NKHANI YAKUPFUNZA 43
NYIMBO 41 Mulungu, Bvani Mpembo Wangu
Mbapemphererani Winango Nthawe Zentse
“ [Mbapemphereranani] . . . mpembo wakudandaulira wa munthu wakulungama una mphanvu kwene-kwene.” — TIYAGO 5:16.
CAKULINGA CA NKHANIYI
Mu nkhani ino, tiniwona kuti thangwe ranyi mpsakufunika kumbapempherera winango na bzinthu bzomwe bzingatithandize kucita bzimwebzo.
1. Kodi timbadziwa tani kuti mipembo yathu njakufunika kwa Yahova?
MPEMBO ni mphaso yabwino kwene-kwene. Kumbukirani ibzi: Yahova adapasa anjo mabasa manango. (Salimo 91:11) Ndipo iye adapasambo Mwana wace udindo bukulu kwene-kwene. (Mateu 28:18) Tsono kodi iye adaikha munthu kuti ambatetekere mipembo? Ne, Yahova caiyeyo ndiye omwe ambatetekera mipembo yathu. Iye ni “Mbveseri wa mpembo.” — Salimo 65:2.
2. Thangwe ranyi Paulo ni ciratizo cabwino pa nkhani yakupempherera winango?
2 Napo kuti tingakhale wakutsudzuka kufenderera Yahova ticimufotokozera bza mabvuto yathu, tin’funikambo kumbapempherera winango. Bzimwebzi ndibzo bzomwe mpostolo Paulo adacita. Iye adanembera gwere la ku Efezo kuti: “Ndikupitiriza kukugumani m’mipembo yangu.” (Aefezo 1:16) Paulo akhambapemphererambo wanthu mwakucita kuwaguma madzina yawo. Iye adauza Timotiyo kuti: “Nimbatenda Mulungu . . . ndipo nimbaleka lini kukumbukira bza iwepo m’mipembo yangu yakucita kudandaulira usiku na masikati.” (2 Timotio 1:3) Paulo akhagumanambo na mabvuto ndipo akhafunikira kupemba bza mabvuto yaceyo. (2 Akolinto 11:23; 12:7, 8) Napo bziri tenepo, iye akhambapambula nthawe kuti apempherere winango.
3. Thangwe ranyi tingayebwe kupempherera winango?
3 Nthawe zinango, tingayebwe kupempherera winango. Thangwe ranyi bzimwebzi bzimbacitika? Mpfumakazi inango yakucemeredwa Sabrinaa idafotokoza thangwe libodzi. Iyo idati: “Moyo wa ntsiku zino umbaticitisa kukhala wakutanganika kwene-kwene. Bzimwebzi bzingaticitise kuyebwa winango ticimbapempherera bza mabvuto yathu yokha.” Kodi nthawe zinango bzimwebzi bzimbakucitikiranimbo? Penu mun’ti inde, nkhani ino in’kuthandizani (1) kuwona kuti thangwe ranyi mpsakufunika kumbapempherera winango na (2) bzinthu bzomwe bzingakuthandizeni kucita bzimwebzo.
THANGWE RANYI TIN’FUNIKA KUMBAPEMPHERERA WINANGO?
4-5. Kodi mipembo yomwe timbacitira winango ingakhale tani “yamphanvu kwene-kwene”? (Tiyago 5:16)
4 Kupempherera winango “kuna mphanvu kwene-kwene.” (Werengani Tiyago 5:16.) Mipembo yathu ingacinje bzomwe bzikucitikira wanthu winango. Pomwe Jezu adadziwa kuti mpostolo Pedru angadamulamba, iye adati: “Nimbakupempherera kwa Mulungu na kumudandaulira kuti cikhulupiro cako cileke kutepa.” (Luka 22:32) Mpostolo Paulo akhadziwambo bza mphanvu yomwe mpembo unayo. Pomwe iye akhadaikhidwa m’kawoko ku Roma mwakusaya cirungamo adanembera Filimoni kuti: “Ndina cidikhiro cakuti nin’tsudzulidwa mwakubverana na mipembo yanu, ndicibwerera kwa imwepo.” (Filimoni 22) Ndipo bzimwebzi ndibzo bzomwe bzidacitika. Pomwe padapita nthawe pang’ono, mpostolo Paulo adatsudzulidwa m’kawoko aciyamba pomwe kupalizira.
5 Bzimwebzi bzin’funa lini kulewa kuti mipembo yathu ingacitise Yahova kucita cinthu comwe an’funa lini. Iye ambawona thupo lomwe atumiki wace ambalatiza ndipo nthawe zinango ambasankhula kucita bzomwe iwo an’funa. Kudziwa bzimwebzi kumbatithandiza kupemba kwa Yahova na mtima wentse bza nkhani inango ticimuthemba mwa kusiya nkhaniyo m’manja mwace. — Salimo 37:5; ndendemezerani na 2 Akolinto 1:11.
6. Mwakubverana na bziratizo bzomwe bzafotokozedwabzi, n’ciyani cimbacitika tikapempherera winango? (1 Pedru 3:8)
6 Kupempherera winango kumbacitisa kuti ‘tikhale wantsisi.’ (Werengani 1 Pedru 3:8.) Munthu omwe ana ntsisi ambakwanisa kuwona mabvuto yomwe winango ambagumana nayo ndipo ambafunisisa kucita cinthu kuti awathandize. (Marko 1:40, 41) Kupempherera winango kumbabweresa bzisimbo bzizinji. Mkulu munango wa gwere, wakucemeredwa Michael, adalewa kuti: “Ndikambapempherera bzomwe winango akufunikira, nimbakwanisa kubvesesa mabvuto yomwe iwo akugumana nayo. Ndipo bzimwebzi bzimbacitisa kuti lufoyi langu kwa iwo lithumizirike. Inepano nimbabzibva kukhala wakufendererana nawo kwene-kwene napo kuti iwo ambadziwa lini bzimwebzo.” Mkulu munango, wakucemeredwa Richard, adalewa kuti: “Tikapempherera munthu munango bzimwebzi bzimbaticitisa kufuna kucita cinthu cinango kuti timuthandize. Ndipo tikacita cinthu kuti tithandize munthuyo timbakhala ninga kuti tikuthandizira kutawira mpembo umweyo.”
7. Kodi kupempherera winango kungatithandize tani kumbawona mabvuto yathu mu njira yakuthemera? (Afilipi 2:3, 4) (Onanimbo bzithunzi-thunzi.)
7 Kupempherera winango kumbatithandiza kuwona mabvuto yathu mu njira yakuthemera. (Werengani Afilipi 2:3, 4.) Tikukhala mu dziko lomwe likutongedwa na Sathani, ndipopa tentsenefe timbagumana na mabvuto. (1 Juwau 5:19; Apokalipse 12:12) Kukhala na cizolowezi cakumbapempherera winango kumbatikumbusa kuti “abale [wathu] pa dziko lentse la pantsi, akugumanambo na mabvuto mabodzi-bodziya.” (1 Pedru 5:9) Mpainiya munango, wakucemeredwa Katherine, adalewa kuti: “Kupempherera winango kumbandikumbusa kuti ndine lini ndekha omwe ndikugumana na mabvuto. Bzimwebzi bzimbandithandiza kwene-kwene kuti ndileke kumbakumbukira kwene-kwene bza mabvuto yangu.”
Kupempherera winango kumbatithandiza kuwona mabvuto yathu mu njira yakuthemera (Onani ndime 7)d
IWO AKUFUNIKIRA MIPEMBO YATHU
8. Kodi ni wanthu aponi omwe tingambawapempherere?
8 Kodi ni wanthu aponi omwe tingawapempherere? Tingapempherere wanthu wakusiyana-siyana. Tingapempherere wale omwe akuduwala, tingapempherere maswaka yomwe yakuyezedwa kucita bzinthu bzakuipa ku xikola ayai kupempherera wale omwe akugumana na mabvuto thangwe ra kukalamba. Abale wathu azinji ambayezedwa na adzinza wawo ayai na boma. (Mateu 10:18, 36; Mabasa 12:5) Abale winango adafunikira kusiya nyumba zawo thangwe ra ciwembo comwe cikhacitika komwe akhakhala. Ndipo winango akubonera thangwe ra malengwa ya pantsi. Pinango tingawadziwe lini abale amwewa maso na maso. Tsono tikambawapempherera timbalatiza kuti timbabvera lamulo la Jezu la ‘kumbafunana.’ — Juwau 13:34.
9. Thangwe ranyi tin’funika kumbapempherera wale omwe ambatsogolera m’gulu la Yahova pabodzi na azikazawo?
9 Ifepano tingapemphererembo wale omwe ambatsogolera m’gulu la Yahova. Bzimwebzi bzikuphatanidza abale wa m’Bungwe Lakutonga na athandizi wawo, abale omwe ambaphata basa m’Komiti ya Mthambi, anyakunyang’anira bzipinda bza mthambi, anyakunyang’anira dera, akulu wa gwere na atumiki wakuthandiza. Azinji mwa abale amwewa ambagumanambo na mabvuto, koma napo bziri tenepo, iwo ambaphata basa na nyongo kuti atisamalire. (2 Akolinto 12:15) Nyakung’anira dera munango, wakucemeredwa Mark, adalewa kuti: “Bvuto likulu lomwe ndinalo ni kukhala kutali na abereki wangu. Iwo mbakukalamba ndipo ana bvuto la thanzi. Inepano nimbadziwa kuti mana wangu pabodzi na kunyado wangu ambawasamalira bwino. Napo bziri tenepo, bzimbandisunamisa kwene-kwene thangwe ra kusaya kukhala pafupi na iwo kuti ndiwathandize.” Ni nthawe lini zentse zomwe timbadziwa mabvuto yomwe abale amwewa akugumana nayo, tsono mpsabwino kwene-kwene kumbawaguma m’mipembo yathu. (1 Atesalonika 5:12, 13) Ndipo tingambapemphererembo azikazawo thangwe thandizo lawo limbacitisa kuti abale amwewa apitirize kucita utumiki bwawo.
10-11. Kodi mipembo yomwe timbacitira abale wa pa dziko lentse imbakondwesa Yahova? Fotokozani.
10 Ninga momwe tawonera, mpsakudabwisa lini tikambapempherera abale na mpfumakazi zakusiyana-siyana. Napo kuti tingadziwe lini dzina la munthu omwe tikufuna kumupempherera, nthawe zinango timbakumbira kuti Yahova athandize wale omwe ali m’kawoko ayai omwe afedwa. Mkulu munango, wakucemeredwa Donald, adalewa kuti: “Tina abale na mpfumakazi azinji omwe akugumana na mabvuto, mwakuti nthawe zinango timbapempherera wentse omwe akugumana na mabvutoyo.”
11 Kodi mipembo imweyi imbakondwesa Yahova? Inde imbamukondwesa! Ifepano timbadziwa lini bwino-bwino mabvuto yomwe abale na mpfumakazi ambagumana nayo. Ndipopa mpsakuphonyeka lini kumbapempherera abale wentse. (Juwau 17:20; Aefezo 6:18) Mipembo imweyi imbalatiza kuti timbafuna “abale wathu wentse.” — 1 Pedru 2:17.
MBAPEMPHERERANI ALI-WENTSE PAYEKHA
12. Kodi kukhala tceru kungatithandize tani kupemba mwakubverana na bzomwe bzikucitikira munthuyo?
12 Mbakhalani tceru. Kuthumizira pa kumbapempherera abale wentse, tingambapemphererembo m’bodzi na m’bodzi payekha. Kodi pana munthu m’gwere mwanu omwe akulimbana na matenda makulu? Kodi pana tswaka lomwe lidasunama pinango thangwe ra kuyezedwa ku xikola? Mumbadziwa m’bale ayai mpfumakazi omwe akucita nyongo ya kulera yekha mwana ‘mwa kumulanga na kumupfunzisa mwakubverana na kufuna kwa Yahova’? (Aefezo 6:4) Mukambakhala tceru, imwepo mun’dzakwanisa kulatiza ntsisi winango ndipo bzimwebzi bzin’dzakucitisani kuti mumbawapempherere.b — Aroma 12:15.
13. N’ciyani comwe cingatithandize kupempherera wale omwe timbawadziwa lini maso na maso?
13 Mbapemphererani m’bale ali-wentse payekha mwakucita kuguma dzina lace. Tingacite bzimwebzo napo kwa abale omwe timbawadziwa lini maso na maso. Mwa ciratizo, abale azinji wa ku Crimeia, Eritreia, Rússia na Singapura ali m’kawoko. Mu webisaite yathu ya jw.org tingakwanise kuwona madzina ya abale amwewa.c Nyakunyang’anira dera munango, wakucemeredwa Brian, adalewa kuti: “Ndidazindikira kuti kunemba dzina la m’bale omwe ali m’kawoko ndipo patsogolo pace kulewa dzinalo mwakukuwa kumbandithandiza kukumbukira m’baleyo ndicimupempherera.”
14-15. N’ciyani comwe cingatithandize kucita mipembo yomwe ikubverana na bzomwe bzikucitikira munthu?
14 Mbacitani mpembo wakubverana na bzomwe munthuyo akugumana nabzo. Michael, omwe afotokozedwa pakuyamba ule, adalewa kuti: “Ndikambawerenga nkhani mu jw.org za abale omwe ali m’kawoko nimbayezera kukumbukira momwe inepano ningadabvera bzingadakhala kuti bzikucitikira inepano. Kulewa cadidi, inepano ningadacita thupo kwene-kwene na mkazangu ndipo ningadafuna kuti munthu amusamalire. Kucita bzimwebzi kumbandithandiza kudziwa bzomwe ningapempherere pakulewa bza abale omwe adalowola omwe ali m’kawoko.” — Ahebereu 13:3, mafala ya m’nyantsi.
15 Kumbakumbukira bzomwe bzikucitikira abale wathu omwe ali m’kawoko, kungatithandize kucita mipembo mwakubverana na bzomwe akugumana nabzobzo. Tingapembe ticikumbira kuti alindiri awadekere mtima nakuti maboma yawabvumize kuti anamate Yahova mwakutsudzuka. (1 Timotio 2:1, 2) Tingapemphererembo kuti ciratizo ca abale wakukhulupirika amwewa cilimbikise abale wa m’gwere lomwe liri pafupi na komwe iwo ali, nakuti wanthu omwe ambatumikira lini Yahova awone makhalidwe yawo yabwino acibvuma kutetekera mafala yathu. (1 Pedru 2:12) Tingacitembo bzibodzi-bodzibzi pomwe tikupempherera abale na mpfumakazi omwe akugumanambo na mabvuto yakusiyana na yamweya. Tikakhala tceru ticimbaguma madzina ya abale wathu ali-wentse payekha na kumbacita mipembo mwakubverana na bzomwe iwo akugumana nabzo, timbacitisa kuti lufoyi lathu “kwa winango na mwanzace lithumizirike.” — 1 Atesalonika 3:12.
MBAWONANI MIPEMBO YANU MWAKUTHEMERA
16. Kodi tingambawone tani mipembo yathu mu njira yakuthemera? (Mateu 6:8)
16 Ninga momwe tawonera, tikapempherera munthu timbacitisa kuti bzinthu bzomwe bzikucitika pa moyo wace bzicinje. Tsono tin’funika kumbawona mipembo yathu mu njira yakuthemera. Tikakhala tikupemba timbakhala lini tikuuza Yahova bzinthu bzomwe iye an’bzidziwa lini; ndipo tingamupase lini malango ya bzomwe iye angacite kuti amalise nkhani inango. Pomwe munthuyo akanati kudziwa bzomwe an’funikira ayai pomwe tikanati kudziwa bzomwe munthuyo akufunikira, Yahova ambakhala akudziwa kale. (Werengani Mateu 6:8.) Tsono thangwe ranyi tin’funika kumbapempherera winango? Kuthumizira pa mathangwe yomwe tayawona kale, tikambapempherera winango timbalatiza kuti timbawafuna. Ndipo Yahova ambakomedwa kwene-kwene akawona kuti atumiki wace akulatiza lufoyi ninga momwe iye ambacitira.
17-18. Kodi mipembo yomwe timbacitira abale na mpfumakazi tingaiyezezere na ciyani?
17 Nthawe zinango, mipembo yathu ingawoneke ninga kuti ikuthandiza lini. Tsono napo bziri tenepo, iyo imbalatiza lufoyi lomwe tinalo kwa abale na mpfumakazi ndipo Yahova ambakwanisa kuwona bzimwebzo. Tingayezezere tenepa: Kumbukirani bza banja lomwe lina wana awiri ang’ono-ang’ono, ka mwamuna na ka mkazi. Ka mwamunaka kakuduwala. Ka mkaziko kakudandaulira pai wace kuti: “Ndaphata minyendo citani ciri-centse kuti muthandize m’bale wanguyu. Iye akuduwala kwene-kwene!” Paiyo akucita kale ciri-centse kuti athandize mwanayo; iye ambamufuna ndipo akumusamalira bwino. Tsono kumbukirani momwe paiyo angakhalire wakukondwa akawona kuti mwana waceyo ambacita thupo kwene-kwene na m’bale wace mpaka kufika pa kumudandaulira kuti amuthandize.
18 Yahova akufuna kuti timbacite thupo na winango ticimbawapempherera. Tikacita bzimwebzi timbalatiza kuti timbabzikumbukira lini tekha koma kuti timbafuna abale wathu na mtima wentse. Ndipo Yahova ambakwanisa kuwona bzimwebzi. (2 Atesalonika 1:3; Ahebereu 6:10) Ndipo ninga momwe tawonera, nthawe zinango mipembo yathu ingacitise kuti bzomwe bzikucitikira munthu bzicinje. Ndipopa nthawe zentse mbatimbapempherereni winango.
NYIMBO 101 Kuphata Basa Pabodzi Mwakuphatana
a Madzina yanango yacinjidwa.
b Onani mu jw.org vidiyo ya Takeshi Shimizu ya msolo wakuti: Yahova ni “Mbveseri wa Mpembo.”
c Kuti mukwanise kugumana madzina ya abale omwe ali m’kawoko, ndokoni pa mbuto yakufufudzira mu jw.org mucinemba kuti “Mayiko Amene a Mboni za Yehova Akumangidwa Chifukwa Chotsatira Zimene Amakhulupirira.”
d BZOMWE BZIKUCITIKA PA CITHUNZI-THUNZI: Abale na mpfumakazi akupempherera winango napo kuti iwo akugumanambo na mabvuto.