Lo Luk Bee Ɛm
3 Bu lo eree 15 zua loo bɛbɛɛ Taiberiɔs Siza, sɔ̄ Pɔntiɔs Pailet bee le mɛnɛ Judia, Hɛrɔd* bee le aa bɛɛ Galilii, Filip ye wuga bee le aa bɛɛ barasī Ituria le Trakonaitis, e Laisenias bee le aa bɛɛ Abailini, 2 bu gbo dee Annas nɛɛ tɛsī ewɔp le Keafas, Bari bee kɔ ue nɛ Jɔn nwiī Zekaraia bie bu kpo-sagara-wii.
3 Nyɔɔwo, a bee kii dɛ̄dɛɛ̄ kɛ̄ a le barasī Jɔdan sa zue kɔ liamaā lu nu a tɔgɛ kɔ nɛɛ ekiiya lokwa alu e’aaloo ye pɔrɔ ye nɛ, 4 dookɛ̄ a bee lu e’ɛm bu kpa nɛɛ mɔmanudɛɛ̄ Aizaia doo kɔ: “Ziī muɛ̄ gaa wiikpā bu kpo-sagara-wii kɔ: ‘Kwaa dee Jɛhova!* Dooraa kɔ ye dee a lera. 5 Elu ebue dɛ̄dɛɛ̄ pɛɛkɛ̄, e elu edoo kɔ dɛ̄dɛɛ̄ kpokɛ̄ a kuūna; elu edoo kɔ dee a bɛga a lera sa doo kɔ dɛ̄dɛɛ̄ dee alu kpog-kpog a ɔɔba; 6 e dɛ̄dɛɛ̄ nɛɛ emuɛ sīdee Bari esu kpɔā pya nɛɛ.’”
7 E a bɔātɛ̄ ekɔ nɛ gbɛnɛkpo nɛɛ a bee ye lu loo kɔ a lie wa maā kɔ: “Bɔɔlo miɔŋɔ bɔm, mɛɛ na a i zuurabahtɔ̄ kɔ bui teera aaloo saŋ a gaa lu a? 8 Nyɔɔwo, dooraa nu a tɔgɛ kɔ bui ekiiya. Bui aa kɛɛrɛ kɔ, ‘Ebreham na ilii tɛ a.’ Nyɔnɛbee m kɔ i nɛ, Bari dap doo kɔ Ebreham a ɛrɛ miɔŋɔ aāloo pya ekpodɛm ama. 9 Bu kaka, sii e’ina ekatɛ̄ pya te a. Nyɔɔwo, ɛrɛgebah te a naa mum le bee elu efii sa top tɛrɛ bu miā.”
10 E gbɛnɛkpo nɛɛ a bee le aa ye bip kɔ: “Lo a le wo, ena i doo a?” 11 A ture wa nɛ kɔ: “Doolo nɛɛ a ɛrɛ baɛ ka bɛloo* a dɔɔ̄ nɛ nɛɛ a naa ɛrɛ, e nɛɛ a ɛrɛ nuede a doonage wo.” 12 E pya tup etup bee lunage kɔ a lie wa maā, e ba bee ye kɔ nɛ kɔ: “Nɛɛ Tɔgɛnu, ena i doo a?” 13 A bee wa kɔ nɛ kɔ: “Bui aa tup* emanyɔɔ ɛrɛgebah nu a wee lu ekpɛ.” 14 Pya nɔ̄ bee ye bipnage kɔ: “Ena ili i doo a?” A kɔ wa nɛ kɔ: “Bui aa su bah ekpo aā* lɔgɔ nɛɛ ale dɛrɛ esah ue nɛɛ, mɛ dooraa kɔ nu bui ɛrɛ* a gbɔɛ̄ i loo.”
15 Kuma sɔ̄ pya nɛɛ aa bee ɛmadɛɛ̄ Kraist a, ba bee bɔātɛ̄ ekɛɛrɛ bu wa beenyiɛ kiiloo Jɔn kɔ, “Ekɔ alɛ na lo Kraist ani?” 16 Jɔn bee ture nɛ dɛ̄dɛɛ̄ aba kɔ: “Mda su maā i liamaā, mɛ lo nɛɛ a kuī ee mda gaa lu, nɛɛ mm bɔloo eyɔbara eziī loo ye kpa ekaɛtɔ. Alɛ eli i maā tɛ̄maloo kaɛ edɔɔ̄ le miā. 17 Ye nu lɛma esaɛ loo kpakpaa le ye bah lo esu kwaā ye kɛ̄ zag esaɛ lɛɛ loo kpakpaa ɛɛrɛ sa bɔŋɛnɛloo ye kpakpaa wheat yere bu ye tɔ kpooge nu,* mɛ a gaa le ɔp esaɛ a aaloo bu miā a naale edap lu ezimɛ.”
18 A bee kɔnage gbɛnɛ-edo ue zuurabahtɔ̄ wa nɛ sa kiisī lo ezue le yereue nɛ pya nɛɛ. 19 Mɛ nyɔnɛbee Jɔn bee kɔgara ue Hɛrɔd lo aa bee bɛɛ lo barasī kumaloo Herodias wa ye wuga le kumaloo dɛ̄dɛɛ̄ pɔrɔ pɔrɔ nu a bee doo a, 20 Hɛrɔd bee sinagekɛ̄ doo lo ama gbaāloo pya nu ebee doo; a bee aa Jɔn yere kpɔgɔrɔ.
21 Mɛ sɔ̄ Jɔn aa bee limaā gbɛnɛ-edo nɛɛ a, a bee linage maā Jizɔs. E sɔ̄ aa bee yere kara, bunyɔɔ bee kpaā, 22 kaɛ edɔɔ̄ bee sira kɛ̄ bu bera bɛmaakuku sa ye dɛɛa nyɔɔ, e ziī muɛ̄ a aa bunyɔɔ bee kɔ: “Olo na mdaa Nwiīnɛɛdam m wereloo a; bu mɛ ɛɛ a loo.”
23 Jizɔs ebee dap lu 30 zua sɔ̄ a bee bɔātɛ̄ ye esiatam, e pya nɛɛ wee ye suāloo nua
nwiī Josɛf,
nwiī Hilai,
24 nwiī Matat,
nwiī Livai,
nwiī Mɛlkai,
nwiī Jennai,
nwiī Josɛf,
25 nwiī Matataias,
nwiī Emɔs,
nwiī Nihum,
nwiī Eslai,
nwiī Naggai,
26 nwiī Meat,
nwiī Matataias,
nwiī Semein,
nwiī Josɛk,
nwiī Joda,
27 nwiī Joanan,
nwiī Risa,
nwiī Zerubabɛl,
nwiī Shiɛltiɛl,
nwiī Nirai,
28 nwiī Mɛlkai,
nwiī Adai,
nwiī Kosam,
nwiī Ɛlmadam,
nwiī Ɛa,
29 nwiī Jizɔs,
nwiī Ɛlieza,
nwiī Jorim,
nwiī Matat,
nwiī Livai,
30 nwiī Simiɔn,*
nwiī Judas,
nwiī Josɛf,
nwiī Jonam,
nwiī Elaiakim,
31 nwiī Melia,
nwiī Mena,
nwiī Matata,
nwiī Netan,
nwiī Devid,
32 nwiī Jesi,
nwiī Obɛd,
nwiī Boaz,
nwiī Salmɔn,
nwiī Nashɔn,
33 nwiī Aminadab,
nwiī Aanai,
nwiī Hɛzrɔn,
nwiī Pirɛz,
nwiī Juda,
34 nwiī Jekɔb,
nwiī Aizik,
nwiī Ebreham,
nwiī Tira,
nwiī Nehɔa,
35 nwiī Sirɔg,
nwiī Riu,
nwiī Pilɛg,
nwiī Iba,
nwiī Shila,
36 nwiī Keainan,
nwiī Apakshad,
nwiī Shɛm,
nwiī Noa,
nwiī Lemɛk,
37 nwiī Metusɛla,
nwiī Inɔk,
nwiī Jerɛd,
nwiī Maheleliɛl,
nwiī Keainan,
38 nwiī Inosh,
nwiī Sɛt,
nwiī Adam,
nwiī Bari.