Nɔ Lo Ekɛɛrɛ Nu Dookɛ̄ Jɛhova Le Jizɔs Doo

1-2. Pya ena a legara bu wereloo Jɛhova a, e bu mɛ sīdee na Jizɔs bee tɔgɛ kɔ a wereeloo Jɛhova aābu dɛ̄dɛɛ̄ ye ekɛɛrɛ a?

“O WERELOO Nɛɛ-a-i-ɛrɛ o Bari aa bu dɛ̄dɛɛ̄ o beenyiɛ, le bu dɛ̄dɛɛ̄ o piogi, le bu dɛ̄dɛɛ̄ o ekpo, le bu dɛ̄dɛɛ̄ o ekɛɛrɛ.” (Luk 10:27) Jizɔs bee doo kɔ lok a kuī eera bu Lok Mozis a sirapie leere. Yere nukuādɛɛ̄loo kɔ, ziī nu i su wɛāloo Jɛhova na i beenyiɛ, lo a ɛrɛ nu edoo kiiloo pya nu a i taɛ ale pya nu a i nia, le kɛ̄ nu i tɔɔ̄loo doo. E dɔɔ̄na nu i sunage wɛāloo Jɛhova na dɛ̄dɛɛ̄ i piogi le i ekpo. Mɛ a ɛrɛnage dɔɔ̄na nu i su wɛāloo Jɛhova, ɛɛ na i ekɛɛrɛ, lo a ɛrɛ nu edoo kiiloo kɛ̄ i kɛɛrɛ nu doo. Kerewo, alu kaka kɔ ii le edap dābeeloo dɛ̄dɛɛ̄ kɛ̄ Jɛhova kɛɛrɛ nu doo leere. Mɛ i dap dā kina beeloo nu alu ekɛɛrɛ Bari tɛ̄maloo enɔ “ekɛɛrɛ Kraist,” nyɔnɛbee Jizɔs suā taɛ kɛ̄ ye Tɛ wee kɛɛrɛ nu doo, sa alɛ bee ye nɔ bu sīdee a mma.—1 Kɔr 2:16 le study note a nyɔɔnɛ ue a kɔ “we do have the mind of Christ,” bu New World Translation.

² Jizɔs bee wereloo Jɛhova aābu dɛ̄dɛɛ̄ ye ekɛɛrɛ. Jizɔs bee suā nu Bari gbī kɔ a doo, e a bee biaɛfii lo edoo lo nu, kereadoo dodoo wo ekura kɔ etɔga nyɔɔ doo nu a lee. Nyɔɔbee Jizɔs bee sere ekɛɛrɛ nyɔɔ doo nu a nia ye Tɛ a, a naa bee iye kɔ lɔgɔ dɔɔ̄na nu a kuī ye loo ee doo nu a nia ye Tɛ.

3. Ena nɛɛ lɛɛratam Pita bee nɔ aāloo Jizɔs a, e ena Pita bee yere mɛm loo Pya Nɛɛ Kraist kɔ ba a doo a? (1 Pita 4:1)

³ Pita le pya dɔɔ̄na nɛɛ lɛɛratam bee ɛrɛ gbɛnɛ dee alu keebee lo esu gbɛnɛkpo sɔ̄ tɔ̄makpaɛ̄ Jizɔs sa nɔ kɛ̄ Jizɔs tɔgɛnu doo. Sɔ̄ Pita bee ɛm ye tua kpa kɛɛ̄ leredee a aaloo kaɛ edɔɔ̄, a bee yere mɛm loo Pya Nɛɛ Kraist kɔ ba a kpooga wa loo tɛ̄maloo ekɛɛrɛ nu dookɛ̄ Kraist doo.a (Buū 1 Pita 4:1.) Bu muɛ̄ ue Grik lo a bee lu esu ɛma dɔ ama, ue Pita bee ɛm bu dɔ ama lo alu etap nua “kpooga loo” kiiloo sɔ̄ pya nɔ̄ wee yaa sa aara dɛ̄dɛɛ̄ wa nu nɔ̄ lo ekpɛ̄naloo baɛ benɔ̄. Nyɔɔwo, lo Pya Nɛɛ Kraist nɔ ekɛɛrɛ Jizɔs, ba e’ɛrɛ nu ba esu beā taɛ lo edoo pɔrɔ, le nyɔuwe Setan gaa bɛɛ ama.—2 Kɔr 10:​3-5; Ɛfɛs 6:12.

4. Bu mɛ sīdee na ekobee ue ama edap i yerebah nɛ kɔ i su zuurabahtɔ̄ Pita bee nɛ yerebu dogo a?

⁴ I gaa le nɔ kɛ̄ Jizɔs kɛɛrɛ nu doo le kɛ̄ i dap ye nɔ doo. I gaa le nɔ (1) kɛ̄ i dap kɛɛrɛ nu dookɛ̄ Jɛhova wee kɛɛrɛ nu doo, lo eyerebah doo kɔ dɛ̄dɛɛ̄ ii i kɛɛrɛ nu bu aba sīdee, (2) kɛ̄ i dap kumaloo kɛ̄ doo, le (3) kɛ̄ i dap ɛrɛ kaāna ekɛɛrɛ tɛ̄maloo edɛɛa nyɔɔ Jɛhova bu yere kara doo.

NƆ LO EKƐƐRƐ NU DOOKƐ̄ JƐHOVA WEE KƐƐRƐ NU DOO

5. Bu mɛ sīdee na Pita naa bee kɛɛrɛ nu dookɛ̄ Jɛhova kɛɛrɛ nu doo sɔ̄ a bee kɔ nɛ Jizɔs kɔ: “Alɔ, Nɛɛ-a-i-ɛrɛ, alɛ ama naale esira a loo” a?

⁵ Dooraa i naa ɛp nu a bee sira ziī sɔ̄ Pita naa bee kɛɛrɛ nu dookɛ̄ Jɛhova kɛɛrɛ nu doo. Jizɔs bee kɔ nɛ pya ye nɛɛ lɛɛratam kɔ a gaa le kiie Jerusalɛm, e pya zaāsī yigabari e’aae ye, ye tɔg, sa ye fɛ. (Mat 16:21) Pita bee suā kɔ Jizɔs na alu aba bɛābu pya Izrɛl bee ɛrɛ a, sa lunage Mɛsaia a bee lu eyira yii loo a, lo ekpɔā pya nɛɛ Bari. Nyɔɔwo, naadabah a bee agaloo Pita lo eyiga kɔ Jɛhova elɛɛbahloo kɔ alu efɛ Jizɔs. (Mat 16:16) Nyɔɔwo, Pita bee su Jizɔs kuma barakɛ̄ sa ye kɔ nɛ kɔ: “Alɔ, Nɛɛ-a-i-ɛrɛ, alɛ ama naale esira a loo.” (Mat 16:22) Nyɔɔbee Pita naa bee kɛɛrɛ nu dookɛ̄ Jɛhova kɛɛrɛ nu doo nyɔɔ ue ama a, ye ekɛɛrɛ naa bee gbaaloo lo Jizɔs.

6. Bu mɛ sīdee na Jizɔs bee tɔgɛ kɔ kɛ̄ alɛ kɛɛrɛ nu doo gbaaloo kɛ̄ Jɛhova kɛɛrɛ nu doo a?

⁶ Jizɔs bee suā kɛ̄ ye Tɛ wee kɛɛrɛ nu doo, e a bee ye nɔ bu sīdee a mma. Jizɔs bee kɔ nɛ Pita kɔ: “Tɛɛ̄ mɛ kii dumɛ, Setan! Olo na nu a doo kɔ m dɔ daa zaɛ̄; nyɔnɛbee oo kɛɛrɛ ekɛɛrɛ nu Bari mɛ loo pya nɛɛ.” (Mat 16:23) Pita bee dap ɛrɛ lenu a yira nyɔɔ kɔ Jizɔs aa kɔ e’ue, kerewo, Jizɔs bee kiī ye ue zuurabahtɔ̄. Jizɔs bee suā kɔ lokwa a dabe doo nu a nia Jɛhova, a ɛrɛ etɔga sa u. Nu Pita bee nɔ aāloo ue Jizɔs bee ye kɔ nɛ ama na kɔ alu ebɛɛ̄ kɔ a kɛɛrɛ nu dookɛ̄ Bari kɛɛrɛ nu doo. Ili dapnage nɔ ziī gbɛnɛ nu a kuī aāloo nu a bee sira ama.

7. Bu mɛ sīdee na sɔ̄ esaa Pita bee tɔgɛ kɔ a kpɛ̄naeloo ekwabahloo alɛɛ ekɛɛrɛ doo kɔ a gbaaloo lo Jɛhova a? (Ɛp foto a le nyɔɔ .)

⁷ Sɔ̄ esaa, Pita bee doo nu a tɔgɛ kɔ a gaa gbī enɔ lo ekɛɛrɛ nu dookɛ̄ Jɛhova kɛɛrɛ nu doo. A bee le sɔ̄ Jɛhova bee gbī kɔ pya dɔɔ̄na buɛ̄ a naa kooa a nuūna pya ye nɛɛ. Bari bee lɛɛra Pita kɔ a zue ue nɛ ziī nɛɛ a naale nɛɛ Juu lo ye bee kura Kɔniliɔs, lo elu tuatua nɛɛ enuūna aā eku pya nɛɛ a naa lu Juu lo ba etaāŋabah Bari. Pya Juu naa wee gbī egbaaloo pya a naa lu Juu, nyɔɔwo, a bee lu ebɛɛ̄ kɔ Pita a kwabahloo kɛ̄ a kɛɛrɛ nu doo lokwa a dap zue ue nɛ pya a naa lu Juu. Sɔ̄ Pita bee muɛ nu alu ekɛɛrɛ Bari kiiloo ue ama, alɛ bee kwabahloo kɛ̄ a kɛɛrɛ nu doo. Nu a bee sira aabu na kɔ, sɔ̄ Kɔniliɔs bee kɔ nɛ Pita kɔ alu ye tɔ, Pita bee si sa naa bee doo “lɔgɔ amana.” (Doonu Pya Nɛɛ Lɛɛratam 10:​28, 29) A bee zue ue nɛ Kɔniliɔs le pya ye tɔ, e ba bee liamaā.—Doonu Pya Nɛɛ Lɛɛratam 10:​21-23, 34, 35, 44-48.

8. Bu mɛ sīdee na i dap tɔgɛ kɔ kɛ̄ ili kɛɛrɛ nu doo gbaaloo kɛ̄ Jɛhova kɛɛrɛ nu doo a? (1 Pita 3:8 le footnote a nyɔɔnɛ ue a le bu dɔ ama bu New World Translation.)

⁸ Sɔ̄ pio zua etɛ̄na, Pita bee yere mɛm loo Pya Nɛɛ Kraist kɔ: “Ɛrɛaa aba ekɛɛrɛ bu edɔɔ̄.” (Buū 1 Pita 3:8 le footnote a nyɔɔnɛ ue a le bu dɔ ama bu New World Translation.) I dap nyɔɔnɛ pya i wuga nɛɛdam le nɛɛwa ɛrɛ aba ekɛɛrɛ bu edɔɔ̄ tɛ̄maloo enɔ kɛ̄ Jɛhova wee kɛɛrɛ nu doo lo i dap nɔ aābu Baibol. Bu edobah, Jizɔs bee kɔ nɛ pya a wee ye nyɔɔnɛ dumɛ kɔ ba a su Buɛ̄-mɛnɛ Bari nua tuatua bu wa dum. (Mat 6:33) Nyɔɔwo, ziī nɛɛ zue ue a le bu o bɔŋanaloo dap biaɛfii lo eyiibu ɛrɛgebah sīdee esiatam mmɛɛ sɔ̄. Taā i ye kɔ nɛ kɔ: “Alɔ, o aa nɔɔ doo wo,” sa ye ɔɛloo, i yere ye mɛm loo sa kɔ pya lele nu akiiloo nu a seeasī lo edoo ama sa ye yerebah nɛ.

LU NƐƐ A KUMALOOKƐ̄

9-10. Jizɔs bee tɔgɛ kumalookɛ̄ alu keebee doodoo wa?

⁹ Uunɛ lɛɛ Jizɔs gae u, a bee tɔgɛ Pita le pya dɔɔ̄na nɛɛ lɛɛratam ziī gbɛnɛ nu a kuī akiiloo kumalookɛ̄. Lɛɛ a gae lu lo sɔ̄, Jizɔs ebee yere Pita le Jɔn kɔ ba a kii wee kwakɛ̄ loo kpɛdumɛ nuede, lo enyɔɔnɛ wa de doodoo nɛɛ a nyɔɔ kɛnɛkɛ̄. Naadabah, ziī nu a bee le bu kwakɛ̄ loo nuede ama na lo emuɛ kɔ ziī gbɛnɛka fɛrɛ le ebakaɛ̄-biā-maā a le kɛ̄, lokwa pya saanɛɛ dap loga wa ekpotɔ lɛɛ ba gae denu. Mɛ mɛɛ na ekumalookɛ̄ sa sitam a kiikɛ̄ ama lo elog tɔ pya dɔɔ̄na a?

¹⁰ Jizɔs naa bee pee sɔ̄ lo esitam ama. A bee doo nu a tɔgɛ kumalookɛ̄ alu keebee. Bu kaka, a bee degere pya ye nɛɛ lɛɛratam sɔ̄ ba bee muɛ Jizɔs a gaa sitam pya zooro wee si. Jizɔs bee su ye bɛloo deenyɔɔ lɛaloo, su ye ebakaɛ̄-biā-maā, sa su maā tɔ̄ bu lo gbɛnɛka fɛrɛ sa bɔātɛ̄ elog wa tɔ. (Jɔn 13:​4, 5) Jizɔs bee log ekpotɔ dɛ̄dɛɛ̄ 12 pya ye nɛɛ lɛɛratam. Lo ama bee dap su gbɛnɛkpo sɔ̄, a bee lognage tɔ Juda, lo alu nɛɛ esah a lɛɛ ye sa ye oo. Kerewo, Jizɔs bee kumalookɛ̄ sa si dɛ̄dɛɛ̄ lo tam. Lɛɛ Jizɔs fɛɛrɛloo wa baatɛ̄ nɛ kɔ: “Bui suāge nu m edoora i loo ni? Bui kue mɛ Nɛɛ-tɔgɛ-nu le Nɛɛ-a-i-ɛrɛ; e bui kɔ leere, nyɔɔbee kɛ̄ m le doolo. Nyɔɔbee wo lo a le mda lu Nɛɛ-a-i-ɛrɛ le bui Nɛɛ-tɔgɛ-nu sa m eloga i tɔ, bɔɔlo bɔɔloo loo ɛɛnɛge elog tɔ ɛnia bui.”—Jɔn 13:​12-14.

11. Bu mɛ sīdee na Pita bee tɔgɛ kɔ enɔāe kumalookɛ̄ a? (1 Pita 5:5) (Ɛpnage foto.)

¹¹ Pita bee nɔnu aāloo kɛ̄ Jizɔs bee kumalookɛ̄ doo. Sɔ̄ Jizɔs e’obia kii bunyɔɔ, Pita bee si ziī nyɛŋiatam tɛ̄maloo ebo ziī gbara lo a bee lu kɔgah aādee a bee mɛā. (Doonu Pya Nɛɛ Lɛɛratam 1:​8, 9; 3:​2, 6-8) Gbɛnɛ nyɛŋiatam Pita bee si ama bee doo kɔ pya nɛɛ alu sa ye tɛɛ̄ ɛŋɛnɛ. (Doonu Pya Nɛɛ Lɛɛratam 3:11) Ekɔ nyɛŋiatam Pita bee si ama bee doo kɔ a kaaga sa nɛ ka aba ɛɛ, nyɔɔbee a bee lu ekpɔā ye aākɛ̄ bie barasī kɛ̄ pya nɛɛ wee ɛp siābee le gbɛnɛ dɔ nua nu a kuī ni? Eeye, taāwo Pita bee kumalookɛ̄, sa wa kɔ nɛ kɔ ba a nɛ ka Jɛhova le Jizɔs, sɔ̄ a bee kɔ: “Tɛ̄maloo yira bu [bee Jizɔs], lo bui muɛ sa suāloo, edoora kɔ nɛɛ ama a agaloo.” (Doonu Pya Nɛɛ Lɛɛratam 3:​12-16) Pya bee ue Pita su kɔā ue bu kpa a bee ɛm ma Pya Nɛɛ Kraist akiiloo kɛ̄ alu ebɛɛ̄ kɔ i nɔ kumalookɛ̄ doo, dap doo kɔ i nyɛŋiabu sɔ̄ Jizɔs bee su ebakaɛ̄-biā-maā fīma-kɛ̄tɛ̄ ye sa log tɔ pya a wee ye nyɔɔnɛ dumɛ.—Buū 1 Pita 5:5.

12. Bu mɛ sīdee na i kiisī lo enɔ kumalookɛ̄ doodoo Pita a?

¹² I dap nɔ edobah Pita tɛ̄maloo ekiisī lo enɔ lo elu nɛɛ a kumalookɛ̄. Nyɛŋiabu kɔ kaka kumalookɛ̄ naale aba kɔ nu a bɔloo. Bee ue Pita bee su kɔā ue kiiloo kumalookɛ̄ ɛrɛ nu edoo kiiloo nu i kɛɛrɛ taɛ bu i li, a bee kɔ, “beenyiɛ a kumalookɛ̄.” I wee sitam nɛ pya dɔɔ̄na nyɔɔbee i wereloo Jɛhova, le nyɔɔbee i wereloo pya nɛɛ, e a naale nyɔɔbee i gbī kɔ pya nɛɛ a leera i. Lo i su ɛɛbu siātam nɛ Jɛhova le pya i wuga nɛɛdam le nɛɛwa bu ɛrɛgebah sīdee i dap doo, lo sɔ̄ i gaa tɔgɛ kɔ i lu pya a kumalookɛ̄, kereadoo tam i gaa si lu tam pya wuga naa muɛ.—Mat 6:​1-4.

ƐRƐ “KAĀNA EKƐƐRƐ”

13. Naa baatɛ̄ nu ɛrɛ “kaāna ekɛɛrɛ” kura.

¹³ Ena ɛrɛ “kaāna ekɛɛrɛ” kura a? (1 Pit 4:7) Nɛɛ Kraist a ɛrɛ kaāna ekɛɛrɛ wee dasī kɛɛrɛ kɛ̄ Jɛhova ɛp ziī ziī nu doo, sa piiga lo ebiaɛnu fii bu sīdee a gbaaloo ekɛɛrɛ Jɛhova. Dua Nɛɛ Kraist a le doo wo suā kɔ lɔgɔ nu a kuī bu dum ee gbanialoo a ɛrɛ kiikɛ̄ Jɛhova le naale. Dua nɛɛ a le doo wo naa wee ɛp ye loo kuma nyɔɔ, a wee suā kɔ naale dɛ̄dɛɛ̄ nu na alɛ suā a. E a wee tɔgɛ kɔ a dɛɛa nyɔɔ Jɛhova tɛ̄maloo eyere kara ye nɛ sa ye bara kɔ a lere ye dee bah.b

14. Bu mɛ sīdee na Pita naa bee dɛɛa nyɔɔ Jɛhova sɔ̄ Jizɔs bee wa kɔ nɛ kɔ: “Elu edoo kɔ dɛ̄dɛɛ̄ bui a dɔ daa zaɛ̄ mɛ nyɔɔ a bu edɛɛ̄ nii’ee” a?

¹⁴ Kpɛdumɛ uunɛ lɛɛ Jizɔs gae u, a bee kɔ nɛ pya a wee ye nyɔɔnɛ dumɛ kɔ: “Elu edoo kɔ dɛ̄dɛɛ̄ bui a dɔ daa zaɛ̄ mɛ nyɔɔ a bu edɛɛ̄ niī’ee.” Pita bee kɛɛrɛ kɔ a agaeloo, e lɔgɔ nu naale esira, nyɔɔwo a bee kɔ: “Kere dɛ̄dɛɛ̄ nɛɛ dɔ daa zaɛ̄ a nyɔɔ, mm le dɔ daa zaɛ̄ lɔgɔ sɔ̄.” Uunɛ lo dee, Jizɔs bee zuurabahtɔ̄ pio pya a wee ye nyɔɔnɛ dumɛ kɔ: “Tɔɔ̄naa baɛ sa taāŋa.” (Mat 26:​31, 33, 41) Lo Pita bee su lo zuurabahtɔ̄, ebee ɛrɛ e’agaloo lo ekɔ siā kɔ alue nɛɛ a wee nyɔɔnɛ dumɛ Jizɔs. Taāwo, Pita bee anna ye Tɛtɔ, e a bee ye kiɛ̄ gbɛnɛ.—Mat 26:​69-75.

15. Bu mɛ sīdee na Jizɔs bee ɛrɛ kaāna ekɛɛrɛ bu ye kpɛdumɛ uunɛ a nyɔɔ kɛnɛkɛ̄ a?

¹⁵ Jizɔs bee dɛɛa nyɔɔ Jɛhova mmɛnɛ. Kereadoo Jizɔs bee mma, a wee yere kara aā ziī sɔ̄ yii ziī. Lo ama bee ye nɛ e’agaloo kɔ a doo nu Jɛhova ye gbī aābah. (Mat 26:​39, 42, 44; Jɔn 18:​4, 5) Bu kaka, Pita bee nɔnu aāloo kɛ̄ Jizɔs bee bialoo yere kara doo.

16. Bu mɛ sīdee na Pita bee tɔgɛ kɔ e’ɛrɛe kaāna ekɛɛrɛ a? (1 Pita 4:7)

¹⁶ Sɔ̄ sɔ̄ aa kiisī, Pita bee sikɛ̄ dɛɛa nyɔɔ Jɛhova kaāna tɛ̄maloo yere kara. Sɔ̄ Jizɔs bee aakɛ̄ bu luh, a bee nɛ agɛrɛ beenyiɛ Pita le pya dɔɔ̄na nɛɛ lɛɛratam kɔ ba gaa le ɛrɛ kaɛ edɔɔ̄ lokwa ba dap sitam a bee lu enɛ wa lo ezue le yereue. Kerewo, Jizɔs bee wa kɔ nɛ kɔ ba a tɔɔ̄ Jerusalɛm mmɛ sɔ̄ esira doo wo. (Luk 24:49; Doonu Pya Nɛɛ Lɛɛratam 1:​4, 5) Ena Pita bee doo sɔ̄ ba le gaa yira a? Pita le pya dɔɔ̄na Nɛɛ Kraist bee kiisī lo ebiibahkɛ̄ “yere kara.” (Doonu Pya Nɛɛ Lɛɛratam 1:​13, 14) Sɔ̄ esaa, bu tua kpa Pita bee ɛm, a bee yere mɛm loo pya dɔɔ̄na Nɛɛ Kraist kɔ ba a ɛrɛ kaāna ekɛɛrɛ sa dɛɛa nyɔɔ Jɛhova tɛ̄maloo yere kara. (Buū 1 Pita 4:7.) Pita bee nɔ lo edɛɛa nyɔɔ Jɛhova, e wo bee doo kɔ a yerebah nɛ pya wuga sa wa agɛrɛloo.—Gal 2:9.

17. Kereadoo a ɛrɛ pya nu ili para, ena i ɛrɛ ekiisī lo ewee doo a? (Ɛpnage foto.)

¹⁷ Lo e’ɛrɛ kaana ekɛɛrɛ, i ɛrɛ ekiisī lo ewee yere kara nɛ Jɛhova. Kereadoo a ɛrɛ pya nu i para, alunage ebɛɛ̄ kɔ i yere kara nɛ Jɛhova kɔ a baɛ i loo sa i leredeebah. Nyɔɔwo, sɔ̄ i gbī edoo biaɛfii nyɔɔ pya nu a kuī, i yere kara nɛ Jɛhova kɔ a lere i dee bah, nyɔɔbee i dɛrɛ ye nyiɛ nyɔɔ kɔ alɛ suā taɛ nu elee i loo.

18. Bu mɛ sīdee na i dap kwabahloo i ekɛɛrɛ lokwa i kɛɛrɛ nu dookɛ̄ Jɛhova kɛɛrɛ nu doo a?

¹⁸ Naa ɛp kɛ̄ bu i ɛɛ doo kɔ Jɛhova bee i dɛm bu sīdee i dap nɔ pya ye elap dogo. (Jɛn 1:26) Kaka ue a le na kɔ, ii le edap nɔ Jɛhova bu sīdee a mma. (Ais 55:9) Kerewo, doodoo Pita, i kiisī lo enɔ ekɛɛrɛ nu dookɛ̄ Jɛhova wee kɛɛrɛ nu doo, sa kiisī lo elu nɛɛ a kumalookɛ̄ sa ɛrɛ kaāna ekɛɛrɛ.