16-22 MARÇO, 2026
NYIMBO 20 Mudapereka Mwana Wanu Wakubadwa Yekha
Thangwe Ranyi Tikufunikira Cakulombolera?
“Mbani omwe angandipulumuse ku thupi lomwe likunditsogolera ku infa imweyi?” — AROMA 7:24.
CAKULINGA CA NKHANIYI
Ni kuwona momwe cakulombolera cimbathandizira pa kulekereredwa pikado zathu, kukhala na cidikhiro cakudzakhala wakulungama na kukhala pa uxamwali na Mulungu.
1-2. Thangwe ranyi tin’funikira munthu kuti atilombole? (Aroma 7:22-24) (Onanimbo cithunzi-thunzi.)
KUMBUKIRANI ciratizoci. Prediyo yagwa ndipo mkatimo muna munthu. Iye wabzinyidwa na matijolo ya prediyoyo. Iye ana moyo tsono angakwanise lini kucoka pa mbutopo yekha. Bzomwe iye angafunike kucita ni kukuwa acikumbira thandizo na kudikhirira munthu kuti adzamupulumuse.
2 Ali-wentse wa ifepano ali mu mkhalidwe umweyu. Mwa njira iponi? Pomwe Adamu alibe kubvera Mulengi wace, iye adakhala nyapikado. Pakuti ndife mbadwa za Adamu, ifepano tina pikadombo. Wanthu wentse adamangidwa na pikado ninga mwamuna omwe adabzinyidwa na matijolo ule. Ndipo ninga iye, tikufunikira munthu kuti atilombole. Mu tsamba lomwe mpostolo Paulo adanembera Aroma, adalewa kuti thangwe ra kuperewera kwathu, tentse ndife akapolo wa pikado. (Werengani Aroma 7:22-24.) Paulo akhadamangidwa na pikado yomwe ingadamucitisa kuti afe. (Aroma 6:23) Bzimwebzi ndibzo bzomwe bzimbaticitikirambo. Ifepanombo tikufunikirambo munthu kuti atipulumuse ku pikado na infa!
Ninga momwe munthu omwe wabzinyidwa na matijolo ya prediyo yomwe yagwa an’funikira kupulumusidwa, ifepanombo tidamangidwa na pikado ndipo tikufunikira kutsudzulidwa (Onani ndime 1-2)
3. Kodi cakulombolera cingatipulumuse tani?
3 Bzabwino mpsakuti pambuyo pakulewa bza mkhalidwe omwe iye akhali, Paulo adatipasa cidikhiro. Pambuyo pa kubvunza kuti: “Mbani omwe angandipulumuse ku thupi lomwe likunditsogolera ku infa imweyi?” Iye adatawira pomwe na citsimikizo centse kuti: “Ndikutenda Mulungu, thangwe ra kundipulumusa mwakuphatisa basa Jezu Kristu Mbuya wathu!” (Aroma 7:25) Paulo akhalewa bza ntsembe ya cakulombolera ya Jezu.a Thangwe ra cakulombolera (1) Yahova angalekerere pikado zathu, (2) tina cidikhiro ca kudzakhala wakulungama kutsogolo na (3) tingakhale pa uxamwali bwakulimba na Yahova. Pomwe tikucezerana nfundo zimwezi, tin’kwanisa kuwona momwe tingathumizirire lufoyi lathu kwa Yahova omwe ni “Mulungu omwe ambapereka cidikhiro.” (Aroma 15:13) Ndipo tin’dzapitirizambo kutenda Jezu omwe “thangwe ra iye, tatsudzulidwa mwakuphatisa basa cakulombolera.” — Akolose 1:14.
CAKULOMBOLERA CIMBACITISA KUTI TILEKEREREDWE PIKADO ZATHU
4-5. Thangwe ranyi tentsenefe tikufunikira cakulombolera? (Mpalizi 7:20)
4 Ifepano tikufunikira cakulombolera kuti tilekereredwe pikado zathu. Munthu ali-wentse wakuperewera ambaphonya m’mafala na m’bzicito. (Werengani Mpalizi 7:20.) Pikado zinango n’zikulu-zikulu. Lamulo la Mozeji likhalewa kuti Mjirayeri omwe angadacita upombo ayai uputa ayai kupha munthu, akhafunikira kuphedwa. (Levitiko 20:10; Numero 35:30, 31) N’cadidi kuti pikado zinango n’zikulu lini ninga zimwezi, tsono napo bziri tenepo ni pikado basi. Munembi wa Salimo, Davide, adalewa kuti: “Nin’dzanyang’anira njira yangu, kuti ndileke kuphonya na lirime langu.” (Salimo 39:1) Bzimwebzi bzikulatiza kuti napo bzinthu bzomwe timbalewa bzingakhale pikado. — Tiyago 3:2.
5 Kumbukirani bzinthu bzomwe mudalewa na kucita m’mbuyomu. Kodi nthawe inango imwepo mudalewa kale cinthu comwe mukhafuna lini kucilewa? Kodi imwepo mudacita kale cinthu comwe patsogolo pace mudakhumbula? Kulewa cadidi, imwepo mwatawira kuti inde pa mibvunzo miwiriyi. Bibliya limbalewa kuti: “Ifepano tikalewa kuti: ‘Tiribe pikado ife,’ tikubzinamiza tekha ndipo tiribe cadidi.” — 1 Juwau 1:8.
6-7. N’ciyani comwe cimbacitisa kuti Yahova alekerere pikado zathu? (Onanimbo cithunzi-thunzi.)
6 Cakulombolera cimbacitisa kuti Yahova alekerere pikado zathu. (Aefezo 1:7) Tsono bzimwebzi bzin’funa lini kulewa kuti Yahova alibe basa na pikado zathu. Kulewa cadidi, Yahova ambakomedwa lini tikacita pikado. (Zaiya 59:2) Thangwe ra cirungamo cace, iye akhafunika kucita cinthu comwe cingadamupasa mathangwe yakulekerera pikado zathu.
7 Lamulo la Mozeji likhalewa kuti Ajirayeri akhafunika kupereka ntsembe za bzifuwo kuti ampsinkhe pikado zawo. (Levitiko 4:27-31; 17:11) Ntsembe zimwezi zikhalatiza kuti wanthu akhafunikira ntsembe ikulu kwene-kwene. Ntsembe ya Jezu idabweresa bzisimbo bzizinji ndipo idacitisa kuti bzikhale bzakukwanisika kuti Yahova ambalekerere pikado zathu. Mafala yomwe Paulo adanembera Akristau wa ku Kolinto, yakulatiza kuti iye adabvesesa kufunika kwa ntsembe ya infa ya Jezu. Pambuyo pakulewa bzinthu bzomwe iwo adacita m’mbuyo, iye adati: “Mudasambisidwa; mudacenesedwa; ndipo mudawonedwa kukhala wakulungama m’dzina la Mbuya Jezu Kristu pabodzi na mzimu wa Mulungu wathu.” — 1 Akolinto 6:9-11.
Ntsembe za bzifuwo zomwe zikhaperekedwa kuti zimpsinkhe pikado zikhalatiza kuti tikhafunikira ntsembe ya Jezu kuti tilekereredwe pikado zathu na kutambi-rambo bzisimbo bzizinji (Onani ndime 6-7)
8. N’ciyani comwe imwepo mungambakumbukire pomwe mukukonzekera cikumbuso ca gole lino?
8 Pomwe mukukonzekera kuti mudzagumanike pa cikumbuso gole lino, mbapambulani nthawe kuti mumbakumbukire thandauzo la kulekerera kwa Yahova. Mwa ciratizo, thangwe ra cakulombolera, imwepo mun’funika lini kupitiriza kumbabzipasa mulandu thangwe ra pikado zomwe mudacita m’mbuyo zomwe mudakungula kale. Tsono tani penu bzimbakunesani kubvuma kuti mudalekereredwa pikado zanu zomwe mudacita m’mbuyo? Pinango imwepo mungalewe kuti, ‘Nin’dziwa kuti Yahova adandilekerera tsono nimbakwanisa lini kubzilekerera ndekha.’ Penu imwepo mumbabzibva tenepo, kumbukirani ibzi: Yahova ndiye omwe ambalekerera ndipo iye adapasa Mwana wace Jezu udindo bwa kumbatitonga. Yahova alibe kupasa imwepo ayai munthu munango ugo bwakusankhula kuti mbani angalekereredwe ayai angalekereredwe lini. Bibliya limbati: “Tikafamba pa ceza ninga momwe iye aliri pa ceza, tin’dzakhala wakuphatana ndipo mulopa wa Jezu, omwe ni Mwana wace, un’dzacenesa pikado zathu.” (1 Juwau 1:6, 7) Ifepano tingakhulupire bzimwebzi ninga momwe timbakhulupirira mapfunziso yanango ya m’Bibliya. Thangwe ra cakulombolera, Yahova ana mathangwe yakulekerera ndipo Bibliya limbalewa kuti iye ‘ngwakukonzeka kulekerera’ nthawe zentse. — Salimo 86:5.
CAKULOMBOLERA CIMBATIPASA CIDIKHIRO CAKUDZAKHALA WAKULUNGAMA
9. Kuthumizira pa bzinthu bzakuipa, kodi pikado imbathandauzambo ciyani? (Salimo 51:5)
9 M’Bibliya, fala lakuti “pikado” limbandothandauza lini bzinthu bzakuipa, koma limbathandauzambo kuperewera komwe timbabadwa nako. (Werengani Salimo 51:5.) Thangwe ra kuperewera kumweku, timbandokhala lini na makumbukidwe yakuipa na kucita bzinthu bzakuipa basi, koma thupi lathu limbaphata lini basa mwakubverana na momwe Yahova adalikonzera. Ndipopa timbaduwala, timbakalamba ticifa. Ndipo napo wana omwe abadwa tsapanopa omwe akanati kucita pikado angaduwale acifa. Ndipo timbakwanisambo kubvesesa kuti thangwe ranyi wanthu wabwino na wakuipa ambabonera acifa. Tentse omwe ndife mbadwa za Adamu tiri pa mkhalidwe umweyu.
10. Kodi Adamu na Eva adabzibva tani pambuyo pa kucita pikado?
10 Kumbukirani momwe Adamu na Eva adabvera pomwe adacita pikado acikhala wakuperewera. Pikado idawacitisa kuti akhale na makumbukidwe yakuipa. Pomwe Adamu na Eva adaphonya, iwo adayamba kubzibva kuipa thangwe ra kusaya kubvera lamulo la Yahova. (Aroma 2:15) Mwadzidzidzi, iwo adazindikira kuti pakhana cinthu cinango comwe cikhadaphonyeka. Iwo adazindikira kuti akhafunikira kubvala na kubisalikira Mulengi wawo ninga kuti akhali akapondo. (Genesesi 3:7, 8) Pamwepa ndipo pomwe Adamu na Eva adayamba kubzipasa mulandu, kucita manyazi na thupo. Ndipo kucokera ntsiku imweyi, iwo akhafunikira kulimbana na makumbukidwe yamweya mpaka kufa kwawo. — Genesesi 3:16-19.
11. Kodi timbabzibva tani thangwe ra kukhala wakuperewera?
11 Ninga momwe bzidakhalira na banja lakuyamba, kuperewera kwathu kumbaticitisa kuti tibzipase mulandu, ticite manyazi na thupo. Kuperewera ndiko komwe kumbacitisa kuti tibve kuwawa ticikhalambo na thupo. Napo kuti tingayezere kucita ciri-centse kuti moyo wathu ukhale wabwino ticitcenkha mabvuto, nthawe zentse tin’dzakhala na mabvuto yomwe tingakwanise lini kuyamalisa tekha. Thangwe ranyi? Thangwe Bibliya limbalewa kuti kuyambira pomwe Adamu na Eva adaphonya, wanthu nthawe zentse an’dzagumana na mabvuto. (Aroma 8:20) Bzimwebzi mpsacadidi kwa ifepano na kwa wanthu wentse. Mwa ciratizo, wanthu azinji ntsiku zino ambayezera kusamalira dziko la pantsi, kumalisa ciwembo, kuthandiza wanthu kukhala na bzomwe ambafunikira na kumalisa nkhondo. Koma napo bziri tenepo, iwo ambakwanisa lini kumalisa mabvuto yamweya. Tsono, cakulombolera cimbatipasa cidikhiro cacadidi. Kodi ni cidikhiro ciponi?
12. Kodi cakulombolera cimbatipasa cidikhiro ciponi?
12 Cakulombolera cimbatipasa cidikhiro cakuti ‘cirengedwe cin’dzatsudzulidwa ku ukapolo bwa pikado na infa.’ (Aroma 8:21) Bzimwebzi bzikuthandauza kuti tikadzakhala wakulungama m’paraizo, tin’dzaduwala lini pomwe ne kusunama. Tin’dzabzipasa lini pomwe mulandu ayai kucita thupo. Kuthumizira bzimwebzi, “Mtongi wa Mtendere” Jezu Kristu omwe adatilombola, ndiye omwe an’dzatonga. Iye an’dzathandiza wanthu kumalisa mabvuto yentse yomwe angakwanise lini kuyamalisa okha. — Zaiya 9:6, 7.
13. Kodi ni cinthu cinango ciponi comwe mungambakumbukire pomwe mukukonzekera cikumbuso ca gole lino?
13 Mbakumbukirani momwe moyo wanu un’dzakhalira mukadzakhala wakulungama. Ndokumbukirani kuti macibese yali-yentse mukumuka na thanzi labwino, ndipo mukucita lini pomwe thupo kuti imwepo ayai wanthu omwe mumbawafuna angabonere thangwe ra njala, angaduwale ayai kufa. Ndipo napo tsapano, imwepo mungagumane mtendere mwa ‘kuphatisisa mwamphanvu cidikhiroci . . . ninga ndangula ya moyo wanu, comwe n’cakutsimikizika na cakulimba.’ (Ahebereu 6:18, 19) Kukumbukira bza cidikhiro cimweci kungalimbise cikhulupiro canu na kukuthandizani kulimbana na bvuto liri-lentse. Imwepo mungakhale na citsimikizo centse cakuti Yahova “ambabaira wanthu omwe ambamulinga na mtima wentse.” (Ahebereu 11:6) Mtsangalazo omwe mumbatambira pabodzi na cidikhiro comwe munaco, bzimbakwanisika thangwe ra cakulombolera.
CAKULOMBOLERA CIMBACITISA KUTI TIKHALE POMWE PA UXAMWALI NA YAHOVA
14. Pomwe Adamu na Eva adaphonya, n’ciyani comwe cidacitika na uxamwali bwathu na Yahova, ndipo thangwe ranyi?
14 Kuyambira pomwe Adamu na Eva adaphonya, mbverano pakati pa wanthu na Mulungu udadzongeka. Napo Bibliya, limbalewa kuti tentsenefe tikhali kutali na Mulungu. (Aroma 8:7, 8; Akolose 1:21) Tsono thangwe ranyi? Thangwe malamulo ya Yahova njakulungama. Ndipopa mpsakukwanisika lini kuti iye andoisiye tenepo pikado. Pakulewa bza Yahova, Bibliya limbalewa kuti: “Maso yanu njakucena kwene-kwene ndipo yan’themera lini kuwona bzakuipa. Ndipo mumbakwanisa lini kulekerera bzakuipa kucitika.” (Habakuki 1:13) Pikado idacitisa kuti uxamwali bomwe bukhalipo pakati pa Mulungu na wanthu budzongeke. Palibe ali-wentse wa ifepano omwe angakhale pomwe pa uxamwali na Yahova bzikakhala kuti palibe cinthu comwe cingacitise kuti tikhale pomwe pa uxamwali na iye. Cakulombolera ndico comwe cimbacitisa kuti bzikwanisike.
15. Kodi infa ya Jezu idacitisa tani kuti Yahova akhale pomwe pa uxamwali na wanthu?
15 Bibliya limbalewa kuti Jezu “ni ntsembe yakumpsinkha pikado zathu.” (1 Juwau 2:2) Kodi Ntsembe ya Jezu idacitisa tani kuti wanthu akhale pomwe pa uxamwali na Yahova? Infa ya Jezu idacitisa kuti wanthu akhale pomwe wakufendererana na Mulungu wakulungama. (Aroma 3:23-26) Iye angadawona wanthu omwe akhamutumikira mwakukhulupirika ninga wakulungama napo pomwe Jezu akhanati kubwera. (Genesesi 15:1, 6) Kodi bzimwebzi bzingadakwanisika tani? Bzingadakwanisika thangwe Yahova akhana citsimikizo centse cakuti Mwana wace Jezu angadapereka cakulombolera. (Zaiya 46:10) Cakulombolera cidacitisa kuti wanthu akhale pomwe pa uxamwali na Mulungu.
16. Kodi ni bzinthu bzinango bziponi bzomwe mungakumbukire pomwe mukukonzekera cikumbuso ca gole lino? (Onanimbo cithunzi-thunzi.)
16 Mbakumbukirani momwe moyo wanu uliri wabwino tsapano thangwe ra kukhala pa uxamwali na Yahova. Pinango imwepo mungambacemere Yahova kuti “Baba,” ninga momwe Jezu adapfunzisira. (Mateu 6:9) Ndipo nthawe zinango imwepo mungambacemere Yahova kuti “Xamwali.” Tsono pomwe tikucemera Yahova kuti “Baba” ayai “Xamwali,” tin’funika kucita bzimwebzo na ulemu bukulu kwene-kwene. Thangwe ranyi? Thangwe ndife wakuperewera. Ndipopa napo ticibzibva kuti tiri pa uxamwali bwakulimba na Yahova, ifepano timbathemera lini bzimwebzo. Cakulombolera ndico comwe cimbacitisa kuti tikhale pa uxamwali na Yahova. Mwakuphatisa basa Jezu, Yahova adacitisa kuti bzinthu bzentse “bzikhale pomwe bzakuphatana na Mulungu, pacikhazikisidwa mtendere kucokera pa mulopa wa [Jezu] omwe udayerera pa muti wakuzunzidwira.” (Akolose 1:19, 20) Ndipopa tingakhale pa uxamwali na Yahova napo kuti ndife wakuperewera.
Ni cakulombolera ca Jezu cokha comwe cidacitisa kuti Yahova na wanthu akhale pomwe pa uxamwali (Onani ndime 16)
CAKULOMBOLERA CIMBALATIZA KUTI YAHOVA NGWA NTSISI
17. Kodi cakulombolera cimbalatiza tani kuti Yahova ngwa ntsisi? (Aefezo 2:4, 5)
17 Cakulombolera cimbalatiza kuti Yahova “ngwantsisi kwene-kwene.” Iye “adatipasa moyo . . . napo pomwe tikhadafa thangwe ra bzakuphonya bzathu.” (Werengani Aefezo 2:4, 5.) Ninga munthu omwe wagweredwa na matijolo ya prediyo ule, wanthu wakubzicepesa ambazindikira kuti adamangidwa na pikado ndipo akufunikira kutsudzulidwa. Ndipopa iwo akukumbira thandizo. (Mabasa 13:48) Yahova ambathandiza wanthu amwewa mwakuphatisa basa mafala yabwino ya Umambo, mwakucitisa kuti amudziwe na kudziwambo Mwanace, Jezu. (Juwau 17:3) Penu Sathani akhakumbuka kuti kuphonya komwe Adamu na Eva adacita kungadacitisa kuti Yahova aleke kukwanirisa cakulinga cace akhabzinamiza.
18. Pomwe tikukumbukira bza cakulombolera, kodi tin’funika kukumbukirambo bza ciyani?
18 Pomwe tikukumbukira bza phindu lomwe timbakhala nalo thangwe ra cakulombolera, tin’funikambo kukumbukira thangwe lomwe lidacitisa Yahova kupereka cakulomboleraco. M’mbuto mwa kumbandokumbukira kuti Yahova adapereka cakulombolera kuti citipulumuse, tin’funikambo kukumbukira kuti iye ambaphatisa basa cakulomboleraco kuti atawire magunkha yomwe Sathani adayalewa mu zunde la Edeni. (Genesesi 3:1-5, 15) Yahova adaphatisambo basa cakulombolera kuti acenese dzina lace ku bzinthu bzakuipa bzomwe Sathani adalewa pakulewa bza iye. Pakuti cakulombolera cimbatitsudzula ku pikado na infa, imweyi ni njira ibodzi yomwe Yahova ambalatizira kuti ni Mulungu wa lufoyi. Ndipo thangwe ra kudeka mtima kwace kukulu, Yahova ambalekerera kuti tilatize kuti magunkha yomwe Sathani adalewa pakulewa bza iye njacadidi lini napo kuti ndife wakuperewera. (Mimwani 27:11) Tsono kodi imwepo mungalatize tani kuti mumbatenda cakulombolera? Tin’dzatawira mbvunzo umweyu mu nkhani yomwe ikubwerayi.
NYIMBO 19 Ciraliro ca Mbuya
a KAFOTOKOZEDWE KA MAFALA YANANGO: Cakulombolera ni pereso yomwe imbaperekedwa kuti munthu omwe ali m’kawoko atsudzulidwe. Ntsembe ya infa ya Jezu ni cakulombolera thangwe imbatsudzula wanthu wentse omwe ambabvera Mulungu ku pikado na infa.