Nyia “Azɛlɛ Ye Kɔsɔɔti Ndɛnebuavolɛ Ne” Mɔɔ Se Anwunvɔne La Anu Anwodozo!

1. Arɛlekyekyelɛ edwɛkɛ boni a Gyihova maanle Ebileham dele ɔ bo a?

ƆLE adawubɔlɛ bie mɔɔ Ebileham arɛle anvi ye ɛlɛ a. Nyamenle luale anwumabɔvolɛ nwo zo hanle hilele Ebileham kɛ ɔkabɔ Sodɔm nee Gomɔla abo zo. Edwɛkɛ ne gyegyele nrenyia nɔhavo zɔhane. Ɔbizale ye kɛ: “Asoo amgba ɛbazɛkye tenlenema wɔaboka amumuyɛma anwo ɔ? . . . Asoo azɛlɛ ye kɔsɔɔti Ndɛnebuavolɛ ne ɛnrɛyɛ mɔɔ tenrɛ la ɔ?” Gyihova zile abotane hilehilele ɔ gɔnwo kulovolɛ zɔhane ɛzukoalɛdeɛ bie mɔɔ baboa yɛ muala na yeakyekye yɛ rɛle la: Nyamenle ɛnrɛzɛkye tenlenema ɛlɛ.—Gyn. 18:​23-33.

2. Duzu a maa yɛnyia anwodozo kɛ Gyihova ndɛnebualɛ ne mɔ tenrɛ yɛɛ ɔkile anwunvɔnezelɛ a?

² Kɛ ɔkɛyɛ na yɛanwu kɛ Gyihova ndɛnebualɛ ne mɔ tenrɛ yɛɛ ɔkile anwunvɔnezelɛ ɛ? Yemɔ a le kɛ yɛze kɛ “Gyihova ɛdeɛ, ɔnea ahonle nu.” (1 Sa. 16:7) Nɔhalɛ nu, ɔze “dasanli biala ahonle nu.” (1 Arl. 8:39; 1 Ek. 28:9) Ɛhye le nɔhalɛ edwɛkɛ mɔɔ yɛ nwanwane. Yɛnrɛhola yɛnrɛde Gyihova ndɛnebualɛ ne mɔ abo bɔkɔɔ. Ɔti ɛzoanvolɛ Pɔɔlo hanle Gyihova Nyamenle anwo edwɛkɛ kɛ: ‘Nea kɛzi bɛngola bɛnneɛnlea ye ndɛnebualɛ nu bɛnwie ɛlɛ a!’—Wlo. 11:33.

3-4. Ɔyɛ a kpuya boni mɔ a kola ba yɛ adwenle nu a, na duzu a yɛbazuzu nwo wɔ edwɛkɛ ɛhye anu a? (Dwɔn 5:​28, 29)

³ Noko ɔdwu mekɛ ne bie a, kpuya mɔɔ Ebileham bizale la bie bahola ara yɛ adwenle nu. Bie a yɛbabiza bɔbɔ kɛ: ‘Asoo menli mɔɔ Gyihova zɛkyele bɛ, mɔɔ le kɛ menli mɔɔ ɛnee bɛwɔ Sodɔm nee Gomɔla la bahola adɛnla ngoane nu bieko ɔ? Bɛ nuhua bie mɔ bɛahola aboka “bɛdabɛ mɔɔ bɛnle tenlenema” mɔɔ bɛbadwazo bɛ la anwo ɔ?’—Gyi. 24:15.

⁴ Maa yɛdi ndelebɛbo mɔɔ yɛlɛ wɔ ewudwazo ne anwo la anu. Kenlensa ye ala, yɛnyianle bɛdabɛ mɔɔ “bɛbadwazo bɛ bɛara ngoane nu” nee bɛdabɛ mɔɔ “bɛbadwazo bɛ na bɛabua bɛ ndɛne” la anwo ndelebɛbo fofolɛ.a (Kenga Dwɔn 5:​28, 29.) Ndelebɛbo fofolɛ ɛhye ɛmaa yɛyɛ nzenzaleɛ bie mɔ, na yɛbazuzu nwo wɔ edwɛkɛ ɛhye nee mɔɔ doa zo la anu. Mɔɔ fale Gyihova tenlene ndɛnebualɛ ne mɔ anwo la, yɛbalimoa yɛazuzu mɔɔ yɛnze la anwo na yɛwie a yɛazuzu mɔɔ yɛze la anwo.

MƆƆ YƐNZE LA

5. Duzu a yɛha ye wɔ menli mɔɔ bɛzɛkyele bɛ wɔ Sodɔm nee Gomɔla la anwo wɔ yɛ mbuluku ne mɔ anu a?

⁵ Yɛha mɔɔ bado bɛdabɛ mɔɔ Gyihova buale bɛ ndɛne kɛ bɛnle tenlenema la anwo edwɛkɛ dɛba wɔ yɛ mbuluku ne mɔ anu. Yɛhanle kɛ anyelazo biala ɛnle ɛkɛ ne kɛ bɛbadwazo bɛdabɛ mɔɔ bɛzɛkyele bɛ wɔ Sodɔm nee Gomɔla la kenle bie. Noko asɔneyɛlɛ mɔɔ yɛva yɛzuzu edwɛkɛ ne anwo bieko la maa yɛbiza yɛ nwo kɛ, Asoo yɛbahola yɛazi ye pi ɔ?

6. Menli mɔɔ bɛambɔ tenlene ɛbɛla mɔɔ Gyihova zɛkyele bɛ la bie mɔ a le nwane mɔ, na duzu a yɛnze a?

⁶ Suzu kpuya bie mɔ mɔɔ ɔti yɛgyinla zo yɛka kɛ yɛngola yɛnzi ye pi la anwo. Baebolo ne anu edwɛkɛ dɔɔnwo ka menli mɔɔ bɛambɔ tenlene ɛbɛla mɔɔ Gyihova buale bɛ ndɛne la anwo edwɛkɛ. Bie mɔ a le bɛdabɛ mɔɔ Azuyilɛ ne hunle bɛ, anzɛɛ maanle nsuu ne mɔɔ ɛnee wɔ Ɛwɔkɛ Azɛlɛ ne azo mɔɔ Gyihova maanle bɛzɛkyele bɛ la, anzɛɛ Aselea sogyama 185,000 ne mɔɔ Gyihova anwumabɔvolɛ bie hunle bɛ wɔ kenle ko nɔɔzo la. (Gyn. 7:23; Dit. 7:​1-3; Aye. 37:​36, 37) Wɔ kɛlɛtokɛ ɛhye mɔ anu, asoo Baebolo ne hanle nwolɛ edwɛkɛ dɔɔnwo mɔɔ maa yɛnwu kɛ Gyihova zɛkyele menli ɛhye mɔ bɔkɔɔ mɔɔ bɛnlɛ ewudwazo nwo anyelazo bieko ɔ? Kyɛkyɛ. Duzu ati a yɛkola yɛka ye zɔ a?

7. Duzu a yɛnze ye wɔ menli mɔɔ wule wɔ Azuyilɛ ne anu anzɛɛ bɛzɛkyele bɛ wɔ Keena la anwo a? (Nea nvoninli ne.)

⁷ Yɛnze kɛzi Gyihova buale sonla ko biala ndɛne la; yɛɛ yɛnze saa menli mɔɔ Gyihova hunle bɛ la nyianle nwolɛ adenle kɛ bɛbazukoa ɔ nwo debie amaa bɛanlu bɛ nwo a. Mɔɔ fale Azuyilɛ ne anwo la, Baebolo ne hanle kɛ ɛnee Nowa le “tenleneyɛlɛ nwo edwɛkpakavolɛ.” (2 Pita 2:5) Noko Baebolo ne anga kɛ, mekɛ mɔɔ ɔlɛbobɔ ɛlɛne kpole ne la, ɛnee eza ɔlɛbɔ mɔdenle kɛ ɔbaha edwɛkɛ ne yeahile awie biala mɔɔ wɔ azɛlɛ ye azo mɔɔ ɔbahola yeawu wɔ Azuyilɛ ne anu la. Zɔhane ala a wɔ maanle maanle mɔɔ ɛnee wɔ Keena azɛlɛ ne azo la edwɛkɛ ne anu, yɛnze saa amumuyɛma zɔhane mɔ amuala nyianle nwolɛ adenle kɛ bɛbazukoa Gyihova anwo debie na bɛahakyi bɛ ɛbɛlabɔlɛ a.

8. Duzu a yɛnze wɔ menli mɔɔ ɛnee de Sodɔm nee Gomɔla la anwo a?

⁸ Na menli mɔɔ ɛnee de Sodɔm nee Gomɔla la ɛ? Ɛnee tenlenenli bie mɔɔ bɛfɛlɛ ye Lɔɔto la nee bɛ a de a. Noko asoo yɛze saa Lɔɔto hanle Nyamenle anwo edwɛkɛ hilele bɛ muala a? Kyɛkyɛ. Ɛnee bɛle amumuyɛma ɛdeɛ, noko asoo ɛnee bɛ muala bɛze mɔɔ le kpalɛ nee mɔɔ le ɛtane la ɔ? Kakye kɛ, ɛnee mrenyia ekpunli bie mɔɔ wɔ suakpole zɔhane azo la kpondɛ kɛ bɛkye Lɔɔto nyɛvolɛ ne mɔ mialeranu bɛ nee bɛ da. Baebolo ne hanle kɛ, mrenyia mɔɔ rale ɛkɛ ne la le “ngakula nee mgbanyinli.” (Gyn. 19:4; 2 Pita 2:7) Asoo yɛze ye bɔkɔɔ kɛ anwunvɔnezelɛ Nyamenle Gyihova buale bɛ nuhua ko biala ewule fɔlɛ mɔɔ ɔnlɛ anyelazo kɛ ɔbadwazo bieko ɔ? Gyihova maanle Ebileham nwunle ye wienyi kɛ, ɛnee tenlenema bulu bɔbɔ ɛnle suakpole zɔhane azo. (Gyn. 18:32) Ɔti ɛnee bɛnle tenlenema, na ɛnee ɔfɛta kɛ bɛ nyɛleɛ ne mɔ ati Gyihova sɛkye bɛ. Yemɔti asoo yɛbahola yɛazi ye pi kɛ, bɛ nuhua biala ɛnrɛdwazo wɔ mekɛ mɔɔ ‘bɛlɛdwazo bɛdabɛ mɔɔ bɛnle tenlenema la’ ɔ? Kyɛkyɛ, yɛnrɛhola yɛnrɛzi ye pi!

9. Duzu a yɛnze wɔ Sɔlɔmɔn anwo a?

⁹ Eza Baebolo ne ka menli mɔɔ ɛnee bɛle tenlenema na nzinlii bɛ ɛbɛlabɔlɛ zɛkyele la anwo edwɛkɛ. Bɛ nuhua ko a le Belemgbunli Sɔlɔmɔn. Bɛhilehilele ye Nyamenle ndenle ne mɔ kpalɛ yɛɛ Gyihova yilale ye kpole kpalɛ; noko nzinlii ɔzonlenle awozonle. Ye ɛtane ne mɔ maanle Gyihova vale ɛya kpole, na ɔlua ye ɛtane ne mɔ ati, Yizilayɛ maanle ne nwunle amaneɛ wɔ ɛvolɛ ɛya dɔɔnwo anu. Nɔhalɛ nu, Ngɛlɛlera ne ka kɛ “Sɔlɔmɔn nee ye nenyia mɔ,” mɔɔ bie a le nɔhavoma le kɛ Belemgbunli Devidi la, “hɔlale.” (1 Arl. 11:​5-9, 43; 2 Arl. 23:13) Noko asoo kɛzi bɛziele ye la kile kɛ bɛbadwazo ye ɔ? Baebolo ne ɛnga. Noko wɔannea a bie mɔ banyia adwenle kɛ, “mɔɔ ɛwu la bɛbua ye benle wɔ ye ɛtane nwo.” (Wlo. 6:7) Ɔle nɔhalɛ, noko yemɔ ɛngile kɛ bɛbadwazo bɛdabɛ mɔɔ bɛwu la amuala, kɛ asɛɛ awie wu a, ɛnee yenyia nwolɛ adenle kɛ ɔbadɛnla aze bieko. Ewudwazo ne le ahyɛlɛdeɛ mɔɔ vi yɛ Nyamenle ne mɔɔ lɛ ɛlɔlɛ la ɛkɛ. Ɔbadwazo bɛdabɛ mɔɔ ɔkulo kɛ bɛnyia nwolɛ adenle bɛsonle ye dahuu la. (Dwobu 14:​13, 14; Dwɔn 6:44) Asoo Sɔlɔmɔn banyia ahyɛlɛdeɛ zɛhae bie? Gyihova a ze ye a; yɛmɛ yɛnze. Noko yɛze kɛ Gyihova bayɛ mɔɔ tenrɛ la.

MƆƆ YƐZE LA

10. Kɛzi Gyihova te nganeɛ wɔ alesama mɔɔ ɔsɛkye bɛ la anwo ɛ? (Yizikeɛle 33:11) (Eza nea nvoninli ne.)

¹⁰ Kenga Yizikeɛle 33:11. Gyihova ka kɛzi ɔte nganeɛ wɔ alesama mɔɔ ɔbua bɛ ndɛne la anwo la kile yɛ. Sunsum ne hanle ɛzoanvolɛ Pita maanle ɔhanle edwɛkɛ mɔɔ ngapezonli Yizikeɛle hɛlɛle la bie, ɔse ‘Gyihova ɛngulo kɛ bɛsɛkye awie biala.’ (2 Pita 3:9) Ɔlua nɔhalɛ edwɛkɛ zɔhane ati, yɛze kɛ Gyihova anwo ɛmpele ye kɛ ɔbabɔ menli bo zo bɔkɔɔ. Anwunvɔnezelɛ ɛyi ye tɛkɛɛ, na ɔse anwunvɔne wɔ mekɛ biala mɔɔ ɔbayɛ boɛ la.

11. Nwane mɔ a bɛnrɛdwazo bɛ a, na kɛzi yɛkola yɛnwu ye zɔ ɛ?

¹¹ Duzu a yɛze wɔ menli mɔɔ bɛnrɛdwazo bɛ la anwo a? Bɛ nuhua ekyi bie ala a Baebolo ne bobɔ bɛ aluma a.b Gyisɛse hanle kɛ bɛnrɛdwazo Dwudase Yesekaleɔto. (Maake 14:21; Dwɔn 17:12)c Ɛnee Dwudase ze kɛ mɔɔ ɔlɛyɛ la tia Gyihova Nyamenle nee ɔ Ra ne, noko ɔyɛle. (Maake 3:29)d Zɔhane ala a Gyisɛse hanle kɛ ɛzonlenlɛ nu mgbanyima bie mɔ mɔɔ dwazole tiale ye la bawu mɔɔ bɛnrɛdwazo bɛ bieko a. (Mat. 23:33; nea Dwɔn 19:11 nee ye study note “the man.”) Yɛɛ ɛzoanvolɛ Pɔɔlo hanle kɛ bɛnrɛdwazo kpɔkyevolɛma mɔɔ bɛnnu bɛ nwo la.—Hib. 6:​4-8; 10:29.

12. Duzu a yɛze ye wɔ Gyihova anwunvɔnezelɛ ne anwo a? Maa neazo.

¹² Noko kɛ mɔɔ yɛlimoa yɛnwu ye la, anwunvɔnezelɛ ɛyi Gyihova tɛkɛɛ yɛɛ “ɔngulo kɛ bɛsɛkye awie biala.” Kɛzi ɔlale anwunvɔnezelɛ ali ɔhilele menli bie mɔɔ yɛle ɛtane mgbole la ɛ? Belemgbunli Devidi yɛle ɛtane mgbole bie mɔ, bie a le agyalɛzɛkyelɛ nee sonla ɛhunlɛ. Noko Devidi nlunle ɔ nwo, ɔti Gyihova zele ye anwunvɔne na ɔvale ye ɛtane ɔhyɛle ye. (2 Sa. 12:​1-13) Belemgbunli Manasɛ vale ye ngoane mekɛ ne anu dɔɔnwo yɛle ninyɛndane ngakyile. Noko ɔnva nwo kɛ nrenyia zɔhane yɛle ɛtane kpole la, mɔɔ ɔnlunle ɔ nwo la, Gyihova nyianle debie gyinlanle zo zele ye anwunvɔne na ɔvale ye ɛtane ne mɔ ɔhyɛle ye. (2 Ek. 33:​9-16) Neazo ɛhye mɔ kakye yɛ kɛ, saa Gyihova nwu debie mɔɔ ɔwɔ kɛ ɔgyinla zo ɔse anwunvɔne a, ɔyɛ ye zɔ. Ɔbadwazo menli zɛhae mɔ ɔluakɛ bɛnwunle ye kɛ bɛyɛ ɛtane mgbole na bɛnlunle bɛ nwo.

13. (a) Duzu ati a Gyihova zele Nenɛvɛma anwunvɔne a? (b) Duzu a nzinlii Gyisɛse hanle ye wɔ Nenɛvɛma anwo a?

¹³ Eza yɛze kɛzi Gyihova zele Nenɛvɛma anwunvɔne la. Nyamenle hanle hilele Dwona kɛ: “Menwu bɛ amumuyɛyɛlɛ ne.” Noko mɔɔ bɛnlunle bɛ nwo la, Gyihova lale atiakunlukɛnlɛma ali na ɔvale ɔhyɛle bɛ. Ɛnee ɔse anwunvɔne kpole kpalɛ ɔtɛla Dwona. Ɛnee ɔwɔ kɛ Nyamenle kakye ye ngapezonli ne mɔɔ ɛva ɛya la kɛ zɔhane Nenɛvɛma ne ‘ɛnze kpalɛ a bɛnze ɛtane.’ (Dwona 1:​1, 2; 3:10; 4:​9-11) Nzinlii, Gyisɛse vale neazo zɔhane hilehilele Gyihova pɛlepɛlelilɛ nee ye anwunvɔnezelɛ ne anwo debie. Gyisɛse hanle kɛ Nenɛvɛma mɔɔ nlunle bɛ nwo la “badwazo wɔ ndɛnebualɛ mekɛ ne anu.”—Mat. 12:41.

14. Kɛzi ‘bɛdabɛ mɔɔ bɛbadwazo bɛ na bɛabua bɛ ndɛne’ la edwɛkɛ ne fale Nenɛvɛma ne anwo ɛ?

¹⁴ Noko saa bɛka kɛ Nenɛvɛma “badwazo wɔ ndɛnebualɛ mekɛ ne anu” a, ɔkile duzu? Gyisɛse hanle ‘bɛdabɛ mɔɔ bɛbadwazo bɛ na bɛabua bɛ ndɛne’ kenle bie la anwo edwɛkɛ. (Dwɔn 5:29) Ɛnee ɔlɛka ye Ɛvolɛ Apenle Ko Tumililɛ ne anwo edwɛkɛ, mekɛ zɔhane anu a “bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu” a. (Gyi. 24:15) Wɔ bɛdabɛ mɔɔ bɛnle tenlenema la afoa nu, ɛhye bayɛ mekɛ mɔɔ “bɛbadwazo bɛ na bɛabua bɛ ndɛne” a. Ɛhye kile kɛ, saa bɛdwazo bɛ a, Gyihova nee Gyisɛse bagua bɛ nye aze anlea bɛ ɛbɛlabɔlɛ nee kɛzi bɛlɛfa mɔɔ bɛlɛkilehile bɛ la bɛali gyima la kpalɛ. Saa Nenɛvɛnli mɔɔ bɛbadwazo ye la anzonle Gyihova nɔhalɛ nu a, Gyihova babua ye ewule fɔlɛ. (Aye. 65:20) Noko bɛdabɛ mɔɔ bɛbazonle Gyihova nɔhalɛ nu la kɔsɔɔti banyia nwolɛ adenle adɛnla ngoane nu dahuu!—Dan. 12:2.

15. (a) Duzu ati a ɔnle kɛ yɛka kɛ bɛnrɛdwazo bɛdabɛ mɔɔ bɛzɛkyele bɛ wɔ Sodɔm nee Gomɔla la anu biala ɛ? (b) Kɛzi yɛbade edwɛkɛ mɔɔ wɔ Dwuudu 7 la abo ɛ? (Nea ɛlɛka, “Duzu A Ɛnee Dwuudu Ɛlɛkile A?”)

¹⁵ Mɔɔ Gyisɛse ɛlɛka menli mɔɔ ɛnee wɔ Sodɔm nee Gomɔla anwo edwɛkɛ la, ɔhanle kɛ “wɔ Ndɛnebualɛ Kenle” ne, ɔbayɛ bɛtɛɛ yeamaa bɛ yeadɛla menli mɔɔ bɛkpole ye nee ye ngilehilelɛ ne la. (Mat. 10:​14, 15; 11:​23, 24; Luku 10:12) Duzu a ɛnee ɔlɛkile a? Bie a yɛbanyia adwenle kɛ ɛnee Gyisɛse ɛlɛwudu edwɛkɛ ne anu yeava yeahile kɛ ɛnee ye mekɛ zo amra ɛbɛla ɛzɛkye ɛdɛla Sodɔmma nee Gomɔlama. Noko ɔnzɔho kɛ ɛnee ɔlɛwudu edwɛkɛ nu, ɔluakɛ mɔɔ ɔhanle kɛ Nenɛvɛma “badwazo wɔ ndɛnebualɛ mekɛ ne anu” la, ɛnee ɔlɛkile kɛ ɔle debie mɔɔ ɔbazi amgba a.e Ɔti ɔzɔho kɛ mɔɔ Gyisɛse hanle wɔ Sodɔmma nee Gomɔlama anwo la le debie mɔɔ ɔbara nu amgba. “Ndɛnebualɛ Kenle” ne mɔɔ ɔhanle nwolɛ edwɛkɛ wɔ ɛke la ko ne ala a ɔhanle nwolɛ edwɛkɛ wɔ Nenɛvɛma edwɛkɛ ne anu a. Sodɔmma nee Gomɔlama yɛle ninyɛndane kɛ mɔɔ Nenɛvɛma yɛle ala la. Noko Nenɛvɛma nyianle nwolɛ adenle nlunle bɛ nwo. Eza kakye mɔɔ Gyisɛse hanle ye wɔ ‘bɛdabɛ mɔɔ bɛbadwazo bɛ na bɛabua bɛ ndɛne’ la anwo la. “Bɛdabɛ mɔɔ bɛyɛle ninyɛndane la” boka nwo. (Dwɔn 5:29) Ɔti ɔzɔho kɛ bie a anyelazo bie wɔ ɛkɛ maa Sodɔmma nee Gomɔlama. Ɔbahola yeara ye kɛ bɛbadwazo menli zɔhane mɔ bie, na bie a yɛbanyia nwolɛ adenle yɛahilehile bɛ Gyihova nee Gyisɛse Kelaese anwo debie.

16. Kɛzi Gyihova bazi menli mɔɔ ɔbadwazo bɛ la anwo kpɔkɛ la anwo edwɛkɛ boni a yɛze a? (Gyɛlɛmaya 17:10)

¹⁶ Kenga Gyɛlɛmaya 17:10. Ngyɛnu zɔhane boa yɛ maa yɛpɛ mɔɔ yɛze wɔ Gyihova ndɛnebualɛ nwo la sikalɛ: Gyihova a le awie mɔɔ dahuu ‘neɛnlea sonla ahonle nu, na ɔneɛnlea sonla ti anu’ a. Mɔɔ fale kenle bie ewudwazo ne anwo la, dahuu ɔbamaa “awie biala debie kɛ mɔɔ ye ndenle de” la. Mekɛ biala mɔɔ ɔhyia kɛ Gyihova si ɔ gyakɛ aze la, ɔyɛ ye zɔ, noko saa ɔwɔ kɛ ɔse anwunvɔne noko a, ɔyɛ ye zɔ. Ɔti ɔnle kɛ yɛnyia adwenle ɛlɛ kɛ awie bie ɛnlɛ ewudwazo nwo anyelazo biala kyesɛ yɛze ye zɔ ɔluakɛ Baebolo ne ɛha ye zɔ la ati ɔ!

“AZƐLƐ YE KƆSƆƆTI NDƐNEBUAVOLƐ NE” BAYƐ “MƆƆ TENRƐ LA”

17. Anyelazo boni a alesama mɔɔ bɛwu la lɛ a?

¹⁷ Ɔvi mekɛ mɔɔ Adam nee Yive hɔbokale Seetan anwo maanle bɛdwazole bɛtiale Gyihova Nyamenle la, alesama mgbe mgbe dɔɔnwo ɛwu. ‘Kpɔvolɛ ewule’ ɛhu menli dɔɔnwo. (1 Kɔl. 15:26) Anyelazo boni a wɔ ɛkɛ ne maa menli ɛhye mɔ kɔsɔɔti a? Bɛbadwazo Kelaese ɛdoavolɛ nɔhavoma ne anu ekyi, mɔɔ bɛ dodo le 144,000 la bɛahɔ anwuma mɔɔ bɛnrɛwu bieko ɛlɛ a. (Yek. 14:1) Bɛbadwazo mrenyia nee mraalɛ nɔhavoma dɔɔnwo mɔɔ ɛnee kulo Gyihova la wɔ mekɛ mɔɔ ‘bɛlɛdwazo tenlenema’ la, na saa bɛkɔ zo bɛbɔ tenlene ɛbɛla wɔ Kelaese Ɛvolɛ Apenle Ko Tumililɛ ne nee sɔnea mɔɔ li awieleɛ la anu a, bɛbadɛnla aze dahuu wɔ azɛlɛ ye azo. (Dan. 12:13; Hib. 12:1) Eza Ɛvolɛ Apenle Ko Tumililɛ ne anu, bɛbamaa “bɛdabɛ mɔɔ bɛnle tenlenema” la nwolɛ adenle kɛ bɛhakyi bɛ ndenle ne mɔ na bɛzonle Gyihova nɔhalɛ nu. Menli mɔɔ bɛanzonle Gyihova ɛlɛ anzɛɛ “bɛdabɛ mɔɔ bɛyɛle ninyɛndane” bɔbɔ la boka nwo. (Luku 23:​42, 43) Noko ɛnee alesama bie mɔ le amumuyɛma kpalɛ, ɛnee bɛzi bɛ kɛnra kɛ bɛbadwazo bɛatia Gyihova nee ye bodane ne mɔ, ɔti Gyihova ɛbɔ kpɔkɛ kɛ ɔnrɛdwazo bɛ fee.—Luku 12:​4, 5.

18-19. (a) Duzu ati a yɛbahola yɛalie yɛali kɛ Gyihova bayɛ mɔɔ tenrɛ wɔ kɛzi ɔbabua menli mɔɔ ɛwu la ndɛne la anu a? (Ayezaya 55:​8, 9) (b) Duzu a yɛbazuzu nwo wɔ edwɛkɛ bieko anu a?

¹⁸ Asoo yɛbahola yɛalie yɛali kɛ, mekɛ biala mɔɔ Gyihova babua menli ndɛne la, ɔyɛ mɔɔ tenrɛ la ɔ? Ɛhɛe! Kɛ mɔɔ Ebileham dele ɔ bo bɔkɔɔ la, Gyihova a le “azɛlɛ ye kɔsɔɔti Ndɛnebuavolɛ ne” mɔɔ di munli, ɔze nrɛlɛbɛ kpole na ɔse anwunvɔne a. Yetete ɔ Ra ne na yeva ndɛnebualɛ kɔsɔɔti yewula ɔ sa. (Dwɔn 5:22) Selɛ ne nee Ralɛ ne amunwiɔ kola nwu mɔɔ wɔ dasanli ko biala ahonle nu la. (Mat. 9:4) Ɔti saa bɛlɛbua sonla ko biala ndɛne a, dahuu bɛbayɛ “mɔɔ tenrɛ la”!

¹⁹ Bɛmaa yɛbɔ kpɔkɛ kɛ yɛbalie yɛali bɔkɔɔ kɛ Gyihova ze mɔɔ le kpalɛ la dahuu. Yɛdie yɛto nu kɛ ɔdaye a ɔfɛta kɛ ɔbua ndɛne a—tɛ yɛdayɛ ɔ! (Kenga Ayezaya 55:​8, 9.) Ɛhye ati a yɛgyakyi ndɛnebualɛ ne kɔsɔɔti yɛmaa ye nee ɔ Ra ne, yɛ Belemgbunli ne mɔɔ ɔda ɔ Ze ne pɛlepɛlelilɛ nee ye anwunvɔnezelɛ ne bie ali pɛpɛɛpɛ la. (Aye. 11:​3, 4) Noko duzu a yɛbahola yɛaha ye wɔ kɛzi Gyihova nee Gyisɛse babua menli ndɛne wɔ anwongyelelɛ kpole ne anu la anwo a? Duzu a yɛnze a? Yɛɛ duzu a yɛze a? Edwɛkɛ bieko babua zɔhane kpuya ne mɔ.