NKHANI YAKUPFUNZA 42
NYIMBO 44 Mpembo wa Munthu Wakutsautsika
Bzomwe Mungacite Kuti Mumbapembe kwa Yahova na Mtima Wentse
“ Ndikukucemerani na mtima wangu wentse. Nditawireni, Imwe Yahova.” — SALIMO 119:145.
CAKULINGA CA NKHANIYI
Mu nkhani ino, tiniwona momwe mipembo ya atumiki wa Yahova yomwe idanembedwa m’Bibliya ingatithandizire kuti timbapembe na mtima wentse.
1-2. (a) Thangwe ranyi bzingakhale bzakunesa kupemba kwa Yahova na mtima wentse? (b) Kodi timbadziwa tani kuti Yahova ambatetekera mipembo yathu mwatceru?
KODI imwepo mumbawona kuti mumbabwerezera mipembo yanu ayai kuti bzimbakunesani kufotokozera Yahova bza mu mtima mwanu? Penu ndibzo, imwepo muli lini mwekha. Thangwe ra bzinthu bzomwe timbacita ntsiku na ntsiku, pinango tingambapembe mwakuthamanga-thamanga. Ayai pinango bzingakhale bzakunesa kufotokozera Yahova momwe tikubvera thangwe ra kukumbuka kuti ndife lini wakuthemera kulewalewa naye.
2 Bibliya limbatipfunzisa kuti cakufunika kwene-kwene kwa Yahova ni kuphatisa lini basa mafala yabwino pomwe tikupemba, koma ni kupemba kwa iye na mtima wentse. Iye ambabva “kukumbira kwa anyakulungama.” (Salimo 10:17) Iye ambakhala tceru kuti atetekere bzentse bzomwe timbalewa thangwe ndife wakufunika kwene-kwene kwa iye. — Salimo 139:1-3.
3. Kodi tiniwona ciyani mu nkhani ino?
3 Mu nkhani ino, tiniwona mitawiro ya mibvunzo iyi: Thangwe ranyi tingapembe kwa Yahova mwakusaya mantha? Kodi tingapembe tani na mtima wentse? Kodi mipembo yomwe idanembedwa m’Bibliya ingatithandize tani kucita bzimwebzo? N’ciyani comwe tingacite tikakhala na thupo ticitazira kufotokozera Yahova momwe tikubvera?
MBAPEMBANI KWA YAHOVA MWAKUSAYA MANTHA
4. N’ciyani comwe cingatithandize kupemba kwa Yahova mwakusaya mantha? (Salimo 119:145)
4 Yahova ni xamwali wakukhulupirika omwe ambafuna kuti bzinthu bzitifambire bwino. Kubvesesa bzimwebzi kumbatithandiza kukhala wakutsudzuka kumufotokozera bzomwe tikukumbuka na momwe tikubvera. Munembi wa Salimo 119 adayezera kuwona Yahova mwa njira imweyi pomwe adapemba kwa iye. Iye akhagumana na mabvuto pa moyo wace. Wanthu winango adalewa bzinthu bzakunama pakulewa bza iye. (Salimo 119:23, 69, 78) Kuthumizira bzimwebzi, munembi wa Salimoyi, nthawe zinango akhasunamambo thangwe ra bzakuphonya bzace. (Salimo 119:5) Napo bziri tenepo, iye alibe kucita mantha kupemba kwa Yahova na mtima wentse. — Werengani Salimo 119:145.
5. Thangwe ranyi tin’funika lini kulekerera kuti makumbukidwe yakuphonyeka yatitazise kupemba? Fotokozani.
5 Yahova akufuna kuti napo wale omwe adacita pikado zikulu-zikulu ambapembe kwa iye. (Zaiya 55:6, 7) Ndipopa tin’funika lini kulekerera kuti makumbukidwe yakuphonyeka yatitazise kupemba. Kumbukirani bza ciratizoci. Nyakufambisa ndeke nthawe zentse ambadziwa kuti angakumbire thandizo kwa anyakunyang’anira ndekeyo. Kodi iye an’funika kuzeza kukumbira thandizo ayai kucita manyazi thangwe rakuti wataika ayai waphonyesa cinthu cinango? Bzikuwonekeratu kuti ne! Mwa njira ibodzi-bodziyi, tikasaya bzakucita ayai kuphonyesa cinthu cinango tin’funika lini kucita mantha kumufotokozera Yahova bza mu mtima mwathu. — Salimo 119:25, 176.
BZOMWE BZINGATITHANDIZE KUPEMBA KWA YAHOVA NA MTIMA WENTSE
6-7. Kodi kukumbukira makhalidwe ya Yahova kungatithandize tani kumbapemba na mtima wentse? Fotokozani. (Onanimbo mafala ya m’nyantsi.)
6 Tikambapemba kwa Yahova na mtima wentse ticimuuza bzomwe tikukumbuka na momwe tikubvera, timbafendererana naye kwene-kwene. Tsono n’ciyani comwe cingatithandize kupemba na mtima wentse?
7 Mbakumbukirani makhalidwe ya Yahova.a Tikambamala nthawe tikukumbukira bza makhalidwe ya Yahova, bzimbakhala bzakupusa kumufotokozera bzentse bzomwe tikukumbuka na momwe tikubvera. (Salimo 145:8, 9, 18) Mbatiwoneni bzomwe bzidacitikira mpfumakazi Kristine, yomwe pai wace akhali waciwembo. Iyo idati: “Kwa ine bzikhali bzakunesa kuwona Yahova ninga Baba omwe ningambatsudzuke naye. Inepano ndikhambakumbuka kuti thangwe ra bzakuphonya bzangu iye angadandisiya.” Kodi ni khalidwe liponi la Yahova lomwe lidathandiza mpfumakazi Kristine? Iyo idati: “Lufoyi lacadidi la Yahova limbandipasa citsimikizo cakuti iye ambandifuna. Inepano ndikudziwa kuti iye nthawe zentse an’dzandithandiza. Napo ndiciphonyesa bzinthu bzinango iye ambandifuna na kundithandiza. Kudziwa bzimwebzi kumbandithandiza kuti ndikwanise kumufotokozera bzinthu bzomwe bzimbandicitisa kuti ndikhale wakukondwa na bzomwe bzimbandicitisa kuti ndisuname.”
8-9. Thangwe ranyi mpsabwino kuyamba takumbukira bzomwe tin’lewa pomwe tikanati kupemba? Fotokozani.
8 Kumbukirani bzomwe munilewa. Pomwe mukanati kupemba, imwepo mungabzibvunze kuti: ‘Kodi ni mabvuto yaponi yomwe ndikugumana nayo tsapano? Kodi alipo munthu omwe ndikufunikira kumulekerera? Kodi pana cinthu comwe cacinja pa moyo wangu comwe ningafunikire thandizo la Yahova?’ (2 Amambo 19:15-19) Kumbukiranimbo bzomwe Jezu adatipfunzisa pakulewa bza momwe tingapempherere, mwa kukumbukira bzomwe mungalewe mu mpembo pakulewa bza dzina la Yahova, kufuna kwace na Umambo bwace. — Mateu 6:9, 10.
9 Mpfumakazi inango yakucemeredwa Aliska idazindikira kuti bayace akhana kankro ya mu ulupi yomwe ingadacitisa kuti aleke kukhala na moyo kwa ntsiku zizinji. Pakuyamba bzidamunesa kupemba kwa Yahova. Iyo idati: “Ndikhana thupo kwene-kwene mwakuti bzidandinesa kukumbukira bwino-bwino bzomwe ningadalewa mu mpembo.” Kodi n’ciyani comwe cidathandiza mpfumakazi Aliska? Iyo idati: “Pomwe ndikanati kupemba nimbayamba kukumbukira bzomwe nin’muuza Yahova kuti ndileke kulewa bza inepano ndekha na bza matenda ya mwamuna wangu. Bzimwebzi bzimbandithandiza kukhala wakugwa mpfuwa na kupempherera bzinthu bzakusiyana-siyana.”
10. Thangwe ranyi mpsabwino kupemba mwakusaya kuthamanga? (Onanimbo bzithunzi-thunzi.)
10 Lekani kumbapemba mwakuthamanga. N’cadidi kuti mipembo mifupi ingatithandize kukhala pa uxamwali na Yahova, tsono tikambapambula nthawe kuti timbacite mipembo mitali bzin’dzatithandiza kumufotokozera Yahova momwe tikubvera na bzomwe tikukumbuka.b Elijah, mwamuna wace wa Aliska, adalewa kuti: “Inepano nimbayezera kupemba kazinji kentse pa ntsiku, tsono nimbabzibva kukhala wakufendererana kwene-kwene na Yahova ndikambapambula nthawe kuti nimbacite mipembo mitali. Yahova ambafuna lini kuti ndipembe mwakuthamanga-thamanga na cakulinga cakuti ndimale kamangu. Ndipopa inepano ndikudziwa kuti ningamufotokozere bzentse bzomwe ndikufuna.” Yezerani kucita ibzi: Khazikisani nthawe ndipo nyang’anani mbuto yomwe imwepo mungambapembe mwakusaya kusokonezedwa. Nthawe zinango, mungambapembe mwakucita kukuwa ndipo khalani na cizolowezi cakumbapemba mwakusaya kuthamanga.
Khazikisani nthawe ndipo nyang’anani mbuto yabwino kuti mumbapembe mwakusaya kuthamanga (Onani ndime 10)
MBAKUMBUKIRANI MIPEMBO YOMWE IDANEMBEDWA M’BIBLIYA
11. Thangwe ranyi mpsabwino kukumbukira mipembo yomwe imbagumanika m’Bibliya? (Onanimbo kwadru yakuti “Kodi Imwepo Mumbabzibva Ninga Iwo?”)
11 Cinthu comwe cingatithandize ndico kukumbukira mipembo, nyimbo na masalimo yomwe yambagumanika m’Bibliya. Kuwona momwe atumiki wa Mulungu adafotokozera momwe iwo akhabvera kun’dzakucitisanimbo kuti mumbapembe kwa Yahova na mtima wentse. Kuwona mafala yomwe iwo adayaphatisa basa pakutumbiza Yahova kungakuthandizeni kugumana mafala yanango yomwe mungayaphatise basa mu mpembo. Ndipo pinango imwepo mungagumane mipembo ya atumiki wa Yahova omwe adagumanambo na bzinthu bzibodzi-bodzi na bzomwe imwepo mukugumana nabzo.
12. Kodi ni mibvunzo iponi yomwe tin’funika kubzicita pomwe tikukumbukira mipembo yomwe imbagumanika m’Bibliya?
12 Pomwe mukukumbukira mipembo yomwe idanembedwa m’Bibliya, bzibvunzeni kuti: ‘Mbani omwe adacita mpembo umweyu, ndipo n’ciyani comwe cikhamucitikira pa moyo wace? Kodi bzomwe munthuyu adalewabzi, bzikundendemerana na bzomwe bzikundicitikira? N’ciyani comwe ningapfunze na mpembo umweyu?’ Pinango imwepo mungafunikire kufufudza kuti mugumane mitawiro ya mibvunzo imweyi. Tsono kucita bzimwebzo kun’dzakucitisani kuti mugumane phindu. Mbatiwoneni bziratizo bzinango.
13. N’ciyani comwe tingapfunze na mpembo wa Ana? (1 Samuyeli 1:10, 11) (Onanimbo cithunzi-thunzi.)
13 Werengani 1 Samuyeli 1:10, 11. Pomwe Ana adacita mpembo umweyu, iye akhagumana na mabvuto mawiri makulu-makulu. Iye akhabereka lini ndipo mkhaziba wace akhamuboneresa. (1 Samuyeli 1:4-7) Tsono Ana adapemba mwakusaya kuthamanga ndipo adafotokozera Yahova bzentse bzomwe akhagumana nabzo. Ndipo bzimwebzi bzidamucitisa kuti abzibve bwino. (1 Samuyeli 1:12, 18) Penu imwepo mukugumanambo na bvuto lomwe likukutazisani kukhala wakukondwa, n’ciyani comwe mungapfunze na mpembo wa Ana? ‘Tikambapereka thupo lathu kwa Yahova’ mwa kumufotokozera mabvuto yentse yomwe tikugumana nayo na momwe tikubvera, ifepano timbabzibvambo bwino. — Salimo 55:22.
Ana akhabereka lini ndipo mkhaziba wace akhambamuboneresa, ndipopa iye adapemba kwa Yahova na mtima wentse (Onani ndime 13)
14. (a) N’cinthu cinango ciponi comwe tingapfunze na ciratizo ca Ana? (b) N’ciyani comwe cikulatiza kuti kukumbukira nkhani za m’Bibliya kungacitise kuti mipembo yathu ikhale yabwino? (Onani mafala ya m’nyantsi.)
14 Ana adadzakhala na mwana wakucemeredwa Samuyeli. Pomwe padapita magole pambuyo pa kubereka mwanayo, iye adayenda kukamupereka kwa Mkulu wa Antsembe Eli. (1 Samuyeli 1:24-28) Pomwe akhapemba na mtima wentse, iye adatenda Yahova thangwe ra kukhotcerera atumiki wace wakukhulupirika na kupitiriza kuwasamalira.c (1 Samuyeli 2:1, 8, 9) Mabvuto ya Ana yakhalibe kumala, tsono iye akhambakumbukira bzisimbo bzomwe Yahova akhadamupasa. Kodi tikupfunza ciyani? Kuti tikwanise kupirira pomwe tikugumana na mabvuto tin’funika kukumbukira bzomwe Yahova adaticitira kale na bzomwe akupitiriza kucita kuti atithandize.
15. N’ciyani comwe tingapfunze na mpembo wa mprofeta Jeremiya? (Jeremiya 12:1)
15 Werengani Jeremiya 12:1. Pa nthawe inango pa moyo wace, mprofeta Jeremiya adasunama pomwe adawona wanthu azinji wakuipa akhawoneka ninga kuti akhana moyo wabwino na wakukondwa. Iye adasunamambo kwene-kwene thangwe ra kuboneresedwa na abale wace Ajirayeri. (Jeremiya 20:7, 8) M’mbuto mwa kulewa kuti Mulungu ngwakusaya cirungamo, iye adamufotokozera bza mabvuto yace yentse. Na kupita kwa nthawe, Jeremiya adawona momwe Yahova adalangira Ajirayeri wakupanduka. Kulewa cadidi, bzimwebzi bzidacitisa kuti Jeremiya athumizire cikhulupiro cace cakuti Yahova ni Mulungu wacirungamo. (Jeremiya 32:19) Ifepanombo tikambawona wanthu wakuipa bzinthu bzikuwafambira bwino ayai akatinyoza tingabzibvembo ninga momwe Jeremiya adabvera. Tsono ninga iye, ifepano tingafotokozerembo Yahova mwakutsudzuka bza mabvuto yathu na cikhulupiro cakuti pa nthawe yace Yahova an’dzamalisa kusaya cirungamo kwentse komwe kumbacitika pakati pathu.
16. N’ciyani comwe tingapfunze na mpembo wa Mlevi omwe akhakwanisa lini kuyenda kukanamata ku templo? (Salimo 42:1-4) (Onanimbo bzithunzi-thunzi.)
16 Werengani Salimo 42:1-4. Salimo limweri lidanembedwa na Mlevi munango omwe akhakwanisa lini kuyenda mu templo kuti akanamate pabodzi na Ajirayeri winango. Mafala yomwe iye adanemba yakulatiziratu momwe iye akhabvera. Bzikakhala kuti tiri m’kawoko thangwe ra cikhulupiro cathu ayai tikakhala tikuduwala matenda yomwe yakutitazisa kucoka pa mui, pinango tingabzibvembo ninga Mleviyo. Nthawe zinango, tingabzibve bwino ndipo nthawe zinango tingasuname kwene-kwene. Tsono bziribe basa momwe tingabvere, tin’funika kumufotokozera Yahova momwe tikubvera. Bzimwebzi bzin’dzatithandiza kubvesesa bwino makumbukidwe yathu ndipo bzin’dzatithandizambo kuwona bzomwe bzikuticitikirabzo mu njira yakusiyana. Mwa ciratizo, Mleviyo adadzazindikira kuti angadadzakhala na mipata minango kuti atumbize Yahova. (Salimo 42:5) Iye adapambulambo nthawe kuti akumbukire momwe Yahova akhamuthandizira. (Salimo 42:8) Kupemba na mtima wentse kwa Yahova kungatithandize kubvesesa bwino makumbukidwe yathu, kukhala wakugwa mpfuwa na kukhala wa mphamvu kuti tikwanise kupirira.
Mlevi omwe adanemba Salimo 42 adadandaulira Yahova na mtima wentse. Tikambamufotokozera Yahova momwe tikubvera tingakwanise kuwona bzomwe bzikuticitikirabzo mu njira inango (Onani ndime 16)
17. (a) Kodi tingapfunze ciyani na mpembo wa mprofeta Djona? (Djona 2:1, 2) (b) Kodi mavesi manango yomwe yambagumanika mu bukhu la Salimo yangatithandize tani pomwe tikugumana na mabvuto? (Onani mafala ya m’nyantsi.)
17 Werengani Djona 2:1, 2. Mprofeta Djona adacita mpembo umweyu pomwe akhali m’mimba mwa cintsomba. Napo kuti iye akhalibe kubvera Yahova, Djona akhana citsimikizo cakuti Yahovayo angadamutawira. Mu mpembo wace, Djona adaphatisa basa mafala mazinji yomwe yambagumanika mu bukhu la Salimo.d Bzimwebzi bzikulatiza kuti iye akhayadziwa bwino mavesi yamweya. Kukumbukira mavesi yamweya kudamutsimikizira kuti Yahova angadamuthandiza. Mwakundendemerana na bzimwebzi, tikambakoya mavesi manango ya m’Bibliya tingadzayakumbukire yacititsangalaza pomwe tikupemba kwa Yahova pa nthawe zakunesa.
PITIRIZANI KUPEMBA KWA YAHOVA KUTI MUKHALE WAKUFENDERERANA NAYE
18-19. Nthawe zinango tikasaya kudziwa bzomwe tingamuuze Yahova mu mpembo, kodi Aroma 8:26, 27 ambatipasa citsimikizo ciponi? Fotokozani.
18 Werengani Aroma 8:26, 27. Nthawe zinango tingakhale na thupo kwene-kwene mwakuti tingakwanise lini kumufotokozera Yahova momwe tikubvera. Tsono pana cinthu cikulu comwe cingatithandize. Pa nthawe ninga zimwezi, mzimu wakucena wa Mulungu “umbatidandaulira.” Kodi bzimwebzi bzimbacitika tani? Yahova adaphatisa basa mzimu wace wakucena kuti atsogolere anembi wa Bibliya kuti anembe mipembo yakusiyana-siyana. Tikatazira kufotokoza bwino-bwino makumbukidwe yathu, Yahova angawone mbali inango ya mipembo yomwe idanembedwa m’Bibliya ninga yathu. Ndipo iye angatawire mipembo imweyi.
19 Kudziwa bzimwebzi kudathandiza mpfumakazi inango ya ku Rússia yakucemeredwa Yelena. Iyo idaikhidwa m’kawoko thangwe ra kupemba na kuwerenga Bibliya. Mpfumakazi Yelena idasunama kwene-kwene mwakuti ikhakwanisa lini kupemba. Iyo idati: “Inepano ndidakumbukira kuti ndikakhala ndidasunama ndipo ndikudziwa lini bzomwe ningakumbire mu mpembo, Yahova angatawire mipembo ya atumiki wace wakale . . . ninga kuti ni yangu. . . . Bzimwebzi bzidanditsangalaza kwene-kwene pa nthawe yakunesayi.”
20. Tikakhala tikucita thupo, kodi tingakonzekerese tani makumbukidwe yathu pomwe tikufuna kupemba?
20 Pomwe tina thupo tingayambe kupemba pa nthawe ibodzi-bodziyi ticimbakumbukira bzinthu bzinango. N’ciyani comwe cingatithandize? Tingayambe kutetekera maaudiyo ya Masalimo pomwe tikanati kupemba. Ndipo tingayezerembo kunemba momwe tikubvera ninga momwe, Mambo Davide adacitira. (Salimo 18, 34, 142; mafala yomwe yali padzaulu pa kapituloyi.) Kulewa cadidi, palibe malango yomwe yambacita kufotokoza momwe tingakonzekerere kuti ticite mpembo. (Salimo 141:2) Na tenepo, citani bzomwe bzingakuthandizeni.
21. Thangwe ranyi tingapembe kwa Yahova na mtima wentse?
21 Mpsakutsangalaza kwene-kwene kudziwa kuti Yahova ambabvesesa momwe tikubvera napo pomwe tikanati kumuuza cinthu ciri-centse. (Salimo 139:4) Tsono iye akufuna kuti timufotokozere momwe tikubvera na kulatiza kuti timbamuthemba. Na tenepo, lekani kumbacita mantha kupemba kwa Baba wanu wa kudzulu. Mbaphatisani basa mafala yomwe yambagumanika m’mipembo yomwe iri m’Bibliya. Mbapembani na mtima wanu wentse. Mbafotokozerani Yahova bzinthu bzomwe bzimbakukondwesani na bzomwe bzimbakusunamisani. Pakuti Yahova ni xamwali wanu, iye nthawe zentse an’dzakuthandizani!
NYIMBO 45 Bzakukumbuka bza Mtima Wangu
a Onani “makhalidwe yanango ya Yahova” yomwe yambafotokozedwa mu bukhu lakuti Malemba Othandiza pa Moyo wa Chikhristu pa kamsolo kakuti “Yehova.”
b Kazinji-kazinji mipembo yomwe imbacitidwa m’gwere nja cigwatho.
c Mu mpembo wace, Ana adaphatisa basa mafala yakundendemerana na yomwe Mozeji akhadanemba. Bzikuwonekeratu padeca kuti iye adapambula nthawe kuti akumbukire Bzinembo. (Deuteronomiyo 4:35; 8:18; 32:4, 39; 1 Samuyeli 2:2, 6, 7) Patsogolo pace, Mariya mai wace wa Jezu, adaphatisambo basa mafala mabodzi-bodzi ninga Ana. — Luka 1:46-55.
d Mwa ciratizo ndendemezerani Djona 2:3-9 na Salimo 69:1; 16:10; 30:3; 142:2, 3; 143:4, 5; 18:6; na 3:8, momwe mavesiya yadalinganizidwira yakubverana na bzomwe Djona adalewa mu mpembo.