Bee Jɛhova—Nu A Bɔloo Kɔ A Kura Nɛ Ili

1-2. I tɛɛ̄ doodoo wa suā kɔ bee Jɛhova kuīloo Jizɔs?

LƆGƆ nu a kuīloo Jizɔs ee bee Jɛhova naale. Aba alɛ na edoora kɔ pya nɛɛ a suā bee ye Tɛ ee dɛ̄dɛɛ̄ nɛɛ a. Dookɛ̄ i bee nɔ doo bu ekobee ue i aa a, Jizɔs bee kpɛ̄naloo e’u nyɔɔ bee Jɛhova lo etɔgɛ kɔ Jɛhova le kaɛ le kɔ dɛ̄dɛɛ̄ nu a doo lera. (Maak 14:36; Hib 10:​7-9) E sɔ̄ ebɛɛra bu Bɛbɛɛ Baɛ Boo Le Lop Tup Zua sah, Jizɔs e’obara dɛ̄dɛɛ̄ bɛbɛɛ nɛ ye Tɛ, e a naale ebaɛ kɔ a dasī lu etaāŋa ye loo lɛɛ a gae lɛa bah, nyɔnɛbee a gbī kɔ Jɛhova a su dɛ̄dɛɛ̄ ka. (1 Kɔr 15:​26-28) Wereloo Jizɔs ɛrɛ loo bee Bari tɔgɛ kɛ̄ gbanialoo a nyɔɔnɛ ye Tɛ ɛnia agatɛ̄ doo. Baɛbaɛ beenyiɛ naale loo kɔ dɛ̄dɛɛ̄ nu Jizɔs bee doo tɔgɛ kɔ a wereloo Jɛhova kaāna.

² Jizɔs bee lu a nyɔɔ kɛ̄nɛkɛ̄ lo ekɔ nu Jɛhova gbī kɔ pya nɛɛ a suā wa nɛ. (Jɔn 5:43; 12:13) A bee doo kɔ pya a wee ye nyɔɔnɛ dumɛ a suā bee ye Tɛ. (Jɔn 17:​6, 26) Sɔ̄ a tɔgɛ nu pya nɛɛ le sɔ̄ a bee si nyɛŋiatam, a bee doo kɔ ba a suā leere kɔ Jɛhova na a ye nɛ suānu le ekpo a su daā pya lo nu a. (Jɔn 10:25) E sɔ̄ a bee yere kara nɛ Jɛhova kɔ a kuūdɛɛ̄loo pya a wee ye nyɔɔnɛ dumɛ, a bee bara Jɛhova kɔ a kuū wa dɛɛ̄loo nyɔɔbee “[ye] bee.” (Jɔn 17:11) Lo a le bee Jɛhova bee kuīloo Jizɔs doo wo, tɛɛ̄ doodoo wa na nɛɛ a gaa nyɔɔnɛ dumɛ Kraist bu kaka sīdee naale esuā sa su bee Jɛhova daānu ani?

3. Ena i nɔ bu ekobee ue ama a?

³ Doodoo Pya Nɛɛ Kraist a gaa piiga lo enɔ Jizɔs, i wee nwadɛɛ̄ bee Jɛhova sa ye wereloo. (1 Pit 2:21) Bu ekobee ue ama, i gaa le muɛ nu anua Jɛhova su ye bee kueloo pya a zue “le yereue . . . Buɛ̄-mɛnɛ.” (Mat 24:14) I gaa le nɔnage nu a bɔloo kɔ bee Jɛhova a kura nɛ ziī ziī ili.

“ZIĪ EKU PYA NƐƐ A LE NƐ YE BEE”

4. (a) Nwīgbagbara sɔ̄ lɛɛ Jizɔs gae obia kii bunyɔɔ, amunu tam na a bee nɛ pya a wee ye nyɔɔnɛ dumɛ a? (b) Amunu ebip na i agara a?

⁴ Nwīgbagbara sɔ̄ lɛɛ Jizɔs gae obia kii bunyɔɔ, a bee kɔ nɛ pya a wee ye nyɔɔnɛ dumɛ kɔ: “Bui gaa le su ekpo sɔ̄ kaɛ edɔɔ̄ elu i nyɔɔ, e bɔɔlo gaa le lu pya na ekeebee bu Jerusalɛm, le bu dɛ̄dɛɛ̄ Judia, le Sameria, le mmɛ kuma nyɔuwe.” (Doonu Pya Nɛɛ Lɛɛratam 1:8) Nyɔɔwo, elu ezue lo le yereue mmɛ dɛ̄dɛɛ̄ kɛ̄ a le bu nyɔuwe, e a naale aba bu buɛ̄ Izrɛl. E sɔ̄ sɔ̄ naa binia, pya nɛɛ a le dɛ̄dɛɛ̄ kɛ̄ bu nyɔuwe e’ɛrɛ dee lo elu pya a nyɔɔnɛ dumɛ Jizɔs. (Mat 28:​19, 20) Kerewo, Jizɔs bee kɔ: “Bɔɔlo gaa le lu pya na ekeebee.” Ekɔ elu ebɛɛ̄ kɔ pya aā nɛɛ a nyɔɔnɛ dumɛ Jizɔs ama a suā bee Jɛhova, sɛh ba e’aadee lu aba pya a yira ekeebee loo Jizɔs ni? Pya ue a le bu 15 ekobee loo kpa Doonu Pya Nɛɛ Lɛɛratam eyerebah i nɛ kɔ i agara ebip ama.

5. Bu mɛ sīdee na pya nɛɛ lɛɛratam le pya kanɛɛ a bee le Jerusalɛm bee tɔgɛ kɔ alu ebɛɛ̄ kɔ dɛ̄dɛɛ̄ nɛɛ a suā bee Jɛhova a? (Ɛpnage foto.)

⁵ Bu zua 49 C.E., pya nɛɛ lɛɛratam le pya kanɛɛ a le Jerusalɛm bee gbaa zɔ̄ŋia lo ekɔnia nu pya a naa lu Juu edoo lokwa ba dap lu Pya Nɛɛ Kraist. Sɔ̄ ba ekɔa lo ue sah, Jems alu wuga Jizɔs bee kɔ: “[Pita] bee nɛ kpɛa kɛ̄ Bari bee dasī si loo pya dɔɔ̄na buɛ̄ doo, lo esu wa aā yɛɛ ziī eku pya nɛɛ a le nɛ ye bee.” Bee mɛɛ̄ na Jems aa bee kɔ ue kumaloo a? Sɔ̄ Jems aa kɔ ue nɛɛ mɔmanudɛɛ̄ Amos bee kɔ, a bee kɔ: “Lokwa pya nɛɛ a siga egbī Nɛɛ-a-i-ɛrɛ, le dɛ̄dɛɛ̄ pya dɔɔ̄na buɛ̄ pya alu ekue loo na bee,” kɛ̄ Jɛhova kɔ doolo. (Doonu Pya Nɛɛ Lɛɛratam 15:​14-18) Naale aba kɔ pya aā nɛɛ a nyɔɔnɛ dumɛ Jizɔs ama enɔ nu akiiloo Jɛhova, mɛ elunage ‘esu bee Jɛhova wa kue loo.’ Lo ama kura kɔ ba edoo kɔ pya dɔ̄ɔna a suā bee Bari, e pya nɛɛ esuānage wa loo doodoo pya a tɔɔ̄dɔ lo bee.

6-7. (a) Ena anua Jizɔs bee lu a kɛ̄nɛkɛ̄ a? (b) Dɔɔ̄na e a kuī na anua Jizɔs bee lunage a kɛ̄nɛkɛ̄ a?

⁶ Taɛ nu bee Jizɔs kura na “Jɛhova Na Kpɔā A,” e tɛ̄maloo Jizɔs na Jɛhova bee kpɔā dɛ̄dɛɛ̄ pya a ɛrɛ yira bu alɛ le ye Nwiīnɛɛdam a. Jizɔs bee lu a kɛ̄nɛkɛ̄ lo e’u bee miɔŋɔ nɛɛ. (Mat 20:28) Tɛ̄maloo ekpɛ lo waara zɔɔ a’agara, a bee doo kɔ a waɛ kɔ alu e’aaloo pɔrɔ miɔŋɔ nɛɛ wa nɛ, sa ɛrɛ dum anaatah.—Jɔn 3:16.

⁷ Mɛ ena anua waara zɔɔ a’agara lu ebɛɛ̄ loo miɔŋɔ nɛɛ a? Ɛɛ nyɔɔbee nu a bee sira bu gɔh Idɛn. Dookɛ̄ i bee kɔ doo bu ekobee ue i aa a, i tua tɛ le ka, lo a le Adam le Iv bee lɛɛbeekɛɛ̄ Jɛhova sa peere dee ba bee ɛrɛ lo etɔɔ̄ dum mmɛ deedee. (Jɛn 3:​6, 24) Kerewo, a ɛrɛ nu a bee lu ebɛɛ̄ lo a kuī ee kpɔā pya miɔŋɔ Adam le Iv. Ɛɛ na ue Setan bee dɛrɛ Jɛhova. (Jɛn 3:​4, 5) Nyɔɔwo, a bee lu ebɛɛ̄ kɔ pya miɔŋɔ nɛɛ a suā kɔ Jɛhova naa bee doo lɔgɔ piya nu le kɔ ye bee le kaɛ. Aba Jizɔs na a nyim tura lo etɔgɛ kɔ Jɛhova naa bee doo lɔgɔ piya nu le kɔ ye bee le kaɛ a, nyɔnɛbee a bee tɔɔ̄dɔ Jɛhova sa doo dɛ̄dɛɛ̄ nu Jɛhova bee kɔ a doo bu sīdee a mmana.

8. Ena a bɔloo kɔ dɛ̄dɛɛ̄ pya e’ɛrɛ yira bu Jizɔs a suā a?

⁸ Elu ebɛɛ̄ kɔ dɛ̄dɛɛ̄ pya e’ɛrɛ yira bu Jizɔs aāloo pya Juu mmɛloo pya a naa lu Juu a suā kɛ̄ wa kpɔā etɛɛ̄ aa, lo a le Jɛhova Bari, alu Tɛ Jizɔs. (Jɔn 17:3) Gbaāloo wo, elunage esu bee Jɛhova wa kueloo dookɛ̄ Jizɔs bee yiganage lo bee doo. E elunage ebɛɛ̄ kɔ ba a suā kɛ̄ sere lo bee kaɛ kuī doo. Ba ɛrɛ edoo dɛ̄dɛɛ̄ nu ama lokwa ba ɛrɛ kpɔā. (Doonu Pya Nɛɛ Lɛɛratam 2:​21, 22) Nyɔɔwo, alu nu a kuī kɔ dɛ̄dɛɛ̄ pya a gbī enyɔɔnɛ dumɛ Jizɔs a nɔ nu akiiloo Jɛhova le Jizɔs. Kɛ̄adoo a lo Jizɔs bee mmɛ kumaloo ye kara tɛ̄maloo pya ue a le bu Jɔn 17 ekobee, lo a kɔ: “M edoora kɔ ba a suā o bee, e m gaa le doo kɔ ba a suā, lokwa wereloo lo o bee mɛ were etɔɔ̄ wa bu, e mda bu wa.”—Jɔn 17:26.

“BƆƆLO NA PYA MDAA EKEEBEE A”

9. Bu mɛ sīdee na i dap tɔgɛ kɔ bee Jɛhova kuī i loo a?

⁹ Lu ebɛɛ̄ kɔ dɛ̄dɛɛ̄ pya a gaa nyɔɔnɛ dumɛ Jizɔs bu kaka sīdee a ɛrɛ taɛ bu sere bee Jɛhova kaɛ. (Mat 6:​9, 10) Ba ɛrɛ e’ɛp bee Jɛhova nua bee a kuī ee dɛ̄dɛɛ̄ dɔɔ̄na bee. E ba ɛrɛ etɔgɛ tɛ̄maloo wa dogo. Mɛ, bu mɛ sīdee na i dap ɛrɛ bah bu sere bee Jɛhova kaɛ ale tɔgɛ kɔ dɛ̄dɛɛ̄ ue Setan bee ye dɛrɛ lu esah a?

10. Amunu ue na a bee lu eyere ziī tɔbiaɛ a tɔɔ̄dɔ nu lo alu ebaatɛ̄ bu kpa Aisaia 42 mmɛ 44 ekobee a? (Aisaia 43:9; 44:​7-9) (Ɛpnage foto.)

¹⁰ Kpa Aisaia 42 mmɛ 44 ekobee kɔ kɛ̄ ɛrɛgebah nu ili doo lo esere bee Jɛhova kaɛ kuī doo. 42 mmɛ 44 ekobee loo kpa Aisaia ama baatɛ̄ ue a bee lu eyere ziī tɔbiaɛ a tɔɔ̄dɔ nu, lo akiiloo nɛɛ alu kaka Bari. Jɛhova bee kɔ nɛ dɛ̄dɛɛ̄ pya nwībari ba kɔ ba lue bari kɔ ba a kɔ ale doo nu a tɔgɛ kɔ ba lu bari. E dookɛ̄ a wee sira doo bie kasī tɔbiaɛ, Jɛhova bee bip pya lo nwībari lo a le ba ɛrɛ pya eyira wa ekeebee loo kɔ ba lu bari. Mɛ ba naa bee ɛrɛ kunɛ ziī nɛɛ ekeebee!—Buū Aisaia 43:9; 44:​7-9.

11. Ena Jɛhova kɔ nɛ pya ye nɛɛ bu kpa Aisaia 43:​10-13 a?

¹¹ Buū Aisaia 43:​10-13. Jɛhova bee kɔ nɛ pya ye nɛɛ kɔ: “Bɔɔlo na pya mdaa ekeebee a. . . . Mda na Bari a.” A ɛrɛ ebip Jɛhova gaa bip dɛ̄dɛɛ̄ ii kɔ i agara. Lo ebip na: “Ziī dɔɔ̄na Bari lege lo a naale mda ni?” (Ais 44:8) Ili ɛrɛ dee a i kpaānɛ lo e’agara ebip ama. I dap tɔgɛ kɔ a naa ɛrɛ lɔgɔ Bari a kuī ee Jɛhova tɛ̄maloo i dogo le pya ue i kɔ. Ye bee eenyɔɔ dɛ̄dɛɛ̄ dɔɔ̄na bee. E tɛ̄maloo kɛ̄ i tɔɔ̄dum doo, i dap tɔgɛ kɔ i wereeloo Jɛhova kaāna sa ye yira agɛrɛ nɛ kaɛlɛɛ ɛrɛgebah e’aga kɛ̄tɔɔ̄ Setan i su nua nyɔɔ. Bu lo sīdee na i ɛrɛ dee lo esere bee Jɛhova kaɛ a.

12. Bu mɛ sīdee na mɔmanudɛɛ̄ a le bu kpa Aisaia 40:​3, 5 bee dooa gbɔ̄mɛɛ̄ a?

¹² I gaa nɔ Jizɔs Kraist sɔ̄ i kɔ ue lɛɛ bee Jɛhova sa doo kɔ pya nɛɛ a sūa kɔ dɛ̄dɛɛ̄ nu a doo lera. Aisaia bee kɔ serekɛ̄ kɔ, a ɛrɛ nɛɛ ‘ekwa’ “dee Jɛhova leere.” (Ais 40:3) Lo ama bee dooa gbɔ̄mɛɛ̄ doodoo wa? Jɔn Nɛɛ Limaā Nɛɛ bee kwa dee sɛɛ Jizɔs. Kerewo, a bee le “dee Jɛhova” na a bee kwa a, nyɔnɛbee Jizɔs bee lu bu bee Jɛhova sa bee kɔ ue lɛɛ bee Jɛhova. (Mat 3:3; Maak 1:​2-4; Luk 3:​3-6) Aba lo mɔmanudɛɛ̄ bee kɔnage kɔ: “Nyɛŋia loo Jɛhova gaa le lu emuuna.” (Ais 40:5) Lo ama bee sira doodoo wa? Sɔ̄ Jizɔs bee lu a kɛ̄nɛkɛ̄, a bee yira dɔ Jɛhova bu sīdee a mmana mmɛ kɛ̄ a bee le doodoo bee Jɛhova na a bee lu a kɛ̄nɛkɛ̄ a.—Jɔn 12:45.

13. Bu mɛ sīdee na i dap nɔ Jizɔs a?

¹³ Ili lunage pya a gaa yira ekeebee loo Jɛhova dookɛ̄ Jizɔs bee doo. I yiga bee Jɛhova sa kɔ pya ye nyɛŋiatam nɛ dɛ̄dɛɛ̄ nɛɛ i zɔ̄ŋia. Mɛ, lokwa i dap lu kaāna nɛɛ a gaa yira ekeebee loo Jɛhova, i ɛrɛ edoo kɔ pya nɛɛ a suā dɛ̄dɛɛ̄ nu Jizɔs bee doo lo esere bee ye Tɛ kaɛ. (Doonu Pya Nɛɛ lɛɛratam 1:8) Jizɔs na Nɛɛ A Yira Ekeebee loo Jɛhova ee dɛ̄dɛɛ̄ nɛɛ a, e ili gaa nɔ ye edobah. (Mum 1:5) Kerewo, ena a bɔloo kɔ bee Jɛhova a kura nɛ ziī ziī ili a?

NU BEE JƐHOVA KURA NƐ ILI

14. Dookɛ̄ a le bu Le-yɔɔ 105:3 doo, bee Jɛhova tɔɔ̄ i loo doodoo wa?

¹⁴ I ɛp nua nuka lo eyiga bee Jɛhova. (Buū Le-yɔɔ 105:3.) A ɛɛrɛbu Jɛhova sɔ̄ i kaaga bu ye bee. (Jer 9:​23, 24; 1 Kɔr 1:31; 2 Kɔr 10:17) Nu “kaaga bu [Jɛhova]” kura na lo e’ɛp nua nuka kɔ Jɛhova na ilii Bari a. I ɛp nua dee a i kpaānɛ lo enɛ ka ye bee sa kɔ nɛ pya nɛɛ kɔ dɛ̄dɛɛ̄ nu a doo lera. A naa bɔloo kɔ kɛɛ a bɔp i doo pippip lo ekɔ nɛ pya nɛɛ le ii gaa gbaa siniātam, pya le ii le tɔkpa, pya le ii le aba kɛ̄, le pya dɔɔ̄na kɔ ili lu ziī yɛɛ Pya Ekeebee Jɛhova! Pɔrɔ-edɔɔ̄ gbī kɔ i ɔbɛ ekɔ nu akiiloo bee Jɛhova nɛ pya dɔɔ̄na. (Jer 11:21; Mum 12:17) Bu kaka, Setan le pya a ye le loo sa gaa kɔ esah loo Jɛhova gbī kɔ pya nɛɛ a ibere bee Jɛhova. (Jer 23:​26, 27) Kerewo, wereloo i ɛrɛ loo bee Jɛhova doo kɔ i kiisī lo e’ɛɛŋa bu ye bee ‘dɛ̄dɛɛ̄ biradee.’—Yɔɔ 5:11; 89:16.

15. Ena kue bee Jɛhova kura a?

¹⁵ I kiisī lo ekue bee Jɛhova. (Joel 2:32; Rom 10:​13, 14) Nu kue bee Jɛhova kura naale aba susuā lo bee sa su lo bee daānu. Mɛ a kuranage kɔ i suāloo Bari doodoo Nɛɛ a le, ye dɛrɛ nyiɛ nyɔɔ, sa ye bara kɔ a yerebah i nɛ sa i baɛloo. (Yɔɔ 20:7; 99:6; 116:4; 145:18) Dɔɔ̄na nu a lenage bu kue bee Jɛhova na dodoo kɔ pya dɔɔ̄na a suā ye bee le pya lele elap dogo a ɛrɛ. E i yerenage bah wa nɛ kɔ ba a nyaana wa sīdee tɔɔ̄dum lokwa ba dap doo nu a ye nia sa ɛrɛ kpɔā.—Ais 12:4; Doonu Pya Nɛɛ Lɛɛratam 2:​21, 38.

16. Bu mɛ sīdee na i dap tɔgɛ kɔ Setan lu nɛɛ kɔ esah a?

¹⁶ I kpɛ̄naloo etɔga nyɔɔ bee Jɛhova. (Jem 5:​10, 11) Lo i tɔɔ̄ agara nɛ Jɛhova sɔ̄ i le bu taāŋa, i gaa tɔgɛ kɔ Setan lu nɛɛ kɔ esah. Bu dee Job, Setan bee dɛrɛ ue dɛ̄dɛɛ̄ pya a taāŋabah Jɛhova kɔ: “Dɛ̄dɛɛ̄ nu nɛɛ ɛrɛ a gaa le nɛ nyɔɔ ye dum.” (Job 2:4) Setan bee kɔ pya nɛɛ etaāŋabah Jɛhova aba sɔ̄ nu gaa wa kiā leere loo, mɛ lo ba kpesī e’aga kɛ̄tɔɔ̄, ba e’ɔbɛ etaāŋa ye bah. Job bee tɔɔ̄ agara sa tɔgɛ kɔ lo ue lu esah. Ili ɛrɛnage dee lo etɔgɛ kɔ kaɛlɛɛ ɛrɛgebah taāŋa Setan i su nua nyɔɔ, ii le e’ɔbɛ etaāŋabah Jɛhova doo pippip. I dɛrɛ nyiɛ nyɔɔ Jɛhova kaāna kɔ a gaa le kiisī lo ekuū i dɛɛ̄loo nyɔɔ ye bee.—Jɔn 17:11.

17. Dɛɛa nyɔɔ ue a le bu 1 Pita 2:​12, bu dɔɔ̄na amunu sīdee na i dap su ka nua loo bee Jɛhova a?

¹⁷ I wee nwadɛɛ̄ bee Jɛhova. (Kam 30:9; Jer 7:​8-11) Nyɔɔbee i lu pya nɛɛ a tɔɔ̄dɔ Jɛhova sa yiga ye bee a, nu i doo dap yere ka loo ye bee ale su kɛɛ nua nyɔɔ ye bee. (Buū 1 Pita 2:12.) Nyɔɔwo, i gbī edoo ɛrɛgebah nu i dap doo lo eleera Jɛhova tɛ̄maloo pya ue i kɔ le i elap dogo. Sɔ̄ i doo wo, a su ka nua loo bee Jɛhova kereadoo i lu pya ii mmana.

18. Dɔɔ̄na amunu sīdee na i dap tɔgɛ kɔ bee Jɛhova kuī i loo a? (Ɛpnage ue a le kɛɛ̄.)

¹⁸ Bee Jɛhova kuī i loo ee kunɛ nu pya nɛɛ i kɔ kumaloo. (Yɔɔ 138:2) Ena a tɔgɛ kɔ bee Jɛhova kuī i loo doo wo a? Nyɔnɛbee gbɛnɛ-edo sɔ̄ i doo nu a nia Jɛhova, a naa wee nia pya nɛɛ, e ba wee i kɔ pɔrɔ pɔrɔ ue kumaloo.a Jizɔs bee kpɛ̄naloo e’u doodoo nɛɛ biu sa suaa kɛɛ lokwa alu enɛ ka bee Jɛhova. A bee ‘ɛp bɔp kɛɛ tɛrɛ’ bu sīdee kɔ a naa bee iye kɔ nu pya dɔɔ̄na ye kɔ kumaloo a nɛ ye taāŋa. (Hib 12:​2-4) Taāwo, a bee sere ekɛɛrɛ nyɔɔ doo nu alu nia Bari.—Mat 26:39.

19. Bee Jɛhova tɔɔ̄loo olo doodoo wa, e ena anua a?

¹⁹ I ɛp nua nuka lo etaāŋabah Jɛhova, e i kaaga lo eyiga ye bee doodoo Pya Ekeebee Jɛhova. Nyɔnɛbee bee Jɛhova kuī i loo a, a doo kɔ i kiisī lo eleera ye kereadoo pya dɔɔ̄na ɛp i kumakɛ̄. Bee Jɛhova kuī i loo ee kunɛ nu pya nɛɛ i kɔ kumaloo. Nyɔɔwo, dooraa i biaɛfii lo ekiisī lo enɛ ka bee Jɛhova kaɛlɛɛ ɛrɛgebah taāŋa Setan i su nua nyɔɔ. Lo i doo wo, i gaa tɔgɛ kɔ bee Jɛhova kuī i loo ee ɛrɛgebah nu dookɛ̄ a bee kuīnage loo Jizɔs Kraist doo.