza kale kuti mumbatenda cakulombolera mu njira zizinji. Imwepo mudacinja bzinthu pa moyo wanu kuti mukondwese Yahova na kukhala xamwali wace. Imwepo mudabvera lamulo la Jezu lakupalizira mafala yabwino na kupfunzisa winango bza Yahova na Jezuyo. Imwepo mudabzipereka kwa Yahova mucibatizidwa. Pinango imwepo mudazunzidwa thangwe ra kusankhula kutumikira Yahova. (2 Timotio 3:12) Koma napo bziri tenepo, imwepo mudapirira mucipitiriza kutumikira mwakukhulupirika. Bzimwebzi bzikulatiza kuti imwepo mumbamufuna kwene-kwene Yahova ndipo mumbatenda cakulombolera. — Ahebereu 12:2, 3.
9. Kodi Mkristau wakubatizidwa an’funika kukhala tceru na ciyani?
9 Ninga Akristau wakubatizidwa, tin’funika kukhala tceru na cinthu cibodzi. Na kupita kwa nthawe, tingayambe kusiya kumbatenda cakulombolera. Kodi bzimwebzi bzingacitike tani? Kumbukirani bzomwe bzidacitikira Akristau wa ku Efezo. Jezu adawatenda thangwe ra kukhulupirika kwawo. Tsono iye adalewambo kuti: “Pana cinthu comwe ndiribe kukomedwa naco kwa iwepo, wasiya lufoyi lomwe ukhanalo pakuyamba.” (Apokalipse 2:3, 4) Mafala ya Jezuya yakulatiza kuti Mkristau angayambe kutumikira Mulungu thangwe rakuti wazolowera kucita bzimwebzo. Munthuyo angambapembe, kuyenda ku mitsonkhano na kupalizira. Tsono iye angambandocite bzimwebzo thangwe rakuti wazolowera kale kubzicita sikuti thangwe ra lufoyi. N’ciyani comwe mungacite mukawona kuti lufoyi lanu kwa Yahova ndakulimba lini pomwe ninga momwe bzikhaliri pakuyamba?
10. Kodi mungaphatise tani basa malango yomwe Paulo adauza Timotio? (1 Timotio 4:13, 15)
10 Mpostolo Paulo adauza Timotio kuti ‘ambakumbukire bwino-bwino’ bzomwe akucita pakutumikira Yahova na ‘kuikha makumbukidwe yace’ pa bzimwebzo. (Werengani 1 Timotio 4:13, 15.) Mwakubverana na malango yamweya, imwepo mungakumbukirembo bzomwe mungacite kuti mutumikire Yahova mu njira yomwe iye angakomedwe nayo bzomwe bzin’dzalatiza kuti mzimu wakucena ukuphata basa mwa imwepo. (Aroma 12:11) Pinango imwepo mungambapambule nthawe kuti mumbakonzekere mitsonkhano. Kucita bzimwebzi kun’dzakuthandizani kukhala tceru mukakhala muli pa mitsonkhano. Ayai pomwe mukupfunza Bibliya pinango mungambakhale pa mwekha kuti mukwanise kubvesesa bzomwe mukupfunzabzo. Bzimwebzi bzin’dzakuthandizani kugumana phindu pomwe mukucita pfunziro lanu la pamwekha. Ninga momwe imwepo mungafunikire kuikha nkhuni pa moto kuti motoyo upitirize kugaka, imwepo mun’funikirambo kucita bzinthu bzomwe bzin’kuthandizani kupitiriza kumbatenda cakulombolera na bzinthu bzentse bzomwe Yahova adakupasani. Pomwe zandosala sumana zing’ono-ng’ono kuti Cikumbuso cicitike, imwepo mungakumbukirembo bzinthu bzentse bzabwino bzomwe Yahova akucitira wanthu wace. Bzimwebzi bzin’dzakucitisani kuti mutende cakulombolera comwe cidacitisa kuti mukhale pa uxamwali na iye.
11-12. Mukasaya kulatiza nyongo yomwe mukhanayo pakuyamba, kodi bzin’funa kulewa kuti Yahova akukupasani lini pomwe mzimu wace? Fotokozani. (Onanimbo cithunzi-thunzi.)
11 Penu mukuwona ninga kuti mukutumikira lini Yahova mwa nyongo ninga momwe mukhacitira kale-kale, lekani kusunama ndipo lekanimbo kukumbuka kuti Yahova wasiya kukupasani mzimu wace wakucena. Kumbukirani bzomwe Paulo adanembera Akristau wa ku Kolinto pakulewa bza utumiki bwace. Iye adati: “Napo ndicicita bzimwebzi mwakukakamizika inepano ndinabo basi udindo bomwe Mulungu adandipasa bwakucita bzimwebzi.” (1 Akolinto 9:17) Kodi iye akhafuna kulewa ciyani na mafala yamweya?
12 Nthawe zinango, Paulo akhambabva utofu kupalizira. Napo bzikhali tenepo, iye akhapitiriza kupalizira napo kuti akhabva kuti akufuna lini kucita bzimwebzo. Imwepo mungacitembo bzibodzi-bodzibzi. Khalani wakutsimikiza kucita bzabwino napo penu mukufuna lini kucita bzimwebzo. Pembani kwa Yahova kuti akupaseni “mphanvu na cikhumbo kuti mucite bzomwe iye akufuna.” (Afilipi 2:13) Pitirizani kucita bzinthu bzomwe bzin’kuthandizani kukhala pa uxamwali na Yahova. Mukacita bzimwebzi, na kupita kwa nthawe lufoyi lanu kwa Yahova lin’dzakhala pomwe lakulimba.
Pitirizani kucita bzinthu bzomwe bzingakuthandizeni kukhala pa uxamwali na Yahova napo kuti nthawe zinango bzingakhale bzakunesa (Onani ndime 11-12)
13. Kodi tingapitirize tani “kubziyeza penu tikana cikhulupiro”?
13 Nthawe zinango mpsabwino kumbakumbukira momwe tikucitira bzinthu pa moyo wathu ninga momwe Paulo adalewera pa 2 Akolinto 13:5. Iye adati: “Pitirizani kubziyeza kuti muwone penu mukana cikhulupiro cakulimba. Pitirizani kubziyeza kuti muwone kuti ndimwe munthu wa mtundu wanyi.” Ifepano tingambabzicite mibvunzo ninga iyi: ‘Kodi ndikuikha Umambo bwa Mulungu pa mbuto yakuyamba pa moyo wangu?’ (Mateu 6:33) ‘Kodi masenzeka yomwe nimbacita yambalatiza kuti nimbawenga bzinthu bzakuipa?’ (Salimo 97:10) ‘Kodi bzomwe nimbalewa na kucita bzimbalatiza kuti ndikuthandiza gwere kuti lipitirize kukhala lakuphatana?’ (Aefezo 4:2, 3) Tin’funika kumbakumbukira bzimwebzi pa nthawe ya Cikumbuso. Tikambakumbukira bzomwe Yahova na Jezu adaticitira, tin’dzacita bzinthu kuti titende Yahova na kulatizambo kuti tikukhala na moyo mwakubverana na Kristu ninga momwe Paulo adalewera.b
WALE OMWE ADASIYA KUTSONKHANA NA GWERE
14. N’ciyani comwe cimbacitisa abale na mpfumakazi winango kusiya kutumikira Yahova?
14 Abale na mpfumakazi winango ambasiya kutsonkhana na gwere. Winango wa iwo ambacita bzimwebzo pambuyo pa kumala magole mazinji akutumikira Yahova mwakukhulupirika. Thangwe ranyi? Winango ambacita bzimwebzo thangwe ra “thupo la pa moyo.” (Luka 21:34) Winango ambacita bzimwebzo thangwe ra kukalipa na bzomwe m’bale ayai mpfumakazi adacita. (Tiyago 3:2) Ndipo winango ambacita bzimwebzo thangwe adacita pikado ikulu ayai cinthu cinango cakuphonyeka ndipo thangwe ra manyazi bzimbawanesa kukumbira thandizo. Penu cibodzi mwa bzinthu bzimwebzi cidakucitikirani ndipo mudatalikirana na gwere, n’ciyani comwe mungacite? Kodi ntsembe ya cakulombolera ingakucitiseni kucita ciyani?
15. Kodi Yahova ambalatiza tani kuti ambafuna mabira yomwe yadatalikirana naye? (Ezekiyeli 34:11, 12, 16)
15 Kumbukirani momwe Yahova ambawonera wanthu omwe adasiya kumutumikira. Iye alibe kuwalamba ayai kuwayebwa. Koma ambanyang’ana mabira yace yakutaika. Iye ambayadyesa na kuyathandiza kubwerera pomwe kwa iye. (Werengani Ezekiyeli 34:11, 12, 16.) Kodi Yahova akukucitiranimbo lini bzibodzi-bodzibzi? Inde, akucita! Kuwerenga kwanu nkhani ino kukulatiza kuti imwepo mukadafuna kucita bzinthu bzomwe iye ambakomedwa nabzo. Ninga momwe Yahova adawonera bzinthu bzabwino kwa imwepo pomwe adakuthandizani kumudziwa, iye akufuna kuti mubwerere pomwe m’gwere.
16. N’ciyani comwe cingathandize mabira yomwe yadataika kubwerera pomwe kwa Yahova? (Onanimbo cithunzi-thunzi.)
16 Mu broxura lakuti Bwererani kwa Yahova muna mafala yakulimbikisa. Mafalayo yambati: “Tsimikizirani kuti Yahova an’dzakhala namwe kuti akuthandizeni kubwerera kwa iye. Iye an’dzakuthandizani kulimbana na thupo, kumalisa mtima wakubzibva kukhala wakuphonyeka, na kugumana mtendere wa mu mtima, mucikhala na mtima omwe un’kuthandizani kukhala na cikumbu-mtima cakucena. Patsogolo pace imwepo mun’dzafunisisa kutumikira Yahova pabodzi na Akristau anzanu.” Kumbukiranimbo kuti akulu akufunisisa kukuthandizani. Iwo an’dzakhala ninga “mbuto yakuthawira conzi na mbuto yakubisalikira nvula ya mphanvu kwa imwepo.” (Zaiya 32:2) Kuti mulatize kuti mumbatenda cakulombolera, bzibvunzeni kuti: ‘N’ciyani comwe ningacite tsapano kuti ‘ndicezerane nkhani zangu’ na Yahova?’ (Zaiya 1:18; 1 Pedru 2:25) Imwepo mungacite nyongo yakuti mumbagumanike pa mitsonkhano ku Nyumba ya Umambo. Ndipo mungalewelewe na mkulu m’bodzi wa gwere mucimuuza kuti mukufuna kubwerera kwa Yahova. Mkuluyo angacite makonzedwe kuti mupfunze pomwe Bibliya pang’ono. Imwepo mukaipempherera nkhaniyo na kucita nyongo yakulatiza kuti mumbatenda cakulombolera comwe Jezu adapereka, Yahova an’dzakusimbani.
Bzibvunzeni kuti: ‘Kodi n’ciyani comwe ningacite kuti ‘ndicezerane nkhani zangu’ na Yahova?’ (Onani ndime 16)
N’CIYANI COMWE MUN’DZACITA?
17-18. Kodi tingaphatise tani bwino basa nthawe yathu pomwe Cikumbuso ca gole lino cikanati kucitika?
17 Jezu adalewa kuti Yahova adamutumiza kuti adzapereke moyo wace “kuti ali-wentse omwe [anim’khulupira] . . . aleke kudzaphedwa, koma adzakhale na moyo wakusaya kumala.” (Juwau 3:16) Pakuti Jezu adatifera, Yahova an’dzatitsudzula ku pikado na infa. Tsono tin’funika lini kusiya kumbatenda cakulombolera. (Aroma 3:23, 24; 2 Akolinto 6:1) Pomwe zasala ntsiku zing’ono-ng’ono kuti Cikumbuso cicitike, pambulani nthawe kuti mumbakumbukire bza lufoyi lomwe Yahova na Jezu adakulatizani. Bzimwebzi bzin’dzakucitisani kutenda lufoyi lomwe iwo adakulatizaniro.
18 Kodi imwepo mun’dzalatiza tani kuti mumbatenda cakulombolera? Bzomwe imwepo mungacite bzingandendemere lini na bzomwe winango angacite. Koma mungakhale na citsimikizo cakuti Yahova an’dzakusimbani mukacita nyongo yakutewezera wale omwe ambamutumikira, omwe ‘adaleka kukhala na moyo kuti ambacite bzakufuna bzawo bzokha basi, koma ambacite kufuna kwa ule omwe adawafera.’ — 2 Akolinto 5:15.
NYIMBO 14 Tumbizani Mambo Mupsa wa Dziko la Pansi
a Kuti mukwanise kuphatisa basa bzomwe mukupfunza m’Bibliya, phatisani basa kwadru yakuti “Citani ibzi” yomwe iri kuphampha kwa pfunziro liri-lentse m’bukhu lakuti Khalani na Moyo Wakukondwa Mpaka Kale-kale!.
b Kuti muwone momwe mungalimbisire uxamwali bwanu na Yahova, werengani nkhani yakuti “Maswaka — ‘Pitirizani Kukonza Cipulumuso Canu’” mu Ntsanza ya Mulindiri ya Dezembro 2017.