Mbalewani Cadidi ca m’Bibliya mu Njira Yabwino

1. N’ciyani comwe tin’funika kucita kuti ticite mbali ya banja la Yahova?

TIKADZIWANA na m’bale ayai mpfumakazi, kazinji-kazinji mbvunzo wakuyamba omwe timbaucita ngwakuti: “Kodi mudadziwa tani cadidi?” Winango ambatawira kuti: “Ndidakulira m’banja la cadidi.” Ndipo winango ambatawira kuti “apfunza cadidi tsapanopa.” Thangwe ranyi timbaphatisa basa fala lakuti cadidi pa nthawe zimwezi? Thangwe cadidi ca m’Fala la Mulungu cimbatsogolera momwe timbacitira bzinthu pa moyo wathu. Ndipo timbadziwambo kuti tingacite mbali ya gulu la Yahova pokha-pokha tikafuna cadidi na kukhala na moyo mwakubverana na cadidico. Bzimwebzi bzimbaphatanidzambo kukhala wakukhulupirika pa bzomwe timbalewa na kucita. — Salimo 15:1-3.

2. (a) Kodi n’ciyani comwe wanthu akhazindikira pakulewa bza Jezu? (b) Kodi cadidi comwe Jezu akhapfunzisa cingadacitisa kuti wanthu acite ciyani?

² Jezu nthawe zentse akhalewa cadidi napo kuti bzomwe akhalewabzo bzikhadekera lini wanthu wentse. Napo anyamadulanthaka wace akhazindikira bzimwebzo. (Mateu 22:16) Jezu adauza ateweri wace bzomwe wanthu angadacita akabva cadidi. Iye adati: “Ndabwera kudzacitisa mgawano pakati pa mwana wacimuna na pai wace, mwana wacikazi na mai wace, mulowola na amibzala wace wacikazi.” (Mateu 10:35) Bzimwebzi bzikuthandauza lini kuti Jezu akhafuna kuti wanthu anyozere mafala yomwe iye na ateweri wace akhapalizira. M’mbuto mwace, iye akhadziwa kuti bzimwebzi bzingadacitika. (Mateu 23:37) Iye akhadziwa kuti wanthu angadawona mafala yomwe iye akhapalizira mu njira ziwiri zakusiyana. Winango angadafuna cadidi ca m’Bibliya ndipo winango angadacifuna lini. — 2 Atesalonika 2:9-11.

3. Kodi tin’tawira mibvunzo iponi mu nkhani ino?

³ Ifepano timbacita nyongo yakutewezera Jezu mwa kumbalewa cadidi nthawe zentse napo kuti winango angakomedwe lini na bzimwebzo. Kuthumizira bzimwebzi, ifepano timbapalizira, timbapfunzisa cadidi ca m’Bibliya napo kuti ni wanthu lini wentse omwe ambakomedwa na bzomwe timbawapalizira. Kodi bzimwebzi bzin’funa kulewa kuti timbandopalizire cadidi mwakusaya kukumbuka momwe tingapalizirire na nthawe yomwe tingacite bzimwebzo? Ne, ndibzo lini! Mu nkhani ino cakuyamba tin’tawira mbvunzo uyu: N’kuponi komwe tingagumane cadidi? Patsogolo pace, tin’tawirambo mibvunzo yakuti: Thangwe ranyi tin’funika kumbalewa cadidi ca m’Bibliya? Kodi ni mwa njira iponi yomwe tingalewere cadidico? Ndipo ni pa nthawe iponi yomwe tingalewe cadidico? Mitawiro ya mibvunzo imweyi in’tithandiza kukulisa luso lathu la kumbalewa cadidi mu njira yabwino na pa nthawe yakuthemera.

N’KUPONI KOMWE TINGAGUMANE CADIDI?

4. Thangwe ranyi tingalewe kuti Yahova ni Mwenekaciro wa cadidi?

⁴ Yahova ni Mwenekaciro wa cadidi. Bzentse bzomwe iye ambalewa mpsacadidi. Mwa ciratizo, bzomwe iye ambalewa pa nkhani ya cabwino na cakuipa, n’bzacadidi. (Salimo 19:9; 119:142, 151) Bzentse bzomwe iye ambalewa pakulewa bza kutsogolo bzimbakwanisika. (Zaiya 55:10, 11) Iye ambaleka lini kuteweza bzomwe adapicira. (Numero 23:19) Ndipo Bibliya limbalewa kuti Yahova cipo anganame lini! (Ahebereu 6:18) Ndipopa Yahova ambadziwika kuti ni “Mulungu wacadidi.” — Salimo 31:5.

5. Thangwe ranyi mpsakunesa lini kumugumana Mulungu? Fotokozani. (Mabasa 17:27)

⁵ Mwakusiyana na bzomwe wanthu azinji ambakumbuka, mpsakunesa lini kumudziwa bwino ayai kumugumana Yahova omwe ni “Mulungu wacadidi.” Tikanyang’anisa mbuto iri-yentse timbawona umboni bwakuti Mulungu alipodi. (Aroma 1:20) Pomwe Paulo akhalewalewa na thimu la wanthu omwe akhadapfunza kwene-kwene wa ku Atena, iye adalewa kuti Mulungu akufuna kuti ‘timugumane’ nakuti “iye ali pafupi na m’bodzi na m’bodzi wa ifepano.” (Werengani Mabasa 17:27.) Kulewa cadidi, Yahova ambakwewa wanthu wakubzicepesa omwe akunyang’ana cadidi. — Juwau 6:44.

6. (a) Kodi ni bzinthu bziponi bza m’Bibliya bzomwe tingakhulupire? (b) Thangwe ranyi imwepo mumbakomedwa kudziwa bzinthu bzimwebzi?

⁶ Njira ibodzi ya kudziwira Yahova ni kupfunza Bibliya. Ndipo wanthu omwe adalinemba, adacita kufuliziridwa na Mulungu. (2 Pedru 1:20, 21) Ndipopa tingakhulupire kuti bzentse bzomwe bziri m’Bibliya mpsacadidi. Mwa ciratizo, tingakhulupire bzomwe iro limbalewa bza bzinthu bzentse bzomwe bziri kudzulu na momwe moyo udayambira pa dziko la pantsi. (Genesesi 1:1, 26) Tingakhulupire bzomwe iro limbalewa bza momwe pikado, mabvuto na infa bzidayambira. (Aroma 5:12; 6:23) Ndipo tingakhulupirembo na mtima wentse bzomwe iro limbalewa bzakuti Yahova, mwakuphatisa basa mwana wace, an’dzacosa mabvuto yentse yomwe yambayambisidwa na Sathani, omwe ni “baba wakunama.” (Juwau 8:44; Aroma 16:20) Ndipo tingakhulupire piciro lomwe Bibliya limbalewa lakuti Jezu an’dzapfudza wanthu wakuipa, an’dzalamusa wanthu wakufa, an’dzacitisa dziko lentse kukhala paraizo na kutithandiza kukhala wakulungama. (Juwau 11:25, 26; 1 Juwau 3:8) Yahova adatipasa mwayi ukulu kwene-kwene! Iye adatipfunzisa cadidi ca m’Bibliya ndipo ambatipasambo mwayi wakupfunzisa winango. — Mateu 28:19, 20.

THANGWE LOMWE LIMBATICITISA KULEWA CADIDI

7-8. Kodi thangwe lomwe limbaticitisa kulewa cadidi ndakufunika? Fotokozani ciratizo. (Marko 3:11, 12) (Onanimbo bzithunzi-thunzi.)

⁷ Ninga momwe tawonera kale, kuti ticite mbali ya banja la Yahova, tin’funika kumbalewa cadidi. Tsono kwa Yahova, kundolewa cadidi n’kwakukwanira lini. Ndipopa, thangwe lomwe limbaticitisa kulewa cadidi, ni cinthu cakufunika kuna Yahova. Onani bzomwe bzidacitika pomwe Jezu akhacita utumiki bwace pantsi pano. (Werengani Marko 3:11, 12.) Pomwe Jezu akhapalizira pafupi na Nyanza ya ku Galileya, wanthu azinji adatsonkhana kuti amutetekere. Ndipo pakati pa wanthuwo pakhana winango omwe akhana bziwanda, bzomwe bzikhambagodamira Jezu bzicimbakuwa kuti: “Imwepo ndimwe mwana wa Mulungu.” Thangwe ranyi bziwandabzo bzikhalewa cadidi pakulewa bza Jezu? Ibzo pinango bzikhafuna kuti wanthuwo abzikhulupire acileka kutumikira Yahova. Bziwandabzo bzidalewa cadidi, tsono bzikhalibe cakulinga cabwino. Jezu akhadziwa bwino bzimwebzi. Iye alibe kukomedwa na bzomwe ibzo bzikhacita ndipopa adabziuza kuti bzireke kupalizira pakulewa bza iye.

⁸ Kodi tikupfunza ciyani na nkhani imweyi? Tikupfunza kuti kwa Yahova, mathangwe yomwe yambaticitisa kulewa cadidi njakufunika kwene-kwene. Ndipopa mpsakufunika kumbapfunzisa cadidi winango thangwe rakuti timbamufuna, ndipo napo winango akayezera kutitumbiza thangwe ra mafala yomwe timbapalizira, ifepano timbacitisa kuti wanthuwo atumbize Yahova, sikuti ife! — Mateu 5:16; ndendemezerani na Mabasa 14:12-15.

9. N’ciyani comwe tin’funika kutcenkha, ndipo thangwe ranyi?

⁹ Mbatiwoneni ciratizo cinango comwe cikulatiza kuti tin’funika kutcenkha kumbabzitumbiza tekha. Tiyezezere kuti m’bale munango omwe ana udindo watiuza nkhani yomwe njacintsintsi. Tsono patsogolo pace, tikuuza winango nkhaniyo. Ndipo wanthuwo akazindikira kuti nkhani yomwe tawauzayo njacadidi, pinango angadabwe nafe acikumbuka kuti timbadziwa nkhani zizinji za cintsintsi. Bzimwebzi bzingawacitise kuti atiwone ninga kuti ndife wakufunika kwene-kwene, tsono Yahova angakomedwe lini nabzo. (Mimwani 11:13) Thangwe ranyi? Thangwe napo kuti bzomwe talewabzo mpsacadidi, tikhalibe ugo bwakumwaza nkhaniyo, ndipo thangwe lomwe laticitisa kulewa nkhaniyo likhali lakuphonyeka.

MOMWE TINGALEWERE CADIDI

10. Kodi kulewa mafala yabwino kumbathandauza ciyani? (Akolose 4:6)

¹⁰ Werengani Akolose 4:6. Mpostolo Paulo adakumbusa Akristau wa ku Kolose kuti mafala yathu “nthawe zentse yan’funika kukhala yabwino.” Kodi bzimwebzi bzin’funa kulewa ciyani? Fala la cigerego lomwe lidaphatisidwa basa pamwepa limbathandauza kuti bzomwe timbalewa bzin’funika kukhala bzakuthandiza kwa wanthu winango nakuti tin’funikambo kuphatisira basa mafala yabwino.

11-12. Thangwe ranyi tin’funika kumbapfunzisa cadidi mwakusamala? Fotokozani. (Onanimbo bzithunzi-thunzi.)

¹¹ Tin’funika kuphatisa basa malango ya Paulo ya kumbalewalewa mu njira yabwino pomwe tikupfunzisa winango cadidi. Bibliya limbandendemezera cadidi na xipada yakuthwa kwentse-kwentse yomwe imbasiyanisa moyo na mzimu. Ayai kulewa kwinango, cadidico cimbatithandiza kudziwa unthu bwathu bwa mkati. (Ahebereu 4:12) Tsono tikasaya kuphatisa basa bwino Bibliya tingakalipise wanthu ayai kuwacitisa kuti apopotezane nafe. Kodi bzimwebzi bzingacitike tani?

¹² Tiyezezere kuti tagumana munthu mu upalizi omwe akufunisisa kudziwa bzizinji. Iye ambapemba nthawe zentse kwa bzifanikiso ndipo ambafuna kusekerera natale na Paskwa pabodzi na banja lace. Ifepano tingadaphatisa basa Bibliya kuti timulatize kuti mpsakusaya nzeru kupemba kwa bzifanikiso bzomwe bziribe moyo nakuti natale pabodzi na Paskwa ni bzinthu bzomwe bzimbabverana lini na Bibliya. (Zaiya 44:14-20; 2 Akolinto 6:14-17) Ticicita bzimwebzi paulendo bwakuyamba, tingakhale tikulewadi cadidi, tsono tingakhale tikuphatisa lini bwino basa Bibliya.

13. Kodi tingacite ciyani kuti mafala yathu yambakhale ninga cakudya comwe caphikidwa bwino?

¹³ Paulo adalewambo kuti mafala yathu yan’funika kukhala yabwino ninga cakudya comwe caphikidwa bwino. Kodi bzimwebzi bzikuthandauza kuti tin’funika kumbabisa ayai kucitisa cadidico kuti ciwoneke ninga cakusaya kufunika? Ne, ndibzo lini. Iye akhalewa kuti tin’funika kupfunzisa cadidi ca m’Bibliya mu njira yomwe ingacitise kuti winango akomedwe naco. (Djobi 12:11) Kucita bzimwebzi kungakhale lini kwakupusa. Pakulewa bza cakudya, pinango ifepano tingakumbuke kuti cakudya comwe tin’komedwa naco, winango angakomedwe nacombo. Mwa njira ibodzi-bodziyi, pinango tingakumbuke kuti wanthu wentse akukomedwa na momwe timbalewalewera. Tsono bzimwebzi n’cadidi lini. M’bzikhalidwe bzinango wanthu ambalewa makumbukidwe yawo mwakusaya kutsembera napo pomwe akulewalewa na wanthu wacikulire. Tsono m’bzikhalidwe bzinango, bzimwebzi mpsakubvumizidwa lini ndipo kungakhale kusaya ulemu. Paulo adalewa kuti ifepano tin’funika kudziwa momwe ‘tingatawirire munthu ali-wentse.’ Bzimwebzi bzikulatiza kuti tin’funika kucinja momwe timbalewalewera kuti bzireke kubverana na momwe timbafunira ayai cikhalidwe cathu, koma bzibverane na bzomwe wanthu ambafuna.

NTHAWE YOMWE TIN’FUNIKA KULEWA CADIDI

14. Pomwe Jezu akhali pa dziko la pantsi, kodi iye adapfunzisa bzentse bzomwe akhadziwa? Fotokozani.

¹⁴ Jezu nthawe zentse akhambalewalewa na ateweri wace mu njira yabwino ndipo akhambawapfunzisa bzinthu bzizinji. (Marko 6:34) Tsono pakhana bzinthu bzizinji bzomwe iwo akhafunika kupfunza. Jezu akhayezera lini kuwapfunzisa bzentse bzomwe iye akhadziwa. Iye akhacita lini bzimwebzo thangwe akhadziwa kuti ateweri wacewo angadabvesesa lini bzinthu bzentse. Ndipo iye akhawonambo kuti ikhali lini nthawe yakuthemera kuti iwo apfunze cadidi cinango ca m’Bibliya. Jezu adalewa kuti iwo angadakwanisa lini kubvesesa cadidico. (Juwau 16:12) Kodi bzimwebzi bzikutipfunzisa ciyani?

15. Kodi tin’funika kupfunzisa anyakupfunza wathu bzentse bzomwe timbadziwa kabodzi na kabodzi? Fotokozani. (Mimwani 25:11) (Onanimbo cithunzi-thunzi.)

¹⁵ Ciratizo ca Jezu cikulatiza kuti napo kuti timbadziwa cadidi bzin’funa lini kulewa kuti tin’funika kupfunzisa bzentse bzomwe timbadziwa kabodzi na kabodzi. Kodi tingatewezere tani Jezu? Tin’funika kumbakumbukira momwe bzinthu bziriri pa moyo wa wanthu. Kumbukirani pomwe bza munthu omwe ambafuna kusekerera Natale na Paskwa pabodzi na banja lace ule. Ifepano timbadziwa momwe misinda imweyi idayambira nakuti njakubvumizika lini kwa Mulungu. Tsono kumbukirani kuti imwepo mwayamba kupfunza Bibliya na munthu umweyu pomwe yandosala sumana ibodzi ayai ziwiri kuti Natale icitike. Kodi tingalatize kuti tikulewalewa mu njira yabwino mwa kumulatiziratu bzomwe Bibliya limbalewa pakulewa bza mafesta yamweya ticidikhirira kuti iye asiye kusekerera Natale pa nthawe imweyoletu? N’cadidi kuti anyakupfunza winango angaphatise basa mwakamfulumize bzomwe akupfunza, tsono winango ambatenga nthawe kuti acinje makumbukidwe yawo na bzicito bzawo. Na tenepo, tingathandize anyakupfunza wathu wa Bibliya kuyenda patsogolo tikambawauza bzomwe iwo an’funikira kudziwa pa nthawe yakuthemera ayai pa nthawe yomwe iwo an’dzakwanisa kubzibvesesa. — Werengani Mimwani 25:11.

16. Kodi tingathandize tani anyakupfunza wathu ‘kupitiriza kufamba m’cadidi’?

¹⁶ Palibe bzinthu bzizinji bzomwe bzimbaticitisa kukhala wakukondwa kuposa kuthandiza winango kupfunza cadidi cakulewa bza Yahova. Kuti tiwathandize ‘kupitiriza kufamba m’cadidi,’ tin’funika kupitiriza kukhala ciratizo cabwino. (3 Juwau 3, 4) Momwe mumbacitira bzinthu pa moyo wanu, mun’funika kulatiza kuti mumbakhulupira mapiciro yomwe yambagumanika m’Fala la Mulungu. Mbalewani cadidi na mathangwe yabwino. Mbalewalewani mu njira yabwino mwakuphatisa basa mafala yabwino na mwakudeka mtima kuti mupfunzise cadidi pa nthawe yakuthemera. Mbaperekani kwa Yahova ulemerero bwentse mukatendedwa. Mukacita bzimwebzi, mun’dzalatiza kuti mumbatumikira Yahova omwe ni Mulungu wacadidi.