EDWƐKƐ 19
EDWƐNE 22 Belemgbunlililɛ Ne Ɛlɛdi Tumi—Maa Ɔrɛla!
Duzu A Yɛze Wɔ Kɛzi Gyihova Babua Ndɛne Kenle Bie La Anwo A?
‘Gyihova ɛngulo kɛ bɛsɛkye awie biala.’—2 PITA 3:9.
BODANE
Yɛbahola yɛalie yɛali kɛ wɔ kenle bie ndɛnebualɛ ne anu, Gyihova bali pɛlepɛle na yeabua ndɛne fɔɔnwo.
1. Duzu ati a yɛbahola yɛaha kɛ yɛde mekɛ mɔɔ yɛ anyelielɛ la anu a?
YƐDE mekɛ mɔɔ yɛ anyelielɛ la anu! Kenle ko biala, yɛnwu Baebolo ngapezo mɔɔ ɛlɛba nu la yɛ nye zo. Kɛ neazo la, yɛnwu kɛ “sɔlɔ belemgbunli ne” nee “nyiakɛ belemgbunli ne” ɛlɛsuhuzuhu bɛ nwo ɔluakɛ bɛ nuhua biala kulo kɛ ɔdi ewiade ne azo tumi. (Dan. 11:40, ɔbdw.) Yɛnwu kɛ bɛlɛbɔ Nyamenle Belemgbunlililɛ ne anwo edwɛkpa ne nolo wɔ ewiade ɛleka biala, yɛɛ menli mgbe dɔɔnwo ɛlɛtie na bɛazonle Gyihova. (Aye. 60:22; Mat. 24:14) Eza yɛlɛnyia sunsum nu aleɛ dɔɔnwo “wɔ mekɛ kpalɛ nu.”—Mat. 24:45-47.
2. Anwodozo boni a yɛbahola yɛanyia a, na duzu a ɔwɔ kɛ yɛnwu ye a?
2 Gyihova kɔ zo boa yɛ maa yɛnyia ninyɛne mɔɔ la yɛ nyunlu mɔɔ anwo hyia la anwo ndelebɛbo kpalɛ. (Mrɛ. 4:18; Dan. 2:28) Yɛbahola yɛanyia anwodozo kɛ anwongyelelɛ kpole ne kabɔ ɔ bo la, ɛnee yɛnwu debie biala mɔɔ ɔhyia kɛ yɛnwu ye amaa yɛahɔ zo yɛagyinla kpundii na yɛayɛ ko wɔ zɔhane mekɛ ne mɔɔ anu yɛ se anu la. Noko ɔwɔ kɛ yɛnwu kɛ mɔɔ bazi kenle bie la anwo edwɛkɛ bie mɔ wɔ ɛkɛ mɔɔ yɛnze a. Wɔ edwɛkɛ ɛhye anu, yɛbalimoa yɛazuzu deɛmɔti yɛyɛ nzenzaleɛ wɔ ninyɛne ɛhye mɔ mɔɔ basisi anwo edwɛkɛ mɔɔ yɛlimoale yɛhanle la anu la anwo. Akee yɛbazuzu ninyɛne bie mɔ mɔɔ yɛze kɛ ɔbasisi kenle bie nee mɔɔ yɛ anwuma Selɛ ne bayɛ la anwo.
MƆƆ YƐNZE LA
3. Duzu a yɛhanle ye wɔ mekɛ mɔɔ Gyihova ɛnrɛmaa menli adenle bieko kɛ bɛraboka yɛ nwo la anwo a, na duzu ati a yɛhanle ye zɔ a?
3 Dɛba ne, yɛhanle kɛ saa anwongyelelɛ kpole ne bɔ ɔ bo ala a, awie biala mɔɔ ɔnle diedinli la ɛnrɛnyia nwolɛ adenle bieko kɛ ɔbagyinla Gyihova afoa na yeanyia ngoane wɔ Amagɛdɔn ne anu. Yɛhanle ye zɔ ɔluakɛ yɛzuzule kɛ edwɛkɛ mɔɔ sisile wɔ Azuyilɛ ne anu la gyi ɛkɛ ne maa debie mɔɔ ɔbazi wɔ yɛ mekɛ ye azo. Kɛ neazo la, yɛnyianle adwenle kɛ, kɛ mɔɔ Gyihova dole ɛlɛne ne anlenkɛ ne anu kolaa na Azuyilɛ ne abɔ ɔ bo la, zɔhane ala a saa anwongyelelɛ kpole ne bɔ ɔ bo a, ‘ɔbado’ Seetan ewiade ne “anlenkɛ ne anu” amaa awie gyɛne biala annyia nwolɛ adenle bieko kɛ ɔbanyia ngoane a.—Mat. 24:37-39.
4. Duzu ati a yɛnga ye bieko kɛ edwɛkɛ mɔɔ sisile wɔ Azuyilɛ ne anu la gyi ɛkɛ ne maa debie mɔɔ ɔbazi wɔ yɛ mekɛ ye azo la ɛ?
4 Asoo ɔwɔ kɛ yɛbu edwɛkɛ mɔɔ sisile wɔ Azuyilɛ ne anu la kɛ ɔgyi ɛkɛ ne ɔmaa debie mɔɔ ɔbazi wɔ yɛ mekɛ ye azo la ɔ? Kyɛkyɛ. Duzu ati ɔ? Ɔluakɛ Baebolo ne ɛnga ye zɔ.a Gyisɛse vale mɔɔ sisile wɔ “Nowa mekɛ zo” la totole ye ɛralɛ mekɛ ne anwo ɛdeɛ, noko yeanga kɛ awie biala mɔɔ ɛnee wɔ ɛkɛ wɔ Azuyilɛ mekɛ ne anu nee debie biala mɔɔ sisile la gyi ɛkɛ ne maa debie mɔɔ ɔbazi yɛ mekɛ ye azo la. Eza yeanga kɛ anlenkɛ ne mɔɔ Gyihova dole nu la gyi ɛkɛ ne maa debie titili bie mɔɔ ɔbazi yɛ mekɛ ye la. Noko yemɔ ɛngile kɛ yɛnrɛhola yɛnrɛzukoa debie yɛnrɛvi Nowa nee Azuyilɛ ne anwo edwɛkɛ ne anu.
5. (a) Duzu a Nowa yɛle kolaa na Azuyilɛ ne ara a? (Hibuluma 11:7; 1 Pita 3:20) (b) Mɔɔ fale edwɛkɛhanlɛ gyima ne anwo la, kɛzi yɛ tɛnlabelɛ ne nee Nowa ɛdeɛ ne le ko ɛ?
5 Mɔɔ Nowa dele Gyihova kɔkɔbɔlɛ ne la, ɔbobɔle ɛlɛne ne ɔvale ɔhilele kɛ ɔlɛ diedi. (Kenga Hibuluma 11:7; 1 Pita 3:20.) Zɔhane ala a ɔwɔ kɛ menli mɔɔ bɛte Nyamenle Belemgbunlililɛ ne anwo edwɛkpa ne la, yɛ mɔɔ bɛte la anwo debie a. (Gyi. 3:17-20) Pita vɛlɛle Nowa “tenleneyɛlɛ nwo edwɛkpakavolɛ.” (2 Pita 2:5) Noko kɛ mɔɔ bɛhilehilele nu wɔ edwɛkɛ mɔɔ li ɛhye anyunlu la anu la, yɛngola yɛnnwu ye saa Nowa yɛle ngyehyɛleɛ bɔle edwɛkɛ ne nolo hilele awie biala mɔɔ ɛnee de azɛlɛ ye azo la kolaa na Azuyilɛ ne ara a. Ɛnɛ, yɛlɛyɛ edwɛkɛhanlɛ gyima ne wɔ ewiade amuala, na yɛbɔ mɔdenle kɛ yɛbayɛ biala mɔɔ yɛbahola la wɔ gyima ɛhye anu. Noko ɔnva nwo mɔdenle biala mɔɔ yɛbabɔ la, yɛnrɛhola yɛnrɛha edwɛkpa ne yɛnrɛhile awie biala mɔɔ wɔ azɛlɛ ye azo la kolaa na awieleɛ ne ara. Duzu ati ɔ?
6-7. Duzu ati a yɛkola yɛka kɛ yɛnrɛhola yɛnrɛha edwɛkpa ne yɛnrɛhile awie ko biala mɔɔ wɔ azɛlɛ ye azo la kolaa na awieleɛ ne ara a? Kilehile nu.
6 Dwenle mɔɔ Gyisɛse hanle ye wɔ ɛleka mɔɔ yɛbayɛ yɛ edwɛkɛhanlɛ gyima ne yɛahɔdwu anwo la anwo. Ɔhanle kɛ bɛbabɔ edwɛkpa ne nolo “wɔ azɛlɛ ye azo amuala bɛava bɛali maanle maanle ne amuala daselɛ.” (Mat. 24:14) Ngapezo zɔhane ɛlɛba nu ɛnɛ adɛla mekɛ biala. Bɛyɛ Belemgbunlililɛ ne anwo edwɛkpa ne anwo ninyɛne nee mbuluku wɔ aneɛ mɔɔ bo 1,000 la anu, yɛɛ ewiade ye anu menli dɔɔnwo ɛlɛdua jw.org wɛbsaete ne azo azukoa nwolɛ debie.
7 Noko eza Gyisɛse hanle hilele ye ɛdoavolɛma ne kɛ, “bɛnrɛwie . . . azua kɔsɔɔti azo kɔ,” anzɛɛ bɛnrɛhola bɛnrɛha edwɛkɛ ne bɛnrɛhile awie biala kolaa na yeara. (Mat. 10:23; 25:31-33) Gyisɛse edwɛkɛ ne bara nu wɔ yɛ mekɛ ye azo noko. Ɛnɛ, menli mgbe dɔɔnwo de ɛleka mɔɔ bɛmmaa yɛ adenle fee bɛmmaa yɛnyɛ yɛ edwɛkɛhanlɛ gyima ne wɔ ɛkɛ la. Eza mitini ko biala, bɛwo ngakula ɛya dɔɔnwo. Yɛyɛ biala mɔɔ yɛbahola la kɛ yɛbaha edwɛkpa ne yɛahile “maanle nee mbusua nee aneɛ nee menli kɔsɔɔti.” (Yek. 14:6) Noko nɔhalɛ ne a le kɛ, yɛnrɛhola yɛnrɛha edwɛkpa ne yɛnrɛhile sonla ko biala mɔɔ de azɛlɛ ye azo la kolaa na awieleɛ ne ara.
8. Kɛzi Gyihova babua ndɛne kenle bie la anwo kpuya boni a wɔannea a yɛbabiza a? (Eza nea nvoninli ne mɔ.)
8 Ɔti wɔannea a yɛbabiza kɛ: Na bɛdabɛ mɔɔ bie a bɛannyia nwolɛ adenle bɛande edwɛkpa ne kolaa na anwongyelelɛ kpole ne abɔ ɔ bo la noko ɛ? Kɛzi Gyihova nee ɔ Ra ne mɔɔ yeva ndɛnebualɛ ne yewula ɔ sa la bayɛ bɛ ɛ? (Dwɔn 5:19, 22, 27; Gyi. 17:31) Ngɛlɛlera ne mɔɔ edwɛkɛ mɔɔ yɛlɛsuzu nwo la gyi zolɛ la se Gyihova ‘ɛngulo kɛ bɛsɛkye awie biala.’ “Emomu ɔkulo kɛ menli kɔsɔɔti nu bɛ nwo.” (2 Pita 3:9; 1 Tim. 2:4) Yɛze edwɛkɛ zɔhane bɔbɔ ɛdeɛ, noko ɔwɔ kɛ yɛnwu kɛ Gyihova ɛtɛkanle kɛzi ɔbabua menli zɔhane mɔ ndɛne la anwo edwɛkɛ ɔtɛkilele yɛ. Nɔhalɛ nu, mɛla ɛnkyekye ye kɛ ɔbaha debie biala mɔɔ yeyɛ anzɛɛ ɔbayɛ la yeahile yɛ.
Kɛzi Gyihova nee menli mɔɔ bɛannyia nwolɛ adenle bɛanzukoa edwɛkpa ne kolaa na anwongyelelɛ kpole ne abɔ ɔ bo la bali ɛ? (Nea ɛdendɛkpunli 8)c
9. Duzu a Gyihova ɛla ye ali ɛhile yɛ wɔ Baebolo ne anu a?
9 Gyihova ɛla ninyɛne mɔɔ ɔbayɛ la bie mɔ ali ɛhile yɛ wɔ ye Edwɛkɛ ne anu. Kɛ neazo la, Baebolo ne maa yɛnwu kɛ, Gyihova badwazo menli mɔɔ “bɛnle tenlenema” mɔɔ bɛannyia nwolɛ adenle bɛanzukoa edwɛkpa ne anwo debie na bɛahakyi bɛ ɛbɛlabɔlɛ la. (Gyi. 24:15; Luku 23:42, 43) Yemɔ maa yɛbiza kpuya gyɛne bie mɔ mɔɔ hyia la.
10. Kpuya gyɛne boni mɔ a yɛlɛ a?
10 Asoo bɛbazɛkye bɛdabɛ mɔɔ bɛbawu wɔ anwongyelelɛ kpole ne anu la bɔkɔɔ mɔɔ bɛnrɛdwazo bɛ bieko ɔ? Ngɛlɛlera ne ka ye wienyi kɛ, bɛnrɛdwazo bɛdabɛ mɔɔ bɛdwazo bɛtia Gyihova mɔɔ Ɔ nee ye ɛlɔne ne bazɛkye bɛ wɔ Amagɛdɔn la. (2 Tɛs. 1:6-10) Na bɛdabɛ mɔɔ bie a ɔlua anwodolɛ anzɛɛ kpanyinliyɛlɛ anzɛɛ esiane bie ati bɛbawu anzɛɛ bie a awie mɔ a bahu bɛ la noko ɛ? (Nol. 9:11; Zɛk. 14:13) Asoo menli ɛhye mɔ bie baboka bɛdabɛ mɔɔ “bɛnle tenlenema” mɔɔ bɛbadwazo bɛ wɔ ewiade fofolɛ ne anu la anwo ɔ? Yɛnze.
MƆƆ YƐZE LA
11. Duzu a Gyihova bagyinla zo abua menli ndɛne wɔ Amagɛdɔn a?
11 Yɛze mɔɔ ɔbasisi kenle bie la anwo edwɛkɛ dɔɔnwo. Kɛ neazo la, yɛze kɛ bɛbagyinla kɛzi menli nee Kelaese amediema ne mɔ lile la azo a bɛabua bɛ ndɛne wɔ Amagɛdɔn ne anu a. (Mat. 25:40) Menli mɔɔ bɛbagyinla bɛdabɛ mɔɔ bɛkpokpa bɛ nee Kelaese anzi la a bɛbabua bɛ ndɛne kɛ bɛle mboane a. Eza yɛze kɛ wɔ anwongyelelɛ kpole ne anu bɔbɔ, ɛnee Kelaese amediema ne mɔ bie tɛbɔ azɛlɛ ye azo, na ɔka ekyii Amagɛdɔn ne bɔ ɔ bo a yɛɛ bɛbava bɛ bɛahɔ anwuma a. Mekɛ ala mɔɔ Kelaese amediema ne mɔ bie tɛbɔ azɛlɛ ye azo la, ɔbahola yeara ye kɛ menli mɔɔ lɛ ahonle kpalɛ la banyia nwolɛ adenle agyinla bɛ nzi na bɛaboa gyima mɔɔ bɛlɛyɛ la. (Mat. 25:31, 32; Yek. 12:17) Duzu ati a nɔhalɛ edwɛkɛ ɛhye mɔ hyia a?
12-13. Saa menli bie mɔ nwu kɛ bɛzɛkye “Babelɔn Kpole” ne a, duzu a bɛbayɛ a? (Eza nea nvoninli ne mɔ.)
12 Wɔ anwongyelelɛ kpole ne anu bɔbɔ, ɔbahola yeara ye kɛ menli mɔɔ banwu kɛ bɛzɛkye “Babelɔn Kpole” ne la bie mɔ bahakye kɛ Gyihova Alasevolɛ ɛha ye mekɛ tendenle kɛ edwɛkɛ ɛhye bazi. Asoo bɛdabɛ mɔɔ bɛbanwu ninyɛne ɛhye mɔ la bie mɔ bahakyi bɛ subane ɔ?—Yek. 17:5; Yiz. 33:33.
13 Saa ɔba ye zɔ a, ɔbayɛ kɛ mɔɔ zile wɔ Yigyibiti wɔ Mosisi mekɛ zo la. Kakye kɛ “menli gyɛne dɔɔnwo” bie hɔbokale Yizilayɛma anwo wɔ bɛ Adendulɛ ne anu. Bie a menli ɛhye mɔ bie bɔle ɔ bo nyianle diedi wɔ mekɛ mɔɔ bɛnwunle kɛ Mosisi kɔkɔbɔlɛ mɔɔ fale Ngyegyelɛ Bulu ne anwo la ɛra nu la. (Ɛzɛ. 12:38) Saa debie zɛhae bie si wɔ mekɛ mɔɔ bɛzɛkye Babelɔn Kpole ne la a, asoo ɔbayɛ yɛ nyane kɛ ɔka ekyii awieleɛ ne ba la yɛɛ akee awie mɔ ɛraboka yɛ nwo ɔ? Kyɛkyɛ! Yɛkulo kɛ yɛda yɛ anwuma Selɛ ne subane ne bie ali, ɔle “anwunvɔnezelɛ nee ahunluyelɛyelalɛ Nyamenle, ɔkyɛ na yeava ɛya yɛɛ ɛlɔlɛ kpundii nee nɔhalɛlilɛ ɛyi ye tɛkɛɛ.”b—Ɛzɛ. 34:6.
Menli mɔɔ bɛbanwu kɛ bɛzɛkye “Babelɔn Kpole” ne la bie mɔ bahakye kɛ Gyihova Alasevolɛ ɛha ye mekɛ tendenle kɛ edwɛkɛ ɛhye bazi (Nea ɛdendɛkpunli 12-13)d
14-15. Saa awie banyia dahuu ngoane a, asoo ɔgyi mekɛ mɔɔ ɔbawu anzɛɛ ɛleka mɔɔ ɔde la azo ɔ? Kilehile nu. (Edwɛne 33:4, 5)
14 Ɔyɛ a yɛte kɛ awie mɔ ɛlɛka bɛ busuanli bie mɔɔ ɔnzonle Gyihova la anwo edwɛkɛ kɛ, “Ɔle kpalɛ kɛ ɔbawu kolaa na anwongyelelɛ kpole ne abɔ ɔ bo ɔluakɛ ɔbamaa yeanyia ewudwazo.” Adwenle kpalɛ ti a bɛka zɔhane edwɛkɛ ne a. Noko awie banyia dahuu ngoane kenle bie a, ɔngyi mekɛ mɔɔ ɔbawu la azo. Gyihova le Ndɛnebuavolɛ mɔɔ di munli—ɔdi pɛlepɛle yɛɛ ɔbua ndɛne fɔɔnwo. (Kenga Edwɛne 33:4, 5.) Yɛbahola yɛanyia anwodozo kɛ, “azɛlɛ ye kɔsɔɔti Ndɛnebuavolɛ ne” bayɛ mɔɔ tenrɛ la.—Gyn. 18:25.
15 Eza ndelebɛbo wɔ nu kɛ yɛbaha kɛ saa awie banyia dahuu ngoane kenle bie a, ɔngyi ɛleka mɔɔ ɔde la azo. Ɔnrɛra ye ɛlɛ kɛ Gyihova babua menli mgbe dɔɔnwo mɔɔ dede maanle ngakyile mɔɔ bɛammaa bɛannyia nwolɛ adenle ɛlɛ kɛ bɛbazukoa Belemgbunlililɛ ne anwo debie la ndɛne kɛ bɛle “mbɔnkye.” (Mat. 25:46) Azɛlɛ ye kɔsɔɔti Ndɛnebuavolɛ ne mɔɔ yɛ mɔɔ tenrɛ la dwenle menli ɛhye mɔ anwo kpalɛ tɛla yɛ. Yɛnze kɛzi Gyihova bali ninyɛne nwo gyima wɔ anwongyelelɛ kpole ne anu la. Bie a menli ɛhye mɔ bie banyia nwolɛ adenle azukoa Gyihova anwo debie, anyia ye nu diedi na bɛagyinla Gyihova afoa wɔ mekɛ mɔɔ ɔbade ye duma nwo wɔ maanle maanle ne mɔ kɔsɔɔti anyunlu la.—Yiz. 38:16.
Saa anwongyelelɛ kpole ne bɔ ɔ bo a, . . . asoo bɛdabɛ mɔɔ bɛbanwu ninyɛne ɛhye mɔ la bie mɔ bahakyi bɛ subane ɔ?
16. Duzu a yɛranwu ye wɔ Gyihova anwo a? (Eza nea nvoninli ne.)
16 Baebolo ne mɔɔ yɛzukoa la ɛmaa yɛranwu kɛzi Gyihova bu dasanli ngoane kɛ ɔsonle bolɛ kpole la. Ɔvale ɔ Ra ne ɔbɔle afɔle amaa yɛ muala yɛanyia anyelazo kɛ yɛbadɛnla ngoane nu dahuu. (Dwɔn 3:16) Yɛ muala yɛnwu kɛ Gyihova kulo yɛ. (Aye. 49:15) Ɔze yɛ nuhua ko biala duma. Nɔhalɛ nu, ɔze yɛ nuhua ko biala kpole kpalɛ mɔɔ saa yɛwu bɔbɔ a, ɔbahola yeadwazo yɛ ɔluakɛ ɔkakye yɛ nwo edwɛkɛ biala nee debie biala mɔɔ yɛze la! (Mat. 10:29-31) Nɔhalɛ nu, yɛbahola yɛanyia anwodozo bɔkɔɔ kɛ, yɛ anwuma Selɛ ne mɔɔ lɛ ɛlɔlɛ la babua awie biala ndɛne mɔɔ fɛta la, ɔluakɛ ɔze nrɛlɛbɛ, ɔyɛ mɔɔ tenrɛ yɛɛ ɔse anwunvɔne.—Gye. 2:13.
Yɛbahola yɛanyia anwodozo bɔkɔɔ kɛ, Gyihova babua awie biala ndɛne mɔɔ fɛta la, ɔluakɛ ɔze nrɛlɛbɛ, ɔyɛ mɔɔ tenrɛ yɛɛ ɔse anwunvɔne (Nea ɛdendɛkpunli 16)
17. Duzu a yɛbazuzu nwo wɔ edwɛkɛ bieko anu a?
17 Ndelebɛbo fofolɛ ɛhye mɔ ɛmaa yɛnwu kɛ yɛ edwɛkɛhanlɛ gyima ne hyia ndɛndɛ kpalɛ ɛnɛ tɛla mekɛ biala. Duzu ati a yɛkola yɛka ye zɔ a? Na duzu a ka yɛ maa yɛkɔ zo yɛbɔ edwɛkpa ne nolo mɔɔ yɛngyakyi a? Yɛbazuzu kpuya ɛhye mɔ anwo mualɛ ne anwo wɔ edwɛkɛ bieko anu.
EDWƐNE 76 Kɛzi Ɛte Nganeɛ Ɛ?
a Saa ɛkpondɛ kɛ ɛnwu deɛmɔti yɛyɛ nzenzaleɛ ɛhye la anwo edwɛkɛ dɔɔnwo a, nea edwɛkɛ, “Kɛ Ɛkpondɛ Kɛ Ɔba Ye La Ɛne” wɔ March 15, 2015, Ɛzinzalɛ Arane ne m. 3-8 anu.
b Bɛsɛkye Babelɔn Kpole ne bɛwie a, bɛbazɔ Gyihova azonvolɛ kɔsɔɔti bɛanlea wɔ Gɔgo mɔɔ vi Meegɔgo la ɛtetalɛ ne anu. Bɛbazɔ awie biala mɔɔ ɔbaraboka Nyamenle menli ne anwo wɔ Babelɔn Kpole ne ɛzɛkyelɛ ne anzi la noko bɛanlea.
c NVONINLI NE ANWO NGILENU: Nvoninli nsa mɔɔ ɛlɛkile deɛmɔti bie a awie mɔ ɛnrɛde edwɛkɛ mɔɔ bɛlɛbɔ ye nolo wɔ ewiade amuala la: (1) Raalɛ bie mɔɔ de ɛleka mɔɔ ɛzonlenlɛ mɔɔ ɛlie duma wɔ ɛkɛ la maa ɔyɛ se kɛ ɔbazukoa edwɛkpa ne la, (2) agyalɛma bie mɔɔ de ɛleka mɔɔ maanyɛlɛ ngyehyɛleɛ ne ɛmmaa adenle kɛ bɛbabɔ edwɛkpa ne nolo yɛɛ ɔmaa ɔyɛ esiane kpole kɛ bɛbayɛ zɔ la, yɛɛ (3) nrenyia bie mɔɔ de ɛleka mɔɔ wɔ moa kpalɛ ɔti bɛngola bɛngɔ ɛkɛ ne la.
d NVONINLI NE ANWO NGILENU: Bɛlɛra bie mɔɔ vile nɔhalɛ ne anu la ɛhakye mɔɔ ɔzukoale ye wɔ “Babelɔn Kpole” ne ɛzɛkyelɛ nwo la. Yehakyi ye subane na yezia yera ye awovolɛ mɔɔ bɛle Kilisienema la ɛkɛ. Saa ninyɛne zɛhae bie sisi a, yɛkulo kɛ yɛsukoa yɛ anwuma Selɛ ne mɔɔ se anwunvɔne na ɔlɛ ahunluyelɛyelalɛ la na yɛdi fɛlɛko kɛ ɛtanevolɛ ko ɛzia ɛra la.